مساء الخير ع اجمل متابعين اتمنى لكم قراءه ممتعه
🌹🦋 البارت 39 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
جان يكول حيدر نريد ناخذ منتظر ويانه
لان هناك راح نطهره
وراح نسوي غده نعزم اقاربنه واصدقائنه المقربين
اني كامت دموعي تجري انهار
يعني شلون مااشوف ابني ولا افرح بي
كال عمو شبيج بابا ليش تبجين
عمو اني مجهزه كلشي واريد ابني هنا يطهر
اريد اسويله مولود وافرح بي
جهزت التوزيعات واشتريت كلشي
وحتى بابا اشتره الخروف
هم ناوين نسوي غده هنا
حجه حيدر
ليش مخبرتيني حسيت بعيونه جمر من العصبيه
اني ابو من حقي اعرف كلشي
ردت اكله مو منطيني حضر
وبعدين كلت عيب من اهلي واهله
سكتت
ليش سكتي ماتحجين
اني غير ابو والي حق اعرف
اي صحيح بس اتوقعتك ماعندك مانع هنا اسوي
شلون ماعندي مانع
يعني وين تصير تقبليها اعزم جماعتي واقربائي هنا ابيتكم
اي عادي وين المشكله
احنه راح نسوي غده للكل
التفت ع بابا
ها عمي تقبلها انت
شلون اطاوعها بهيج شي
ابني عادي خلي احنه نسوي غده وثاني يوم انتم سوي
اول يوم يحتاج امه ميصير تاخذه هناك
ومترهم زينب تروح يمكم
بس اذا هنا عادي البيت بيتكم واحنه خطار
تكدرون تبقون هنا وانت تكون قريب ع ابنك
وتكدرون تعزمون اي شخص ابالكم
كال عمو
عين الصواب هاي هي
يبقه هنا وثاني يوم اذا يريد ابو ياخذه عادي
اني مسحت دموعي
فرحت لان راح يبقه يمي
كال حيدر مااقبل الغده عليكم لازم اني اتكلف كلشي
والخروف اني اجيبه
ابني ماكو فرق بيناتنه والله شاهد
اني مشتري الخروف ومخلي يم الكصاب
عيب ارجعه
لعد انطيك الفلوس وتاخذهن
وباقي المسواك اني اتكلفه
غير هذا الشي مااقبل
يابه هاي هي مثل متريد
بس اني هم زعلت عليك
لان حسبتني غريب
اني هم جده والي حق اصرف علي
هو شكم نظوري عدنه
الله شاهد قطعه من كلبنه نظوري
من سمعه هيج سكت
كال هاي هي سوي الي يريحكم
كلت لخاله المولود راح اسوي وره باجر
انت تعالي باتي يمنه
ساره وبنين خابرتهن وراح يجن باجر
انت تكدرين تعزمين اي شخص تردين
المدرسات الوياج اقربائكم
بكيفج
كالت خوش لعد راح اعزم
كتلها حنان هم كليلها عيب منها
اني عفتهم وطلعت
وره شويه راحوا
بلشت بالكيك
سويت وحده عجينة سكر مثل 👇
وسويت وحده بالكريمه مثل 👇
كالت ماما مايكفن خاف تجي ناس هواي
وسويت وحده جبيره خليت صورته الشخصيه بيها
خليت صورته الي بالقاط الجويتي
طبعنه شكم صوره سوينه كب كيك للاطفال مثل 👇
طبعا هالمره ابدعنه لان سويه اني واخواتي وماما
سوينه قطع احتياط خاف ميكفن
وكالت ماما اذا بقن نخليهن للناس الي تجينه
عزمنه عماتي وعمامي كلهم
واكو صديق لبابا من زمان قبل ليتزوج يعرفه
وطلع ويا بنفس الدائره
هم عزم زوجته وبناته
الصراحه منعرف شكد تجي ناس
بس جهزنه كميه جبيره
جبنه اشكال واللوان
انواع الجكليت وانواع الحلقوم وانواع الشكولاته وكرزات
وهواي اشياء
دزيت رساله لحنان عزمتها هي واهلها كلت عيب
وطلبت من زهراء تكول لاهلها
وطلبت منهن يباتن يمي هي والبنات
واتصلت بام رسل واخواتها
فاطمه كلتلي اني بدون عزيمه اجي اني وحمواتي
افرح والله كتلها احسبي حسابج تباتين يمي
خل اشوف حبيبي اذا قبل ابات
اجوي بالليل البنات وخاله وحيدر
جايبين وياهم اشكال واللوان للصينيه
كتلهم والله مجهزه كلشي من زمان
مو مهم لان راح يجون ناس هواي ونريد ترفعين راسنه
من عيوني الاثنين
شويه وراحن
اخذت اجازه يومين
صار الصبح وجنت نشطه حيل
الكل راح للدوام انطيت السياره لرنا
بقينه اني وماما
رتبنه الاستقبال وجهزنه الميز
جابنه بابا بالونات
وزينه
رتبنه كلشي وطلعت تخبل التجهيزات
خلينه الببسي والعصائر بالبراد
عدنه بالمطبخ براد مخليه الكيك والببسي بي
كلتلي ماما بيش الساعه نروح للصالون
ماكو داعي للصالون مااحب المكياج
اني هنا ارتب نفسي
طبعا اشتريت الي عن طريق النت مثل 👇
واخذت لنور مثل 👇
كالت ماما نروح للصالون احسن
هم نظفي وجهج يفشل وهم سوي تسريحه
ونكلها مكياج خفيف
اني حاجزه منتاخر
كتلها اوك
اتغدينه وخلصنه اجن رقيه وتبارك
وصيتهن ع نظوري وكتلهن ب 2 ونص يمر علي ابو ياخذه يزينه
هو كل لبابا
رحنه وبلشت بيه وطلعتني جمال
مكياج خفيف ونازك وتسريحه بسيطه
بس الصراحه طلعت اخبش فديتني 🙈🙈🙈😜
رجعنه لكينه قسم جايين
مشتاقه لهيج اجواء وكلت اله اعلكها لان طهور حبيبي فديته
اني الصراحه محاضره ولا حفله
هاي اول مره
حتى بالعقد مالت رنا محضرت
اجني بنين وفاطمه وساره
وحيل افرحت بيهن
بعدها اجتي خاله وحنان واخواتها وامها
وبعدهن اجني زهراء واختها وزوجة اخوها
امي رسل واختها وزوجة اخوها هم اجني
عماتي اجني وبناتهن وزوجات اولادهن
وزوجات عمامي همين وحتى الجناين
الكل يباوع عليه وصافنين
اول مره اعرف اني حلوه ☺️☺️
شغلنه الديجي والبنات يردن حجه تعرفون بهذا الشي
بس حبيبي لهسه مجاي
كلت لفاطمه خابري حيدر شوفي وين صار
كالت جاي بالطريق
وره شويه وجابو
انصدمت بي من لابس الدشداشه جمال طالع
مسويله تسريحه تخبل
الكل صلى ع النبي من شافوا
الكل يركص وفرحان
اجتي الملايه وبلشت بالمولود
طلع يخبل المولود
اني رفضت اركص
بس جلبن بيه ساره وفاطمه
المله حلفت بالعباس محد اطك صور ابد
لان بيها اعراض الناس
كالت بس ام الولد الها حق اطك لابنها وبس
فعلا طكيت اله هواي
الجهاز بيدي
اجاني اشعار
فتحته وجان انصدم
من حيدر وبي صورتي
دزلي الج مهله 5 دقايق اذا مارحتي بدلتي
عشيرتج احركها واحد واحد
شنو هذا الثوب اللابسته طويل مو حلو عليج
ماعندج اكصر اطلعين احلى
منو دزلك الصوره
ماعليج لتلغثين زايد
روحي بدلي لا والخلقج اندمج
هسه اجيج واجرج من شعرج كدام الكل
الصراحه خفت منه
بينت اني مخايفه
انت ماالك حق تحاسبني
لتنسه نفسك
اللهم طولج ياروح
الج مهله 10 دقايق اذا مابدلتي اني اعرف شغلي وياج
بده العد بس وامامج اخليج تتندمين اذا مبدلتي ولبستي حجابج
رحت لفوك حيل مقهوره
من جها منو الي صورتني ودزته اله
وخلينه العباس ع الي تصور
ومن جها ثانيه شلون راح ابدل وشاكول
فتحت الكنتور طلعت فستان مستور
هم الخوف اكلني يجوز وحده تسويها وتصورني وتنشرني
كلشي يصير
لبست مثل 👇
بس هم خايفه
بس لا هم يصورن
رحت والكل اتفاجئ بيه
سالني ليش بدلتي
كتلهن مو زلم اجوي وكل شويه اطلع يمهم خاف يحتاجون شي
طبعا كعدت وسكتت حتى بعد مااركص ابد
بدينه نوزع وكصصنه الكيك
بس عايشه برعب وخوف
وره شويه اجاني اشعار
رحت للمطبخ فتحته
لكيت صورتي بهذا لبسي
شصار لو من البدايه محترمه نفسج ولابسه هيج
مو احسن الج
هذه منو الناقصة غيره ادزلك صوري
احترمي نفسج مناقصة غيره هاي الي ادزلي
هاي اشرف منج
😲😲😡😡😠😠😠
مااسمحلك هيج تحجي ويايه افتهمت
ويله بعد لتدخل بيه
اسمعي لج
قسما بالله العظيم وهذا يمين عليه
باجر بالغده اذا لمحت طولج بلبس مو مستور
لو شفتج يم ولد عمج
الى اذبحج ع القبله واندمج
وهذا وعد مني الج
بصفتك شنو وتحجي هيج
بصفتي زوجج امام القانون
غصبا ماعليج تحترمين رايي لمن نطلك
عود روحي لعبي جوله
عيب عليك هذا الحجي
شنو العب جوله
هيج شايفني ساقطه بعينك
هاي الفاض الشباب وبنات الليل عوفيهن
افتهمتي لو لا
يله ولي مفارغلج اني
بقيت صافنه علي
الكل لاحضني شلون تغيرت
الله كاتبلي ماافرح ابد حتى بهيج يوم
خلصت الحفله والاغلبيه راحوا
البنات قررن يباتن يمي وحتى زهراء وخاله
حيل فرحت
حيدر: دخلنه بشعبان
وبدت الولادات
اجه ابو زينب وجايب ويا حلويات وكرزات اشكال واللوان
صرنه عرك عليهن
صدفه هنا فاطمه وبنين
بس هواي الكيك الدازته
مريت مرتين للخياط وبعده ممكمل
كتله مو تنكتها بيه الطهر مالته بالشعبانيه
كال قبل 3 ايام تلكيهن جاهزات اثنينهن
قررنه نسوي غده نعزم بي اقربائنه ونسابتنه
مااجه ابالي مولود وهاي السوالف لان مااعرف
كال ابويه خل نروح ونتفق وي الجماعه
رحنه بس فتحنه الموضوع
اشو هاي كامت تبجي
ع شنو مااعرف
بعدين طلعت مجهزه كلشي وتريد تسوي مولود
وحتى للغده متسوكين
اني الصراحه ضجت لان مخبرتني ابد
وميصير هي الي تسوي
لازم احنه الي نسوي الغده
بعدين من سمعت حجيهم وشفتها تبجي
كلت هاي هي بس ع اعصابي
دزت رساله لحنان عزمتها
وهاي مصدكت راحت لاهلها وكالت مناك واروح للصالون ونروحلهم
لج شعندج وصالون
عرس قابل
ميهم اهم شي حفله ولازم الكل يتعجب بيه
رحت لنظوري ب 2 ونص اخذته للحلاق رتبت شعره
ورجعته للبيت سبحته وبدلتله
ورجعته للحلاق سوه شعره تسريحه
وثبته اله
اخذته لمصور طكينه اني ويا
فديته حبيبي يخبش
حتى اني طلعت بالدشداشه فد شي غير اني مااحجي 😂😂😜😜
حيل اتاخرت عليهم وخابرتني اختي
رحت للبيت وانطيتهميا وطلعت
اتواعدت وي جماعتي
قبل لااروح رجعت للبيت
كلت ابدل ادري بيهم يزفوني زف لان بالدشداشه
احنه متعودين الي يلبس دشداشه نزفه زفه تخبل
اجاني اشعار فتحته
جان من نور
دازه صورتها وصورة زينب
بابا شلوني طالعه حلوه لو لا
هاي شطالعه
خلتني اشتعل شعل
طالعه فد شي تخبل
اول مره تخلي مكياج هيج
وشعرها يخبل
بس اني وجيت وانطفيت
يعني اليوم كلها شافتها هيج
والكل راح يحجي بيها
اكيد الي تكول لزوجها والي لاخوها والي لابوها
تخبلت
دزيتلها اذا منزعتي لثوبج اندمج
كلت يمين عليه
اخذ ابني منها واخلي يمي وهنا اطهره
واعلمها بعناده
وهي تجاوب بكل برود
اني اعلمج
دزيت لنور
لج بابا شطالعه تخبلين
كتلها تكدرين تخابريني خل احجي وياج
خابرتني
كتلها تكدرين اطكين صوره لماما زينب
بس بدون مااحد يحس بيج
ليش
محد يقبل وميصير
ولتكوليلها ابد بابا كلي
وره شويه دزتلي صوره الها
حيل افرحت من ماعاندت
وطالعه تخبل احسن بهواي من الثوب الاحمر
عابتله لثوبها اصلا مو حلو 😂😂😜
اتصلو بيه جماعتي
رحت مستعجل بس نسيت ابدل
هاي ثولتني بثوبها الاحمر خلتني مااشوف دربي والله 😂😂😂🤣🤣
حيل انصدموا بيه من شافوني بالدشداشه
لك شنو هاي اليوم شطالع
اكلكم مالي خلكم تقلدون
ردت ابدل بس نسيت
يابه وشنو الي يخليك تنسى هيج سالفه مهمه
هيج شغله مستعجله
تعال سولفنه شعجب مفصل دشداشه منك من الشيطان
اني عاجبني البس وي ابني
لان فصلتله وباجر طهوره
زين ابنك يلبس دشداشه بيضه لان يطهرونه
انت ليش هم وي ابنك
ولكم ساقطين اسكتو لا اعوفكم واروح
لا يابه شتعوفنه اليوم العشه نكربسه براسك
بمناسبة طهورك 😂😂😂🤣🤣🤣
ايا سرسريه اني اعلمكم ع هاي السالفه
اله اعشيكم فلافل
اخاف تزعل والله غير المشاوي منقبل
عفتهم واريد اروح
جروني لك وين تنهزم
كبل للمطعم
امري لا الله اذا اني مصادقلي ناس جوعيه متعرفوني اله وقت المطعم
كاموا يركضون ورايه
اني مااكدر اركض من وره الدشداشه
لزموني باللحضه وخنكوني
بيومها حيل اتونست
كلولي بالليل هم نسهر ونشرب
لا اعذروني مااكدر
لازم انام من وكت ع مود اكعد من وكت
اتعشينه وخلصنه ورحنه شربنه اركيله
جنت حيل فرحان بيومها
مااعرف السبب بالضبط
بالليل خابرت نور
لكيتهن عالكاتها
شنو هالصوت
كالت عماتي وخالاتي مشغلات اغاني ويركصن
ايا بنات اللذين اني اعلمجن هسه
لج وماما زينب هم وياهن
اي وياهن تركص
لج طكيلي صوره لامج والله اذا طكيتيلي
اخليج تبقين يمها
كول والله
اي والله
دزتلي صورتها لابسه تراك مثل هذا 👇
هاي زينب خطير اللون الاحمر وي بشرتها
انعل عشيرتها ع هذا اللبس
دزيتلها هلووو
تقره ومتجاوب
شلونج يحلوه
هم ماكو جواب
دزيتلها الاحمر فد شي عليج
طالعه تخبشين
بس اني اغار حتى من اخواتي من يشوفنج هيج لابسه
دزتلي 😲😲😤😤😤
اعصابج عيني مو زين عليج
متتوالم العصبيه والركص
اني اكول شبيج ذاك اليوم بس تبجين ومتقبلين اجيبه هنا واسويله غده
اثاري كاتله نفسج ع الركص واللبس والمكياج
لهنا وكافي الزم حدودك حيدر
لتخليني اطلع من طوري
ههههه شلون يعني اطلعين من طورج
راح انطيك حضر واخلص منك
شحدج لج انت تموتين بدوني
😲😲😲😲 اكيد تخبلت
اتحداج تستغنين عني وتنطيني حظر
اني ارهم بدونج وانطيج حضر عادي
بس انت نوووو مستحيل ترهمين
هاي شكد مغرور انت
لعد راح انطيك بلوك وخلي غرورك يفيدك
عبالي تشاقه طلعت صدك حاضرتني
اني اعلمج زنوبه
خل اشوف عنادج لوين يوصلج
اتصلت بنور كتلها انطيني ماما اريد احاجيها
راحت كلتها ماما هذا بابا يريدج
اخذته وطبكته
دكيت مره ثانيه انطته رفض
خابرت فاطمه كتلها انطي الجهاز لزينب
راح ادز رساله خل تقراها
واذا ماقرتها كليلها يجي يشعل عشيرتج كلها
دزيتلها اسمعيني لج
والقران اذا فكرتي يوم من الايام تتصلين بيه لو ادزيلي رساله
اله العب بيج طوبه
وخل يفيدج الحضر
كمت افور دم
اني حبيت اتشاقه وياها
بس هي الظاهر اخذتها بجديه
خابرت حنان
هاي وين لهسه
راح ابات يم اهلي
وليش ماحجيتي لمن اني اخابر
لاوالله دزيتلك هواي رسائل
روح وشوفهن
صدك طلعت مراسلتني وماادري
نمت ووقتت المنبه وي الصلاه
كعدت ورحنه اني وامير وابويه
متفقين وي مضمد ب5 يجي للبيت
وصلنه قبل ربع ساعه
اني اليوم مجاز
كعدوا وكام يبجي نعسان
غسلتله وطلعته بالباب شويه
سكت وره دقايق اجه الرجال
طهرنا وخلصنه بس شنو مات حبيبي خطيه
حيل ضجنه علي
راح الرجال
وطبت امي وهلهلت وطشت الجكليت
وراها اجتي ام زينب هم طشت الجكليت
بس زينب ماكو
وره شويه دخلت وجانت لابسه صايه
عيونها مورمه وتبجي
سلمت وراحت شبكته لنظوري
هو هم يبجي ماما اوا
ياحبيبي هسه تصير زين
فارشين اله بالاستقبال
حاولت تنيمه بس يبجي ميقبل
كامن كلهن يجهزن بالغده
امير كال راح ارجع للبيت والظهر اجي
راح
كتله لنظوري حبيبي تعال اني وياك انام سويه
اجه يمي خطيه كلبه طك من البواجي
هدئ شويه وره لحضات نام
لازم ايد امه
كتلها عوفي واختفي من الوجود
قسما بالله اذا لمحتج يم ولد اله نهايتج ع ايدي
عوجت حلكها 😏😏😏 وهزت ايدها وطلعت
بقينه اني وابويه وعمي ابو زينب
لحضات وكالوا اجه الكصاب
طلعت وياهم ذبحوا وكملوا
كلت لعمي خل يسون طريق حتى ندخله اللحم
جنت لابس الدشداشه
اخاف تنعدم دم
اتذكرت التراك الي بالسياره
هذا ماانزله من السياره ابد بس اذا وسخ ينغسل وارجعه
اخاف اتضايق من البنطرون ابدل
لبسته ودخلت اللحم
وبديت اغسل بي
وخليته بكدر جبير
خليته ع النار
وطلعت
وصيت امي اذا احتاجيتوني دزوا عليه
لبست الدشداشه ورجعت التراك
بدت الناس تجي
عمام زينب وولد عمها
واكو قسم مااعرفهم
مو هواي ناس
صبوا الغده وجان تمن وباميا وتشريب لحم
وفواكه وخضره ولبن
حسيت بنفسي غريب ابينهم
بس مابيدي شي
ولد عمها المزعج وهذا الدكتور خطيب رنا
همه الي يجيبون الاكل
كملوا وادوا الواجب وراحوا
بقه مصطفى الدكتور ولد حباب وخلوق
وهذا المزعج هم بقه ابد ماارتاحيتله من اول مره شفته بيها
كام يبجي نظوري راد امه
كلت لنور صيحي ماما خل تجي
اشو هذا طفر
لا وين تجي لتنسه نفسك انت هسه غريب عنها وميصير تشوفك
لك بابا زينب بعدهي زوجتي بالقانون
واكدر هسه اخذها كدامك اذا تريد
فياريت تسكت احسن
عود شيسموها هاي مخليها لحد الان ممطلكها
طلكها يابه خل البنيه تشوف مستقبلها
والحياة طويله كدامها
اللهم طولج ياروح
حبيبي البنيه شاكيتلك
حاجيه وياك
اي دائما اروحلها للجامعه واحجي وياها
واريد اخطبها
بس تكلي خل يطلكني يله نرتبط
كمت افور دم يجوز صدك لان شفته بالكليه وياها
عود خلي تجي وتطلب الطلاك بلسانها
ذاك الوقت اطلك
ادخل مصطفى
اكلك علي ليش انت تلح
يجوز يرجعون لبعضهم
لتنسى اكو طفل يجمعهم
حتى اذا اكو طفل
همه اصلا ممتفاهمين من البدايه
لو متفاهمين جان مطلكو
علي كوم روح لبيتك وبعدين نتفاهم
طبعا لو يطيح بيدي جان خليت طلقه براسه
الحقيقه مااعرف منطيته مجال زينب لو بوحده هيج يحجي
مصطفى راح وصاح زينب
اجتي بس ع اعصابي
لان هذا الغثه هنا
بس اشو عادي تسولف وياهم ولا كانو اني موجود متجاهلتني ع الاخير
من صدك فار دمي بودي ادفرها دفره
اوصلها للصاله واخليها بعد متوصل
نيمت نظوري
واتمددت ويا اني
بقت وياهم سويت نفسي نمت
لحضات وطلعت
بعدها اترخصو وطلعوا
همزين غير عقده هذا ابن عمها
وراها نمت وكعدت ع صوت بجي نظوري
وهاي بصفه تسكت بي
ها بابا شبيك
اوا بيه يوجعني حيل
خطيه حيل ضجت علي
اخذك للمحل واشتريلك
لا مااطلع
ماتريد موطا
اي اريد
يله كوم اخذك
هاي طفرت وين تاخذه لا ينلجم
انت اسكتي ماعليج
روحي حيري بولد عمج
اخذته وطلعت
حيل ضايج
اجتي نور
بابا اروح وياكم
اي بابا تعالي بس جيبي مخده لنظوري
جابتلي نيمته وره كتله ابد لتكعد
وخليت نور عينها علي
وصلنه ونزلته ع كيف
وكلته موطا
وبعدها اخذته لمحل اللعاب
كتله شتريد تشتري حبيبي
شاف سكوتر كال هذي اريدها
لك بابا هاي مالت كبار
كام يبجي اني اريدها
سالت ع سعرها لان ادري بيها غاليه
كال ورقه ونص
عندي اوراق بالسياره همزين
كتله اختار وحده
مااكدر اخلي يبجي خطيه
اخذ نفس هاي 👇
كلت انضمها اله لمن يكبر شويه
تريد طوبه
كال اي
وانت نور شتردين
اني اريد مكعبات
روحي اخذيهن
جابتهن
عفتهم بالمحل ورحت جبت ورقتين من السياره
اني مخلي شكم ورقه احتياط اخاف يصير شي بالطريق واني خارج المحافظه
ابد مااصرف منهن
بس ارجع للبيت ارجع بمكانهن
رجعتهم ورحت للسوبر ماركت
اشتريتلهم شكم شغله الي يحبونها
رجعتهم للبيت وخابرت فاطمه كتلها جهزن نفسج
كالت رجعنه وي بابا
نزلتهم نور ونظوري واني مادخلت كبل رحت
خابرت حنان
كالت مر بيه ارجع وياك
مريت بيها ورجعتها
اذن صليت ونمت لان حيل نعسان
تقريبا الساعه ب1 كعدت ع صوت الجهاز يدك
شفته رقم نور
انطيت رفض لان جنت ممركز
دك مره لخ هم انطيت رفض
بهالاثناء دك ابو زينب
هنا اني صحيت
ياالله بس لانظوري بي شي
رفعت خط الووو
سمعته يبجي حبيبي
كوه فهمت الحجي
ياريت تجي هذا يبجي يريدك
اي هسه راح اجي
اتخبلت خطيه مبين علي هواي باجي
رحت بتراك البيت
وصلت لكيته كلبه واكف من البواجي
اخذته من زينب
ليش ماخابرتوني اول مابجه
كال ابوها هواي دكينه عليك بس ماتجاوب
والله جنت نايم حيل نعسان جنت
شتريد بابا حبيبي
اريدك يمي
كتله عمي راح اخذه ويايه هناك ابيتي
هم راح يشلع كلبك ويكلك اريد ماما
لعد شلون بي خطيه
خلي نفرشلك هنا ونام بس الليله
كتله عادي افرشلي اني ويا هنا بالاستقبال
لا عليمن هنا
روح بغرفة زينب
وزينب تنام يم اخواتها
اخذوا راحتكم ابني
لا عمي هنا افرشولي احسن
بابا انت مو غريب وثقتنه بيك عميه
ميخالف هنا احسن
ع راحتك ابني
فرشولي هنا وخليته بحضني
مسحت دموعه
سكت
شبيك بابا شتريد
اريد يمك انام
اني يمك نام حبيبي
طفينه الضوه وره شويه كال اريد ماما
دزيتلها رساله ع رقم نور
تعالي يريدج نظوري
لحضات واجت
ها حبيبي شتريد
اريد مي وعميه
شاسويلك حبيبي
اريد تبيته يعني بتيته
هسه اجيبلك
راحت جابت المي
وره شويه جابت ماعون بي فنكر
كلي بابا وكلني
افتحي الضوه
اي
بديت اوكل بي
ميت من الجوع
ليش مخليته جوعان بيمن ملتهيه وتاركته هيج
مملهيني شي بس هو ميقبل ياكل بس يبجي
هسه وحد اكل
اي لان انت يمه
اها زين لعد
بعدها شربته الدوه مالت التهابات
شالت الاكل
جوعان اسويلك شي
لا مااريد اي شي
رجعت لزمنه واحد منا و واحد منا
خطيه لحضات ونام
كالت اني راح انام بالصاله بس يبجي اجي
رادت تطلع
سحبتها تعالي احاجيج لحضات وروحي
وخرت ايدها
ها خير
شعندج وي ابن عمج الغثه
اعتقد ماالك دخل بيه
زينب لتختبرين صبري
والله مو كدي انت لتتحديني
اخليج تبجين دم والله
لاتعاندين ولتختبرين صبري
لو تحترمين نفسج وتكعدين وتسكتين وماتعانديني
لو كليلي طلكني واخذ ابني واني حره شاسوي اسوي
تحلم بهذا الشي
لعد انجبي واسكتي
واذا لمحت ابن عمج بالجامعه لو هنا وانت كاعده يمه
متلومين اله نفسج
جهزيلي ملابسه لنظوري
من الدوام اجي واخذه
سكتت محجت شي وطلعت
وقتت المنبه ونمت
كعدت لكيته بسابع نومه خطيه
دزيت رساله ع رقم نور
الوووو
كاعده
باللحضه جاوبت
اي كاعده
سويلي طريق اريد اغسل حتى اروح
ماكو احد
روح للحمام غسل وبعدها تعال للمطبخ
فعلا رحت غسلت ورحت للمطبخ
لكيتها مجهزه ريوك
كالت اتريك قبل لتطلع
مسويه بيض وطماطا
ومسويه حليب مدري عصير
مكدرت اعرف شنو بالضبط
صبتلي جاي
الصراحه حيل اشتاقيت لايام الجانت ابيتنه
اتريكت وشربت العصير مدري الحليب
يمكن حليب ماادري شنو بس حيل طيب
كملت وطلعت
محجت ولا حرف
رجعت للبيت بدلت ورحت للدوام
كل شويه واتصل ع رقم نور
اطمان علي
تطلعلي نور وتكول زين
اجيت من خلص الدوام كبل الهم
اخذته واخذت نور ورحت للبيت
بقوا يحجون عليه امي وابويه ليش جبته من امه
كتلهم هو يبجي عليه
صار زين
وبقيته يمي 3 ايام
جانت عطله قبل الامتحانات
بعدين رجعته بدت الامتحانات ومحد يبقه بالبيت
نور بقت يمهم والسايق ياخذها ويجيبها
فترة الامتحانات ابد مجبتهم
امر عليهم اطلعهم وارجعهم
خلصت الامتحانات واخيرا
اول يوم العطله جبتهم
نور ع اعصابها تجي متقبل ابد
خليتهم اسبوع كامل
نظوري اتعلق بيه يمكن اكثر من امه
خلص الاسبوع ورحت ادزهم
لكيت سيارة الغثه
خابرت عمي ابو زينب
طلع كلي اتفضل جوه
رفضت مااكدر ادخل لان هذا ينرفزني وجوده
بس كلي عدنه موضوع مهم وياك
لازم تدخل خل نتفاهم علي
كلبي نغزني
دخلت وسلمت
جابولنه جاي
بعدها حجه عم زينب
كال ابني البنيه ميصير تبقى معلكه هيج
لاهي بسما ولا هي بكاع
لازم تذبحها ع القبله
طلكها وكلمن يشوف طريقه
اني الصراحه رايدها لابني علاوي
واخذنه راييها البنيه
كالت اذا طلكني واتنازل عن ابني
اني موافقه ماعندي مانع
حسيت براسي افتر
كلشي حسبت حسابه اله هاي ماجنت محسب الها
كتلهم اني متفق وياها اطلكها محكمه ابني اخذه
اذا وافقت من باجر اطلكها وابني يبقه وياي
بس ميصير هيج تحرم ام من طفلها
لعد اني هم مااقبل ابني يربى عند الغربه
اني بالنسبه الي غير هذا الكلام ماعندي
باللحضه الي تطلب الطلاك مني راح اطلكها
واخذ ابني
خبروها ردي
في امان الله
عفتهم وطلعت وجنت حيل معصب
اني اعلمج زينب
ثاني يوم رحت للدوام
ورجعت اتغديت ونمت
لليل اجاني اشعار
فتحته وجان رقم غريب
فتحته وجانت صوره لمحادثه
بين زينب وعلي
كاتبه بيها
حبيبي والله لو ماابني جان وافقت
بس اخاف من هذا الحقير الهمجي ياخذه مني
لج حبيبتي مو بكيفه نرفع علي قضيه واكيد راح نربحه
والله ياريت تشوفلي محامي زين
لازم اخذه بعناده مااريده يتعلق بي
من عيوني حبيبتي تدللين
احبك
اموت عليج
وهذا رد زينب الك
اذا عندك ذرة كرامه طلكها احسن الك
وحتى ابنك تسوي جميل عليه اذا اخذته
لان مستحيل راح احبه لو اعامله زين
مستحيل اوصف شعوري بهاي اللحضه
يمكن زينب اذا كبالي اشرب من دمها
مجاوبته شي لان عقلي وكف من التفكير
كوه نمت وثاني يوم رحت للجامعه ب10 تقريبا
كلت اشاره منها اطلكها وانعل ابوها لا ابو الخلفها
وصلت ورحت عليها كبل
وجان انصدم بالمنظر الشفته .......
توقعاتكم حبايبي شنو الي شافه حيدر ؟؟؟؟؟
هل راح يطلكون محكمه لو لا ؟؟؟؟؟
راح ترجع المياه لمجاريها لو راح تتعقد اكثر ؟؟؟؟؟
تحياتي للجميع 😘😘😘
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!