رواية بين الكاف و النون الفصل الرابع عشر 14 - بقلم saja altaie95

بين الكاف والنون (كن فيكون)

الرابع عشر

الكاتبه سجى الطائي

///////////////////////////////
ﻳﺎﻣﻪ ﺍﻟﺘﺮﺍﺟﻲ ﻣﺮﺟﺤﻦ
ﺣﺴﻚ ﺍﻟﺼﺎﻓﻲ ﻭﻏﻔﻪ
ﻭﻳﺎﻣﻪ ﺍﻟﺪﻣﻊ ﺿﻮﻩ ﺳﻮﺍﺩ ﺍﻟﻌﻴﻮﻥ
ﺟﺎﻧﺐ ﺗﺮﻓﻪ
ﻭﺗﺪﺭﻱ ﺗﻨﻴﺖ ﺍﻟﺪﻓﻮ
ﺑﻠﻬﻔﻪ ﻭﺭﺩﻩ
ﻭﻣﺎ ﺟﻴﺖ ﻭﻧﻴﻤﻨﻲ ﺍﻟﺜﻠﺞ . . .
ﻭﺍﻟﺸﺘﻪ ﻛﻠﻪ ﺃﺗﻌﺪﻩ
ﻻ ﺑﺎﻟﻤﺤﻄﺔ ﺭﻑ ﺿﻮﻩ ﻭ ﻻﺧﻂ ﺟﺎﻧﻪ ﻣﻦ ﺍﻟﺒﻌﺪ
ﻻ ﺭﻳﻞ ﻣﺮ ﻋﻠﻰ ﺍﻟﺴﺪﻩ
ﻭﺍﻟﺸﺘﻪ ﻛﻠﻪ ﺗﻌﺪﻩ ﻛﻠﻪ ﺗﻌﺪﻩ
ﻭﺃﻋﻠﻜﻨﻪ ﻟﻠﺼﻴﻒ ﺍﻟﻴﺠﻲ
ﺭﻭﺍﺯﻳﻨﻪ ﺍﻟﺴﻤﺮﻩ . . .
ﺷﻤﻊ
ﻣﻦ ﻳﻨﺰﻝ ﺃﻭﻝ ﺍﻟﺪﻓﻮ ﺑﻨﻴﺴﺎﻥ
ﻳﻬﺘﺰ ﻧﺒﻊ
ﻳﻤﻜﻦ ﻳﺨﻀﺮ ﺩﻣﻊ . . .
ﻳﻤﻜﻦ ﺑﻌﺪ ﺑﺎﻟﺮﻭﺡ ﻳﺎ ﺭﻳﺤﺎﻥ ﻭﺻﻠﺔ ﺗﻨﺰﺭﻉ
ﻭﺍﻟﻜﻴﻆ ﺃﺟﺎﻧﻪ ﻭﺃﻧﻜﻀﻪ ﻭﺭﺩ ﺃﻧﻜﻀﻪ
ﻭﺭﺩ ﻛﻴﻆ ﺃﺟﻪ
ﻭﺍﻟﺰﻟﻒ ﻫﺠﺮﻙ ﻓﻀﻔﻀﻪ
ﻭﺭﺩ ﻓﻀﻔﻀﻪ
ﻭﻣﺎ ﻣﺶ ﺭﺟﻪ

_______________________

ارغد•

الضلم انواع ؟
اول نوع من البشر شوفه يحجي بضهرك وهوه كبالك يحبك ومتدري بليصير وراك

والي اله وجهين ويبين روحه ميفاركك وماعده غيرك وساعه يحبك وساعه افعاله تكلك لا تجي يمي

والي هذا يعاملك معاملت الحيوان مالك قيمه وكانو مستعار منك

ماشايف خوان يضلمون اخوهم من دم ولحم رتبين سوه

واكف اعاين الدنيا طالعه من عيني دمي فاير وامي تفتر وراي والله لوما هي جان اني حالي حالي المتسولين بلشارع والله اشرفلي من عيشتهم

سديت الباب بقوه شنو من بشر ياناس ياعلم اني اخيكم شتردون مني ابراهيم وتمام واحد يكبس واحد يرفع وذيج مكبوره بيتها توز بيها

لو ادري شمسويلهم جاي من فطر الكاع مو من بطن وحده هم الجلب يحن على اخو واهمه ماعدهم رحمه

نازل ارتاح تلكوني بلمشاكل تعوذت من ابليس وكعدت افرك بكصتي الضغط ذبحني يمكن فول عدي حتى عيوني يوجعني

تميم مو هنا بمحله سمعت صوت اسامه نزلت اشرب مي واطلع هاج

جايب امه تبجي وتشكي لمي باوعتلها بطرف عيني كالت " شكو تشمت بيه تشمت بختك "

ارغد" منو يمج شاخطه انتي "

باوعت لمي تشكي "شوفي يمه مو اكلج نغل ميحترم اني اخته ابني بكده مامخليلي حترام "

امي عضت اصبعها " ارغد اصعد الغرفتك وكفينه شرك وشر المشاكل فدو العينك "

كعدت كبالها مو هوه بيتها واصعد علمودها " شكو يام شمسويلها هم فاك حلكي"

سعاد " انت لو ماامدلل وشايف نفسك علينه مسوي هيج وشوف حالي "

ارغد " شعليه بيج انتي مدخلتني وماماخذلج حقج شسويلج والله ياالله "

سعاد " عساك بلبيه وضوكه لوعتي وشوفني محروك كلبي تتمضحك عليه "

هزيت ايدي " بعد ادعي مو الله مادلج مرزيب كبل من حلكج اله "

لطمت " شفتي يمه شفتي شلون يضحك الاه لاينطيك ولا يوفقك عساك ماتنجح ولا شوف الراحه يامسموم "

طلعت عفتها تهرج واسامه فوك نزل عليها راد يهجم متعلم امي جرته اخر كلمه سمعتها نغل هههه اضحك عليها هاي الكلمه شكد سمعتها منها ومن خواني من اتعارك وياهم ليكول صدك نغل ويعايروني

مشيت التميم طبيت لمحله سمه جهال يشترون دفعو وطلعو طبيت وره جام خانه دنك يحسب بلفلوس ويعزل بيهن شكد خرد هذا شغله

سد المجر

تميم " هااا شبيك "

ارغد ابتسمت " شكو نفس لعبان النفس اكلك سيف خابرني وعزمته احتمال يجي وهذا ابراهيم من عرف سوالي زفه اديايني من احصل اردهن لو ماعدك"

تميم " دكل .... اني وياك واحد خلي يجي شوكت ميريد "

دنكت اسحب نفس " شوكت تعزل "

تميم " وين اعزل شتريد "

كمت  " من ترجع كلهم رايح للمدينه عدي شغل هناك "

صاح " وين رايح شعدك بلكوت"

ارغد " شبيك لصيح وين اولي اجيب كم قميص من الباله جريت تشيرتي عتكن من الغسل وذولو يعيبون "

تميم دنك للمجر كتله " يمعود عدي مامحتاج وعزيمت سيف جنت شايل لو ماامي تحتاج للبيت كل الشايلهن انطيتها "

تميم " هااك لك لا تتعزز عليه خليهن جوه ايدك "

عفته وطلعت صاح وراي ماسمعته اخذت عبريه نزلت بلسوك ادبر روحي بلباله ينغسلن والكوي يطلعهن اخت الجديد

مريت من يم محلات ماركه كل قميص وزي واحد يكل للثاني اني احله منك طبيت اشبع عيني واطلع

مريت من الباله اخذتلي كم بلوز وقمصان زينات مابيهن شي صح مبينات مو جديدات ينطلع بيهن 

مااهتميت اخذتهن وطلعت مريت اخذت حذاء جديده مريت اخذتلهم برتقال ورجعت

عطله وين اولي شغل ماكو فريت محلات المنطقه مالتنه كلها وصيت جماعتي

واحد منهم كال تشتغل عمال محل بنجرجري فركت وجهي امري الله ميخالف اتففت وياا ثاني يوم رحت الرجال علمني شنو شغلهن من عرف بيه مامشتغلها قبل مااقبل راد واحد عده خبره

ضحكت دااخلي لو يعرف اني مهندس نفط شيسوي سكتت الدنيا اذا مااتلويها تلويك رجال طول بعرض امد ايدي لبويه لو لتميم مكرم شبيه

بلشت وياا الشغل مرات من الصبح لوره الغروب ارجع وطت الصيف شغلنه الصبح ارجع الضهر
ب4 اروح افتح

ارجع مدهن وحالي حال نعمه المهم بعرق جبيني ولا ذلتهم طبيت بيدي كيليون طماطه وبتيته مااعرف اجي ايدي فارغه لمي خطيه تكيف بيهن رغم ماتقبل منيلك يمه اشتغل لم لروحك تكفي عدي من تدعيلي بلرزق والتوفيق

طبيت سبحت صليت اسبح واسمع صوت امي انزل اتعشه لميت السجاده ونزلت كل ملتم بس تميم ياكل يم محله كشك يسوي لفات فلافل

ابراهيم كال " يابه كالو ينطون سلف على التقاعد اسحب نبني الفوك "

ابو ابراهيم " وين ابني هوه كل شهرين والسلف ياخذون ضعف شيضل منها ابني وبركبتي كومت لحم "

ابراهيم " نضل هيج اني غرفتي سرداب والولد محصورين بغرفه وتميم ينام بلصاله "

امي " يمه انت مو لاملك جم فلس ليش مطك حايط غرفتك تكبرها وترممها ماتكلفك هواي مثل البناء"

ابراهيم " منيلي العدي صرفتهن على العرس يمه وراي جاهل مرتي حامل كلشي يصير اذا طلبو عمليه منين اجيبلها "

امي " كول يااله يمه ليش حضرت العمليه ان شاء اللة مابيها شي تجيب طبيعي ودكوم بلسلامه منا لمن جيب الف حلال يحلها "

تمام " اني بس تطلع سلفتي ابني الغرفه يمه تحضرين نفسج دوريلي مره "

امي ضحكت " يوم عيد تدلل ادورلك وبليتمناها كلبك "

ابويا " ابراهيم اخوك مو راح يبني مثل مكالت امك طك الحايد وابني على خارطت الجوه هي غرفتك بناها غلط سويناها مجرد مخزن "

ابراهيم " اكلهم ماعدي والعدي مايبنن"

ابويا " التقاعد مايكفي اسحب قرض يكصو كله منين اعيش خواتك واخوك عده جامعه "

ابراهيم " تفكر بي وماتفكر بيه يابه اكلك الغرفه كن دجاج اذا اجه طفل وين احطه بيناتنه واخنكه واذا كصو راتبك اني اجيب مسواك البين "

امي نبت " يمه جا هوه بس مسواك الحصه الغاز الخطار فلوس المولده ذني مو فلوس من غير الزايده والناقصه الخطار اليجي "

صاح " سديتوها بوجي لو ارغد طالب جان ركضتو ماشوف حالي متبهذل وهذا حايرين بي وبجامعته صاح لمي المن جبتي وخليتي عله علينه "

عاط تمام " ابرااااااهيم "

امي وجها صار اصفر ابويا صاح عليه " امشي ولي الغرفتك الله يطيح حظك عود جبير واحترمك  "

البنات حارن بمي شلتها للمطبخ شبيها هيج صارت خركه بسرعه جسمها رغه وشفايفه يبسن شربتها مي سناء وسندس يبجن ابويا وتمام فوك راسها

تمام " شيلها اجر تكسي ناخذها للمستوصف"

اجه ابويه لا عوفوها سندس سويلها نومي بصره فوري بقوري وجيبي كلي شيلها خليها بلغرفه

كتله "يابه ماشوفها وجها صوفر"

ابو ابراهيم " امك مو اول مره يرتفع ضغطها شينطوها غير هل مغذي وترجع نومي البصره احسن علاج"

ابراهيم دار وجها وصعد طببتها لغرفتها تمام عاوني عليها مددتها على جربايتها جانت بس تخته وعليه دواشك كطن وفوكاهن جرجف ومخاد وكنتور بسيط ضليت يمها خايف عليها غمضت عينه نزلت منها دمعه ابويه همس

" ام ابراهيم شني القضيه اول تالي يتعاركون ماتعرفين ابراهيم وكمزاته جنه ثور هايج كولي يالله خوفتينه عليج "

ساكته تمام كال " يمه ناخذج ششوفين نفسج زينه "

كوه كلعت الحجايه "عوفوني ويه ابوكم "

جنت قريب يمه كاعد بصفه نزلت يم اذاناها " حبيبه كولي شيوجعج كلبي يمج اخذج للمستشفى"

هزت راسها " لا اريد ارتاح يمه اخذ اخوك واطلع"

تمام راد يحجي اشرتله نطلع اخذته طلعته وسديت الباب 

كعدت بلمطبخ مديت رجل وثنيت رجل طلعت الباكيت سحبت جكاره هذا العار شنو الحل وياا حاطني براسه

دخنت وبراسي الف موال متاني التخرج اشعل ابهاتهم اذا مااجر واطلع لو اعرف اعيش بصريفه ويه الحيوانات احسلي راسي مرتاح ولا عيشه ويهم

سندس واكفه صب النومي كتله " صبيلي وياج"

باوعتلي بطرف عينه مصب انت بيديك كسر لو معاق ان شاء اللة

" دمشي ولي لا هاي خلقتج اعقجها الج الزركه"

هي كلشي ولا واحد يعيرها بسمارها "شكد حقير مثل الحيه انت تنكط سم تجي تتعزز يم امي وابويا لحد ماخليتهم يحبوك اكثر من يمنا ويفضلوك علينه "

نترت" دولي الزركه ام فطور فطورج يختل بيهن عتوي "

اجت تبجي والله ولا رف كلبي من قساوتهم غمتني وفاتت بيدها الستكان اني اصغر منها بسنه ذيج سناء خوينسه من جوه الجوه مستفاده مني منو ينطيها غيري حتى هاي سنيدس تاخذ مصرفها مني بعدين كطع بيهن من دخلت جامعه وشلت جنت الحصله اقسمه عليهن اكول خطيه ابويا بطرك التقاعد وهنه بنات كلشي يحتاجن

شكد مااكون طيب وياهم اكلوني وذبوني كشر الكل ميريدني من اصفن شنو المسوي تمام يوم هيج ويوم هيج ابراهيم يشوف دم شنونه ولا يشوفني

سعاد يامن يذبحني ويحطني بطنها من طفولتي تحملت كتلهم الي على ابسط الاشياء تحملت معايرهم الي ومن غير كلماتهم يريكوني بيها ويعشوني نغل لو مبري ولا انت عار علينه انت

المنطقه اذا متعرف تميم تعرفني مرات يجون الوالدي يكلوله ابو ارغد ميعرفون لا سعاد ولا ابراهيم ولا تمام

اكو واحد ماراكضله اكو محتاج مامساعده تميم مثل بس ذاك مطبل على الاغاني شوكت مااشوفه يدندن وكاسيتاته ومسجله وياا حتى بلمحل مالته

اخذت نفس والكطف بيدي مخلصها ومحاس كمت غسلت وجهي على السنك مسحت وجهي بتشيرتي وطلعت بلباب

اخذتلي فتره اشتغل ويه واحد بواري مي عرفت اسس اجاني حنيش ابن جيرانه بعد عن بيتنه بيتين ابو راح ويه جيش المهدي ونضرب من الامريكان تكوم بمكانه

سديت الباب مشيت وياا وكفت بلباب كتله صيحلي جدك

حنيش" عمو جدو طالع للكهوه "

ارغد " منو بلبيت "

حنيش " بس اني وامي "

ارغد " وشلون اسويلكم البوري رايح من يجي جدك تعال "

صاح " لا عمو حباب والله انريد نسوي عشه وامي مغاسله الماعين صارلنيه يوم كامل مسابحين حباب"

ارغد "بابا شلون اسوي انفخ عليه امشي صيح جدك اني هنا "

ركض راح الجده رجعت للبيت البنات بلمطبخ ينضفن كتلهن اذا اجه حنيش صيحني

صعدت فتحت شباك الغرفه طلعت باكيتي هذا مخفف المي وحشتي

ساعه صاحتني سناء نزلت كالت جد حنيش بلباب

طلعتله " هاا عمي "

" يابه نعرفك تعرف تأسس ابني التانكي مايصعدله مي وهذا ثالث ماطور نبدله دشوفليا رحمه لبوك "

ارغد " تدلل يابه سهله عدك عدت المي لو اجيب"

" جيب ابني يجوز اكو غراض مو يمي"

طبيت اخذت جنطت المي الترك وطلعت وياا طبيت للبيت هوه كدامي " تفضل ابني "

نصيت صحت ياالله كال
" فوت اختك ام حسن جوه "

صعدت شفت البواري نزلت من يم الكاكات الجوه اووو هذا مسدود البوري الحجي يمي كتله " عمي هذا البوري يتبدل مسدود اليصعد المي طاب بي رمل لو حصوه متكدس وساده "

كال " عمي تاكد اخاف صوج الماطور ذاك الجبته قبلك كلي الماطور مايصعد مي "

" سويلي طليق اشوفه "

طلعت شفته فحصته شخلته وفكيت البوري عدهم حوض اجه قوي

كتله " عمي شوف المي قوي مو يم الماطور عدك بوري حديد هسه ابدله الك شغلته سهله نونيات عدكم "

رجعت بدلتله البوري سديت الكاكات من الرئيسي بوريات التانكي بلترك شباك الهول عليه اشتغل ملتهي العرك كام يصب نزعت التشيؤت وهوه واكف فوك راسي  البواري خايسات يمكن من زمن جدي مابدليهن فصخته تفصخ باوعو هذا يرادله تبديل بواري واعاده

الحجي شافني كال " هاا ابني جنك دولغت "

ارغد " والله يابه البواري متهريات مزنجرات وحتى ياثراً على المي تسبحون وطبخون منه كلههن يرادلهن تبديل تريد ابدلهن لازم بواري جدد وتفلون وغراض تبديل "

الحجي " عمي شكد يكلفن الحال على كدي"

ارغد " عمي انت لا تحسب اتعابي اني اسوي لليتيم هذا واكسب اجر البواري وياهن شغلاتهن مو هواي واني ادليك ابو انشائيات ينطيهن بلاقصاد وعلى كيفك سدد"

هز راسه " مخالف يابه المهمس نسبح نشربلنه ميه "

ارغد " وقتو روحك اليوم وان شاء اللة باجر من الصبح مرلي اخذك للسوك "

طلعت وصلني للباب

ثاني يوم اخذته سوكنه ورجعنه بلشت من التسعه
ساعتين اني افك واشد الحجي عافني يجيب مسوك
شفت ضل باوعت

سبحان الخالق حوريه لابسه دشداشه صفره وهي منا حمره بيضه مربربه دنكت خجلان يول شبيك مشايف نسوان اي والله مشايف مثلها من وره الشباك اعاين

ماحست بيه ضلها صار عليه لا شباكم على الترك والشمس عاليه مخالين برده ايدي رخت من الشغل

ضليت متصنم اريد امنع روحي مااكدر هاي مني طلعتلي الله ينعلك ياشيطان

سيف الدين •

السنه مرت اول سنه عبرتها بدرجات عاليه المواد كلهن طلعت بيهن كول جماعتي بلتدريب كل واحد فك عينه ويصيحون خوينس مبين عليك لان مالي شغل بيهم

ضافر اخذني يمهم الجامعه معطله اكيد ارغد نازل لهل ضليت يوم ورديت لبيت الشيخ ارتاحيتلي يوم وكعدت

الشيخ يمي مهموم كعدت بصفه " هاا يابه اشوفك مو على بعضك شنهي صاير "

الشيخ " سيف اخيك مدوهني وحساباتي كثرن لا هوه طالع لتركيا ومبرد كلبي ولا هوه الحاجيلي صدك ومطمني "

سيف" زياد شبي"

الشيخ " ابني جاي يوصله تهديد اليوم مرته خابرتني تبجي دكلي الحجي عمي يعرفون مكانه وزياد ماراضي يطلع "

سيف حجي الشيخ خوفني " يابه متاكد انه وزياد دوم على تواصل ماكلي "

الشيخ " انه اعرفه عنودي وراسه يابس مايخاف على روحه "

كتله " اصبر هاي ادك عليه وافتهم منه"

دكيت فتح الخط

سيف" الو هاا زياد شلونك "

" زياد شنهي هذا السمعته من ابوي دازيلك لبيتك تهديد اوكف خلني اكمل انه اخيك واطيح كبل طيحت لا تحسبني غريب من اكلت بزادكم طرت منكم وبيكم وانه عشت وياكم 14 سنه

امي الحجيه تراها ضاله شعره يوميه تناطرك وتنتضر فرج ربك انت لا تخاف على روحك

بس اسمعني ولا تقاطعني واليرحم هاي شيبات ابوك هذا كدامي ان جان روحك رخيصه تره عدنه غاليه بغلات رواحنه

عدك جهال ومره لا تعيشهم حياتي لا تخليهم يتمنونك انه الله لطف بيه وطلعلي ابويا

وارحم بيهم لم غراضك وهسه انه وفرات جاييك ناخذك لغير مكان امن الك

سكت ينافخ ماراضي  ماخليته يحجي ادري بيه يباغتني ويلف السالفه خليتها حار بحار

كتله هااا خويه لخاطري انه مودكول انت ابني مو اخوي

كال لا تجون هسه اخذهن واطلع لفندق بين ماادورلي بيت وانقل غراضي

سيف " ماسوينه شي متابعيك ويندلوك لو شلتهن دعوفهن صدقه على لجهالك اخذو بس ملابس والاشياء المهمه "

زياد " هاي هيه طمن امي وابوي ليخافون ان شاء اللة  اكمل المعامل واحول للجيش

سديته الشيخ وجه كشف كام طمن الحجيه طبت حظنتني " يمه انه اكول التالي للربت مو للجابت الله يرفع كدرك وينطيك على كد بياض كلبك "

بست راسها " ماسويت شي يمه هذا واجبي اخوي اوكف ويا "

بيومها مانمت لحد مااكلي همه بلفندق اطمأنيت

كعدت من الصبح على صوت الفلح غرفتي صايره بلاخير وبيها شباك على البستان انه ردتها هيج وبيها حمام وتوتليت كاملات بس الشيخ ماقبل بابها وحد طلعه من نفس البيت على المنور سادي بحايط عن البستان

طلعت غسلت رحت يمهم رفعت ايد " هاااا الله يساعدكم "

واحد كال " هلا بحظرت الملازم يساعد بختك "

ابتسمت على كلمته " شلونها الهمه"

واحد رد " عاليه بوجودك سيدي"

"يابه سيف لا تتكلفون خلوني منكم وبيكم"

كعدت اسولف وياهم طضيت وقت كعدو يستراحون جايبين اكلهم شو اشتهيت اكلهم بي ريحة طيبه عزموني مارديتهم واحد صاح الواحد حميد صفنت عليه غصيت بلكمه لليوم ماناسي مااعرف شلون كملت وكمت تشكرتهم رديت الغصه بلعومي يابه ياطاريك يفطر كلبي انه وارغد ماعايفي دوم نزوره نتلاكه هناك

لليل كاعد يم حايطهم ياخذني شوكي يابه يجبنة عرب لوعتي كلبي فوك لوعته انه ويني وين هذا الكلب ودكته

اسمع صوتها بينه حايط وكحه بت كلبي ويا امها صوتها يلعلع لو ماادري بستان وبس بيت الشيخ وبيتهم مطمأن لو بلمدينه وجيران يمكن امردها على هذا الصوت

خنسه ادخن من الشيخ احترمه مااحب فعل يبدر مني يزعجه طبييت افتريت الغرفتي ممدت ارتاح
كعدت على صوت الشيخ

" يابه صلي اذن"

كفيت الغطه اصلي يوم يومين وانه كلبي ناطف عليها كاعد كدام المضيف بحديقت البيت بلفي بصف حايط باب الشارع

تهف بعباته الطايره شايله جديريه بيديها ماشافتني طب فرات ويا بته شلتها ام لسان تنطي روعه العمتها براء

طبيت بيها للبيت امي الحجيه بلهول صحت ياالله
كالت طب يمه محد غريب

البنات كاعادات كعدت بصف الحجيه منصيه خجلانه
المستحه حمر خدودها

براء كالت " جا انت خال هاي الجاهل بحظنك ماتزوج"

الشيخ ستوه طاب " انه منتضر يتخرج وازوجه"

امي الحجيه " جا شنهي انه وابوج متاني يتخرج ويشد الرتبه ابتسمت وعاينتلي يمه هيج اشدلكاياها مثل اخيك زياد"

ابتسمت اخذتها جوه جتفي " ست الحبايب وتشدلي رتبه  محضوض انه بيج " بست راسها

الشيخ " بس هاي السنه بعد نزوجك"

الما ميته خجل اضحك داخل رحت فدوه بعد كلبي كلبج هيج ابوج ينطيج

الحجيه " انه ادورلك اجيبلك احسنهن واجملهن هيج
وازوجك واشوف جهالك  ونذر عليه  يوم زفتك لركصلك"

الشيخ " تفرهد شرفك يجليل "

ضحكنه كالت" والله لركصلك ركص ماركصنه الحديثات "

سيف" هههه  يمه بيج خير وابجي بعرسي وانه والولد نعاونج مالد بحجي الحجي "

الشيخ " دعرس والباقي الله كريم "

الما اعاين عليها غاط بعباتها درفعي راسج اروح سيع فدوات للعيون المدوره

كمت تانيتها تطلع اشرتلها بعيوني

مشيت وره البيت بلبستان احاجيها راس حجايه
اجتي تتمشه على كلبي مو على الزرع جنه تفاح
احمر  هيج شكلها الخدود تارسه الوجه

العيون ماليات الوجه  طولها زين مو كصيره
عاينت الي بخجل تهمس لا يسمعها احد " شنهي سيف لا يشوفنه احد "

ابتسمت " هيج مامشتاقتلي ولا جنه كلبج مثل كلبي وناطر شوفتي مناطر"

نصت " انه شيهد عليه الباري كلبي بيك يرتوي
واناطر جيتك اعدلك الايام لو يوم تاخرت اليل
مانامه بس عيبه مااريدن تنزل من عين الشيخ لو
شافك خوفي عليك اكثر من خوفي على روحي"

يابه ودي احدطها بكلبي واسده  عليها" ماضل شي ينبضة كلب جبنه سنه وانه متخرج وتلكيني بعتبت
دارج وجايبلج كل زلام العرب الشيخ والسيد واسدلج
الدرب واكلهم جاي اطلب ست البنات واميرتهن
وتاج كلبي اتوجة عليه بس اصبري عليه حبيبه "

عيونها تضحك وتعاينلي انه من غير نضره ميت نوب هيج تعاينلي جنه ناويه عليه " فدوه اروحن لعيونج بس نصي عويناتج دوهنني وشلن حالي وانه رجال
على كد حالي مالي بسوالف الوعات حجت بفهاوه
شنهي

يابه فركت وجهي جني راح  اعميها وانه اريد اكحلها بس صبر يبنت صبر ولا تباوعيلي هيج واليرحم جدج"

نزلت عيونها خجلانه " جا شلون اعاينلك "

هاي هيه روحي البيتكم هاا الما حسج هليام عالي وانه لا ن اعرف محد موجود لا تاخذيها طبع وتتعودين مثل ماانتي بكلشي رقيقه حسج نصي"

غطت وجها بلعبايه مستحيه " هيج فاضحه روحي"

" هههه صير بويا ماهي صعبه بس اذكري من تردين تحجين ويه اهلج "

هزت راسها

" يله ردي البيتكم "

مشت صحت " عديلي الايام يبنت وتلكين نفسج مسميه بسمي "

ركضت طبت البيتهم ضحكت على خجلها

مشيت راد للبيت طبيت للديوان الشيخ كاعد مغمض  حس بيه كال "جنت ناطرك تعال سيف "

وضعه مايريح وجها مغندب " ها يابه خير زياد بي شي"

مدنك ويحجي " زياد بخير "

رد كمل" سيف يوم الطبيت داري عتبرتك ابني مافركتك عنهم ولا كلت هذا مو من صلبي وحبيتك
على حبي لولدي ابني انت عاقل وانه كل عمري اشوفك اكبر من عمرك مايوم نضرتلك غير هيج"

كلامه شكدني " يابه انه مسوي شي يعيبني بنضرك"

هز راسه متحسف " اي سيف مو وياي انه شيخ جليل "

........يتبع

حبايبي اريد منكم متابعه للحساب هواي بنات يبحثن على القصه ميلكنها بسبب قلة المتابعين

صعدو الحساب 😘