بين الكاف والنون (كن فيكون )
التاسع عشر
الكاتبه سجى الطائي
///////////////////////////////
يلي جامع بين طبع .. الذيب ..
واوصاف الغزاله
حلو .. او عادات الحلو .. من كثر
ما يغتر .. يجط لوله اجماله
ماله وكتي او اياي ، ورطني ابعشك
جذاب ... ماله .. ؟
شَفِج .. بس ابدفكَة الدمعات ..
خلاني اعله باله
جالغريج الجرته الخورة .. لغميج
الماي .. واتعذر نتاله
سيف الدين
لحضه مااستوعبت حجيها جنت ضان وضني بمحله
وكفت مغتاض تعاين بخوف تمسح بعيونه ويردن يهلن دمع
غمضت كل الكلام ضاع مني اول مره احس بلغصه
تصعد وتنزل بحنجرتي اسمع بجيها وتبريرها وكل هذا مويمي انه مكتوب عليه الشكه والتعب ماارتاح
فركت كصتي حيل عصرتها اريد احجي
درت عليها" ارفضي"
هزت راسها" مااكدر حتى لو رفضت ينهي عليه ويزوج وياخذني غصب "
اعصابي تشنجت بختها بنيا لزمت روحي " ماجني سمعتج الما ترديني ضحكت بستهزاء تريدني هزيت راسي مدنك حسافه "
درت وجهي ناحيت الشجر سحبت نفس "اعمل باصلي واليوم جايين طالبيج اذا وافقتي ورفضتي ابن عمج وان جان ينهي اصبرين وياي اذا صدك ترديني وجابريج عمامج يمي شغلتهم غصب عنهم يشيلون النهوه لو اعرف اجيب شيوخ الجنوب كلها "
وكفت "وابويه ..."
لاتكملين " يبنت الناس انه وياج لهل يوم اوكفي وياي امشيج على ذهب وهذا يريدج اشرت على كلبي تصرفج الاخير ردني للصفر بس يهون انه ماكل من بيت ماابز بماعونه ابن شيخ رميض وتربات شيخ جليل خلها بالج للموت مااعوفج ان جنتي صدك رايده "
والله لحضتها حسيت كلبي يوكف اسحب نفس اهدي روحي كملت"انه راد وره العشه احنه يمكم "
عفتها ومشيت طبيت الغرفتي كعدت على الجربايه
اريد اهدي روحي ضغطي علك دكتها مو حلوه بحق
حبنه بسرعه رضخت الهم
كمت طلعت للديوان لكيته فارغ طبيت للبيت بعد مادكيت الباب صحت"يمه "
صاح الحجي "طب يابه محد موجود"
دخلت بس هوه كاعد وكدامه ستكان جاي
كعدت مسافه عنه "بويا اليوم حضر روحك نروح
نطلب الما"
نزل الستكان وعايلي عرف دريت "دريت موو ابني مو وكته "
حجيت بقهر" اي حجي دريت مستغفليني والمي تجري من جواي انه ناطركم يوم يوم وساكت احترامن الكلمتك كتلي اصبر لين تبرد السالفه وهي السالفه مكضيه لبن عمها"
الشيخ " ميصير تاخذها وهي منهي عليها "
سيف" وين صايره ينهي عليها ماتريده يجبرها علي
وين دايره بقران بكتاب بسنة نبي ارد اشوف يانهوه هاي تخرب قسم "
الشيخ"ابني هاي عاداتنه والولد كال ان مارضت اني ناهي عليها ليوم الدين شتريدنه ندخل بحرب وعمامها شرانيين صح ولد عمي واعرفهم واعرف طبايعهم
مايهابون احد وهاي مو اول نهوه الهم مو ابوها نهه على امها وهي اختي واخذها هم ابويه مانطا ونهه عليها "
سيف" يابه انت وياي وياهم لو اعرف اجيب كل الشيوخ وافك نهوتها منهم ليش مصعبها علي "
الشيخ" انت بهذا حجيك تعم على البنت واذا عرفو بينكم شي يكتلوها ويروح دمها بركبتك ومايتركوك "
سيف"وين عايشين بغابه عليش يكتلوها مسوي حرام زاني بيها حبيتها حب فطري لا كاعد وياها لا
ماخذها بمكان "
الشيخ"سيف انت لو ماعشت ويانه وعرفت طبايعنه وعاداتنه تره ذوله تربات بساتين ووسنين هاي عاداتنه تمشي بدمهم "
سيف"حجي انه منطي كلمه للبت ان جان ماتجي وياي انه اخذ جم زلمه خير واروح اطلبها واليصير
يصير لا انه ضاملي ضمه ولا مسوي فاحشه واخاف
منهم البت ليره ذهب "
الشيخ سكت انطيه علم يريد يمشي وياي وان مااراد كيفه كمت ترخصت طلعت لغرفتي مااعرف شلون كضه الوقت لبست بنطرون كابوي وقميص رصاصي غامق عدلت شواربي وطلعت
انه مبلغ فرات هم حجه وماقبل بعد اصريت لو اعرف اصير مذابح مااعوفها
طلعو للديوان لكيت فرات وشيخ مناتي خابرته وطلبته مااردني رغم كلامه نفس الشيخ بس
اجه الخاطري ولخاطر الشيخ
كلي امل تصف وياي ادري بيها تخاف من تهديدهم
كلي فرات شاكين بيك عمامها لان نسوانهم سامعه
من امها والحجي تريها الك
متاني الشيخ اذا مااجه بعد هاي هيه هوه ماقصر
وميريد يتفاشل ويه ولد عمه حكه وانه اعتبر رجال
غريب وان جان رباني
شويه وطب يعدل بعباته ابتسمت كمت بست ايده جرها دك على متني "امشي وليدي الله يسهل "
طلعنه الشيخ مناتي يبتسم عليه "انت مستعد لهاي المواجها تره مايصير اذا منهي عليها معناها منتهيا
والياخذها ينهدر دمه "
سيف" شيخ انه انطيت حجايه وللموت مااتنازل عنها"
شيخ مناتي"يابه والنعم ماربيت حجي "
ابتسم الشيخ"وليدي سيف سبع"
دكينه الباب طلع والدها استغرب جيتنه رحب بينه "تفضل تفضل هلا بلشيوخ زارتنه البركه "
دخلنه عدهم الصاله والهول سوه مرتبه وابوها ماكاعد اشتراله دونمات سواهن احواض سمك
عايشين بخير بس هوه حبن بلشيخ ومايريد
يفاركه ضل وياا
هوه ابوها بعد خروجه صار عده ثنين ولد وبلاخير
صارت عده بنت
طب ضيفنه وكعد
سلام واحد يسئل عن حال الاخر نص ساعه
جبناها من شمالها الجنوبها عن وضع العراق
لحد مااشيخ مناتي كال " ابو رائد ماعدك علم سبب
زيارتنه "
كال" لا والله ماعدي خبر "
شيخ مناتي" ان شاء اللة كل الخير والله يابو رائد الجابنه هذا الزلمه الطيب طلبني وانه ماارد احد دك
بابي وانه هم جاي وطالبك "
ابو رائد " مايردك غير لسانك شيخ اطلب ان جان يمي من عيوني تاخذه"
شيخ مناتي " يمك عمي يمك انت تعرف سيف ومعاشر مااضن غريب عنك وتعرفه رجال معدل
والسنه تخرج وماناكصه شي وكلها تشهد على
اخلاقه "
ابو رائد" والنعم منه سيف بعد تربات الشيخ"
شيخ مناتي " جايين وكلنه فخر نطلب ايد بنتك
الجبيره لبنه راد يحجي رفع ايده ادري بكل السالفه
عمي يكلك اخذ الشين لو تعرفه وسيف والنعم منه
والله لو طالب مني اطي بدون نشده يكبع وياخذ
ابو رائد" مو غريب عني سيف ربه ويانه واعرف
معشره شني والنعم منه ومن تربات الشيخ والنعم
مااعلم معدل ورزن وزلمه حوك بس انتم تعرفون
ابن عمها طلبها واخر مره من رفضته صارت مشاكل
واشهر انه وياهم مااتحاجه شيخنه ابو زياد هوه
شاهد كتله انت كفيلها انه طالع منها وردت بختيارها
البت منهي عليها وانه يشهد الله تعاركت وزعلت لحد هذا اليوم مااتحاجه ويه اخوتي وكاطعتهم ماراضي بنهوت عباس بس شبيدي هاي سنايينه ابن اخوي
مايتخير على سيف بس وراها دم
وبعتبار كاسر كلمتهم ومو بعيدها يثورون ويضربون سيف ليش اخلي عداوات بين ولد العم الشيخ ماراح يسكت ابنه اذا اضرر ولا انه اقبل اخوتي يتأذون "
شيخ مناتي " حكك بس عمي هي شنهي نهوه بهذا الوكت مااكفانه سنين كبل وبناتنه تأذن وبيهن كعدن سنين بله زواج لحد مااكبر بيهن العمر شني ذنبهن "
ابو رائد" حجيك عين العكل بس وينه اليفهم
يكسرون بخاطرهن يجوز ابن اخوي مابي
عيب بس يصحلك واحد كل عيوب الدنيا
بي ويجي ينهي على بت عمه تعال حلها
يصير هوه وبس وابن عمها واوله بيها"
شيخ خليل" ولد العم مابيهم مجال نروح نحاجيهم
ونطيح النهوه عن البنت "
ابو رائد " ليش تفتح عليك باب مسدود وابنك منصبه مهم وكدامه مستقبل حلو خليها للزمن
اخوتي وانت اعرف بلبير وغطى عوفها ربك
يحلها "
صار اخذ وعطى بلحجي وانه ساكت ردينه احس
كلبي جمر حتى اجازتي ماكملتها التحقت عاصبي
فايره
شغل مااعرف اشتغل وين جان عنها هسه عرف عده بت عم حك الزواج
كاعد بلمقر بمكتبي دك جهازي رفعته مقدام هذا الولد هم بتله يوميه مخابره علمود يحصلي رقم صديقه الكردي موضف بلنفوس الكرديه بسليمانيه
كبل سنين رحنه وماحصلنه شي يجوز رجعو بعد السقوط لاكي رقم صديقه سجلته وختمته وياا
اسئل على كفاء مشتاقله الكويت لو تفتح الحضر
جان سويتلي زياره الهم
يومين وخابرت الرقم عرفته بنفسي كال شوكت ماتجي انطيني خبر استقبلك الرجال ماقصر
شكرته
دايخ وين الكاهم وين صفه بيهم الدهر جدي شون
حاله هسه وين كانو هاي السنين كلها الف سالفه
تخطر بالي
كمت سحبت جهاز النداء سويتلي جوه على النقط
المسؤلين عنها خابرت ضافر نازل هذا يخوف باي
ساعه طك عده يروح يذبح خواله مااشفت مثله
السالفه باله ماعايفهم ذاك اليوم بلتواسيل طلع ابن
خاله من السجن مدري شلون مدبرله سالفه عوجه
ومن واحد الواحد ساجني عرفو ورها حتى الي
وصلو تعال حاجي اكله شهرين بلسجن وشوفه
النبي عربي يله طلعه
لزمته انت منيلك هاي السلطه تامر بسجنه ستوك ملازم ضافر استهدي لا انتقامك يعميك الولد شدخله
بابو وعمامه
اليكتلني قهر مايرد عليه غير سيف عوفني مالك شغل بيه مال الكمه بوكس اخلي يتفل سنون
سديم
حالين احنه بداية 2005 الوضع بيتنه ساء اكثر من قبل حالتنه الماديه سائة اكثر السنه ثالث دبرتها شلون ماكان جنت شاطره ماحتاجيت دروس تقويه ولا سجلت بلمعهد اصرف لهلي منين يجيبون
امي كوه سده اكل البيت
اماني عيونها رايحه بلنهار تخيط وبليل تقره تنام بس
اربع ساعات حتى ضعفت وجها شحب
اعتمدت على نفسي دروس الاضافيه ماافوتها قراية اليومي مااعبرها اقره يوم بيومه كدرت اسيطر
مشاكل نعمه وتحسين بستمرار وامي تحاول تهدء بيهم يوميه زعلانه وراجعه غير وصاحت غرفتها
اني تعبت كل مره تحسين يصيحني انضفها شنضف البردات من عرسها معلكات وماغاسلتهن انضف الكاع
لو جوه الجربايه حتى بيوت عناكب صايره جواها
ملابسه المكومات تنزعها وتدحسها بوصخها لمن يتكدسن كوام بلكنتور يله تغسلهن هم تنجبر
لان مايضل عدها لبس
تحسين ملابسه يشمرهن على امي هي تغسلهن تعب
سنه كامله يحجي يعلم يضرب يصيح ماكو نتيجه
وازاد الطين بله حملها
الاحضنا ابويه يوكف وياها ضد تحسين لان مااخذ وحده من بنات عمي اماني دكمز تريد تنفجر من الوضع
بيت عمي ابو نعمه من اخر مشكله ويه ستار ومأثر مااطبولنه بيبي تجي يمنه تحير شتحجي وياما
تعاركت وياي واماني تاشرلي اسكت مجبوره
اسمع الكلمه مااريد الصار ينعاد وانضرب علمودهن
بلعتها وسكتت اماني حذره من بقية عماتي وعمامي
هواي سوي بطلات وتنطي لماما ترش بلبيت صح
نهدء فتره وفجئه البيت ينكلب
لازمه كتابي بيده وكاعده بصف ماما بلهول هي تباوع تلفزيون واني اقره اماني نايمه ساعه وتكعد تخيط
خياطها حلو صار عليها طلب
اقره ومندمجه نزلت نعمه وعباتها بيدها امي بيدها الريموت نزلته كالت" وين نعمه"
ضحكت" عمه هنا يم بيت عمو ضايجه وانه كلت التحسين كلي لاتتاخرين "
امي" يا بيت عم ولج شعدج وياهم"
نعمه" شني السالفه عمه بيت عمو ابو نعمه البنات كالن تعالي ضايجين هم نتونس وهم نكضي وقت
جاييات قماش اخذلي كم قطعه تخيطلي ياهن
اماني"
امي متفاجئه " شعدي وياهن من يمته تحاجيهن مو اشوفج يمي مافديوم اجن وحاجنج منين بعد كللج تعالي اخذي قماش"
تعلج وتتمضحك "شنو السالفه عمه تحقيق هوه حاجيتهن من الحايط مااتخر ساعه وجايه سدومه
تردين اجيبلج قطعه على اختياري "
هزيت راسي لا
كالت"كيفج"
طلعت وامي تباوع وراها "هاي شصخم وياهن اخوج عاقل يخليها وياهن اول تالي يكلها روحيلهم جاب عمره مايطيق عمامه وبناتهم شعجب نزلت الحنيه من تالي وكت "
"يمه هي ليش صادقتهن والله ضدنه لان تعرف بينه مانريدهم ولا نطيق طبتهن شفتي راحت صاحبتهن
اليوم راحتلهم باجر يجنها والقران هسه يعلمنها
على دروب السحر والاعمال"
امي"لا هاي خوثه ماتعرف دبرهن صح وصخه
وعوبه ولسانها طويل بس مو شيطانه مثلهن
ذنيج خوينسات من جوه الجوه"
سديم" ليش ماما دافعيلها كدام اخويه ومتخلي يضربها واشوفج اضمضميلها "
امي" شسوي اخلي يهجم بيته وتالي ابوج غصب عنه يزوجه وحده من بنات عمج هلمره ينجبر
يسكت وذنيج بس يدخلن بيتي يهجمنه بعمالهن
وسحورتهن خليني متحمله وصاختها واخيج
كدام عيني والله حافظه احسنلي "
مرت فتره زادت روحاتها وتحسين مايحجي
مانعرف اذا يدري او لا هي تروحلهم وكت
شغله من يجي هي بلبيت
عدت الايام حسام وتحسين شغلهم قل خطيه
كامو يطلعون باي مبلغ حسام اخذله فتره
اتمشكل ويه ابويا علمود البساتين كله بيعهن
وخلينه نشتري كاع بلمدينه على شارع تجاري
ونفتحها محلات ناجرهن نفتح بيهن مشروح
ولا كعدتنه هيج وكيعانك مهجوره
حتى زرع ماكو والسلف نبنه واغلب البساتين
تقسمت كيعان وتزعت وصارت بيوت ليش
مجلب بي شمستفادين منه لا عيشتنه مثل
العالم لا وضعنه لا عدنه شغله بيها حظ
ومسترزقين منها عاجبك الوضع
مجرد صيت ابوهم عده كيعان وبساتين
شمستفادين بويا شمحصل منهن
كلام حسام مر مرو الكرام كان ساكت يسمعه
حسام شاف الوضع مامنه نتيجه خله وطلع
شهر بعد ونعطل نكعد نراجع
اليوم راجعه تعبانه وضهري يوجعني من كعدت
الرحله نمت جفي كعدت فازه من صوت الهوسه
عرفت ربى جايه
غمضت تعبانه خرب وين واحد يرتاح بهذا البيت
اماني مو يمي فتحت الباب صحت " سوك هرررج
شعدج جايه"
باوعت مصدومه " وخفه وبله جايه بيت ابويا
شبيج لج شكو مدبجين يم راسج "
سديم " منو الي هسه يهوس مو يم راسي المن
خليج خفيفة ضل "
عوجت حلكها" انتي ناكره ولج بدل ماتاخذينه بلاحضان دكولين ذني خواتي صالي سبوع
ماشايفتها شبيج بومه حصره شوفيني
تكلبين همزين مو بيتج"
سديم" اكلج انتي صخله تره بس الصخله
تغار من الصخله الثانيه يوميه مخلفه انتي
ومرت حماج "
ربى" عزززه بعينج ياحيوانه ادبسزز كامت اليه
معبالي تضربني ماحسيت غير التكفخ واني اعيط
صار كدامي ابنها اريد اشر وتركض وراي تكومت
وهي فوكي لكطتي بعضه من وره شالتني شيل
اماني وامي خربانات ضحك واني لازمه مكان العضه
واكمز واباوع اليوره اريد اشوف مااكدر
ربى" اله اتوبج من التغار اني شعدي همه
ثلاثه وهذا الرابع شمخلفه "
وصلت لباب الغرفه الفلته سهله" هايشه حلوبه
شوفي ص...... بعد يومين صدرين للعالم ونصير
بيت ام دي....."
نطن عيونه لحكت على روحي سديت الباب شارده
دك تريد يتروع مامن بعدج روح اباوع على عضتها تأذي مو سنون منشار من فوك الدشداشه وسنونها طابعه
ضدي ضلت يومين يله رجعت بيومها ضليت للعشه
مااطلع اخاف تلزمني وامي واماني خربانات ضحك عليه وعليها
طلعت بليل اكلت ورجعت للغرفه بس اماني طبت قفلتها ثاني يوم رجعت العصر متحاجيني زعلانه
مني
اريام عكسه ضلت على الواحد ماقبلت سوي جهال رجلها عاار ويوميه ضاربها المن سوي شيعيشه
صار وقت مراجعتي الصبح اكاعد على برودت
الجو والشمس صير بضهر بيتنه لازمه التاريخ
والمعارك والسلاجقه وهولاكو كل الاقرا بالي
يسرسح واتخيل روحي عايشه بذاك الزمن
واماني تنبهني اقري الصفنه للمطي ابرطم دعوفيني
اتخيل يعني لو صارت اختار نابليون ههههه فرنسي واكيد حلو يمكن اشكر مثلي وعيونه ملونه
ندفع الباب درت وجهي اريام الوجه مورم عيونه
منتفخةت مينشاف فزيت من منضرها طفرت اله
اخذت ابنها بس دموعها ينشافن على خدها من تمشي تهبد متشوف كضيتها حتى حجي مااكدر
احجي تشهك كوه تحجي " بس كوديني "طببتها
امي شهكت " يمه بنتي يمه سوده بجهي " وتضرب على صدرها محد موجود الولد طالعين وابويا
اخذ بيبيتي للسوك ونعمه فوك واماني بلكليه
اريام" يمه اريد انام ميته معاس راح اموت بس ابني وكولو ماماكل من البارحه "
امي" منو هذا الهيج مسوي بيج ضاربج السك...
الله لا ينطي كسر كون ربي ولج يمه احجي شبيج
شمسويه"
كعدتها " يمه وكت حجي مشوفيها خلي تنام وترتاح وبعدين تحجيلنه "
امي" اني اتحمل لحد ماتكعد وتحجيلي كلبي فرفح
اريام صايحه مريضه العار ضاربج"
هزت راسها"مااكدر احجي يمه صارلي ليليتين ماشايفه طعم النوم "
كومتها امي تبجي واني دموعي على جدي وجها احمر وازرك من الضرب عيونها منفوخات والله مثل
الملاكم من ينضرب على وجها هيج منضرها
طببناها للغرفه مددتها على جربايتي كوه نزعت عبايتها شلتها خنست من منضر ايديها شخوط
شخوط زرك جسمي كزبر كعدت مكابلتها
بس مددتها نامت والله مااعرف اذا نامت صدك لو لا
عيونها منفوخات كابلتها وابجي خنسه امي مثلي
تعضعض بيديها طلعت مفرفحه لحكتها اسوي
اكل لبنها خطيه حتى الولد مخنوس
امي بجيها وصوتها ليمي واصل ثردتله خبز
ومركت باميه كعدت اوكله دمعتي ماانشفت
كل لكمه انطيها لبنها اناشخ من كلبي ادعي
على زوجها العار
صبيتله ماعونين وهوه ياكل خفت لا يتأذه
ساعتين وهم اسويله شي
ضليت ويه ابنها بدلتله جنطتها مااعرف شجايبه بيها هيج ملفوفات لف الملابس على عماها حاطتهن
كلبي متكطع طبت نعمه شافتني ابدله
" هاااي شنو اريام شوكت اجت"
مارديت عليها مسحت عيوني
نعمه "شبيج تبجين"
"معليج نعمه خليج بروحج لتدخلين"
نعمه "يااا اسمله ركبج جني ردت اعرف لتحجين معروفه رجلها يوميه مطبطبه"
اعرفها مستفزه"شعليج هااا شدخلج والله بشر حشريه "
هزت ايدها وطلعت اماني من رجعت وشافت وضع
اريام تخبلت كامت ادك على رجليها وتبجي شافت وجها وايديها
تانينه الولد ابويه مااجه للعصر طبو من الشغل تعبانين ماكدرنه نحجي امي تخربطت ونامت اني
واماني نار بكلوبنه عليها
شافو ابنها سالو عليها كلنالهم نايمه رظناها تكعد ماقبلت منتهيه جثه اجتنه لليل ودينه على تحسين وحسام بلستقبال كتله تعال للغرفه
طبو وهي نايمه امي دموعها ماوكفت شاوفوعا كال شني هاي منو مسوي بيها هيج
امي" زوجها الكلب "
كنالهم هيج ثنينهم طفرو
تحسين " ايا كلب اذا مااجنزه مااطلع تحسين "
حسام سكت عيان على تحسين وكال" امشي لبسو شحاطاتهم وطلعو
امي تناشع كلشي ماحجو بسرعه راحو ساعه متانيهم
وهاي نعمه دردم وماعاجبها ماتحملت صحت بيها
"الجايفه المعفنه امشي ولي صعدي الكبرج "
نعمه"شكو خيه من داسلج على طرف"
سديم " اليشوفج يكول يمه شكد تحبين اخويه وانتي كفشتج ينام بيها الدجاج مشطي شعفاتج زيتيهن عليمن هنه من اساسهن مزيتات من الوصخ "
وكفت على الدرج متخوصره وتهز بخصرها وتباوع عليه بغيض ماهتميت بالي كله يم اخوتي ليصير عليهم شي وابويا حظ اريام تاخر هلكد
نفتح الباب ركضنه دخلو ثنبنهم بهدذلين امي راحت من الهبطه كوه تحجي وياهم وهمه يلهثون
حسام "شبيج يمه ماكو شي شويه علمنا وعدنه سستم اخلاقه وربينا الج واجينه "
امي "اخخخ يااحظج يايمه بيمن طحتي منين اجاج صاحت شكول عليك يرجال من شلتها وشمرتها هلشمره ادعي عليك وانه ام كلبي محروك "
دخل ابويا"هاااي عليمن الدعاوي "
صاحت "طب شوفت بتك شوف حالها اجتني معميه ومكسره لا اكل ولا شرب من شمرتها لهيج واحد شدكل الربك من تقابله خطيتها بركبتمن بركبتك بركبت عماماها المايخافون من ربهم لو وحده
من بناتهم ينطوها "
كلها "سدي حلكج شبيها اريام هلمره شمسويلها"
حسام "هيج يشاقيها دلع بنات نتر شوفها مجنزها ماخال بيها شي صاحي الكوا ..... وعمامي كوا.......
حتى الله مايرضها هذا مال مره انطي
الحيوانه ماتعيش عيشتها راح اطلكها واشوف
كوا..... يتفتح حلكه "
سكت ابويا من طب وشافها طلع ساكت لنص اليل
تخربطت علينه ركضو بيها تحسين وحسام وابويا
البيت انكلب بجي ونحيب
ريحانه
رجعت حالتي انتكست ليش هسه رجعلي الوجع
جنت ناسيه وعايشه حياتي فجئه تجدد عليه كلشي انضف بلا شعور اداوم مجرد جسد بله روح امشي
بدربي واماني وياي تحس بتغير حالتي تسال وجوابي تعبانه مامتهوده على الدوام صح تكست
بدون قناعه بجوابي
اليوم جيت بيت جدي يردون يزورون سعيد ابن جبير معروف يمنه مقامه بلحي الكل يجي يزوره
ويطلب منه مراد مايرد احد
كعدت من الصبح ماداومت اساعد امي خطيه
تعبانه هليام تركض وحده اول مابلشت بلصاله
كنس ومسح وتعطير والدي اشتره تخم مرتب
الها واماني خيطتلنه البرده صارت مرتبه
وطبلات خشب النجار سواهن وصبغهن كلش
حلوات منضرهن كملت مسحهن طلعت على الطرمه
تعزيل وكنس الحديقه مساحتها وسط مو جبيره
لميت الاوراق الطايحه كنشت الكاع
جريت الصونده رشت الكاعيه كاشي وبسرعه
يسرسح الطين والتراب درت على الحديقه
كملت جريت المي بلماسحه لحد الباب
نشفت يله طبيت لكيت ماما تعجن بلعجين تريد
تخبز تحزمت للهول تعزيل وغسل الحلو بي المي مالته
مسلط على الترك مينزل على باقي البيت للضهر
كملت احس ضهري صار نصين شويه رتاحيت
كمت ت ضيت وكفت اصلي
كبرت وتحضير روحي طقوس اسويها من اجل اتقان الصلا وتخرج لله باجمل صوره وادراك ذهني وحضور روحي اقامو الصلا ايه باطنها اعظم من ضاهرها
ليس مجرد اقامتها تاديتها الكل يعاني من السهو اثناء الصلا مندري بروحنه باي ركعه مرات نخلص
نسجد ونسلم واحنه مامفتهمين منها شي
بابا يوصفها الي مثل خطار جايج اوشخص عزيز
وكدامج تفاحتين وحده جايسه ومنضرها مو حلو والثانيه تازه ومنضرها يشهي متكدرين ترديها لو قدومها الج شتنطين للخطار اي وحده منهن
جاوبته اكيد التفاحه الزينه كلي ليش كتله لان خطار وعيب نقدمله الفاكها التعبانه كال صلاتج مثل ذني التفاحات تاديها لله عزوجل بابها صوره وكلج
خشوع وحضور كانو تلتقين بشخص غائب عنج لسنوت واليوم لقاء راح تركضيله بكل لهفه
لشوفته صلاتنه هي مكان لقائنه بلمعبود
كانت كلماته حاضر قبل كل صلا كنت الاحظ الفرق
بين صللتي بستعجال وصلاتي بتأني وحضور
غمضت غصت مع المعبود الواحد الاحد روحي تشعر بوجوده احب لقائه هدوء نفسي اطمأنان سلام ذاتي
كملت حسيت بفتحت باب رفعت راسي امي
اسماء"بيت جدج جايين وبت خالتج تكتم وياهم جايه "
هزيت راسي خالتي خديجه اكيد وياهم وجايبه
بتها كان لمدت عشرين سنه جدي مقاطعهم من
زوأجها كلها انطيج بس تنسين عدج اب وام وخوات وخوان لو يذبحوج لا تجيني وتشتكين وهي
قبلت وبلفعل جدي رفض جيتها الهم ومنع حتى
بيبي تتواصل وياها واستمرت هاي الخصيمه
عشرين سنه لان اخذت عن حب وغصب على
جدي مكان قابل بي
امي من ازوجت كدرت تتواصل وياها وكامت تجينه
مااذكر رحنالهم غير كم مره بابا ماله دخل بهاي الامور
ميحب قطيعة الارحام ومرات تصدف حجي كدامه
على خديجه يمطي رائيه بصراح الجدي
قبل اربع سنوات خالتي تعبت كل كم سنه بيبي من تجي يمنه هي تجي شوفها وهم بلبوكات بابا يتكفل يجيب بيبيتي دون علم جدي وهوه يرجعها
ودت ناس هواي دون فايده ققررت هي تروح بنفسها وراحت وطاحت عليه باست حتى رجله يله شويه فك وياها رغم ضل شايل عليه بس رجعت تجيهم وتروح وتعرفو على جهالها
كفيت السجاده طلعت احضر ويه امي الضيافه ساعه واني افتر بلبيت تلحيضات شي مامرتب ندك الباب
بابا نوجود هوه الفتح الباب
باوعت من شباك المطبخ طب جدو وبيبي وخاله وابنها وبتها وياهم رضا طلعت سلمت امي قبلي طلعت
اربع ايام ضلو تونسه رغم تكتم موهلكد اني وياها مااعرف مااحب اتخالط رغم التزامها بس احساس
داخلي مايرغبه بس من اشوفها واشوف تصرفاتها
اغير رائيي شبيه ليش هيج احكم على الواحد من
احساسي
باخر يوم هواي سولفنه وسزلفتلي على الجامعه
وشلون درست ادارة واقتصاد قسم محاسبه
اكثر من طالب تقدملها ورفضته واني اسمعلها
خلصت اجازتهم رضا ضل مارجع وياهم
كاعدين على السفر اتفاجئنه بطلب رضا نخطبله
تكتم امي ابتسمت "يوم عيد ازوجكم حبيبي"
رضا"شرايج بيها "
امي" اشوفها حبابه ومطيعه من تصرفاتها ويه امها مو عنيده ولا مشاكسه "
ابويا"عدك شي وياها "
رضا"لا حجي وين عدي مجرد مسلم صديقي وخوش ولد وهي شفتها بيت جدي ثكيله ورزانتها حلوه تابعتها ماعدها زايده زاقصه "
سيد محمد"نسال ونشوف"
رضا"ههههه حجي بت خالتي شتسأل"
سيد محمد"تبقى غريبه وابوها رجال غريب وزياراتهم سنويا النه منعرف طباعم ولا معاشرين البنيه "
رضا" ههههه قابل اجندها يايابه حتى عيب يوصللهم حجي سألين زحمه منهم "
سيد محمد"مابيها شي ابني اذا سألنه وطقسنه وانت هم تروح لجامعة البنيه تسال البي خير ربك يقدمه"
كام بابا طلع يغسل
رضا ضاج مايريد يسأل يستحي من خالتي ورجلها لان اطيد اذا سال لا بد يصير حجي وناس تعرف ناس وتوصلهم الحجايه
كانت هناك باب من ابواب كانت لابد ضل مغلقه لكن للقدر رائي اخر
...........يتبع
لا تنسون تصويت ومتابعة الحساب
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!