تحميل رواية «بين القبول والرفض» PDF

القصه حقيقيه رجاء لحد يسئل اذا كانت حقيقيه او خيال

هاي اني كتبت حقيقيه لان مجاي اكذب عليكم

عقيل ….مواليد ٨٣

طولي ١٦٦ اسمر شكلي عادي عادي جدا

جسمي ضعيف دائما احلق شعري قصير كلش

لا ادور موديلات ولا احاول اشبه بااحد

راضي بشكلي ومقتنع ولله الحمد

الجمال للبنات الولد شيسوي بلجمال قابل اريد اشتغل عارض ازياء

اني وحيد اهلي ابوي استشهد بحرب إيران

بيتنا بأحد المحافظات بيت حلوو على شارع رئيسي

بيت عمي ابو علي جيرانه الحايط على الحايط

عمي عنده ولد علي الجبير ازغر مني بسنتين

وعنده بنيه ريام ازغر مني بسبع سنوات

احنا وبيت عمي بيت واحد

عمي تحمل مسؤليتي من استشهد ابوي الحد ماكبرت

صح احنا عايشين على راتب ابوي

بس عمي ابد ما مقصر ويانه

يتسوكلنا مثل ما يتسوق البيته

يعتبرني ابنه الثاني ابد ماقصر وياي بااي شي

يحترم امي بشكل وتعاملها مثل اخته

يكول المره الي كعدت على ابنها وهيه شابه

ورفضت الزواج وتحملت كلشي

اخليها تاج على راسي على فكره امي من مات ابوي

لليوم مانزعت الاسود

شكد حاولت وياها جانت ترفض تكول اني بعد مااكدر البس اللوان كلبي مات وياا ابوك

من اني زغير واني احب بت عمي

عمي دائما جان يكول ريام محد ياخذها غير عقيل

عقيل رجال

كبرت الفكره بعقلي اني اصلا احبها من اول يوم انولدت

بس جابوها العمي

شاله عمي وخلاها بحضني

وكال هاي عروستك

كبرت واني احس ريام ملكي شي يخصني

مكتوبه على اسمي تعرفون شنو احبها وهيه عمرها يوم واحد

كلما تكبر كدام عيني احبها ااكثر

من جنا نطلع بلشارع نلعب اذا احد قرب عليها لو ضربها

ياويله مني اموته تموت

حتلو اخوها علي ضربها

مااقبل حتى علي يضربها

مستحيل تطلع الاي مكان اذا مااروح وياها

احميها هذا الحجي من جانت طفله

حتلو تروح تشتري اروح وياها اشتريلها

اذا تروح للخياطه اروح وياها وابقى منتظرها برا

ريام مو مثلي حلوه حلوه من جانت زغيره وهيه حلوه

بيضه وعيونها حلوات ملامحها تخبل

شعرها لونه يخبل امها جانت تخليها دائما حنه

لون شعرها كلش حلو

كل يوم تكبر كدام عيني واني اشوفها تحلى اكثر واكثر

طبعا اني ادخل عليهم كبل عبالك بيتنا

وهيه لحد ماكبرت تطلع كدامي هيج بدون حجاب

نكعد ناكل سوه مرات حتى انام بيتهم

بس بعمري ما نضرتلها نضره مو زينه

اوفكرت اتجاها تفكير سخيف رغم اني احبها

واموت عليها ومايمر يوم اذا ماادخل بيتهم اربع إلى خمس مرات

الحد سنة ٢٠٠٠ مات عمي بهاي السنه

وكع ومات فجئه صح جان مريض بس زين

يشتغل ويطلع ويدخل ويجيب مسواك

بس بعد هذا اجله والكل اجل كتاب

الله يرحمه شكد بجيت علي وحزنت حزن موطبيعي

لان كل عمره يعاملني كأني ابنه

لا يوم خشن خاطري لا عز عليه شي

اذا ينطي مصرف العلي ينطيني بكده

ابد مايصحلي عقيل

كله بويه لو وليدي

من تبدي المدرسه ياخذني وياا علي وريام يشتريلي ملابس المدرسه

وبلعيد يشتريلي ملابس احلى من ملابسهم

بهاي السنه نفسها اني خلصت صناعه وتخرجت

قررت اشتغل اعتمد على نفسي لان الراتب مايكفي

مصاريف عمي جان شايل مصاريفنا

عمي مات لازم اعتمد على نفسي

محد يشيل حملي بعد

اني مسؤل عن نفسي

من اني زغير اعشق السيارات عشق

اريد اشتري سياره واشتغل عليها

قدمت على قرض من المصرف براتب ابوي الشهيد

وكدرت استري سياره

بوقتها جانت البرازيلي مكتسحه الساحه

الي عنده سياره برازيلي اوووو منو يحاجي

تعلمت السياقه وكمت اشتغل عليها سايق ااجره

جمانه السعيدي

فرحتي ما تنوصف اني صار عندي سياره

سيا ه ملكي اشتغل عليها

اول ما صرت قوي بلسياقه اخذتهم كلهم للنجف

رحنا زرنا عمي وابوي الله يرحمهم

من بعدها بدت اشتغل خير من الله عادي اطلع للمحافظات

يعني يأجروني من محافظتي الاي محافظه اطلع عادي بااجرتي

واذا ماعندي شي أخذهم للزياره

كبرت حبيبتي كدام عيني وكلما تكبر تحلى ااكثر اكثر

بس محد يحجي بارتباطنا اني وياها

من بعد وفاة عمي محد يحجي بارتباطنا اني وياها

بس اني مصمم ريام عروستي محد ياخذها غيري

بس منتظرها تكبر ااكثر

لان هيه طالبه وتريد تكمل دراستها

واني ابد ما مستعجل اريدها تكمل واني هم

ااكدر ااكون نفسي حتى نزوج اني وياها

ريام جانت تعاني من مشكله وحده

من يوم وفاة عمي وعلي يعاملها معامله مو حلوه

على اساس يخاف عليها

بعد هو المسؤل عن هذا البيت ولازم يحافظ علي

بس هو جاي يخنكها ويفرظ عليها شروطه

بالاضافه علي حيل عصبي

عصبي بشكل لا يطاق ايده والضرب

كلما اروح عليهم الكا يتناكر وياها

مرات اسمع ضاربها اتعارك ويااا

طفله ليش يمد ايده عليها

بمكان مايكون حنيين عليها يعاقبها هيج

حسره عليها تطلع لو تريد تروح بيت صديقتها

ممنوع ممنوع تطلع من الباب

واذا شغله ضروريه لو هو ياخذها بايده

ويرجعها بايده لو يطلب مني اوصلها وارجعها بلسياره

كلما تصعد وياي تشكي منه ومن اسلوبه الزفت وياها

عمي الله يرحمه جان مدللها دلال ماصاير

بس علي اسلوبه غير يختلف

بعد ماخلص علي صناعه اشتغل بتصليح السيارات

شغله خير من الله

وماومقصر وياهم بلبيت بشي

بس لو يعدل اسلوبه جان ماكو منه بلدنيا كلها

بعمر العشرين ام علي قررت ازوجه بعد هو خلص دراسه

ويشتغل خير من الله

ليش يبقى بدون زواج

بدت ادورله عروس

طبعا اكثر وحده فرحانه بزواجه

ريام متوقعه بس يزوج يخف الضغط عليها

وهم راح تجي بنيه وياها بلبيت

يسولفن يضحكن سووه

جمانه السعيدي

عقيل…. بيني وبين نفسي كلت بس يزوج علي

افتح موضوع زواجي من ريام

حتلو بس خطوبه لحد ما تكمل سادس اعدادي ونزوج

طلعن خالتي وريام يشوفن بنيه ووحده من الجيران رشحتها الهن

اخذتهن اني بلسياره

ام علي.. تعبناك ويانا خاله عقيل

عقيل.. صدك تحجين غير هاي خطوبة اخوي

اذا اني مااتعب منو يتعب بعدعرس اخوووي

بعدين وين التعب بلموضوع

ام علي…يوم الك ونفرح بيك

عقيل…قريبا انشاء الله

ام علي.. الله يسهل انت ذهب وهنيالها الي توكع بيك

ريام.. اهم شي هسه نزوج علي حتى اخلص منه

ام علي….عمت عينج شنو تخلصين منه نخلص منج

ريام…ولله خانكني خنك لا تفتحين الباب

لا اطلعين لا تلبسين ضيك

لاترحين الصديقتج

هو حقه ماشايف البنات شلون عايشات

قابل مثلي عايشه بكبر والدفان علي أكف على راسي

ام علي…يخاف عليج

ريام…لا يكرهني لو يخاف عليه ما يخنكني هيج

عقيل وصلتهن نزلن واني بقيت منتظرهن

هاي وصية علي تاخذهن وترجعهن بيدك

هاي اول وحده ماعجبتهن ولا الثانيه ثالث وحده عجبتهن

اتفقنا ويا اهلها وطلعن

ريام…لووووش راح نخلص من علي

عقيل…بيها الخير انشاء الله

ام علي…فدوه الحلكك

حضرنا المشيه ورحنا خطابه

وتم القبول لله الحمد لان جان اكو اتفاق مسبق

بين النسوان قبل المشيه

وبدينا نحظر للعرس

هنا اني عمري ٢٣ وعلي ٢١ وريام عمرها ١٦ سنه

بيوم العرس جنت اني مشرف على الطبخ

يعني ما مستعد اروح الزفه

الزلم يتعشون بيتنا والنسوان بيت عمي

عبرت على بيت عمي اجيب مصفي جبير

دخلت لكيت ريام تبجي

لابسه نفتوف يخبل احمر وفاتحه شعرها

طالعه اجنن

عقيل…ياستار ليش تبجي شصاير

ريام….علي مايقبل اروح بلزفه يكول ممنوع اطلعين من البيت

عقيل….انتي تردين ترحين

ريام.. اي قابل احنا كل يوم عدنا عرس

عقيل…روحي اغسلي وجهج مالج شغل بعلي

انتي اول وحده تصعد بسيارة الزفه

ريام…ولله اروح

عقيل…بس مو هيج اطلعين

ريام…لا البس شال على شعري وثوبي طويل

عقيل اغسلي وجهج وتحضري

اخذت المصفي وطلعت ادور على علي

جمانه السعيدي

لكيته واكف يسولف على جماعته منتظرين سيارات الزفه

تكمل

عقيل… علي تعال اريدك

علي.. هاا شكووو

عقيل…ليش مانع ريام تروح بلزفه ولك انت هلمره تعرس قابل كل يوم

اذا ماراحت ريام للزفه ازعل عليك وبعد مااحجي وياك

علي.. خليها تولي لا بسه احمر وتريد تطلع كدام هاي الناس كلها

عقيل…تطلع ويا النسوان مالك شغل بيها

علي…اريدها تبقى بلبيت بيتنا منو يبقى بي

عقيل.. اني ابقى بلبيت انت شعليك اني حارس هنا

علي.. ترا انت جاي تنطيها عين

عقيل…طفله خليها تفرح

علي.. الخاطرك خليها تروح

عقيل…رجعت على ريام

ريام يله حضري نفسج بس لفي شعرج مو اطلعين هيج

كدام الناس

ريام…اي همزين شكرا

عقيل….شكد فرحت من شفتها فرحانه وتضحك

بقيت واكف لمن شفتها صعدت بلسياره

يله رجعت على جماعتي

عقيل…..ايام العرس اني كاعد كعده اني وامي بيت

عمي لان علي مو مجرد ابن عمي

لا هذا اخوي افرحله ااكثر ماافرح النفسي

الحد يوم السابع واني كاعد كعده بيتهم

نستقبل الناس الي تجي تبارك

من بعدها طلعنا للشغل اني وعلي

هنا شهرين بعد العرس

وتعارك علي ويا زوجته

منطيها ملابس تغسلهن وهيه ماغاسلتهن

من رجع للبيت وسئلها عنهن كالت نسيت

طلع كل عصبيته عليها

غلط وحجي بس ضرب ما ضربها

البنيه اتفاجئت بااسلوبه وياها

اجت تروح الاهلها زعلانه بس امي وخالتي

ما خلنها تطلع

عقيل.. هااا شبيك علي مو هيج نست شنو عجيبه ماكو مشكله

علي…شنو نست بيش ملتهيه اذا ملابس زوجها ما تغسلهن

عقيل…مو هيج هاي البنيه غريبه مو اختك حتى تتحملك

عدها اهل

لا على كلشي وسويت مشكله على كيفك

هيج راح تشرد منك

علي…خل تولي اذا تبقى هيج فاهيه خليه تولي بيت اهلها

عقيل.. لا ما مقبول منك هذا الحجي

عيب من اهلها بسم الله توكم عرسان

من بعدها بشهر هم تعارك وياها هلمره ضربها

راحت بيت اهلها زعلانه

عقيل…ممكن اعرف شبيك ترا هاي بنيه ما تتحمل

عصبيتك

على كيفك وياها مو هيج تعاملها جنها عامل عندك

كله قوه وضرب على كيفك

علي. اكسر راسها حيوانه ما تفتهم تعبتني

عقيل.. لا ولله الله يساعدها عليك ما تنجرع

بعد كم يوم اهلها دزولنا خبر طلعت حامل

عقيل…نروح اني وياك بليل نرجعها البنيه حامل

على كيفك وياها بعدها ما متعوده على اطباعك

بلكوه قنعته رحنا اني ويا رجعناها للبيت

يكول المثل ابو طبع ما يبدل طبعه

لاهو يقبل يتغير علمودها وعلمود الطفل الي بطنها ولا هيه

متعوده على طباعه ومشيه الامور

منا لمن جابت ولد الولد يخبل اسمه حسين

بس المشاكل بينهم ما تخلص

كل فتره وصايره عركه لستار بينهم

اما بلنسبه الريام متعوده على تصرفاته

اذا تريد شغله ضروريه لو ادز خالتي علي لو تجيني واني اقنعه

جمانه السعيدي

وصلت ريام الصف سادس اعدادي

وهنا اني عمري ٢٥ سنه

قررت اتقدملها رسمي ونعقد اريد اخذ راحتي وياها

اريد نطلع اخذها للدوام

تجي بيتنا نكعد نحجي اني وياها

لان مستحيل اروح عليهم واكعد بس اني وياها

لازم خالتي وعلي كاعدين يمنا

ولا اكدر اخذها نطلع نتونس برا نفتر بلسياره

اني اريد اعبرلها عن حبي الها

اريد اعيش ياها لحظات سعيده

اريدها تعرف اني شكد احبها

عقيل….امي اني اريد اخطب

امي….لووووش يوم الهنا اي هذا الكلام الحلو

علي ازغر منك ازوج قبلك

عقيل…اريد ريام بت عمي

امي…يا زين ما اختاريت اليله اروح احجي ويا امها

قابل ياخذها واحد احسن منك

عقيل…خاف تحجي وياج علمود الدراسه

اني ماعندي مانع من تخلص سادس نزوج

حتلو تكمل جامعه ماعندي مانع

امي… اي خليها تكمل يمه صارت الشهاده مهمه

بليلتها اني مارحت بيت عمي رغم اني متعود اروح عليهم

نكعد اني وعلي وخالتي نسولف

صعدت سيارتي وبقيت افتر بلشوارع

رجعت لكيت امي بلبيت

عقيل.. هااا يمه بشري

امي… يكولون عقيل ياامر اامر يكبعها وياخذها

قابل نلكه وواحد احسن من عقيل

عقيل….الله يبشرج بلخير حبيبتي

امي…باجر اسئلهم على العقد عقد الشيخ يمتى نعقد

عقيل…اي ولله اني مستعجل

اريد اخذ راحتي وياها

نطلع نتونس نسولف

امي…هااا عقيل ولك انت موخالي

عقيل.. احبها تعرفين شنو احبها احبها من عمرها يوم واحد لليوم

امي… اني منتظره هذا اليوم من زمان

بيتنا مادخلته الفرحه من زمان

عقيل… هسه راح يدخله الفرح من كل الاتجاهات

ناوي اترس البيت جهال

امي.. اي ولله يايمه اريد جهال هواي

بيتنا سنطه مابي صوت من تطلع انت اروح على ام علي

مااتحمل البيت

عبالك الحياطين تريد تاكلني

عقيل…انشاءالله خير خاف تنهزمين من الهوسه

امي….الله يوم عيد بيتنا يصير هوسه

عقيل….الله كريم

جمانه السعيدي

ثاني يوم امي راحت تسالهم يمتى نكطع مهر

ريام ….بعطلة نص السنه انشاء الله لمن اخلص امتحانات

رجعت امي كالت ريام تكول بعطلة نص السنه

طرت من الفرح ريام بنفسها حددت الموعد

ياربي الف الحمد لله والشكر ما قصرت يارب العالمين

واخيرا حبيبتي راح اصير من نصيبي

يومين اروح عليهم ما تطلع عليه ريام ولا اشوفها

كلت ابجوز مستحيه مني

ماكو مشكله خليها براحتها

ااكيد تستحي مني بس نعقد اذا ما دللتها دلال

اله اخليها تنسى اهلها

وتنسى الدنيا كلها

رابع يوم اندكت الباب الصبح الساعه سبعه ونص

رحت فتحت الباب ريام

عقيل… هله صباح الخير

ريام…صباح الخير

عقيل.. ادخلي تفضلي ليش واكفه بلباب

ريام…ممكن توصلني للمدرسه وعندي موضوع مهم اريد احجي وياك بي

عقيل.. اي تمام دقيقه اجيب السويج واجي

ريام…لاتكول الخالتي ريام بلباب

عقيل.. تمام

دخلت للبيت

امي…منو هذا الجاي من الصبح

عقيل. ماكو شغله زغيره اوصل الراس الشارع وارجع

بسرعه

امي…شكو غير افتهم ويامن راح تروح

عقيل….هسه ارجع امي

اخذت السويج وطلعت شغلت السياره

صعدت بصفي على الكرسي الامامي

شغلت السياره

المدرسه مو بعيده شارعين عن بيتنا

ريام… انت قبل كم يوم طلبت ايدي من اهلي

عقيل.. اي

ريام…اني مااريد ازوج اصلا اني معتبرتك مثل اخوي

اني رافضه هذا الزواج

مااكدر ارتبط بيك

عقيل…ليش اني شنو ناقصني

ريام. ما ناقصك شي بس اني مااحبك

ومااكدر اتقبلك زوج اليه انت مثل اخوي

ممكن اطلب منك طلب

عقيل.. باوعت عليها وعيوني بيهن الف سؤال

ريام..اريدك تروح بيت اهلي وتكلهم اني لغيت فكرة الزواج

وخاصه علي اتأكد علي انت ماتريدني

عقيل.. بس اني دزيت امي

ريام…كول امي اجت بدون مااعرف

اني مااريد ازوج

ضروري انت الي ترفض هذا الزواج لان اني اذا رفضت محد راح يسمعني

مستحيل يسمعوني ااكيد راح يجبروني على هاي الزواجه

تقبل تاخذ وحده ماتريدك

اني مااريدك اريد اكمل دراستي

تكدر تخطب وتزوج اي وحده تعجبك

بس اني لا

مااكدر اتقبلك زوج اليه اذا تعزني

ارفض هذا الزواج رفض قطعي

مااريد اهلي يحجون بهذا الموضوع نهائيا

اني اذا مااكمل جامعه مستحيل ازوج

وانت اخر واحد افكر بي اني هلكد مااشوفك بيتنا

قبل متوقعه انت اخوي

هذا الزواج مستحيل يتم

اني قررت احجي بيني وبينك حتى لا تنحرج

اذا رفضتك كدامهم

انت ارفض حتى تحافظ على كرامتك

مهما يكون انت ابن عمي ومااقبل تنزل نفسك علمودي

عقيل…تمام اعتبري هذا الموضوع انتهى

اني راح انسحب من هاي الخطبه لاتصورين

ممكن ازوجج غصبا عليج

ااكيد الزواج تفاهم وتوافق بين ثنيبن

اتمنالج السعاده والنجاح من كل كلبي

نزلت دخلت للاعداديه

واني شغلت السياره افتر بدون مااعرف وين اروح

معقوله حلم هاي السنيين كلها ينهد بكلمه من ريام

مااريدك ليش ما ترديني شنو ناقصني

لو ادورين الدنيا كلها ما تلكين واحد يحبج بكدي

مستحيل اكدر ازوج وحده غيرها

ريام مسجله على اسمي من عمرها يوم واحد

شلون راح ادور وحده غيرها

شلون اكدر اتقبل وحده غيرها بحياتي

افتر بلسياره لمدت ساعه كامله افتر بدون وعي

شلون ريام ترفضني

مااكدر اتقبل الموضوع

بعدها رجعت للبيت

امي…وين رحت مو كلت اوصل الراس الشارع

عقيل….صار عندي شغل

امي… شبيك ضايج شكووو

عقيل…لا ماكو شي

امي…عليه انت ليدي اعرفك

عقيل….لا ماكو شي

امي….براحتك

عقيل…اريد انام

امي…ياستار ترجع تنام ليش مومن عوايدك

عقيل….تعبان انام والضهر وكت الصلا كعديني

عقيل…دخلت غرفتي تمددت

مااكدر اتقبل كلام ريام ابد

شلون بساطه ترفضني

معقوله ريام مو قسمتي ومراح تصير اليه

معقوله اشوفه بيوم تنزف الواحد غيري

مااكدر اتقبل هاي الحقيقه ابد

شراح ااكول الامي وشلون أواجه علي

استغفر الله منيين طلعتلي هاي السالفه ماادري

بيومها لليل ماطلعت من البيت

وامي تحوس تريد تعرف اني ليش ضايج هيج

حتى امي استحي ااكول كدامها ريام رفضتني

مارحت البيت عمي بليلتها ولا اليوم الي بعدها

علي اجاني للبيت

علي…هااا النسيب شكووو

لو اعرف من تخطب ريام بعد ما تجينا للبيت

جان رفضت هاي الخطبه

ليش صار يومين ماكووو

ما متعود مااشوفك هلكد

عقيل…لا عندي شغل صار يومين وتعبان

علي…اي شغل واني كلما اجي للبيت اشوف سيارتك بلباب

عقيل… لا اروح وارجع

علي…خاف اكو شي لا اضم عليه كول انت اخوي العزيز

عقيل…كلشي ماكو سلامتك الف سلامه

عقيل….ما تتخيلون شكد ضجت

عقلي ميقبل يرضا بلامر الواقع شلون ريام تكول مااريدك

بعد حب ٢٥ سنه تكول مااريدك

شلون اقنع كلبي يرضا

شلون راح اشوفها واضم بكلبي حبها

شلون راح اتخلص من هذا الوجع

ماترهم ابد ماترهم

اني وريام واحد للثاني

شلون تكول انت مثل اخوي

لا اني مو مثل اخوها اني احبها

معقوله اكدر اجاوز هذا الوجع واتحمل واسكت

بعدها ما وصلت بيتهم بس علي كل ليله يجي بيتنا

المشكله مااكدر اكله اني بطلت

مااريد ازوج اختك

اذا سئلني ليش شراح ااكول

هاي بت عمي ليش انسحبت ولله اني بموقف انحسد علي ورطه ومااعرف شلون راح اطلع منها

بعد اسبوع واحد طلعت الفلوس الي جنت ضامهن

العرسي ورحت غيرت سيارتي

بعت القديمه وكملت الفلوس واشتريت جديده

موديل حديث

من رجعت للبيت وامي شافت السياره

امي…يااا بلعافيه غيرت سيارتك

عقيل… اي هاي أحدث موديل

امي… بلعافيه تشوف خيرها ويكفيك شرها

عقيل… الله يعافيج

امي…. شني بدلتها بدل

عقيل…شلون بدل حبيبتي كملت عليها الفلوس الي عندي

ذيج موديل قديم وهاي موديل جديد

امي…يااا يمه عقيل صرفت فلوس عرسك

عقيل…اي لان اني بطلت مااعرس

امي… شلون شني ما تعرس ليش

عقيل.. هيج بكيفي مااعرس

امي… يااا تحجي صدك وبت عمك انت مو تحبها

وتريدها شنو بطلت انت صاحي لو بيك شي

عقيل…بطلت ماازوج لا ريام ولا غيرها

امي… يمه فدوه عقيل انت ناصب عليه اني حجيت

وياا خالتك وويا علي جمانه السعيدي

شلون بطلت شراح اكوللهم

عقيل… اسكتي كلشي لا تحجين

واذا خالتي سئلتج كولي عقيل يريد يجمع كم فلس

واذا ريام اجتها قسمه خل تشوف نصيبها

امي.. لا مااصدك مستحيل

انت موعقيل ابني فهمني شصار

عقيل…ماصار شي اني بطلت ماازوج والفلوس الي جنت مجمعهن للعرس صرفتهم

خلي العرس بعدين

امي…ولله فشله شراح اكول الخالتك

عقيل…كولي ماادري الي يسئلج كولي ماادري

امي ماجنت مصدكه موقفي لان تعرف اني شكد احب

ريام اتمنى اليوم الي يجمعنا اني وياها سوه

مستحيل اتخلى عنها بهاي السهوله

عقيل…امي قللت روحتها بيت عمي

واني هم مااروح عليهم بس علي كل يوم بليل يجي يمي

امي كانت محرجه تخاف خالتي تسئلها على زواجنا

شراح اجاوب

وهيه اجت وخطبت ريام

اما بيت عمي كانو منتظرين امتحانات نص السنه تخلص

حسب الاتفاق الي بينا

حتى أتقدم الخطبة ريام بشكل رسمي

اني الصراحه مااكدر انسحب استحي

اذا سئلني علي ليش شراح ااكول

اختك ماتريدني اختك ما تحبني ماعندي عذر مناسب

ومااكدر اقلل من نفسي كدامهم

طبعا علي وخالتي حاسين اكو شي

لان مو معقول عقيل الي جان يخلص نهاره بيتهم

هو وامه كطعو هيج فجئه

بس مايعرفون شنو السبب

علي الف مره سئلني ليش تغيرت واني اكول ماكو شي

ماكو شي

مشغول شويه

اما امي ماتعرف تتعذر كاعد تتهرب منهم

حتى لا اجاوب على سؤالهم

قبل الامتحانات بأسبوع تقريبا

كانت عندي أجره البغداد ومن رجعت رجعت وياي

عائله من منطقتنا كانو بيت اقاربهم بلكاظميه

عدهم موعد ويا الطبيب خلصو المراجعه

واتصلو عليه اذا عندي أجره البغداد ارجعهم ويا٠ي

فعلا اخذت كروه البغداد طلعت الفجر بعد الصلا

ومن وصلت هناك رحت زرت الكاظم عليه السلام

وتريكت بعدين رحت عليهم ارجعهم البيتهم

وصلنا المنطقتنا الساعه وحده الضهر

نزلت غراضهم وصعدت بسيارتي

قبل لا احجي الموقف الي صار وياي خل اوصفلكم منطقتنا

ووين صاير بيتهم احنا بيتنا على شارع رئيسي

هما بلشارع الي ورانا

ااكو فرع طالع من الشارع الي بيتهم بي

صعدت بلسياره بعدني ما محرك

رفعت راسي جمدت بمكاني من الشي الي شفته

برأس الفرع مرت ريام وياها واحد يسولفون ويضحكون بلشارع

طبعا هيه هلكد ما مشغوله بي ما انتبهت عليه

اني جنت واكف بلفرع

وهيه مرت من الشارع راس الفرع

طريقتها بلكلام ويااا مبين اكو شي بينهم من زمان

لان مجانت تشوف شي غيره

حتى ما مهتمه للناس الي بلشارع

تسولف وتضحك ورايحه بعالم ثاني

بقيت جامد بمكاني لا اكدر اطلع ولا اكدر اسوي اي شي

الرجال الي وصلته كال هاا عمي محتاج شي

اجيبلك مي

عقيل….لا شكرا شغلت السياره ومشيت وراهم

على كيف

من وصل للشارع عافها هو طلع من طريق

وهيه وصلت للشارع الي بي بيتهم

قبل لا اكمل خل اوصفلكم الاعداديه شكد تبعد عن بيتنا

احنا بيتنا بلشارع تمشي كبل الحد نهاية الشارع

وترجع تمشي يمنى بشارع رئيسي ثاني بنهايته

الاعداديه الي اداوم بيها ريام

طبعا هيه حتى تلتقي بحبيب الروح

تجي من الافرع الي ورا بيتنا تكسب وقت اكثر

وحتى محد يشوفها

تقريبا تدخل باربع أفرع حتى توصل للبيت

لو شكد مااحجي مااكدر اوصفلكم شعوري

ريام رفضتني علمود هذا منو هذا وشلون عرفته

وشلون تمشي ويا بلشارع هيج

بدون ماتخلي اعتبار السمعتنا

بقيت امشي ورا الولد اريد اعرف منو هذا

وشلون كدر يضحك عليها هيج

جاي تمشي ويا بدون ماتحس على نفسها

شلون تتصرف هيج

جمانه السعيدي

مشيت ورا بلسياره الحد ما ندليت بيتهم

دخل للبيت

بيتهم بناء قديم مبني بلوك بابهم مفتوح

عدهم دجاج وبش جوه بلبيت

مبين حالتهم الماديه تعبانه من شكل ببتهم

شفت اكو ولد واكفين قريب على بيته

عقيل.. السلام عليكم

….عليكم السلام

عقيل…من رخصتكم هذا البيت بيت منو

… هذا بيت ابو احمد ليش تسئل

عقيل…مو مشبه على هذا الولد الي دخل عندي صديق قديم حبيت اتاكد

…هذا احمد ابنهم

عقيل…شنو يشتغل بلا زحمه

….كلشي ما يشتغل كاعد وساكت عنده برج حمام

يطير حمام

عقيل.. هااا شكرا مو صديقي هذا اني مشتبه

صعدت السياره احس دمي يفور

ااكو شي يفور بدماغي من كد القهر

شلون عرفته وشلون تمشي ويااا

اني لازم اعرف كلشي عنه حتى اكدر اتصرف صح

مستحيل اعوفه يضحك عليها

حتلو ما تحبني خوما تمشي بكيفها

ولله لو عرف اخوها علي اله يموتها خلاص

بقيت النهار كله افكر بيها شلون تفضل واحد مطيرجي

عليه

صدك جذب عبالي تختار واحد بي خير

هذا وين لكته وشلون تعرفت علي

قررت اجمع عنه معلومات اكثر

ثاني يوم طلعت من الساعه سبعه ورحت قريب بيته

الساعه سبعه ونص طلع كاشخ عبالك ابن الوزير

بلاول مشا وصل راس شارعهم

اجت بنيه تمشي ااشرلها قربت علي

يمشون هو وياها ويسولفون منا لمن وصلها للمدرسه

بعدين. طلع مشي شارعين او اكثر

دك الباب على بيت

طلعت وحده حلوه لا بسه ثوب قصير ودلع

ضحكتله دخل بيتهم

بقيت بلسياره منتظره طول تقريبا نص ساعه

نزلت من السياره

ااكو رجال طلع بيده صونده يرش بلباب

عقيل…صباح الخير حجي

…صباح الخير

عقيل….اني اجيت هنا على ولد صديقي بس مجاي اذكر ببتهم

.الحجي…….شنو اسمه صديقك بيت منو اني اعرف هاي المنطقه ببت بيت

عقيل…..بيت ابو احمد يمكن حجي يمكن هذا بيتهم

( اشرت على بيت البنيه الي دخل عليهم )

الحجي…لا ذوله ماعدهم ولد مره مطلكه هيه وبتها

استغفر الله سمعتهن مو هلكد

ذني مو من اهل الشارع الا صليين

ذني صار ست اشهر من نزلن هنا وطول النهار أشكال زلم تدخل عليهن

عقيل….لا مو بيت صديقي بيت صديقي ناس محترمين

يمكن اني غلطان بلشارع

بيتهم مو بهذا للشارع

شكرا حجي تعبتك وياي

ااحجي…تدلل عيوني

عقيل…رجعت صعدت بسيارتي وطلعت من الشارع بس بقيت منتظره برأس الشارع

ساعه كامله يله طلع من هذا البيت

رجع على بيتهم

اني هم رجعت البيتنا ارتاحيت وقريب ينتهي الدوام

رحت وكفت بعيد انتظر ريام تطلع من المدرسه

نزلت شفت صاحبنا اجا وكف ينتظر

طلعت ريام ااشرلها ومشى كدامها بلافرع

وهيه مشت ورا بنفس الطريق

شغلت سيارتي ومشيت وراهم على كيف

نفس أمس يسولفون ويضحكون هو وياها بعدين فتحت جنطتها طلعت منها جزان زغير

طلعت فلوس ونطته قبل لا يوصلون للشارع الي

بي بيتنا عافها وراح

جمانه السعيدي

عقيل.. اي ريام عفيه تصرفين علي شكد غبيه

هذا التحفه وين لكيتي

رجعت للبيت افكر لازم اتصرف بسرعه وبعقلانيه

اذا لزمتها ويااا ايجوز تنكر

ااكيد تنكر وراح تكرهني وتكول انت متقصد تتصرف هيج

لان رفضتك وفضلته عليك

واني مستحيل اقبل تفكر بيه هيج تفكير

اني اريد انقذها منه وبس وما يهمني اي شي بعد

لازم اكو حل مستحيل اعوفها تلعب من ورانا

هذا احد. حقير جاي يضحك عليها

ايجوز يقشمرها وتغلط وياااا

ماكو غير علي هو الوحيد الي يكدر يخليها توكف عد حدها وتبطل هاي السوالف

بس شلون اروح اكوله تعال اختك تمشي ويا واحد

دايح مسربت مطيرجي

مايصير هيج هسه يكول ليش انت ما تصرفت

ليش جاي تكولي

واني اذا منعتها مراح تمتنع منه ايجوز تكول انت شنو دخلك موضوع ما يخصك

وواكيد ااكيد راح تكول انت جاي ادور وراي لان

رفضتك

تريد تنتقم مني وراح تكرهني ااكثر واكثر

لازم اكو حل

لازم علي يشوفها بعيونه وهيه تمشي وياا هذا الحيوان

حتى يتصرف بمعرفته

اليله كله بقيت افكر شلون علي يشوفها تمشي ويا احمد

بدون مايكول اني مدبر هاي السالفه

مااريد علي يعرف اني دبرت هاي السالفه

للصبح بقيت كاعد حسبه اجيبني وحسبه توديني

هسه لو انسان بي خير

مجان كلبي احترك بس هيه رايحه تحب وواحد مابي حظ

بقيت احوس شلون اتصرف

لكيت حل بس مدري يصير مدري لا

رحت الساعه ١٢ الورشة التصليح الي يشتغل بيها علي

جمانه السعيدي

عقيل…..هلو اخوي

علي.. هله وكل الهله اليوم شعجب جاي عليه

عقيل….اريدك بشغله مهمه

علي…اطلب عيوني تاخذهن

عقيل…..سالمات عيونك

علي.. اتريد فلوس احجي لا تستحي

عقيل….لا لكيت خوش سياره معروضه للبيع

بعدها بلجيس واريدك تشوفها وياي

علي.. انت مو اشتريت وحده جديده قبل شهر

عقيل…هاي تخبل احلى من سيارتي بهواي والولد مستعجل على بيعتها

انت بس تشوفها ومناك نروح للبيت اتغده ورتاح

علي…بس اخلص هاي الي بيدي

عقيل…خاف نتاخر

علي…شنو انت عندك موعد ويااا

عقيل….اي الساعه وحده الضهر

علي…تمام ماكو مشكله اجي وياك

بس اغسل ايدي اروح بملابسي ذني مالات الشغل

عقيل.. اي شبيهن حلوات .صعد وياي بلسياره واني ادعي كون هذا الحيوان

يوصلها اليوم مثل كل يوم

خاف ما يجي اليوم وتخرب الخطه بعد وين الكه عذر

حتى اجيب علي ياي

وصلنا قبل الوحده بعشر دقايق

علي…انت ما كتلي قريب بيتنا

عقيل…..خليها مفاجئه

علي…وووين صاحبك عقيل…شويه ويوصل

عقيل وكفت سيارتي بلفرع خاف تشوفنا وتغير

طريقها

علي….وين صاحبك صارت الساعه بلوحده وخمسه

عقيل…اصبر شويه ماكو صبر

بعدني احجي ويااا

جان اشوفهم يمشون سوه كلت بكلبي اي

هسه ارتاح كلبي

سويت نفسي متفاجئ

عقيل….. هاي مو ريام ويامن تمشي

التفت علي بسرعه وشافها تمشي وتسولف وتضحك وياا احمد

علي…انا اخوك اي هاي ريام نزل من السياره وركض كل قوته عليها

هيه شافته عاطت اخوي اخوي

احمد عافها ونهزم

عقيل… فتح باب السياره وركض بكل سرعته

لو محترك بيتهم مايركض هيج

احمد النذل مجرد ما سمعها تكول اخوي انهزم

ركض بسرعة الضوء اصلا اختفى بلحظات

لعد وين الحب شلون تنهزم وتعوفها تواجه مصيرها وحدها شكد نذل الخاطر الله

اول ماوصلها علي هيه حاولت تنهزم

بس هلكد ما نصدمت من شافت علي ماكدرت تركض

رجليه ووحده تضرب الثانيه

لزمها علي وبدا يضربها بدون وعي

ضرب مستمر وبأي مكان

اني الصراحه الصراحه الحقيقيه فرحان علي جاي يضربها تستاهل

يمكن بداخلي اريد اخذ حقي منها

اريد اضربها مثل ماعلي جاي يضربها واكثر

لان كسرتني كسره مو طبيعيه

سنيين احبها وهيه تعرف هذا الشي كل تصرفاتي وياها

تكول اني احبها

صح اني ما كتلها احبج بس هذا التصرف احتراما البيت عمي الي ربوني وصرفو عليه سنيين

وامنو بيه مايصير اني ادخل بيتهم ماين عليهم

وكعد اتغزل بتهم عيب مو أخلاقي

بعد كل هذا الحب

بكل بساطه تكول مااريدك وياريت فضلت واحد بي خير عليه

لا واحد تافه صاحب علاقات يضحك عليها

وصلت يمهم وحاولت اخلصها من علي

عقيل…كافي علي كافي مو بلشارع الناس تتفرج علينا

عدنا بيت ونتحاسب بي

بس هو عبالك فقد عقله ما مصدك اخته تخون الثقه

وتمشي ويا واحد هيج بالنهار وكدام عيون الناس

تخبل عليها خبال

بلكوه صرت بينه ودفعته عنها عبالك ثور وهاج

محد يكدر يوكفه عد حده

لان ماناوي يعوفها يريد يموتها خلاص

دفعته عنها وكتلها روحي للسياره

هلكد ما نضربت وجها كله دم تمشي وتتعثر

تريد تندل طريقها ماكووو

صعدت بلسياره واني دفعت علي

عقيل…عوفها عوفها بلبيت نحاسبها مو هنا

كافي الناس تتفرج علينا

علي….ماتوصل للبيت اموتها خلاص اليوم احفر كبرها

وادفنها بي

اني علي وحده مثل هاي تضحك عليه وتشوه سمعتي

بيش قصرت وياها

عقيل…نحجي بلبيت كافي يله روح للبيت

اني اجيبها واجي

جمانه السعيدي

مشا علي للبيت قبلنا يمشي ويلهث هلكد ما عصبي

يمكن راح يحضر الها كتله اكبر من هاي وينتظرها

رجعت على السياره

لكيتها تبجي وجها صاير خارطه من الضرب

واديها كلهن دم وخشمها يجري دم

عقيل….هاااا ريام ارتاحيتي اريد اكمل دراستي مو ريام اكمل دراستي ما مفكره بلزواج

وانتي تفترين بلشارع ويا واحد ساقط

شغلت السياره حجت وياي بصوت يرجف

ريام…وين ماخذني لا ترجعني للبيت يموتني

علي اذا لزمني يموتني

عقيل…وليش مافكرتي بهذا الكلام وانتي طالعه ويا واحد مثل هذا

ريام….احبه ويحبني ليش حرام احب مثل البنات

انتم بعدكم عقولكم محجره

عقيل…مبين يحبج ماشوفين شلون دافع عنج

من اول ماشاف علي انهزم الي يحب ياغبيه

يجي للبيت من بابه يخطب الي يحبها ويزوجها

مو يفتر وياها بلشوارع ويخلي الي يسوه والي ما يسوه يحجي بسمعها وسمعة اهلها

ريام.. اي خاف منكم انتم ثنيين وهو واحد

عقيل…بعدج ادافعين عنه

تستاهلين كلشي يصير وياج يله وصلنا انزلي

ريام…..ماانزل علي يموتني

عقيل…واني شنو علاقتي اتحملي نتيجة تصرفاتج

ريام…لا فدوه الله يخليك

فدوه اني دخيله عندك الله يخليك ابوس ايدك

لا تسلمني العلي

عقيل..نزلت من السياره وهيه بقت ما نزلت

عقيل. انزلي شنو راح تبقين بلسياره

فتحت الباب ونزلت

ريام…..اروح وياك البيتكم

عقيل…اي والى متي راح تبقين بيتنا

(مااعرف ليش حسيت نفسي اريد اتشفى بيها)

هلكد ما انقهرت منها لان رفضتني

عقيل…انزلي

ريام…ووين اروح الله يخليك لا اسلمني العلي

راسا انفتح باب بيتهم وطلع علي بيده بوري حديد

طو له تقريبا متر

يريد يشوف ليش اتاخرنا هو منتظرنا بلبيت

طلعت خالتي ورا وهيه تتوسل بي

خالتي..فدوه يمه علي على كيفك وياها طفله ما تفتهم

جمانه السعيدي

عقيل….انزلي ريام

ريام…ماانزل ماتشوفه يريد يموتني

عقيل…دنكت عليها من شباك السياره

هاج مفاتيح باب بيتنا راح احجي ويا وانتي ادخلي للبيت ادخلي بغرفه واقفلي عليج الباب

علي. انزلي بصوت عالي وواضح وعصبيه

انزلي انزلي بسرعه اليوم اخر يوم بحياتج

عقيل…قربت علي احاول اخذ البوري من ايده

هاي شبيك علي كول يالله

موهيج على كيفك موزين عليك العصبيه راح يصعد ضغطك

علي…ضغطي ولك عقيل راح اموت اني تضحك عليه ريام وتلعب بسمعتي

عقيل..حضنته اريد ارجعه البيتهم

وهيه بعدها داخل السياره خايفه تنزل

بقيت ادفع بي واحاول اخذ البوري من ايده لمن دخل بيتهم

بعدنا بلباب نزلت ريام وركضت دخلت فتحت الباب ودخلت بيتنا

بس اني شنو لازم علي بقوه

الصراحه هو أضخم مني اني أضعف واكصر منه

بس مثبته بكل قوتي خاف يتهور ويضربها ضربه

تقضي عليها

علي…عقيل عوفني هذا الحجي مايفيد

جيب ريام اريدها هنا كبالي اريد اعرف اني بيش قصرت وياها تفتر بلشوارع ويا الولد

ريام..دخلت بس شافتني خالتي

ام عقيل…الله يستر هاي شبيج منو سو بيج هيج

ريام…خاله ضميني الله يخليج

علي راح يموتني

دخلتها امي بغرفتي وقفلت الباب عليها

عقيل…اخذت البوري من علي ودخلته للبيت

عقيل.. خاله جيبي مي بارد

على كيفك علي مو هيج هيه عرفت غلطها كافي

علي.. شنو عرفت غلطاها اليوم اموتها خلاص

عقيل…ولله انت دمرت احوالها

ولك وجها يجري دم ماتكدر توكف على طولها

كافي

علي….اشرب من دمها اليوم ووين تروح

مصيرها ترجع هنا اني اعلمها

حقيره ادبسز شنو ولج شفتيني عندي كرون

تضحكين عليه هاي واني احجي ليل نهار ووانصح بيها

عقيل…اهدء رحمه العمي اذا تحب عمي كافي

اخاف عليك لا يصير بيك شي

ولك انت اخوي ماعندي غيرك اذا يصير بيك شي

بيش تفيدني ريام

علي….رجعها عقيل رجعها هنا انت اخوي

واني ساكت الخاطرك

رجعها هنا اذا مااسود عيشتها

اني مو علي

بقيت كاعد بيت عمي يم علي اخاف علي

اريده يبرد شويه

بيني وبينكم برد كلبي بيها حيل

اشرت الخالتي جيبي غده

جابو الاكل وخلو كدامنا

عقيل…يله ااكل

علي…مااريد اكل اي شي ااكل سم ولكم اختي تغدر بيه

عقيل…اكل يله خليها تولي

محد يفيدك غير صحتك

بلكوه جبرته ياكل شويه بعدين شرب جاي

عقيل….جيبولنا فراش انام هنا

اجت زوجته سلمت عليه وخلت افراشات ثنيين

تمددنا اني ويااا لاهو كدر ينام ولا اني كدرت اغمض عيوني

للساعه اربعه العصر كعد راح غسل

جابولنا جاي

عقيل…يله اوصلك للشغل

علي…مااريد اتعبك

عقيل……كول يالله وين التعب

اخذته وصلته الشغله ورجعت للبيت

دخلت لكيت امي نايمه بغرفتها وباب غرفتي مقفول

عقيل.. هااا يمه

امي…شبيها ريام بس تبجي خليتها بغرفتك

ليش علي يتهدد عليها

اني اجيت اعبر على بيت عمك بس كلت عيب ايجوز شغله خاصه

عقيل…ماكو شي بس علي شاف ريام تمشي ويا واحد

بلشارع وضربها

امي…. يا يمه عقيل تمشي ويا ولد بلشارع

عقيل.. اي تكول احبه ويحبني

امي.. هيه تكول هيج ولله عيب

عقيل.. اي وربج وربي تكول احبه ويحبني

امي…يا يمه عقيل اضنك تعرف هيه تحب واحد وبطلت من العرس

عقيل…..يعني هيج شي تقريبا

امي…وهسه شلون

عقيل…تبقى عدنا كم يوم منا لمن يهدء الوضع وترجع البيتهم

امي….الله يستر من بنات هذا الوكت

جمانه السعيدي

عقيل…اكلت شربت

امي…ماقبلت لا تأكل ولا تشرب بس تبجي

اضنها نايمه هسه

عقيل….عوفيها اني راح احجي وياها

طلعت من غرفة امي دكيت الباب عليها

عقيل…ريام ريام احجي وياج

فتحت الباب وجها مورم من كد الضرب

عقيل…ليش ما اكلتي

ريام…علي وين بلبيت

عقيل…وصلته للشغل

ريام…الله عليك لا تخلي يقرب عليه

عقيل…..والى متى انتي غلطتي لازم تتحملين غلطتج

ريام….ولله يموتني خلاص

عقيل…تستاهلين الي تفرط بسمعة وشرف اهلها

تستاهل الموت

ياغبيه الحب مو فره بلشارع وكلام حلو

الحب ارتباط زواج ليش تعوفين واحد ساقط مثل هذا يضحك عليج

ريام…. انتم بس لو منطي فرصه هو يريد يتقدملي

عقيل…بعدج مصممه

ريام…لان انتم ما تعرفونه مثلي

عقيل…..انتي الي غبيه ومجاي تفتهمين

اذا مااخليج تشوفين حقيقته بعينج اني مااسمي عقيل

راح اخليك تشوفين شلون يضحك عليج

ريام….الله يخليك لاتعوفني ارجع البيتنا

عقيل…قابل تبقين بيتنا طول العمر

اني اريد اخطب وازوج وهاي غرفتي

بلنسبه اليه مااكدر اتحمل مسؤليتج قبل اكول

حبابه خوش بنيه

بس اليوم انصدمت بيج صدمة عمري

انت مو اهل للثقه ينخاف منج

ريام….بس كم يوم منا لمن يهدء علي

عقيل…خل يكون بعلمج

بعد مدرسه ماكووو طلعه من البيت ماكوووو

صديقات ماكوو

حتلو تتمرضين انجيبلج علاج بلبيت

واذا تموتين بعد احسن خفت وراحه

نخلص منج

ريام…حتى انت تكول هيج

عقيل…..ودي اشيلج هسه واخليج بيد علي حتى تعرفين الله حق على هاي المصيبه

حرامات طحتي من عيني