بيت جبر الفصل الستون 60 - بقلم هُدىٰ آذار

مَســاء الخير
ورجعنــا وياكُم بـ بارت جديد من قُصة
بيَت جبُر
للكاتبة : هُدىٰ آذار
لاتنســـون التصويت والتعليق بين الفقرات
قِراءة مُمتعة.
____________________

فَرس

بهل اثنـاء احنة كعدنـة ماحس الا طبت ضلينـا كاعدين

باوعت بغضب وراسًا باوعتلي وكلنلي

مسرّة
قليلة ادب وماتفتهم!!
من كالت هَيج ماحس الا امير كام بعصبية

امير
رجاءً الزمي حدودج، و كُفي الفاظج ترة انة محترم كونج مرأة وما اكدر ارد اعليج

مسرّة
لا رُد علية رُد وعلى شنـو ترُد اساسًا

العميد
هاي شجـاي يصير هنانة، كفوا عن الشجـار رجاءً، احترموا المكان الي انتوا بي

مسرّة
دكتـور ترة هيَ قليلة ادب و

امير
انتِ بـ ايّ سُلطة من سُلطج عليها جاي تكولين قليلة ادب !! انة مستعد احشمج هسة على اعادتج لهاي الكلمة !!!

العميد
استااااذ اميررر اهدئ، بَس شويـة اهدئ !!

امير جـان محيل معصُب وبشكل ما معقول، لزمت ايـدة باوعلي ورجع شعـرة لورة بعَصبية

العميد
بناءً على شنو تم استنادج على انها قليلة ادب مُمكِن نفتهم ست مسرّة ؟

مسرّة
دكتور اني عندي الهُم كوز بـ مُحاضرة البارحة

العميد
شبسرعة ست مسرّة البارحة يادوب مُحاضرة تعريفية للمادة

مسرّة
دكتور اني استاذة المـادة واني حاطة خُطة للمـادة هيج
واني البارحة حيل انزعجت من استاذ امير من اخذها وراح كدام الكل ترة بنهاية اكو بنات بالقاعة وهذا التصرف مايصيـر

العميد
هوَ ما ماخذ حبيبتة ست مسرّة

امير
موبس هجي دكتور انة كلت مُمكِن شوية احجي وي زوجتي وترجع جان عندي شي ضروري اكولة وهاهيّ، بـس هيَ راسًا تكلي مخصوم درجات ع الغياب
عفوًا ؟؟؟ من يمتى واحنة نخصُم درجات من الطلاب ع الغياب!
مو حضرتك انتَ تمشي وتوصي ب الطلاب
لو هـاي قوانين جِديدة؟؟

مسرّة بصايح
والله اني هاي قوانيني وانتَ ممضطر تسطي عليها

صوتهـا وصيحتها بوجها حسيت ماكدرت اتلافهن ولا كدرت اسكت عنهن اتنرفزت حَيل منها وكتلها بعَصبية قاتمة

فَرس
عفوًا ياريت تراعيـن صوتج ونبرة كلامج، لان بالنهاية انتِ دتحجين ويَ رجُل

ضحكت بصوت عـالي وبشكل حيل موحلو وكالت
مسرّة
وهسة اني تالي عُمري اخذ نصائح منج انتِ

جانت واكفة وتأشر على طولي من فوگ لجـوة

راد يحجي اميـر العميد استوقفة وكام
العميد
هذي التصرفات مو تصرفات دكتورة جامعية، هذا الردِح ماتردحيليا هنانة انة ماعدي جمعة نسـوان وتسويلي هجي ليناتجن عود، كِلشي الة احترامة تحترمين نفسج والمقابل يحترمج، اذا بجامعتج ذيجّ مسموح الج تسوين هجي هنانة ممنوع منعًا باتًا هذا الاسلــوب، وانة كلت وارجع اكول ممنوع تفشلون طالب كدام جماعتـة، واستاذ امير زميلج المفروض تقومين بالواجِب وتعرفيـن شلون تتعاملين بطريقة وديّة اكثر، باجر عكبة اخوج اختج يطبون هنانة وتحتاجي
هذا التصرُف غير لائِق ابدًا وما مقبول نهائيًا

مسرّة
بـس دكتور هذا تحيُز !

العميد
انة شفت اسلوبج مايحتاج حتى افتهم السالفة منج يكلك بـ اسلوب الانسان يضيع نص حگة وانتِ ضيعتي حگج بـ تصرفاتج هذا

امير
هاي اذا الها حگ

العميد
هذي الحـالة ماسمحلها تتكرر ابدًا ان كان عليج او على حضرتهـا الكُل مسؤول على احترامة لِذاتـة وللانسان المقابيلة واذا تكررت راح اخذ اجراء فوري بخصوص هل حـالة ومُمكِن يزعل تـرة

ماحجت شي ابد انخلست واني جنت حَيل خجلانة، خلت وطلعت هيَ واحنـة ضلينا واكفين مقابيلة

العميد
تفضلوا استـاذ امير

كعدنـا كدامة وحَسيت لازم اخطي خطوة شوية
فَرس
دكتور والله العَظيم اني ناوية اشد حيلي هالسنة حيل بس امير من راد يحاجيني هيَ نترت بـ وجهة وتكلة اغيبها فَ هوَ بطبيعتة رجُل اكيد ميحب احد يتحدى فَ كال الها هاهيّ وطلعنا

فَ المُحاضرة الثانية ابد ما توقعت انُ اكو امتحان اصلاً فَ انصدمت من كومتني وما كلت الها شي غير ماعرف صاحت وكلتلي ليـش كتلها مجنت موجودة البارحة كلتلي اطلعي برة

هيَ اخذت سالفة مجتت موجودة البارحة كَ حِجـة حتى تطردني بس كُل هذا واني ماحجيت ايّ شي ضليت ساكتة وطلعت بهدوء

العميد
شوفي بابا انتِ بحساب بنيتي وانة ادري كِلش زين امير راد يتقدم الها سابقًا، انة الي جاي احجيلج استاذ اقدم هنانة ومدرس امير ورايح بـ وحدة من مشياتة الهة فَ هيَ الظاهر ماتحملت فكرة استاذ امير يكمل ويعيش حياتة طبيعي فّ راح تحاول تنغص الجـو

فَ انتِ بكِل بساطة ايّ شي تسوي ايّ نعم حاضر ها اها شلج عدها ماتكليلي هيَ هم ما اخليها تمتد ولاشي اخليها تجي للثانية بَس وشجم شهر وتكضي وتصعدون للثالثة وهاهيّ

امير
طبعًا انة جان بـ امكاني اخرب الهة كِل النقل الله شاهد بس حطيت الله بين عيوني وكلت شعلية بيها، غير هيَ يصير بعينها وتكول شعلية بي

العميد
هاي شنو هاي استاذ امير شو حيل معصُب ما متعود اعليك هجي انة

امير
لا دكتور موهجي بس انة ماحب واحد يقلل من مكانتي هنانة وهيَ جاي تتسلق اعلى راس خطيبتي حتى توصل الي وكل ظنها تكدر تقلل من مكانتي
انتَ تدري كِلش زين انُ اهم شي سمعتي هنانة خصوصًا بين الطلاب تهمني اكثر من سُمعتي بين الاساتذة
فَ ماريد وحدة نفسها تجي وتخرب كلشي

العميد
لا لا تخاف انة هسة حاجيتها وبعدين هم احاجيهـا
بَس شوية بيت جبُر دمكُم فاير

امير
بس وي اليندگ بينة دكتور

العميد
جا هاي شلون راح تچد وياك، بنيتي مبين ماتحل رجل الدجاجة

من گال هيج استحيت باوعت لامير يأشرلي انُ
لا كُلش متسوي شي
ضل يوصيني وحجة وي اميـر هم وطلعنـا

فَرس
شكد حباب هذا العميـد احسن من عميد ذيجّ السنة بميت مـرة، شنو تعرفوا مبين يعرفك حَيل

امير
ايّ حبيبي هـذا يصير كرايب بيبيتي ابن عمها اللح وهوَ حيل ويانة يحِب جَدي ويحترمة وجَدي يحبة وشفتي شكد هوّ متواضع وخوش رجـال

فَرس
امممم ايّ مبين والله حبيتة

جان يمشي وحاط ايدة ع متني، نزلنـا من مُدرجات العمادة واني اكول اخر جُملة الي
ماحس الا وخر ايـدة وباوعلي

وجهة كُلة ملامح انزعـاج، ويباوعلي ومنتظر اكول شي

فَرس
ها شبيك

امير
شني حبيتـة ما تلزمين روحج شوية

مشيت كدامـة وكلت
فَرس
اوي يغـاررر

امير
تؤ فَرس شبيج

يباوعلي بـ انزعاج جبير، ضحكت ع منظرة من كُل وكلبي ابتسم بهدوء

لـزم ايدي وصرنـا نمشي سوى، الجو حلو ربيع و الطريق فاضي وادينا مشبوكات ب بعض

امير
تنوعيلي فَرس

باوعتلة

امير
احبج تدرين مو؟

ضليت اباوعلة بدون ما انطي ايّ جواب بس تعابير وجهي جانت تحجي

امير
أينَ ابتسامتُكِ البريئة إنني
‏أخشى بأن تغتالَها الأيامُ
‏ما زالَ في جنبيكِ خافقُ طفلةٍ
‏يلهو وترقصُ حولهُ الأنغامُ
‏لكِ من شِفاهِ الوردِ أجمل صورةٍ
‏تُحيي الربيعَ فتعبقُ الأنسامُ
‏مهما حمَلتِ من الأسى لا تحزني
‏فالحزنُ للوجهِ الجميلِ حرامُ

ابتسمت على شعـرة ردلي الابتسامة واخذ ايدي وباسها
قطعت نظراتنا بَ مُخابرة ايلول كالي امير كوليلها تجـي بالنادي كتلها توكف النة هناكَ ورحنـا الها طلب النا اكِل وهوَ اخذ جاي

ماحب يكعد ويانا ادري بي فعليًا ميحب يراوي لايّ احد الجانب الثاني الة وخصوصًا بدوام يحب يظل اكثر رسمية حتى وياي

كعدت احجي وي ايلول بـ حُب ع الي سوى وربطتها هيَ بموقف علي، اخذتنا السوالف ونسينا روحنة بيها فززتني مُخابرة امير باوعت الساعة بـ ١٠:١٠ وهي بـ ١٠ تبدي

رحنـة اني و ايلول للقاعـة بس المسافة جانت شوية بعيدة وصلنا دگينـا الباب باوع النة واشر ع ساعتـة
احنة ضلينـا صافنين

كتف ادي و باوع بجدية للطلاب وانطانة جانبـة
امير
خو انة كايل ماحب احد يطب وراي، شنو من اول ايام نسخت ونخرق قوانين

حصرتني ضحگة، باوعت لـ ايلول هم وجهة بي ضحگة
دنگت اني لان مُستحيل اكدر اتعامل بجدية بهيج موضوع و ايلول حجت

ايلول
ان شاء الله متتكرر مرة ثانية أُستاذ

امير
يلة طُبن بس هاي اخر مـرة
ايّ احد يجي وراي لا يطب اصلاً خل يروح للنادي وعمي فلوس اكلة علية المُهم مايجي ورايّ ويغثني

ماكدرت اتعامل بـ جدية وي كلامة ابد و ايلول كام تضحك متحملت وضحكت بس بصوت ناصي، طبينـة واني كوة احاول اخفي الضحكة من وجهي

بدت المُحاضرة وبـدة يشرح واني مركزة على ملامحـة ومحتارة هوَ يشبه منو كعدت ادور بينهُم لكيت ملامحة هااااادية وما تشبـه احَد

سأل سؤال بس اني مجنت مركزة، رفعت ايـدها اميرة من بين الكُل

امير
يلة شنو بس اميرة ستوني شرحتلكُمياه يمعودين

ايلول
مو ع اساس تركزين وتركزين
وصارلج ساعة صافنة ويـن

فَرس
صافنة بخلقتة

كلت هيج وايلول ضحكت
فَرس لو تموتين مـا تصيرين شاطرة مو تحبيط بس انتِ من گاعج هيج مسطورة سطر

فَرس
انجبي والله الا اصير شاطرة و اوائل هم

ايلول
يلة يالله الله يسمع منج ونجحينا وياج عود

امير
يلة اميرة كومي

فَرس
حافظ اسمها ما شاء الله

ايلول
شلون ما تردينة يحفظ اسمها وهيَ كُل ساع وكامت ومن العام

كامت حجتلة الجواب كال الها عاشت ايدج وكعدت
ضليت اباوع الها بحقِد حَسيت غرت لمُجرد مـا كامت وحجت، لو غير طالبة ميخالف بس اميرة ادري بيها من زمان جانت مُعجبة بـ امير

اجت نطراتة علية وجان مبين علية شكد مزعوجـة
تنهَد وصعد ع الستيج يكمِل

قررت احط بـالي زين ويا وافتهم الديحجي
وفعلاً ركزت ويـا

نزل يمنة ضل يفتر بيـن الـ ستولات(كراسي) مالتنـة ويحجي

تقرب يمي وضل واكف بصفي ويحجي واني احجـي ويا وهوَ يبتسم الي ويهز راسة، وقبل لا بروح التفت الي وهمس بـ

امير
عفية بالشطورة

ابتسمت وكملت المُحاضرة ورجعنـا بنفس اليوم للسكن، امير جان حيل فرحان بية وحمَسني هـوايّ انُ اصعد مستواي

فَ اتفق وياي هوَ يشرف على دراستي وضل بين الي يدرسني وبيـن الي يشرحلي ويكلي اقريها وتعاليلي

بنفس اليوم ايلول رادت تطلع وي علي كلتلها ضلي هوَ سمعني

علي
لا عيني شكرًا باجر عدي مهمة بالحدود ويـن اشوفها بعد خل تجي وعود انة ابوكلها الاسئلة من امير ماريدها تتعب

ضحكت عليّ و ايلول مكيفة ع الوضع كملنة دراسـة تقريبًا ساعة بـ ١١ وهاي البنية الي يمي حيل كئيبة ومُعقدة

سبحت وكملت اجيت ايلول بعدهي ماجايـة، احنة سكنة ب ٧ بعد ممنوع لا طبة ولا طلعة واحنة جنة ملتزمين هَيج بس هسة لمن صارت عادي ميهم لان الحارس يعرفنـا مخطوبيـن ويعرف الولد هم

راسلني امير واني امشُط

امير
ماذا تعمل الخمريّة

فَرس
دامشُط ستوني طلعت من الحمام وكاعدة وساكتة

امير
ايلول وعلي بعدهُم طالعين

فَرس
ايّ ما اجوا

امير
نعسانة؟

فَرس
لا بعدني شوية وانام

امير
جا يلة خل نطلع نص ساعة انة يمج جهزي روحج

فَرس
يا وين نطلع بنُص الليل

امير
هجي نفتر ونرجع ماعدنة شي

فَرس
فشلة من الحـارس امير شيكول

امير
شيكول يعني ترة عادي مراح يفكر تفكير موحلو لا تخافين
وانة هم عندي شجم سالفة ويـاج

فَرس
ماننزل من سيارة مو البس كُلشي ان كان

امير
ايّ ماننزل

بدلت ملابسي لبست قميص ابيض وبنطرون كابوي، وبمُناسبة انُ ماننزل حَطيت حُمرة حمرّة
ضليت منتظرة علما خابرني طلعت الة

لكيتـة نازل يم الحارس اول ما شال عيونـة علية، ضليت متفاجئة من طريقة نظراتـة الية، الي جانت بين تفحُص لملابسي وبين الدهشة وبين الغيرة، بس قبل لا ألتهي او اسوي ايّ شي، حسّيت بخطوات أمير تقترب بسرعة.

صار ورايَ وكام يحجي بـ استعجال وي الحارس
وسُرعان من كمل منة وتقدمنا شكم خطوة دارني وخلاني كدامة وصلنة يم السيارة واني ستوني طخت بـ بالي انُ الحارس موجود ويشوفني حسبالي محَد يشوفني نسيت سالفتة

أمير بصوت خافِت متوتر
صعـدي يلة، لا تخليني هَسة انفجر بوجهج

دخلت بسرعة للسيارة، كل حركة بيه مضطربة، عيونه متعصّبة وكل ثانية يرجع يباوع عليّ بنظرة غيرته ما محتاجة كلام.
ركب وسد الباب بعصبية، ضغط عالستيرن وصار يباوعلي بعصبية

فَرس
امم امير شبيك

أمير
شبيـة مو فَرس شبية هاي شلابسة!!

فَرس
غير انتَ كتلي مننزل من سيارة البسي ايّ شي

امير
والحارس والصخام!!

فَرس
نسيتة والله شسوي هسة هوّ وين شافني دنيا ليل

امير
يعني انة كتلج ما ننزل البسي ايّ شي قصدي لا تكشخين البسي جبة بسرعة واطلعي مو تكشخين هجي
المفروض هذا البس تشيلينة من قائمتج فردور فَرس رجاءً انة ابد ماقبل بي ابدد، انة وحدي الي الي حَق اشوفج بهجي لبس
وهاي الحُمرة الحمرة بعد الزواج اشتريها مو من هسة خازنتها

كال هجي ومَد ايدة بسرعة لشفتي ومسحها

فَرس
ياااا امير شبيج خربطتني

امير
ايّ تخربطت يلة امسحيها كِلهة

فَرس بانزعاج
شوف حتى ع خدي اجت صدُك تحجي

امير
ايّ صدك احجي امسحيهـا يلة

اتاففت ومسحتها لان خربطت وجهي تخربط جاب ايدة من شفتي لخدي

فَرس
شهل غيـرة الزايدة عود متسوى ترة

باوع الي وعيونـة جانت تلئلئ بطريقة غريبة وگال

امير
انتِ قصيدتي ومـا اقبل واحد غيري يقرة حروفچ

من گال هيج ابتسمت

امير
اوكفي اوكفي

سد السيـارة وكفها بمكانها ولزم موبايلة

فَرس
ها شكو؟

امير
مو اكلج انتِ الهامي، بس اصير ويـاج يجي ب بالي شي

ضليت ساكتـة وهوَ صار يباوعلي ويرجع يكتب وكانهُ ديرسم لوحة بيها صورتي، بس هوَ جان ديرسم حُبة
مرت ١٠ دقايق وهوَ يكتب اخر شي ابتسم وگال

امير
تقولين غيــرّة؟
أما تعلمين أنّ الغَيرة نارٌ تُشعلها حمرةُ ثغركِ،
وتزيدها فتنةُ خصركِ الميّاس إذا مال؟
يا فَرس،
إنّما أُحاربُ العيون قبل أن تفتك بكِ،
وأُقاتلُ النظرات قبل أن تسرق منّي ما أملكه.
دعيني أغارُ عليكِ
فأنتِ لستِ امرأةً تُمرَّرُ بين العيون،
أنتِ قصيدتي...
وأنا لا أسمح لشاعرٍ سواي أن يقرأ حروفك

هوَ يحجـي واني ابتسم اكثر واكثر
درت وجهي بخجّل وكتلة
فَرس
ايّ ميخالف بـس زايدة

امير
فَرس انتِ تتصورين هالغيرة زايدة؟ لا والله الغيرة إلها حق ويه ثغرج الأحمر وخصرج الي يدوخ وبعدين انتِ سمنانة ماريد تفاصيل جسمج تبين
آنة مو أريد أتحكّم بيج، بس شسوي؟ من أشوفج بهالجمال، أخاف، إيه والله أخاف، مو منج من الدنيا ومن عيون الناس.

فَرس
بس والله الدنيا ليل ومشافني يعني مالها داعي

امير
ها خنكول بلة انة يمج ماشافج والحُمرة ماتشوفج ناس هسة؟

فَرس
ترة هيَ نظرة عابرة واذا

امير
تره إنتِ مو عابرة وياي، إنتِ كلشي، فخليني أغار، لأن غيرتي هي الحبل الي ماسكني بيج، وما أريده ينقطع أبد.

سكتت وردت اقلب موضوع
فَرس
هاي الاشعار ليش جاي تجمعها

امير
لايهمج، ع العموم شحابة تاكلين ؟

فَرس
بكيفك

امير
فَرس اخذي موبايلي وافتحي وطبي ع اخر مُحادثة لـ مسرّة

من كال هيج صدمني، جان موبايلة محطوط ع الجكمجة اخذتة وفتحت لكيت مُحادثتهـا

المُحادثة منتهية بـ بلوك هوَ ضاربهيا
نزلت بيـها شي شي ورحت للبداية

مسرّة
هَسة هـيَ هاي تاليتك ؟ تروح وي هجي وحدة زعطوطة!

امير
منو الزعطوطة؟ انتِ ليش ماتحترمين نفسج
والله اتعجب ع البـشر ليش دائمًا يحبون ينهون علاقتهُم وهمة يبينون بعيونة ابشع شي، شكد نحاول ننهي الجـدال ونحافظ على صورتهم الحلوة المطبوعة براسنـا حَتى لو راحوا بس هُمة يضلون مُصريـن يشوهون صورتهُم، خطيبتي ممنوع منعًا باتًا تحجيـن عليها وممنوع تقللين من احترامـها لان بساعتها راح يكون الي وياج غير حجي تمامًا !

مسرّة
لا والله وتدافع الهـا هم، انتَ مقتنع بيها ؟؟ مقتنع انك حاب وحدة عمرها ١٩ سنـة صدك تحجي امير!

امير
انتِ شدخلج عسى ما احب ١٥ ماعتقد الج علاقة بيـة ومراسلة بعد لا تراسليـن ابد لُطفًا !

مسرّة
والله يالله ابد ماتوقعتك هيج ابد

اميـر شايفها وماراد، ع اليوم الثاني مراسلتة

مسرّة
هسة تالي كلشي توكفني كدام العميد حتى تدافع عليها ؟ لسة ممستوعبة وبس ابجي من اجيت لسة
امير اذا جـاي تغيضني بيها كول حباب بس لا تسوي وياي هل اساليب

امير
الي عندي سولفـتة يم العميد
واذا ردت اضيف شي فَ اكلج ابتعدي عن فَرس ما الج علاقة بيها عرسي بـ نص السنة وماريد ايّ شي يخرب علينا ف الله يوفقج بحياتج واتمنى الج كِل الخير ويـارب تلكين العوض الي يعوضج عن كلشي، وللامانة انة اتمنى الج الراحة والاستقرار والسعادة بس ابدًا مو على طاولتي ..

كاتب هَيج ومنطيها بلوك

امير
ماريد شي يصيـر من وراج وماريد اكرر الغلط مرة ثانيـة، هذا الي صار بكل حذافيرة ..

فَرس
دتكُلك تريد تغورني بيها ههه

امير
اكيد مراح تصدكين مـو؟ وليمتى هوَ الواحد يضل يتلطلط هل تلطلط ؟ هاي التصرفات تصرفات اطفـال فَرس، تصرفات واحد ما عندة ايّ مسؤولية ولا شغل ولا عمل وما مستعِد لشي جّدي

بالنهاية انة خطيبج مو حبيبج السري، وانة من اختاريتج لان الله اختارج الي هاي اول شي، ولان كلبي انعجب بيج هاي ثاني شي، واستمريت وياج لان عقليًا هم انعجبت بيج وتأقلمت ويـاج فَ انة مُصر اعليج و رايدج

تذكرين بالعطلة؟ مليت يوم، جزعت يوم، ماحاولت بفد يوم؟
لو استمريت احاجيج يومية بـ أمل ترضين !
مع انُ ردودج جانت تبين انُ انتِ مارايدتني اساسًا

بَس فَرس انة رايدج حاولي تستوعبين هشي، وهاي علاقة قديمة ما استمرت حَتى ف بعد من شنـو تغارين؟

هل انة هجي ناقص عقل واغيض شي دائمي بـ شي مؤقت ! لو المفروض يكون العكِس ؟

كبري عقلج حبيبتي

واعرف وثقي انُ انة صدِك احبج، وادري بيج تغـارين لذالك اخذت هواي خطوات علمودج واحترامًا الج وحتى ابينلج انُ رضاج وخاطرج اهم من الكُل

بعد ماكوم واحد حتى لا اشوف نظرات الغيرة بعيونج، وحسابي التليجرام راح ينمسح ويتبدل بـ حساب خاص، وامنع منعًا باتًا ايّ سؤال او استفسـار جانبي، و اكلهم ايّ احد عندة اسئلة يحضرلياهة بدوام يكلي المُهم ماشوف بعيونج نظرات الغيرة والزعـل

ها انطيني موبايلج
اخذ موبايلي مني وفتح الانستكرام

فَرس
هاي شدسوي امير

امير
صبُر

انصدمت انُ هوَ ديدخل حسابة يمي
امير
اه وهذا حسابي صار يمج حتى ع البنات انتِ ردي مالي دخل انة بس مو تخرمشين؟ نفس ردودي مُمتن وشُكرًا .

بعـد مدآمي تآمرين شي ؟

من سوة هيج ابتسامتي وضحت وصارت اكو ضحكة ع وجهي، ضحكة بيها ارتياح اكثر من الفرحة

صارت عينة علية
وضل يباوع الي وكأنه نسى الدنيا كلها. عيونه لانَت، وشفايفه ارتسم عليها نفس الضحكة بس بهدوء. مد إيده بخفّة، مسك كفي وهو يضغطه ضغطه صغيرة دافية، وگال بصوت خافِت:

امير
هيچ ابتسامة، تخلي تعبي كله يروح، وتخليني أتمنى ما تنمسح من وجهج أبد. كل خسـاراتي يمهة ربِح

فَرس
احبك امير، وبنفس الوقت اغار عليك
واحس غيرتي تقتل، يعني ماعندي استعداد ابـد انّي افرط بنظرة منك لغيري ادري هطبُع موحلو وادري مُمكِن يخسرني بس جَد ماكدر ماكدر .

امير
إنتِ مو وحدة بين الناس، إنتِ كل الناس.
فلا تفكرين يوم من الايام عيون أمير تصير على غيرج، لأن آنة من زمان سلّمت عيوني إلج وحدج.

كلبي كام ينبض بسرعة بس هالمرّة مو من الخوف أو الغيرة، هل مرة من ارتياح رهيب. حسّيت كل زعلي وكل شكوكي تلاشت وكأنها تطير وي الهوا. ابتسامة صغيرة ارتسمت على وجهي، عيوني دمعن، وحسيت روحي تخُف شوية شوية

هل كلام هو الكلام الي مو بس يطير زعلي، هذا يخلّيني أحس أني أغلى وحدة بالعالم. أحس كأني أحسن إنسان بالدنيا، وكل شي حواليني صار كله فرح

قضينـا وقت حيل حلو برة وجنة مستمتعين بكل لحظة تمر، وبنفس الوقت ماطولنا اقل الساعة ونُص ورجعنا

رجعت للبيت وجنت احجي لايلول وجِنت فرحانة حيـل ب الي صار ومن الفرحة احس كلبي مامتحمل وبس اضحك

مُمكِن يكونن هذني ابسط الاشياء بس اسعدهن بنسبة الي
ضلينـة نحجي بيومها هواي وجنت اعبرلة عن فرحي وعن حُبي الة بنفس الوقت وهوَ جان حيل فرحان لان صارلنة هـواي ماحاجين هَيج

اليوم الثاني ماجان عدنة مُحاضرتها فَ ماشفتها ابد، للعصُر تقريبًا جنت فاتحة حساب امير ودزت

مسرّة
ماجاي اكدر انساك ولا جاي اكدر انُ انتَ عفتني علمود وحدة هيجي

احس روحي اشتعلت نـار، هاي شبيها وشنو الوحدة الهيجي وكُل ساع وتجي تنقُص مني دزيتلها فويس وجنت حَيل معصبة بي

فَرس
يعني اني مطلوب مني احترام تجاهج حتى خارج الكلية بس دامج ماجاي تحترمين مكانتج فَ اني هم ماراح احترمج ابـدًا واحب اكُلج للمرة الالف اميـر عرفي، انتِ ماعندج كرامة لو شنو وطابتلة من حساب ثاني ديكُلج الولد اني مرتبُط زواجنـا قرب وانتِ مُصرة تتلزكين بي ؟
من جُرمن زواجج بالـ ١ ماستمر من كثر ما نيتج مو صافية عاد لو نيتج صافية جان استمر، مو انتِ متزوجة وبالج يم امير
اني اعرف بكُلشي يخصكُم واعرف بسالفة كُلها وامير هسة ناسيج نسيان تـام ومايريد يشوفج حَتى فَ لا تتوقعين انُ مُمكِن يصير شي لان زواجنـا مابقالة شي
وحرام والله حرام تصغرين بروحج هلكد ترة انتِ استاذة جامعية المفروض تكونين اكبر وارقى من هيج شي مو تتلزكين بواحد على ابواب زواج

كلتلها هَيج وحظرتها نهائي، شكد تفاهة
راسلت امير ع الواتساب وكتلة روح شوف

شـاف وكال اني خايف لا تشد ويـاج لا اكثر كتلة ميهمني شسوي خل تسوي

اليوم الي ورى جان عدنة مُحاضرة الها كعد امير وقراني كُلش زين وشرحلياهة كُلها

اجت النـة وجانت كلها حقد وغضب تِجاهي كومتني بـ اكثر من مَرة بس اني جنت اجاوبها بسـرعة

بالاخير رادت الاسماء الي شاركوا باليومي اشرت ع اميـرة وبنية ثانية و ولد ينطوها اسمائهُم اني سكتت ماكلت شي

ايلول
ست مسرّة فَرس كامت مرتين

مسرّة
جوابها ماكان كامِل

ايلول
شلون ماكان كامِل تـرة نفس الجواب

فَرس
اسُكتي ايلول ماكو داعي

مسرّة
ترة مو انتِ تعلميني بـ شغلي اني الي اقرر هنانة

جانت تحجي وتنتر اريد اسكت ايلول متسكت

ايلول
ايّ ست على عيني وراسي انتِ بـس ترة هيَ كامت يعني مو انصاف انج ما تسجلين اسمها

مسرّة
وهيَ ما تحجي بحلكها عظُم مثلاً ؟

فَرس
رفعت ايدي تجاهلتيني وكلتي بس ذولة يعني شسوي

مسرّة
معناهة ماريـد اسجل اسمج لان اجوبة ذولة جانت احسَن ماريد كلا زايد يلة

ايلول
هسة هوَ شنو الكلام الزايد احنة بس كلنالج تـرة سَت

مسرّة
اكُلج ترة اني موصديقتج وتحاجيني بهذا الاسلوب احترمي نفسج احسن، وكومي اطلعي منـانة يلة

ايلول
المفروض انتِ تكونين بعمرنا يعني تكونين اكثر تفهُم وقرب النـا موهيج!
ست انصحج تشتغلين على روحج واسلوبج وعلى شرحج هم
لان لا اسلوب ولا شرح ولا روح حلوة
وكَ نصيحة حاولي تفصـلين بين حياتج الشخصية وحياتج هنانة لان الظاهر انتِ متكدرين توازنين بينهن

گـالت هَيج بعصبية بس بنفس الوقت صوتها جـان هادئ وخلت وطلعت بسرعة

مسرّة
هـاي منو قليلة الادب عديمة الاحترام !!!!!!!!
منو هيَ وهيجي تحجي ويـاي اساسًا
كومي اطلعي وراها انتِ الثانية هم

فَرس
عفوًا ؟

كلت هيج لان ماسمعتها زيـن او مافهمتها بالضبُط

مسرّة
جاي اكول كومي اطلعي وراهة طرشة لوشنـو

تعجبت من الاسلوب البُدائي الي عندهيا كمت وكفت وكتلها

فَرس
بس اني ما كلت شي ليش دتطرديني ؟

مسرّة
لانُ يعجبني !!! هيج طخ براسي اطردج وراح اطردج عندج شي لو هم تتقوين بـ امير وتجيبي وتبجيلج دمعة ثنين يم العميد !!

جانت تحجي بـ عَصبية مُفرطة، باوعتلها بتعجُب وخليت وطلعت بـدون ايّ كلمة

التفتت منا ومنـا ايلول ماكو بس اني جنت معصبة لدرجة موووووطبيعية من وقاحتهـا

خابرتهـا اجتني ايلول جانت قافلة عليها تكُلي لو اني لو هيَ بالكُلية اليوم، ايلول اساسًا تحقد اكثر من عندي ع كُل واحد يأذيني يعني مُمكِن اني انسى بس هيَ متنسالهيا ابـد ونوب هيَ هجي سوت وياهة وعصبت عليها تخبلت

اميـر جان طالع لان اساسًا هيَ المُحاضرة الاخيرة وامير من الـ ١ ماخذنة وطالع

بهاي الاثنـاء خابرها علي حجتلة كُلشي وجانت حَيل معصبة
علي
ولج هـاي دواهة انة، امير الفقير شني، امير يستحي وعندة المرأة شي مقدس وكائن لَطيف يكلي انة والله عندي استعداد افصلها بس الرسول گال ( استوصوا بالنساء خيرًا ) يا رسول الله مو ذني مچلوبات مايجن بالعين والاغاتي لا عيب مـا احط گوري بگور مَرة دصبرن اصبرن انة جـاي هَسة
الا اطلع حرگة امير بذاك الوكت بيهـا
يُتبععع...

______________

شَمس

گلبي احسـة عُصرني من گال هيج، ماحسهة ثواني احسها اعوام صارت علية، وكمت اجيب منـا احُط منا بتفكيراتي

يعني سواهة سُراج وراح صدك يخليني اتزوج محمَد لو شنو

ضليت ساكتة واباوع لـ امير، وحَتى انفاسي بُطئن

جبُر
شكو خيرك بويـة

امير
تقديراتج ابد موخوش اليوم جنت بالـ عمادة وشفتهن ليش هجي وانة كلت تطلع اوائِل

من گال هجي احس اتنفست، يُمة للحظة جسمي كُلة رجّف

جبُر
يا جَدي جا شمالك جفلتنة يطبها مرض هيَ درجات دنيا اهم شي الاخرى

شَمس
اا شنو امير شطلعن تقيدراتي ؟

امير
عندج بـس بال مُصطلحات جيد الباقي كِلة متوسط

شَمس
ياااااا امير هاي انتَ صدُك تحجي شبيك

ضحگ ضحگة جبيـرة وگال بحماس
امير
اشاقة ولج طالعة الاولى ع القسم انتِ

من كال هَيج الضحكة مُباشرتًا انرسمت على وجهي وكتلة بحماس
امير
عزة كول والله

امير
والله

ضحكت بفرحـة وحضنت بيبي وجدو الي جانوا فرحانيلي حَيل، الكُل بدون استثناء فرحلي

ماجان على بالي ولا صُفر بالمية انُ مُمكِن اطلع الاولى اني جنت ادرس وبَس بدون هدف وبدون تخطيط وبدون حافز حتى، بهـاي اللحظة بالذات اجة براسي بابا صُفنت وتذكرت كلامة لمن يكُلي اذا طلعتي اوائل اشتريلج سيـارة والي تردي اجيبلجيا، بس اني اليوم ماطلعت اوائل اني اليوم طلعت الاولى

ماكدرت اتحكم بنفسي واني احضن عمو حَسن اتذكرت بابا وبجيت

شَمس
ياريتـة لو جان موجود ويشوفني هوَ جان يتمنة اطلع من الاوائل ويشوفني احسن شي ليش راح بعَد وقت والله

حَسن
يابعد عمـج يابوية هيَ هاي الدنيا تاخذ الزين وتخلينا بحسرتة، هوَ هسة شايفج وفرحان بيج وتلكينـة هوَ هم يتمنة لو يشوفج ويشبگج لا تزيديها اعليّ

شَمس
والله عمـو ماكدر كُلش مشتاقتلة وخصوصًا بهل لحظة هاي اتمنة يكون يمي ويشاركني بيها

عمـو حَسن من النوع الي حَيل عاطفي وكلبة فُطير لدرجة، هواي مرات يشبهون علي بي لان طالع على ابـو
وجان حَيل يحب بابا ومدللة بعتبارة الاخ الجبيـر وابوية الصغير ماتحمل وبجة وهوَ حاضني
وتكابلنـا ثنينة وضلينـا نبجي

بيبي ضلت تبجي ويانـة
وجدو انطعن طعن ضَل بس يشوف وغصة بكلبة

الولد ضلوا يحجـون مايصير وكافي كلهة سكتت بس اني ماكدرت احس حيل مشتاقتلة ومشتاقة حيل لوجودة وياية

علي
انة اخذج باجر والله وروحي وشاركي فرحتج وراح يفرح من غُبشة نروح للنجف كِلنا اذا هايّ

امير
عمي لا تخليني اتندم سولفتلج هاي بدال ما تفرحيـن نصبتوها عَزة اعلينـا

صالحة
ي يمة جا أبيها شلون ما تنصبها عزة
يكون التراب اخذني انة بمكانك يَ حسوني يَ يُمة

ضليت كااعدة بمكاني واشاهك بالبجي ماكدرت اسكت ابـد، صاحني جدو يمة خلاني بسِدة وضل يطبطب علية

جبُر
مرات الكلب مايكدر يستوعب الغياب، بس تذكري يابوية ابوج دايمًا يحبج حتى لو ما موجود وياج

كال هجي ومرر ايدة الخشنة على وجهي يمسح دموعي بيهن

دارني الة واني بعدني ابجي، حَط عيونة بعيوني وجانت عيونة مليانة حُب وحرص علية وكانهُ جان يكلي انتِ مو لحالج ترة احنة كل احنة وياج

ادري بالشوگ ثگيل بس حاولي كل ما تذكري تكون ذكراه ب راسج ضحكة مو دمعة

كالها وهوَ يجيبني لصدرة ويحضني علكيف

حسيت روحي ارتاحيت واني بين حُضنة وهوَ هيج يحاجيني

رُغم انُ هوَ جان متأذي ماراد يأذيني ابد ولا راد يشوفني متأذية

مسحت دموعي وضليت كاعدة بمكاني

جبُر
اي احجيلنـا

امير
هيَ عدها مُنافس واحد احمد صلاح

شَمس
احمد ابـن عميد الصيدلة والله عَجيب شلون ما طلعة هوَ الاول للامانة هوَ هم شاطر بس بمادة من المواد مادة دكتور علي موكُلش زين دائمًا يجيب اقل ب ٧ درجات هيج شي

امير
سُلطة الدكتور صلاح صح جبيرة بس انة يمي عرف و واسطات وسعيتلج بيها كتلهم هيَ شاطرة ودام درجاتها اعلى من درجاتها هذا مو حگ تطلعونة هوَ اول رحت لعميـد ثائر عميد العربي جَدي

جبُر
ايّ ونعم منة خوش رجال والله

امير
هوَ هم سعالي بيهـا والا لو ضالة ورة صلاح يطلع ابنة الاول وهاهيّ بس انة كتلهم ماعدي اكعدلكم ركبة ونُص الحگ يطلع يعني يطلع والي الة حگ ياخذة وياخذ استحقاقة
وفعلاً هُم بعد من شافوني هجي شـاد ماكدروا يحجون شي
وهيَ عدها بالكوري الاول شوية اخفاق بس بالثاني كِلة درجاتها كاملة هوَ عكسها بالاول كلهن كاملات وبالثاني كلش خافق
فرق بينهُم تقريبًا ثلاث اربع بوينتات كتلهم ما تاخدوهة هم سويتها بالضحك وياهم كتلة دكتور صلاح جدي يكاومك اذا طلعت ابنك واحنة بتنـا الاولى

فرحت حَيل بكلام امير ومُعاملتة وسعية تِجاهي

هاي الفرحة شوية كدرت تنسيني الي صاير وترسملي بسمة شويـة بوسَط كل الهوسة والضياع الي اني بيها

اليوم الثاني قررنـا نروح للمقبرة، الي راح فقَط اني وبيبي وجدو وعمامي ثنينهُم والولد، رحنـا بسيارتين سيارة علي جدو وعمامي واني وسيـارة زّعيم واجوا هوَ وسَجاد وغَيث وامير هم

جنت لابـسة عباية وشكلي جان مبين عليّ شكد تعبان وباجي لان طول اليوم جـنت اتذكر بابا وابجي
ماكدرت مابجي لان حسيت لازم يكون وياي بهيج يوم وجنت حيل مفتقدتة

مر امير بالجامعـة وجابلي شهادتي لان جان موعد استلام الشهايد ضلينـا منتظرينـة ب باب الجامعة حدما جابها وانطانياهة

جانت تقديراتي تتراوح مابين جيد جدًا والامتياز وتقدير العام كُلة امتياز

شكد ما جان اكو فرحة جان اكو غصة وشي ناقصني وبشِدة، رحنـا للنجف واتجهنـا للمقبرة اول شي قريب ماردنا نوصل علي كال

علي
هاي مو سيارة امير، ايّ وعلي امير، هااا الظاهر سُراج جاي

جبُر
ها عليوي متفق ويا

علي
لا وحق داحي باب خيبر علي فلا كايلة، بس تدري بي كل ليلة جُمعة هو هنا

جبُر
اليوم جُمعة مو ليلة جُمعة

علي
شمدريني يجوز بايت

جبُر
كلاواتك هاي خلها اعلى صلحة

علي
جدي جا انة اذا اريد اجمعكم بالمكبرة يم الميتين حتى الميتين يفزون من عركم خو بالبيت شموازيني

صالحة
جا سُراج مني شيخ، غير ابنينة وطالع من لب كلبنا هم اعلى كيفكم ويا هوَ الوكت متعبة وشال حالة

وصلنـا لمنطقة اقرب شويـة ونزلنا نمشي، خفت هواي انُ اشوف سُراج وجنت امشي ومتوترة

وصلنـا لقُطعتنة جانت مسيجة بس من السيـاح تكدر تشوف منو موجود، باوعنة سُراج كاعد يم قرب زينب وايدة ع القبر ونـايم

صالحة
يايُمة سودة اعلية يوليدي

اول مـا فتحنا الباب صوت الباب بي صوت فَ فز بسرعة دار وجهة النـة شافنة ومبين عليّ مصدوم

راحتلة بيبي اول وحدة تبوسـة وهو يحضنها، ملابسة كلهن تراب ومبين ستوة غافي

جبُر
تعال سلم ولك

ابتسم سُراج بهدوء واجـة سلم على جَدي وحضنة
باس راسـة وسمعتة يكول

سُراج
اعذرني جَدي، ماجان لازم اعلي صوتي وعليتة

جدو ضل يطبطب عليّ وگالة
جبُر
روح اعتذر من ابيك بوية

عمي حَسن جان ماخذ زاويـة و واكف وحيل مزعوج

صالحة
يمة لا تكدر بوجه ابنيك يمن فدوة اروحلك

بيبي جانت تهمس الـة، هوَ اجة، صارت عينة بعيني درت وجهي ورحت لبابا

سُراج
اعذرني بويـة ماريدك تزعل اعلية هجي

عفتهم يحجون وكعدت يم قبُر بابا، الشهادة جانت بـ ايدي
كمت احجي ويـا بصوت هادئ واني حاطتها ع قبرة

شَمس
بابا اني اجيت يجوز اكون مزعلتك بهواي شغلات ويجوز اذيتك بقبرك من ورة تصرفاتي ب اخر شي بس هاي اني اليوم جاية وجايبة شي يفرحك
بابا ياريتك جنت موجود وياي جان اكيد فرحت بيـة هسة بس انتَ ما موجود بابا، رحِت وعفتني وحدي بهل دنيا هـاي

جنت احاول ابجي بهدوء وما اخلي صوتي يتعالى، ما كدرت اكتم صوت شهگاتي الي اعتلن اكثر واكثر
وبلشت ابجي بصوت اقرب للمسموع

كعد يمي جَدي وهوَ يحط ايدة على كبر بابا، يوخر التراب بـ ايدة

جبُر
يَ حسنين يا بوية يجوز انة غلطت وياك وحرمتك منة وحرمت روحي منك بس انة جاي احس روحك يمي موجودة ب بتك شوفها اليوم هل راح تصيرلنة دكتورة ناجحة وترفع راسنة بيها يابوية
نام انتَ بوية ارتاح برد كليبك يبعد كلبي جاي يسمعوني حجي اعليك يكلولي حسنين يجينة بالحلم ويكل النا ديروبالكم اعلى شمس
بوية شمس ب امان، وما تنخدش خدش الا ان جان جبُر مات ولحگك وصار جوة التراب
يبوية اطمن لايضل كلبك اعليها

هوَ يحجي وانة اباوعلة ومصدومة شنو هاي وشديصيرر ولمنو بابا جـاي بالحلم !

كلامة كسر كلبي تكسيرررر
بابا جـاي لاحد ويكلة ديربالك على شّمس ؟

يعني بابا يخاف علية لسة ومايريدني اتأدة
يعني بابا ديحس ويعرف كلشي داعيشة!

ماتحملت الفكرة وبدني كُلة قشعر
صرت ابجي اكثر على كلام جدو الة

حَطيت راسي ع الكبر وجنت اناشغ بالبجي واحجي بهمس
بابا رايدتك، محتاجتك والله
وجودك غير حيل غير
محد كدر يعوض مكانك
وحتى لو عوضوا لابد تجي لحظة حزن لو فرح الي تخليني اموت وماكدر اتقبل فكرة انك مويمي
بابا حبيبي وين عفت شمسك وحدهي ماخذتها وياك بابا

شهادتي تبللت بالدموع وجدي يطبطب علية وبيبي تبجي ويـاي
خَطية عمو احسن اجـة كعد يمي وحط راسي اعلى جتفة وصار يبجي

مادري ليش هل يوم انعاد كلشي علينة وصار بالنسبة النة عزاء ثاني وكانهُ كل احنة جنة متعطشين حتى بابا يشاركنة بفرحة نجاحي

شريط حياتي وي بابا كُلة انعـاد علية لحظة لحظة من جنت صغيرة لحد ماكبرت، الوجع احسة استفحل عليّ والم الغياب صرت ماكدر اتحملة

بهاي اللحظة بالذات جنت رايدتة وجنت محتاجة اشم عُطرة وصلت بية المرحلة اريد انزل لقبـرة بس اشم ريحتة

ماكدرت اعبر بـ ايّ حركة ولا حجي ماريد سُراج يكول دتتعاير لو تريد تجذب انتباه، جنت بس ابجي وضامة وجهي بحُضن عمو حّسن

شفت سَجاد كعد كدامي وجان بيـدج كاسة ماي
سَجاد
كافي عميتي عيونج كافي شَمس
هاج غسلي وجهج كافي راح تموتين روحج

ماجنت مستعمة الة بـس جنت ابجي وبقوة
بالي محصورة يم ذكرياتي وي بابا وفاصلة عن كل العالم الخارجي

جبُر
كافي جدي كافي جا انة جبتج حتى تمردين ارويحتج بالزايد لو جبتج حتى ترتاحين ما عاولناج تصيرين زينة وامس ضحكتي شويونة وكلنة يا الله تمردين رويحتج هجي

وانتِ يامرة جاية تزوديها اعليها كولن يالله

صالحة ببجي
اي يمة كافي ما يصلح وعلي جاي نمرد رويحتة مرد كافي ي يمة كافي

سَجاد ماتحمل وحسيتة شكد وجهة تغير وخلة وكام
ماجنت سامعة منهُم وجنت بـس ابجي

علي
ايدها جاي ترجف، كافي شَمس شو تنوعيلي
كعد علي كدامي و وخر وجهي من ابـو
وجهي قابل وجهة

جان يحجي بـ اصرار وصرامـة اول ماشافني گال بحدة
علي
كافي راح تموتين روحج هسة توكعين هنانة شبيج شمس كافي

جاوبتـة بصوت خافت
شَمس
مشتاقة لبابا مشتاقة لريحتة علي
كلت هَيج وشهگت بـ اخر كلمة

باوعت لعلي عيونـة تتجول على وجهي من كتلة هَيج حسيت عيونة كامن يلمعن للحظة وحدة، مادري شبي بس وكانهُ شاف شي بعيوني ماكدرت افهمة !

خلة وكام بسرعة دنيت روحي لگبر بابا وصرت ابجي واكلهُم
عمو عوفني حباب بس خل ارتاح حباب عوفني

زَعيم
كافي يلة خلوها، ميلوا عن البت خل تبجي خل ترتاح

امير
شترتاح زَعيم هسة تتخربط

زَعيم
لا ما تتخربط ختطلع الي بكلبها وترتاح عوفوهـا

صرت احجي وي القبـر وي بابا ب ايامنا قبِل سمعت علي وهوَ يحجي

علي
جـا شكد كلام عمي ابو ايلول بي نظرة مُستقبلية من گالي انتَ شلون تريد تكون روحك وسوي عائلة وانتَ عمرك ما ضامنة، وشكد انة مافتهم من اكولن اريد بنيات
جا هجي انة ضامن حياتي ؟
وشلون بيهن من بعدي؟
وشلون اخليهن بهاي الدنيا واروحـن
شلون تغمض عيوني اساسًا واعوفهن هنّ وامهن يتلوعن وراي شلون الي كلب شلون
لا انة ماجيب بنات مستحيل اخليهن يتعذبن من وراي مستحيل

رفعت راسي اباوع كدامي علي گاعد وجان يحجي ونفس الصافن ويحجي من كل وكلبة وبقهر واستنكار جِدي

جبُر
جـا هيَ بكيفك يبوية، لو كِل واحد فكر هجي جا محد تزوج ومحد خلف، هي هاي الدنيا لا تعرف واحد بالجيش ولا تعرف واحد كاعد بالبيت، كلمن وحد يومة بوية محد يعرف يومة وساعتة شوكت

اجتني بيبي وصـارت تهدئ بية وسَجاد كعد يمي اطاني ماي وجبرني اشرب واغسل وجهي

ضليت گاعدة يمة بهدوء والهوى يمر ع وجهي بقوى لان مبلل وصافنة بهدوء

شويـة واجة عصفور وضل واكف على القّبر

صالحة
يكولون الميت تجي رويحتة اعبى شكل عصفور لو فراشة

نزيت من كالت بيبي هيجي وعدلت كعدتي وصرت اباوعلة بتمعُن العصفور يجنن وملون ضل يوصوص و يفتر ع القبر

ماحس الا انذب حنطة ع القبر، رفعت وجهي شفت سُراج ديذبة

اجة العصفور وصـار ياكل بي، صرت امسد ع ريشة بهدوء واني مبتسمة

جبُر
يلة كافي بجي اقروا الفاتحـة وخل نقرة قران وخل نمشي

قرينـا الفاتحة كُل احنة وبـدة غَيث يجود النة قُرآن بين قبُر زينب و بابا

جنة كُل احنة مُنصتين للقرآن، واني اباوع للقبر وصافنة وبكلبي اقـرة وياهُم

باوعت لشهادتي ماهيَ شو التفتت اريد اشوفها ويـن شفتها يم قبُر زينب وين مـا سُراج كاعد

حط عينـة بعيني وضل يباوعلي وساكت
درت وجهي وحَطيت ايدي ع القبر ونمت عليها
غمضت عيوني وضليت اسمع لـ غَيث
ودموعي تنزل بهدوء

كملنـا و زَعيم غسل القبر وسَجاد جان مشتري ورد حطة عليّ وحط بخور وسُراج حط حُنطة وكالوا يلة

طلع علي و زَعيم وامير سويـة وطلعت وراهُم
جدو وبيبي وغيث وسّجاد ورايّ

جنت واكفـة وصافنة لا اني رحت وي الولد ولا ضليت جوة
ماجنت اسمع صوت بـس اباوع لمكان مجهول وافكر شلون الدنيا هيج غيرت احوالنة بلحظة وحدة من ورة آل دحام

ماحسيت الا ع سُراج ساحبني بـسرعة وصاح
سُراج
شبيج شَمس ماتسمعين

جنت مامستوعبة شي، باوعت اكو ستوتة ورايّ ودك هورن

شَمس
اسفة

كلت هَيجي وطبيت لكيت سَجاد يكنس بالگاع وبيبي تعلمة سوي هيج وهيج حتى الگاع تضل نظيفة صبة وحدة

سُراج
هاي شهادتج

التفت الة بيدة شهادتي
اخذتهة من عندة وباوعت الـة منتظرة يكُلي مبروك
مادري شلون جرأت نفسي وكتلة بصوت خافت
شَمس
ماكو مبروك؟ قرايتك جابت نتيجة ..

اندار وكإنما يريد يطلع وگال
سُراج
انتِ شاطرة مالي دخل انة، مبروك ..

حجـة بهدوء وخلة وطلع بالباب، باوعتلة طلع جكارة وصار ع صفحة وصـار واكف ويدخن

عّجيب شلون سُراج يدخن !
انصدمت هـواي بي لان هوَ جان دومة يرزل بسَجاد اذا شرب
معقولـة بسببي عود الي صـار؟

اخ يا شَمس اخ، شستفاديتي هَسة من خليتي حتى بنظرة ما يباوعلج، واصلاً من بعد الي صار حَتى استحي اخلي يباوعلي

رحنـة للامام علي على نفس الترتيب مال سيـارات صلينا وزرنا وكملنا اني وبيبي وطلعنـا لكيناهُم كاعدين كدامنة اجانة سَجاد

باس راس بيبي وكال الها
سَجاد
مقبولة زيارة حجية

صالحة
انجب ولك حجية شني كبرتني ميت عام

سَجاد
اويلي يصلوحة تردين اصيحلج صلوحة يلة ترتاحين

صالحة
يمة شكد الك خِك يسجاد اكلك ما يبيعون احزام هنا اريدلَي احزام مال ظهر

سَجاد
شسوين بالحزام انة احزام ظهرج

من گال هّيج ضحگت
دار وجهة الي وكالي

سَجاد
البندورة الحمرة اسكتي لا تفضيحنـا منانة ناس
عابت حتى عابت وبلت لهل خلقة الحمرة الينطلع بيها

شَمس
هسة ماعرفت دتمدحني لو تذمني

سَجاد
اعذريني ماكدر امدحلي مرة غير سيوف العوبة

شَمس
وفوكاهة عوبة

وصلنـا الهُم كعدنة سوية
كالوا انُ حيجيبون اكل

جابوا اكل اكلنـا اباوع لسُراج ولا يباوع الي عكس الايام القديمة جنت هواي ارفع راسي والكا يباوعلي، وحتى هسة من تجي عيني ب عينة يتلافني وكإني ما موجودة

حتى ماجان الي واهس اكل ضليت انقش تنقش كملنـا ورجعنا اول مارجعنـا ذبيت روحي ونمت لان مكدرت انام بسيارة ابد وكضيتها راسي مصدع

سُراج مارجع ويانة مادري ليش لليوم الثاني يلة اجة وجان متلافيني بشكل كامل

اطب منا يطلع منا يكولون شَمس يدنك راسة تصير سالفة تخُصني مايهتم ولا كانهُ جاي يسمع شي

هـواي مرات تصير ونتلاگة سوية ونكون وحدنـا، بما انُ هوَ انسان يسهر لل١/٢ واني هم اسهر لهل وقت هذا

بس يتعامل وي موضوعي وكانهُ مو انسان عادي لا شخُص ما يعنيلة اساسًا

بدت تمضي الموال واحنـة ع هذا الاساس
هوّ مُتجاهل تـام
واني ب انتظار مُبادرتة تجاهي وان كانت خطوة بَس اني اكمل الباقي المهُم ميضل يباوعلي بهل نظرات القرفانة مني ..

جنت اتمنى احاجي و شكد ما احاول اجرئ روحي الكي نفسي فاشلة بهشي

مُضت الايام بـ هدوء تام ومن دون ايّ حدث يجمعنـا اني وسَجاد، وسالفة الخطوبة مال محمّد ما نجاب الها طاري اساسًا، عرفتة جان بوكتها مُجرد يريد يهددني

اجـة الدوام وجَدي جان يكلي جدي داومي بالعباية احسلج بوقتها اني انصدمت حيل وبنفس الوقت ماكدرت استحي لان حيل اخجل انّي من جدو وماكدر اجادلة ع ايّ شي يكوليا

حجيت وي بيبي و وي امير بنفس الوقت
كتلة كولة البس جبب عريضة و عندي مختبرات وكذا ويوجب علية
امير كلي ماعليج اني احاجي

وفعلاً امير تكلف بالسالفة وكلي فهمتة وقنعتة هاهيّ
بدون ما اكول بيبي كالت لجدو خل تطلع تشتري الي تحتاجة
وجدو انطاني فلوس

طلعنـا اني و امير لان امير شوية خُلكة طويل
اشتريت الاشياءات الي احتاجهُم للدوام

موبايلي جـان عند سُراج وايّ احد يسئلني وين موبايلج اكُلة مكسور وممحتاجة عندي ايبـاد

قبل ٤ ايام من الدوام بنفس اليوم الي رجعنـا بي اني وامير بليل من المحلات، جان الكل كاعدين سوى
كعدنـة سوية شويـة و جدو خابر غَيث
كلة لا تنسى الي كتلك عليّ

للـ ٩ تقريبًا اجوي غَيث وسَجاد من المحلات
وسّجاد انطا علاكة لجدو
صاحني جدو اكعد يمـة وگالي

جبُر
ترة انة ماناسي هديتج مـال شهادتج
وهاي هديتج وتستاهلين الاكثر بوية

ابتسمت الة وحضنتة وكتلة شُكرًا جدو
فتحتها حتى اشوف شبيها
باوعت كارتونـة موبايل

سَجاد
جبتلها احسن من الي كتلي عليّ جدي جملتها مني، حتى احسن من موبايلي بعد شتريد شَمس

جبُر
يلة انة انطيكياهن بس لا تخبصنـا

سَجاد
لا عمي مني نحتار بجبر و بزرة انة شلون بية مادري

جبُر
ولك جبُر يلعب وياك دعبل احترم نفسك لا اكوملك اكسرك يامكسور الرگبة

شَمس
جدو بس اني ماريد مامحتاجة عندي بس ايبادي كافي

امير
هاي شلون حجي الايباد قابل يصير بي شريحة واحد يريد منج شي مُخابرة كذا اجاج دوام

صالحة
لايمة مايصير تضلين بدون موبايل شلون تخابرين ابن عمج تشوفين منو يجيج ما يصِح مايصِح

هُمة يحجون واني عيني اجت ع سُراج الي جان يباوع بـ غضب جبير ومايكدر يحجي، اباوعلة خلة وكام
اخذت الموبايل وسكتت حتى ماطلعتة من الكارتونة

لليل تقريبًا ضليت افكر شسوي وشلـون
لكيت انسب قرار اروح وانطي لسُراج
لان ادري راح ينتقم مني ومايرتاح ابد اذا يضل يمي

لليل تقريبًا لمن الكُل نـام مافتحتة ابد ولا حَتى طلعتة من الكارتونة، لبست ونزلت ضليت كاعدة الساعة بـ ١٢ وسُراج ماكو مادري بي اذا طالع او بغرفتة

ضليت منتظرتة مـاكو
ايبادي جان يمي طلعت مُسلسل عليّ وكعدت اباوع
شوية وشفت بالكامرات سُراج ديطُب للبيت بسيارتة

لان هوَ بـ هاي الايام اشترة سيـارة، باوعتلة وعدلت كعدتي وتوترت احس كُل الكلام تبخر مني وخفت شلون راح اكدر اواجهة

اجـة طب وجسمي احسة تكهرب من الخـوف، باوعلي وتفاجئ وتقدم الي وحجة ب انزعاج

سُراج
صارت عندي فوبيـا من الكعدة وحدج وهل مكان شسوين هنا

شَمس
جنت منتظرتك

من كتلة هيج باوعلي بـ استغراب
شلت العلاكة مال الموبايل ورحت يمـة قدمتلهيا

شَمس
سُراج، اني صح غلطت بس صدك جانت لحظة غَضب، من اول لحظة ومن حاجيتوني انتَ وامير وعلي اني تغيرت بَس مادري شنو صار بـ ذاك اليوم وجَد جنت احجي بدون وعي حَتى
هذا الـ موبايل وماريدة اساسًا
بس الي اريدة ما تعاملني هيج، اني ماريد شي منك والله بس اريدك تغير الفكرة الي براسك عني
اني مو بهالسوء سُراج صدكني

سُراج بحِدية
مافهمت ليش جاية تحجيلي هَسة بي شتردين مثلاً ؟ اضحك و اسولف وياج لوشني ؟

من كالي هَيج احسـة حرجني حَيل، وحسسني بنبرتـة داذب روحي عليّ خجلت وضليت اباوعلة وماعرُف شـرد حَتى

ضليت صافنة بوجهة وساكتة

سُراج
شني جاية حتى تصفنين بوجهي ؟
احجي التردي اريد اروح هسة انة حتى مافهمت شتردين

شَمس
ردت ، ردت انطيك الموبايل

سُراج
ايّ جيبي زين من حسيتي على نفسج جـان جبتة انة لو ما انتِ جبتي

اخذة من عنـدي وخلة وصعد وعافني بصدمتي
ع نُص الدرج وگال

سُراج
لا تضلين هنـا اصعدي بغرفتج

هذا شلـون ديعاملني وشهل قسـاوة هاي !

دموعي من القهَر وحدهن نزلن وجنت ميتـة من القهَر ومن الفشلة الي فشلنياهة بـ اسلوبة

شي يكول حقة
وشي يكول مغرور شلون يتصرف هيج وياي ويبدي يكرهة

صعدت لغرفتي وجانت مشاعري جـواي متضاربـة بشكل وبنفس الوقت ميتـة من القهَر

بدت تُمضي الايام وسُراج جان متجاهلني تجاهُل تـام، قبِل يوم الدوام بـ يوم واحد بليل جنت كاعدة اني وسيـوف بغرفتنـا فجأة واندگت الباب

طلعت سيـوف
سُراج
سيوف تكدرين تسويلي جـاي راسي حيل جاي يوجعني وماجاي اكدر اركز حَتى انزل واسوي

سيوف
يـا سودة علية شبيك هَسة انزل اسويلك

نزلت سـيوف واني مستغربة سُراج شبي، ضليت بغرفتي وقلقانة عليّ فجاة اندكت الباب

شَمس
منو ؟

سُراج
اني

شَمس
سيوف نزلت دسويلك الجاي

سُراج
ارد احاجيج ارد اطُب

كمت بسرعة من فراشي لبست حجاب ورجعت كعدت ع جربايتي وغطيت روحي ب البطانية وكتلة تفضل

طَب للـ غرفة وبدون كلام حط الموبايل ع الجرباية

سُراج
هـذا الموبايل يمج سويتلج تليجرام وربطتة يمي و واتسابج ارقامنـا فقط ممنوع رقم لا زميلة ولا ايّ احد الانستا ما الة ايّ داعي وحساباتج كلهة مربوطة يمي والايكلود هم سحبتة من موبايلج يعني ممنوع تنزلين ايّ تطبيـق وايّ حركة ايّ شي انة هنا والله اطيح حظج واسويها كربلاء عليج خاف عبالج سكتتلج شجم مرة استخطيتج هل مرة ابد ترة حتى حجاية ماحجي وياج الله شاهد كُبل لجدي
فهمتي؟؟

شَمس
سُراج والله...

سُراج
ماريد حجي زايد
فهمتي لو لا !

شَمس
ايّ فهمت

سُراج
هاي اولاً نجي لثانيًا، اسمعيني زيـن محمَد و امور محمَد ومدري شنو تنسيها !!! اذا شفتج بنظرة وحدة بس نظرة والله العظيم العب بيـج جولة، انة حاولتلج بنقلج لاهلية بس ماصارت فَ تحترمين نفسج وتجرين عدل وما تدخلين بـ ايّ سالفة تعنيلة

ولا عبالج سالفة ما توصلني وتلعبين بكيفج هناك، من الاخير انطيجياهة انة عـايف ناس اعليج، وهجي موصيهُم يمشون وراج ويشوفون كل تحركاتج ومن قسمج هم شتردين بعد !!

شَمس
انتَ صدُك تحجي لو تشاقة!

سُراج
متشاقي وياج قبل؟ شكلي شكل واحد يشاقة؟
لا

شّمس
سُراج انتَ دتفضحني لو شنووو!

سُراج
انة اعرف شتصرف المهم تحترمين نفسج ونفس ماكتلج تسويـن، هوّ الخايس ماعتقد اصلاً يباوعلج بعَد لان يدري بـ اقل زلة منة يجني اعلى نفسة وانتِ هم اوصيج والله اقل هجي شغلة وحدة اشوفها غلط ابطلج واكعدج بالبيت

ولو الفرص الجاي تنطة الـج هواي بس هاي اخرتهِن .

حجة هـيج وخلة وراح احس يمرد كلبي بكل كلام يكولة الي
فتحت الموبايل مسوي نفس ماكايل بالضبُط ومبين عندي انُ الموبايل مالتة فاتح اغلب تطبيقاتي

الصُبح كعذت بدلت ملابسي لبست جُبة عريضة واخذت لابكوتي(صدرية) وياي لان جان عندي من اول يوم مُختبر، بيبي لحت علية اشتري شالات الوان كلتلي لا تذبي بس عاد البسي حجاب الوان مايصلح ومدري شنـو فَ لحت علية هواي فَ اشتريت الوان، لبست شـال چويتي وطلعت من غرفتي

اتلگاني سُراج واگف وعينـة ع موبايلة ويباوع عليّ وبيدة لابكوتة، اول ماباوعلي انطاني خطفة سريعة وخلة ونزل وكانهُ ما شايفني حتى

نزلت ورا، جانوا كاعدين كُلهم

صالحة
هلا بـ دكاترة العائلة هلا بـ شمعة البيت

حَطينة لابكوتاتنة ثنينة ع التخُم وكعدنـا يمهُم ناكل
كمنـا اني و اميـر كملنـا اول النـاس وطلعنـا رحنـة للجامعة

امير رافقني لحد ما طبيت لقاعتي يـلة راح، اول ماطبيت كعدت بمكاني بدون ما اباوع لايّ احد

مضة اليوم واصلاً ماشفت محمَد بصورة تامة، اخذنة بس ثنين مُحاضرات وكملنـا راسلت امير كلي راح اخابرلج سُراج

اجـاني سُراج واخذني بهدوء تـام

بدت تمضي الايام هيج
وسُراج جان يسوي فعاليات ع طول الوكت الي، لو يدخل لحساباتي وتجيني اشعـار انُ هوَ دخل لو ع فجأة اكون كاعدة وبدون ما احد يدري ياخُذ الموبايل وشوي يرجعليا

يوم من الايـام جنت كاعدة وحدي بالحَديقة دزلي رسالة
سُراج
شجـاي تسوين ؟

صفنت ع كلامة وكُا ظني راد يبادر لكلام حلـو حتى يصلح بينة

شَمس
كاعدة وحدي هيج

سُراج
ايّ ادري كاعدة وحدج بس خومـا كاعدة تنتظرين احد !!! شسوين بهل مكان وحدج؟ مو كتلج تكعديـن بمكان عام او بالاحرى ما تطلعيـن من الـ قاعة !

شَمس
انتَ شمدريك!!

سُراج
شعليج شمدريني المُهم لا تكعدين وحدج بهل مكان ارجعـي لقاعتج بسرعة

هوَ يحجي واني احس كلبي بدة ينبض بقوة من العَصبية الي اني بيها، كمت من مكاني اريد اشوف منـو الي جان يمي ومنو الي كايلة عليّ

التفت ما الكي ايّ احد !!
ضليت متفاجئة شديصيـر
عود هذا صدُك يحجي وحاط احد يراقبني !!!!

هوَ اليوم الصُبح كال عدنة عمليات اليوم هواي يعني مُستحيل طالع

رحت لقاعتي واحس انفجرت فجر عليّ
شّمس
سُراج انتَ صدُك تحجـي وصلت وياك لهل حَد ؟؟؟
تحُط ناس تراقبني !! ونوب من قسمي
انتَ تريد تفضحني او شنو شيكولون علية هسة
ترة ماكو داعي لكُل الدتسوي
والله دتبالـغ قابل شسوي شسويي!!!
كتلك بعد ماسوي شي والله ماسوي شي وروح بابا ماسوي شي
شتريد بعددددد شتريدددددد

ماشاف الرسائل ضليت منتظرة يرد مارد، كلت ممكن يكون مشغول
رجعنـا للبيت خفت عليّ كلت خاف شو شبي
شبي مايرد ؟

رحت نمِت للعصُرر شفتة جوة وحاط موبايلة يكلب وطبيعي

هـا !!!
هذا شبييي !
وصلت بي المرحلة مايشوف رسائلي ابد!!

اعصابي احسـهة تلفتتت من ورى وهوَ بكُل بساطة حاط موبايلة يكلب ويبتسم وعـادي طبيعي

لليل تقريبًا تعمدت اقرة جوة حتى بس يجي احاجي
اول ماطب كمت داحاجي
هوَ متجاهلني وضل يمشي يريد يصعد

شَمس
سُراج اريد احاجيك

سُراج
مالي خُلك تعبـان
اذا شي ضروري اختصري
واذا شي سخيف فَ لتحاولين تحجين بي

شّمس
لا موو سَخيف
سُراج انتَ شنو حاط مُراقبة ع..

بعدني ما مكملة انطة ملامح الانزعاج من كلامي وخلة وصعَد

صعدت ورا بعَصبيـة واحاجي

شَمس
تـرة داحاجيك سُراج شهل تجاهُل

سُراج
وانة مالي خلك الج عندج شي !!!!

شَمس
بس انتَ دتزودها وياي والله

سُراج
هذا الموجود تردين تحملي ما تردين تاكلين خـرة وتكعدين بالبيت احسن

شَمس
على فكرة بهل اسلوب انتَ ماراح تبين واو راح تبين بصورة حيل موحلوة

سُراج
ههههههههه تخيلي اريد اكون بصورة حلوة
وبعيونج انتِ !!!!!!!
تخيليييي بَس

گال هيج وهوَ يضحگ من كل وگلبة صعَد فوگ واني احس بروحي انمردت مرد

شَمس
حسبي الله ونعم الوكيل سُراج ع الدتعيشنياه

كلت هيج ودمعتي نزلت ردت انزل ماحسيت الة نزل خطوتين ولزم ايدي بقـوة

سُراج
احترمي نفسج واحجي عدل احسن مِمّا اعلمج شلون تحجين بطريقتي، دور الضحية كافي تاخذي مو قرفنا منج ومن حركاتج

هوَ يحجي وعيوني تباوعلة بصدمة
ماتحملت ودموعي نزلن بـسرعة

باوع لعيوني وضل ع نفس الغضب مالتة ولا تزحزح شوية وخلة وصعَد

والله العظيم قرفني بنفسي والله العظيممممم
يعني هسة هو اكيد شايف رسائلنا ماشايف شلون احاجي ماشايف برودي ماشايف مسجاتة شكد ومسجاتي شكد ماشايف شكم مرة مارديت عليّ اصلاً !!!

نزلت للصالة وصرت ابجي بجي هستيري
يفشلني ويتجاهلني ويحسسني بـ انّي اوصخ خلق الله اني
مُستحيل مُستحيل احاجي بعد مُستحيلللل اذل روحي الة بعد لو شمهما صاررر

ضليت ابجي وافتـر بالصالة باحثة عن نفس اتنفسة، بهل يوم هذا حَسيت روحي انهاررريت كُليًا بسبب تصرفاتة وياي

كوة هدئت روحي وسكتت صعبت لغرفتي هوَ فتح الباب باوعلي بسرعة غضيت نظري عنة

سُراج
اوكفي !

وكفت وكُل ظني راح يسئلني شبيج او يعتذر بالاحرى
صار كدامي وفجأة اخذ الموبايل مني

سُراج
شعدج تبجين ما تكليلي على محمَد لو شني

من گال هيج شهگت بصدمة!!!
وهوَ ولا اهتم اخذ الموبايل وطبيعي
روحي احسهـا انوخذت منـي
من الصَدمة الي صارتلي حَتى ماحجيت حرف ضلت بس دموعي تنزل وساكتـة ومصدومـة

سُراج
هاجيا

كال هَيج ورفع راسة الي
ماتحملت وشهگت ب بجيي

شَمس
مارررريد خلي الك كرهت حتى روحييي

كلت هيج ومشيت بـسرعة، اسمع صوتة وراي وهوَ يكول
سُراج
انتِ الوصلتي روحج لهل مواصيل فَ لا تلوميني

رحت بفراشي وضليت بـس ابجي، وحتى نوم ماكدرت انـام للصُبح كعدت ع صوت تنبيه دزيت لـ امير انُ اني ماريد اداوم مالي خُلك

كعدت متاخر اول مافتحت عيوني شفت موبايلي محطوط يمي كلتلي سيوف سُراج كلي حُطيلهيا يمها ناسيتة جـوة

نزلت يمهُم وبيبي وجدو ضلوا يسئلوني شبيـج وشكو كلتلهم مابية شي بس تعبـانة شوية

اليـوم الي ورا جان عدنة تكريم جنة كاعديـن وامير يحجي
امير
جَدي يُمة باجر تجون ان شاء الله هـا

جبُر
ايّ ان شاء الله نجي شلون لا

حَسن
وانة هم اجـي

سَجاد
وانة هم اشوف اذا كدرت اطلع من جامعتي اجيكُم

طبعًا سَجاد دخل بـ جامعة اهلية قسِم قانون

شّمس
بس اني ماريد اروح حيللل تعبانة

جبُر
ولج انتِ والله راح تخبليني بكلمة تعبانة
شبيج جدي شو ٢٤ ساعة تعبانة شجاج

امير
يمعودة وانة تعاركت علمودج تالي تروح لابن استاذ صلاح والله اذا ماحضرتي

شَمس
امير شدخل وهسة شراح تسويلي اذا كرموني مالي خلك حيل

امير
شَمس ترة كلية الصيدلة صعبة، ويحاسبون ع الغياب مرات فٍ لا تغيبين هجي نوب من اولها صدك تحجين

شَمس
امير والله ماريد

جبُر
لا بوية ترحيـن شني هسوالف ممنوع

ماقبلوا ابـد وكلهم ضلوا يحجون علية، اليوم الثاني رحنـا وجان وياي جدو وبيبي و امير و سَجاد اجة هم وعمو حَسن

شكد ما جان الكُل فرحان الي والكُل يتمنى مكاني اني جنت اتمنى بـس ارتاح من الي اني بي واتمنى ابطل من كُل الجامعـة

كرموني وكملـت واجيت يمهُم وجدو باسني ولبسني گلادة ذهب وباسني بـ راسي

بهل اثنـاء واحنة دنحجي سمعنـا صوت ورانا

محمَد ( حفيد مجبِل )
السلام عليكُم

درنـا وجهنة كل احنـة، جان واكف شـاب انيق و وسيـم كرموا قبلي بـ تكريم طلاب الطب العام ك الـ ٢ ع المرحلة

اتلگـا جدو بـ سلام حـار هوَ وبيبي وامير
عرفتة هوَ هذا نفسة حفيد اخو بيبي

كمل منهُم واندار الي وگال
محمَد
الف مبروك ان شاء الله منهـا للاعلى

ابتسمت وهزيت راسي كَ شكُر بس جانت مبينة ابتسامتي تسليك، درت وجهـي وسويت روحي العب بموبايلي واسمعهُم يحجون شلونة ابوك وشلونة خالك ومدري شنـو

ضـل الولد يعزم بيهُم بس جدو كالة وراي مشية
محمَد
هم ايّ شي تحتاجة اني هنا وبالخدمة

امير
ماتقصر حبيبي انة موجود، انتَ الي اذا تحتاج شي تعال وكلي

محمَد
حبيبي امير قابل ما مجربك وكفاتك وكفات انتَ

ماجت عينـة بعيني اساسًا، نظرت الة بس نظرة وحدة من اجة وبعدهي كعدت وهاهيّ

راحـوا هُمّ وخلوني بالجامعة غصُب بعد ماحرمصتلهم حتى ارجع بس امير سجينة الخاصرة الي ماقبل وكلي تفوتين لمُحاضراتج الباقية

محمَد وي مرتـة دهن ودبس واصلاً مو بحالي واني فرحت لهل تغيير وما جنت اهتـم او اباوع الة حَتى

رجعنـا بنفس اليوم وجان الوضع طبيعي
اليوم الي ورى ردت اغيب وامير كالعادة ماقبل
ونزل لجدو وصار يشكيلة علية وعلى غياباتي
جدو ماقبـل وكعد يحجي علية ويكلي انتبهي لدروسج

ابتليت على عمري وطلعت الاولى احس امير حتى مقعدي كَ مُعيدة حجزليا يريد يوسع قائمة ال جبر الجامعية هم يدرس فَرس ويحسن مستواهة وهم فوك راسي يريدني اقرة واحافظ على مستواي

داومت مع انُ جنت مالي خلُك اخذت مُحاضرة اولى واحس نفسي دخت رحت لنفس مكاني جنت ماخذة اكل و اكل وصافنـة

شويـة واندزتلي رِسالة
سُراج
ليش ضاربة مُحاضرة شعندج !

غمضت عيوني بـ عدم صبر وكمت بسرعة اريد اشوف منو الي واكف وديشوفني، باوعت ماكو احددد ابد وكانهُ شبح ويختفي

شَمس
ماعليك بيـة رجاءً كافي لا تلعب نفسي عـادددد كاعدة وحدي اريد استرخيييي اريد اريح بالي اريد اموتتتت شوية انتَ شعليك بس كلي شعليككك!!! والله راح تموتني خنگتني خنگ كافي !!!

ساف الرسـالة ومارد من الاساس
الله يلعنك سُراج الله يلعنك والله كرهتني بروحي حتى

مُضت الايام ع نفس الحـالة وسُراج بكُل خطوة اخطيها جان يدري ويجي ويحجيلي
- شجاي تسوين
- ليش كاعدة وحدج
- ليش ضاربة مُحاضرة

واني بكُل بساطة اجاوب بهدوء رُغم بداخلي براكيـن ..

يوم من الايام جـنت امشي وجِنت تعبانة حيل والشمس عاليـة، حاطة الايباد ع وجهي حتى اشوف ويحميني من الشمس العالية وعيني ع الكاع وامشـي

شفت كدامي صـار واحد رحت للجهة الثانية سمعت اسمي
محمَد ( ابـن مجبِل )
شَمس

التفتت الـة لكيتة نفس الولد حفيد اخو بيبي
شَمس
اهلاً

محمَد
شخبارج ان شاء الله بخير

شَمس
بخير اني اترخص عندي مُحاضرة خوماعندك شي ؟

محمَد
لا ماعندي شي جنت رايد اسلم عليج بَس
واكلج اذا تحتاجين شي اني موجودة

شَمس
شُكرًا

كلت هيج وخليت ومشـيت حتى اسلوبي صار حاد وحيل موحلو من ورة الخـوف والتوتر، وصلت لقاعتي وبدينـة بالمُحاضرة
شوية شفت موبايلي ينفتح ويطفي ينفتح ويطفي إشعارات كومة شكو مـادري

فتحت موبايلي رسائِل من سُراج
سُراج
شعندج واكفة وي هـذا !!!!!!!!!
نوبّ حولتي الة لوشنووووووو؟؟
ومنين يعرفج اساسًا لا تخبليني شَمس

شَمس
شدتحجي ؟

هوَ يحجي واني مصدومة واصلاً مو ببالي عن شنو ديحجي
شفت صورة مصورة النة من بعيـد اني و محمَد

سُراج
شني هااااي شنييييييي ها !!!!!!!

شَمس
انتَ شكد انسان منحط وبلا اخلاق عسى كون اموت ولا ارجع للبيت ولا اشوفك ولا اخليك تشوفني الولد وكفني وسلم علية وكلي اذا تحتاجين شي اني موجود هنا، ماطولنـا دقيقة وحدة

حتى الدقيقة جانت هواي ع كلامنـا، يعرفني من يوم تكريم اجة وحجة وي جدي وكدام جدي كلي اذا تحتاجين شي اني موجود وهسة انتَ بكُل جرئة تجي وتكُلي حولتي الـة

حولت الة شننوووو شنوووو
اني شنو لهل درجة بلا اخلاق لهل درجة!!!!!
جزي تلومني ع محمَد ؟ لان رديت علية بسببك وبسبب تناقُضك وياية! يعني انتَ ماشفت محمد شلون رديت عليّ؟

ماشفت بيا اسلوب وشلون! ماشفت شلون احجي ويا ب برود و كوة ارد !
عفت كلشي واهتميت انُ اني حجيت ويـا
و وصلت وياك لمرحلة تحطلي شخص يراقبني ؟

اني بعد ماتحملك، اني بعد ماتحملككككك
ساعة تكلي الله يعلم شنو نيتج وي سَجاد
ساعة تكلي جاي تحجين وي منو
ساعة تكلي عاهرة
ساعة تكلي تخيلي اريد اصير حلو بعيونج انتِ

كاااافي كاافي جاي تموتني والله
حَسبي الله ونعم الوكيل ع الجاي تسوي بية
ماخليت شي ماسويتة اعتذار واعتذرتلك
كلشي سويتلك شسوي بعدد شسوي

خنكتني موتتني بعـد ما اصلح حتى للعيش
يارب اموت وتخلص مني
يارب كون بعد ماتضوج هلكد وتعاني مني هيج
يارب اموت واخلص من عيشتك هاي الجاي تعيشنياهة

كلت هَيج ودموعي جـانت تغوش عيوني كل شوي وامسحهن وارجع اكتب

دزيتهـا شافها راسًا، انطيتـة حظر ومسحت دموعي واستاذنت من الدكتور وطلعت، اول ماطلعت دموعي اطلقت العنان

اريد اخذ نفس بعـد ماكدر، انفاسي تسارعن وصوتهن اعتلى و دموعي تنزل بشكل هستيرري

استوقفني اكثر من شخُص وهوَ يحاجيني ويسئلني شبية، والباقين جانوا يكتفون يباوعولي بـ تعجُب

وكفتلي بنية وجانت تحاول تفتهم مني شبية بس اني ماجنت استوعب ايّ شي

ضلت موكفاني وتكُلي

- حبيبتي اتنفسي كافي بس اسمعيني

كعدتني بالگاع غصُب عني جنت مذهولة واخذ النفس گوة و ودي اطلع شهگاتي بس احس كلشي ضل محصور بـ بلعومي

وكفوا و ولد وهيَ صارت تهفيلي وتكلي اهدي وهُمة ضلوا يكولون ننقلها للمُستشفى

سمعت صوت بنية وهيَ تكول
- هاي مو بت عم استاذ امير ايّ بت عمة صيحولة خل يجي بسرعة

جانت دتنطي المعلومات لـ واحد من الولد واني متمددة و داير مدايري مجموعـة طلاب

حسّيت بخنگة تدخل ب كل رئتيني، وصدري صار طبلة تضرب بقوة لحد ما حسّيت العالم بدة يدور حواليني، النفس صار يطلع ويرجع بسرعة، كل شهيق ما يكفي، وكل زفير يطلع ناقص
ماكدرت اكبت بعَد ولا كدرت اتحمل بعَد وكلشي جـان هاي المرة خارج عن ارادتي ..

الطلاب حوالية تحاول تحاجيني او تهدئني بينما يجي امير، الأصوات تتكدس وتختلط لدرجة إنّيّ ماصرت اميز واحد منهم ان كان ولد او بنت، جنت اذكر بكلام سُراج شي شي وارجع احسني انطعن مـرة ثانية وكلشي يصير بعيوني اسود من قبل.

جسمي صار يرفض الطاعة اديني ترجف، ورجلية ماحس بيهن، وبطني تتلوّى بغصة وغثيان. حسّيت بالخدر يبتدي من أطراف أصابعي ويوصل للذقن، كأنّ كُلشي صار عبارة عن حبل ضيگ وجـاي يحيط بجسمي.

بلعومي محبوس بالغصة، الصوت ما يطلع، احاول انادي اريد اطلع اسم امير بس جنت اطلع صوت مبحوح ما يكفي حتى لطلب مساعدة.

صاحـوا الدكتور الي جان علية، وهواي من طلاب قاعتي اجوي الدكتور صار يكلي بابا تنفسي علكيفج بس اسمعيني واني جنت بغيـر عالم

بهاي اللحظة وصل اميـر وهوَ يركض بسرعة، انتشلني من بين الكُل وسندني وهوَ يباوع لعيوني المفتوحة ع وسعهِن وحلكي الي مفتوح بصدمة وماتحرك ولا شوية

امير
شَمس شبيج شَمسسس جاي تسمعيني

من شفت امير حَسيت اكو احد واخيرًا اجاني صرت احاول احجي ويـا بس ماجنت اكدر الكلام مايطلع نفسة حتى، بديت اطلع أصوات صغيرة، أنين مختنگ، وشهگات قصيرة تتحول لصراخ غريب

وشفايفي ترجف وكأنها تريد تبجي وتصرخ بآنٍ واحد. حاولت ابين الة انُ الوجع بصدري بـ انّي الزم ايدي واشدها على صدري، بس كل محاولة توصلني لذروة خوف ما اعرف شنو اسميه.

عيوني توسعت، بؤبؤي كبر، والرؤية ضاقت صار عندي إحساس بعدم الواقعية، وكإني جسمي من بره. هذا الشعور ازداد لدرجة الخوف من الغيبوبـة والالم الي جاي يصيرلي.

الموجودين حواليـن شَمس صاروا يترجمون الوضع بكلمات عملية الدكتور يحاول يثبت راسها ويمنعهُم من اتخاذ ايّ اجرا، واحد يتصل بالإسعاف، وامير يهمس الها بخوف اهدي، تنفّسي انة وياج حبيبتي لا تخافين مايصيرلج شي هاي انة موجود بصوت مرتعش.

لكن الهمسات ما توصل لأنّ الدماغ صار مركّز على نبض القلب اللي يزمجر، وعلى الحاجة الماسة للهواء، وعلى شعور الخطر اللي ما إلها سبب منطقي غير الاتهام والاحتجاز النفسي اللي تعرضتلها شَمس ..

فقـدت الوعي كُليًا، بس عيونها ضلن مفتوحات بشكِل يخوف ومُرعب، ودقات قلبهـا اختفوا تقريبًا بشكل ملحوظ

الشي الي جنن اميـر وخلا يعيط بخـوف

امير
شَمس شَمسسسسس شجاااااي يصيـررر

- اهدئ اُستاذ اهدئ الاسعـاف بالطريق

صوت صفّارة الإسعاف غطى ع ضوضاء داير مداير شَمس، والطلاب تفرّقوا بسرعة حتى يخلّون مجال. ركضوا المسعفين بزيّهم الأزرق، شايلين الحقيبة الكبيرة ويا جهاز محمول.

ابتعدوا، خلّونا نشوف الحالة

مد إيده على رقبتها يفحص النبض، والثاني يقيس التنفّس ويكول بقلق
النبض ضعيف والتنفس سطحي كلش.

شـالوها بسرعة لسيارة الاسعـاف وامير وياه مصدوم من شكلها ومايعرف شنو مصريهـا من بعد هل حادثة !

والطلاب تردد بـ انذهال : يـارب استرنـا ..

طلّعوا جهاز قياس الضغط بسرعة، والثالث جهّز الأوكسجين. حطّوا الماسك على وجها، والهواء بدا يتدفّق. واحد منهم يكلّم أمير الي جان لازم ايدها ومصدوم بخوف من المنظر الي شافها بي
-أنتَ قريبها؟ حاول تهدي إحنا راح نسوي اللازم.

المسعف رجع يصرخ لزميله:
ثبّت راسها، لا تخليها تتحرك، يمكن نوبة صرع أو سكتة دماغية.

أمير صُعق من الكلمة وگلبه كام يتخبط
سكتة دماغية!! عمرهـا ٢٠، هي بعده صغيرة

المسعف ما جاوبه، ركّب الأقطاب على صدرها للجهاز، الشاشة أظهرت دگات قلب متذبذبة. الثاني كال:
الضغط نازل حيل، ننقلها فوراً للمُستشفى، كل دقيقة مهمة.

اول ما وصلـوا للمُستشفى، المُستشفى ضجّت بصوت سيارة الاسعاف الي ضل يدوي دوي تنبيهًا ل صعوبة الحالة

اجـوا الممرضين واسعفوهـا حالاً للطوارئ
امير كعد ع الكرسي وبالة يم المنظر الي شافة بي ومصدوم
طلع الدكتور وهوَ مستعجل ويركض باوع لـ امير الي كام واجة بسرعة

الدكتور
المريضة متعرضة لحادث ضربة بـ راسها سابقًا

امير
ايّ دكتور بلي

الدكتور
قبل شكد

امير
تقريبًا شهر ونص

الدكتور
مطلوب من عدنة سحب الخثرة، لازمنة نطببها عملية فورًا
الدقيقة تاثر علينـا بسرعة وقع على مسؤوليتكم و حولوها ع الخاص خل نبلش الكم بيهـا

امير
دكتور بلشـوا بيها علما يجون اهلي ويوقعـون

الدكتور
لا ممنوع لمن يجي احد ويوقع على مسؤوليتة يلة

امير
دكتور قابل تموتتتتتت بين ادينا جاي اكلك هسة اخابـر بسسس ابدوا بالعملية

الدكتور
جاي اكلك مايصير شنو انتَ ماتفهم

امير من هول الي شافة ومن خوفة على شّمس ضل يتعارك وي الطبيب والدكتور ولا كانهُ

خابـر عمة حَسن بسرعة وخابر سُراج حتى يجي لانهُم بنفس المًستشفى

نقلوا شَمس للجناح الخاص واجـة سُراج
سُراج جاي ومصدوم شنو شَمس بالمُستشفى شنو سكتة دمااغية هوَ شجاي يصير اساسًا

امير
البت ماتت، شَمس ماتت بين ادية سُراج شمس ماتت بين ادية
يُتبعععع.....
هل برائيكُم الي سوى سُراج حقة او مُبالغة؟

لا تنسون التصويت والتعليق الحلو
دُمتم بخير، احبكُم