رواية بيت حبوبه الفصل الأول 1 - بقلم دانيا

رواية بيت حبوبه

الفصل الثامن8والاخير

بقلم دانيا

حبوبه اثناء ماهي بتحكي لاحظت لأنو خلاص نمنا ابتسمت ابتسامتها البشوشه ديك وغطتنا وقالت لمن تكبرو يابناتي ح تفهمو وتستوعبو حاجات كتيرة إنو الكوارث بتحصل معانا عشان تعلمنا إنو الدنيا فيها الخير وفيها الشر وفي كل الحالات الإنسان لازم يرجع لربو وفي الخير يحمد ويشكر وفي الخير يستعين بالله ويصبر ، وإنو وراء قسوة خالكم محمد خوف عليكم ومحبه كبيرة وإنو م كل الوجوه والبتضحك في وشنا ضامره لينا الخير .... قفلت باب الغرفه ومشت .

صحينا الصباح بدري مشينا صبحنا على حبوبه وعملنا ليهم الشاي مشت قعدت مع ناس خالي محمد في الديوان عاوزة تطمن على راجل خالتي الصغيرة " زاهر " سألت خالي محمد قالت ليهو انت امبارح كيف رجعت مش طلعت الصباح على المدينه وقلت بترجع بعد اسبوع ؟ خالي سكت مسافه واتلبك في الإجابه وبعدين قال ليها م قدرت امشي بسبب المطر ، حبوبه اقتنعت وقالت ليهو سبحان الله لخير بركه م فتا وجيتنا راجع .

بعد عملنا الشاي بقينا على الفطور بنعمل فيهو قلت للبنات انتوا م ملاحظين رغم قساوة خالي محمد إلا انو وجودو معانا مهم جداً لولاهو م عرفنا نعمل شنو وجودو بحسسنا بالإطمئنان مكارم قالت لي فعلاً والله كلامك صاح ياسهير .... نطت ضحى وقالت لينا مهما عمل انا م بحبو لأنو قاسي القلب تقى قالت ليها وانا كمان .

مرت سنتين من الحصل والناس نست والحياة ماشه طبيعي وبقينا بدال نحن نمشي الخلوة الشفع بجونا في البيت عشان ندرسهم ، وحبوبه بقت تنضم في موضوع الزواج كتير مع خالي محمد قالت ليهو البنات كبرن بكره بيتي بفضى جيب لي زولة تونسني وتونس بتي سهير دي لو الباقيات عرسن بس هو مصر م يرد عليها قام مشى خلاها قال ليها ماشي السوق .... قاعدين في البرندا كدا وحبوبه في غرفة الخياطه جاتنا ضحى مبسوطه قالت لينا جبت ليكن اخبار قلنا ليها شنو ناس حاجه سعيدة ديل مش كانو رافضين الحفله هسي قررو يسوها مكارم قالت ليها المطلوب شنو ؟ عاينت ليها وقالت ليها كيف المطلوب شنو رايكم شنو نطلع بالدس نمشي نحضرها هي بتبدأ بعد العشاء طوالي واصلاً خالو محمد م بنتبه لأنو بكون نايم في الديوان وحبوبه م ح تحس على شيء .

مكارم قالت ليها جنيتي عشان تفكري كدا دا شيء م ممكن انت اكتر واجده قاعد يدقك خالو محمد وبعدا م بتتوبي .... قالت ليها كدي خلينا من محاضراتك دي الماشه معاي منو يابنات ؟ بقينا نعاين لبعض سكتنا م جاوبنا وعلى كدا تاني م حكينا في الموضوع ،، المساء بعد خلاص خلصنا كل شيء وجينا نمنا وحبوبه نايمه بهناك مكارم صحتني بالليل قالت لي ضحى وتقى وينهم ؟ قمت نعسانه قلت ليها بكونو في الغرفه التانيه هي مرقت وانا رجعت نمتا .... ضحى وتقى الشليقات في نص الحفله رقصن لمن فترن تقى قالت ليها ورح نرجع انا نعست نوال مسكتهن قالت ليهن ماشات وين لسه الزمن بدري تقى قالت ليها لالا ماشين طلعن من الحفله وتاري في ولدين كانو مركزين معاهن اول ماطلعن جو وراهن ،، تقى قالت لضحى كأنو في زول ورانا قالت ليها لا مافي خلينا نمشي سريع سريع .

بعد شويه خطمو ليهن من قدام بقوا يقولو ليهن الحلوين مالهن راجعين بدري كدا ومشاغلات ، تقى مسكت ضحى من يدها قالت ليها في داعي لدا يابت ورح نجري قامن جاريات في واحد مسك ضحى من طرحتها شالها منها خلنها ليهو وجرن جريه واحده م وقفن إلا قدام الباب وعلى حظهن لقن خالو محمد في وشهن ولااا سألهن دخلهن جوا ولمى فيهن خبت بصوت الحمار حقو داك لمن حبوبه صحت مخلوعه حجزتو منهن الصباح م قامن من الوجع مكارم قالت ليهن تستاهلن انا مش قلت ليكن م تطلعن م سمعتن مني .

في اليوم التاني بالليل شديد اليوم دا سبحان الله الجو م طبيعي شدة ظلام الليل لمن حبوبه قالت لينا انتوا م نورتو الفوانيس كلها ولشنو قلنا ليها منورات ..... فجأة الجوا قلب وبقى الجوا تحس بيهو زي الملوث غبار وم غبار كدا جو بخنق ،، ومن دون اي مقدمات في وسط هدوء غريب سمعنا صوت خالي محمد بقول لا انا م ماشي معاكم لا انتوا م اهلي ديل هم اهلي انا م بخليهم عشانكم قمنا مخلوعين قلنا خالي محمد بتكلم مع منو حتى حبوبه كانت محتاره مشينا بهناك والصدمه الحقيقيه لمن شفناهو بارك في الأرض وبأشر بيدينو وبقول لا م ماشي معاكم .

اتصدمنا وقفنا في وسط إستغراب شديد اول مره خالي محمد دا يكون كدا والحاجه البتخلي الدم يجمد في العروق إنو م كان في زول قدامو م كان في اي شيء زي الزول المجنون القاعد يتكلم براهو .... حبوبه دي قربت تقع إلا مكارم مسكتها قالت ولدي جنى ولشنو بعد شويه قام على حيلو واتحرك خطوتين لقوام وهو بأشر بيدو وبقول مالكم ماقلت ليكم م ماشي معاكم فجأة غضب وشكله اتغير بقى لونو احمر زي الدم من الصدمه تقى طقشت الحوش الفانوس واحد وقع لمن سمع الصوت اتلفت علينا عيونو دي تقول يطلع منها شرار من شافنا وقع ارضو .

سرقنا حبوبه سريع سريع وجرينا دخلنا البيت وقفلناهو علينا للصباح م نمنا ولا زول قادر ينضم ، الصباح جاء دق لينا الباب حبوبه قالت مافي زول يفتح قال " امي خليهم يفتحو الباب خليني اشرح ليكي امي انا م بنتمي للعالم داك ولا عاوز انتمي امي انا عاوز انتمي ليكم انتوا واعيش معاكم إنتوا " صوتو كان مهزوز ودي اول مره نسمعوا يتكلم بالنبره دي حبوبه قالت ليهو لو فعلا اعتبرتني امك م اشوف وشك دا تاني للحظه سكت وسمعنا صوت خطواتو وهو طالع .

ونحن لسه في صمت وسط زحمه من التساؤلات بتتطاقش في عقولنا مكارم قالت لحبوبه ياحبوبه ما تشرحي لينا الحاصل شنو ؟ سكتت مسافه وتاني قالت لينا الكلام الحأقولو ليكن دا يفضل في بيت حبوبتكن دا للموات م يطلع برا قلنا ليها حاضر ..... قالت لينا بعد ولدت بتي فاطمه الكبيرة ام مكارم وقفت من الولادة فترة تلاته سنه وفي يوم جدكن المرحوم كان راجع من الزراعه لقى محمد دا صغير بكون زي عمر سنه كدا مجدوع في طريق الخلا والدنيا مغرب وم كان جنبو اي زول طوالي شالوا جابو لي ومن الوقت داك م ظهر ليهو اهل يسألو منو ونحن زاتنا رحلنا من الحله جينا هنا وربيناهو وبعدوا ياهو جبتا بنااتي ديل لكن الحاجه الما اتوقعناها يطلع ولد جن

قالت انا لو عارفه كدا م بربيهو في بيتي قاطعت كلامها ضحى وقالت ليها الحمد لله ارتحنا منو وبعدا كان قاسي .... عاينت ليها وقلت ليها لكن برضو كنا بنلقاهو وقت الصعاب قالت لي نبهرة عشان م دقاكي صاح ،، تقى قالت ايواه عشان كدا كل مره كان بظهر فجأة في كل موقف لأنو جني ياحبوبه معقولة ربتيهو اكتر من تلاتين سنه وم حسيتي بحاجه غريبه فيهو عشان كدا انا ولاا يوم شفتو بصلي ولا ماسك مصحف وكمان رافض فكرة إنو يتزوج ،، مكارم قالت ليها يابت اسكتي انتي كمان انفتح ليكي خشم تنضمي مش كنتي رايقه وهاديه ول خلاص خلا ليكن الجوا .

مرت الأيام وحبوبه بقت هاديه شديد حتى اكلها بقى قليل بتأكل حبه وبتقوم وخالي محمد اختفى كلياً ، جونا ناس امي وخالاتي قيلن معانا وسألو كتير من خالي قلنا ليهن مشى المدينه عندو شغل ... قالن لينا حبوبتكم مالها صحتها نزلت ؟ مرضت او كدا ؟ قلنا ليهم لا م مرضت بس احترنا نقول شنو .

في اليوم التاني خلوني في البيت وضحى وتقى مشن المرعى مع الغنم ومكارم ودت حبوبه للبصير لأنو صحتها متراجعه ،، بعد صليت الظهر قعدت اقرأ في المصحف حسيت بالنعاس قمت نمتا في السرير .

ضحى وتقى الغنم برتعن في العشب وهن قاعدات تحت الشجره وكل حديثهن خالو محمد والحصل ،، حبوبه ومكارم جوا حبوبه خشت غرفتها نامت وانا قعدت مع مكارم في المطبخ بنسوي في الغداء قلت ليها برسل جواب لناس امي لو ابوي رضى اخوي يجي يقعد معنا عشان يترسل لينا السوق قالت لي وهي شارده في افكارها ياحليل خالو محمد .

جوا ولدين مارين بالمزرعه شافو ضحى وتقى قاعدات واحد اشر للتاني نظام ورح عليهن جوا وقفو قدامهن تقى عاينت ليهم قالت ليهم خير إن شاء الله وقامن على حيلهن .... في واحد طلع سكين من جيبو قال ليها الف خير مسكت ضحى من يدها وقالت ليهم شوفو م تقلو ادبكم احسن ليكم انتوا م عارفين نحن بنات منو نحن خالنا محمد القريه دي كلها بتعرفو لو م عارفنو اسألو عنو والله لو سألتونا إلا يكسر يدينكم الأولاد بقو يقلو ادبهم وم عاوزين يمشو فكرن يهربن قامن جاريات اتزكرن الغنم قالن يمكن دي خدعه عشان يسرقو الغنم .

كل واحده شالت ليها عود ووقفن قدامهم قالن ليهم كدي حاولو اسألونا والله إلا نكسركم تكسير فجأة ظهر خالو محمد قامو جارين مسكهم دقاهم دق العيش وقال للبنات لمن غنمكن وامشن البيت ..... م اتكلمن معاهو ساقن الغنم ورجعن ،، جن البيت كل واحده سارحه براها سألناهن حكن لينا الحاصل قلت ليهن شفتن م قلت ليكن ح نفقد خالي محمد .

بعد جهزنا الغداء مشينا لحبوبه قعدنا نأكل فجأة ضحى قالت لحبوبه حبوبه عليك الله خلي خالي محمد يرجع البيت لمن اتخلعنا بقينا نعاين ليها تاني قلنا ليها ااي والله ياحبوبه كلامها صاح خليهو يرجع إنتي م سمعتي كلامو القالو قال هو م معترف بعالمهم وعاوز يكون معانا ،، قالت لينا خلاص كويس بكره امشو انا متأكده ح تلقوهو في نفس المكان هو م بتخلى عننا بالسهوله وانا لو علي م كنت بطردو بس كنت عاوزاكم تعرفو وتشوفو الحياه من غير خالكن محمد ح تكون كيف وهسي براكم عرفتو .

الصباح مشينا وفعلاً لقيناهو في نفس المكان اتلكمنا معاهو وسبحان الله اول مره اتكلمنا معاهو من غير خوف بالعكس حسينا في وجودو الإمان بعد الله .

رجع البيت وحتى حبوبه ياداب وشها نور ورجعت حبوبه البنعرفها وبعد فترة شهر كدا عندو صاحبو تاجر كبير في السوق عندو اولادو اتنين وولد اخوهو المرحوم واحد جاء وطلب ايد كل من " مكارم ، وضحى ، وتقى " لأولادو الإتنين ديل وولد اخوهو ولحسن حظنا م ساكنين بعيد مننا وهم اسرة كبيرة زينا وعايشين مع بعض وبعد موافقات ابهاتهم وامهاتهم وحبوبه وخالو محمد عملو ليهن احلى عرس والحفله المشن حضرنها في بطن الحله واتدقن بسببها دي عملو ليهن واحده احلى منها .... وهن مرقن من هنا وجابو بت خالتي الصغيرة وعمو زاهر تعيش معانا في بيت حبوبه ونفس الشيء لو العرسن ديل جابن بنات القانون ح ينطبق عليهن المهم بيت حبوبه م يكون فاضي .... وجابو لينا راعي للغنم واخوي الصغير بجي بترسل لينا احياناً .

تمت