دجن الضليع الفصل السابع وخمسون 57 - بقلم رهف علي

نبدأ بذكر الله ﷽💛✨

قبل القراءة مُتابعه للحساب akyta_98
للتواصل ع حساب الانستا akyta_98

و لو ردت أختصر عُمري بكلمة وحدة
راح أگلج بس ' أحبچ '♥️.

رهبار : رفه كلـــــبي

ريفان : عيونها

رهبار : ريتهن سالمات عيونج يابعد أهداب عيوني جاهزه حبيبي

ريفان : اردفت بهمس ، لشنو؟ وكأن نسيت الوقت

رهبار : جاهزه تكونين زوجتي

ريفان : رجف جسمي من بحه صوته كأن نغمات
احتلت مسامعي اعاين ابتسامته ماليه وجهة ونظراته
الحلوه ادور حول ملامح وجهي كأن يحفظ تفاصيله دكات كلبي زادت اكثر واكثر كل ما اريد احجي احس شي يمنعني فرحتي هيَ ااي تمنعني
عيوني نملت دموع كأن اليوم ما ناويه تخلص دموعي
كأن أليوم هو يوم البجي ولازم كل شوي ابجي بي

اردف بهمس مُحبب القلبها ..

رهبار : ها حبيبي شو صافنه

ريفان : هزيت راسي بنفي توسعت ابتسامتي واردفت بصوت واضح

مستعده اكون زوجه غجال عُمغي ( رجال عُمري ) ..

ضحك بصوته الرنان سحبني وباسني براسي
نزل نظراته الي واردف ..

رهبار : جا امشينا نطلع برى اسجلج ب اسمي قبل لا ابعرها هنا

ريفان : شتبعغ؟؟ ( شتبعر )؟؟

رهبار : ضحك راد ، ابعر الدنيا حبيبي يلا امشي نطلع مابقى صبر ووووشلت ..

ريفان : ضحكت شلون يحجي وهو كاز ع اسنانه لزمني من ايدي بس قبل لا نطلع وكف ..

رهبار : لججج اوكفي يعرضي اوكفي جا تتطلعين هيج وانتِ مدلعه اطشررر عرضك يارهبار
بله لبسي هذا ماعرف شتسموا هذا الأبيض مال العروس

ريفان : ضحكت ع شكله شلون لازم الشال الأبيض من اسفله ويريد يلبسه الي عدلته اله وهو لبسه الي
بس شنو خنكني خنك بي ، اااي غهباغ مو هيج خنكتني

رهبار : حبيبي احسن حتى محد يشوف حلوتي

ريفان : اي قابل غاح اكعد وياك هو من وغى( ورى ) الباب

رهبار : حتى لو هدب عيني حتى لو اتستري حتى من عيون البنات الي موجودات

ريفان : هزيت راسي مأكو امل منه اخر شي لزم ايدي وطلعنا جان اكو قاطع بالشقه ف همه صاروا بالصاله واني والبنات صرنه بهذا القاطع رهبار من شاف البنات تركني وراح يمهم اعاين عليهن شلون يضحكن علينا
واني انترست خجل الله اعلم هسه شنو الي براسهن صار
طبعا البنات مرتبات كل العادات الي تصير بالخطوبه
رهبار موصيهن حتى ما احس بالنقص
فدوه العمره

بلش الشيخ يقرا واني الرجفه لزمتني بحيث
ماعرف ليش صرت ارجف رجف مو طبيعي
حسيت شعوري صارت مختلط بالفرحه والحب والخوف الخجل كل شي صار بهاي الحظه
وماعرف حتى شنو اسوي
حتى كلامه للشيخ ما سمعته
فززني نغزه الي بصفي ..

_ ريفان فشله من الشيخ ردي عليه

ريفان : يااا ربي حتى ما حسيت عليه يحجي وياي
رجع عاد كلامه واني توترت كلشش
بحيث حسيت بالحراره صارت تتطلع من عيوني صخنت و وجهي صار حااار نااار اجاني صوته يسألني ..

_ هل تقبلين رهبار يامن زوجاً لكِ ان قبلتي قولي نعم وانتَ وكيلي ..
ريفان : بدون تردد رديت "" نعـــــم وانتَ وكيلــي ""
ثواني وسمعت رد رهبار بصوته القوي بقبوله هنا أعلن الشيخ عن زواجنا وتم العقد بينه شرعي يعني هسسه اني " زوجه رهبار أمام الله ورسوله "

الدموع هنااا ماكدرت اضمهن ولا كدرت اتخطاهن بجيت وهنَ يسكتن بيه بس اني ماكدر اسكت
شعور بداخلي كأن تجدد ويه كل كلمه كالها الشيخ
و ويه كل كلمه نطقتها اني ورهبار
حسيت نفسي
فعلاً نولدت من جديد هسه اني صرت زوجته
صرت زوجه رهباري
مسحت دموعي بس يرجعن ينزلن من جديد

ماكو احد غير بس كم شخص البنات بس باركن الي وطلعن حتى اصدقاء رهبار راحوا ويه الشيخ يعني محد بقى هنا بس اني ويا
بقيت بمكاني كاعده سمعت سده الباب مال الشقه
يعني راحوا شوي وسمعت صوت رهبار ..

رهبار : مرتـــــي

ريفان : صار كدامي واني وكفت حسيت هنا بعد ماكدر اتحمل صرت اناشغ من البجي
هو تقرب مني بخطوات سريعه و ع وجهة ابتسامه عريضه حتى سنونه بارزه سحبني من ايدي
ودخلني بحضنه حضني بكل قوه
اطلقت العنان الدموعي وهو يسحب النفس بقوه
ويهمس ..

رهبار : الحمد الله ، الحمد الله ، الحمد الله

ريفان : احسها طالعه من كل كلبه رفع ايده لفكي ورفع راسب اله جان ع صدره

رهبار : شبيج بعد روحي

ريفان : فغحانه( فرحانه )

رهبار : ااااخ لج رفه صرتي مرتي مبروك علينااا حبيبي

ريفان : ضحكت ع شكله ، مبغوك علينا حبيبي
ضمني الحضنه وجعصني جعص حتى راسي ضمه بصدره ، اووي ولك غهباغ جعصتني ، صاح بصوت عالي

رهبار : اوووووويلي ربي مووووتتني هل البنيه

ريفان : هسه شسويتلك غير جعصتني

رهبار : جااا بويه غير اريد ادخلج بنص ضلوعي

ريفان : ضحكت فجأه تغيرت ملامح وجهة وصفن بوجهي

رهبار : هسه انتِ مرتي مو ..

ريفان : هزيت راسي وهمست ، اي

رهبار : وشيعجبني اسوي بيج

ريفان : انحرجت من كلامه خاصه نظراته تجاهي تموع روحي ، سكتت ما رديت هو صاح بصوت عالي وضرب كلبه

رهبار : اوووووويلي ياااااابه اليوم طااااح طيح للصبح

ريفان : ضميت روحي بصدره واني خجلانه احس وجهي صار نار ضربت بيدي ع صدره ، ششبيك لاتخجلني

رهبار : ها استحت المدام شو بله ارفعيلي راسج ولج

ريفان : رفعت راسي غمز الي وهو يضحك ..

رهبار : خلينه نتمزمز بعد روحي ..

ريفان : ياااا غهباغ ... بعدني ما مكمله كلامي
وهو سفطني ع الحايط جعضني جعص بحضنه
اديه لازمهن وقبلني بقووه يممه احس شفتي انشلعت من مكانها بس حسيت بشعور اول مره احسه
حبيت هل احساس خاصه هذا الانسان الي حبيته
من اني وطفله مراهقه وكبرت ع حبه وهسه هو زوجي
بعد فتره ابتعد عني سحبت نفس بقوه كأن حسيت الهوى شح عندي هو ينفس بسرعه حتى عركان
حط جبينه ع جبيني ويتنفس ع وجهة ابتسامه
موعت روحي واني كلش خجلانه منه

رهبار : هدب عيني ..

ريفان : ابتسمت نزل راسي بس هو رجع رفعه

رهبار : خلي عينج بعيني لاتنزليهن احب اشوف عيون البزون هذن هنَ هذن لعبن بحالي لعب وطيحن حظ حظي طول هاي السنين

يا ام عيون الجتاله شلعبتي بحالي زلمه شطولني شكدني ولعبتي عليه لعب طيرتي ابو الهيبه الي كلها تتراجف منها ، يمج انا غير شكل رفه كلبي يمج
الضابط رهبار غير شكل اذوب بتفاصيلج بزوون...

ريفان : دمعوا عيوني بكلامه ، غهبااغ اني احبك واموت عليك ..
رهبار : جا انا شكول احبج ياهدب عيني ..

ريفان : ارتميت بحضنه وحضنته بقوه بقيت ساكته
اسمع دكات كلبه مسويه هوسه بداخله
احسه يريد يطلع من صدره ابتسمت واني ارفع ايدي
ع مكان كلبه هو حط ايده ع ايدي وضغط عليها بمكانها ع صدره

رهبار : جاي تشوفين شلون يصير بحاله من تكونين بحضنه

ريفان : مممم

رهبار : هاي بكل مره هيج اشتعل من تصيري بقربي هيج كلبي يلعب بحالي لعب ويلعن الخلفني و****

ريفان : عااااا مووووهيج غهباااااغ ، يمه استحيت من كلامه شلون يحجي

رهبار : ع شنو تستحين جا غير انتِ ***** بلعرض والطول ومطيحه حظي

ريفان : صخااااام احس بعد ماكدر وجهي راح يطك من الخجل الحراره صرت احس بيها وهو عادي عنده يحجي هيج كدامي ضربته بقوه وهو لزم ايدي ويضحك بصوت عالي اول مره اشوفه هيج فرحان
ع فرحته نسيت نفسي وسهيت اعاين بوجهه
هو سكت من شاف نظراتي اله
غمز االي وهز براسه بمعنى شنو ..

رهبار : ها ياحلو مطول تعاين عليه

ريفان : غهباغ..

رهبار : بعد روحه ..

ريفان : انتَ شكد حلوو ..

اني حجيت هيج وهو طكها بضحكها قويه سحيت بوجهة ورجعت كملت ..

_ بس كبيغ ( كبير ) ...

نوب صار يهتز بقوه ويضحك غص بضحكه
ورجع عليه واني بعدني مسهيه بوجهة ..

رهبار : يلعن بليسج ع هل طلعه هاي منين جبيتها ..

ريفان : والله شوف شعغك شلون مليان شيب
شوف اللحيه مالتك شلون خصله كامله شيب والباقي منشوغ بكل شواغبك( منشور - شواربك )

ضحك بصوت عالي ورجع غمز الي ...

رهبار : بس تموتين عليه
ريفان : يااا منين الك هاي الثقه
رهبار : وربي تموتين عليه تعشكيني عشك مسودنين
ريفان : ياااااا يعني اني مسودنه غهبااااغ
رهبار : واحلى مسودنه شفتهااا بحياتي

ريفان : ضحكت ع ضحكه نزل نظره ع الفستان وعض شفته

رهبار : بويه تشكين شك بعرضي

ريفان : ياااا شنو هاي سوالفك

رهبار : شبيهن تردين اسولفلج غير سوالف

ريفان : اي بله ، عض شفته مره ثانيه

رهبار : سوالفي انا كلها مزمزه تعاي اسولفهن بعرضي تحبيهن تعاي جاااي لج

ريفان : عرفت نيته لزمت وطفرت منه واني اضحك عليه وهو يركض ورايه
دخلت للغرفه ردت أسد الباب بس هو حط رجله ودفعه نوب اني من الضحك ماعندي قوه حتى ادفع الباب
وكفت فحطانه من الضحك وهو كدامي دخل للغرفه وكف مبتسم ع ضحكتي
ماعرف شبيه بس حيل احس نفسي فرحانه

رهبار : اروح فدوه لهاي الضحكه الي شكت كلبي شك

ريفان : سحبت نفس واني ابتسم بتوسع ، غهباغ تحبني

تقرب صار كدامي لزم ايدي اردف بكلامه ..

رهبار : الحب عندي لاشيء اهم شي الفعل يعني هسه لو كلت الج اي احبج ماراح اعبر عن الي بداخلي بهاي الكلمه احسها قليله بحقج وما تنطي حق حبي الج
رفه انا تخطيت الحب وياج ، انا حبيتج من انتِ وصغيره لعبتي ع كلبي لعب
من انتِ وصغيره جنت اخاف لا بيوم ااذيج وفعلا اذيتج بس بكل مره ااذي روحي قبل لا ااذيج
صدكيني ندمان بكد شعر راسي وداعه كل شيبه بشعري
ندمان الله عاقبني من تزوجتي ورى وين يلا صحيت ع نفسي الله لا ينطيهم الي خلوا هاي الفكره براسي
اصدقاء السوء لعبو بحالي لعب وانا جنت طايش
من صحيت ع نفسي بوقتها الله عاقبني بيج
شكد حاولت أصلح الوضع وبكل مره اصلحه يصير شي اسوء من القبله ويخلي حياتنا تتكركب
انتِ شي مزروع بداخلي وينمو كل ما اكبر كل ما يمشي الوقت كل ما تمر سنين هو يكبر وياي
حبج بداخلي مايوم قل بالعكس يزيد كل دقيقه
احس نفسي انسان ثاني انسان عن حق وحقيق
مو شخص اتجرد من مشاعره
انتِ شي مختلف بحياتي انتِ النور الي نورت كل دنيتي ما تتخيلين شكد انا فرحان بهذا الوقت
وبهاي الحظه

ريفان: ماعرف ليش دموعي صارت تنزل ويه كل كلمه يكولها ترجعلي ذاكرتي باليوم الي صارت كل حادثه
حسيت رهبار اليوم يختلف عن قبل
كلش يختلف احمد الله واشكره عليه الف مره ..
سحبت نفس واردفت ..

غهبااغ اني احمد الله واشكره الف مغه لان زغعك ( زرعك) بحياتي من اني وطفله إلى أن كبغت ( كبرت )ما تتخيل شكد فغحانه بيك ومن احجي بيك احجي بفخغ
الي صاغ بالماضي غاح ويه الماضي صح ما نسيته لكن انتَ جاي تعوضني عنه
بعدين مثل ما كلت اصدقاء السوء لعبو بفكغك
لهل سبب مو بس انتَ المذنب لا همَ هم
بس اطلب منك شغله وحده...

جان يستمع الي وعيونه مليانه لهفه وفرح احسه ع لحظه يبجي ..

رهبار : امريني مو تطلبين عيوني الج ..

ريفان : اغيدك تكون الي سند بهاي الدنيا لان ياغهباغ
اني وحيده ماعندي احد وبس انتَ الي بقيت الي
لاتخليني شي يوم اتندم عليك ولا تأذيني

رهبار : اشلع كلبي من مكانه اذا بيوم فكرت ااذيج لج انتِ بنص روحي تعرفين شنو يعني بنص روحي !!!
ااذي نفسي وما اذيج ...

ريفـــــان : وتخليني بعيونك ؟!
رهبـــــار : بهدب عيني اخليج ..

ريفان : اليوم الأول بخطوبتنا جانت مثل الحلم
بحيث طول اليوم ماتركني وين ما اروح الكا ورايه
يمشي والابتسامه مافارقت وجهة
واني اضحك الفرحه مافارقتني
بالعكس حسيت هاي الايام احلى ايام بحياتي كلها
وفعلا حسيت الله جاي يعوضني عن كل شي سيء صار بحياتي وطفولتي حسيت هذا العوض الي
جنت انتظره من زمان ...

ثاني يوم دخلت للمطبخ اريد اكل واكفه اقطع الفواكه
وحسيت بي ورايه ابتسمت بس ما التفتت اله
هو بقى واكف يريدني ان التفت اله من احس بي ورايه بس عناد بي بقيت واكفه منطيته ظهري ..
ثواني وحسيته يحضني من ظهري جعصني جعص هاي عادته كل ما اصير بحضنه ما اطلع سالمه لازم
اتكسر تكسر ..
ضحكت ع كلامه...

رهبار : شنو هاي ولج صارلي ساعه واكف وراج
معقوله ما حسيتي بيه ..

ريفان : حسيت عيني حسيت ، اخخخ مو هيج ، لزمني وعضني من شحمه اذني كاز عليها اجيت ابجي

رهبار : جا ليش ما التفتي الي هييييي ب****

ريفان : ايييي غهبااااغ اذني ، بعدين اني تكول عليه بغبوك اااااني .

رهبار : جا عروك اذاني ، انتِ اكو وحده غيرج هنا بحضني

ريفان : ماكو غيغك هنا بغبوك غهباغ ، عضيت شفتي من حسيت بنفسي جفصت هو عاط بيه

رهبار : وووولججج شكلتي

ريفان : صرت وجه بوجه خازرني ماعرفت شلون اليصها حتى اطلع منها ، اي شي اجه ع الساني حجيته بس حتى احاول اهدي لا اروح بيها ...

هااا شوف غهباغ هي هاي الكلمه مو فشوغه ( فشوره) مثل ما متوقع ولا سوالف فسفوغيه( فسفوريه )

رهبار : جااا ؟؟؟

ريفان : عاين هاي الكلمه هذاك اليوم طلعتلي معناها هي يعني هاي البنت الي تغافق العغوسه ( ترافق العروسه ) بيوم زواجها ف يسموها ( البغبوك )
ماحسيت الا فتح عيونه ع وسعهن وعاط بيه

رهبار : يعني انااااااا بنت !!!

ريفان : ضربت ع جبيني ياربي شلون اطلع منها ، هااا لاااا فهمت غلط يعني شوف
اقصد حتى العغيس هم الي يغافقه يكولون عليه بغبوك ( العريس ، يرافقه )
حسيته هدأ بس رفعلي حاجبه .

رهبار : منين الج هذا الحجي بويه
ريفان : اذا ما مصدكني غوح ابحث ، اشو هذا ،راح للجهاز يريد يبحث هو صحيح العروس بس العريس ما سامعه بيها كلت بعرتها وبعد ما تتصلح
عطت بصوت و هو وكف مصدوم مني واني كعدت امثل عليه ،
شنووو هاي غهباغ انتَ ماتثق بكلامي وتغوح تبحث عليه !!!! زعلت بعد لا تحاجيني..

عفته وردت ادخل الغرفه هو شمر الجهاز واجه ورايه
يحاول يراضيني واني ادلع عليه ماتركني ااالا ما شافني اضحك ..

بيوم جنت كاعده جان يجي عليه ماعرف ليش لزمت كلبي ..

رهبار : رفه
ريفان : عيونها
رهبار : الباجر انا التحق
ريفان : لااا غهباغ حباب ماصاغ هواي من عقدنا
رهبار : جا بويه قابل معرس لازم التحق هذا شغلي
لاتعرضين طريقي حبيبي خليني اروح وانا بالي مطمن يمج
ريفان : تقوسن شفايفي بزعل وهو يصيح

رهبار : دخيلك ررررربي هاي البنيه تريد تموتني
لج لا تسوون هيج لاتسوووين

ريفان : ما معليه ، هو يضحك واني فاير دمي كعد بصفي ونغزني من كتفي

رهبار : ولج لا تكَلبين الخلقه عليه هي منا حلوه نوب
تكَلبيها تتطلعين تشكين المطي بعرضي

ريفان : شهكت بصوت التفتت عليه هوَ غاص بالضحك
يتحارش بيه واني تخبلت عليه
بقيت اضرب بي الا ان صار يدغدغ بيه طارت هيبه الزعله وضحكت
جعصني بحضنه حييل شمني وباسني بوسه ام الطكه ماعرف ليش تذكرت قبل وضحكت هو استغرب
رجعت كررت الماضي بس هل مره واني
كبيره
لزمته من خدوده وبسته بوسه قويه من خده
وحجيت نفس الجمله الي سبق وكلتها اله من اني وصغيره ..

" اححح بوسه ام الطكه الغهباغ الطغطوغ "

ماحسيت الا ضربني ع راسي وهو يضحك لان
هوَ هم تذكر الماضي سحب راسي
الصدره وبقينا ساكتين هو باله يفكر واني باله يفكر
مسح ع راسي بحنيه اخخ ياحنيته عليه الي تموع
الكَلب وتسبي سبي
احبه واحب حنيته عليه كل شوي يتنفس من شعري
بقوه ويتنهد

رهبار : يلا بويه شو كومي جهزي الج الجنطه
ريفان : ابتعدت اعاين بعيونه ، يعني غاح تغوح
رهبار : اي يلا حبيبي مابقى وقت هم يلا
ريفان : ماردت اعارض اكثر لا يصير شي لا سامح الله
لهذا كمت جهزت اله الجنطه وكل الأغراض الي يحتاجها
هو دخل للحمام
الباب مفتوح وكفت يم الباب وسندت نفسي عليه واعاين عليه شلون يحلق ذقنه
كل شوي يعاين عليه بالمرايا ويغمز الي واني ابقى اكركر من الضحك
غسل وكمل تقرب باسني وراح للغرفه
غير ملابسه وطلع هو والجنطه جان لابس ملابسه العسكريه والرتبه ع اكتافه ابتسمت والغصه تحرك صدري حرك بس ماريد ابجي ماريد هاي اول التحاق من بعد ما عقدنا خاصه هل ايام عشت بيهن
طير بالسماء من الفرح تغيرت حياتي 180 درجه
وصعب بلحظه تصحى من هل ايام الحلوه

وكف كدامي وفتح الي ايده اني ركضت ارتميت
بحضنه وطكيت بجي شكد حاولت اقاوم والزم نفسي
بس ماكدرت وهو يهدي بيه
ماطلع الا ما شاف ضحكتي راح رهبار وبقيت
الوحدي بالبيت كالعاده بس هل مره تغير كل شي
اني زوجته يعني مو مثل قبل
كل شوي اضحك وابتسم ويه نفسي
اليوم خلص واني ملتهيه بالتنظيف
بحيث الشقه غيرتها صارت تلمع لمع

باليل كاعده جان يدك جهاز طرت من الفرح
لان عرفته هوَ اول ما فتحت الجهاز اجاني صوته ..

رهبار : هلا بـــــريحه اهلنااا ياعطـــــر الورد ..

ريفان : يبو شصار بيه معت ، هلا حبيبي اشتاقيتلك
رهبار : لج مو بكد شوكي الج نعلعلا الشغل الي يبعدني عنج هدب عيني
ريفان : تعغف شكد احبك من تكول هدب عيني
رهبار : واناا احبك وبس الج اكولها
ريفان : احبك اني هواااي غهباغ اموت بيك

رهبار : اشششتعل صفحه مراد ال***

ريفان : يااا غهباغ شبيك شمسوي الك

رهبار : جا غير هو مكَابل وجهي وكاعد جنه دجاجه أرمله تكاكي

ريفان : غصيت بالضحك وهو يصيح

رهبار : لج لاتضححكين وتهيجين المواجع بتالي اليل
وين انطي وجهي بنت ال* استغفر الله

ريفان : ردت احجي وسمعت الباب ينفتح وعاط رهبار
اسمعه واني ميته ضحك

رهبار : هيييييييييي مراد ال** تروح مني لا العبك طاح طيح والعن الي جابك امشي لك

مراد : شبيك ولك هسه انا شمسوي الك وتتطرد بيه

رهبار : كاطع رزقي حبيبي

مراد : بروح امك جا ما تكول هذا صاحبي ال* طاكه الجفاف ومكَابل شكو واحد وجهة يسد النفس
ادورله ع وحده تموع روحه وتلعب بي طاح ماطيح ع كولتك واطيرني بالسماء والطارق

رهبار : خاب هيييييييييي تكوم عني لا أعرف شلون اكومك واشحتك منا امشي لك

مراد : ليش حبيبي مو انا حبك الأول ذكرتني باغنيه حسام ونصرت اول حب ، جا مو جنت اغنيها الك عبنك انتَ اول حب بحياتي شكد *** جا هيج تخوني بسرعه وتبيع العشره هو هم هذا حظي
ال*** يكعد حضها وأنا ما يكعد حظي

رهبار : اهووو جنك طلي مدوحس توخر عني لا اطلع ضيم كلبي والجفاف كله بيك
انكلع منااا سربوووت

مراد : طالع أمري ال الله ادورلي ع حاته منا منا احسن ما اكَابلك ياخااااين ناكر العشره والمعروف

ريفان : اسمع بكلامهم واني غاصه بالضحك
هذا يعلي وهذا يكبس وكلامهم كله بالعميق
اشو هذا عبالك نساني وكعد يكد سوالف ويا
يمه فحطططتي شوي واجاني صوته ..

رهبار : ها بعد روحي وياي ع الخط

ريفان : ها حبيبي شنو نسيتني

رهبار : لا لج انتِ الروح والريه

ريفان : ضحكت ، شنو سالفتكم ليش هيج

رهبار : وضحيلي عيني

ريفان : يعني اقصد ليش هيج اخلاقكم فد مغه بايعيها ، جفصت وسديت حلكي وهو غلس بس جاوبني

رهبار : بعد روحي اخلاقنا تنكَط عسل ومن ما صار عندنا فائض بيهن وزعناهن ع كل جماعتنا
لهذا كلنا صارت أخلاقنا ****

ريفان : غصيت بالضحك بقيت اكركر وهو يحجي بهدوء ولا كأن جاي يحجي شي يفطسني من الضحك

رهبار : ضميلج ضحكه خليها من اجي اغااتي

ريفان : بعد شكد وترجع تغى ضجت من هسه

رهبار : ان شاء الله ما أطول لان ما اتحمل من هسه وحاير وين انطي وجهي ، صورتج بخيالي ماتفاركني
حتى عيني ما تغمض تخيلي انا اشتغل الكه نفسي
سارح بيج وبتفاصيلج فكري كله يروح يم عيونج
الجتالات الجنهن عيون بزون
هنَ بس سحبتهن تسبي الدنيا سبي
مطيحات حظي مايخلني اشتغل عدل

ريفان : هو يحجي واني سارحه بكلامه ، الله غهباغ كلامك كلش حلوو

رهبار : **** مني ومن مراد جا صارلي ساعه اتغزل بيج وبالكوه حافظ هل غزل تالي تلزكيني بحايط
الجفاف خلف الله عليج

ريفان : اووو شسوي ماعغف شنو اغد عليك

رهبار : يصيبج الثول بعد روحي ومن تتعاركين تمدين السانج الي بطول ال*** عليه ولا يكول نفسج الي خانسه هسه

ريفان : عزززه سويتني مزق شنو هااي زعلت

رهبار : ازعلك وشحلاتك من اراضيك ، يلا حبيبي بعدين اتصل عليج هذا ال*** طلع مصاريني
كل شوي يجي اكمل الي بيدي واتصل بيك يحلو
رد مو تنام وتخليني مشتول مثل الشجره بنص صحراء قاحله

ريفان : هههههههههه تمام ، سديته منه وكعدت اصفن ويه الي صار كله ياربي يوم عن يوم جاي احبه اكثر
لا ساعه عن ساعه دقيقه عن دقيقه او بالاحرى ثانيه عن ثانيه احبه واموت بي احمد الله واشكره
كل ثانيه لان صار من نصيبي الانسان الي احبه
ادعي من الله يجمع كل حبيبين سوه ويخليهم
يعيشون نفس الفرحه الي اني عايشتها هسه
حرفياً تخليني اطير من السعاده ..

مر الوقت وتوقعته ماراح يتصل تأخر الوقت كلت هاهي ماراح يتصل ردت انام جان يتصل جهازي
ركضت عليه لكيته هو الضحكه شكت حلكي
فتحت الجهاز واجاني صوته

رهبار : لج رفه اشو احس نفسي ماتحمل كلش مشتاكلج شتكولين اطفر واجيج بس كولي اي تلكيني مزروع كدامج

ريفان : لا غهباغ لاتتطلع من شغلك خطغ عليك نوب يصيغ وياك شي لا سامح الله

رهبار : جا شلون لج طاك كلبي عليج ، اريد امعطج

ريفان : ها حبيبي الدينا ليل ما اسمع عدل

رهبار : اخخ بويه احب اليل وياج شحلاته

ريفان : ياااا غهباغ شجاك ديغبالك( ديربالك ) تجي هسه انتظغ الصبح عود تعال

رهبار : ولج هيَ حلاتها الختله وياج باليل

ريفان : عززه

رهبار : شبيج

ريفان : شعندك ويه اليل اشو صايغ تحجي باليل

رهبار : جا غير شغلنا كله يصير بسواد اليل احب سواد اليل وياج بعد طحالي

ريفان : شنو هاي السوالف السغسغيه غهباغ

رهبار : اخخ كون يمج الزمج واعلمج شلون تصير السوالف السغسغيه ع كولت الا ..

ريفان : بقيت صافنه مصدومه كلامه كله محرج وهو يغرد واني ماكدر ارد عليه مو مثله هيج قويه وما أخجل هو ما شاء الله ولا يستحي
وراها سدت الخط سمعت احد يحجي ويا
عاد خليت راسي ع المخده وبالكوه نمت من الفرحه
التارسه روحي وعقلي ..

مرت الايام وبكل يوم رهبار ينزل من الالتحاق مالته
نطلع سفره للشمال لو زياره للاماكن المقدسه جانت ايامنا كلها حلوه
يوم عن يوم اثبت اختياري بحقه صحيح وما بيوم
راح اتندم ابد طول حياتي بالعكس راح
اكون سعيده ويا سعادتي ويا وبس

بيوم جان نازل من الدوام اجاني ..

رهبار : حبيبي جهزي نفسج من ارجع من يم مراد حتى نطلع
ريفان : عقد حاجبي بعدم استيعاب ، وين نطلع ؟
رهبار : هسه معليج جهزي نفسج
ريفان : اي غير اعغف
رهبار : خليها مفاجأة حب
ريفان : عافني وراح طلع مستعجل جان بوقتها الساعه بال 1 الظهر مرت كم ساعه الا ان صارت الساعه بال 4 العصر ورجع اني بعدني ماجاهزه لان ماعرف شنو البس و وين نروح اول ما شافني صاح ..
رهبار : هاي شنو بعدج ما لابسه
ريفان : ماعغف شنو البس لان ماعغف المكان الي غايحين اله
رهبار : البسي اي شي مريح وما تتقيدين بي
ريفان : يعني اكشخ
رهبار : ضحك ، حتى لو ملابس البيت عمي بس خلصينا
ريفان : ماشي ماشي انتظغني ما اتأخغ ،
رحت للغرقه طلعت ملابس راهيه وماتقيد حركتي
وطلعت من الغرفه هو جان كاعد يدخن من شافني
طفه الجكاره بالطفايه وتقرب مني

رهبار : جمالك ياحلو يلا حب امشي نطلع
ريفان : يلا ابني ، ضحك بقوه وهو يهز براسه واني ضحكت ع ضحكته
نزلنا من العماره فتحلي باب السياره وغمز الي ضحكت ع تصرفه وصعدت للسياره هو سد الباب
وتحول للجهة الثانيه
لتفتت عليه ..

_ مكتلي هسه وين نغوح؟
_ دخيلك ربي شنو هذا الفضول مو كلت الج مفاجأه
_ اي بس ماكدغ اصبغ
_ هاي هسه نوصل ما نطول اصبري حبيبي..
_ اي ماشي نشوف وين توصل وياك

مشت السياره مسافه تقريبا نص ساعه و وصلنا المكان مفتوح
ومابي اي احد لا بيوت ولا ناس ولا اي كائن ماعرف ليش خفت وصار تراودني افكار
اكشن ومرعبه عيوني صارت تفتر ع المكان
بخوف لتفتت عليه ابتلعت ريقي واردفت بهمس ..

_ غهباغ هاي وين جايبني
_ نزلي يلا
_ لزمت الباب بقوه ، ما انزل ليش جبتني هنا شنو تغيد تسوي بيه؟؟؟؟

_ اغ***

_ شهكت بصوت عالي ، شننوووووو
_ ضحك بصوت ، لج شبيج ليش هيج خايفه قابل شنو اسوي الج لج بابا انزلي بطلي هل افكار الي براسج
موزينه عليج احنه بالواقع مو بفلم الله يستر هسه تخيلتيني وحش وجاي افترسج
_ ليش الكذب هو هيج تخيلت
_ اي مو اكول هاي خوفها ونظراتها بيها انّه شو نزلي

ريفان : سحبت نفس وهو نزل قبلي فتحلي الباب ونزلت بقيت اعاين بعيونه و ع المكان ، هسه ماتكول الي ليش جبتني هنا

رهبار : اعلمـــــج سياقه الـــــسياره

ريفان : كول والله !!!!
رهبار : والله وهسه راح خوفج، استغفر الله عبالك وحش كدامها هو هذا هم حظي ال***
يلا امشي كعدي بمكاني وانا بمكانج حتى اعلمج عليها
ريفان : الضحكه شاكه حلكي كلشش فرحانه يعني راح يعلني السواقه واني عقلي راح للبعيد
كمزت من مكاني وحضنته بقوه وبسته بخده وصحت ،
انتَ احلى شخص شفته بحيااااااتي كلهاااا
رهبار : ها هسه صرت احسن شخص وقبل شويه
شايفتني وحش ديلا أنعم الله ..
ريفان : عافني وراح يصعد السياره وهو يدردم عليه ( سوي زين وذب بالشط اعلمها السياقه وهي عبالها افطسها بيدي الك الله يالفقير ) اسمع كلامه واني اضحك عليه هو فعلاً امي فكرت هيج وخفت
طلعت نيته زينه واني نيتي الي مو زينه

ركضت للجهة الثانيه صعدت وكعدت بمكانه وهو بمكاني لزمت مقود السياره واني فرحانه
هاي اول مره اجرب وكلش تحمست صح
بالبدايه خايفه بس مادام رهبار وياي ماكو خوف
هو بالأول صار يشرح الي هاي شنو تسوي
وهاي شنو تسوي وعادهن الي الف مره حتى احفظهن
ما تعب ولا مل ابد بالعكس يرجع يعيد
وكأنها المره الأولى الي يعلمني بيها
وكل ما اغلط يضحك ويفهمني عدل

رهبار : وهسه شغليها يلا مثل ما علمتج ولاتخافين
انا هنا يمج مستحيل اخلي شي يصيبج
لاتتوترين ولا ترتبكين

ريفان : هزيت راسي ب اي مامتوتره ولا مرتبكه واني اضحك شغلت السياره وهو يضحك عليه
وحركتها يمه احس كلبي وكع شعور ماعرف شلون
اوصفه خوف ع فرح اول ما تحركت السياره عطت وهو يضحك عليه ويصيح ( لج ما تخوف )
صرت اسوي مثل ما يكول الي واني اطبق اخر شي ماعرف شنو سويت ومشت سريع واني عطت وهو تقرب خفف السرعه ويضحك عليه شلون خايفه
حط ايده ع ايدي وصرت تقريباً بحضنه
نزل راسه باسني بخدي قوي ورجع يكمل
يعلمني بهدوء
مر الوقت إلى أن وكف السياره

رهبار : هذا درسنا لليوم نخليها ع غير مره نكمل
ريفان : صفكت بحماس، يعني هاهيَ تعلمت ؟
رهبار : ها بعد روحي عبالج الشغله بس هيج وخلصت لا اغاتي انا يمج وزين ما دخلتي بهذاك الحايط وتهدمي امر ما هسه مهودم ع النص وتفلشين السياره ويا
ريفان : ياااااا لهل دغجه سيئه اني !!
رهبار : مو من اول مره تتعلمين يحتاج الج بعد حتى تضبطيها يلا هسه خلينا نرجع تأخر الوقت

ريفان : تمام ، بقيت صافنه واعاين اشو هذا صافن عليه ، شبيك يلا نغجع
رهبار : شنو ليكون تردين انتِ ترجعينا
ريفان : لا انتَ
رهبار : ابوسج عقلج اليشتغل ، جاا غير تنزلين حتى ارجع المكاني شلون بهل البنيه الي شكتني شك
ريفان : ضحكت ، نسيت ، نزلنا وهو رجع المكانه واني المكاني بعدها رجعنا للبيت بس اكيد اخذنا عشه ويانا
لان تعبنا وماكدر اسوي اكل

مرن الايام وبكل نزله اله يعلمني بيها السياقه
إلى أن ضبطتها بعدها قرر يطلعلي اجازه سواقه
وهاي لازم ادخل ويختبرون يلا يطلعوها
واني اصلاً ضبطتها فد مره يعني ما احتاج اي تعلم
فدوه القلبه حبيبي علمني وخلاني اضبطها
كأن محترفه
ضبطها هوَ هم من يمه وبتاريخ 2018/8/23 طلعت اجازه السياقه والفرحه ما واسعتني

يوم بعد يوم أيقنت انُ الله سبحانه وتعالى جاي يعوضني ع كل الي مر بحياتي وبكل يوم
اني افرح اكثر عن اليوم الي قبله
بحيث انتبهت النفسي ولا مره بجيت
الا ماندر بس من يلحتق واشتاق اله
ابقى طول الاتصال ويا ابجي واتمنى يرجع الي سريع
حياتي بلشت تتصلح من بعد الخراب والدمار الي عشته طول سنين السابقه
وهذا الجزاء من بعد الصبر فرحه طول العمر ..

بيوم اجه رهبار وبلغني بخبر نقله للموصل
بوقتها شبعت بجي وهو يحاول يسكت بيه
بس وين اني شبعت بجي وخاصه من عرفت
فتره الدوام مالته تصير عشرين يوم التحاق وعشر ايام يمي ينزل واني هنا شنو يصبرني عشرين يوم
هو بالمهمات الي يبقى بيهن أشهر ابقى ابجي
بس ع الاقل فتره وتنتهي مو هذا دوام ع طول
يعني مو فتره ويتغير
بالكوه قنعني
بيومها جان مجهز الي مفاجأه ماخطرت ع بالي ابد

جنت كاعده ارتب اله الجنطه مالته وهو
دخل للغرفه جانت دنيا اليل وهو الفجر يلتحق
دخل سحبني من ايدي لبسني الشال ع راسي
والبشت وطلعنا من الشقه سألته شكد وين رايحين بس ماجاوب بس يكول هاي هنااا بس اصبري
عقدت حاجبي من طلعنا من العماره مشينا شويه
و وكفنا

رهبار : مبروك السياره بعد روحي هاي الج ..

ريفان : بقيت مصدومه المفتاح كدام عيوني والسياره ورى رهبار صايره احس الدموع كلها تجمعت بعيوني
ماتحملت حضنته وبجيت وهو يمسح دموعي ويهمس الي

رهبار : احترك مراد لج مو بنص الشااارع يعرضي مو بنصه اطشر عرضك يرهبار

ريفان : ضحك واني ابتعد امسح دموعي واعاين عليه ماعرف شنو اكول اله كل الكلام ما يوصف الفرحه الي حاسه بيها

رهبار : هاي السياره خليها جوه ايدج انا التحق عشرين يوم ماعرف شنو يصير ما يصير ع الاقل
جوه ايدج وسيله نقل اريدج تعتمدين ع نفسج حبيبي ماتعرفين هاي الدينا شنو بيها ولا شنو مضموم النا انا ما دايم الج شغلي خطر ع لحظه اروح وما ارجع
ماريد اخوفج رفه بس هاي الدنيا مانعرف شنو بيها
من هسه اريد اخليج بميه رجال ماتحتاجين لأي شخص
وانا ما موجود كتلج انا سند الج وابقى سند الج لآخر نفس بيه خليج قويه لو شنو ماصار وياج

خليـــــج ريـــــفان الفهـــــد ..

________________

للحكايا بقايا ♡

شششلون البااارتووووووت طمنوني ع مشاعركم الجياشششه اني من يمي طكني الجفاف انتوا شلون 😂😔🫂❤️

مابقى شي ع النهااااايه اما بارت واحد أو بارتين احاول يكون بارت واحد اذا ماكدرت والأحداث هواي يصيرن بارتين تمام كبد
احبكووووووم كوووماااات هدب عيني ونظرها 🤩🙈

المااااااايصوووت ازعل عليه طكووونا بتصويت ع هذا التعب والبارتوت الحلو وتابعوا الحساب بطريقكم كبدبد akyta_98

.

.