دهاليز القدر الفصل الرابع والعشرون 24 - بقلم نهى

دهاليز القدر

دهاليز القدر
للكاتبة
Nuha-d-h

زينة
من سمعنا بزهراء ابوي سودة علية وجه صار اصفر وخفنا عليه لاصير بي شي لان گلبة ضعيف
فخطبة اول ماسمعوا راحو كبل ركض هو وامي
للمستشفى حتى يشوفون زهراء
لكن من رجعو ماما وبابا للبيت ورة فترة من روحتهم
جانت ووجوهم ماتتفسر وامي عيونهة حمر وجهة مخرط
بهاي الاثناء واندك الباب وخطية دخلت علينا زينب ايد تجر بيهة ابنهة محمد والايد الثانية شايلة مصطفى
خطية دخلت وهي تبجي
زينب -ها بوية اخيتي شبيهة
ابو زهراء-وهو يبجي بوية اخيتكم حالهة يصعب عالكافر
اختكم واكعة من الدرج على وجهة وداخلة بغيبوبة وهسة المكرودة حامل
ام زهراء-سودة علية حتى ما تدري بروحهة حامل
زينب گعدت بالگاع -بوية اريد اشوفهة
اان شاء الله بوية الباجر من نروح اخذج

زينة ومرت الايام وماصارتلي فرصة اروح لان اول شي جانت عندي امتحانات اخر السنة فماكدرت ااروح
وجانت الامتحانات طويلة لان اني بصف الرابع علمي

ومن خلصت الامتحانات كلما اريد اروح وياهم
تطلعلهم شغلة لو زينب تبقي جهالهة يمي
بس بيوم من الايام امي شافتني بغرفتي بالليل ابجي اتذكر سوالف زهراء اختي وابجي واتذكر مواقفنا سوية وشلون جانت حنينة علينة وتفكر بينا سودة علية جانت شايلتنا بالصلوات وكعدت ابجي وتذكرت شلون من تروح تشتريلي صدرية وقميص من الفلوس اللي تجمعهة من شغل ايدهة
لو من تجيب الملازم اشوفهة مرات من تجي علية بالمدرسة تسأل عني وية بابا
اشوفهة تحجي وية البنات وتوصيهن علية
اباوع عليهة شلون تشلع اللكمة من حلكهة وتتقاسم ويانا اني وزينب ثمرةتعبهة
دخلت علية ماما وشافتني ابجي ووعدتني ان الباجر اروح وياهم
ام زهراء-سودة علية يمة والله ما انتبهت
والله ماظل عقل بالراس ونسينا هي اخيتج وگلبج هسة عليهة مثل النار
وعد علية الباجر اخذج وياي من اروح للمستشفى اني وابوج وزينب
زينة -ماعلية موتبقون جهال زينب عندي عفية كل مرة تسوهة بية كللولهة خل تخليهم عند عيالهة
ام زهراء وهي تبتسم -صار يمة
والله ورحنا يوم ثاني وشفت اختي حبيبتي شلون مددة على السرير بالمستشفى وشلون ضفان وجهة وبي اثار خفيفة مال حمار الظاهر من طاحت من الدرج
بس صارلهة ثلاث اشهر اشو مارايح الاثر شنو من وكعة اللي اثرهة لحد هسة باقي
وشفت شلون ايدهة مزرفة من ورة الابر ومعلكين المغذي بس رغم هذا كلة بعدهة وجهة حلو
بجيت وبستهة من راسهة وحجيت وياهة
زينة -زهورة خية كعدي محاتجتج يالغالية منو الي بعدج ينشدني على حوالي

خطية زينب لزمت كتفي وهي تبجي وكالت كافي مو مردتي كلوبنا اني عفتهم وطلعت برة لان خنكتني العبرة
وشفت براد ماي واني جاي امشي رحت عليه اريد اشرب ماي سحبت كاسة بلاستك وترستهة ماي والتفتت يمنة ويسرة اريد اتأكد ماكو احد رفعت بوشيتي فوك راسي ومسحت دموعي وگاعد اشرب الماي واسمعلك صوت رجال بصفي واكف ماحسيت عليه هذا شوكت اجة اشو ماشفتة
الرجال-ماشاء الله تبارك الرحمن
اني التفتت عليه بشهگة ونزلت بوشيتي ومن خوفتي حتى كاست الماي علنص ورحت ركض ودخلت غرفة زهراء واني ارجف
وبعد ماخلصنا وبدلنا لزهراء وعطرناهة واني مشطت شعرهة بيدي لان جانت دائما تتسول بية علمود العب بشعرهة وهو شلون طويل ويجنن وهسة خطية طولان بالزايد
طلعنا وية بابا من الغرفة وصادفنة ياسر رجل زهراء ووياه اخوه الشيخ عمار
ووياهم نفس الشاب اللي التقيت وياه قرب براد الماي
يمة واني گلبي گام يرجف ما اعرف شيوي گمت البد بروحي حتى مايشوفني بس المصيبة حسيت بي عبالك عرفني لان ظلت عيونة تتنقل بيني وبين زينب اتوقع يريد يعرف منو بينا اللي جانت واكفة يم البراد
وظلو يسولفون واني بالي مو يمهم وصحيت على ياسر يحجي وياي ويسئلني على دراستي اني جاوبتة بصوت ناصي مدنكة اجت اصير ورة بابا حتى مايشوفني بس ما اعرف ليش رفعت راسي واجت عيني بعينة وبسرعة نزلتهة
سمعت ياسر يكلة يالله هشام خلي نروح للدكتور ينتضرنا
اشوف الولد عينة علية ويجاوب ياسر وكأنه ما يريد يمشي ويعوفنا وبابا استأذن منهم وطلعنا ورجعنا للبيت

تبارك ورة سبوع من زيارتي لزهراء رحت مثل كل مرة ازورهة بيوم الخميس دخلت عليهة وسودة علية
لكيتهة لوحدهة بالغرفة
طبعا زهراء خالينهة بجناح خاص اهلي على حسابهم لان عمار اصر عليهم ان ينقلونهة لمستشفى انظف لان اول ايام دخول زهراء كانت بمستشفى حكومي وبعدين من استقرت حالتهة نقلوهة لمستشفى ثانية اهلية بطلب من عمار
كعدت على كرسي يصير بصف السرير مالتهة وبستهة من راسهة واقتربت منهة وكعدت احجي واسولف وياهة عن عيالي وجهالي والمدرسة مرة اضحك مرة ابجي مثل كل مرة شوية دك نقالي وحجيت بالنقال ونوب سديتة
والتفتت لزهراء واحجي وياهة عبالك تسمعني
زهورة خطية هاي امج اتصلت علية تريد تتطمن ان اكو واحد يمج خطية تخاف عليج نبقن لوحدج لازم واحد يرافقج حقهة امج تخاف عليج اشو يوم عن يوم تحلووين بنت الاوام اضحك واحجي وياهة لمست بطنهة شوية كبرانة دخلت بنص الشهر الرابع
يمة والطفل رفس ايدي
تبارك بكمزة خلت ايدهة على حلگهة وكامت دموعهة تصب بصمت خطية تحجي وتبجي خية زهورة شوفي ابنج مدري بنتج شلون گام يتحرك ببطنج خية كومي وشوفي حملج خية زهورة مابسج نوم ماحنيتي على رفيجتج
هسة امج راح تجي وافرحهة بالاخبار واكللهة على ابنج شلون اتحرك
شوية واندك الباب ودخل ياسر

تبارك وهاي اول شوفتهة لياسر من بعد حادث زهراء
يااااااسر
تبارك وكأنه كانت منتضرة هذا اليوم اللي تشوف بي ياسر
تبارك -هَـا ياسر اجيت شتسوي اجيت حتى تشوف زهراء شلون تذبل لو
تشوف نتائج افعالك بزهراء ولك شمسويتلك يالظالم يالخسيس ولك جانت تسولفلي على هذا العار اللي جان يمشي وراهة وخايفة وباليوم الف مرة تموت من الخوف عيشهة بخوف بس جان خوفهة من الرجال اهون عليهة من خوفهة من عندنك
جنت اطلب منهة تحجيلك وجانت تگول ياسر ما يتفاهم اخاف بتعاركون ويصير بياسر شي من وراي
وجان صدك كلامهة فعلا انت انسان همجي ماتتفاهم
ولك ليش هيج ظلمت البنية شلون هانت عليك
زين من ضربتهة ما اجة على بالك عمو ابو زهراء بيوم امنهة عندك ولك هاي امانة بس ياحسافة طلعت مو بگد الامانة روح الله يجازيك اشوف بيك يوم حوبة هاي المظلومة ياسر وهو مدنك
ياسر-والله يا اختي طلعت حوبتهة والله ماقصر بس الله الشاهد علية ماتتصورين شكد متندم والله متندم على كل لحظة قهرتهة بيهة
بس بعد مايفيد الندم اعرف محد راح يسامحني لان اني نفسي ما اكدر اسامحهة شلون اطلب السماح
بس خوية عينج عليهة وانتي ثبتي بهاي وكفتج صدك اخت دنيا وهسة اتطمنت ان زهراء مو لوحدهة عندهة اخت كفو مثلج تعادل عشر زلم
شوية واجة اللحضة اللي جنا منتظرينهة بفارغ الصبر
ونسمع صوت من ورانة
زهراء وبصوت كلش ناصي ومبحوح عبالك حنجر مجرحة -اممممممم اممممممم اه اريد ماي
احناهنا اني وياسر وواحد يباوع للثاني وعيونة كلهة دموع ركض ياسر يصيح الدكتور
واني ركضت على زهراء لزمت ايدهة وهي بضعف لزمت ايدي
والله واجة الدكتور واجرة عدة فحوصات على زهراء ونوب طمنا عليهة طلبت من عندنا ماي وشربناهة شوية بين ما تتعود معدتهة لان صارلهة كلش هواي على المغذي وماداخل شي لمعدتهة
وخطية اجو ام زهراء وابو زهراء طايرين من الفرح والكاع ما شايلتهم
اجة الدكتورة وكالت نريد ناخذ المريضة على غرفة الفحص النسائي
الله واخذتهة واني رحت وياهة خليناهة بعربانة واني ادفعة ما اقبل اي واحد يدفع وكمنا نتسابق اني وام زهراء من اول وحدة اللي تخدم زهراء والله هاي من فرحتنا
فحصتها الدكتور ونومتهة على سدية الفحص وشغلت الدكتور شاشة الجهاز حتى تسويلهة سونار وتتأكد من نمو الجنين والمايات والجارة
وخلت مادة مثل الجل على بطنهة وحطت الجهاز وكعدت تباوع على الشاشة واني وياهة اباوع عبالك من راح اشوف راح افتهم شي الله وكليكم كلشي ما افتمت بس مشوش ونقاط بس ما اعرف ليش اباوع
الدكتورة تحرك الجهاز وتحجي
الدكتورة-المايات زينة الحمدلله والجارة تٌـٌـمــام والجنين حجمة زين وهسة انتي ماما مقبطة الشهر الرابع وداخلة على الشهر الخامس كعدت بعد تجيك وشوية وكالت وراح يجيكم ولد بالطريق مبروك حبيبتي
تبارك بفرحة شبكت زهراء اللي بس تباوع وساكتة وكأنها بغير عالم مو ويانة وما مفتهة شي

وخطية ياسر اتصل على اهلة ورة نص ساعة انترست غرفة زهراء بالناس عمتهة وعمهة وحتى خطية الحجية الجبيرة ونوال واسيل ومرت محمد سلوى خطية الظاهر كلهم بالهم يمهة
دخلنا واني دافع بالعربانة مال زهراء وانصدم بالتجمع اللي موجود بالغرفة استحيت واجة ياسر ركض علية واخذ العربانة وقدمهة من السرير ورفع زهراء من العربانة ونومهة على سريرهة
وشوية رفع التكية مالت السرير وخلاهة بوضع الجلوس
واجت الممرضة اخذت العربانة واني اجيت وبيدي الورقة مالت السونار
واهل ياسر يبوسون بزهراء وزهراء ساكتة ما جاي تفتهم شنو صاير
وبعد ماخلص السلام وكعدو خطية ام زهراء
ام زهراء- هايمة تبارك بشري شكالت الدكتورة على وضع زهراء
تبارك بابتسامة - خالة الحمد لله فحصتهة الدكتورة واخذتلهة سونار وشافت وضع الطفل زين وخطية هسة هي قبطت الرابع وداخلة بالخامس وبيه ولد
ام عمار بفرحة وصوت عالي
ام عمار -عيدي يمة حبوبة شگلتي
تبارك -وضعهة زين وومقبط...
ام عمار قاطعتهة-لايمة كليلي شنو طلع بيهة
تبارك بصحكة -خالة جايكم ولد ان شاء الله يتربة بعزكم
وهنا ام عمار بجت من الفرحة يا رحمتك ربي يارحمتك ربي يمة راح يجينا ولد الف الحمدلله والشكر الك يارب

زهراء
كنت نايمة واحس باصوات بعيدة علية تروح وترجع هاي الاصوات
سمعت صوت تبارك تحجي وتبجي
اريد احجي وياهة واكللهة اني اسمعج
بس ماكو ماكدر احجي ونوب ارجع اغط بالظلام وانام
ونوب مرة ثانية هم سمعت صوت تبارك شلون تبجي وتحجي بصوت عالي بحيث احس روحي فزت وكدرت هلمرة اطلع صوت
من طلعت الصوت ردت افتح عيوني كوة گدرت افتحهن بس اشوف وجه تبارك شوية مغوش
رجعت غمضت ونوب فتحت على كم مرة ظليت ارمش احس جفوني ثگال بس بعدين وضحت الصورة وشفت تبارك لازمة ايدي عصرت ايدهة وكأنما اريد اطمنهة خطية گامت تبجي احس بيهة فرحانة
وبعدين طلبت ماي
دخلو امي وابو ي علية ونوب اجت دكتورة كالت نسوي فحص واخذتني تبارك بالعربانة زين ياسر وين ليش تبارك مبتلية بية هو وين
ونوب الصدمني واني تعبانة ومابية حيل احجي كلام الدكتورة من اخذتلي السونار شكيت ان هي جاي تحجي وية مريضة ثانية بس المصيبة ان اني الوحيدة اللي على السدية وجاي تفحصني زين شنو هذا الحجي يعني ما افتهمت الجنين يخصني الي يعني تقصد علية اني
يعني شنو اني حامل ماجاي افتهم اي شي احس بروحي داخلة بمتاهة
وخلصنا ورجعنا للغرفة واشوف عيالي كلهم موجودين وفرحانين وعمتي ظلت تبجي وتبوس بية
ومن تبارك حجت شنو گالت الدكتور ة
ام عمار طارت من الفرح

زهراء احس صار عندي شلل بالاحاسيس ماجاي افتهم شنو جاي يصير من حولي واني ليش هنا
احس راسي راح ينفجر

اجت الممرضة وگالت خلص وقت الزيارة مو زين على المريضة وهي ستوهة فاقت من الغيبوبة يصير عليهة ضغط
راحو عيالي وخطية تبارك هم راحت بعدهم بشوية اجة عليهة رجلهة وبقت بس امي وياي واجت الممرضة
انطتني ابرة خلتني ارجع انام بس قبل لا انام تسائلت ياسر ليش ما اقترب مني ولا خلة عينة بعيني
نامت زهراء
وجانت ام زهراء قلقة وسألت الدكتور شبيهة بنتهة ليش هيج وضعها عبالك غريبة گاعدة ويانة
الدكتور يطمن ام زهراء ويشرح الهة الحالة-المريضة كانت بغيبوبة لمدة ثلاثة اشهر واسبوع فهذه فترة تعتبر طويلة على المريضة فمن افاقت من الغبوبة تمر بمرحلة بين الوعي واللاوعي يعني تصير قليلت التركيز ولاتخافي هاي الفترة تعدي احتمال خلال ساعات وترجع وظائف الدماغ بترتب الاحداث وترجع عادي ان شاء الله بمساعدتكم لحياتهة الطبيعية

اتمنى اكم قراءة ممتعة

مع جزيل الشكر لكل من علق وابدى رأيه بروايتي

دهاليز القدر
للكاتبة
Nuha-d-h