دهاليز القدر الفصل الثالث وثلاثون 33 - بقلم نهى

دهاليز القدر
دهاليز القدر
للكاتبة
Nuha-d-h

عمار

مع الاسف عليج زهراء اذا انتي محتاجة ميحتاج تمدين ايدج علمود الفلوس
جان اجيتيني وطلبتي مني واني انطيج
صحيح زينب اختج جانت محتاجة واعرف بيج ردتي تساعدينهة
بس مال تبوگين الذهب وتسويلج فلم وتردين تطلعين نفسج منهة بريئة هاي ترة حيل واكفة

زهراء وبقهر وماقبلت تسكت
زهراء-شوف عمار انت حققت وانت بحثت وانت حكمت
وانت قررت
انت حتى ماكلفت نفسك ان تسألني
واصدرت حكمك اتجاهي واني مظلومة ومابيدي شي يثبت برائتي
بس صدگني ما راح اطلع من البيت وادوس على كرامتي الي هنتوهة و لثاني مرة بهذا البيت
ووما راح اروح لعند اهلي
مو علمود خاطر علاوي ابني لا
هلمرة ما راح اهرب واورح لحضن ابوي
راح ابقة هنا حتى اثبتلكم مو انة السرقت
لا بد ويجي يوم والله ياخذلي حقي من اللي ظلمني
لان هواية تعرضت للظلم على ايدكم
بس صدگني بساعتهة ما راح اسامحكم

زهراء

ومرت الايام واني احس بعيون الكل تنظر الي بقهر
نوال ماصدكت ولا اتقبلت ان انا اكون السارقة على رغم كل الدالائل تشير ضدي

شيخة واستغلت الموقف خير استغلال وكعدت علطالعة وعنازلة تعيرني وصارت تحجيهة بالعلن وحتى گبال عمار كامت تحجي علية

عمتي موقفهة جانت
تگول ما اريد اتسرع واظلمج
مثل ما ظلمتج قبل
وعمي ضايج مني ومايقبل يعاين بوجهي
اسيل رفضت رفض قاطع ان تتقبل فكرة ان انة سارقة ذهبهم
اسيل-عشت وياج واكلنا وشربنا سوية واعرفج عزيزة نفس وما تمدين ايدج
بس ما اكدر اكول غير حسبي الله ونعم الوكيل باللي سواهة

زهراء
وبهاي الفترة عمار هج من البيت وسافر احس هلمرة هو الضعيف الي هرب من الموقف بس قبل لايسافر للامارات حسب ما يدعي ان هو عندة شغل
كانت نضراتة الي مدانة بحقي
واخذ شيخة والبنات هلمرة وسافر بيهم

لان خطية هو عادل بين زوجاتة يخلي لكل سفرة
وحدة من نسوانة تسافر وياه

واني بقيت ببيت عيالي معلكة ما اعرف شنو مصيري

واحس عمي الله سلطة علية وطلع روحي باسلوبة الجارح

على الرغم هو مايحجي شي ولايجيب طاري الذهب الي انسرق ابد
بس كانت هواي طرق استخدمهة لعقابي
وحرم علية طلعة البيت وما قبل اروح وازور اهلي ولاقبل احد يجيني او التقي باحد وسحب مني نقالي
ما الومة حقة لان كلشي ضدي
بس كان عتبي على الحبيب اللي المفروض يعرفني ان اني ما امد ايدي وابوگ بس هو فضل الهروب على ان يواجه اهلة ويوگف وياي وياخذلي حقي

ومر اسبوعين على الحادث والوضع على هو ما عليه

عمار -من صارت سالفة الذهب لليوم واني مانايم الليل
احس بروحي اختنك
ما اريد اصدك ان هي تگدر تمد ايدهة بس ما اعرف شسوي كل الادلة ضدهة واني بأذني سمعتهة بيومهة اختهة اتصلت عليهة تتشكر من عندهة على الفلوس اللي وصلتهة

احس بيهة استغفلتني وصرت ومعمي بحبهة لدرجة ماتخليني اشوف مساوءهة
ليش گلبي مو راضي يسمع لعقلي احس انطعنت بظهري
وبعد ما اضعف امامه بسبب حٍٍِْــًبٌٍـــِٓېٍٓ الهة
راح اربيهة بيدي اراويهة ان الله حق لان انة عمار
الة اخذ حق قهرت گلبي اللي حبهة واتعلق بيهة
وهي بفعلهة هذا رفست نعمتهة
الا اخليهة تجي تعترف بلسانهة ان هي الباگت

اني ماهمني الفلوس والذهب بگد ماهزني فعلتهة ليش هيج تبيعني علمود اهلهة اني اعرف بيهة من الاول اني هي حييل مخلصة لاهلهة وتحب تقدملهم كلشي
وتساعدهم
بس ما اتصورت ان توصل لهل المواصيل بحبهة لاهلة وتمد ايدهة حتى تنقذ اختهة

زهراء
ومر شهر ونص على الحادث واجة شهر رمضان
واني كلش تعبت صحتي
ما اعرف من الكراب الي عمي نازل بي علية روحي وتعاي
وروحي وتعاي كاضيهة علية عزايم بهذ الشهر الفضيل اللي الناس تكعد تقرالهة قران اني من دون البنات اكرب وعلاوي خطية حبيبي احس هو الوحيد الي مهون علية السالفة
خطية مايقبل يخلي لكمة بحلگه الا اني اكعد وياه واكل ولايقبل ينام الا اني انام وياه وكأنما الله حب يجبر خاطري بتصرافات علاوي
ويوم عن يوم كعدت اسحب نفسي من عندهم وحتى كمت الاكل آكلة وية الخدامات
اكعد اكل وياهن احسن من اكعد وية ناس وعيونهم علية كلهة اتهام من الغير البسامير الي اسمعها تسد النفس

زهراء
اليوم عمار يرجع من السفر وكالعادة. عمي مسوي
عزيمة وشي اكيد براسي طايحة اني لوحدي لان نوال راحت وية اهلهة للزيارة بعد ما اخذت الاذن من عمار

اجت اسيل تساعدني بالمطبخ
وعمتي خطية اخذت علاوي من يمي تخاف عليه يلعب جواي واني اطبخ وخاف ينجوي من الطباخ
وكعدت اطبخ والخدامات يساعدني يحضرن وياي الغراض واني اشتغل
واسيل تسوي مقبلات وياي اعاين عليهة شلون مرتبة نفسهة علمود اليوم خطيبهة راح يجي على الفطور
وية المعازيم
اشوف الفرحة بعينهة وابتسم
الله يديمهة
قررت ما اصير ضعيفة واكعد اندب حظي لاهلمرة راح استخدم جميع اسلحتي ضد عمار وراح ابدي
اقهرة اخلي مثل العطشان الي يقربون الماي منة ومايشربوه
خلصت الفطور وصعدت فوك لغرفتي ولبست عندي دشداشة مارونية تصير ضيكة من فوك وعريضهة من جوة
وعدلت نفسي بكل ثقة الا احرك گلبك يعمار

نزلت وشفتهم وصلو وكعدو يسلمون على الكل واباوع على عمار عيونة تدور عبالك ضايعلة شي
اني اتقدمت منهم
زهراء-الحمدلله على سلامتكم شلونك عمار
واقتربت منة وفرشت ايدي على صدرة وبستة من خدة

حسيت بجسم عمار رجف جوة ايدي

زهراء وببتسامة خفيفة تتكلم مع نفسهة
بعدك ماشفت مني شي بس اصبرلي
زهراء-الحمدلله على سلامتج شيخة
شيخة بغرور- الله يسلمج

وعفتهم ورحت واحس عيون عمار وراي تريد تاكلني
فتت على المطبخ اكمل شغلي لان صار الوقت مغرب وراح يأذن ولازم احضر التمر و اللبن حتى ياخذونة للديوان
فالتهيت احضرة وخليتة بصواني صغار حتى يوزعوهة بالديوان على الطبلات وحتى من يأذن يبدون بالتمر واللبين
جاي اشتغل وشالي راخي من فوك راسي وطلعة خصل عشوائية من شعري صارت تحيط بوجهي

سمعت حركة وراي التفتت شفت عمار جاي يباوع علية
من ورة
عيونة جمر تريد تاكلني
زهراء شلت الصينية مالت التمر واللبن وكعدت احجي بدلع وارمش بعيوني -عمار عفية هاك اخذ هاي الصينية يم الزلم بالديوان
حجيت وياه وكأنما ابد ماهامني سفره وفراقه
شفت عمار مد ايدة ياخذ الصينية مني اني اتعمدت اتقرب منة حيل لدرجة ان يشم ريحتي واشم ريحتة
اخذ الصينية بس قبل لا اسحب ايدي ولمست ايدة على طول لذراعة وعفتة ومشيت سويت نفسي مامنتبهة عبالك صدفة مو متعمدة
شفت الصينية اهتزت بيد عمار
واني ابتسامة شريرة على وجهي
طبعا ما انكر احس جسمي كب نار من الحرارة من اشتميت عطرة ومن لمست ذراعة ورجف جسمة احس جسمي وياه رجف

عمار
وصلنا للبيت انة وشيخة والبنات ودخلت اسلم على اهلي
وجنت ادور عليهة بعيوني اريد اشوفهة
شفتهة نزلت من الدرج
اخ ربي هاي شلابسة وشطالعة احس اكو بيهة شي زايدهة جمال فوك جمالهة بس ماعرف شنو
شفتهة اقتربت مني وحطت ايدهة على صدري ورفعت رجليهة حتى توصل لخدي وتبوسة
لان هي اقصر مني بهواي
بس اخ بوية احس جسمي اهتز جوة ايدهة ولاحتني شمت عطرهة والله لو ما عيب واهلي كدامي جا بالقران رحت جريتهة من شعرهة لفوك واشوف شغلي وياهة ولاخلي اثر مثل الختم بكل جسمهة وابرد نار البگلبي شكد مشتاق لحضنهة وهاي حركتهة اطلقت سراح البركان الهايج الي بصدري

زهراء
خلصت العزيمة
وكان الكل يحمد بطبخي شلون كان طيب والحلويات اني سويتهة بيدي
وطلعو الخطار كلمن لبيتة
وتركت غسل الصحون على الخدامات لان احس بجسمي كلة يوجعني
اسيل-زهراء صبي جاي لجدي
زهراء-صار هسة
اندك باب المطبخ
وشفت نوال رجعت من الزيارة -ورحت عليهة وبوستهة
وراحت للصالة
سويت الجاي وحضرت الصينية واخذتهة للصالة جانو كلهم گاعدين ويسولفون
خليت الصينية بالكاع وكعدت يم رجلين الجد والجدة
وصبيت للكل جاي واحس اكو عيون تراقبني
نزلت شيخة وياهة جنطة
وبسطت بيهة بالصالة
وكعدت توزع الهدايا الي جايبتهة وياهة هي وعمار من الامارات
شفتهة انطت للكل وعبرتني ما هدتني شي
اني عادي عندي واصلا ما استغربت من شيخة ومانقهرت الي قهرني
جايبة لكل البنات سوار ذهب كلش نازك وحتى لعمتي جايبة
وعمتي سألتهة - جا وزهراء اشو ما انطيتيهة
شيخة-زهراء ماخذة حصتهة من الباگتة بعد عليمن اجيب الهة ذهب
عمار وبغضب-شيخة احترمي نفسج لا اجي اكص السانج اشو ماتحشمين الگاعدين
ابو عمار-شبيك بوية عمار هديت على الفرخة ترة شيخة ماحجت شي غلط ترة هي حتى كفر تگعد بيناتنا

زهراءوبكل شموخ لان هي تعرف بنفسهة مامسوية شي غلط-مشكور يعمي ماتقصر شنو انت شفتني بعينك اني بگت الذهب
موانت رجال جبير والله فوك راسك ويشوفك وباجر وراك حساب وتتحاسبً
ابو عمار-لابوية ماشفت بس الذهب جان عندج ومحد يكدر يوصلة الا انتي
عمار وبصوت هادئ-سدو الموضوع ما اريد اسمع بعد حرف بخصوص هاي السالفة اعتبروهة صفحة ونطوت وزهراء مرتي واريدكم تحترموهة
زهراء بقهر-لا الموضوع ماينسد وانة ما راح اسكت عن الموضوع وابقى بنظركم حرامية لان مو انة الي اخذت الذهب ولا اريد منيتك علية وتسوي روحك مسوي فضل براسي لان تكتمت على السالفة وحضرتك تنازلت عبالك اني راح اكون ممتنة لتنازلك
فاذا سكتت معناهة اثبت اتهامكم ضدي ان هو صحيح

ضل عمار ساكت وما حجة شي وعرف من عيون زهراء وحرگة گلبهة من تحجي عرف ان موهي اللي سرقت وففضل ان يسكت وبقة امر البحث عن السارق سر بينة وبين نفسة وراح يبحث من جديدعن سالفة الذهب
بس هلمرة بدون علم احد

مرت الايام وزهراء وشهر رمضان بنهاية وزهراءكل يوم يزيد تعبهة
وكانت تلعب باعصاب عمار وتحس بي متلهف الهة بس يكابر وما يقتربلهة
كان ينام عند شيخة ونوال
ومرة صبينا الفطور وكعدوا كلهم على السفرة واني اخذت اكلي ورحت اكل وية الخدامات
واشوف واحد لزمني من زندي وگومني
عمار بغضب-بدون كلام تجيبين اكلج وتجين تكعدين على السفرة فاهمة
زهراء-خليني هنا اكل مرتاحة اكثر
عمار وبقهر-مو بكيفج يالله
زهراء
كمت لان جان ما عندي قوة احس بروحي كامت تبهت ما اعرف شبية
رحت كعدت يمهم شفت عمتي فرحت من شافتني
كعدت وياهم وشيخة عيونهة نطت وما تكدر تسوي شي
بس بيومهة كلت العب باعصاب عمار
من خلص الفطور وعمار وعمي طلعوا بعد الفطور يسيرون على اهاليهم
واني رتبت نفسي على حباية ونص ولبست طوك ابو الفيونكة ولبس ثوب قصير ولبست حجل ونزلت شعر خليت ميك اب
سمعت عمي وعمار رجعو واسمع اصواتهم كعدو يسولفو ويحجون وشوية سمعت عمار استأذن من اهلهة يريد يصعد فوك لشقة شيخة اليوم الا احرك گلبج ياشيخة رحت ركض عليهة شفتة واكف گبال باب شقة شيخة ويريد يفتح الباب
واني انفاسي تتكطع من الركض -
زهراء-عمار لحظة

دهاليز القدر
للكاتبة
Nuha-d-h

انتمنى لكم قراءة ممتعة