دهاليز القدر الفصل الثلاثون 30 - بقلم نهى

دهاليز القدر
دهاليز القدر
للكاتبة
Nuha-d-h

جنت اعدل بملابس علاوي واحطهن بالكنتور وجان علاوي وبنات شيخة يلعبن وية علاوي
وحوراءخطية تساعدني تناوشني الهدوم واني احطهن بالكنتور

طبعا بنات شيخة ابد مو على امهن كلش حبابات وحوراء دخلت المدرسة هاي اول سنة الهة بصف الاول

وكعدت تسولف عن صديقاتهة واني اسمعهة
واحجي وياهة
عبالك اني صديقتهة
ودخلت علينا شيخة مثل الاعصار
الظاهر رجعت من السوك وخلصت شغلهة
شيخة وبدهة تاكلني
شيخة-يالله يمة تعالن اشتريتلجن بدلات يخبلن خطية ابوجن گلي مو ترجعين وما جايبة وياج شي الهن
يالله يمة حوراء عوفي البيدج وتعالي
طلعن بنات شيخة قبل امهم وهي بصوت ناصي تحجي حتى ماتسمع بناتهة
شيخة-شوفي ولج هاي سوالفج ماتمشي علية وعرفي وين تخلين عيونج
ترة جاي ارقبج واعاين عليج شلون تباوعين على عمار جنج تردين تاكلينة اكل بعيونك
والله ثم والله اذا اقتربتي من عمار لسوي بيج سواية
اخليج تعضين اصابعج من الندم
زهراء
بقيت واكفة مصدومة بكلام شيخة وماعرفت شحجي
زهراء-شيخة ترة موتشوفيني ساكتتلج عبالج اخاف منج والله اروح احجي لعمتي على كلامج هذا واخليهة تطيح حظج
شيخة - اح عشتوا والله وطلعلج السان وكمتي تحجين شوفي حبيبتي هنا عمار هو الامر الناهي بالبيت مو عمتي وانتي منبوذة ترة وعمار ما جابج هنا الاعلمود تخدمينا وام لعلاوي
والدليل عمار حتى ماحاسبج مثل النسوان
انتي لو عندج كرامة جان مابقيتي يوم واحد بالبيت بس ويامن اني احجي انتي بنت فكر والكرامة عندج مثل مداس الباب ( المداس يعني القطعة التي توضع في الارض امام كل باب وقبل الدوخول للبيت يداس عليها )
زهراء
كلام شيخة الي كانت القشة التي قسمت ظهر البعير
يعني على اساس اني ناقصة قهر وتجي شيخة تجملني شلون بالله تحزمو علية شيخة والشيطان وما اشوف نفسي الا واني هادة على شيخة وجريتهة من شعرهة وعضيتهة من زندهة حيل فوخت گلبي بيهة
عمار شفت
شيخة واكفة يم باب غرفة اسيل وظهرهة علية
وفجاءة اشوف ركضت عليهة زهراء ولزمتهة ومشعتهة
اني تخبلت هاي شنو وين كاعدين بغابة وشيخة وكعت بالگاع
زهراء -والله اشك حلكج اذا جبتي طاري اهلي على السانج
عمار وبصوت عالي -زهراء

زهراء
من سمعت صوت عمار شهگت ووكف گلبي
عمار-شنو هذا التصرف شنو حضرتج كاعدة بسوك
زهراء اقترب مني عمار وهو يحجي بعصبية
زهراء-عمار هي ال
مالحكت اخلص الكلمة
اجاني راشدي طياري فر راسي فر احس اندارت ركتبي من وراه
لزمت مكان الضربة وطاحت دمعتي على خدي ودنكت ومشيت وماحجيت اي كلمة
وشفت عمار كوم شيخة ويحجي وياهة
- شنو ليش هيج سوت وياج شنو حجيتي وهي هدت عليج هيج
شيخة وبدموع تماسيح سوت روحهة تبجي-اسأل بناتي ماحجيت شي جنت احجي وية بناتي واكللهن اشتريتلكم بدلات اشو هاي بعدني ماحاجية شي هي ركضي علية وكامت تصيح بس انتن يخليجن تطلعن تشترن واني مايخليني
كلتلهة لاتحجين على عمار هيج عمار يحبنا كلنا لاتظلمينة خافي ربج
وهي هدت علية وملختني

زهراء
سمعت كلام شيخة لعمار شهكت ولطمت على صدري وهو باوع علية
عمار-زهراء صحيح هذا الكلام
زهراء باوعت عليه -عمار اذا كلت كلامه كلة كذب راح تصدك بية لو تجذبني وتصدگهة
عمار وعيونة حمر -شوفي اني اعرف شيخة وهي بنت عمي من هي وصغيرة رابي وياهة واعرف صدكهة من جذبهة
بس انتي اللي ما اعرفج
زهراء وبهضم -خلاص انت صدرت الحكم قبل لاتسمع كلامي بعد على شنو جاي تسألني
عفتهم وطلعت للمطبخ احس صدري بي غصة وعيوني انملت بدموع الهضم
استهضمت على نفسي
والله صحيح كلام شيخة اني هنا مجرد خدامة للكراب وام لعلاوي
بس والله ما اسكت على اللي يهيني ومامتندمة من ضربت شيخة
وعمار مشكلتة يصدگني ما يصدگني اني كدا والا كدا مرفوض مرفض
بالحالتين مامعبرني ولايسويلي حساب بعد عليمن اني دايخة واسويلة حساب
عمار -ضربت زهراء لان ما اقبل احد يتجاوز ببيتي وبوجودي فلازم تعرف حدودهة
وبوكتهة سئلت شيخة شنو الصار ومن خلال كلامهة عرفت ان شيخة جاي تجذب لان هي بنت عمي واني رابي وياهة من الصغر واعرف جذبهة من صدگهة
بس اليقهرني واليدقني سكوت زهراء الي ماتعرف شلون تدافع عن نفسهة وحتى وان اجت تاخذ حقهة تخرب الاول والتالي وتنگلب السالفة براسهة
بس احسن تستاهل اصير وياهة قاسي لان ماتعرف تتصرف
كل يوم اگول خطية وبعدهة ماتعرف لطبعي
بس بتصرفاتهة الرعنة تخليني اگول هذا هو وصل حدهة
هاي ما يفيد وياهة الانتظار والمفروض من اول يوم اشوف شلغي وياهة
وارجع واگول بس هلمرة انطي فرصة وخليهة هي تجيني من ذاتهة

زهراء
اجت نوال وشافتني ابجي واطبخ
وهي تعرف بسوالف شيخة ولظاهر شاهدت الموقف وسمعت حجي عمار وياي

نوال -خلصتي طبخ
زهراء واني امسح دموعي بسرعة -اي خلصت هسة شوية واطفي الطباخ
نوال - تعالي كعدي اريدج عندي سالفة وياج
زهراء كمت خلصت الطبخ وطفيت الجدورة ورحت ورة نوال بالمطبخ البارد شفتهة سحابتلهة كرسي وكاعدة على ميز الطعام اني اجيت وسحبت الكرسي اللي بصفهة وكعدت
دارت وجهة علية نوال-شوفي زهراء اني اول مرة راح احجي وياج
اني الله الشاهد معتبرتج مثل اختي
ولا حاطة ببالي ان انتي شريجتي
واظن تصرفاتي وياج تشهدلي
زهراء-اي والله والنعم منج انتي وردة مال الله

نوال -راح احجي شي ماحاجيتة لأي واحد وانتي اول وحدة راح احجي الج حتى تفتهمين وتستفادين
شوفي خية ما اظن ياسر سولفلج عن قصة زواجي اني وعمار لان محد يدري بس عمار وياسر وهشام بقصة زواجنة
من تزوجني عمار جان شاب كلش صغير على الزواج بس جدي اللي فرض عليه ان يتزوجني واني اكبر من عمرة ب١٠سنوات وجنت قبل لا يتزوجني عمار مخطوبة واحنا عندنا المخطوبة كسرتهة اقوى من المطلقة والارملة لان هذني يعرفن مصيرهن وجربن الحياة وعاشن الهن كم سنة بسعادة بس المخطوبة مثل العطشان الي جاي يشرب ماي ويجرونة من حلكة هيج صارت حالتي واني جنت احب خطيبي ابن خالتي من جنا واحنا صغار واحد يحب الثاني بس الله ما كتب النا نتزوج وهو استشهد واني من بعدة اعتكفت عن الزواج
بس جدي فرض علية وعلى عمار ان نتزوج لان هو ابن عمي وهو اولى بستري لان السان الناس ما رحمني ومن شافوني ماتزوجت واني قبلهة جنت مخطوبة گالو
يا بس لا ماخوذة ومو بنية جا ليش قسمتهة لحد هسة ما اجت ومحد دك بابهة
وارجع واگول ان المخطوبة مظلومة اكثر من الارملة والمطلقة هاي عقليت التاس الي عايشة وياهم
وتزوجنا واني وعمار من اول ليلة النا بعرسنة حجيتلة عن اللي بگلبي وهو سودة علية اتفهم الموضوع وهو اصلاً جان يموت علية بس مثل اختة ولج اتذكر من اجة عمار على الدنيا ورحنا نتبارك لخالتي ام عمار جان باللفة بعدة صغيرون واني عمري ١٠وداخلة على١١
اتذكر من شلتة بين ايدية وبعدين حللتة وكعدت العبة
وحتى اتذكر اول ما تعلمت شلون اكمط الطفل بديت بعمار وكعدت اتعلم بي شلون اكمط
وبيبتي الحجية تحجي علية و تگلي ولج هذا مو لّعابة وتلعبين بيهة
ومن يومهة احس بي مو بس مثل اخوي احس بي مثل ابني
لذلك اني اعرف عمار اكثر من نفسة
اني ماحجيتلج قصتي وية عمار حتى تسمعيهة لا ولا علمود تعرفين شنو يدور بيني وبين عمار هم لا
اني حجيتلج حتى افهمج واكلج يا بنت الناس اني اكثر وحدة بأهلة تعرف عمار واعرف شنو يفكر واعرف كل اطباعة
شوفي يابنت الحلال
عمار يتخبل من الشخص الضعيف اللي ما يطالب بحقة وكلش يحترم القوي الي مايضيعلة حق
فسمعيني شنو راح احجي علكيه حلقة بأذنج
انتي صحيح حلوة وجميلة وبيج كل المواصفات ماشاء الله
بس هاي ماتكفي بعين عمار هو يموت على المرة القوية
الي تعرف شنو الهة وشنو عليهة وتعرف واجباتهة وتگوم بواجبهة من كل النواحي على اتم وجه وما يبدر منهة تقصير وبالمقابل تشوفيهة تطالب بكل الاحترام ماتقبل احد يقصر وياهة وميضيع الهة حق
مرات من اشوفة يتصرف بقساوة مع ناس
يكسرون خاطري من يحجي عليهم
اظل احجي عليه واتهمة بالقساوة باتجاه الضعيف
يكول -لانوال الي يشوف نفسة ان هو مستضعف ومظلوم فهذا ما يستحق ارحمة
لان هو اختار ان يكون تحت والناس تستضعفة وما يدافع عن حقوقة ورضى بهذا وضعة
فيا اختي صيري قوية بس ها ميزي عدل ترة القوة مو معناهة ترحين وتهدين وتعاركين وتمدين اللسان شطولة
لا القوة تكمن بمكنون الانسان بفرضة احترامة وشخصيتة امام الكل باستخدام عقلة
واسلوب الكلام هم الة دور بالاحترام
ترة عمار من ما اقتربلج مو معناهة ما يهتم بيج او ما رايدج لا هو منتضرج انتي تكونين قوية الشخصية وتطلبين من عندة بنفسج كل حقوقج وبساعتهة
راح تكتشفين جانب من عمار لحد الان محد يكدر يشوف هذا الجانب الا القريب على گلبه

زهراء
من سمعت كلام نوال عبالك جنت متيهة الطريق وواحد مد ايدة الي واخذني ودلاني الطريق
زهراء-الله نوال شكد حلو كلامج والله درر عمي حقة عمار يحبج ويقدرج لان انتي انسانة نادرة الوجود

نوال -وهاي انتي گلتيهة بنفسج وشفتي عمار من يحب واحد شلون يعاملة واتخيلي وهاي اني يحبني مثل اخته
جا هنيال اللي ببالي الي يحبهة بعشك مجنون

زهراء واني انخمط گلبي وتغير لوني وصار اصفر جريت حسرة قوية -اي هنيالهة والله الف مرة هنيالهة

زهراء اشتعلت عندي الغيرة حتى اكل ماكمت اكل والليل كلة مانامة من يوم گالت نوال عمار جاي يحضر الشقة محمدالفوك علمود راح يعرس
زهراء بفضول-اگول نوال سؤال
نوال -گولي خية
زهراء-ها البنية الي راح يتزوجهة عمار منو
نوال باستغراب -يابنية ما افتهمت
زهراء-شنو السالفة انت موگلتي عمار راح يعرس وجاي يعدل بشقة محمد

وهنا دك جرس براس نوال ان زهراء غركانة لاذاناتهة بحب عمار وهسة هي جاي تستفسر وتريد تعرف البنية لاحظت ان بينت عليهة الغيرة وهي جاي تسأل عنهة
نوال -والله ياخية ما ادري ما اعرفهة
زهراء -هااا يالله ربي يوفقهم بس كون تطلع خوش بنية وتقدر عمار ولوً هو يستاهل وحدة مثل (حكيمة وفتون الي بمسلسل دواس ومانع )

عمار -منو هذا اللي يستاهل وحدة مثل حكيمة وفتون
زهراء بكمزة ووگامت من الكرسي-هَـا هَـا لا هذا هذا نحجي على البنگالي هيج جاي اتقشمر وية نوال
ودارت وجهة على نوال
هانوال موجنت احجي على البنگالي

نوال گامت تضحك على زهراء-اي خوية صحيح كلام زهراء
عمار -نوال اني صاعد فوك لشقتج عفية صعديلي كلاص جاي ثخين راسي يوجعني
باوع على زهراء واكلهة اكل بعيونة وراح

زهراء حطت ايدهة على گلبهة ووجرت النَفَس براحة وكعدت على الكرسي -يمة راح گلبي والله عبالي سمعنا بكت طن هوى گلت فلت وجهي
ما اعرف شلون طلعت بسالفة البنگالي
نوال وهي تسوي جاي لعمار و خربانة من الضحك على شكل زهراء

زهراء -نوال عفية اطلب منج طلب
نوال -طلبي خية
زهراء- تقبلين اصعد الجاي لعمار بشقتج لان عندي حجاية وياه وما جاي الكاه واحصل عليه لان ماينطيني مجال من وقتة الثمين
نوال -روحي خية عادي واخذي راحتج
وهسة هاي خلصت الجاي راح اصبة واخذي وياج

زهراء
اخذت الجاي من نوال ورحت صعدت لشقت نوال فوك بس قبل لا اصعد باوعت على روحي بمراية الموزع وشفت حجابي عدل ودشداشتي مرتبة وكرصت خدودي حتى يصير بيهن لون
ضحكت على محاولتي العقيمة بان الفت انتباه شخص على وشك الزواج من حبيبت گلبه
وهسة اني بيش الحگة ويباوعلي
دكيت الباب وسمعت صوتة -دخلي نوال فوتي
فتحت الباب واني گلبي رعيد ما اعرف شصاربية-
شفتة نايم على السرير بطرك قطعة السروال (يعني بجامة التراكسوت)وصدرة العريض طالع كلة وايدة على عيونة
زهراء-احم احم
عمار بفزة وخر ايدة من عيونة-شجابج هنا
زهراء-جبت الجاي
عمار-اعرف وانة مطلبت منج تجيبين الجاي
زهراء-اعرف بس اني گلت لنوال تخليني اصعدة الك
عمار -هذا هو خلي على الميز وطلعي
زهراءبتردد-لا ما اريد اطلع اريد احجي وياك بشغلة
عمار -تفضلي اسمعج
زهراء - اة اني

ولحاكايتي بقية اتمنى لكم قرائة ممتعة
بصحبة ابطال روايتي
تعليلقاتكم تسعدني

دهاليز القدر
للكاتبة
Nuha-d-h