دهاليز القدر الفصل الثاني 2 - بقلم نهى

دهاليز القدر

للكاتبة
Nuha-d-h

اني كبل خليت ايدي على وجهي وانتبهت ماكو نقابي اثاري من الوكعة انرفع فوك راسي بس ما اسولفلكم عن حالي شنو كمت ابجي مثل الطفل بشهكة
-خرب عشيرتك عمار من احتركو اي ليش تبجين شنو متأذية
اني امسمح بدموعي مشاعري بوكته كانت خوف على ارتباك على مستحة وكان على وجهي لثكة من الطين
؟-مد ايدة ومسح الطين عن خدي وايدة ترجف
اني تعالو دوروني من الاحراج وخرت ايدة ونزلت نقابي على وجهي
احم خلي احجيلكم عن الشخصية الجديدة عمار
اني اسمي عمار عمري ٣٥ متزوج ثنين وحدة بنت عمي اكبر مني بعشر سنوات بس كلش حبابة اتزوجته لان كانت مخطوبة من ابن خالهة واستشهد خطية وبعدومحد قبل يتزوجه وعرض جدي علية اتزوجهة
جدي -بنت عمك انتى اولى بسترهة من الغريب
خطية هي تعتبرني مثل اخوهة الصغير لان احنا رابين سوة وبقت وفية بحبه لابن خالهة وبيوم زواجنا كان عمري٢٣سنة. خطية ظلت تبجي بيومه اتذكر شلون سحبتهة وبسته من راسهة كلتلهة
ماعاش الي يوكع من عندج دمعة
نوال ودمومعه توكع -عمار والله مو بيدي اريد احجي وياك وخايفة منك
عمار-احجي والج الامان
نوال -عمار گلبي وروحي ماتت بيوم مات احمد فالنفس طابت من بعدة ما اتوقع احد ياخذ مكانة حشاك مو اقلل من قيمتك بس صدكني عمري ما شفتك غير اخوي الصغير
عمار -بسته من راسه شوفي يبنت عمي التردي يجرالج ومايصير بخاطرج الا طيب اني ماتزوجت الا حتى اكف السان الناس عنج
انتي تكعدين هنا معززة ومكرمة وام بيتي وانتي الامر الناهي ههههه ما انكر اني هم اناني يعني حتى افتك من نكة امي والحجية بيبيتي اكلو كلبي شوكت تتزوج شوكت تتزوج
فصرنا اني ونوال شلون الاخوان يعني من اضوج او يصعب علية امر او شغلة اجي انام بحضنه شلون الطفل وتظل تلعب بشعري وتكعد تنصحني
يعني ربي خلة نوال بحياتي شلون الملاك الصالح الي يهدي ويبرد علية مرات استشيرهة بهواي امور بالعشيرة وبالعمل هي برزانتهة وعقلهة هواي رشدتني لان كنت شاب بوكتهة وعندي نوع من الغرور والطيشان كانت هي تكبح من التهور اللي عندي.
بمرور الايام ومرت ثلاث سنوات على زواجي بنوال واخذت بيبي تلح على الخلفة وليش ما يصير عندك جهال واريد اشوف بزرك قبل لا اموت
عمار-ادري حجية هو بس اني بالعشيرة هذولي ولد عمامي كل واحد عندة ثلاثة واربعة جهال
الجدة - لا يمة عمار انتى ابن الغالي ابن ابني العود الجبير يعني بزرك يختلف عنهم كلهم انت يمة شيخ العشيرة من بعد ابوك يطول بعمرة
وظلت تضغط عليه الحجية والوالدة وخطية حتى نوال صفت وياهم هم ظلت بس تحجي براسي اتزوج وانتى شن🤔و? ذنبك متقيد بيه شوف حياتك ومن هذا الكلام الي كل يوم تحجي براسي
لحد ما يوم طكت روحي مهنم كلتلهم خلاص انتو اختاروا البنية اني ما فارغ غركان بالشغل اختاروا وفكوني فيوم ثاني امي راحت وهي النسوان والحجية الجبيرة لبيت عمي الصغير ابو جاسم وخطبولي شيخة بنتة وتمت الخطبة والزواج طبعا شيخة شكلهة عادي سمرة وعيون كبار وطوله عادي ومرت الايام وصارت مشاكل بين نوال وشيخة وطبعا شيخة نشبت وية نوال ومرات تخبث عليه وحبلت شيخة وظلت تعاير بنوال لذلك فديوم عطت بشيخة ووكفته عند حدهة. مو لان حبلت. تكوم تتفرعن على المسكينة نوال طبعا نوال ماكانت تحجيلي عن سوالف شيخة وياهة فيوم من الايام دخلت فجأة على البيت واسمع شيخة تصيح بعالي صوته وتغلط على نوال وتكلله العاقر وغلط هواي اني هنا ما اتحملت حركت البيت حرك على راسهة احس نار تطلع من راسي اضوج من الظلم ومن يومه علمت شيخة درس ماتنساه وعرفته حدودها ان نوال هي ام البيت وهي الامر الناهي وعاقبت شيخة عقاب
كمت اسبوع عند نوال ابقى ويوم عنده منا لحد ما شيخة رفعت الراية البيضة واستسلمت وظلت شنو تكول نوال شيخة تنفذ وهي ساكتة بدون كلام واني اعرف نوال حقانية ماتظلم احد ويوم عن يوم نوال تصير شخصية قوية حتى على بقية الجناين وامي سلمته امور البيت والعزايم والمناسبات هي تكوم بالواجب وزيادة لان امي تعبت صحتهة وصار عندي ثنين بنات وهسة شيخة حامل بالسابع وفي يوم واني راجع من الفاتحة مال جبير عشيرة ال........فبالطريق واحنا راجعين جان اكو نسوان ثنين وبنية صغيرة البنية الصغيرة عرفته بنت ابو سامي الرجال الجبير فمرت سيارتي وبالطسة طفر ماي على المرة فسمعت صوت شهكة وشفته من الجامة مالت السيارة عثرت وطاحت السيارت الي قبلي راحن واني صفيت سيارتي ونزلت ومديت ايد حتى اكومه بس دخيلك يا ربي سبحان الخالق يعني خلق فابدع من اكول حسن على جمال رباني قليل بحقهة ما عرفت شنواسوي لاول مرة بحياتي يرجف جسمي واحس حرارة تطلع من راسي ونفسي صار ثكيل ماعرفت شنو حجيت بالاول ونوب ظليت اصيح عليه شن🤔و? طلعج وظليت اسب واغلط
احتركت عشيرتك عمار وماحسيت على نفسي من مديت ايدي ومسحت عن خدهة الطين اويلي بوية ايدي ظلت ترجف جنك ما شايف مرة بس الله اكبر مو مرة هي ظلت الدموع متجمعة بعيونه
هي نزت وتلمست وجهة وكمزت بسرعة ونزلت نقابهة
على وجه وحرمتني من شوفت البدر
للكاتبة
Nuha-d-h

زهراء
اجت ست امنة والطالبة يركضون عليه وهذا الزلمة واكف فوك راسي والطالبة تصيح يمة ست زهراء خوما تاذيتي اني بس اناشغ(اشهك مثل الطفل)
امنة-زهورة حبيبة خو ما تاذيتي. دارت على الرجال شلونك ابو ياسر
عمار -هلة ست امنة ارجو السموحة وحجة
لست امنة الصار وخطية ست امنة كومتني وكعدت تمسح بعباتي واني رفعت عيني واشوف الرجال بعدة واكف وعرض على ست امنة ان ندخل لبيتهم انظف عباتي من الطين فدارت عليه تسئلني هَـا ندخل بس اني ما اشوف بيت قريب بس البساتين ومناك القصور الاربعة احتمال هنة الي يقصد عليهم بيت
اني حجيت بصوت ناصي زهراء-لا مايحتاج
للكاتبة
Nuha-d-h

يالله خلينا نمشي اتأخرنا على المدرسة
فمشيت ومشت وراي ست امنة والطالبة وهو ركب سيارت ومشى
عمار -استغفر الله اعوذ بالله من الشيطان شجاك عمار
شنو اول مرة تشوف بنية حلوة
اي والله اول مرة اشوف هيج حسن وجمال وحشمة هنيال امه وابوهة بيوم يصبحون بهيج وجه
ست امنة صاحت عليهة ست زهراء. يعني الابنية اسمهة زهراء شي اكيد هي معلمة تداوم بالمدرسة القريبة علينا وية عمة فوزية شنو عمار من تالي عمرك و هيبتك تدور ورة بنات العالم

زهراء-وصلت لبيت ابو سامي واستقبلتنا ام الطالبة تصير مرة جبيرة تعبانة سلمت عليهة وحجيت وياهة عن بنتهة وشفت وضعهم تحت الصفر كان بيتهم من طين وكعدنا على حصيرة خوص اني كنت اتوقع ان هيج فراش انقرضت بعد بس مع الاسف هنا كلشي اتوقع موجود من خلصت كلامي حجت ام سامي -والله ياخالة فدواتج ما اعرف شنو اكلج بس والله مستحية اكول هنة البنات عندهن صدرية وحدة فيوم هاي تلبسهة ويوم اختهة الجبيرة تلبسهة فلذالك تداوم بين يوم ويوم حتى اختهة الثانية الي بالسادس هم تداوم بين يوم ويوم

زهراء
اني بساعته متت قهر وضجت من نفسي شلون جنت ارزل الطالبة بدون ما اكلف نفسي واسئل عنه وعن وضعهة
زهراءبحزن- خالة شكرالاستقبالج النا وان شاء الله يصير خير واعتذر عن ازعاجكم
طلعنا اني وست امنة وست امنة ظلت بس تصفن
وكالت اني صارلي كومة بهاي المدرسة وما كلفت نفسي اسئله عن وضع الطالبات والله مو بس هي هواي بنات اشوفهم بعز البرد لابسات بس قمصان بدون شي جواهن استغفر ياربي
وصلنا للمدرسة وحجينا للمديرة كل اليصار عن بيت ابو سامي وغيرهم من البنات المحتاجات
وبيومه سوت المديرة اجتماع بنهاية الدوام وكانت ست فوزية موجودة ورفل وتبارك وكل المعلمات حضرن وحجت المديرة عن موقف بنات ابو سامي وبقية البنات المحتاجات فاقترحت ان كلما نستلم راتب تاخذ من كل معلمة خمس الالاف لصندوق المدرسة واني اتكفلتلهم ان امي تخيط الصداري والقمصان همة بس عليهم يشترون القماش من فلوس الصندوق
رفل بدلع-اني هم راح اسأل ماما اذا عندنا ملابس زايدة مانريدهة اجيبهم
امنة -اي صحيح كلامج رفل زين تسوين

زهراء-اني لو بيدي انطيهم كلشي جديد و ما اتمنى انطيهم قطعة ملبوسة خطية بس اقتراح رفل احسن من ماكو
ست فوزية ساكتة بس تسمع
فاتفقنا وصارت الحلة وكلمن راح لبيتة
ورجعت للبيت كالعادة وخطية امي مكسور ضهرها على مكينة الخياطة وكعدنا نتغدة وسولفنا عن الي صار وصادف كنت لابسة ثوب قصير وطالعة ركبتي وبابا بخوف

بابا -ولج زهورة هاي وين طايحة
زهراء اهوووو ذكرني باللي صار اليوم -حجيت لبابا عن الي صار بس ماكلت ان نقابي انرفع من على وجهي وان الرجال شاف وجهي وخطية ماما عندهة مرهم مال جروح خلتلي على ركبتي
ورحت اكمل كم طلبية مال الحلويات الي طلبهن المعلمات اجت ماما للمطبخ
ماما-زهراء مو تنسين تاخذين قياسات البنات حتى اخيطن مضبوط على قياسهم الصداري والقمصان
زهراء -اي ماما ان شاء الله بس ماما المديرة كالت امج تاخذ اجرت الخياطة
ماما-شنو السالفة اني هم اريد احصل ثواب واجر مثلكم مو بس انتو
زهراء- رحمة الله والديج يا احلى واحن ام بالعالم
كمت وشبكت ماما قوي
واجت زينة -شنو هاي خيانة خيانة
بابا-اكول ست زهراء مو جنج ماخذة الحضن كله الج بقيلنا شوية
زهراء-عيني ابو الشباب انت الكل بالكل
رحت اتمدد بفراشي واتذكرت الرجال يمه شلون حلو ومزيون بس ما اعرف وين شايفتة احس شايفتة
بس يمة يمة شنو من صوت وكلامة طير گلبي
حتى حلكي ماندليتة من ردت احجي
خرب ومن لزم وجهي اجه يغمي عليه اشكد عيب
بس اول مرة بحياتي رجال يلمسني
نمت وما احس الا امي تكعد بية
ماما-ولج زهراء كعدي اجة السايق عليج ركضي شعجب متاخرة بالنوم
اني طفرت من فراشي بخرعة وظليت بس اركض
ولبست هدومي شلون ماكان وركبت السيارة وسلمت
وركبت بالسيارة والدنيا مظلمة لان شتا والساعة بالخمسة الاربع
السايق-شنو بوية اشو متاخرة
زهراء-والله عمو اخذتني النومة
وصلنا للمدرسة بعد ما اخذنا المعلمات حتى نسيت اخذ ريوك وصلت للمدرسة خربانة روحي من الجوع اول مانزلت من السيارة احس اهتزت بية الكاع من الدوخة
فحسيت روحي راح اوكع من طولي. فردت شي الزمة استند عليه
فصارت ايدي على سيارة تصير قريبة علية واكفة بباب المدرسة ما انتبهة منو راكب بالسيارة ولا انتبهت على السيارة كان همي خاف اوكع غوشت عيوني
ماحسيت الا احد لزمني من ايدي
نزيت ودرت وجهي وشفت ست فوزية
فوزية -سلامات خالة زهورة شبيج يوجعج شي
كولي اخذج للمستوصف هي هنا قريبة علينا اخلي ابن اخوي يوصلنا اني اجيت احجي فرفعت راسي اريد اجاوبهة فوكعت عيني بعين الرجال صاحب حادث الطين
هنا كلش اتأزمت حالتي ما ادري من الجوع لو من المستحة حتى كلام ما عرف اطلع
زهراء بصوت ناصي -لا ست فوزية اني زينة الحمدلله بس لزمتني الدوخة لان ما اتريكت
فوزية بصوت مسموع -يا يمة سودة علية هسة اصيرلج ريوك عساج على ريوك
زهراء طبعا اني هنا تعالو دورو عليه ماتلكوني من الفشلة غديت ماي من الفشلة الله يسامحج ست فوزية بعد لو مأذنة بمكان شيخ الجامع فدنوب وصيحي زهراء الجوعية ميتة من الجوع وتريد اكل

عااااد هناك اسمع واحد صوتة خشن اقشعر جسمي وكمت ارجف مدري خوف مدري رهبة يعني الهيبة مالتة تخلي الواحد كوة يرتبك
عمار- يخسي الجوع كولي عمة امري شنو اليوم نسيتي تتريكين
هو سمع كلام عمته بس ما راد يحرجني
ست فوزية افتهمت عليه -هَـا اي يابعد عمتك دزلنا على ريوك معتبر
عمار-صار عمة تدللين
اني هنا جمدت لا اسمع لا اري لا اتكلم وكأن اني مو وياهم من المستحة استغفر الله يعني والله يازهراء ماكدرتي تظمين جوعتج وتتحملين شوية ام بطن فضحتينا عابت اي والله
دخلنا المدرسة
وشفت كراتين مال صداري وقمصان بجميع الاعمار والمديرة طلبت من ست امنة ان تشوف صف صف وتسجل اسماء البنات اللي مستحقات ان يسلموهن قمصان وصداري
وخطية كان هذا تبرع من اهل ست فوزية وهذا الرجال كان ابن اخوها واسمه الشيخ عمار

كان اول درس الي شاغر فكاعدة واجت مرة لابسة عباية وشايلة صينية شكبرهة ودكت الباب
تبارك -نعم خالة تفضلي
المرة-خالة اني من طرف ست فوزية
اجت ست فوزية -هلة بام سلوم شلونج دخلي حطي الصينية هلى الميز
المرة- خالة يكول الشيخ عمار هاي عربون اعتذار عن الي صار البارحة والف عافية

للكاتبة
Nuha-d-h

يتبع