رواية ضحية لمن لايرحم الفصل السابع وثمانون 87 - بقلم زهراء الحسناوي

مابعد الألم

(ضحيه لمن لايرحم)

بقلمي زهراء الحسناوي

****************
هناك من يختار الصمت فيحبس غصته في جوفه
وهناك من ينفجر باكياً عند اول محاوله
فاشلة في التجاوز
هناك من يحتاج عمراً لينسئ ثقل الذكريات
وهناك من يستجمع نفسه سريعاً
هناك من يأخذ وقته كاملاً للنسيان
فيظل وحيداً بعد الإنفصال لمدة طويلة جداً
الئ أن يفرغ قلبه من الحب القديم
وهناك من يملأ فراغ قلبه بأول شخص يدق باب الدخول
هناك من يحاول البحث عن شخص لايشبه من رحل
في شيء
وهناك من يبحث عن نسخه مستنسخه ليجتنب الإحسان بالوجع
لكل منا طريقته في تجاوز الوجع
في مواجهة عجزه
في كبح صراخه من فرط الألم
وفي النسيان
لكننا جميعاً نتشابه في لهفة البدايات
وحداها اوجاعنا عند النهاية تختلف💔

كل انسان بينه عنده ماضي يختلف
اكو شخص عنده ماضي يحاول بشتى الطرق يتجاوزه وينساه
لانه يحمل ذكريات صعبه وسيئه بنفس الوقت

اكثر شي يقهرك من تخلص اجمل سنين عمرك قضيتها بذاك الماضي البشع

محاولاتك المستميته للتجاوز
حتى لو كان تجربه بعلاقة جديدة بدون سابق انذار او تفكير المهم تريد تتحرر من القوقعه الدافن نفسك بيها

ماكو شي اسمه نسان
اكو تناسي فقط نتناسه حتى نكدر نكمل طريقنه بسلام
الذكريات المؤلمه راح تبقى رفيقتنه الارذل العمر

مهما حاولت تبين انو انت نسيت
حدث بسيط راح يسبب برجوع كل الذكريات دفعه وحده

امجد قرار اتخذته وخلص انتهى وقت التراجع
عشت مايكفي من الخسائر بالماضي
كلمة زينب تتردد بدماغي
كل المرينه بي عسر ولابد يجي بعده اليسر
واني املي بالله تعالى جبير كلش

مرات احس نفسي واكفه على قمة جبل عالي وبطريقي منعطف صعب العبور وعلى ساعه اوگع

ومرات احس نفسي قويه لان تجاوزت كثير امور صعبه
بس الشي الوحيد المتعبني هو حالتي النفسيه
اعرف هواي تجاوزت امور صعبه بس بالمقابل
نمليت هم وحزن وقهر

تمنيت اكو جرعة أو لقاح ضد الحزن
لو عندي مناعة ضده

ليش دائما مكتوب علينه نعيش الحزن لحظه بلحظه؟؟

تفكير نخر عقلي نخر للصبح يالله كدرت امام ساعتين بعدها كعدتني امي لان بعد صلاة الظهر
ياخذوني للصالون

اصريت زينب تروح وياي رغم وضعها
بس استمد قوتي منها من ابتسامتها المطمئنه
من نظراتها الحنونه

سبحت وطلعت خالاتي يهلهن ويصفكن واني ابادلهن ابتسامه عكس الشي البداخلي

اخذنه مثنئ اني وهي وخالتي وامي
احنه هم ماعزمنه احد بس خالاتي وبناتهن
وبنات عمي زينب وزينه ومريم

اجرت بس بدلتين البيضاء مال العرس
والثانية كان لونها بنفسجي اختيار خالتي

لان ماعندي روح الكلشي حتى مالي خلگ اختار لو اشوف شنو يرهملي لو شنو يعجبني لو مايعجبني
هنه تكلفن بكلشي

بدت ام الصالون ترتب بيه بين مكياج وتسريحه
لبستني البدله البيضاء اول شي

امي الدمعه بعينها وزينب كل شويه تروح وترجع تسالني جوعانه اجيبلج نستله لو عصير!؟؟

لان تدري بيه مااتريكت شكد لحت امي كتلها مااشتهي
وغده اكلت لگمه وحده وكمت احس نفسي شبعانه اريد بس اتقيئ حتى ارتاح

كملنه ورجعنه للبيت كعدنه بالصاله مريم مشغله اغنية مارايد من الدنيا كلشي
وتركص هي وبنات خالاتي

كعدت بالنص بين الهلالهل والصفكه
وصوت الديجي العالي احس راسي صار شكبره
اشرت الخالتي كتلها نصي الصوت راسي حينفجر

كانن توهن مشغلات اغنية لمحمد السالم اسمها بسبس ميو

خالتي عاطت بيهن

ام جعفر،، ماااطفنه من بسبسجن البين انشاءالله
سطرتن روسنه
بسبس ميو وبسبس ميو حسبالك بزازين يطافرن

غصون،، صار الضحك بفلس لان يعرفون خالتي سبورتيه

وحده من بناتها جاوبتها
كالتلها يمه الزمن تغير مو مثلجن قبل اقوة اغنيه
جانت عدكم خايب هو

غنوها الج من زفوج ع الحصان
مدري زفوج بالبلم

جاوبتها اختها الثانيه
كالتلها
اغنية امي هاي من جان الاعدام تگرص

والحمرة جانت زرقيون مال سلهاف

ام جعفر،، من ترحن فدوه لسعاد العبدالله وضحكتها الحلوه الله يرحمها
جنه نكابل التلفزيون ونكعد من تطلع اغنيتها

طرب قبل يختلف عن هسه لاذوق ولااحساس
بس طربكه واتكمز ونسوان مصلخه

اكعدن خل اغني اني وطفن هذا الشيطان سطرتن راسنه بي قصدها ع الديجي

غصون،، صدك طفنه وصارن
يدارمن وامي وزينب ميتات ضحك عليهن

ام جعفر،، انطني صينيه وخاشوكتين

غصون،، راحت حوراء
جابتلها صينيه والخواشيگ

حطتهن على رجلها وبدت تغني
وادك بيهن ع الصينيه

ام جعفر،، يالله راح اغني وانتن ردن وراي بس
كولن خايب هو

چنك سمار هواي
خايب هو

وعيني التفت جاي
خايب هو

واتعرض اليمشون
خايب هو

من نار الوياي
خايب هو

وخلاني راح وراح
والگلب مامرتاح

وخايب هو وخايب هو
خايب هو

غصون،، خالتي الجبيره ملايه بس ماتقره اناشيد مال اعراس تستحرم
تكول جهازي اشتريته اقره بي على مصاب ابا عبدالله الحسين عليه السلام
مااشتريته اسوي بي مواليد

بس هي كالت اسويلج جلوة مال عروس

جابن الغشوه البيضه حطنها فوك راسي لازماتها اربع بنات
وبيدي شمعه

بدت خالتي ام علي تجلي

ام علي،، ياحسنها في ليلتآ جوليت بها
لجل محمد سيد الأكوانِ

بعد ماانتهت الجلوة كعدن يسولفن ويضحكن زنوبه
تنشاف اكبر من خالاتي لابسه شيله سودة وثوب مايوالم عمرها

ماقبلت تشتري لبس يناسبها هي من يوم الدخلت ال منهل كلشي بيها تغير
مرات من نحجي عليها حتى تغير من نفسها شويه
تگول عوفني اني گلبي من القهر صاير اسود

شيفيد لون الهدم وگلوبنه مفحمة

وحدة من جناين خالاتي انتبهت الها ابنها يبجي يريد ببسي
رفعت راسها الزينب

كالتلها خاله بلازحمه جيبي قوطية ببسي هذا خبصني خبص

زينب،، صار بعد خالتج

غصون،، شگت گلبي زينب من حجت هيج لو وحده غيرها ونفس عمرها جان كالت تره اني بعدني صغيره
وجنه خالتي اني اعرفها كلش هي اكبر من زينب بسنة

اكثر شخص يواسيني هي زينب مع العلم
حالتها اصعب من حالاتي بالف مرة
اني ماخسرت بگد خسارتها

صارت الساعه ب5العصر
اجت حوراء بيدها الموبايل
كالت خابرت مرت اخوي جايين

هي كالت جايين لو اني
معدتي خبطت وضعي تخربط

خالاتي يبوسن بيه ويدعن ربي يسعدني
زينب توصيني اصير سباعية
واطمني حتى اهدء لان جسمي
بده يرجف اللحظه ردت اكوم اكول بطلت مااريد

عشر دقايق وسمعنه صوت الهورنات يعلن عن وصولهم
امي حطت الكبوس على راسي جابته ويه البدله
وغطت متوني لان ابو يدخل وياه

مريم،، بعز الهوسه رجعت شغلة الديجي
مخلية اغنية
هو نجمة ومن اشمة

النسوان لبسن عباياتهن
وكفت مدنكه واحس على ساعه اوگع جسمي كله يرجف

دقايق وتعالت صوت الهلالهل اسمع صوتهم رفعت راسي كان امجد وامه وابو امه تهلهل كدامهم واطش جكليت
وابو لازم ايده جايين بااتجاهي

ابوي يمشي بصفهم
وكف امجد كدامي شكد كانن البنات مخليات عطر
بس عطره هو طغى على كلشي
رفعت عيني الثانية وحده اله ورجعت دنكت

كان لابس قاط اسود وقميص ابيض
ابوي لزم ايده يوصي عليه ومختنگ ماتحمل بجه
خالتي كالتله ابو مثنئ ادعي الله يسعدها خطيه راح تبجي من تشوفك هيج

وفعلا كانه لگيت سبب حتئ بس ابجي
ماكدرت اسيطر على دموعي مدنكه ودموعي تجري
ابوي باسني براسي

وحضني وامي كذلك زينب ردتها يمي لگيتها واكفه بعيد عني ودايرة وجها ادري ماكدرت تتحمل تبجي بعيد عني حتى مااشوفها

لزم ايدي امجد بهتت روحي احس مااعدت اسيطر كلشي بيه اختل
شد لزمته الي بقوة حتئ مااوگع

طلعنه للسيارة مدخلها للكراج مال البيت
صعدني لكدام وهو صعد. الجهة السايق
امي وحوراء طلعن صعدن بسيارة عمي

رفعت راسي زينب واكفه اباب المطبخ عيونها حمر
سوتلي حركه بوجها دائما تسويها من تريدني اهدء

عيوني بعيونها من بعيد
كانه ارواحنه تشكي
شنو السويناه بحياتنه حتى مامكتوب النه نعيش الفرحه التتمانها كل بنت؟؟

تحركت السيارة وطلعنه من البيت
متوجهة لمستقبل وحياة جديدة

امجد كان جدا هادئ تماما عينه للطريق
كلمة وحده حجاها بعد كم دقيقه مرت

امجد،، اشلونج؟؟

غصون،، هزيت راسي بمعنى زينه
خلصنه الطريق كله ساكتين

وصلنه البيتهم هم دخل السياره للبيت
نزل والتف الجهتي فتحلي الباب
نزلت امي وحوراء وهو واكفيلي

امي لزمتني حتى مااعثر بالبدله بعدها هو لزمني
دخلنه للبيت نسوان مااعرفهن يهوسن ويطشن جكليت على روسنه

دخلوني لغرفة مخلين بيها ديوانيه كلش جبيرة
مخليلي كرسي كعدت امجد كالهم اني طالع
تركني وطلع
حتى ماكعد ثانيه وحده

اجن كلهن يباركن الي اخواته ونسوان اخوانه
اسلم عليهن وارجع ادنك الرجفه بجسمي موطبيعيه

تقريبا ساعتين اني كاعده اسمعهن يجهزن بالعشه
للزلم رغم همه كالو مانعزم غريب بس مبين هواي ناس موجودين

بعدها حوراء اجتني

حوراء،، كومي خل اصعدج الغرفتج ترتاحين اهناك اكثر
هنا راح نفرش للنسوان نعشيهن

غصون،، كمت وياها وامي وياي صعدني لغرفتي
كل خطوه امشيها احس بخنگة فضيعه بداخل صدري

دخلت للغرفه ك شكل مبينه غرفة عروس
بس ليش جاي احسها مثل الگبر
وبمجرد ينسد الباب احسهم راح يهيلون عليه التراب

كعدت ع الجربايه حوراء كالت راح اجيبلج موزة تاكليها لان انتي على لگمة الغدة مال الظهر

كتلها مااريد ماجوعانه

ام مثنئ،، روحي يمه جيبيلها ختولي وجها اصفر لاتروح تتخربط
اووف يغصون ربيتيلي عله بگلبي

غصون،، امي مقهورة عله وضعي لان تشوفني مطفية ماكو فرحة بداخلي كلشي بيه هافت

راحت حوراء شويه وجابت موزتين بيدها
امي وكفت كدامي فتحت اول وحده قسمت منها وحطتها بحلكي
كتلها كافي مااريد

ام مثنئ،، تاكليها لااشگ ثوبي هسه وعلي
كافي راح انجلط من وراج
بدل ماتفرحين بلكت الله يسعدج
گالبه وجهج حتئ ابوج اتخربط من شافج هيج

غصون،، سكتت وامي تقسم واتحط بحلگي
اكلت حتى ماتنقهر اكثر

وره ساعه حوراء كالت كملو عشه وراح يصعد امجد

امي بدت توصيني اصير سباعيه وانسه كلشي وامجد حباب ومبين راح يخاف الله بيه

بعدها طلعت امي وحوراء وضليت بس اني بالغرفة
سمعت اصواتهم تقترب من الباب صوت هلاهل وهوسات

انفتح الباب صارت عيني بعينه دنگت
اسمعه يحجي ويه امة مااعرف على شنو
بعدهم كلهم واكفين بالباب اخواته وامه
توه راد يسد الباب ماحسيت غير بنته الجبيرة

دخلت تبجي مفزوعه
كانه واحد ضاربها
كلهم انخبصو بيها بيبيتها عماتها وامجد الكعدلها
ركبه ونص بالگاع
وعلئ وجها باين القلق من منظر بنته وبجيها

بيبيتها جرتها بهدوء

ام امجد،، عوفها يمه مابيها شي

امجد،، اشلون مابيها شي وهيج تبجي
منو وياج بابه؟؟

اريج،، محد

غصون،، حجتها وحضنته تبجي

امجد،، اذا محد وياج جا ليش تبجي. اميرتي؟؟

غصون،، رادت تحجي عمتي جرتها تريد اطلعها
الطفله دكت رجلها بالكاع مفزوعه تبجي كانه واحد ضاربها

صاحت بصوت عالي

اريج،، ماااا مااطلع

اله تطلع هاااي

غصون،، حجتها واشرت عليه
رفعت عيوني لامجد واني كوة مانعة دموعي حتى ماتنزل

كان امجد يباوع للطفله بشفقة على وضعها
يمكن هو اكثر مني ماراد هذا الزواج
بس امر الله فوق كلشي يمكن هاي قسمتنه مكتوبه النه احنه الاثنين

شكد حاولو وياها حتى يطلعوها بس كانت منهارة تبجي بحرگه گلب لازمه ايد ابوها تجر بي تريده يطلع وياها

التفتتلي باوعلي بنظره ماعرفت بشنو اكدر افسرها
دنگ البنته شالها وطلع من الغرفه
اهله ماقبلو امه وحتى ابو صعد بس ترك كلشي وراح
وهو شايلها

دخلت امي وحوراء وامه ومرت اخو
هنه يحجن واني احس حراره تطلع من عيوني
صخونه فضيعه هذا الكنت خايفه منه

ضلن يمي شويه مقهورات على حال الطفله
واني مقهورة اكثر منهن واتندمت لان الوضع الي هي بي اني سببه

حوراء جابتلنه عشه اني وامي
واثنينه ماكلنه اي شي
شكد لحت عليه اكل
تالي قنعتها من اجوع اخلي حوراء تجيبلي اكل

للساعه ب10تقرييا امي گالت اني راجعه البيتي ابوج خابرني كال لاتباتين راح ادزلج مثنئ لان انتي صرتي بتهم منهم وبيهم مالها داعي ابات يمج

وفعلا ربع ساعه وراحت امي و حوراء هم نزلت كالت ابني يبجي يريد ينام
كالتلي محد يصعدلج اخذي راحتح امجد بس تنام اريج يجي يمج

شعور صعب اوصفه بعدني ب اول ساعات دخلتهن لهذا البيت واتندمت
وخاصتا تصرف الطفله زاد هذا الشعور عندي قاطات

صفيت وحدي بالغرفة
رغم كل الاضويه مشتغلة
بس احسها ضلمة طافية مثل انطفاء كلشي بروحي

شلت بدلتي وتوجهت للمرايه وكفت كدامها
رغم كل المكياج البوجهي حسيت وجهي شاحب
حتى الهالات السوده مبينه

هلمرة كان انعكاس صورتي بالمراية اكثر حزن من اي وقت فات
ملامحي جامدة رفعت اديه امررهن على وجهي
هاي الواكفه كدامي ماتشبهني بشي

ماتشبه غصون الكانت قبل لتروح فصلية
هاي وحدة ثانية
دموعي بدت تتسابق وبدت مطارق الالم تشق طريقها الداخل روحي
احس روحي فقدت نفسي من زمااان كلش
خسرتها بذاك اليوم الاخذوني بي غصب عني
من ذاك اليوم واني مضيعه نفسي

مااعرف شكد مر وقت على كعدتي كدام المرايه
فزيت على صوت عمتي حتى ماانتهت شوكت دخلت للغرفه

ام امجد،، ييمه ليش ماتعشيتي حوري كالت مرت امجد ماكلت شي

غصون،، كتلها اشكرج عمه مااشتهي

ام امجد،، اني هم مامتعشيه هسه وصيت حويره تحميلنه عشه اني وياج ناكل ع الواهس
ييمه الليل طويل وتجوعين

غصون،، سكتت ماحجيت

ام امجد،، اذا مضايقتج البدله انزعيها والبسي شي يريحج

سوده عليه وليدي مامرتاح ابد
وهو هم متعلق ابناته شوفت عينج شفتي بنته شسوت
لاتزعلين ييمه طفله بعدها تره بالله العظيم محد معلمها هيج تسوي هي من كيفها هيج تصرفت

لان من ماتت امها لليوم تنحست كلش
النهار كله متطوگه على رگبتة ابوها
متعلقه بي
هي حسبالها انتي راح تاخذين مكانها

والله ييمه من يوم الشفتج حبيتج
وزاد حبي الج اكثر من كلام حوري عنج

النهار كله تسولف بيج خلتنه كلنه نحبج

الله دزج الهذني
اليتيمات تخافين الله بيهن

غصون،، هي تحجي واني ساكته مااعرف شنو احجي
صارت الساعة ب12گالت عمه نعست وتعبانه لان كاعده من الفجر اني نازله انام وامجد نايم بغرفته الثانية بس تنام بنته يجي يمج

تركتني ونزلت كمت فتحت الكنتور طلعت دشداشه مال نوم نزعت البدله ولبستها موكلش قصيرة ربع ردان وللركبه وهاي استر وحده لگيتها بالملابس
امي الله يستر عليها مشتريتلي وين ماكو سيت نوم مفضوح

التسريحه فتحتها لميت شعري بقراصه ورفعته
ردت البس عباتي واطلع للحمام بس استحي

امجد بعده ماكمل بناء البيت مالتنه
كال نكعد فتره يم اهلي بين مايخلص البناء

رفعت الغطه واتمددت انطيت ظهري لجهة الباب غمضت عيوني بس عقلي صاحي

نص ساعة وانفتح الباب عرفته هو
بمجرد ماحسيته بالغرفة زادت دگات گلبي
صارت سريعة بصورة موطبيعيه

صرت اسمع حركاته من الصوت عرفته ينزع ملابسه ويعلگهم

لحظات وانرفع الغطة غمضت عيوني بكل قوتي
كلشي بيه جمد من صارت ايدة على متني

يتتتبع