رواية ضحية لمن لايرحم الفصل الثاني والعشرون 22 - بقلم زهراء الحسناوي

متبدل بطبعه الوكت
لو احنه الاتبدلنه؟
ولك لاعين ضلت غافيه
ولاضل ولف يتعنه
لاتدگ يالدگك قهر
مقفول باب الجنه 💔

،،،،،،،.

ضحيه لمن لايرحم

بقلم زهراء الحسناوي

،،،. ،،،،،،،،،

زينب،، خبر وگع على راسنه مثل الصاعقه
الكل ضج بالصريخ
اني گعدت بالزاويه لميت روحي وابجي بحرگه حد گطع النفس. احس صدري ماعاد يتنفس

اباوع جنه وغفران يملخن بشعرهن وتلزمهن النسوان ويرجعن يلطمن

لسه مامستوعبه ولاحتى مصدگه قبل ساعه جان اهنا
قبل ساعه حضني
معقوله طفل وگلبه يعلم يموت؟
اي معقوله. لان حجاها بلسانه
ماما سويلي كيكه مو راح اموت ومامسويتلي

كلمته ماجاي تطلع من راسي
ولاجاي اصدگ خلص راح اليواسيني من تنزل دمعتي وراح المونسني من اضوج ويضيج خلگي

اشهگ بالبجي بس مامصدگه احس روحي تحت تأثير الصدمه

انترس البيت عالم حتى ام ذياب اجت تلطم وتبجي وامهات حنان كذلك

كل شويه وحده تنطينه خبر لان زلمهن لحگو لواء للمستشفئ ف يتصلن حتى يسألنهم

ف العرفنا منهم بعده بالمستشفى بس يكملون إجراء مال الوفاه ويطلعو لكربلاء

للساعه 8اجه واحد من الجوارين وياه مرته ماخذها للمستشفى من سامع الخبر
جابو نذيره بس شباقي بنذيره؟

الوجه عباره عن خطوط مخرمشته الشعر نصه طالع من الحجاب دخلت للبيت لازمتها المره تسحل بروحها سحل

اتحسها مثل حالي مامصدگه موت جود
النسوان بمجرد ماشافن نذيره ضجن بالبجي

صاحت بيهن

نذيره،، بسچننننننن لاتبچن
لحد تبجي ابنيي راح يشتري ويرد لاتبجن

زينب،، زرفت گلبي بحچايتها حالي مواحسن من حالها اني هم احسه اخوي الزغير
لان هو. الوحيد الچان گلبه طيب بيهم ولاتحسه طفل عبالك زلمه

شگد چان يحميني منهن
هسه منو اليحميني؟

نذيره گطعت روحها ماخلت حتى ثوبها شگته من الطول للطول

وحده يمي سمعتها گالت خابرت زلمتي گالي طالعين الكربلا نزوره الحسين فدوه لااسمه

للساعه ٢بليل
نذيره صاحت انطني تليفوني خل يجيبوون ابنننني

گامت غفران جابت الجهاز انطته ل امها اخذته من بتها اتصلت

نذيره،، خوويه لواااء ردلي جووود احلفك بالحسين تردلي جووود والله گايمه اسويله كيكه ردلللي ابني

زينب،، اكو مثل يگول اذا فات الفوت ماينفع الصوت راح جود بعد مايرجع لوتعلگين اصابيعج العشره شمع الميلاده مايرجع وسبحان الله مات بنفس تاريخ ميلاده هي تفرفح وگلبي يفرفح وياها
شمرت الموبايل ودگت ولطمت

لمه مال نسوان وكل وحده تعرف حچايه تحجيها
ف العرفته منهن لواء طالب منهم يخلون الجنازه شويه بالامام بين مايطر الصبح حتى يدفنو

شويه وجان تدخل ام سجاد ورفل
ذبت العبايه من الباب وشگت ثوبها ملخت روحها
لزمتها النسوان بس فقدت رفل تبجي اجت يمي كعدت وحده تباوع للثانيه بعيون مليانه دموع

ماهدئت ام سجاد لما تعبت من اللطم والصايح

للساعه ٤رجعو للامام علي عليه السلام
زورو وسمعت منهن راح يجيبو شويه للبيت وبعدها يشيعو اهله واحبابه

ب 6گالو جابو

سمعنه صوت السياره
شبت روحي طفرت وياهن ماجاي احس راح اشوف تابوت ونعش محمول بي جود
لاجاي احس راح اشوفه يمشي گدامي

نذيره وجنه وكلهن وگفن بالباب محد خلاهن يطلعن لان زلم واگفه بره

دخل لواء وذياب وحسن وبعد واحد من اقاربهم وشيخ منهل شايلين التابوت والوجوه مكدره عيونهم وارمه

حطو بالگاع كلنه گعدنه داير مدايره
الله شاهد احجي بيني وبين روحي اكول كون يگعد وكلشي مابي
كون يطلع فاقد وعبالهم ميت

هذا جان تفكيري مثل تفكير الشخص الداخل بصدمه

راحت الزلم تسبح لان لازمي من مات
ف يستوجب السبح للطهاره عن دم الميت او نجاسه الجثه قبل التغسيل

مره من الگاعدات ندستني گالت خاله جيبي للنسوان ماي خطيه نشف ريجهن من الصايح

گمت واني اجر برجليه دخلت للمطبخ لحگتني رفل
طلعت صينيه هاذا الحجي ثنينه نشتغل ونبجي
ترستها كاسات ماي ودتها للنسوان

سمعت صوت نحيب من جوه البيت رحت وجان اشوف لواء وحسين والشيخ يبجون بصوت عالي

يكسر الگلب منضرهم نهض لواء گوه يمشي
راد يعبر مسح دموعه گال

لواء،، زينب حضريلي هدومي اريد اسبح

زينب،،لاول مره لواء يطلب مني شي
صعدت للغرفه گوه احس على ساعه اوگع
دخلت للغرفه اعرف وين يحط ملابسه لان اني الاغسلهن اخذتله ملابس وخاولي ونزلت لگيته گاعد اباب الحمام ساند راسه بيده

انطيته الهدوم جر حسره مختنگ خذهن وفات للحمام عفته ورجعت يم النسوان ام ذياب تقره قران يم راسه
وبعد اكو مره هم لازمه قران تقره بي

نذيره فاتحه شعرها ونايمه ع التابوت مغمضه هادئه
والكل يبجي بصمت لان جاي يقروله قران
صارت الساعه ب 7 گالو راح نشيع

دخلت الزلم رادو يشيلو نذيره وگفت كدامهم تمنعهم ماتخليهم
كلها بجت عليها منضرها مفجع گوه لزمتها ام ذياب وام سجاد وجاراتهم ياالله شالو التابوت
دفعتهن وركضت وراه بس رجعوها لان هواي عالم بره
صارت تشيل روحها وترگعها بالگاع
كلها بجت على جود كبار وصغار طفل بس گدر يكسب محبة الكل
ولاكأن عمره صغير اليشوف نشعة جنازته يگول هذا عريس ومات

اجت المله واشتد اللطم بعدها بطلت شويه لان اذن اذان الضهر
نذيره صوتها راح تحجي للنسوان وتفرفح

نذيره،، ولك يمه وليدي
ولج نهللله خيتي وليدي گمرر ونايم ع المغيسل
حبيته برگبته وحبيته بحلگه وحبيته براسه ردته يگعد ماگعد

زينب،، ام سجاد اتهدئ بيها وتبجي
بعدها حجت للنسوان اتحسها فاقده موبوعيها

نذيره،، ولجن وديته يشتري معجوونه دقايق وانهجم الباب ولنهم يگلولي اابنج ضربته سياااره
ركضتتت ولن وليدي امدد بالكاع والرجال ينحثل بي
يريد ياخذه للمستشفى

صعدت وياه وخاااله ويانه حطوو بحضني
كلشي مابي مفتح ويسولف گكتله يممه مابيك شي لتخااف وليدي هسسه نوصل المستشفئ لتخااف

گاال يمه بطنييي توجعني لمن وصلنه للمستشفى نزلو حطو ع السديه
التمت الدكاتره علي
يردون يشوفون وين الكسر وشمتاذي منه حتئ يدخلو عمليااات

ولج نهللله خيتيييي

انتفختت بطنه صارت شكبرهااا

رادو يحطوله كانووونه بيده حتى يدخلو عمليات
بس الوريد ماجاي ينطي دممم
يردوون يسحبون قطره دم من ايده مالگو ماكوو

تالي الدكتور عرفه بسرعه گالهم مفجوره امعائه لان تاير السياره صاعد على بطنه وصاير عنده نزيف داخلي والدم جااي ينجمع ابطنه

ولج ينهللله

غدة بطننه شكبرهاااا

سااعتيين ساااعتين ماضل وليدي.

زينب،، تحجي وتمسح حلگها يابس شايطه
كلنه نبجي وياها

راحو دفنو واجو

بليل شغلتله شمعه بغرفتي وصليتله صلاه الوحشه واهله هم كلهم صلوله
اباوع على مكانه اگول يوميه هو گاعد اهنا
واليوم حاطه شمعه بمكانه

يومين احنه ماماكلين شي بس نشرب ماي محد اله نفس بكلشي
ليلي ماانامه نذيره تفتر بالحوش مثل المخبله ادور جود
يطلع ابوها ولواء يحضنوها بس يردوها تسكت وترتاح من البجي
بس هي ماگعدت ادوره ادواره حتئ للمخزن اجت تسألني عن جود يمي لو لا؟

ثلاث ايام مانعرف ليلنه من نهارنه
انتهت الفاتحه والعالم مستمره اهوواي ناس اجت
بحيث الشارع انسد نصبو جوادر للعالم
ياهو اليجي يگلهم الفاتحه مبينه مال شيخ الميت مو عبالك طفل

وفعلا جود جان شيخ بفعله بتصرفاته وبعقله وطيبه گلبه وعنده بخت سبحان الله البخت ماتلگاه عد ياهو الجان اكو زلم مشوربه وماعليها اعتماد وماتعرف تسولف واكو كبار وشيوخ يموتون بس فاتحتهم يكونون المعزين قليلين وهو رغم زغر سنه بس عنده بخت بحيث ثلاث ايام احنه ماگاعدين من العالم انگلبت علينه زلم ونسوان

اني وياهن واگفه على رجليه اركض وماملحگه وحدي افتر جيبي هاي سوي ذيج اغسلي الشغله الفلانيه

بليل كلهم ملتمين بالصاله وابو لواء گاعد ومخلي راس نذيره علئ رجله يمسد براسها حقه بنته وانفجعت بوليدها
فكانت نذيره طول ذني الايام اتلوم بروحها كل شويه ولطمت وصاحت صووجي اني وديته

جان من ضمن الموجودين لواء
عدلت گعدتها ودموعها تجري تحجي لبوها اشلون جود طلب منها كيكه واشلون نهرته وماسوتله واشلون انطته الفين الف معجون والف اله

حجه ابوها گال

شيخ منهل انتي انطيتي الفين؟
نذيره،، ااي يبويه سوده بوجهي لو ادري مااودي

زينب،، مد ايده الجيبه وطلع جيس نايلون
بي فلوس

شيخ منهل،، بس خاله لواء مالگه بيده بس الفين
ذني 7الالف

زينب،، احس امعائي انخبطت اكيد راح يذبن السالفه براسي وفعلا نذيره ضلت صافنه
گالتله 7؟
بعدها باوعتلي وصاحت
نذيره،،، عرررفت من صحتيله انتتتي الدزيتي
اكيد ضل يدورلج على شغله ومالگاها وراح الغيررر محلللل

زينب،، نهضت تريد تگوم تضربني بس لواء صار گامها منعها

نذيره،، وخررر عنييي هي الدزته وكتلته هيييي

لواء،، كاافي شنو دزته شنو كتلته،؟
هذا حد يومه لتذبين السبب براسها

ولتخلين غيرج حماله لذنوبج انتي الدزيتي وهي من شافته راح انطته افلوس

زينب،، لواء گدامي واگف واني خاتله گاعده لامه روحي ابو لواء صاح بيها كافي بويه بس هي فاصله ومبينه تريد تذب قهرها بيه لان

اكو نسوان من تجي تعزي من باب الحزن او مااعرف شيسموها تگول النذيره شوداه الطفل للشارع حتئ ينضرب وليش تودي؟

حجيت وصوتي مختنگ گتلها والله من شفته مشتهي كيكه انطيته يشتري غراض لان انقهرت علي والله

اجت ام سجاد جرتها گالتلها انتي بياحال وتعتبين؟
كافي عوفي الابنيه مات حسين خليتنها هي السبب ومات جود حملتهنا الذنب كافي
راح تحرگكم دموعهااا

اجن بناتها اخذنها البيتها ترتاح وام سجاد خطيه الواگعه بيها اجت يمي اتگلي اتحملي خاله ميخالف من قهر گلبها هيج تحجي

سكتت وشريد احجي؟
هي قبل مايموت جود واگفتلي وگوف
مو انوب هسه بس تريد ضميرها يرتاح ذبت الصوج براسي

رحت للمخزن لحگتني ام سجاد ورفل
فاتن وسدن الباب لزمتني من ايدي ام سجاد وتحجي بصوت ناصي

ام سجاد،، يمه اذا تحبين جود لمي غراضج واصعدي فوگ يم رجلج تره والله اختي واعرفها من چانت قبل تنقهر تخلي البيت جحيم
عاذرتها وهو هم ابني والله روحي مفرفحه علي بس شنسوي هذا قضاء الله وقدره
بنيتي اعقلي واصعدي فوگ حتى محد تحتك بيچ

زينب،، شبه اقتنعت بس خايفه گتلها خاله اجلي السالفه هسه بين مايطلع السابع

ام سجاد،، يمه اني هم عندي زلمه وبيت ويلادي عدهم دوام اضلي يومين واروح زلمتي مناك وحده
وانتي تضلين جنه تكفخ بيج
عاد استري على روحج واتحامي بزلمتج تره هو النهار كله ماهو بالبيت هل مايدري بالدنيا طشت لو رشت وراه

زينب،، الله كريم خاله والله بس تخلص السابعه

ام سجاد،، زينب والله العضيم اذا مانفذتي اني اسحلج فوگ يمه
صارلج ثلث شهور ونص اهنا اكو مره غيرج مسويه هيج؟

زينب،، شنو؟؟

ام سجاد،، عازله فراشج عن زلمتج
يمه انتي كدام الله مرته وتتحاسبين علئ هجره
كافي روحي يمه وخل حياتكم تمشي طبيعي

زينب،، رفل هم ضلت تقنعني فشله اشلون اصعد؟
وبعدهي حتى نفسيتي تعبانه الدرجه روحي ماحاملتها بسبب موت جود

عافني وطلعن واني الف فكره براسي
من اريد انام بليل اضل مفتحه اگول ساعه ودگ الباب وكون يطلع هذا حلم واصحئ

بيوم السابع خفت العالم وربي ينزل ع العائله الصبر قبل البلاء شويه شويه نذيره اكلت وبناتها كذلك
كل شويه اسويلهن شغله خاف جوعانات والله مااكل لگمه وتنسد نفسي بس ع الاقل اگول بلكت تحن گلوبهن شويه ومايأذني بعد

بس شتترجه من ناس انشالت الرحمه من گلوبهم

قبل السابعه بيوم راحت ام سجاد شگد لحت حتى اصعد يم لواء بس استحيت فشله
تالي راحت شبه زعلانه مني

نذيره صار شغلها الشاغل اني كل ماتشوفني كدامها تتفل عليه وتصيح گمعتي جود وضليتي
حملتني ذنب الافلوس الانطيتهن واني والله انطيتهن اله لان انقهرت علي من حبي لجود

يوم يجر يوم ونذيره اذا جانت قبل موزينه وياي ف زادت قاطات بحيث اربعه وعشرين ساعه اطلع شحنة غضبها بيه مرات اتجنب اصير گدامها حتئ ماتتعارك وياي

بس من تشوفني حسبالك شايفه جني
تتسودن مني

يرحون للمقبره كل جمعه واتمنئ اروح وياهم
هاي ثالث جمعه مرت على وفاة جود مشتاقتله ومشتاقه لضحكته وسوالفه

بيوم الرجعو من المقبره الصبح جنت انضف بالمطبخ وهنه دخلن نذيره امرغله روحها بالتراب انقهرت عليها
جنه گالت سوي ل امي چاي جيبيلها ريوگ هابط ضغطها

سويت ريوگ وصبيت كوب جاي واخذته لغرفة ام لواء گاعدات يتباجن كلهن

خليت الصينيه جدامها

نذيره،، شيلي مااريد سم لاارگعه بوجهج
ام لواء،، اكلي يمه مايصير هيج وجهج صاير اعضام لان ماتاكلين
هذا حضج مثل حض امج هم فجعنه الوكت والبين بعزازنه

زينب،، مدت ايدها نذيره للجاي شربت شويه ردت اروح صاحتلي تعاي هواي شكر حاطتله روحي صبي فوگه چاي اريدة مر

مديت ايدي وهي مدتلي الكلاص ودارت وجها كل ضنها اني لزمته وبلحضه وگع الكوب بحضنها

،،،،،،،،،،،،،،،،،،،،،،،،،،

غصون،، من سمعت كلام عذراء احس گلبي راح يسكت من الخوف وقبل لااحجي سدته بوجهي

ضليت صافنه لااخذ ولاانطي ام ذياب سالتني شتريد عذراء سكتت مااعرف شجاوب رجعت سألتني گتلها تسالني على شالها ناسيته اهنا

بعدها رحت للاستقبال انضف سمعت صوت ام ذياب بالمطبخ تصيح لاااا ياااا ربيييي دخيييلك ياالله

احس رجليه بعد مايشيلني المكان من الاستقبال للمطبخ كلش قريب بس من سمعت صوتها مرعوبه حسيت المكان صار شطوله

گوه وصلت اتلگتني تبجي وادگ على وجها
وتصيح يايمه ياجود يازغيرررون ياجووود

اريد افهم منو جود وشبي ماجاي افهم المره ملخت روحها وتيهت دربها تروح منا وترد منا
تصيح جيبي جواريبي وعبااتي

سالتها عمه شكووو ومنو جود؟

ام ذياب،، ابن نذيره ضاربته سياره وذياب سااامع ولاحگهم للمستشفئ خابرني گال روحي البيت عمي

واني رايحه يمه دخيلك ربي بردا وسلاما
كون مابي شي

غصون،، خطيه ادوهنت
بسرعه لبست جواريبها وعبايتها وطلعت تركض

قفلت الباب ورها وقبل لاتطلع انطتني تليفونها گالت خلي يمج ولاتفتحين الباب ال اي احد

راحت ام ذياب لاساعه ولاساعتين ماكو مارجعت صار الليل وماكو احد بس اني
خفت وحدي

كل مااريد اتصل بذياب اتردد
اريد واحد يمي جسمي يختض من الخوف بيه سوله اذا اضل بمكان وحدي اتضل عيني بالشبابيج كل شويه احس واحد يباوعلي عقلي من الخوف يضل يصورلي شغلات موحقيقيه

اخر شي بعد مااتحمل طلعت رقمه امه كاتبه ابني على رقمه اتصلت
دگ اهواي لمن راد يفصل يالله جاوب بس صوته مخنوگ گوه يحجي واسمع صوت زلم تتباجه

بدون تردد سالته بخوف شكوو بيك شيي؟

ذياب،، ماات جوود يغصوون

غصون،، بمجرد ماسمعته يبجي بجيت وياه
ورغم حالته اوضعه سالني منو يمج بالبيت جاوبته بس اني

ذياب،، قفلي البيبان ولاتخافين اني كل شويه اتصل بيج لان امي واخواتي يم بيت عمي
يالله بويه رايح راح نطلع الجنازه للمغيسل

غصون،، نهئ المكالمه وراح قفلت البيبان الداخليات وصعدت للغرفه قفلتها عليه بس خايفه
شغلت الاضويه كلهن وشغلت التلفزيون بس حتئ يرد عني الوحشه من اسمع صوت اذا صنته يضل يتخايلي شغلات

للصبح اني گاعده خايفه دگ الموبايل شفته يتصل

رفعته گال غصون اني بالباب انزلي افتحيلي

نزلت بسرعه فتحتله الباب لاف شماغ على راسه وجها مليان حزن ومبين شبعان بجي عيونه مبربعه

البقيه بحياتك

ذياب،، حياتج الباقيه
غصون اريد بس اسبح وارجع حضريلي الحمام

غصون،، ركضت جبتله ملابس خليتهم بالحمام وطلعت هو دخل سبح شويه وطلع
گوه صعد الدرج انتضرته بين مايبدل واصعد شويه ولحگته لگيته لابس دشداشه سوده وغتره سوده لافها على راسه گاعد ع الجربايه مدنگ بس متونه تنهز عرفته جاي يبجي

لااراديا رحت يمه گعدت بصفه دار وجها يمسح دموعه
حجه وصوته بي بحه وغصه

ذياب،، بعد زغيرر ع الموت

غصون،، هو يبجي واني عيوني تجري وياه
ساكته ماحجيت رجع. گال

ذياب،، والله خايف على لواء. على ساعه ينجلط گوه يمشي ذاك اليوم دفن اخو واليوم ابن اخته هو المربي الله يساعده ويصبره

غصون،، الله يلهمهم الصبر والسلوان

نهض من مكانه عدل جراويته راد يطلع
التفتلي

ذياب،، سدي الباب ومو تفتحين ال اي احد خابرت ساره من تطلع من الفاتحه تجي يمج لان امي تضل يم عمامي

غصون،، عافني وطلع ولاجن هذا ذياب الاشوفه يوميه
هسه مخيم علي الحزن
سديت الباب وراه للضهر يالله اجت ساره يمي

بليل رجع ذياب وعمتي گال تعبان اريد انام
هو صعد للغرفه واعمتي خطيه تون ع الطفل

خليتها ترتاح سألتها على زينب گلبي طاگ عليها
گألت والله ييمه خافنها هاي حوبت المسكينه طاحت بالطفل لان بريئ لان الحوبه توگع بالنضيف ماتوگع بالعار والنجس

خلتني اخاف اكثر اني كلساع احمد الله وگعني حضي يم هلمره الطيبه بس زينب من اليوم الدخلنه الذاك البيت وضربونه بدون رحمه عرفتهم ناس مايخافون الله

استمرت ايام الفاتحه وذياب مااشوفه
يجي بليل يسبح وينام ويطلع من غبشه يروح يم لواء يگول فشله عمامي يجيهم خطار يعزون

مرات ساره تجي يمي ومرات اضل وحدي
بيوم السابع راحت عمتي من الصبح تطبخ وياهن
شگد گلبها طيب رغم مره حجتلي عن سوالف ام الطفل المات واشلون جانت معذبتها بس هسه تبجي عليها اتگول خطيه وليدها الضنه غالي

ذياب بيومها راح من الصبح يمهم هو وامه
الضهر رجع وحده
گال بس سويلي استكان جاي بين مااسبح واطلع

رحت بسرعه حطيت القوري انتضرته بين مايفور واخدر واگفه صافنه ماحسيت غير حضنه من ضهري احس اطرافي جمدت دنگ المستواي خله راسه على متني

ذياب،، مشتاقلج

غصون،، مو گال مشتاقلج لو احس راح اطيح وافضح روحي
بس ضليت واكفه وكفه المرأة العراقيه الصامده

مايدري اني غديت خرخاشه مجرد ماحسيت بي قريب مني الهاي الدرجه

ذياب،، غصون والله اموت عليج
اتمنئ من ارجع تعبان تحضنيني وداعتج كل التعب يروح

غصون،، ضليت ساكته بس گلبي وصل السابع سمه
اول مره يحضني

وخرت عنه سويت روحي اجيب كوب هو راح گعد ع الكرسي بالمطبخ طلع جكاره ورثها وانتجه ع الميز خليت الكوب گدامه ماحجه بس يسحب نفس من الجكاره تحسه بداخله جمره مثل جمره الجگاره اليشربها

ماحجه ومبين ضاج لان اصده واتهرب منه
ماانكر اكو احساس بداخلي اتجاها من اشوفه افرح واحس بالامان بس خايفه

وره الفاتحه بيومين گاعدين كلنه نتغده بالمطبخ انفتح الباب ودخلت عذراء اتفاجئت بيها وامها سلمت عليها بس ذياب رفع راسه ورجع كمل اكل بكل هدوء

ماسلم عليها ابد دقايق ونهض من مكانه گال غصون صعديلي كوب جاي للغرفه

عافنه وراح وعذراء تخزر بيه مخازر بمجرد ماگامت عمتي جرتني من اردان ثوبي

عذراء،، ماخذه راحتج موو؟
عبالج اعديلج السويتي بيه؟

غصون،، رادت تكمل فاتت امها سكتت ماحجت عافتنه ودخلت للصاله انتبهتلها صعدت الدرج عرفتها راحت لذياب تراضي

تركتهم براحتهم بس ميته خوف بمجرد ماشفتها ذكرت كلامها وتسجيلهن الصوتي

بس الطمني ذياب يحبني وماراح يصدگ ومتاكده راح يعرف السالفه جذب واني بس اريد ابين الهن اني مامهتمه هيج حجيت

گلت فشله احجيله هسه شيگول؟؟
كلساع طالعتله بسالفه جديده وهو البي كافي

شويه ونزلت الضحكه شاگه حلكها مبينه تراضو
اخذت الجاي وصعدت لگيته متمدد

مرجع راسه ع الجربايه وبيده جگارته
وانتبهتله من مات الطفل لسه بس يحش. بهاي الجكاير

خليت الكوب يمه عدل گعدته مد ايده طفه الجكاره بالمنفضه

ردت اطلع گال انتضري

ذياب،، اگعدي

غصون،، گعدت يمه اخذ الكوب شرب شويه ورجعه

هزيت راسي بمعنئ شكو؟

ذياب،، كلشي ماكو بس ضلي يمي گاعده من انام اطلعي

غصون،، وفعلا نام صفح ايده جوه وجها حطها ونام
من شفته غفه طلعت تفاجئت بطلبه

نزلت جوه اسمع عذراء تحجي ويه امها اتگلها اليوم اباب اهنا

بليل حضرنه العشه اني وعمتي وهي كاعده بغرفه امها بس ماحجت شي لكن من تشوفني تخزرني

ذياب راح يم بيت عمه كال اتاخر لاتنتضروني
الساعه ب 10ام ذياب فاتت نامت واني صعدت للغرفه سبحت ولبست دشداشه نص ردن
وطلعت

اتفاجئت بوجود عذراء بالغرفه گاعده حاطه رجل على رجل وتهز برجلها اني تفاجئت بيها وهي باوعتلي من فوگ لجوه ماعاجبها

نهضت من مكانها وكفت گدامي

عذراء،، اووو ست غصون امورج عدله صايره تتسبحين وحاسبه روحج شغله مهمه

غصون،، شتردين عذراء؟

عذراء،، والله وطلعلج صوت يالفصليه
قبل جنتي خانسه وهسه شگواتج
بس كل هذا صوج امي انطتج عين

بس قسماً بذات الله علئ اسوايتج السويتيها بينه اله ادفعج الثمن غالي
مبينه فقيره تتمسكنين تالي طلعتي داهيه خربتيني ويه اخوي ولاول مره نزعل بسببج ويطردني هم بسببج

بس بسيطه ضامتلج سالفه خوش سالفه

ذياب،، سالفتيش؟؟

يتبع

بنات تابعو كروبي ع الفيس للنساء فقط
اسمه كروب قصص (زهراء الحسناوي)

هذا حساب الكاتبه زهراء امجد تابعو روايت انت القدر الذي كتب رجعت تنزل بارتات

Zahra_Amjed12

وهذا حساب الكاتبه الورده حمامه الجبوري
hmamh_aljpwry

وذني حسابات المتفاعلات فدوه
user44713080

GjgdHhjfd

UmLamar068