رواية ضحية لمن لايرحم الفصل الرابع والعشرون 24 - بقلم زهراء الحسناوي

البارت 18

ضحيه لمن لايرحم

بقلم زهراء الحسناوي
،،،،،،،،،،،،،،،،،،،،،،،،

دورتك انه بشدتي
شفتك وطن حنيت الك
لكن لگيتك غربتي
احتاريت منهن ياهي اصح
مابين ذلي وعزتي
اختاريت اعوفك حتى لا
تكسر قرارك دمعتي
وونيت سكته ماردت
يتشمتون بونتي 💔
،،،،،،،،،،،،،،،،،،،،،،،

زينب،، رجليه ثگلن والساني خدر
اجه گعد يمي

لواء،، زينب

زينب،، معدتي انخبطت ردت اتقيئ
رفع وجهي بيده عيوني منزلتهن مااكدر اباوع بوجها

لواء،، ارفعي عينج
من اليوم انتي مرت لواء گول وفعل اليمسج يمسني
اني وانتي واحد ستر للثاني وانشاءالله ماقصر عنج

زينب،، بعدها گال گومي نصلي
طلع گدامي واني لبست عباتي وطلعت وراه خاف يصعد احد للطابق الثاني
اتوضينه
توجه للقبله گدامي واني وراه
وكفت اصلي كملنه اخذ السجادات حطهن ع الميز
ردت بس اهدئ راح يصيبني انهيار عصبي من الخوف
اجه يمي رفع وجهي غمضت بقوه
اخذ شفايفي بين شفايفه
گلبي يريد يطلع من مكانه على سرعة دگاته
يشوفني ارجف يردد يم اذني

لواء،، اهدي

،،،،،،،،،،،،،،،،،،،،،،،،
لواء،، خمس شهور هي يمي مرتي وعلى ذمتي
بس مافكرت اجبرها على شي
بس دائما ابين ل ام سجاد اني رايدها
واختي هم ماقصرت
بيوم الاخذت الاوكي من ام سجاد احس الدنيا ماشايلتني صرت احسب لووقت دقيقه دقيقة
بس بداخلي مقهور لان بعدها طفله اكيد حالها حال اي بنيه تحلم بدله وعرس وزفه
من تجي هاي الفكره براسي اتراجع اخاف الله بيها
ويرجع ذياب ينصح وهو هم حاله مو احسن من حالي مبينات اثنينهن راح يجلطنه من وكت

وجودها يومي بالغرفه بدون مااحطها بحضني احس هلشي حرب اعصاب
جنت ملهوف الهذا اليوم
رجعت من الحلاق دخلت للغرفه شفتها گاعده مدنگه
احب خجلها واحب هدوئها
احب الابنيه الرزنه الثگليه
رحت سبحت ورجعت وهي بعدها خجلانه
ردت اطمنها حتى لو بتصرف بسيط خاطر تهدئ مبينه راح تموت من الخوف
بليل دخلت عليها اباوعلها غدت صفره ترعش
طلعت ل ام سجاد حتى شويه تهديها لاتموت الفرخه

شويه وطلعت وصتني بيها ماتدري گلبي نار عليها
دخلت وقفلت الباب
صوت اصتكاك سنوها الصوبي وصل
كعدت يمها جريت ايدها بارده ثلج عكس ايدي تلهب نار ونفس هاي النار بروحي موجره

اخذتها الحضني غمضت
ترجف ترجف بيدي
غمضت قوي لزمت متني
مسحت العرگ الينضح من گصتي
دخيلك ربي طفله والفرق بالعمر بيناتنه اهواي لاسنه ولااثنين
خفت عليها من روحي
(اجعل قسوتك في العناق ف انا اغرم كثيرآ
بحضن عنيف بين ضلعيك)

واخيرا امتلكتها ابتعدت عنها وهي علئ نفس وضعها ترجف خايفه جرت الغطه

زينب،، من هاي الليله صرت مرت لواء گول وفعل

لواء،، مبروك

زينب،، يامبروك يابطيخ توني طالعه من معركه
وهذا يگلي مبروك وفوكاها يريد اجاوبه
ضليت خاتله مغطيه حتى راسي

اسمعه خربان ضحك
انرفع الغطه عن وجهي

لواء،، كومي

زينب،، رجعت جريت الغطه ميته خجل وهو زايع الخجل فد نوب

لواء،، استخطيتها بس اتعمدت اكسر حاجز الخجل حتى تتعود على وضعها الجديد
جريت الغطه وشمرته بعيد

ضلي نايمه حتى نرجع نكمل

زينب،، حجاها وغمز
نهضت بسرعه ابتسم وراح اخذ ملابسه وطلع

اني هم بدلت اكو الم خفيف
اندگ الباب دخلت ام سجاد الضحكه شاگه الحلگ
ورفل وراها

جرتني باستني وباركتلي رفل تضحك اتكول يوم الالي واحصل واحد هيبه مثل خالي
ام سجاد فتحت جنطتها مدري شطلعت صامتهن بيدها فتحت ايدي وحطتهن غمزتلي وهي تضحك

فكيت ايدي شفتهن فلوس
رجعتهن خااله شنو هاي؟
ام سجاد،، يمه هذني بياض الج

رفل،، هههههه يمه البياض ينطو الصبح مو هسه
ام سجاد،، ماكو فرق هسه لو الصبح
اكو جريذي خاف ياكلهن

زينب،، تحجي وتباوع الرفل وذيج خربانه ضحك على سوالف امها

دخل لواء مبين سابح الخاولي على متنه
شافته ام سجاد ضحكت گالتله ها خويه حررت الاندلس؟؟

اباوعله ضحك بقوه گالها بااذن الله حررنه كل المناطق المحتله
باوعلي وغمز واني لو ادوروني ماتلگوني من الفشله
هو واخته يحجون بالخط العريض ورفل شاگه الحلگ تضحك زمخ بيها بالشقه
اني من الفشله صخنت

عافنه وطلعن هم اخذت ملابسي سبحت ورجعت لگيته متمدد يشرب جكاره
باوعلي فتح ايده بمعنئ تعاي
بعدني خجلانه منه رحت لزم ايدي جرني نمت ع ايده باس گصتي

بعد يومين الساعه 8الصبح صعدتلي ام سجاد
لواء گال جيبيلنه ريوگ لفوگ نتريگ سوه
نزلت سويت ريوگ وصعدت
نذيره وامها كاعدات بالصاله يتنافخن
نذيره تباوعلي بعين غضب
قبل لااكمل الدرج سمعتها اتگول

نذيره،، انتي صرتي ام البيت؟
طاحض الوكت اليخلي الفصليه تتامر

زينب،، لازم تنغز بحجايه عفتهن وصعدت

كعدنه كلنه نتريگ سوه لواء شويه وطلع گال عندي شغله
ضلينه بس اني وياهن
ام سجاد،، خاله اني راح ارد البغداد لان انه اجيت علمود افض شغلتكم وارجع
اليوم عمليه ولاده مال مرت حمايه وزلمتها وصاني ابات يمها بالمستشفى خطيه محد الها هم مگطوعه من شجره ماعدها اخوات

زينب،، اتقربت يمها بستها گتلها ياريت الوادم كلها نفس طيبتج

ام سجاد،، ييمه اني اسوي هذا كله لله باجر يفيدني بذيج الحفره الضلمه يوم ماينفعك غير اعمالك الزينه تشفعلك عد ربك

زينب،، وره ساعه رجع لواء گالتله بس وصلنه للكراج واحنه نصعد مناك البغداد
بس هو رفض واصر يوصلهن البغداد وفعلا هو اخذهن

مر اسبوع ولواء كلش زين وياي
حتى ثلاجه جاب للغرفه وترسها مسواگ يگول خاف اجوعين واني ماموجود
نذيره وام لواء احسهن يفورن من القهر بس مايگدرن يحجن بوجود لواء

انزل اشتغل لو اسوي غده
وهنه گاعدات من يرجع لواء يشوفني وحدي بالمطبخ يصيحلي اروح وراه بعد مايخليني انزل
يكول التريد تاكل تصب الروحها لاتنطيهن مجال

صدگ ارتاحيت بهذا الاسبوع
والاهم شبعانه وتارسه بطني
كل شويه ابوس ايدي واحطها على گصتي اكول الشكر لله عدن ايام القحط والجوع
وانشاءالله الايام الجايه احسن
بس الضاهر ويه نذيره وملتها ماكو راحه

بيوم الثامن لواء اتصلو بي ولازم يلتحق
من الليل شلت هم خايفه
خاف يرجعن يضربني بس لواء گال التحجي وياج گليلي واني اتصرف

بليل اجه جايب علاليگ اهواي مسواگ وحلويات ونساتل مامخلي شي ماجايبه
ترس الثلاجه
اخر شي جر علاگه طلع منها كارتونه صغيره مرسوم عليها موبايل عرفته مشتريلي جهاز

فتح الكارتون جايب جهاز كلش حلو

لواء،، هذا الموبايل الج بي خط ورصيد
حتى اكدر احجي وياج من التحق

زينب،، فرحانه بالجهاز اگلب بي جره من ايدي
حطه وره ضهره

لواء،، موصوجج بالجذب كولي شكرا بوسه منا منا
زينب،، رغم صار اكثر من اسبوع متزوجين بس والله استحي منه
درت وجهي عنه ردت اكوم كتله شكرا مااريد

لواء، شكرا ماريد شنو؟
تعاي ولج

زينب،، جرني الحضنه دفن وجهي بصدره

لواء،، وعلي من هسه مشتاقلج

زينب،، احس الدمعه بطرف عيني
هو راح يروح وكال هلمره ماانزل اسبوعين
اتمنيت اغمض افتح الكاه راجع

بيومها محاوطني بحضنه للصبح
الساعه ب 5ونص كعدت سويتله ريوك اتريك
يطلع للباب ويرجع يبوسني ويرد يطلع

لواء،، ولج اتمنئ احطج بجيبي واخذج وياي
شيصبرني سبوعين؟

زينب،، ضحكت على سالفته
اتقرب مني
لمني الحضنه باسني وجر نفس

لواء،، ياالله بويه ردي نامي من اوصل بخير وسلامه اخابرج
هو راح واني لميت الريوگ والاستكانات نزلتهن جوه غسلتهن وصعدت

رجعت للغرفه حطيت راسي ع المخده انفتح الباب

اتفاجئت كل ضني لواء بس انصدمت بنذيره واكفه متخوصره

نذيره،، ياالله يالعروس اطفري
نايمه بالعسل صار اسبوع لاشغله ولاعمله
بس عفتج الخاطر اخوي ياالله انهضي

زينب،، ضليت صافنه عليها لواء ماصارله ساعه من التحق وهي اجت هاده اكيد جانت متحمله الوضع على اعصابها كمت من مكاني مااعرف ليش بمجرد مااسمعها مااسيطر على اعصابي اضل ارجف
هي ضخمه وطويله حنطاويه عدها شامه بحنجها
هواي شبعتني ضيم الدرجة صرت اهاب وجردها واضل ارعش من الخوف

نذيره،، اليوم اطلعين للزرع تخوفرين الكاع

زينب،، اني من جنت عد اهلي اطلع للزرع يعني اعرف اخوفر وارجع (التخوفر معناه تنضيف الزرع من الدنان والتخيته والسبط والدهنان ذني كلهن يمردن الزرع ولازم نشيلهن وهنه نفس الزرع المايعرف صعب يفرق بينهن وبين الشلب والترقيع معنئ ملئ المكانات الفارغه المابيها زرع ياخذون من المكان المليان يرقعون المكان الفارغ حتى يتساوى الزرع)

صارت تفتر بالغرفه تباوع ماعاجبها
راحت فتحت الثلاجه

تذيره،، اي عيني وتارسلج الثلاجه شتردين بعد؟
والله هاي فصليات اخر زمن مدللات
عوزهن نغسل رجليهن

زينب،، سدت باب الثلاجه حيل

نذيره،، ياالله وولج لاتصفنين دنيه الضهرر

زينب،، اباوع ع الساعه توها ب6وربع

نذيره،، راح انزل دقايق الكاج كدامي

زينب، ردت بس اتكفه شرها اكيد من راح لواء راح تنچلب عليه
وهم اني صار شهور بالبيت ماطالعه
كلت اني اكيف اطلع للزرع شويه عاد اشوف عالم اشوف بشر اتنفس هوه خارج هذا البيت
رحت للكنتور طلعت العبايه مالتي القديمه
اتحزمت بيها لفيت حجابي ولبست جواريبي ونزلت

كل ضني حتى هنه يطلعن وياي
لان من جنت عد اهلي كلنه نطلع وابوي الله يرحمه يگعدلنه ع الفرك (معبر بين قطع الاراضي)

اباوع ماكو

نذيره،، يالله زينب خانم راح يجن بنات ام سعد وياج يساعدنج وبناتي يلحگنكم شويه بعد

زينب،، اندگت الباب راحت هي فتحتها دخلن نسوان اثنين وحده متوسطه بالعمر والثانيه بكدي

هنه محزمات ومنفقبات لان صيف الشمس تطلع من وكت

هنه طلعن واني وراهن نزلنه للكاع
كاع الشيخ كلش جبيره 100دونم
يعني على هاي الحسبه اني وذني الاثنين شهر مانخلصها تنضيف اقل شي يرادلها 20واحد ياالله انكملها بكم يوم

كل وحده من عدنه اخذتلها طريجه (الطريجه جهتك التمشي بيها)
دنكت اخوفر وهنه هم كل وحده مدنكه بمكانها
بدينه نشتغل طلعت الشمس وصارت كلش عاليه
وجنه وغفران مااجن

الساعه 10ونص ياالله شفتهن من بعيد نزلن للكاع
هم محزمات ولابسات نگبه بس عيونهن طالعه
اني ماعندي لان ماعبالي يطلعوني للكاع
فما لحگت اخيطلي وحده
ولاحتئ عندي كفوف البسهن لان السبط من تجره من الگاع يعورك لان حاد السنبل مالته

هنه بس يتمضحكن وساعه يشتغلن ساعه يكعدن
بس كل شويه يفشلني جدام المره وبتها
مايصيحلي غير الفصليه الوصخه

سكتت غلست عنهن والابنيه مبينه تتلوگ الهن تخاف منهن تضحك وياهن بس امها زمخت بيها ماراضيه

المكان الينضفن بي جنه وغفران بصفه البستان
متروس نخل
اشتغلن ساعه وطلعن گعدن اثنينهن جوه ضل النخله يسولفن ويضحكن

احس ضهري اكسر من كثر مادنگت واديه اتشخطن صارت بيهن خطوط حمر
جنه وغفران نزلن يكملن شغل بس
مااجن يمي اخذن غير شگه (قسم من الارض)
بعدها اجو 10شباب عرفتهم ذوله العمال مأجرهم الشيخ حتى يساعدونه
الشباب كل مجموعه لزمو مكان ينضفون بي
والمره وبتها اجن الجهتي صارن وياي
وجنه وغفران بالجها الاخيره يعني الشباب بالنص

كل ماارفع راسي اشوف جنه عينها الجهتم
گلت شلي شغل بيها يطبها مرض
اسمع سوالفها وتمضحكها وياهم
حتى المره بصفي بتها كل ماترفع راسها تزمخ بيها اتگلها دنگييي

اني على ريوگ الفجر بالخمسه والساعه راح تصير ب 12 جعت
شويه واحد من الشباب راح جاب غده لفات
انطه وحده من العلاليگ للمره واثنين الهم

احنه كعدنه بجها وهما على جها ثانيه كدامنه
جنه رفعت النگبه هي وغفران
انطتني المره لفه الي ميته جوع كعدت اكل بيها
انتبهت جنه عينها للشباب ونضراتها موراحه

التفتت وبلحضه شفت واحد منهم غمزلها بدون ماينتبهون جماعته

عرفت وتاكدت اكو شي بينها وبين الولد
بس بنفس الوقت گلت مالي شغل بيها يطبها طوب
الناس تعرف الزينه من الشينه
وتصرفاتها مبينه راح توگعها بمصيبه

للساعه 1ونص الضهر طلعنه من الگاع
بس ضل بمكانه الوصخ خلينا ع الفروك (المعابر الفاصله بين كل قطعه ارض)
العمال شغلهم بس ينضفون الزرع عن السبط والدنان
واليشلعو يخلو ع الفرك عود احنه انشيله

من رجعنه للبيت رجعت مكسور ضهري
گوه امشي
اتلگتنه نذيره
جنه وغفران يمشن جدامي

نذيره،، ها جنه بشرن شخلصتو اليوم؟

جنه،، شخلصنه الگاع مليانه دنان وسبط يادوب كملنه نص شگه
بعد بيها عشر ايام وتخلص

نذيره،، لميتن الوصخ ال علفروك لو لا؟

غفران،، لا يمه شيلمه؟
اهواي

جنه،، اني ارجع المه اني وهاي

زينب،، تحجي وتاشر عليه
يردني ارجع الم الوصخ وضهري كتلني ماصدگت ارجع
وغير كلشي الدنيا حاره شمس تصگع بالراس

نذيره،، لاهي تروح تلمه وحدها

جنه،، لايمه اني اروح وياها نخلص بسرعه

زينب،، اتفاجئت بيها منين نزلت عليها الحنيه
تالي رجعنه اني وياها انلم
اشيل السبط واحط على متني كله طين
واطلعه من الگاع المكان مخصصي نحط بي الوصخ

رجعت مالگيت جنه رفعت راسي اباوع ماموجوده ولاالها اثر
هاي وين ولت؟
صار عندي فضول اشوف وين ختلت وشتسوي

اكو مكان بالبستان يحطون بي كبسات مال تبن
اهواي كبسات بحيث اليدخل يمهن يضيع
كل سفطه مال كبسات شكبرها عبالك سياج عالي

اتقربت على كيف اسمع صوت جنه بس خفيف
اتقربت اكثر الصوت صار واضح
احس رجليه ماعادن يحملني
مجرد اسمع صوتها گلبي وجسمي كله يختض
واني اسمع صوت تاوهاتها
فجاه وجان اشوف جنه هي ونفس الولد خاتله بين كبسات التبن واثنينهم بمنضر بشع

من شافوني اثنينهم طفرو مفزوعين

،،،،،،،،،،،،،،،،،،،،،،،،،،،،،،،،،،،،

غصون،، اباوع لذياب يحجي بكل هدوئ عكسي تماما على ساعه اوگع من الخوف
نهض من مكانه اجه بااتجاهي بيده الموبايل
رفع بوجهي

ذياب،، هذا سبب نفورج مني؟؟

غصون،، دمعتي سبقتني والكلام صار جدا صعب
جاوبته بصوت متقطع
ذياب والله جذب

رفع اصبعه گدام وجها اشرلي اششش

ذياب،، سؤال واحد اسألج وجاوبيني ب اي لو لا
هاي التحجي انتي لو لا؟؟

غصون،، حطيت اديه على وجهي غاصه بالبجي
نزل ايدي وزمخ بيه

ذياب،، انتييي لووولااا

غصون،، هزيت راسي ب اي
بيده موبايله رگعه بالحايط كله جزئ صار بمكان
ابتعد مني رفع ادي لزم شعره حيل تحس يريد يشلع شعر راسه
گعد ع الجربايه وجها احمر دم مسح وجها بثنين ادي اتحسه گوه كاتم غضبه

رحت گعدت گدامه بلگاع مايهون عليه اشوفه محترگ واني السبب ردت ابررله
گتله والله جذب لان حرگن روحي هيج حجيت
ذياب والله مااحب احد ولااريد احد
اباوعله ضحك ب استهزاء بطرف شفته

ذياب،، وشتردين اصدگج؟؟
طفل جدامج انه؟

من شفتي روحج انفضحتي نكررررتي

غصون،، دفعني ونهض من مكانه ضليت على گعدتي

ذياب،، غبييي غبببييي ذليت روحي اكثر من الازم

غصون،، التفتلي يضرب بيده على صدره

ذياب،، صووجي اني كله مني ذليت رووحي الوحده ماتستاهلل
غصون،، مااكدر اسكت اتنفس بصعوبه وابجي
كتله والله وداعت ابوي ماكو هيج حجي

ذياب،، ههه اي هم صدگ
وتردين ذياب الغبي يصدگج موو؟

ولج ااجيتي وگلتي نووور وعذراء هيج گالن
رحت وبهذلتهننن الخاطرج
وصدگتج انتي گلت طفله ماتعرف الجذب بعدها خاام الهذا السبب حبيتج
والله وطلعت نور احسن منج باالف مره
ع الاقل جانت تتمنى اخذها
وانتي مررتي شهور اركض وراج اجيتج بكل الطرق
وجنت مااحصل غير الصد منج

ماجننت اضن مرتي عاشگه وكارها گرببي منهااا
جنت اضن خوفج وتهررربج مني خجلللل

يااالللله

غصون،، گعد لزم راسه بثنين ادي يرجف اعصابه كلها ترجف
نهضت يمه ردت الزم ايده سحبها ودار وجها

ذياب،، وخري

غصون،، ذياب والله جاي احجي الصدگ
دنگ وجها مقابل وجهي

ذياب،، كرهتج وجزت نفسي منج
بس وداعة كل لحضه نزلت بيها روحي الج
لندمج ع الساعه الاجيتي بيها لهنا
ومن اليوم لتنسين روحج انتي منووو وشنو مكانتج بهذا البيت
غصون،، سكت واتقرب همس يم اذني

ذياب،، كلج على بعض فصليه اهنا
اسحگج بحذائي بدون مايرفلي جفن

غصون،، عرفته مستحيل يصدگني حتى دموعي ماشفعتلي يمه
راح للكنتور طلع ملابسي وشمرهن بنص الغرفه
صار يطلع. ويشمر بحرگه
عرفته صدگ كرهني ومستحيل يرجع مثل قبل

اشرلي بيده

ذياب،، شيليهن اخذيهن واطلعي من الغرفه مااريد اشووفج نهائيا

غصون،، دنگت دموعي تجري اجه يمي رفعني من ايدي نهضت وياه دفعني الجهة الملابس

ذياب،، لميهن

غصون،، كعدت اجر واحط بحضني الموقف الي اني بي صعب كلش دنگ المستواي

ذياب،، والافضل ترجعين مثل قبل من جنت اجي وتختلين
اريد من ارجع للبيت مااشوف وجهج والا قسما بالله تشوفين مني وجه عمرج ماشايفته

غصون،، تركني وطلع رگع الباب وراه
هديت الملابس وبجيت بقهر من كل گلبي
غبائي وگعني بمشكله مااضن راح اطلع منها ابد

فشلانه من روحي لميت الغراض ودموعي تنزل فوگهن
التفتت المكانه الينام بي بالگاع
اتذكرت قبل كم يوم جنت بحضنه يهمس بااذني احبج والله
اتذكرت لمساته وبوساته الي بلهفه
ضحكته شقا حنيته طيبته كلهن اجن ابالي
وبلحضه ترن براسي حجايته
كرهتج وجزت نفسي منج
ارجع ابجي بقهر
لميت الغراض اخذتهن واطلعت اسحل بروحي
نزلت مالگيته موجود ولاسيارته موجوده بالطارمه

دخلت للغرفه القديمه الجنت انام بيها قبل
حطيت الملابس بالگاع
اتمددت بالگاع ولميت نفسي احس روحي تريد تطلع
خسرت ذياب خسرته

دخلت عمتي شافتني اجت يمي المره مفزوعه حسبالها ذياب ضاربني

من شكلنه مبينين متعاركين بس ماتعرف شنو السبب
ضلت تمسد براسي وتهدئ بيه
اتگلي ماكو مره ورجال مايتعاركون وبعدين يتصافون وتصير سوالف
اني بس ابجي تعبت گد مابجيت ومن التعب نمت بمكاني

ماگعدت غير نص الليل باوعت الساعه 3الفجر
نهضت من مكاني فتحت الباب باوعت من الجامه سيارته بالگراج
مااتحملت اضل بمكاني اريد اصعد انام بحضنه وافهمه بهدوء بلكت يفهمني ويصدگني

صعدت لفوگ فتحت باب الغرفه ودخلت
شفته نايم صفح ايده على عيونه
نايم ع الجربايه بنفس الجها الانام بيها يوميه
شجعت روحي ورحت يمه ولاول مره تجيني الجرئه الهاي الدرجه
صعدت يمه اتقربت واتمددت بصفه
حشرت راسي بين ايده وصدره

ذياب،، وخري

غصون،، حسبالي نايم بس من صوته وماانطئ ردة فعل عرفته مانايم
كتله والله ماكو هيج حجي وداعتك
حجيتها وخنگتني العبره

ذياب،، مايفيد بعد وخري غصون

غصون،، رفعت ايدي حضنته بس للاسف بسرعه بعدني عن حضنه وبدون ولا حرف فتح الباب وطلع
اتمنيت اموت بساعتها
مو ذياب اليتمنه ابقى ثواني بحضنه
هذا شخص من صدگ كارهني

نزلت وكل درجه احس راح اوگع على وجهي صار گدامي الاستقبال مطفي الضوه مالته
وضوه خفيف يوصله من ضوه الصاله
انتبهت جمره مشتعله عرفته گاعد يشرب جكاير
ردت اروح يمه بس خفت يفشلني مره ثانيه

رجعت للغرفه نمت بفراشي شبعت بجي احس جفوني ورمت من كثر مابجيت
من هذا اليوم ذياب اعلن وياي الحرب البارده

بحيث صرت مااشوفه اله بالصدفه وحتى من اصير گباله مايباوعلي ابد
رغم نبهني مااتواجد گدامه بس ماگدر اتحمل من اشوفه مااگعد گدامه
هو من يشوفني اگعد ينهض يطلع من البيت

لو من يتغده واجي اريد اتغده يعوف الاكل وينهض
استحقرت روحي ايام واني احاول افهمه وهو اليصدني مايريد يفهم مني
وعدت نفسي مالي شغل بي

وفعلا صار من يرجع اروح اختل حتى مايشوفني
وصلت مرحله ماعدت اتحمل تجاهله الي صرت اشتاق اسمع ضحكته لو شقا وياي

بعدها صرت اشوفه فرحان ويضحك واني دمي يفور وروحي تشتعل من اشوفه مرتاح واني اتگلب على نار هاديه

العصر بدل وكشخ لبس الدشداشه الخليجي والشماغ والعطر يهف ترس البيت
لازم السويج والسبحه نزل من الدرج رفع راسه شافني اباب الغرفه دار وجها وطلع ولاكانه شافني

تصرفه دمر اعصابي صرت احمس بروحي
اباوع النفسي حتى شكلي تغير علئ گد مانفسيتي تعبانه

خلص على شنو اني اموته نفسي وهو ولايمه؟
شگد حاولت وياه مافادت محاولاتي ولاجابت نتيجه
قررت خلص هذا احسن حل

انتضرته يرجع اتاخر صارت الساعه 12بليل وهو ماكو
شويه وسمعت صوت سيارته گلبي صار يركض

انتضرته بين مايصعد
سمعت خطواته ع الدرج
ضليت افتر بالغرفه اذا اصعد شنو احجي؟
خايفه من اشوفه يطير الحجي من راسي

اخر شي صعدت ورجليه يرعشن خايفه يطردني
فتحت الباب ودخلت صار گدامي ينزع بدشداشته
دار وجها عني مامهتم الوجودي
دخلت وسديت الباب

هو ينزع بساعته والمحبس يحطهن ع الميز
وگفت گدامه
وفعلا كل الحجي الحضرته طار من بالي ردت اجمع كلمتين واحجيهن ماگدرت

ذياب،، مومنبهج مااشوف وجهج ابد؟؟

غصون،، من يعاملني هيج احس سچينه حاره يغرزها بروحي
رفعت راسي وهلمره مامجبور يتحملني وهو كارهني
وبلحضه وحده مالگيت روحي غير
گتله ذياب طلگني

يتبع

هذا حسابي الثاني التحبني اتابعه 😘
Zahra036