رواية ضحية لمن لايرحم الفصل الرابع وثلاثون 34 - بقلم زهراء الحسناوي

البارت 25

ضحيه لمن لايرحم

بقلم زهراء الحسناوي

،،،،،،،،،،،
سيخبرك جحيمهم يوماً ان قربي كان جنه
وان عشقي لك ليس ذنبا
سترئ في مراة اعينهم كيف تندم
كيف انك اضعت الثمين من اجل المزيف
حينها فقط ستوقن انك احمق مغيب
وانك اهدرت عمراً لن يعود
حتى لو اعتليت جبالا من الصفح
وبكيت فوق كل حبة رمل دمآ 💔
،،،،،،،،،،،،،،،
غصون،، نار بروحي مشتعله وذياب مبين ولامهتم
ساره يمي همست بصوت ناصي

ساره،، تستاهلين انتي الجبتيها الروحج

غصون،، ماجاوبتها لان بس احجي ابجي
شويه وطلع ذياب نور الفرحه ماسايعتها على هاي فرحتها مستعده هسه تجي ويانه

رجعت ترگص واكو كم وحده مبينات صديقاتها رافعه ايدها تشوفهن الحلقه مامصدگه حصلتلها رجل

بعدها دك تليفون ساره جاوبت كالت هذا ذياب يكول عشر دقايق واطلعن
اجت امها كعدت يمنه وتوصي ساره تسلم على عمتي لان عذراء مفهمتها عمتي كلش مريضه وماكدرت تجي ويانه

ام نور صاحتلها جارتها راحت كعدت يمها عبالك طالعه ازغر من بتها مره جبيره والمكياج تارس وجها
اجت مرت حمه عذراء وكفت يمي

سوت روحها تعدل بشعر بتها

حوراء،، الله يساعدج اشلون راح تتحملين نور

غصون،، عافتني وراحت مافهمت شتقصد
وحتى ماعرفت اذا تحجي وياي لو ويه بتها
ساره كالت ياالله نروح ذياب جاي يتصل

من ردنه نطلع وكفت ام نور يمنه وجاراتها
وحده منهن كالتلي انتي الفصليه؟؟
هزيت راسي بمعنى اي

المره،، ياعيني سوده عليه بعدج طفله
شكد عمرج خاله؟؟

غصون،، واني البس بحذائي كتلها 17

المره،،يااا الله اكبر والله خطيه من جرمن زلمتج مارادج وراد نور يمكن لان جبير راد وحده بعمره تفتهمه

غصون،، ماجاوبت اكتفيت باابتسامه مزيفه
عدلت عباتي وطلعت ضلت ساره تسلم عليهن
وصلت باب البيت هوسه مال زلم واكفين بره
وذياب يمهم خزرني واترخص منهم توجه للسياره
فتحت الباب مال الكشن الوره وصعدت اجه هو صعد
رفع راسه باوعلي بالمرايه

ذياب،، ماتعرفين ادنگين من طلعتي؟؟
غصون،، ماجاوبته درت وجهي
شمر موبايله يمه بعصبيه ودگ هورن يستعجل ساره
اجت صعدت يمي

دك هورن للزلم الواكفه سلم وشخط السياره
كال الساره

ذياب،، صورتي؟؟

ساره،، اي بس مو اهواي

ذياب،، موكتلج صوري نور ودزيلي الصور

غصون،، يحجي بعصبيه ادري يريد يقهرني
سويت روحي مو يمي الحجي بس بالحقيقه كل كلمه تنبت بگلبي مثل السهم

وصلنه للبيت اتلگتنه عمتي جاي تسوي عشه
ذياب سلم ماردت السلام ابد من شافها هيج انقهر تركها وصعد الغرفته

رحت الغرفتي بدلت ولبست دشداشه وشال حطيته على راسي
طلعت يم عمتي لگيت ساره تحجيلها عن العقد وعن ام نور گالتلها ام نور سألت عليج وكتلها مريضه ودزتلج سلام وياي

ام ذياب،، الله يسلمهن ماصدگن يحصلن زلمه

ساره،، كافي يمه فشله من ذياب لاينزل ويسمعج

ام ذياب،، السمعني والماسمعني مشكلته اليوم وباجر اني اكول هلنور مارايدتها ابد
بس كله من وره هاي ااااخ خليني ساكته

غصون،، عضت اصبعها مقهوره تقصدني
ضليت مدنكه

ساره،، يمه اسكتي هاي مشكلته هو مو مشكلتنه عليمن تنقهرين ويصعد ضغطج

ام ذياب،، ولج يمه المره النادره هي التحتوي زلمتها ماتخلي عينه فارغه يتنوع الغيرها
واني مشكلتي مااعرف ادخل بينهم اكول همه يحلون مشاكلهم تالي خوش حلوهن جابولي عله على گلبي

اسمعيني غصون وروح ابو ذياب اذا انطيتي مجال لو ضحكتي بوجها لو ردتي تردين تنسين عندج عمه
خلي يعرف الله حق مالج شغل بي خلي تفيده نور الصفيره

ساره،، ههههه يمه صايره خطيره هسه غير اعرف شمسويتلج الصفيره وهيج ضايجه منها؟؟

ام ذياب،، الي نضره بالبشر حتى اعرف طينته شنو صح جانت تجي قبل اضحك وياها بس لانها خطار لكن هسه لا اختلف الوضع لالي شغل بي ولابيها

غصون،، المره روحها محترگه حتى ماتعشت وبيومها كلنه ماتعشينه حتى ذياب ضل بغرفته وبليل كال رايح يم لواء

يوم يجر يوم واني متجنبته نهائيا حتى من يجي افوت الغرفتي واسد الباب
اكثر الوقت اسمعه يرعد بالبيت على ابسط شغله يصير عصبي

قبل حتى من جان زعلان وياي قايمه بواجبه انضف غرفته وملابسه مغسوله ونضيفه
بس من خطب نور شلت ايدي من كلشي يخصه

كل شويه اسمعه يصيح ليش قميصي مامكوي
ليش بنطروني مامغسول عدل

اسمعه ومغلسه عود خل تجي الصفيره على كوله عمتي تغسل ملابسه

مر علي عقدهم اقل الاسبوع العصر اجت عذراء وياها نور ذياب نايم فوگ بغرفته
اول مادخلت سلمت على عمتي حضنتها
عمتي دارت وجها ردت السلام من وره خشمها
نور انتبهت ام ذياب ضايجه منها بس ولاجن بسرعه نزعت عباتها لبسها فضيحه
ستريج لزگ ع الجسم والله استحي البسه جوه هدومي ولابسه وياه تيشيرت ربع ردن واديها عبالك ثلج من البياض ولابسه بيهن سوار رفيع ذهب
نزعت حجابها شعرها حرير واني شعري اذا احط المشط بي ينكسر لان كيرلي صح طويل بس بي كسره خفيفه

سالت على ذياب جاوبتها عمتي وهي تحط الغراض بالثلاجه

ام ذياب،، نايم بغرفته

نور،، عذوره اني صاعده يم ذياب

غصون،، فتحت عيوني متعجبه بيها اشلون تكدر تروح يمه بهذا لبسها
عمتي باوعتلها صفح ماعاجبها
وهي عافتنه وصعدت

احس كاعده على نار اطحن بروحي طحن
عذراء اخذت ابنها للتواليت
ضلينه اني وعمتي ويه ماطلعت عذراء التفتتلي ام ذياب غمتني

ام ذياب،، كله من ايدج خليتي هاي البلگه تاخذه منج
شوفيها هلتنگرط گرط وانتي مدثره بحجابج
جنه نحجي نزل ذياب لابس اتراك وجها معقوج ضايج ونور وراه
من شافني كاعده بالمطبخ سلم على عذراء بضحك

رفعت راسي شافني اباوعله شال ايده حطها على متن نور

ذياب،، تعاي حبي نكعد بالاستقبال

غصون،، نور نزلت ضايجه بس من سمعته هيج حجه الضحكه ترست الحلگ راحت وراه للاستقبال
سمعت بس طبگه الباب
اشتعلت روحي احسها وصلت للسما ونزلت من القهر

افكر شجاي يسون يبوسها مثل ماباسني؟؟
راح يكلها احبج مثل ماگالي؟؟
الف فكره اجت براسي وكل فكره اصعب من الثانيه

التفكير البراسي فقط شراح يحجيلها وشراح يسمعها
هذا الاعرفه صح اغار بس مااعرف شي غير انو راح يسمعها كلام حلو مثل ماسمعني

اتاخرو جوه وحدهم اعصابي شايطه كل شويه التفت حسبالي طلعو
صادف خميس عمتي اتصلت بساره كالتلها مسويه ثواب على روح ابوج تعاي تعشي يمنه

نص ساعه واجت ساره جابها رجلها
طلعله ذياب ماقبل يفوت للبيت
من دخلت ساره وسلمت عمتي گالتلها موحلوه حالت رجلج يستنكف يفوت يتعشه يمنه

ساره،، يمه تعرفين طبع عقيل مويستنكف بس يستحي يكول فشله

ام ذياب،، لافشله ولاهم يحزنون زلمتج من يوم يومه هذا طبعه زين اذا يستحي يتعشه يمنه
شو حتى اخوج من ينطيج افلوس لويجيبلج حاجه رجلج مايرضه ويرجعها

ساره،، هذا طبعه جا شسويله
يكول من اخذتج صرت مسؤؤل عنج التحتاجي اني اجيبه خلي براحته

غصون،، اجت نور يمنه ساره باوعتلها من فوگ لجوه
نهضت سلمت عليها وذيج تتماوع بس مبينه مغثوثه من جهرتها
صبينه العشه وهلمره عمتي كالت بعنادهم تكعدين تاكلين وتضحكين لاتبينين النور ضايجه منها

وفعلا من صبينه العشه كعدت يمهم ذياب بس يضحك ويتشاقه وياها
عمتي كل شويه وندستني تحجيلها سالفه وتضحك تخليني غصب عني اضحك وياها

ذياب من يشوفني مامهتمه يضوج ويحاول يقهرني اكثر

نور طلعت موبايلها تحجي بالفيس شگال الفيس وشحجه الفيس
اني هذا البرنامج شايفته عد ابوي جان تجيله طلبات صداقه ومن ينشر نشوف المنشورات لان موبايله النهار كله لو عندي لوعد مرتضئ اخوي نتعارك علي

هو مدنگ ياكل وعذراء بس تتمضحك مثل الخبله
كل شويه وكالت الساره نور اشترت هيج فستان وطلع يخبل عليها
نور جابت حذاء ماركه
نور راحت سوت وجها بكذا صالون

كاعده تصبغ بنور جدام اخوها
هو مدنگ
ماادري اشلون خطرت على بالي الفكره
التفتت الساره كتلها صدگ سويره
ماتسويلي فيس

ذياب،، شتسوين بي؟؟

غصون،، كلها سكتت والتفتن لذياب الجان مسلط نضره الجهتي درت وجهي باوعتله ورجعت التفتت الساره بدون حتى مااجاوبه

ساره سويلي فيس وفايبر اواتساب
كل برنامج تعرفي نزلي الي

ذياب،، حتى اكسر الموبايل براسج

غصون،، دنگت ولاجن سمعته
رفعت راسي نور صافنه على ذياب وجها انطعن احمر
تركتهم وگمت للغرفه شويه ولحگتني عمتي فتحت الباب تضحك

ام ذياب،، عفيه هيج اريدج ولج يمه والله يحبج ماشفتي اشلون وليدي اخترع من سمع بطاري الفيس

غصون،، ضليت ساكته دخلت ساره

ساره،، يمه والله ماينگدرلج شعلتيها بينهم وطفرتي
ههههه

ام ذيتب،، يمه ساره سوي المرت اخوج هذا البرنامج مال الفيص بوك

ساره،، يمه لايسمعج مارك جان فيصنه تفيص

ام ذياب،، مره جبيره شمعرفني بسوالفجن
دكعدي سوي الها
واني هم محضره سالفه اريد اطلع الغباء البراسها شويه بلكت تصحئ قبل مايفوت الاوان دامنه بعدنه ع البر

ساره،، والله حجيه مو گتلج صايره خطيره

غصون،، عضتلنه شفه وتضحك عافتنه وطلعت
انطيت موبايلي الساره

سوتلي فيس وثبتته برقمي خفت الرقم
گالتلي شنو تردين اسمج؟؟

اتذكرت مسلسل نور ومهند كلش احبها
وجنت حيل متاثره بيها وخاصتا من يبجي مهند اكعد ابجي وياه
كتلها سميها عاشقة مهند

ساره،، يبوووو ولج موهيج الله يستر من هذا الاسم بس لا يشلع گلبنه ويشمره للجلاب ذياب

غصون،، اخوج الغضبان محتار بنويره الصفره على كوله عمتي

ساره، هههههه هذا ذياب الغضبان؟؟
اذا سمعج يغضب عليج تره

ياالله هسه شنو تردين صوره ملف؟؟

غصون،، جنت بوكتها احب المسلسلات التركيه تارسه تليفوني صور مهند وصور لميس وعمار كوسوفي

كتلها حطيلي صوره لميس

ساره،، والغلاف؟؟

غصون،، مهند حجيتها والعب بحواجبي

ساره،، ادري اني مكتوله مكتوله بسببج
اذا ماذبحني من وراج

غصون،، عليش يذبحج مو نور عدها فيص على كوله عمتي لو بس من يمها غفور رحيم ومن يمنه شديد العقاب؟؟

كتلها اشلون انشر منشور؟؟

غصون،، المنشور بس بحسابج محد يشوفه بس الاصدقاء

غصون،، علمتني وفهمتني اشلون انشر واشلون ادز طلبات صداقه بس نست تعلمني اشلون الغي الصداقه لو احضر شخص

كملت ساره وحملتلي الفايبر والواتساب
كيفت لان راح يوميه اتصل ب اهلي بدون رصيد
يعني راح يوميه اسمع صوتهم

طلعنه اني وياها وعفت الموبايل بالغرفه
لگيت نور وعذراء يغسلن مواعين وذياب بالاستقبال بس عمتي بغرفتها
ساره كالت تعاي نروح يم امي
عفناهن ورحنه يم عمتي هنه سون جاي وشربن وحدهن يمه واحنه اني وعمتي وساره بغرفه ام ذياب

للساعه تسعه بليل اخذهن ذياب وداهن
احنه سادين الباب ونسولف منطلقين وعمتي تحجي على ايام قبل اشلون جانت عايشه ابيت الشيخ

ساره تاخرت يمنه رجلها كالها طالع بشغله من ارجع امر بيج للساعه 11اجه اخذها

عمتي تعبانه غفت من وكت واحنه نسولف لگيناها تشخر
من راحت ساره رجعت للغرفه
اتذكرت الموبايل نهضت اريد اخذه مالگيته

دورت بالجام ماكو ع الميز هم ماموجود
نفشت الغراض نفش ماكو ولا اله ذكر
صدك اتوترت وين اختفه؟؟

اتذكرت موبايل عمتي رحت جبته طلعت رقمي واتصلت وكفت بالغرفه اتصنت حتى اسمع صوته بس ماكو يدك بس مااسمع صوت رنين

ربي دخيلك وين راح
لازمه موبايل عمتي دگ بيدي فزيت
هذا رقمي يتصل عمتي كاتبه غصينه علي
بسرعه جاوبت

ذياب،، عاشقه مهند هذا موبايلج يمي تعاي اخذي

غصون،، سد التليفون ظليت بمكاني خايفه اصعد
وليش اصلا اخذ الجهاز ويشسوي بي؟؟

حطيت رجلي ع الدرج ورجعت نزلت محتاره بين اصعد وبين مااصعد
لان مااريد انجمع بي بمكان واحد بعد السواه

اخر شي صعدت بس بداخلي ارتباك وخوف
وارجع اكول ليش الخوف ومن شنو؟؟

دكيت الباب مره وبااثانيه فتح الباب لابس فقط بجامه وفالينه
مادخلت دنگت كتله ممكن الموبايل؟؟

ذياب،، جوه فوتي اخذي مهند ينتظرج

غصون،، جريت نفس مبين يتعمد هيج يسوي
ابتعد عن طريقي دخلت شفته ع الميز توجهت حتى اخذه سمعت صوت سدت الباب التفتت شفته مكتف ادي ومنتجي

اخذت الجهاز بيدي درت وجهي شفته قريب مني
ردت اعبر لزم ايدي ورجعني وكفت كدامه

ذياب،، مو گلت ماكو فيس؟؟

غصون،، رفعت راسي مندهشه بسبب التناقض عد هذا الشخص الموجود كدامي
يعني نور عادي عدها فيس واني لا

كتله وليش مااسوي فيس؟؟

ذياب،، بكيفي
ليش دائما تسجلين نقاط على روحج؟

غصون،، دنكت وجاوبته
مامسويه شي غلط واذا حضرتك تشوف تصرفاتي
اغلاط فهاي مومشكلتي

قبل لايحجي تركته وطلعت بسرعه خايفه اضعف وابجي لان دموعي رخيصه بسرعه تنزل
مااعرف ليش اضعف كدامه؟؟
كلشي بيه ينشل ويتوقف عن الحركه
عدا دگات گلبي الاحسها غير منتظمه وسريعه

رجعت الغرفتي وبيدي الموبايل
فتحته ودخلت ع الفيس
راد يوگع گلبي من شفت صورته منشوره بحسابي
شفت الاصدقاء بس هو وساره
اكيد من اخذ الموبايل ضاف حسابه
انتبهت زين هذا موحسابي اطلع وارجع للفيس شو الاسم متغير كاتب ع الاسم دهن الثول والصوره مغيرها
مخليلي صوره لميس
دخلت ع الصور الموجوده بالاستديو حاذف شكو صوره المهند
كل ضني غير الاسم فقط ماجنت اعرف انو هو مغير الصفحه كلها ومسوي جديده

ردت الغي الصداقه مااعرف اشلون
ضليت اگلب بالفيس اكو حسابات مقترحه اهواي
وصور حدث ولاحرج حاطيهن غلافات
گلبي صار يدگ سريع ايدي خدرت وثلجت اطرافي
لان اول مره اشوف هيج اشياء

ومن الخوف والارتباك بدون ماانتبه دزيت طلب الواحد من الحسابات وبنفس اللحظه طلع عندي تم قبول طلب الصداقه........ يتبع

كلها مرت
وانت حتى بطيف
تتعاجز تجيني 💔

التصويت مايسوي واهس 😒🥴