رواية ضحية لمن لايرحم الفصل السادس وثلاثون 36 - بقلم زهراء الحسناوي

البارت 26

ضحيه لمن لايرحم

بقلم زهراء الحسناوي
،،،،،،،،،،،،،،،،،،،

احببتك كأنك لن تغادر أبداً
وغادرت
كأنك لم تحبني يوماً

،،،،،،،،،،،،،،،،

زينب،، نذيره من شافت بتها اخترعت تريد تفهم شبيها ومنو كاتلها تالي اخذتها البيتهم وراحت
رادت تروح تلحگهم رفل امها ماقبلت كالتلها انتظري بين مااصب الحلاوه ونروح اني وياج نشوف شبيها بت خالتج

كتلها خاله اني اصبها

ام سجاد،، مو تاخذين الحصه الجبيره

زينب،، ضحكت كتلها لا اربع مواعين الي والباقيات الكم

ام سجاد،، لاهذا هو ودع البزون شحمه

زينب،، حجتها وهي تضحك تالي جبتلها مواعين صغار
اخذت منها الچفجير اخوط بالحلاوه عافتني وراحت من كملت صبيتها وتركتها تبرد
بس ماعون واحد ترسته الي احب المحلبيه وهي حاره

اخذت ماعوني وصعدت الغرفتي
خليته بالگاع وگعدت اكل من حبلت لسه مااحس اكو طعم اكل بحلگي حتى الماي احسه مر
اكلت ربع الماعون لعبت نفسي ركضت للحمام كله اتقيته

احس روحي طلعت ماكو اكله تضل بمعدتي
شويه وانفتح الباب دخلت رفل
سدت الباب واجت گعدت يمي شافتني كاسره المخده ومتمدده عدلت گعدتي

رفل،، ابقي نايمه ليش گعدتي؟؟

زينب،، ابتسمت الها كتلها شكو شبيها جنه؟؟

رفل،، خابزيها عيالها خبز العباس ههههه

زينب،، هزيت راسي بمعنى ليش

رفل،، هي وعمتها متعاركات ورجلها سامعها تتجاوز على امه لازمها مكسرها تكسر وهسه مدري شبيها تبجي من بطنها
عزااا لوتشوفين جسمها عباره عن كدمات زرگ

زينب،، اللهم لاتجعلنا من الشامتين خطيه

رفل،، والله ماكو مثل گلبج
تذكرين شسوت بيج جنه؟؟

زينب،، اذا اني انسه حاشه لله ينسى
اني تركت الي ياذيني هو وربه يتجازه

رفل،، ونعم بالله

زينب،، بعدها اجت ام سجاد بس ماحجت شي
گعدنه نسولف سوالف عاديه سالتني على حملي
گتلها قبل لاتجين اكلت من الحلاوه واتقيئت

ام سجاد،، سوده عليه بنيتي هي فتره وتعدي التنساه
صدگ بشنو تنسيتي؟؟

زينب،، قصدج اشتهيت؟؟

ام سجاد،،، اي

زينب،، والله خاله كلشي مااشتهيت وحتى الاكل الاكله اركض اذب من معدتي

ام سجاد،، بلگت ماتتنسين ومن ادخلين شهر الرابع يتوقف لعبان النفس

زينب،، اني قبل جنت اسمع من امي من حبلت ب امير اخوي تحجي ويه مرة عمي كالتلها نساتي تبدي من شهر الرابع للتاسع اضل روحي بالطين وريحة الرطوبه والتربه

ام سجاد،، يااا يمكن انتي نساتج نفس نساة امج ومن الشهر الرابع راح تكومين تشتهين الاكل

زينب،، والله ياخاله ماادري بس كل اليهمني تخلص فتره لعبان النفس لان تعبتني

ام سجاد،، قبل جانت مرة عمي ام ذياب گاعده ويانه بنفس البيت وحامل بذياب
خطيه جانت تتنسئ وعمي ماموجود اكثر شي تشتهي الحمضيات
بس جانت نذيره موشي وياها ودوم مشاكل
فخطيه من گد ماتنساتها صعبه وماتريد الطفل يطلع بي شي

تركض للنخله عدنه نخله صغيره تاخذ من گلب السعف خوص اصفر هذا اليصير ناعم كلش
تشلعه وتضل تعلس بي لو تاكل ورق عنب لو العنب الصغار الحصرم لان حامض

زينب،، بگلبي گلت الله واكبر يعني من زمان الضلم جائر بهذا البيت
طلع بس من الخارج حلو ويخلي كل شخص يشوفه يحلم يعيش داخل جدرانه لكن من تتعايش وياهم راح تشوف بشاعتهم تخليك تتمنى تعيش ابيت سعف افضل الف مره من عيشتك بمثل بيت الشيخ
ع الاقل عيشتك ابيت السسعف تشتري بيها راحه بالك
لكن اهنا من يوم الدخلت ماشفت راحة بال ابد

يومين وراحت ام سجاد
بس الوضع بالبيت كلش متوتر لان محد اجه من عيال جنه عليها كانه كارهين وجودها يمهم ومرتاحين بدونها
اسبوع وجنه يم امها مااجت البيت جدها خاتله اهناك تخاف احد يتشمت بيها

بس نذيره من تشوف بتها مقهوره تجي اطلع ظيمها بيه تستلمني نضفي هاي وشيلي ذيج
لواء مااحجيله من يخابر اكول خطيه شيريد يسوي وهو بالدوام واذا كتله راح بس يحرگ بروحه اهناك
عاد من يجي احجيله

نذيره تلح على ابوها حتى يخابر ابو رجل جنه يعاتبه على ضربها بس شيخ منهل رفض كالها كل اليجرالها من ايدها لاتفشليني اكثر انتي وبنتج ويه الوادم
خليها اذا يردوها يجون ياخذوها

نذيره،، واذا مارادوها؟؟

شيخ منهل،، اروح اتوسل بالوادم يردون بنتج

نذيره،، صدگ بويه؟؟

شيخ منهل،، والله لو يطلجوها مااروح ابد
وهسه انه جاعد اهنا بس اعرف بنتج العايله
عبنها وكحححه هي التجيب زلمه للبيت بتوالي الليل شترجه منها؟؟

زينب،، اتصل لواء گال اني جاي اليوم
كويت ملابسه ورتبت الغرفه
للضهر وجان نسمع صايح بالمنطقه

ام لواء گالت النذيره البسي عباتج واطلعي شوفي شنو هذا الصايح
ركضت نذيره شويه ورجعت كالت بيت ام محمد ابنهم استشهد بالحشد

ام لواء گالتلها خطيه سمعت امه خاطبتله. تريد تعرسه

من سمعت كلامهن دموعي وحدهن نزلن
دخيلك ياربي شباب جاي تروح بعمر الورد وكل واحد بيهم عنده حلم يحققه بس غيرتهم شالتهم وفزعو لبو نداء المرجعيه حتى يدافعون عن وطنهم
رفعت ايدي للسماء ربي دخيلك لواء بحفضك وامانتك يارب

للمغرب كلش اجه لواء ومن سمع الخبر ضاج لان الولد بغير وحده يداوم
والعرفنا بعده ماجابو بعده بالمستشفى
واكو كم واحد من الجيران يردون يلحگون اهل الشهيد حتى يجيبو
لواء بي فزعه حلوه بحيث بسرعه ذب ملابسه العسكريه حتى مالحگ يسبح لبس دشداشته

وطلع گال ذوله جيراني يفزعولنه بالزغيره والجبيره وبموت جود واكفين وياي النهار كله
بيومها للعشره بليل وهو ماجاي
حضرتله عشه وصعدته للغرفه غطيت الصينيه خاف يجي جوعان
تالي نص الليل حسيت روحي نسحبت فزيت شفت روحي بحضنه نايمه رفعت راسي
سالته شوكت اجيت؟؟

لواء،، قبل ربع ساعه

زينب،، نهضت فتحت الضوه ورجعت يمه
مبين سبحان باوعت للساعه ب٣ونص الفجر
سالته ع الولد

لواء،، جبنا يم اهله والصبح التشييع

زينب،، انگلب نام على ظهره وايده جوه راسه
عيونه حمر دم

لواء،، الله يصبر ابو واخوته وامه
اخوته بالمغيسل من رادو يكفنو شمرو رواحهم على فوگ اخوهم
اتخيلت حسين اخوي ماشفته ولاطبيت وياه وغسلته بيدي

زينب،، الله يصبرهم بحق النبي
اباوعله دموعه نزلن مديت ايدي مسحت دمعته مسح وجها بثنين ادي
اخذ موبايله وقته ب ٦ونص
كال التشيع بالسبعه

ادري تحز بخاطره عبن اخوي كتل اخو بس ولامره بينلي هذا الشي

ثاني يوم من الصبح هو راح للتشيع والساعه ب ٩نذيره لبست هي وغفران راحت للطم مال النسوان
مارجعت غير قبل الصلاه مال الظهر بشويه

اسمع نذيره تحجي عن مره لاگيتها بالفاتحه تعرفها من زمان تسولف ل امها عنها

نذيره،، ييمه شفت بت ابو رضا هاي المعرسه ابغداد
اشلون صايره احوال والله ماعرفتها عبن هي عرست گبلي والمره هم كبرانه بس مامبين عليها الكبر مثل حضي
سالتها گالت صار عندي اثنين اولاد واثنين بنات
ابنها الجبير اكبر من جنه بنتي لسه مامعرس

والمره ضلت عينها على غفران وكل شويه تسالني بنتج مخطوبه؟؟
خو مامحجوزه لواحد من گرايبكم؟؟

ييمه يمكن خلت عينها على غفران
اني من زمان اسمع اخبارها من النسوان يگولن ماخذتلها واحد صايغ وخير من الله تلعب لعب بالفلوس

بلكت الله تخطب غفران ل ابنها

زينب،، اسمع ومتعجبه بحقاره هيج بشر
رايحه الفاتحه وناس حلوگهم متروسه دم على موت ابنهم وهي ناصبه ع المره يسولفن بالخطبه
صدگ الوجعه ماتوجع غير راعيها
اهل الميت يفرفحون وذني الفايخات عبن الفاتحه موفاتحتهن مامحترگه ارواحتهن وكاعدات مرتاحات

اسمع ام لواء تگلها بلكت قسمتها احسن من قسمه اختها الكتلت روحها ع الرجل تالي كسرت وجوهنه ودمرت روحها بسبب وكاحتها

زينب،، كملت تنضيف الصاله ورحت للمطبخ اذن اذان الضهر رجع لواء من الدفنه

حضرتله الحمام يسبح
ورجعت للمطبخ انضف من نزل شافني اشتغل

لواء،، زيينب اني موگايل لاتشتغلين؟؟

زينب،، ردت احجي سمعته نذيره اجت گالتله ومنو مشغلها هي مرتك وحدها اتگوم
ماردت افشلها وهم اني تعبت من المشاكل صرت اتخبل من اسمع عركه لو مشكله لان روحي انترست قهر بحيث ماعدت اتحمل احجايه زايده
كتله لواء اني گمت اشتغلت لان تعبت من النوم والحافضه الله حافضه لتخاف وداعتك اذا كاتبله عمر يعيش لو اشتغل ليل نهار كلشي ماعلي
ولو الله كاتبله يموت لو انام ومااحرك الورد هم ياخذه لان مامكتوبله العيشه

لواء سكت بس گال لاتذبين روحج كلش كملي البيدج واصعدي
نذيره من تسمع كلام لواء وتشوف خوفه عليه تنطعن يصير وجها احمر ابدها تحطني وتگطعني

بليل گاعده اعزل بملابس لواء انفتح الباب دخل بيده علاگه

سد الباب واجه گعد يمي بالصدفه ماادري ولامنتبها اني شلازمه

لواء،، بويه هيج مشتاقتلي الهاي الدرجه؟؟

زينب،، يحجي وياشر بعيونه على ايدي لمن دنگت وجان اشوف لازمه الملابس الداخليه احس صخنت من الفشله وهو طگها ضحكه جر راسي باسه

احب حنيته وطيبته واخجل منه كلش حتى استحي ابدل جدامه شگد يحجي ويفهمني انو اني حلاله والله جعلنه واحد ستر للثاني وهلشي عادي بين الازواج بس موبيدي استحي من يكمل حجي الگاه مبتسم مرات يگلي احب خجلج
بس العجيب بعلاقتنه ولامره واحد من عدنه سمع كلمه احبك من الثاني

لااني حجيتها ولاهو

بيوم الثالث مال فاتحه الولد هم راحت نذيره واخذت بتها غفران يشهد الله من طلعت غفران عبالك عروس انتبهتلها حاطه باودر وجها ابيض كلش
اني من يمي استحيت
عبن فشله رايحه فاتحه موعرس ورايحه متبرجه
ماكو مره ماتعرف المره الجدامها حاطه مكياج لو ماحاطه اكيد راح يعرفنها وراح ينتقدن امها
هسه يگولن موصوجها صوج امها الجابتها واجت

والله اذكر مره صادف حصاد والوادم تذري الشلب عن الصدف، (العودان الناعمه)
واحنه حاطين شلباتنه اباب الحوش وامي تذري بيهن
طفرت عوده بعيني كلش ناعمه خبصت عيني خبص من گد مافركتها وامي خطيه فتحت عيني ادور العوده تريد اطلعها بس ناعمه وزغيره صعدت بالفص فوگ

ف مرت عمي ام غصون گالت الغصون روحي جيبيلها الكحله الحجر خل تكحل عينها لان الكحل ينضف العين

صدگ راحت غصون جابت الكحله والقران كحلت عين وحده حتى تطلع الوصخه عن عيني

المغرب كلش وكت عشه ومطفيه الكهرباء
واگفه بالمطبخ اغسل مواعين والفانوس يمي مشتعل
اجه احمد التفتتله ورجعت التفتت للمواعين
ماحسيت غير جرني من شعري احس رگبتي طگت

يگل ل امي اليوم بنتج مكحله انطيتيها مجال
طاحلي كتل وابوي ماهو وامي ماتگدر ل احمد عاد مريم ركضت العمي صاحتله گالتله الحگ احمد موت زينب كتل

اجه عمي يركض هو ومرته واتعارك ويه احمد
مرت عمي گالتله اني انطيتها الكحل لان عيني بيها وصخه من الشلب وماحطت اختك غير العين وحده
يعني رادت اداوي عينها موتتغاوه بكحلتها (تتكشخ)

من سمع كلام مرت عمي يالله عافني بس جسمي يون من الكتل
من يومها تبت شگد توگع بعيني وصخ من الشلب لو الحنطه بس دائما صرت اروح الجيرانه اطلعها تعرف بذني السوالف

وذني لاعدهن مستحه ولاخجل رايحات متزينات للفاتحه هسه لو بس فاتحه الشهيد بيها مجال
بس اخوهن الماصارله كم شهر من مات
وحده عرست وصبغت وميشت
والثانيه من هسه ادور عرس
يمكن نذيره صارت بيها خوفه اتگلك قبل ما الثانيه اتصخم وجهي خل اعرسها وارتاح منها

العصر من رجعت نذيره من الفاتحه اتفاجئنه وياها مره جايه المره نافشه ريشاتها عبالك طاووس
ولاجنها تمشي ع الگاع تتگلب تگلب بمشيتها
اباوع نذيره مخبوصه بيها اليشوفها يكول جايه وياها مرت السلطان سليمان

فاتت المره يم عمتي للاستقبال
اجتني نذيره تركض وغفران لازمه بيدها عبايتها ولابسه حجابها لان توهن رجعن من الفاتحه

نذيره،، بسرعه رتبي صينيه وحطي بيها كاسات ماي وسوي جاي ركضض

زينب،، كملت كلامها وياي التفتت الغفران

نذيره،، وانتي انزعي حجابج وشعرج رتبي تعاي اكعدي يم المره

زينب،، اول ماطلعن هزيت ايدي عائله يمكن عدهم خيط اخبال

طلعت صينيه حطيت بيها كاسات ماي واخذتها الهن طلعت غفران من الاستقبال صارت بوجهي همست جيبيها

اخذت الصينيه من ايدي وفاتت يمهن اسمع ام لواء تحجيلها عن حادث جود والمره تتعذر منها اتگلها ماسمعت والله اله البارحه سمعت من النسوان بالفاتحه

رجعت سويت جاي اجت غفران وكفت يمي لمن صبيت اخذته وراحت يمهن

نص ساعه المره يمنه
المطبخ بي شباكين واحد للحديقه والثاني بجهة باب الحوش جان بمكان الشباك بانين مخزن وفلشو بنو بمكانه بس شباك

سمعت هورن مال سياره فتحت البرده على كيف
شفت شاب نزل من السياره انتجه عليها طلع موبايله يتصل مدري بمنو

ضليت صافنه شاب متروس محابس وگلايد وسوارات حواجبه مسويهن خيط رفيع وطابرهن من النهايه ومزين شعره طاسه كذلته طويله بحيث نازله على عيونه كله شويه وحرك راسه يشمرها على صفحه
وحاط بحزامه مداليه بيها مفاتيح
من اتحرك خطوتين صرت اسمع صوت الخرخشه مالته زلمه كله يخرخش من فوگ لجوه

عرفت هذا ابن المره لان الضاهر اتصل بيها انطاها علم هو واگفلها بالباب طلعت وياها نذيره تودعها سلمت ع الولد شو هذا يتماوع گوه كتمت ضحكتي لان بي انوثه اكثر مني
لاوالمصيبه نذيره اكلت الولد بالسلام

تالي اخذ امه وراح فاتت نذيره تحجي ل مها اتگلها اشلون شاب ينگرط گرط
حلو ومرتب هو صدگ ك شكل حلو بس مخرب روحه بالهوسه المسويها بشكله

بليل اتصلت ام حنان بس ماعرفت شكو بس سمعتهن يحجن بااتصالها
من صعد لواء للغرفه گال حنان البارحه طالگه بليل
وماخذيها والدكتوره مرجعتها عبالهم عدها ولاده وهي حاجزه ع العمليه بس متعارضه قبل موعدها بلكت الله كلشي مابيها
ويطلعون ويلاد اخوي كلشي مابيهم

ضليت اندعي كون يكملن ايامها وتجيب بخير وسلامه
سبحان الله نسيت كل السوته حنان وصرت ادعيلها ربي يلتفت الها وتطلع سالمه هي واطفالها

ثاني يوم ام لواء گالت الواء يمه مرت اخوك اليوم ياخذوها للدكتور فشله خابر ابوها اساله عنها وگله شمحتاج مامحتاج وانطي علم افلوس العمليه من عندك مو من ابوها

وفعلا اتصل لواء ب ابو حنان وساله عن وضعها
كاله تجيها الالم وتروح وهسه احنه يم الدكتوره وحولتها للعمليات لان متقدمه ولادتها والساعه ب8بليل تدخلها للعمليات

لواء بدل واخذ الشيخ ونذيره وياه للمستشفى
عبالك اني الاريد اجيب
افتر بالغرفه واندعي ربي سهل الها
ربي دخيلك طلعها طيبه هي وجهالها

وره ساعه اتصل لواء مهضوم مختنگ ماحجه شي غير گال

لواء،، جابت زينب جابت اجوو جهال حسين

زينب،، سد التلفون جريت نفس الف الحمدالله يارب تحيي العظام وهي رميم حسين مات بس مامات ذكره والله عوض امه وابو بذريته راح يحملون اسم ابوهم ومايموت ذكرئ وياه بدون نسل

مارجع لواء للساعه 10بليل اول مادخل للغرفه ضحك
اني من اشوفه يضحك وحدي الحلگ ينفتح اذراع
اجه يمي جرني وباسني دنگ البطني يحجي وياها

لواء،، شوكت تجي ولك سربوت خليتني احسبلك يوم يوم

زينب،، واذا بنيه؟؟

لواء،، بنيه وتطلع رزنه وعاقله مثل امها يامحلاها
ولتنسين الولد والبنت هديه من الله عز وجل المهم اتمامه الخلقه اكو زلم ومابيهم حض وبيهم العاق لهله
واكو بنيه تسوالها الف شارب وباره باامها وابوها وراضين عنها

ولج والله مساع بالمستشفئ اول ماانطونه الولد شلته بحضني كبرت ب اذنه وبسته صح فرحان بي بس مو بگد فرحي من طلعو الطفله وجها وردي وملبسيها ابيض ومگمطيها بگماط وردي
والله تمنيت احطها بروحي بوستها وماشبعان منها
يصح طفل ياخذ معزته گوه

زينب،، بعدها سكت ابتسم وغمزلي

لواء،، يمعوده فوگ ضيمي بالدوام اجي تتلگاني المصايب اتگول منتضرتني الكوارث لمن انزل مجاز
وانوب الدكتوره سدت بوجهي الباب وگطعت عليه الهوئ والماي والكهرباء

زينب،، ضحكت كتله اتحمل

لواء،، لايبوي خلصن هنه بس خمس شهور والله يسهلها

زينب،، تالي گلت خطيه باجر ارتبله جو كل مايجي صدگ تتلگاه المصايب

ثاني يوم من الصبح لواء اتصل ب ابو حنان ساله على صحتها وعلى الاطفال گاله زينين
رجع لواء حجه ويه ابوها گاله اني جايكم للمستشفى وراح اجيب ريوگ وياي

راد يطلع گتله انتظر اني راح اخدر ترمز مال چاي اخذه وياك وانته اشتريلهم بس صمون وگيمر عرب

لواء من يشوف تصرفاتي احسه يفرح لان اشوف لمعه الفرح بعيونه

نزلت وياه ترست القوري ماي حار من الگيزر بسرعه فار خدرته ودرته بالترمز اخذه لواء وياه

هو يشتري كاسات سفري يصبون بي

الساعه ب 11 طلعو حنان من المستشفئ لهلها ابوها اخذها بسيارته لواء بس داخللها مسلم عليها ومتحمدالها ع السلامه

الساعه ب 3ونص العصركلهم راحو البيت حنان وكل واحد ماخذ هديه شكل ام لواء دزت نذيره للسوگ من الصبح راحت للصايغ اشترت زوج تمايم للطفله
وللطفل مشتريه مدري شنو ينلبس براسه ذهب

نذيره اشترت جهاز كامل للاطفال ملابس وشغلات حلوه اباوعلهن من المطبخ ولازمه بطني شيجيب اليوم الاجيب بي طفلي واشتريله من ذني الشغلات
من راحو البيت صار هدوء صعدت الغرفتي

تذكرت كلامه البارحه فتحت الكنتور عندي نساتل وشغلات وبالثلاجه حلويات وعصاير
اجت ابالي اهواي شغلات بس مستحيه اتفذهن

انفتح الباب دخل لواء

لواء،، مريتي وحدها بالبيت؟؟

زينب،، اي لان كلهم راحو البيت حنان

لواء،، وليش مااتصلتي بيه؟

زينب،، وعليش اتصل مااخاف وبعدها دنيه العصر من شنو اخاف؟

لواء،، والله مرتي ذيب امعط ماينخاف عليج
گومي اطلعين وياي

زينب،، وين؟؟

لواء،، مشتهي ننزل سوه للبستان

زينب،، بسرعه لبست عباتي ونزلت وياه
هو يمشي جدامي واني وراه صارت عيني على گاع ابوي الباعها للشيخ بيتنه من بعيد اشوفه اتمنى المح خيال امي لو وحده من اخواتي

من بعيددد شفت مريم وزينه لازمات حبل الهاشه ويمشن جدامها لان العصر ينزلنها للبستان مال جيرانه صاير بصف بستان شيخ منهل
عيني تشكلت عليهن امشي وعيوني الصوبهن لگيت دموعي وحدهن نازلات

لواء،، تذكرين من نزلتيني بالطين حتى تعبرين؟؟

زينب،، مسحت دموعي كتله اذكر بس شعرفك هاي اني؟؟

لواء،، صاحبتج الجانت تمشي وياج فاضحتج بصوتها العالي من بعيد اسمعها تصيحلج زينب
صرت كل ماانزل اشوفج ومبينه وكحه عكس هسه فاهيه

زينب،، هو جدامي يمشي على كيف ويحجي
گتله كثر الدگ ع الحديد يخلي يلين

التفتلي شافني امسح بدموعي رفع وجهي بيده

لواء،، وليش تبجين؟؟

زينب،، التفتت الصوب بيت اهلي
كتله مشتاقه ل امي حجيتها وبجيت مااتحملت

لواء،، كافي بويه لاتبجين
اني هم غلطان بس وروح اخوي موبيدي هلتشوفين ارجع من الدوام تتلگاني الكوارث اتخليني مالحگ احك راسي
بس انشاءالله بيوم الالتحق اخذج يمهم تضلين مااجيبج اله لمن انزل مجاز اسبوعين اخليج يمهم اريدج تشبعين شوف منهم
هابويه راضيه؟؟

زينب،، من فرحتي جريت ايده بستها جرها حطها وره ضهره

لواء،، استغفرالله

زينب،، گعدنه على جذع مال نخله ممدود بالگاع
طلع باكيته وجداحته اخذله جكاره حطها بحلگه اورثها سحب نفس ونفث الدخان

لواء،، احجيلي

زينب،، مافهمت شيقصد هزيت راسي بمعنى شنو

لواء،، عن اهلج

زينب،، دنگت اخذتلي عوده صغيره من الگاع
گتله شحجيلك

لواء،، كلشي

زينب،، گتله قبل من جنت ارجع من المدرسه امر على بيتكم اباوعله اگول هنياله العايش بي اكيد مرتاح

لواء،، وهسه؟؟

زينب،، حلمي ارجع اكعد بين امي وابوي واخواني
صح عيشتنه تعب بتعب بس بالنه مرتاح لان ناس فقره على گد حالنه لو العمر ينباع جان دفعت عمري كله في سبيل يرجع يوم واحد اعيشه ويه ابوي

كعدت احجيله عن ايام قبل واشلون جان ابوي يتعب ويكد وهو مريض وظهره محني ورغم هذا الشي يشتغل في سبيل يوفرلنه اللگمه الحلال
وجان قبل ماينام اذا واحد بينه زعلان وخاصتا احنه البنات محتوينه يبوس هاي ويحضن ذيج ومايوم حسسنه بفقره دائما من نريد شي يجيبه لو يعرف يداين وبعدين يسده من راتبه

جنت احجي ودموعي مستمره بالنزول
بعدها سكتت وهو ساكت يستمع

لواء،، الاب كلمه الها وصف ومعنى
اكو اباء اهواي عايشين الوصف وتاركين المعنى

زينب،، هزيت راسي مامفتهمه

لواء،، الي عايشين الوصف يعني يصرفون على اولادهم بدون حنيه ولااحتواء مثل ابوي بالظبط
ومن واحد من اولادهم يسويله مصيبه وتجي الناس تعاتبه يگلهم والله اني مامقصر عنه بشي وموفرله كلشي بس بالحقيقيه هو مامحتويهم ولامصادقهم اكو مثل يگول ابنك خاويي يعني صاحبه صير صديقه اسأله عن المضوجه اساله عن ابسط الاشياء خلي يحس بوجودك اذا غلط علمه واذا اتجاوز عاقبه بس بعگل موبقسوه هاذه المعنئ الحقيقي للابوه

زينب،، احس لواء مدرسه اتعلم منه وكلامه جبير صعب على عقلي يفتهمه بس هو يحاول يبسطلي الكلام حتى افهم صرت اكتسب معلومات منه من يحجي وياي تحسه جاي يحجي ويه شخص بعمره مو فرق بيناتهم 19سنه

موضوع يجر موضوع ومن ضمنهن العلاقه الزوجيه المبنيه ع الاحترام والعلاقه الزوجيه المليانه مشاكل

لواء،، اغلب الحالات الزوجيه حاليا متزوجين ظاهريا
لكن منفصلين داخليا
حياتهم كلها عركات ومشاكل كثير بسبب او بدون سبب
وتشوفهم محد راضي عن تصرفات الثاني
حتى لوكانت صح
ماكو حب بيناتهم ولا احتواء ولارضا
وتلگاهم واصلين لاقصئ درجات النفور من بعضهم
ورغم هذا الشي تشوفهم مكملين حياتهم
ليش؟؟
السبب الاول لان عدهم اطفال
والسبب الثاني
لان الناس تگلهم كملو حتى المركب تمشي الخاطر اطفالكم
بس بالحقيقه عمرهم هو اليمشي
والمركب يضل واگف ويمكن يغرگ بيهم
وهيج يكون ضاع عمرهم وحياتهم واستنزفو طاقتهم
بعلاقه فاشله نهايتها مكتوبه من البدايه

اهواي حجينه حتى ماانتبهنه للوقت دنيه المغرب واذن الاذان نهض من مكانه مدلي ايده
لزمتها وگمت رجعنه للبيت لگيتهم راجعين ماشفناهم لان بجهة بيت الشيخ نخل وشجر مانشوف السياره التجي
اتلگتنه نذيره تتخازر وياي مخازر
عبرناها وفتنه صارت بوجهنه ام لواء يم المغسله اباب الحمام تتوضه كملت والتفتتلنه

ام لواء،، ضل البيت ل ام طيره وطارت بي فرد طيره

لواء،، شكو يمه؟؟

ام لواء،، طلعنه مامنين لان الخانم بالبيت تالي عايفته وطالعه لو جاي حرامي؟؟

لواء،، وانتو اشلون اطلعون كلكم وعايفيها وحدها؟
وبعدين اني طلعتها تره هي هم بشر حالها حالكم
بس لان ماتشكي ولاتحجي ماكول حگها
وشغله ثانيه حرامييش هذا اليجي يبوگ بعز النهار؟؟
لو بس تردن تحملنها ذنب؟؟

ام لواء،، والله هنيالها ادافعلها

لواء،، والله يايمه كل المصايب الجاي تصير بهذا البيت من يوم الفاتت زينب لهنا ونامت مضلومه
وفهمجن كفايه

زينب،، حط ايده على ضهري بمعنى اصعدي
تركته وصعدت للغرفه نزعت عباتي وطلعت للحمام توضيت ورجعت لگيته متوضي جوه وفارش السجاده يصلي

اخذت سجادتي فرشتها وراه وبديت اصلي كملنه التفتلي

لواء،، قبل الله

زينب،، گتله اتقبلك الله
عرفت روحي جفصت هو خرب ضحك

لواء،، ولج الفاهيه گولي قبل الله اعمالك لو منا ومنكم بس يالله ميخالف اهم شي يتقبلني الله

زينب،، يحجي وخربان ظحك لميت السجاده
گتله هاي بسيطه جا مره مات جد صديقتي ورحنه اني وامي نعزيهم بيوم الثالث مال جدها

من شافتني الابنيه عود شافت صديقتها واجت تحضنها حتى تواسيها
اجت حضنتني گتلها البقبقاء في حياتج
والله بيومها الابنيه نست حتى جدها وخربت ظحك گوه سكتتها

ف وگفت بصفها نلطم شايف انته امهات الميت يوگفن سره واحد وتجي النسوان تواجهن باللطم
اني واگفه بصف صاحبتي الطم وياها والنسوان الغربه عبالهن اني من اهل الميت ف اجت وحده باستني گالتلي البقيه بحياتج
جاوبتها حياتج البقبق

والله العظيم صديقتي عظت حجابها وانهزمت فحطانه من الظحك
جرتني الغرفة امها گاالتلي مبين ماكله دجاج اليوم لان تبقبقين من اجيتي لسه فظحتينه النسوان تتنوع بوجهونا لان نظحك من وراج

لواء،، هههههههه خرب بغيرتج رايحه تعزين لوتبقبقين؟؟

زينب،، والله موبيدي الساني يفلت واضل التم بالسالفه اتلتم الله يطيح حظك يلساني

گعدت اسولف الواء على ايام قبل وجفصاتي وهو كل شويه وطگها ظحكه اخر شي سكت فرك وجها گال اهواي ظحكنه اليوم ظحكه خير انشاءالله

بعدها گال اني رايح يم ذياب البارحه مارحت يمه
سالني اذا جوعانه كتله لا اكلت العصر

لواء،، خوش چا من اجي اجيب عشه وياي و اذا نزلتي جوه شتسمعين من امي اسكتي امسحيها بوجهي لان هاي امي حتئ لو غلطانه مانگدر نغلط بحقها بس نذيره اذا حاجتج گليلي

زينب،، هو نزل واني ظليت بالغرفه حتى مانزلت يمهن لان اكيد اذا شافني يظلن يذبن حجي لان ماسويتلهن عشه

اتذكرت لواء خطيه خل اسويله جو قبل لايلتحق بعدله يومين

اكو كارتونه مال شاشه البلازمه
حاطتها جوه الجربايه جريتها حطيتها بالگاع عندي شرشف احمر يجي ويه الديباج طلعته فرشته فوگ الكارتونه طلعت النساتل والعصاير نزلت جبت المواعين واگلاصات اثنين من المطبخ همزين هنه ماموجودات مبينه نذيره رايحه البيتها وام لواء بغرفتها اتنام من وكت حطيت الغراض بالمواعين

رتبت كلشي رحت سبحت بسرعه ورجعت قفلت الباب لايسويها الشيطان وتصعدلي نذيره وتخرب كلشي

فتحت الكنتور عندي سيتات النوم الاشتراهن لواء لسه مالبستهن بعدهن جدد بس شنو فظيحه
اربع سيتات واحد يگول للثاني انجب اني افضح منك فرشتهن ع الچربايه محتاره شنو البس
تالي گلت حبايه بخشم الخياط الخيطجن
هسه اشلون البسهن؟؟

واحد منهن طويل بس من فوگ مكشوف
الخياط الخيطه راضي الله وعباده
من جوه طويل مستور ومن فوگ الصدر طالع

باوعت للثاني لاراضي الله ولاعباده ولا الكفار
ولا البشريه شلع قلع
من الهبطه شلته رجعته للعلاگه گتله مخبله اذا البسك

تالي اخر شي اختاريت سيت لونه اسود طويل بي فتحه جانبيه من فوگ صح مكشوف بس ارحم من السيتات الباقيه
ولاانتبهت الهذا البسته
لمن وگفت جدام المرايه اتمايزه وفشلانه من روحي عبن فشله صح زلمتي بس استحي منه
درت وجهي وجان اشوف الضهر كله طاير

يبوووو عود هذا استرهن ردت انزعه اندگ الباب
ضليت افتر ارتبكت ومن دگته عرفته لواء لان من اقفله يدگ الباب بالسويج مال سيارته

تالي مالگيت روحي غير جريت عباتي لبستها فوگ الكارثه الابستها
رحت فتحت الباب دخل وسده وراه راد يحجي انتبه للترتيب المسويته راح يمه

لواء،، شني هاي ترتيب وكذا اليوم صايره تطورات

زينب،، ابتسمت ولازمه عباتي من يم رگبتي شو من صارت صدگ السالفه خفت
ردت اعبر لان بطلت اريدلي دشداشه البسها فوگ الطرگاعه الابستها
ابتسم لزم ايدي جرني احس دگات گلبي عبرن الذاك الصوب
رفع وجهي يباوع بعيوني ابتسم بطرف شفته وبانت الرصعه احس روحي تيهت العبايه عندي بدل الرصعه اثنين بس مااحسهن حلوات مثل رصعه لواء
وانوب لان صارله اكثر من اسبوع مجاز مامزين لحيته بس محددها صايره خفيفه بحيث زايدته وسامه

تيهت العبايه وتيهت روحي واگفه بصفه فرق الطول كارثه واصله المعدته جرني حضني وطاحت العبايه الگشره وفضحت المستور

بعدني عن حضنه وعيونه تتفحصني

لواء،، زينب انتي گد هاي الحركات لو ناويه تشلعين گلبي؟

زينب،، هزيت راسي بمعنى ليش

لواء،، مو الدكتوره مانعتج لو نسيتي؟؟

زينب،، دنگت مستحيه منه

لواء،، بويه والله راضي ومتحمل الخاطرج لمن تجيبين واطلعين طيبه اخذ حگي منج مربع
لان كل يوم انتضره اسجله دين اعليج
ومن تجيبين ادفعين كل دينج

هسه النه الله نصبر ونتحمل

زينب،، لواء عاقل عاقل بشكل بحيث رغم لبسي وترتيبي وهاي اول مره هيج اجهزله نفسي بس مافكر يرضي غريزته على احساب اذيتي

ردت اروح البس دشداشه منعني

لواء،، يابه گلنه كلشي ماكو لان اخاف عليج
خو مو اتقفلين علينه كلشي خلي عويناتي تشوف حلالي وتتمتع

زينب،، كعد وكعدني يمه احسه داخل بحرب اعصاب غصب عنه تالي گال

لواء،، بويه گومي البسي دشداشه فوگ الغضب الابسته تره السالفه حمت والشيطان يطگلي اصبع من ضيمه استري على روحج وع البطنج

زينب،، گمت لبست فوگ هدومي وهو بس يدردم
تالي رح نام وصاحلي
رحت طفيت الضوه وشغلت گلوب النوم
رجعت نمت يمه سحبني الحضنه باسني بگصتي

يوم عن يوم لواء يكبر بعيني اكثر احسه انسان اكبر من عمره عگله جبير دائما يفكر بعگل

ثاني يوم العصر گال جهزي ملابسي الصبح التحق
هنه مغسولات بس كويتهن وجهزتهن وخليتله ملابس بالجنطه مالته بس هاي اول مره احس گلبي مقبوض مااريده يروح

فركت صدري دخيلك ربي شو دائما يلتحق بس هاي اول مره اختنگ هيج
قريت المعوذات اتعوذت الشيطان
هدئت روحي گلت يمكن لان هاي اجازته اني وياه كلش تقربنه من بعض بحيث احسه دارسني دراسه مفصله بدون مااحجي يعرف شبيه

كملت تجهيز الجنطه اجه من شافني گال عفيه عاشت ايدج
سالته وين جنت لان من العصر طلع وهسه جزه المغرب وهو توه اجه

لواء،، جنت بشغله وهم مريت ع الحلاق زينت
جهزتي غراضج؟؟

زينب،، ياغراض؟؟

لواء،، موگتلج اخذج لهلج

زينب،، گتله خاف اهلك مايرضون وتصير مشكله

لواء،، انتي ماخذه منو؟؟

زينب،، ضليت ساكته

لواء،، مو احجي وياج؟؟

زينب،، ماخذتك

لواء،، جا لاتهتمين الواحد دام اني راضي
يالله بويه حضري غريضاتج حتى ازتج وياي الصبح

زينب،، صح فرحانه بس جاي احس اكو احساس بداخلي خانگني
حضرت علاگه جبيره بيها سحابه لان ماعندي جنطه

لواء يضل اسبوعين بالدوام يعني الغراض البثلاجه حرامات تضل
جبتلي علاگه نايلون طلعت النساتل والعصاير والشغلات الجابهن حطيتهن بالعلاگه

لواء،، شتسوين بيهن؟؟

زينب،، گتله اخواتي محرومات من ذني السوالف اخذهن الهن خطيه يفرحن بيهن

لواء،، لالتاخذين شي بيدج لهلج
انزلي انطي العلاگه النذيره

زينب،، احس روحي اتفشلت بس مابينت هلشي
وصدگ هو جايبهن الغراض فشله اخذهن لهلي

صح حزت بخاطري حجايته لان ردت افرح اخواتي بس ياالله مامقسوملهن الفرحه
اخذت العلاگه بيدي ونزلت لگيت غفران بالمطبخ
انطيتها العلاگه وصعدت

لگيته ماموجود بالغرفه شويه ودخل بيده الخاولي سبحان

بيومها مانمت للصبح اكول شيجيب باجر واروح لهلي
والله ابد ماغمضت عيني اباوع للشباج شوكت منتظره شوكت تطلع الشمس واشوف اهلي

صارت الساعه ب 7 نزلت سويت ريوگ خدرت جاي بالقوري الجبير خاف يگعدون حتى يتريگون بي
احس كلي نشاط

اخذت صينيه صغيره بيها كوب جاي وقشطه وخبزه وصعدت الواء لگيته ينشف بوجها
حطيت الصينيه وكعدت كعد يتريگ گدامي
اباوعله اشلون ياكل لگيت عيوني وحدهن سرحانات بي وبتفاصيله

لواء،، يالله يابه جهزي امورج انه نازل اسلم على ابوي وامي واجي

زينب،، هو نزل واخذ بيده الصينيه
عزلت الغرفه بسرعه وطفيت الثلاجه والاضويه
اجه هو گال انطيت خبر لبوي راح اوديج لهلج فشله مهنا يكون هو جبير البيت وانتي جنته

زينب،، ابتسمت جرني حضني حييييل ويه كل حضنه يجر نفس طوويل

لواء،، افيش

ياالله بويه تره الاوضاع صارت خطره استري علينه
وانزلي

زينب،، دمعتي نزلت مسحتها طلع جدامي بيده الجنط
حطهن بالباب طلعت جر المفتاح مال الغرفه من جهة الداخل
وقفلها كتله ليش؟؟

لواء،، اني وانتي ماموجودين عليش تضل بدون قفل؟؟

زينب،، نزل جدامي بيده جنطته وعلاگتي
ام لواء تحسها تريد تنفجر من شافتني اريد اروح لهلي صار ثمن شهور عدهم مارايحه غير مره وحده بيوم المات ابوي
اتلگتنه نذيره جايه من بيتها من طلع لواء لان اني وراه امشي ماشافها من هزت ايدها ماعاجبها الوضع

صعد الغراض واني صعدت يمه
ولاجنها المسافه بين بيتنه وبيت الشيخ كلش گصيره
ماتتجاوز الدقيقتين بالسياره
اتمنيت عندي اجناح واطير البيت اهلي

واخيرا وصلنه وگفت السياره بالباب نزلت مامصدگه
اباوع اللواء فرحانه واحس روحي بحلم لان هو جابني
باب البيت مفتوح اكيد امي طالعه تحش للهايشه من الصبح
دخلت ولواء واگف بره ماقبل يفوت گال ادخلي شوفي اهلج حتئ اطمن واروح

اسمع صوت من حويه الهايشه عرفتها امي جاي تحلبها

رحت اتخنس ودموعي تجري
وگفت بالباب مديت راسي شفتها حست بيه التفتت فتحت عيونها مامصدگه امي مو جبيره بس كبرها القهر والتعب والعوز
نهضت من مكانها وصاحت

ام احمد،، يايمه يازززنيبه
شمرت روحي بحضنها اشم ريحة محنه اشم ريحه الامان بهدومها

امي نعمه منين مااطبلها خير
امي دوله مستحه وعالم شريف
وبالعجاف تمد اديها ونركض
نعضعض بديها ماعرف من قدره الله
نشوف جف امنه رغيف
امي شجره ومايها ترباة ابوي
وعشعشن عفه وبخت بااغصانها
امي من تغندب توقع شيصير؟؟
تغندب الجنه وتسد بيبانها
امي راية وتختلف راية ضماير
امي ياعفه وشرف طاري العشاير
امي من تنگل جدمها دخيل جدها
ترابها يخضر مناير
امي من اشتاگ لله امشي اطوفنها
انحسب عد الله زاير

اثنينه نبجي بحرگه تالي بعدتني عن حضنها مامصدگه

ام احمد،، ولج يمه زنيبه منوو جابج واشلون اجيتي؟؟
زينب،، مسحت دموعي وجاوبتها رجلي جابني. اواگف بره بالباب

خطيه امي ركضت عدلت شيلتها على راسها ومحزمه بعبايتها طلعتله
لواء اتقدم سلم عليها بكل احترام ولاكان ابن هذا البيت كتل اخو رجع فتح الجنطه مال السياره ضليت صافنه تارسها ترس مسواگ كارتون عصير ونساتل وصندوگ تفاح وكارتون موز اهواي اهواي شغلات جايبهن بقيت مصدومه اتقربت يمه سالته بدهشه
شوكت جبت كل هاي الاشياء؟؟

لواء،، من البارحه المغرب وقفلتهن بالجنطه مال السياره

زينب،، امي واگفه يمي مامصدگه تتشكره
قفل الجنطه وراد يصعد رحت وگفت يمه
گتله هسه عرفت ليش ماخليتني اجيب غراضي البثلاجه
لان متسوگ مو؟؟

لواء،، لا مو لان متسوگ بس حتى نذيره ماتعيرج بهاي العلاگه

زينب،، صدمني بحجايته طلع محفضته سحب منها افلوس حطهن بيدي
جر راسي باسه

لواء،، ديري بالج على روحج وعلى ابني وياج

يتتتتتبع