رواية ضحية لمن لايرحم الفصل العشرون 20 - بقلم زهراء الحسناوي

يذاك انت
يطير الحب
يما احبك واحب اتحط
علئ سطوحي
يبس انته وتظل وحدك
عزيز منين ميعجبك تطب روحي 💔
،،،،،،،،،،،،،،،،،،،،،،،،،،

ضحيه لمن لايرحم

بقلم زهراء الحسناوي

،،،،،،،،،،،،

غصون،، نهض من مكانه متفاجه

ذياب،، اهدي غصون شبيج؟؟

غصون،، ارتديت للخلف رفعت ايدي امنعه
گتله مابيه بس وخر عني

ذياب،، غيرر اتفهميني حتئ اعرف راسي من رجليه
احجييي

غصون،، اول ما زمخ بيج بجيت وكعدت بالكاع ارجف وابجي اتخربطت واتبهذلت احوالي
لميت روحي ودفنت راسي بين رجليه ابجي بحرگه

احسه گعد گدامي رفع ايده حطها على متني والثانيه رفع وجهي بيها

ذياب،، غصون گاعد علئ اعصابي والله تدرين عقلي الف سالفه صار يحوك بس طمني گلبي واحجي

غصون،، مافهمت قصده مسحت دموعي كتله شتقصد؟؟

ذياب،، هو من غبائج هذا گلبي يرتاح
بويه بس فهميني مو گلبي ورم

شوفي قبل لتحجين اذا خايفه اتقرب منج ف راح اطمنج حتئ ترتاحين

مو اني اليفكر بهيج سوالف حتئ يرضي غريزته
الله شاهد من حبي الج ردتج يمي وكدام عيني وبس
حتئ لو كل واحد ينام وحده بس ردت من افتح اشوفج كدامي گلبي يرتاح

بس اذا اكو غير شي خايفه منه ف احجي ولاتخلين روحي تحترگ يرحم الخلفوج

غصون،،، بالبدايه اتراجعت ماگدرت احجي بس بعدين گلت خل انطي علم اني ادري يحب نور

ف گتله مامجبور

ذياب،، مجبور؟
اعله شنو مجبور؟

غصون،، عليه

ذياب،، صدگ تحجين؟

غصون،، هزيت راسي بمعنى اي

ذياب،، زين المجبور يفرفح؟
موتشوفيني مشعول شعل رايدج يمي؟

سؤال غصون بس عوفي البجي وجاوبيني
انتي من كيفج تحسين مجبور بيج.
لوسامعتها من واحد!؟

غصون،، صوتي گوه يطلع اناشغ گتله لاسمعتها

ذياب،، يمعوده والحمزه ابو احزامين شليتيني احجي

غصون،، انته موتحب نور؟
اباوعله ضل صافن

ذياب،، يانور؟
حماة عذراء؟

غصون،، رجعت هزيت راسي

ذياب،، غصون احجي كلشي واني اسمعج

غصون،، بديت احجيله عن كلام عذراء وكلام نور والرسائل وهو ساكت ماابده اي ردت فعل وكل مااسكت يگلي كملي

ذياب،، ولج تحبيني وتغارين؟

غصون،، وجهي اشتعل دنگت ضميت راسي بين رجليه
سند ادي فوگ متوني حاوطني وباس راسي

ذياب،، والحمزه احبج
لاتساليني اشلون لان مااعرف اشلون
اتعودت عليج لو شفت بيج كل مميزات الانسانه الاحلم ارتبط بيها لو گلبي من البدايه هواج ماادري
بس كل الاعرفه احبج وداعت امي

غصون،، ماحجيت بس اسمع كلامه

ذياب،، هسه گومي غرگتيني بدموعج
اني ميت جوع انتي ماجوعانه؟

غصون،، واني مدنگه جاوبته لا
نهض من مكانه اسمعه يدردم

ذياب،، ادري ماجوعانه قابل طالعين من حرب البسوس؟

هو كل تفكيري بهاي الحرب ومخططاتي راحن بالهوى وفشلن تالي صفت هدنه بيناتنه

غصون،، مافهمت شنو معنئ كلامه
نزع دشداشته البيضه علگها
بمجرد مارفعت راسي شفته بالداخليات رديت غمضت ودنگت
طگاها ضحكه

ذياب،، راح تخليني استحرم وانتي مرتي خررب بحضي

يالله يابه راح البس بنطرون وقميص وقمصله حتئ تأمنين

غصون،، اندگ الباب اشرلي بسرعه بمعنئ گومي
اجه يمي همس

ذياب،، بسرررعه بدلي ثووبج البسي غير شي ركضض

غصون،، كمت مثل ماگال ساره نقلت ملابسي بخانه من خانات الكنتور طلعت دشداشه اردان اخذتها وفتت للحمام الطابق الثاني كل غرفه بيها حمام

دخلت بسرعه نزعت وغسلت وجهي الكحله واصله البلعومي من البجي
رتبت نفسي وطلعت شفت عمتي وعذراء واگفات عمتي باستني وباركتلي دموعها بعينها

ام ذياب،، ييمه لومافشله هلهلت بس سوده بوجهي عرسكم لاصفگه ولاهلهوله بس خل ادور السنه اذا الله خلانه عدلين وواسويلكم عرس بالقاعه حتئ لوحبله تسع اشهور

غصون،، استحيت ودنگت وذياب خرب ضحك يگلها مااسوي عرس لمن جهالي يكبرون حتئ يشيلون بدلت امهم

غصون،، عذراء علئ ساعه تنفجر من شافت اخوها فرحان ومنطلق

ذياب التفت العذراء گالها

ذياب،، عذوره باجر معزومه ع الغده يمنه جيبي نور وياج

غصون،، روحي شبت نار قبل شويه يحلف يحبني وهسه يريد نور تجي

عذراء،، ضحكت گالتله اي صار والله هي تكيف تجي
ابتسملها ذياب

شويه وطلعن سدن الباب وراهن اني وجهي گلبته ميه واثمانين درجه
التفتلي

ذياب،، لو لابسه درع مواحسن؟

غصون،، ها،؟؟

ذياب،، ماكو شي بس لتنسين البسي جواريب وياج

غصون،، مد ايده فوگ الكنتور ماشاءالله بسرعه لاح الفراش نزله فرشه بالگاع
كمل التفتلي

ذياب،، بالجذب گولي تعال نام يمي لاتفرش بالگاع

غصون،، درت وجهي لان قافله من سمعته عزم عذراء ونور

ذياب،، هو هذا العرس الخابصين الدنيا علي؟
لاوالمشكله اني ضارب دقله صار يومين احلم بالاجواء الورديه تالي لاورديه ولاحمزيه

غصون،، ماگدرت اتحمل غطيت راسي وابتسمت
بيومها لاهو نام ولااني اسمعه يتحرك بفراشه
واني لان نايمه بغرفته مايجيني نوم اخاف اغفه واتكشف

بس ويه طلعت الشمس غفيت مااسيطر بعد تعبت
ونمت
ماگعدت غير من گعدتني ام ذياب فزيت مرعوبه الساعه گبالي صايره ب11الصبح

استحيت من عمتي فشله لان نمت الصبح ماحسيت بروحي

ام ذياب،، گومي يمه انزلي جوه غسلي حتئ نتغده فشله حماه عذراء اهنا

غصون،، ذكرت السالفه ضجت اول ماگعدت
گمت من مكاني كتلها هسه انزل عمه
هي طلعت واني طلعت دشداشه حلوه ومرتبه
دخلت للحمام غسلت ولبستها ونزلت يمهم
لگيت نور وعذراء بالمطبخ بس نور وجها يضحك وتشتغل ويه عمتي تسوي زلاطه مبينه كلها نشاط مدري شبيها

دخل ذياب شايل سمج شوي حطهن ع الميز
سلم على نور عافهن وراح الاستقبال

بدينه نجهز بالغدة ميته جوع بدون ريوگ والبارحه مااتعشيت من الخوف

بعد الصلاه صبينه ونقلنه الاكل بالصاله اجه ذياب گعد بس ابد ماباوعلي مدري شبي
وكل شويه يحجي ويه نور يگلها اكلي لاتستحين

وهي الضحكه تارسه الحلگ وتتنعوص

اتمنيت ارگعها بالماعون اكلت لگمتين وگمت
الجذاب البارحه يحلف وهسه يتوسل بيها حتئ تاكل عوزه يبوسها گدامي

گمت من مكاني رفع راسه باوعلي

ام ذياب،، وين رايحه عمه شكلتي؟

غصون،، شبعت عمه رايحه اسوي چاي
ذياب ابد ماحجه رجع كمل اكل واني النار تلهب بصدري وحلفت بس يرحن ارجع غراضي لجوه واليصير خل يصير

كملن ونور النادره تنقل بالمواعين وماقبلت عذراء تغسلهن اصرت اله هي تغسلهن عمتي گالتلي انتي عروس ولو مااحب اشرب الچاي. من ايدج جان ماخليتج تگومين

صبيتلهم كلهم واخذت كوب لذياب گاعد وحده بالاستقبال
لگيته متمدد يگلب بموبايله شافني ابتسم وعدل گعدته بس اني عاقچه الخلقه

ذياب،، والله اليشوف وجهج اشلون مغندب يگول عندج طلابه وياي

غصون عفته ردت اطلع گال انتضري
نهض من مكانه وگف اباب الاستقبال صاح

ذياب،، عذراء جيبي نور وتعاي اهنا نشرب چاي

غصون،، اجن يركضن ونور الفرحه ماسايعتها دخلن وهو سد الباب گالهن استريحن

حط ايده علئ متني وضغط حتئ اگعد التف هو گعد گدامنه انتجه علئ عكوس ادي

ذياب،، عندي موضوع والموضوع مخصوص النور

نور هاي جدام مرتي اني متصل بيج؟

غصون،، اباوعلها هي وعذراء بهت لونهن وحده تباوع للثانيه
رجع سالها

ذياب،، جاوبي

نور،، ل لا

ذياب،، مواعدج بشي؟

نور،، لا

عذراء،، ذياب

ذياب،، انتي صمي حلگج

كملي نور

محاجيج اني مواعدج بزواج؟

نور،، ل لا

ذياب،، قبل يومين انتي اهنا ومشوفه مرتي رساله علئ اساس مني
فهميني انتي شنو الموضوع؟

نور،،...

ذياب،، مو اني المراسلج؟
غير تحجين شكاتبب وماادري برووحي

غصون،، نور دنگت تبجي ماتگدر تحجي وعذراء لونها انخطف لان عرفت جذبتهن انكشفت

كمل كلامه

ذياب،، شوفي غصون هاي گدام نور ولوعندي شي وياها مااجمعجن كلجن واحجي وياها جدامج

وروح ابوي واول مره احلف بي
لايوم مواعدها بشي ولاحاجي وياها ولاعندي اصلا رقمها ولااريده

فيانور هلمره راح اعديها احتراما الشيبات ابوج واحتراما لخوانج لان خوش زلم ومتاكد اذا احجيلهم هيج موضوع حتئ دوام مايخلوج اداومين

وانتي عذراء من اليوم تنسين عندج اخو وقسما بمحمد اذا اسمعج محاجيه غصون بهيج موضوع ضهرج احطه بعلوه ونصه واكسره فهمتتتي

غصون،، نور طفرت ماتندل دربها تبجي لبست عبايتها وطلعت لحگتها عذراء ادردم وتبجي خلاهن اثنينهن مايندلن دربهن

اباوعله گعد ع القنفه رجع لوره وخله ادي وره راسه مبتسم مرتاح

ذياب،، هاا يست غصون صدگتي ماعندي شي

غصون،، اتمنيت الگاع تنشگ وتبلعني نهض اجه يمشي ب اتجاهي بكل هدوء

جر ايدي لزمها گومني وياه صعدنه للغرفه دخل وسد الباب وايدي بيده
كعد ع السرير وكعدني يمه
شوفي بويه اريدج هيج من يغثج واحد تجين تحجيلي واني اتصرف
وشغله ثانيه شكو شي يصير بهاي الغرفه يضل بيناتنه
اهنا نتمالخ نتعارك نتكافش تصير بالنعل بيتاتنه ايضل هذا الشي داخل غرفتنه
نتزاعل اهنا بس من نطلع نضحك ونسولف عادي فاهمه؟
لان دائما احب يكون كلشي بحياتي خاص بيه وحدي تمام؟

وهسه بعد هاي المحاضره ومرغلت روحي مالله يهديج وتحنين؟

غصون،، لسه مااعرف شنو يقصد لان اني وزينب نفس التفكير اثنينه ماعدنه سوالف انو نعرف شيصير بين اثنين متزوجين وحتئ ام ذياب من طلبت من عذراء تفهمني عذراء ماحجت شي ابد

كل الفكره الي ابالي عن الزواج انو اذا المره انكشفت ع الزلمه راح تحبل

ضليت اضرب اخماس بسداس وجسمي وحده يرجف

هو انتبه

ذياب،، نصبر بويه شعدنه امرنه لله

شويه ونزل يم امه لان صار العصر
واني هم نزلت وراه عمتي حاطه جدر حمص ع النار وكاعده بالمطبخ تشرب جاي

ذياب قبل لايطلع گال رايح اشوف لواء توه نزل مجاز
عافنه وطلع

دگ تليفون ام ذياب وجان المتصل عذراء

ام ذياب،، هاج عمه عذراء تريدج

غصون،، ضليت صافنه توها ترزلت وراحت شتريد مني بعد؟

اخذت الموبايل اول ماخليته علئ اذني گالت

عذراء،، اسمعيني زين يالفصليه
والعباس الصار اليوم اطلعه من خشمج
واخلي ذياب هو يدفرج بره بربو.......

غصون،،احس راح يغمه عليه اخاف من هيج مواقف اواحد يرزلني لو يغلط
بس الخلاني اجمد من سمعت صوتي واني اگول احب ابن عمي

اتذكرت اني حجيت هيج حتى استفزهن
بس ماجنت ادري كاعدات يسجلن صوتي

،،،،،،،،،،،،،،،،،،،،،،،،،،،،،،

زينب،، الدنيا انگلبت بالصريخ ومن ارتباكي تيهت الثوب اريد اندل منين البسه بعد مااشوف
مدري اشلون لبسته وجريت الحجاب اركض

صار بوجهي لواء طلع يركض الباب الحوش وابو وراه
كلها تركض ومااعرف شكو
طلعت وياهم بدون عبايه الباب الحوش
انتبهت نذيره وصلت النص الشارع بدون عبايه بطرگ ثوبها

كلهم راحو ولان بالحمام جنت مااعرف شكو وشبيهم رجعت للمخزن بسرعه جريت عباتي وطلعت
لحگتهم النص الشارع من بعيد اشوف سيارات شخطن طايرات اول وحده تحسها من السرعه راح تنگلب

رجليه ثگلن والساني خدر اباوع مجموعه مال نسوان بنص الشارع منجمعات ويتلاطمن

لمن وصلت وجان اشوف جنه وغفران امددات بالگاع
بس نذيره ماكو ماشفتها

كلمه مثل الطلقه اخترقت مسمعي

جنه،، رااااح جووووود

زينب،، واكفه النسوان تبجي ويسكتن بجنه وغفران هاي التدعي مابي شي وذيج التصيح ادعوله

شفايفي يرجفن احس روحي فقدت
لزمت وحده من النسوان سالتها خااله م منو مات ش شبي ج جود؟

المره جاوبتني وهي تبجي يخاله ضربته سياره باللوفه هاي هنا دائما تصير حوادث لان ركن اليجي بالسياره مايشوف اليمشي
وخطيه هو اجه يركض وضربته السياره

كعدت بالكاع مالي رجلين يعينني واكوم اوكف
الساني وحده يلهج باسم جود
اسمع صوت صايح مال موت ترس اذني حتئ من سكتن اسمع بيت الشيخ بي صايح

احس فصل دماغي وارجع انتبه الروحي دخيلك ربي كلشي ولاجود
رجعتنه النسوان للبيت لزمن جنه وغفران واني وحيدي امشي وراهن عباتي تخط بالكاع تسحل بالتراب ماادري بروحي

وصلنه للبيت صارت كبالي ام لواء شامره روحها من العربانه وكاعده تلطم بالباب

صعببب كلش صعب
حتئ من مات ابوي موهيج انصدمت
ابوي ماشايفته شهور وحتئ من توفه رجال جبير وهذا حد يومه
بس جود بعده طفل قبل دقايق هو بالمطبخ يبجي. يريد كيكه

كلمته ترن براسي

جود،، والله راح اموت ومامسويتلي ميلاد

زينب،، انگلب البيت نسوان وبجي وهوسه
اسمع مره اتگول خطيه امه من سمعت ابنها ضربته سياره اجت تركض بدون عبايه ونزعت بنتي عباتها لبستها النذيره من صعدت بالسياره

والثانيه اتگلهم الرجال الضربه نزل شاله وحطه بسيارته وصعد وياه خاله لواء من سرعتهم گلت راح ينگلبون

مااتحملت اسمع كلامهن رحت ختلت بالمخزن
بجيت من كل گلبي
عدلت كعدتي وسجدة لله عز وجل

حجيت وياه كلام حتئ مااذكره
بس اذكر اندعي بنيه صادقه لجود

اذكر گلت يارب راضيه بكلشي يصير بيه وراضيه بكل الضيم بس كون جود مابي شي خطيه شنو ذنبه؟

البيت انگلب كلها تبجي وتندعي وام لواء اتگلهم هسه جان جدام عيني

صار الليل ومحد سمع خبر والنسوان كلمن لازمه موبايلها تتصل بزلمتها اللحگهم للمستشفئ
بس محد يجاوب وحتئ اليجاوبها ماتحجي اباوع الوجوه اتغيرت الوانها مبين اكو شي

هنه ساعتين

ودگ تليفون نذيره عد جنه لازمته بيدها من جانت تتصل عليهم
ماادري ليش گلبي انقبض من سمعت صوت رنه الموبايل

اول ماجاوبت وگع الموبايل من يدها لطمت بثنين اديها صاحت

جنه،، ماااااات جووود مااااات

يتبع

،،،،،،،،،،،،،،

قسما بالله اصعب بارت عندي هذا
صح الطفل توفه ب 2014
بس مجرد زينب ذكرت الاحداث انهارت
موفقط انتم تعبكم البارت لابالعكس حتئ اني خفت

اعتبرو الصار الجود عبره الي والج
دنيه مامعروفه ومامعروف كل واحد شوكت ساعته
ف لاسامح الله اذا طلب منج ابنج او بنتج شي اكله لو فد شي بنفسه
حتى لو نص الليل جان طلبه انهضي ولتتعاجزين
الله يحفض اطفالكم ولايفجعكم
وداعت بناتي هذا الشي سببلي رهبه فضيعه
بحيث من البارحه لسه اي وحده منهن تطلب اركض اسويلها حتئ لوتگعدني بعز نومتي اگوم وياها

استودعكم الله الذي لاتضيع ودائعه

حسابات المتفاعلين

Fto_h5

lolomh420

ma_ab94

user44713080

nour103nour