رواية ضحيه_ام_جلاد الفصل الثالث 3 - بقلم أم احمد

ضحيه-ام-جلاد
ام احمد
الجزء الثاني
البارت الثالث
بين ثنايا الزمن هناك احلام ورديه تولد &
نعيش احلامنا وكلنا يقين انها ستتحقق &
عذرآ ايتها احلام الجمليه فانها لم اعرف ان من ولد متعوس لايحق له ان يعش تلك احلام&
ليس كل ما نريد نحصل عليه
وليس كل من نتمنى وجوده قريب منا يبقى الى الابد
الحياة ما هي الا لعبه تلعب بنا كيف ما تشاء تحركنا كيف ما تريد واين ماتريد&

جانت عطله وضاح شهرين خلال هاي شهرين جنت اني اخجل منه وارتبك من تصير عيونه عليه مااعرف شنو شعور الي داخلي او شلون افسره جنت استمتع بصوته من يحجي عبالك موسيقه بااذني كلشي بيه جنت اشوفه مميز وحلو
ماإن احط راسي عل مخده اظل افكر بيه صح هو مهلكد يشوفني او نلتقي بس عاش بداخلي افكاري بيه متنتهي جنت احلم بيه الفارس الي راح يخطفني ويزوجني بعدين ارجع للواقع واكول هاي راح يعوف بنات الكليه الصاكات ويباع عليج انت نص بشر ودومج مخربطه ومبهذله حتى شكلج ميشجع الواحد ان يفكر بيج اظل واكفه كبال مرايا واباع عل روحي واضل افرك بخدودي مرات يعجبني اجذب نظره بس شلون اخليه ينتبه عليه اني دومي بالمطبخ عشت هل شهرين واني روحي وعقلي كلها يم ابن عمي وراها راح عل كليته واني ظليت اسمع صوته بااعماقي وصورته انطبعت بگلبي كل ليله اشوف بااحلامي حبيته من كل كلبي
بدا موسم دراسي وبدوا وصال وحيدر وكريمه يرحون للمدرسه اني اكعد 5 فجرا اعجن واخبز ويه مرت عمي صرت اني اسوي اغلب الشغل وصارت مرت عمي تعتمد عليه بكل شي بس ظلت تكلي بنت عجميه جنت اسمع واطلع ماادير بال وصارت القاب اسمعها وحتى ملامح وجهي متتغيير مع هذا جنت حبيتهم كلهم رغم قساوتهم ويايه بس حسيت اني باانتمائي الهم جنت اتعلم هل اكدر عليه من حيدر جان اكثر واحد يحبني هو حيدر ويحاول يعلمني كلشي يتعلمه بالمدرسه اتعلمت اكتب عربي وحتى كلمات طويله تعلمتها رغم صعوبه حرف ظ عل لساني بس بديت اكوله ردت اغير لكنتي بكل طرق واحجي عربي مثلهم حته يحسون اني عربيه مثلهم&  عمي حبني هوايه اما حبوبتي من صرت اداريها كامت تحن عليه جانت مرات تصيح الي نونه تكلي احسن من اسم ناز جنت اطير من فرح لان ماكو احد مدلعني گبل &ظليت انام ويه كريمه و وصال بس اني انام بالكاع وبيوم اني جيت انام جانن يحجن بينهن
اكلج كريمه عرفتي اليوم شسمعت
شسمعتي كم مرا كتلج بطلي تسنطين
اوه هسه تردين اكلج لو لا
كولي
وضاح
شبيه
مخابر ابوي ويكله اريد اخطب
(كلبي راد يوكف من سمعت اسم وضاح )
وج عوبه انت معليج بهل سوالف انخمدي فلك طرج
اوو شكد تبيعين مثاليات
انجبي ونامي
صار
مكدرت اسكت وسالتها لوصال عن وضاح
وصال احجي شسمعتي
اهنا اثنينهن انتبهن عليه وحجن بنفس الوكت
ها ولج طلع لسانج من سمعتي اسم وضاح
لا مو هيج بس وضاح ابن عمي وافرح لفرحه
ههههههه (ضحكن اثنينهن)
(وصال) وج علينا لج لاعبالج امي تقبل عل الي بالج وتوافق عليه والله طمج انت وحيه
(كريمه)  ليش شنوو بالج عيني ست ناز
اني ماكو شي بالي ابد
وطكتها بضحكه وصال وباوعت عليه بنظره مكر وكالت ناز تحب وضاح بلحظتها اني ياكاع انشگي وابلعيني من خجل كامت كريمه عل حيله واجت ليمي وكالت
باعي انت صح بت عمنا بس مستحيل وضاح يزوجج لان وضاح يحب وحده وياه بالكليه
حسيت سجينه وانزعت بگلبي وعيوني دمعن درت وجهي عل حايط وظليت الليل كله ابجي من الي سمعته مسحت دموعي وكلت ويه روحي ها ناز مو كتلج راح يباع عليج انت مخربطه ويعوف بنات بغداد الكشخه ونفخه كتمت نفسي واتمزقت احلامي ورديه من صبح كعدت وعيوني هنا صغار منا وانوب ورمن من بجي طمسن بالزايد شافتني مرت عمي
وج شبيج خلقتج تگطع الرزق
مابيه شي
روحي غسلي وجهج وتعالي عاونيني
صار
غسلت واني اريد اخرب من هم وحزن ظليت اشتغل وعيوني مبطلن بجي انتبهت عليه مرت عمي وظلت تعوج بحلكها عليه
وج مصخمه ليش بس تتبجبجين
ماكو شي
بس لا مشتاقه لاامج
لا خاله
خلخاله تخلخل عظامج اني ناقصه كابه وانتِ مكابلتني بس تعوين
مسحت دموعي واني اشيل الخبز وادخله ليجوه صاحت عليه وج روحي كعدي ويلات عدهم امتحانات صعدت كعدت وصال وحيدر وبديت اسوي الهم ريوك ظلت مرت عمي تذب بسامير الي عل اليوم مو عل بعضي ظلت وصال تباع عليه وحست ان كلام بارحه هو سبب ظلت ساكت من راحت للمدرسه قبل متطلع كالت الي انت غلطتي من اصورت  اخويه يباع عل وحده مثلج وخلت وطلعت جان كلامها جارج بس هو عين العقل انكلبت حياتي راسنا عل عقب يمكن لان صغيره ومراهقه ومتحملت الي يصير انطويت بعد اكثر عل روحي واذا جنت احجي حجايتين صرت حتى هاي حجايتين مااكولها دخلت بالعالم من حزن وصمت وصار الليل عليه ثگيل وميمر بساع وزادت همي من خلص موسم دراسي وعرفت وضاح راح ينزل اجازه يمنا شلون راح اضبط نفسي مااعرف واجه اليوم الي يجي بيه اموري كلها اتخربطت وصارت عندي لويه وكل شويه اروح للحمام جانت كريمه وصال حاسات بيه بس ميكدرن يحجن بدخلته للبيت وسمعت صوته روحي غابت وردت اطيح بس ظليت اشتغل ومقاومه & خبصة البيت والكل ملتمه بس اني داخلي كله الم واحس بفراغ اتمنيت احجي ويه احد عل معاناتي بس منو يسمعني او يعتبرني بشر والي احاسيس & صبينا الغدا وصار لازم ادخل واشوفه ظليت ادعي من الله يقويني وعيوني مايصبن دمع كدامهم الكل موجود وكاعدين وفرحانين وبدوا ياكلون بس حيدر يفتقدني اجه عليه وصاحني دخلت وشفته كدامي بضحكته الحلوه وسلمت بلا مااباع عليه هو راسنا هلا بت عمي والله كبرانه شويه
كعدت بلا مااحجي كلمه ولاشلت عيني عليه يمكن اني ولااجي عل باله ولا حته يذكر اسمي  اكلت لكمتين وكمت مر اليوم كله اني مخنوكه مصدكت اجه الليل ودخلت الغرفه وحطيت جسدي عل فراش منهكه من تفكير لان جسمي متعلم عل شغل نمت بساع وكعدت مثل كل يوم شغل بشغل بس للعصر كبت عيطه بين عمي و وضاح وتصايحوا اني من يمي جفلت عل صوتهم من ركزت بكلامهم افتهمت ان وضاح يريد يقنع ابوه بزواجه من حضريه وابوه رافض ويكله عندك بنات عم ليش تدخل الغريبه لبيتنا جان وضاح مصر عل رايه وعمي هم وادخلت مرت عمي وصارت هوسه انتهت بطلوع وضاح من بيت وظلت مرت عمي تبجي & اني بين فرحانه ان عمي رافض زواجه وبين مقهورة لان حسيت انه مثلي يريد ياخذ الي يحبها & استمر غياب وضاح عن البيت وضل عمي معاند وظلت مرت عمي تطلع قهرها بيه ماادري ليش وره اسبوعين رجع وضاح وكال ان راجع للبغداد وحته اذا موافقتوا هو راح يزوج هذا الخبر وكع صاعقه عليه وعل عمي وعل مرت عمي
عمي ظل يتصايح وياه بس وضاح متراجع واهنا عمي كله ازوج حضريه بس تاخذ وحده من بنات عمك مرا ثانيه وره شهرين تزوج وحده منهم سكت وضاح واجه عل ابوه وباس ايده وكله اول ازوج الي احبها ومن اجيبها اهنا اني اقنعها بزواج الثاني اني حسيت روحي رجعت الي حته لو مرا ثانيه اني راضيه مهم اخذه لوضاح واعيش وياه
عمت الفرحه بالبيت والكل فرح بس اني غصه بكلبي للعصر طلعت للبستان امشي وابجي بدون هدى ولااعرف وين ماخذتني رجليه الى ان تعبت وكعدت بالكاع ابجي واكول حته اذا راد يتزوج ثانيه اكيد ياخذ غيري اني اعرف بنات عمي عواد حلوات ومرت عمي تحبهن اكيد راح تختار وحده منهن قابل تختار بنت عجميه بنص افكاري سمعت صوت يصيحني
ناز ناز وج وين موليه
انتبهت هذا صوت وضاح فزيت نفضت التراب عني مسحت دموعي وباوعت عليه
ليش انت اهنا شعندج خطر مكان عليج ليطلع الج واوي او حيه او عكرب
ظليت ساكته وعيوني بالكاع اتقرب عليه وكال
ناز انت ليش هيجي ساكته عل طول وهلمره حسيت بيج حزينه هوايه
باوعت عليه وعيوني كلها دموع ظل هو يباع عليه ثواني من تبادل نظرات حسيت بيها احله ثواني وكلي
ليش تبجين
مابيه
كولي اساعدج
محد يكدر يساعدني
تردين ترجعين يم امج
لا
جا شبيج احجي
مريضه مابيه شي غير مريضه
اجيب الج دوا
دواي مموجود بكل العالم وخليت ومشيت
وج خابيه كفي شبيج كفي شنو مرضج واجه كمش ايديه عبالك تيار مشه بجسدي ظليت اريد افلت منه ماكو
وج جا شمالج مسودنه كفي خلي فهم عليج
وكفت شتريد
شنو ليش مرضج ماله علاج
عوفني اروح
وخرت وركضت اريد انهزم مااعرف منه لو من نظراته لو انهزم من نفسي مااريد يشوف دموعي وضعفي
وره ايام من الي صار بالبستان دخل وضاح للمطبخ وكلي
ناز راسي يوجعني اريد جاي
گلبي يمه راد يوكف حسيته من ذاك اليوم هو يرمقني بنظرات مجنت اعرف احللها معقوله فهم الي بداخلي صوت عقلي يكلي ناز لاتتراسلين بااحلام وبعدين تكعدين عل كابوس
سويت جاي وديت اله وكلي تعاي اكعدي
رحت كعدت
راح اوكف وياج واحجي ويه امي علمود تخف عليج اني اعرف انت تتعبين هوايه بالشغل وراح اخلي ابوي يخليج تدرسين خارجي وتتعلمين
مااعرف شنو اجاوبه او اكول اله ظليت ساكته بهل اثناء دخلت مرت عمي وشافتني كاعده يم وضاح وانعقجت خلقتها
وووو
ام احمد