رواية دخيله بنت الشيوخ الفصل الثالث 3 - بقلم اوسار

دخيله_بنت_الشيوخ
بارت 3...
بقلمي نوره ..

صرت عزيزة ابوي بعد وفاة امي ..
انه البنيه الوحيده اله .. دللني وعززني بين اخواني
هو وحبوبتي .. حسيت بدلال ابوي بالقوه
كبرت شبيت وصار عندي من العمر 17عام

بأيلول .. بوكت كصاص التمر .. جنت امشي بالبستان
واتبختر ورافعه راسي اليفوك وماعاجبني العجب ..
كطع غروري هذا وكبريائي ... شي طاح ع جتفي اباوع عثك تمر .. صحت اخخخ .. اذاني لان ثكيل ومليان تمر .. باوعت للنخله الجنت جواهه شفت واحد جاي يكص العثوك مال نخل .
صحتله بصوت هييييه انت
ظل يباوع من فوك النخله مو كلش طويله
كال ها
كتله انزل ولك
كال هسه .. هل اخلص الكصاص
انه بركان واثور . انه يذب عليه عثك جاا اليوم موته ع ايدي ..
خلص الكصاص مالته ونزل .. تلكيته عركان ريحته كلها تمر ونخل ريحه خاصه هالكد ماحاضن النخله
ولك انت منو
انت منو
انه هاله بت الشيخ بندر ليش تذب العثك عليه
انه فوك النخله وكصيت العثك وشمرته بالكاع جا وين اشمره بعد
ماتشمره »عليه
خيتي قابل انه متعمد ...
ايي متعمد
وانت شبيج تصيحين شنو الكدامج عيب عليج انه رجال ولاتصيحين عليه
لا والله وانه مره ليش تعور جتفي
ماحاجاني راح يفتر بالبستان ويكصص بالزرع قريب مني
اجه بعد شويه انه مخوصرتله وواكفه واهز عود معصبه
هو جثه ع ركبه ونص وجايبلي باقه بيها ياس وورد ورابطهم بخوصه رفيعه ومرتبهم  كال هاج قبلي اعتذاري
حسيت روحي بفلم عربي رومانسي قديم
خذيتها منه كتله انه احب الياس والورد علمود هيج راح اخذه منك
خذيته اشمشم بي ورحت .امشي . انداريت عليه شفت جاي يعدل بالفروند .. ويباوعلي ومبتسم اسمر والعرك ينضح منه عنده كفشه  جسمه ضعيف شاب ببداية العشرينات من عمره
وكفت وصحت
گتله شسمك
سجاد اسمي سجاد ..
كتله ها ورفعت راسي بتكبر ودخلت للبيت
شي وتغير بيه .. بداخلي ..
دخلت للبيت وكل شويه اطلع واباوع السجاد من نخله النخله يكص بالتمر ..
اجه الليل وفكري يمه .. واتمنى الصبح يجي حتى اروح اشوفه ..
صار الصبح ع اعصابي .. بدلت لبست نفنوف برتقالي بي ورد ابيض ورفعت شعري .. وخليت فوكه الفوطه وطلعت بره ادور سجاد ماكو افتريت البستان كله هو ماكو رجعت للبيت
اسأل  روحي انه شسوي ادور عليه شعندي يمه
خليووولي
الصبح والظهر بقيت كله بالبيت .. احس روحي الوب اريد اطلع اشوفه
للعصر احس اختنكت .. طلعت شفته  بالبستان
ويمه هاشميه بت الحارس .. لازمه دولكة ماي وكلاص وتدك فج ويا
عصبت لا دخنت راح اثور ..
اروح اتعارك وياهه
تراجعت انه شعليه
شبيج يهاله تخبلتي
اجيس روحي صخنت ياا شسالفه اي يمته تنكشع من يمه هي الخبله. .
ردت اروح اكفشها .. كل ضحكه اطكها ويا ولاالثانيه صوتهه يلعلع
دخلت للبيت شفت فطم مرت اخويه
فطم روحي صيحي الهاشميه
ماتصيحيلهه انت
فطم روحي صيحيلهه كتلج
خوش خوش شبيج انت متغيره مو ع بعضج
ماعليج يله كدامي
يااا
بعد انتظار دقايق .. طبت هاشميه بالمطبخ وانه واكفه هاشميه بعمري .. كتلها هاشميه ليش ماشايله الهدوم من الحبل الهسه
لا والله عمه شلتهم
هاا لعد واحد من نفانيفي وصخ غسلي مره ثانيه
خوش عمه تدللين
يلا روحي تلكين بالكنتور
زين عمه ع امرج
عفت فطوم تهز بيديها وطلعت الها الساني عيبتلها
ورحت بره بالبستان .. ادور سجاد ماصار يوم من شفته بس خربط كل احوالي جان داير ظهره  هو اندار عليه وابتسم اه يااضحكته صوبت گلبي بسهام احتاريت شسوي ومااعرفت الحاله الي انه بيها ليش هيج مهتمه زايد بي ...
رحت تقربت منه ..
هلا سجاد گلتها بتكبر
هلا والله ببت الشيخ
سجااد .. اريد  ضبة ورد وياس مثل امس
هههه بس بشرط
انت ماتشرط عليه
شدعوه مايصير نشاقه ..
لا مايصير .. لو اكلك كمل شنو شرطك
بطلت هسه اسويلج ضبه
لزمته من ايده بعفويه .. جنت مستعده اسمع اي شي منه المهم اسمعه .. كتله احجي شون الشرط
ظل يباوع لايدي .. وضحك كال اصعد النخله واشكر عليج عثك ثاني ويضحك
ع ضحكته انه ضحكت .. ضربته ع ايده بخفه كتله شكد مكروه
هو ضاج وخنزر شوفي
يابت الشيخ صح انه فقير حال .. واشتغل عند اهلج بس ماارضى تتجاوزين عليه
يااعيني شدعواك جاي اشاقه بطلت ماريد ضبتك انه اروح اسويلي ضبه ويي عوووكه
عفته ورحت سويت نفسي زعلانه .. واكطع بالياس والورد .. واريد اسويلي ضبة ورد وياس وهو هم بالمقابل يكصص ويسوي
انه مادبرتها .. هو اجه يمي ويرتب بالضبه .. اخذ الورد الي بايدي وضافه علي عنده ونسقه بشكل كلش حلو وانطانيا ووياهه ضحكه
ضحكته كلش حلوه احلى مابي ضحكته يضحك بملي گلبه
اي فقير بطرك ضحكاتي التخبل والضمير ..
طبيت للبيت وهي يمر عليه الليل وفكري يمه اريد يصير الصبح واشوفه 
يوم الثاني الصبح كعدت .. شفت هاشميه عدلت هدومها يم المرايه وخذت اكل وطلعت
كلت اكيد هي راحت اله  صخام صخمها لو انه لو هي...
رحت ع السريع بدلت  لبست نفنوف احمر ساده كصيف ..
ونص ردن ..

خليت فوطتي البريسم ع راسي وطلعت ..
ادور وينهم بين الزرع .. سمعت صوتهم .. رحت اتبعت الصوت ..لكيتهم كاعدين ع الحشيش .. سجاد جاي ياكل .. وهي بصفه تباوعله وتضحك .. وهو هم يضحك .. ويسوي لگم وينطيها تاخذ منه وتتمضحك
ساعتكم سوده يالفكور لو انه لو انت هاشميه ..
اتسمعت الهم تكله سجاد تحبني سجاد
اموت عليج شعندي غيرج هشومه
لعد يمته تخطبني
بس استلم فلوسي من الشيخ وضاملي جم فلس
انه اجي اخطبج

انه هنا صرت ارجف والعبره خنكتني .. متت قهر ياصخام هذا يحبها غمضت عيوني ونزلت دمعه مني انه متعوده من صغري الشي الي اريده يصير الي يعني يصير .. ظليت افكر وافكر لازم اتخلص منها بس هسه مو وكته خلي اروح ارزلها اريد افيك كدام سجاد واراوي انه منو وهي هاشميه منو
اقتحمت خلوتهم .. وكتلها هاشميه
صاحت هاعمه
اي وعمه انت هنا وفطم تصيحلج تريدج تساعدينها
عمه عمتي فطم نايمه
دنجبييي لاتعاندين وروحي من كدامي يله
صار عمه
راحت وتتلفت السجاد ..باوعتله ضايج وياكل
گتله اسفه يمكن ضوجتكم بجيتي هي
ظل يباوعلي ويضحك ..
ليش الضحك بالله ليش الضحك
شنو ميصير واحد يضحك (بخزر)
لا بس انت جاي تضحك عليه
كام وكف .. واجه تقرب مني كال بهمس على كيفج يبت الشيوخ على كيفج تره كلنه بشر
دفعته من جتفه لزم ايدي ولواها اذاني صار يباوعلي بعيوني .. باعي بت الشيخ تره انه مو لان فقير اقبل بتجاوزاتج هي عيب المره حلاتها بثگلها وهاشميه على كيفج وياهه
وجهه قريب الوجهي ويحجي .. گتله ليش تهمك
اي تهمني ياريت لو على كيفج وياهه
اترك ايدي
تدللين اسف
عافني وراح ..
سجاد جان جريئ لو واحد غيره ابد ميتجرأ هيج يسوي وياي ..
وهذا العجبني بي بل كل شي عجبني بي
جانت شخصيته قويه .. وعرفت بعدين جان رايدهه الهاشميه بس ابوها رافضه ليش ؟؟ مااعرفت
كل يوميه ظليت اشوفه مرات مايقلدني اضوج
كلش
مره طلعت بالبستان ... شفته بس سويت نفسي ماشفته حليت شعري وكعدت بالحشيش وظليت اغني واخلي ع شعري ورد .. باوعتله شفته يشتغل ويباوعلي خليت الفوطه ع راسي ورحتله
ليش تباوعلي مو عيب .. ضحك واستمر بشغله بدون مايحجي
اريد اوصل الگلبه ماادري شلون ميته عليه واحبه ..
شلون كدر يحب هاشميه
جانت تدلل توديله ماي واكل
انه متكبره وانتر بي .. ماراح يحبني هيج لازم اتغير واغير من نفسي
غيرت طريقتي ويا صرت اضحكله وهو يضحكلي بس احس يضحك عليه رحتله
كتله ليش احسك تضحك عليه
له له له انه اضحك عليج عمي انتوا وين واحنه وين
هيج احسك
غلطانه .. 
عفته ومشيت اذا ابقى يمه كلبي يرجف وخاف اضعف واكله احبك ,...
حبيته اي حبيته من كل قلبي .. وكلما افتش عليه بروحي الگاه فارس احلامي
عدت تسع ايام ع شوفتي اله .. كعدت الصبح لكيته اباب بيتنه كاعد على الدرجات الي يم الباب
رحت اله ..
صباح الخير
وكف ع رجلي وحك براسه
صباح النور .. عمي الشيخ وين
ليش شتريد منه
رايده بشغله
كول وانه بمكانه
انتييي ااااا
اييي ليش مو بعينك ؟!
لا بعيني وع راسي هم
بسسس ؟!
شنووو ..
غلس المهم احجي وانه اكول لابوي
انه باجر لازم اروح وااا اريد حقي مال النخل يمكن الشيخ ناسي مرت 9ايام بالعاشر لازم اروح
وين تروح
اروح غير ديره
انه هنا توترت لا شنو يروح انه مااخلي يروح وغير ديره بعد وين اشوفه
كتله ابقى هنا انه اكول لابوي يشغلك هنا وماتروح
لامايصير
ليش مايصير ابوي مايرفضلي طلب انه وكلشي ييجرالي هو هيج يكول دائما
يابت الشيوخ انت ع راسي وادري بابوج شكد يحبج بس مو بكيف ابوج احنه بقانون العشاير ورحمتهم مايصير نبقى باي ديره اكثر من عشرة ايام
ليييش
الله يخليج من يجي ابوج خلي ينطيني اتعابي انه رايح ولازم باجر الصبح احنه طالعيين منا
يريد ينزل من الدرجات لزمته من ايده ظل يباوعلي كتله سجاد اكدر اعرف ليش وشنو هالقانون
مره عينه تصد لايدي الازمه ايده ومره يباوع لعيوني
كال والخاطر مكسور يمكن الوالد يكدر يفهمج انه اروح ديري بالج ع نفسج مودعه بالله
يعني بعد مااشوفك سجاد
باوعلي بعين حزينه هو هيج .. الله وياج
راح وانه كعدت على الدرجات انهاريت ابجي لاصدك راح يروح غير ديره وبعد مااشوفه كبل لااكله احبك
اخخ ياحبه صوب گلبي بسهام ملصوب جتفي بعثك
صار الليل اجه ابوي .. وكتله ع اتعابه كال اوو نسسيته هذا
طلع بره دز واحد يوديله اتعابه ..
كعدت يم ابوي ..
كتله يابه اريد احجي وياك ..
احجي ياشيخة المزايين احجي
يابه هذا سجاد يكول باليوم العاشر لازم يروح وهذا قانون من العشاير ليش
ايي هذا ابو سجاد مسويله مكسوره
والعشاير طردته وحتمت عليه مايبقى بديره اكثر من عشرة ايام لازم يبقى متنقل من ديره الديره هذا عقابه
اهها
خطيه سجاد هو استحى يگلي ..
يوم الثاني صبحت ورحت للبستان وسجاد ماكو ..
رحت يم النخله اللي التقينا بيها شفت ضبة ياس وورد خذيتها عرفت هو مبقيهه الي
مرت الايام كل يوميه اجي الهاي النخله

سميتهه عشگ ايلول .. لان هنا عشگته من اول ماشفته
مرت الايام عليه سم اتمرضت كلش ومالي خلك عمري كطعت الاكل والحجي والضحكه اختفت وصرت طريحة فرلش المرض والهم والكل متعجب على حالتي 
فكري بسجاد معقوله انه هيج حبيته بسرعه انه الگويه اطيح هيج
ماتوقعت .. ابوي ظل يعالج بيه ويجيب الي اطباء وماخله للداي دوه
بس محد طاح على علتي .. انه دواي الغريب الي كل عشر ايام بديره وين صار هسه اكيد ابتعد عن ديرتنا
بليله حلمت بي جاي ..
كمت من فراشي بالليل .. ابوي يخلي فطم لو بيبيتي ينامون يمي يخاف عليه
بليلتها جانت فطم .. نايمه يمي
طلعت من البيت .. رحت لعشگ ايلول النخله اشتاقيت الها شفت»عليها ضبة ورد وياس .. صحت سجاد بهمس وصوتي من المرض گوه يطلع ..
يتبع ..