رواية دخيله بنت الشيوخ الفصل الثاني والعشرون 22 - بقلم اوسار

#دخيله_بنت_شيوخ
الجزء الثاني 
بارت 7
أسيل ..
اندار عليه كال اشلونج ياوجع گلبي
ماتوقعته ايلول ولاتوقعت اشوفه بيوم من الايام مره ثانيه ..

أيلول ..
بعد مااعرفت اسيل متزوجه اجت على بالي كل الذكريات وياهه وحسيت بضعف وكل كلمه كالتهه صح انه تخليت عنهه وماقاومت . ابد وبسرعه تنازلت وطلكتها بس جان هذا احسن حل .. حتى تتوقف المشاكل والعركات واحسن الهه هي. . عفتها ورحت جبت غدا ورجعت رأسا للفندق وبدربي لغرفة انسام وامها .. دكيت الباب فتحوا الي .. جانت انسام متمدده ع الجربايه .. رحت كعدت يمه وخليت ايدي ع كصتهه كتلها هاا شلونج .. هزت راسهه
كتلها تكومين تاكلين. . كالت اي ..
امها كالت الله يهديج ويشفيج يمه وامي هم ظلت تدعيلهه ..
كعدنه كلنه ناكل .. وكل شويه اسألهه عن حالها ..
خلصنه الزياره ورجعنه للبصره .. وهناك وديتها لبيت امها .. بس حالتها بعدهه مو طبيعيه ماتحجي هواي وكله ساكته جانت ماتحب تشوفني بس هسه احسن وعدتها .. نشيل بغير مكان بالبيت الي انطانيا ابوي واخذ امها ويانه ..هي هم مثل امي .. وجانت صديقتها وعشرة عمر ..
بقيت كل يوم اروح الها البيت امها .. ونكعد ونسولف شويه صارت احسن وملتزمين بالعلاج الروحاني  بالقرأن .. فد يوم رحت الهه العصر .. رحت كعدت يمها بغرفتها .. بس انه ووياهه .. جبتلها حلويات وملابس .. وكعدت يمها .. اكلنه وانتجيت ع الحايط وحوطتها بايدي وخليتها ع صدري .. وبستها على راسها ..هي زوجتي ولازم اتعامل وياهه كزوج صالح وخاصة هي ماعدها غير وتحتاجني ووعدت نفسي مااتخلى عنها .. جان تكول ايلول ..
عيوني انت  احجي ..
شنو جان احساسك من شفتهه
انسام تره اسيل تزوجت وهسه ماتهمني انت تهميني اكثر انت زوجتي
شفت عيونهه ..لمعت من الفرح واحتضنتني ..
كالت اريد اروح وياك .. نرجع لشقتنه ..
لا ماارجعج للشقه اخاف عليج يله صرتي زينه ..
لعد نبقى هنا
لا عندي بيت بس يستقر وضعي .. وارتبه نروح نكعد بي ..
صدك منيلك البيت
ابوي انطانيا .. انت لاتشيلين هم شي .. يجيج الصافي بس اريدج ترجعين مثل ماانت انسام الي اعرفها ..
وانت تصير الي ايلول الي اريده ..
اصير الج كلشي تردينه
فرحت وحضنتها وبقيت .. لليل يمها وبعدين طلعت .. ورحت للبيت .  نمت والصبح .. من كعدت نزلت جوه وكعدت يم ابوي بقيت يمه اسولف .. وبينما انه كاعد طب. جعفر .. سلم على ابوي وانا رأسا كمت ..مااحب ابقى ويا بنفس المكان  كتله يابه تريد شي .. كال سلامتك .. بوست راسه وطلعت
وصلت للباب فتحته وسديتها سمعت جعفر يكول لابوي .. شعنده هذا ابن الناهبه هنا .. طبعا جنت متاكد يريد يسمعني هذا الحجي حتى يغثني ..
كمل حجي ويكول لابوي .. ماناوي تتبره منه .. تحسرت وطلعت .. ماردت اتعارك ويا كدام ابوي ..مااردت اضوجه .. طلعت من البيت .. وصعدت للشقه اخذت مسدسي .. ونزلت ردت افرغ بي كل غضبي واخوفه شويه وابين اله بان انه ماساكت اله ابد ..
رحت وكفت يم سيارته جان مطلعها بره ..
بقيت واكف انتظره الى ان طلع .. اجه صار قريب مني انه اضخم منه اخذته وسفطته على سيارته وخليت المسدس براسه هو خلس وشفت الخوف بعيونه .. كتله ولك منو ابن الناهبه تره .. ماساكت الك انه .. وروحها امي وروح ابوي .. الي ماراح يضيع دمهم هدر اله انتقم منك اشد انتقام ولك لاعبالك ساكت الك .. بس ضاملك يوم وهاليوم كلش قريب تره ادري بيك انت الواشي بامي ... انت وكلمن وراك الكم يوم يمي ..
ظل يمتمت ومايعرف يحجي .. ويقسم ويحلف مو انه ومن هالحجي . عفته كتله الك يوم بس مو هسه ..
عفته وصعدت بسيارتي .. ورحت اشتغل وي صديقي عنده مكتب عقارات .. لان بديت اعتمد على نفسي وابتعد عن اخوان الشيخ تمار ..
مرت كم يوم .. وانه بالشقه وبالليل .. اجاني اتصال .. جاوبت كال انه جعفر ..
اي وشتريد
تره الخانك منك وبيك ..
شنوو شجاي تكول ..
اي زوجتك الطلكتها هي الوشت بيك .. وفتنت على امك .. وعندي دليل ..

انه ماصدكته وظليت اسبه .. واغلط عليه وسديته بوجهه .. وشمرت التليفون ..
ورحت تمددت ع جربايه وانه افكر مستحييل اشك باسيل ولانسبة واحد بالميه ..  بس هو كال عنده دليل شنو هذا الدليل ..
ماتحملت بقيت بشك .. وعيوني ماخذت نوم ابد للفجر بالاربعه يلله نمت .. كعدت على صوت التليفون جاوبت الوو وانه نعسان ..
انسام .. الو هاا حبيبي وينك
ويني بعد بالبيت
تدري بيش الساعه هسه
لأ بيش
ساعه 11
الله صدك
اي ليش شنو
ماكو شي
يمته تجي مو ع اساس تجي ع نتغده سوه
اي .. بس أجليها نسمه ماكدر اجي ..
ليش شبيك لاتخوفني عليك
لاتخافين حبيبي .. حسبه ابالي تخلص وينتهي كل شي ..
اشو عيدهه بعد مره
ولج حسبه ابالي ..
لا كتلي حبيبي
اي حبيبي ليش انت مو حبيبي
حلوه بلسانك
نوب دوم تسمعيهه
ياريت .. يعني هسه مااتجي ..
لا مااجي خليهه غير يوم عندي شغله اريد اخلصها. .
زين حبيبي دير بالك ع نفسك
وانت هم ماشي
ماشي الله وياك
سديته منها وكمت .. اتصلت بصديقي واعتذرت لان ماداومت ..
ورحت بدلت وشربت جاي وحبايه راسي مصدع
اجت على بالي انسام .. وشون فرحت من كتلهه حبيبي خليت ايديه راسي وره. . وظليت احاسب نفسي .. وشنو هي بالنسبه الي .. احبها لو جاي امثل عليها لو على نفسي ماادري ..
سحبت التليفون .. وخابرت جعفر كتله اريد اشوفك تعال كال تدلل .. اجيك وين مايصير ..
كتله تعال للشقه .. كال خوش ..
انتظرته ربع ساعه اجه .. صعد فوك وكعدنه كتله اسمعك جعفر .. احجي شنو الدليل على اسيل. .
كال زوجتك جانت خايفه كلش من ان تنفضح فاجت النه .. وكالت اريدكم تصيرون واسطه وي خالي وابوي حتى لايكتلوني وي عمتي خاف يعرفون كل شي يصير انه خايفه ..ومااريد اكضي حياتي كلها بخوف تعبت .. احنه جنه مااندري هي تصير بت خالك .. هي كلتلنه .. واحنه ساعدناهه
كتله جذاب .. هي التمثيليه ماتمشي علي اسيل مستحيل تسويهه
عندي دليل مو كتلك عندي رقم تليفونها .. وحجي بيني وبينها .. هاك هذا التليفون .. وشوف الرسايل اخر مره شلون جانت تسأل على ابوها ..
خذيت التليفون منه وكلبت بالرسائل قريت هواي جانت تكله يمته يطلع ابوي واحنه مااتفقنه .. هيج ليش ابوي راح اعدام .. ومن هالحجي وكاتبتله عندي دوام مااكدر بعد اجاوب .. عرفت رجعت تداوم الرسائل جانت هواي وكلها تثبت بان صاحبة الرقم هي الواشيه ..
راح جعفر وانه ماصدكته . بقه الرقم يمي ماادكيت عليه لان ماصدكت .ولااصدك التفكير والتعب والحيره كلها بيه . قررت اروح لكليتها ..
ورحت للعماره ووصلت للجامعه .. ودورتها ومن صدك لكيتهه .. راقبتها من بعيد دكيت ع الرقم .. وشفتها جاوبت على تليفونها .. حجت وسمعت صوتها وحجيت وياهه .. عرفت صوتها
الشي بقه محيرني .. كلش معقوله اسيل هيج تسوي تعبت كلش .. بقيت مراقبها اريد اواجهه خاف ترفض تواجهني ماكو غيرها اخذهه .. لمكان واجبرها تعترف ..راقبتها كلش زين وحتى راقبت .. الخط مالتها وكبل لايستعد حتى يروح عليهه شفته واكف بمكان .. وخليت مسامير جوه سيارته وبنجرتها خليته يدك ويلطم ..
ورحت على اسيل .. السياره جنت مخلي عليها اشارة التكسي .. شفتها طلعت واشرتلي . ورحت الها وطلعت بيها .. خذيتها بطريق خارجي ظلت تصيح نزلني .. مو هذا طريقي .. بعد مااشفت الطريق امان ومحد يشوفنه اعلنت عن نفسي كتلها
شلونج ياوجع كلبي ..
ايلول وين موديني ..
من جنت اكلج وجع كلبي ماجذبت
ايلول رجعني عفيه
وكفت السياره .. ونزلت منها ورحت فتحت الباب اليمهه جريتهه من ايدهه ونزلتهه بالكاع طاحت بالارض
اسيل ..
متت خوف منه مااحسيت بقربه بالامان ابد فقدته من زمان .. طحت بالكاع .. كعد يمي وانه منتجيه ع السياره .. حاولت احمي نفسي بايديه .. كتله ايلول اتركني انه هسه متزوجه ..
ظل يضرب بالسياره برجله وبايده هذا الهامج فرحانه انت متزوجه .. عبالج علمود هذا الشي .. جايج

شتريد مني ايلول
ولج انه تخونيني .. ولج انه تغدريني
ليش تكول هالحجي ايلول ماصار هالشي والله
انت رحتي كلتي لبيت عمي على امي وقرابتها منج
والله ماكتلهم مستحيل شون اكول الهم وادمر حياتي بيديه
ولج شفت رسائلج بعيني وي جعفر ..
ماصار هالشي .. والله
خمط جنطتي وطلع تليفوني ودك عليه
ظل يصيح بوجهي .. ولج بعيني شفتهم بعيني منو يستخدم تليفونج غيرج
هزيت راسي وانه مدنكه متت خوف والله مو انه ايلول والله ماوشيت بعمتي مستحيل اسويهه وانت بكيفك بعد .. هي انه يمك ومحد يدري انه وياك اكتلني واشمرني مااهتم الشي بعد ..
ايلول ... كمت من يمها .. ابتعدت عنها خطوات باوعتلها وهي كاعده بالارض وتبجي بهستيريا طولت بنضري الهه كتلهه ماادري ليش مصدكج اسيل . ماادري .. جريت نفس .. رفعت راسي للسما وحكيت شعري حسيت ع روحي انه شجاي اسوي .. شجابني عليها معقوله اشتاقيت الها وجبتها هنا لان مستحيل اشك بيها .. اخخخ جعفر مره وشيت بامي وهسه تريدني أذي اسيل .  لا ماراح انطيك فرصه ابد ..
كمت عليها لزمتها من ايديها وطببتها بالسياره وهي منهاره .. بس تبجي ..
وصعدت بالسياره ومشيت ..
اسيل ..
ماادري شبي وشنو سامع معقوله يشك بيه ماصدكت ابد .. الطريق كله ابجي ماسكتت ..
والدنيا صارت ليل .. والتليفون مابطل دك .. ماجاوبت
تعبت كلش حسيت راح اخرب . بقينه ساكتين الطريق كله الى وصلت للبيت .. دخلت راسا طحت بالباب ..

اجت امي وروان اخذوني ودوني للغرفه وللجربايه نمت وجنت .. كلش تعبانه وحتى مابدلت تلفلفت ونمت واسمع امي يم راسي .. تبجي عليه ..
وروان تعصر بيديه .. وبراسي .. واسمعها تكول راح اخابر رافد .. بقيت حالتي حاله كوابيس تجيني وحتى حسيت نفسي بعالم ثاني ..
يوم ثاني اجه .. رافد .. جنت نايمه بالغرفه .. كعدت شفته كاعد يمي .. وجهه مايتفسر ابد ...
كال شبيج ..
هزيت راسي .. ماكو شي
لاتجذبين عليه سمعت كل شي .. تره .. سمعتج تكولين ايلول وتهذين وتكولين رجعني للبيت انه متزوجه كولي شبي وياج انت موصرتي زينه امي تكول وصلتي بالليل متخربطه احجي شون صار ..
كمت من الفراش .. وقرفصت روحي وبديت ابجي هو تقرب مني مال هي اخر فرصه احجيلي شنو .. تره تعبت منج كافي ماصارت هي .. ولج شغل الدنيا عندي ومن عرفت بحالتج جيت بسرعه زين من اندليت دربي ..
ظليت اشهك كتله ايلول .. يتهمني بان انه .. الي .. وشيت بامه .. واخذني من يم الكليه بدون ماادري والله رافد ماادري هو ابو الخط كال مااجي نزلت للشارع اجر تكسي .. وهوو كبالي صار وصعدت ماعبالي هو وحجيت اله كل شي بعد ..
رافد تقرب مني .. ورفع راسي ليفوك كال اذاج سوالج شي كتله لا لا بس خوفني وشمرت روحي بحضنه بدون وعي .. حضني قوي كال حقج اخذه انه اعلمه رفعني من حضنه كال اخذه هسه كبل باجر
كتله رافد
خله اصبعه  على حلكي .
كال اششش وين تليفونج اخذ رقمه
اشرتله على مكان تليفوني ..

رافد....
انه رافد .. عمري 27سنه مهنتي هي طبيب .. فتحت عيني ع الدنيا امي هي مرت عمي وابوي هو عمي ابو اسيل ..
لان ابوي كاتل وعادمينه وامي متزوجه وابد ماسألت عني
جانت مرت عمي ماعدهه جهال وبعمر 7سنوات صار عدهه بنيه واول مااجت للبيت .. خلوهه بحظني كالوا جبنالك عروسه احنه ربيناك وتعبنه مااريدك تاخذ غريبه.. بقت ابالي هي العروسه .. وكبرت اسيل بس بعمري مافكرت اتقرب منها جنت اعتقد .. اخليهه للزواج احسن حلو الحب يجي بعد الزواج بس بداخلي اكن الها مشاعر ..
بعد مادخلت للكليه وانه تخرجت .. فد يوم جان اكو سايق شاب يوصلها شفتهه امثر من مره تضحكله شفت بعيونهم الحب قررت ابتعد شويه شويه وادفن حبي الهه بداخلي
جنت كلش اكره العادات والتقاليد الي تجبر البنت على الزواج من ابن عمها او شخص ثاني
وهذا الي ماردته يصير وي اسيل ..ماردتها اتزوجها غصب ..
من تقدم الها ايلول .. تاكدت من حبهم البعض .. وقنعت عمي يخليهم يتزوجون .. وتزوجوا ..
وصار الي صار وتطلكت اسيل..
تمرضت فتره جنت اسمعها تهذي باسمه كلش تالمت
وبيوم اليردون يخطبونها الباسم امي كلتلي
كلت مستحيل اضيعها مني هالمره بس ابد ماحبيت اجبرها على شي وبقى حبي الها بداخلي . .
عبرت عن حبي الها بغير شي .. ساعدتها تتعالج واعتنيت بالعائله كلها مو حبا بيها هي وبس لا وانما هي عائلتي ولازم اهتم بيها
من خابرتني امي وكالت علي صار بيها .. ماتحملت ورجعت الها ..
سمعتها تهذي عرفت صاير وياهه شي ..
رحت الهه .. وجبرتها تحجي ماتحملت
اخذت التليفون وخابرت ايلول دك التليفون جاوب
الوو
لك لاياجبان .. انت شون تسوي هيج بزوجتي موتك على ايدي ..
انت منو ماافتهمت ..
انه رافد زوج اسيل
وهسه شتريد رافد
اذا انت رجال تعال واجهني
اي رجال ونص .. وين ترريد اجيك
تعال نصفي الحساب ايلول تعال بهذا المكان ..
اي نصفي حساب سنين .. ثار ابوي الكتله ابوك .. يله رافد جايك ..
يتبع
ايلول Vsرافد 😂😂منو يغلب
بنات بارتين للنهايه حبيباتي تحملوني لان والله جاي اتعب .. 😘😘😘احبكم