فارسي العاشق الفصل السابع وأربعون 47 - بقلم بسمة البياتي

_ فارسي العاشق _
( بقلم بسمة البياتي)
_البارت الاخيررر _

فز باوع عليه شكو شبيج

ريتال... متعرف شبيه هاك شوف حبيبة الگلب شدازتلك

هشام اخذ الفون يقرأ فرك وجها بيده

هشام... ريتال ماكو شي بيني وبينها وانتي شفتي بعينج هي الدازتلي واني ممجاوب

ريتال... اذا ممنطيها عين مجلب بيك

هشام... ريتتتتال سدي حلكج شنو منطيها عين
لزمت الفون اتصلت علبها

بسرعة جاوبتني

الج انتييييي صدك وحدة متستحين ششششنو هاي السخافة الدازتها ليش تخليني اجي على ابوج واخوج واشوفهم رسائلج

سارة.. هشام والله احبك ما أكدر انساك فدوة ارجعلي والله مستعدة اتغير علمودك

ريتال.. جريت الفون منه وعطت بيها لج ياحقيييرة مسوية روحج برنسيسة وخشمج مرفوع للسماء وانتي كلج على بعضج وحدة دايحة

خرب بعدني ممبردة گلبي بيها سدتة بوجهي

سكرنت المحادثة ودزيتها الفوني
علنت الحرب على هشام كاعدة مدلغمة اشكد حاول يراضيني واني ما أرضى

كاعدة بالمطبخ وحدي معاندة ما ادخل للغرفة

هشام.. راح تبقين كاعدة اهنا

ريتال... درت راسي مجاوبتة

هشام.. لا اله الا الله هو قبل جنتي طكة ونص هسه بسبب هرمونات الحمل صرتي مخبلة رسمي

ريتال... كمت بعصبيه فتت من يمه واني شايطة من الغضب دخلت للغرفة اجة وراية وهو يضحك بصوت عالي

اخذت بطانية وطلعت ظل صافن عليه

رحت للهول تمددت على التخم

هشام... لج بابا شششبيج ترى طلعتي روحي حرت شسويلج حتى ترضين امشششي رجعي للغرفة اني انام اهنا

ريتال.. روح ومعليك بيه ما اتحرك من مكاني

هشام... لاتعاندين ظهرج يتأذى من نومة القنفة انتي مو متريدين تنجمعين وياي بمكان واحد روحي للغرفة واني ابقى اهنا اريد اشوف لوين تصفى وياج

ريتال... والنبي ما اتحرك روح اريد انخمد

هشام... اني على شنو حارك دمي ابقى بس من هسه اكولج اذا وكعتي من التخم وصار شي على الطفل لاتلومين الا نفسج

ريتال... عافني وراح حضرتة خايف على الطفل مخايف عليه

مرتاحيت بالنومة المكان ضيق تكسرت كمت شغلت البلازما اخذت الريمونت اگلب بالقنوات مليت ماكو شي حلو

درت قناة شفت بده فلم أجنبي ظليت اتفرج عليه بالبداية احداثة عادية بعدين عرفت بي رعب صرت لا اكدر اعوفة ولا اكدر اكملة كلما تطلع لقطة تخوف افز من يمي واظل اتلفت الفلم يحجي عن مكان مهجور قبل جان مصحى للأمراض النفسية والطبيب والممرضين يمارسون ابشع طرق التعذيب على المرضى راحوا مجموعة يستكشفون المكان من دخلوا انسد الباب عليهم وكامت تطلعلهم ارواح المرضى والطبيب والممرضين ويقتلوهم

من الخوف كمت اغم نفسي طيح الله حظي اكو وحدة زعلانة من زوجها ونايمة وحدها تتفرج رعب امده حظي هسه اقتنعت بنفسي اني عقل معندي

خلص الفلم واني قطرة دم مبية من الخوف كمت اخاف اغمض عيني لا من افتحها اشوف الارواح كدامي تلفلفت بالبطانية حاولت اقنع نفسي واكول هذا تمثيل هو مجرد فلم وكلهم ممثلين يعني شي مو حقيقي غمضت عيني دقائق سمعت صوت طكطة برا الشقة كمزت من مكاني الا شوية اوكع من القنفة

شلت بطانيتي وكمت هي مال زعل وكرامة بهل ليل اروح انام بعرفتي اشرفلي

مشيت على رؤوس اصابيعي فتحت الباب على كيف بگلبي اتوسل بالباب حتى لايطلع صوت

مشيت على كيف تمددت على السرير وتغطيت هشام نايم على بطنة ورايح بسابع نومه

شوية اطمئنيت غطيت راسي واخذتني النومة حلمت الطبيب بيده شفرة اجه يريد يذبحني فزيت مرعوبة جسمي كلة يرجف من خوفي كمت ابجي

تقربت من هشام حركتة بيدي حتى يكعد
فتح عينة
حجيت ويا واني ابجي كوم اكعد

من سمع صوتي ابجي كعد مفزوع

هشام... شبيج ليش تبجين شنو يوجعج

ريتال... خايفة مجاي اكدر انام

هشام... من شنو خايفة اشو تعالي اخذتها الحضني

ريتال.. نمت بحضنه من الخوف حاضنتة قوي ودافنة راسي بصدره

هشام... كافي حبيبتي اني يمج لاتخافين اذا انتي مو كد النومة وحدج شكو صرتي برأسي فاندام

ريتال... لاتظل تحجي عليه هسه كولي شسوي نعسانة واخاف انام لا هم يجيني الدكتور

هشام... عقدت حواجبي لزمت راسها رفعتة
منو هذا الدكتور

ريتال... الي بالفلم حلمت بي يريد يذبحني

هشام... ليش فلم شنو جنتي تتفرجين

ريتال... رعب

هشام... هاي صدك تحجين يوم بعد يوم دتثبتيلي انتي صدك ناقصة عقل
حامل وتتفرجين رعب ليش مستهينة بروحج ومتخافين على نفسج و على البطنج

ريتال... كافي ترزل بيه ترى اني مناقصة مجنت ادري بي رعب ومن عرفت مكدرت اتركة ردت اشوف شيصير بالنهاية

هشام... اوووف منج اني قبل لا انام باوعت عليج شفتج دنتفرجين فلم عبالي فلم عادي عفتج ورجعت نمت

ريتال... اكولك صح هسه اني نايمة بحضنك بس مو معناها اني تراضيت وياك هذا الوضع مؤقت الحد ميطلع الصبح

هشام.. هههههههه ترى اعوفج وهالمرة اني اروح انام بالاستقبال

ريتال... خبيث

هشام... بستها كافي حبيبتي كبري عقلج كتلج معندي شي وياها ليش متصدكين

ريتال... مصدكتك بس جاي اموت من الغيرة لان تعرف رقمك اخاف هم ترجع تراسلك
هشام اذا عندي خاطرك يمك غير خطك

هشام... صح كل اقاربي واصدقائي والمعارف يعرفونة وبرامجي كلها عليه بس ولايهمج راح اغيرة حتى ترتاحين

ريتال.. حضنتة وبستة بصدرة ربي لايحرمني منك حبيبي

ثاني يوم كعدني هشام من الصبح

هشام... كومي اخذج الاهلج ومن ارجع من الدوام اجي ارجعج

ريتال... رغم مقفلة بس كمت بسرعة مستحيل ابقى بالشقة وحدي بعدها احداث الفلم برأسي

على السريع غسلت ولبست صاية وشال وطلعت ويا

و صلني البيت اهلي نزل وياي ظليت ادك بالباب ماكو احد اتصلت على رؤى الخاتون نايمة اجت فتحت الباب من دخلت جوة يلا راح هشام

رؤى... هاي شجابج من الصبح شنو حلمانة بينا عاااا ولج اخاف زعلانة

ريتال... اسم الله شنو هذا الفال من الصبح
محبيت ابقى وحدي جيت اهنا
لعد ماما شوكت راحت للدوام

رؤى.. قبل شوية

ريتال... دخلت الغرفتي صحت رؤى كتلها تعالي نامي يمي

طلت تضحك اتكولي صايرة جبانة

نمت ساعة عشرة ونص اجت رؤى كعدتني

رؤى.. كافي نوم تعالي نتريك سوى وهم اكو موضوع اريد احجي وياج بي

ريتال... كمت غسلت وكعدت اتريك وياها
اي ست رؤى شنو هو الموضوع

رؤى... برتباك هااا ما ادري شلون اكوله الج

ريتال... احجي بدون مقدمات ولاتشلعين گلبي

رؤى.. تذكرين من جنا بالحلة من حجبتلج على زميلي البغدادي الأسمة منتظر

ريتال.. رفعتلها حاجبي اي شبي

رؤى... هو حاجي ويا صديقتي وكايللها تحجي وياي وتجس نبضي تشوف اذا هو راد يتقدملي راح اوافق لو لا واهلي ينطوني الغير محافظة لو هم لا

ريتال... اي وانتي شكلتي الصديقتج

رؤى.. مممم كتلها اذا اهلي وافقوا اني معندي اعتراض
هو كايل خلي تسال اهلها لان صعبة نجي من طريق طويل ونتفشل اذا مقبلوا ينطوها

ريتال.. مممم وتريدني اتي احجي ويا ماما موو

رؤى.. هزيت راسي بمعنى اي

ريتال... اوك من تجي ماما افتح وياها الموضوع

رؤى راحت تنظف اتصلت على هشام حجيت ويا بعدين سديتة

اخذت الفون دخلت الغرفتي قفلت الباب طلعت رقم عمتي ام هشام اتصلت عليها

عمتي.. الوو هاي شعجب متصلة خوما صاير شي

ريتال... اهدي عمة لا الحمدلله ماكو شي بس عندي موضوع اريد احجي وياج بي واريدج تساعديني

عمتي... شنو الموضوع قلقتيني

ريتال... حجيتلها على مسجات سارة وعلى الصورة
عمة الله عليج ترضين بهذا تصرفها اني البارحة من قهري حتى وجع صار عندي ومن القهر جان صار بالطفل شي لا سامح الله

عمتي... اشكد طايحة حظ اني اعلمها خلي توكفلي تريد تهجم بيت ابني والله لاسوي سواية بيها وبامها لا صارت ولا دارت هاي امها احسن ما باقية تتبها بيها كدام الرايح والجاي خلي تكعد تربيها
وانتيييي شكوو مقهورة وماذية روحج ديربالج على الجنين مفهووووم

ريتال... ماشي عمة اعتمد غليج فدوة وهسه راح اذزلج السكرينات مال المحادثة شوفيهم بعينج

دزيتلها السكرينات عمتي كامت تفور وتتحلف بسارة وامها هههههههه ميجيبوها غير نسوانها

الظهر ماما اجت من الدوام تفاجئت من شافتني سلمت عليها
استغليت الفرصة رحت حجبت وياها قبل لايرجعون بابا ويزن

ماما كالت اذا خوش ولد شكو بيها بس لازم احجي ويا ابوج واخذ راية

اجة هشام من الدوام راد ياخذني ماما جلبت بي يبقى على الغدى
تغدينا اني ويا ورجعنا للشقة

بالطريق هشام يباوع عليه ويبتسم

حبيبي باوع كدام لاتروح تسوي بينا حادث

هشام... اليوم شعندج متصلة على امي

ريتال.. هههههه شلون عرفت

هشام... هي اتصلت رزلتني اتكولي ليش متغير رقمك لو صاير بالبنية وبحفيدي شي من ورا سارة

ريتال... هههههههه فدوة الگلبها

هشام... اي اضحكي شكو عليج صاير عندج خوش دفاع

ثاني يوم

ريتال.. رؤى اتصلت عليه كالت ماما حجت ويا بابا وهو كال اذا خوش ولد شكو بيها نسال عليه وبعدين خلي يجون

واكفة بالمطبخ اسوي غدى
صارلي كم يوم رجعت اني اطبخ رن فوني غسلت ايدي واخذت الفون الاتصال من بابا خير ياربي مو من عوايدة يتصل بيه هيجي وقت

الووو هلو بابا

بابا... هلا بنتي شلونج

ريتال.. الحمدلله بخير شنو انت مو بالدوام؟

بابا.. بلي بالدوام اتصلت بيج عندي بشارة الج

ريتال.. خير ياربي شنو هي

بابا... تعينج طلع

ريتال... بعدني لهسه ممستوعبة كلامة حسيت گلبي راد يطلع من مكانة من الفرح
بابا الله عليك تحجي صدوك لو تشاقة

بابا.. بله بربج عايف شغلي ومتصل حتى اشاقة اكيد صدك قبل شوية صديقي، خابرني وبشرني خطية بالكوة مرتبها ألج بس الوظيفة مو ضمن اختصاصج

ريتال... فدوة اروحلك هذا احلى خبر عادي حتى لو مو اختصاصي المهم اسمها وظيفة وبدائرة حكومية

بابا.. رتبي وضعج وكولي الهشام لان لازم خلال يومين تباشرين بالوظيفة

ريتال... من كال كولي الهشام حسيت بخوف يربي بس لا يرفض نهيت الأتصال

فرحتي تحولت خوف وقلق شراح اسوي اذا هشام رفض

اجة هشام راح سبح وبدل حظرت الغدى وصبيت كعدنا ناكل

هشام... عمري شبيج اشو مو على بعضج

ريتال... هااا لا مابيه بس

هشام... اي بس شنو

ريتال... اليوم بابا اتصل عليه كال الوظيفة القدمت عليها طلعت والازم اداوم
جنت احجي واباوع على وجه هشام

هشام... زين ليش تحجين وانتي خايفة ومرتبكة

ريتال... حجيت بنكسار خايفة ترفض ومتقبل اداوم

هشام... اهااا وليش ارفض قابل انتي مسوية شي غلط لو حرام لعد انتي ليش درستي وتعبتي غير حتى تتوظفين
حبيبتي لاتنسين امي وخواتي موظفات انتي شنو فرقج عنهن
بس شغلة وحدة قالقتني انتي وين تكدرين ادوامين بهذا وضعج كل شوية تتقيئين وكاضية نهارج كله دوخة ونوم

ريتال... لعد شلون اذا ما ادوم تروح مني الوظيفة حبيبي هسه اني دخلت بالشهر الثالث لازم اتحمل بس هالشهر وراها وضعي يصير عادي

هشام... برحتج حياتي اني علمودج والله

ريتال... فرحت بكلامة كمت حضنتة وبستة

استلمت الوظيفة وبديت اداوم اطلع الصبح ويا هشام ومن يخلص دوامي يجي عليه نرجع سوى

جنت اتعب هوايه وبالكوة مسيطرة على نفسي الصبح من اطلع من البيت بس اشرب كلاص حليب حتى لا تلعب نفسي وبطل الصودا ميفاركني

بنفس الغرفة البيها مكتبي اثنين موظفات واثنين موظفين كلهم اكبر مني

ست ساهرة اكبر وحدة من اول يوم داومت شلعت گلبي صارت متتحرك من مكتبها كلما تريد شي تكومني اني عبالك اشتغل يمها
جيبي هذا الفايل ودي هذا روحي لفلان قسم صيحيلي فلان

استاذ سعيد يكوللها خطية تعبتي البنية اتكوله اني اريدها تتعلم علينا وعلى الشغل وتتقوى علاقتها بجميع الموظفين والموظفات

لان جديدة ما اكدر اكوللها لا على اي شي تطلبة مني
واستحي اكوللها حامل ادوخ اظل كل شوية كايمة المكان

حجيت الهشام عليها رزلني يكولي ليش تخليها تستغلج هاي راح تتعلم عليج لازم تصيرين قوية وتوكفيها عد حدها

بابا سأل على الولد الرايد رؤى والكل مدحوا بي انطى الجواب موافق كال خلي يجيبون المشية ويجون
ولان طريق طويل راح يسوها هم عقد وهم تلبيس حلقات بس بدون حفلة لان جدو مصارله هواية من مات
. اني وهشام من الخميس رحنا بتنا بيت اهلي لان المشية الجمعة

ثاني يوم عماتي من الصبح اجني رؤى رتبناها بالبيت مراحت صالون

جنا بالغرفة اني وبنات عماتي نرتب رؤى

نغم.. اكولج رتولة انتي صدوك زعلانة من رهف ومتحجين وياها

ريتال.. اي صح

نغم.. ياااا ليش هذاك اليوم اتصلت عليه لان هي جانت ويانة بالمجموعة مالت الفايبر وتعرف رقمي

حجت وياي وهي تبجي اتكول ريتال و رؤى تغيرا عليه وميحجون وياي

ريتال... حجيت النغم على سوايتها بدوكان

نغم... عزااا بعينها اشكد متستحي واني الفطيرة مقهورة عليها

ريتال... وهي اصلاً شكو خابرتج

نغم... سالتني عليج وعلى اخبارج كتلها ملتهية بالدوام

ريتال... عفيه بالسباعية يعني كتيلها ريتال توظفت

نغم... بصراحة اي سالت وين توظفت كتلها اسم الدائرة

ريتال... الله اي وبعد شغردتي

نغم... لا بس هلكد حتى مكتلها انتي حامل

ريتال... بقت على هاي جان كتيلها

نغم.. لا خفت عليج من عينهم

ريتال... دخلن نور وايات للغرفة سلمنا عليهن

ايات كالت عمي وعمتي كاعدين ويا اهلج روحي سلمي عليهم

اجوي اهل منتظر واقاربة تمت المشية والعقد ولبسوا الحلقات

صارلي شهر كامل من داومت حياتي طبيعية دخلت شهر الرابع من الحمل بطني شوية برزت مو هوايه

ست ساهرة بعدها مستلمتني اشغال شاقة واني مثل الثولة شتكولي اسوي والحد هسه محد يعرف اني حامل

خلص دوامي طلعت من الدائرة هشام ينتظرني برة

مشيت مسافة حتى آروح السيارة هشام لمحت من بعيد سيارة مو غريبة عليه ركزت زين عزااا بعيني هذا فارس راد يصير بيه سكتة قلبية من الخوف مسافة قليلة بين سيارة فارس وهشام ما اعرف شلون كدرت اوصل للسيارة واصعد

صار عندي مغص من الخوف راد يصير، عندي اسقاط

هشام.. حبيبتي شوفي شلون تعبانة اذا متكدرين اداومين ليش تضغطين على روحج

ريتال.. مابيه حيل اتناقش ويا بس كتلة تعبانة وصلني للشقة

من رجعت من الخوف حتى اكل ما اكلت بس نايمة بالفراش

العصر طلع هشام يسوك

اتصلت على رؤى كتلها اليوم شفت فارس واكف يم دائرتي هاي اكيد سوالف رهف العار هي كايلتلة

رؤى.. الله يصخم وجها هسه اتصل عليها واطيخ حظها

ربع ساعة رجعت رؤى اتصلت عليه

رؤى... هاي الحقيرة هم سوت روحها بريئة وطلعت اعذار، نفس كل مرة اتكول جنا كاعدين اني وعمتي ورغد
رغد سالتها عن اخبارج اني كتلها ريتال متوظفة شمعرفني راح يوصلون الكلام الفارس

ريتال... الله لاينطيها هسه اني شسوي ولج گلبي راح يوكف من الخوف

رؤى.. اني هددت رهف كتلها اذا بعد فارس اجه راح اكول البابا وخلي شيصير يصير

كالت لا اني راح اخلي مؤمن يحجي ويا وبعد ميخلي يروح عليها

ثاني يوم بالكوة داومت مابية حيل ودايخة من التفكير والقلق وخايفة لا اليوم هم يجي

عندب شغل كاعدة اكملة جنت بالكوة فاتحة عيني

ست ساهرة... ريتال اريدج تاخذين هاي الفلوس مال سلفة تنطيها الست امال مكتبها بالطابق الثاني

ريتال... لا هاي هوايه زودتها هو اني راسي ما اكدر ارفعة من الدوخة وهاي تريدني اصعد درج

حاوبتها اعذريني ما اكدر اصعد للطابق الثاني وربي كولش دايخة

اشو هاي گلبت خلقتها اتكولي هي خطوتين شدعوة عليج

غلستها مجاوبتها قبل انتهاء الدوام بساعة اترخصت من استاذ سعيد حتى اطلع لان وضعي ابد مو تمام كال عادي طلعي

اتصلت على هشام حتى يجي يرجعني

ظليت كاعدة انتظرة هو متعود من يجي يتصل عليه حتى اطلعلة اليوم تفاجئت شفت اجة للقسم مالتي

كال السلام عليكم الكل ردوا جانوا يباعولة بستغراب

استاذ يونس كالة تفضل اخي شمحتاج

سعيد.. هههههه هاي شعجب انت اهنا

هشام راح سلم عليه استغربت هذا منين يعرفة

هشام.. هههههه جيت اخذ زوجتي مجنت اعرف انت مسؤول قسمها

سعيد... لاتكول ريتال هي زوجتك

هشام... بلي هي مو جنت حاضر عرسنا وشايفها

سعيد... هههههه والله ممنتبة يعني طلعت ريتال بنت رافد

هشام... اي بنتة

سعيد... ابوج شلونه صارلي هوايه مشايفة

ريتال... الحمدلله زين

استاذ سعيد ظل يحجي ويا هشام واني بالكوة واكفة اخير شي ترخصنا وطلعنا رجعنا للبيت للعصر شوية صرت احسن

هشام... ليش متروحين الدكتورتج تجيكين وضعج

ريتال... موعد مراجعتي مو هسه بعدكم كم يوم

ثاني يوم داومت ست سلوى ويانة بالقسم

ظلت تاخذ وتنطي وياي بالكلام

سألتني كالت البارحة شكلج جان مبين تعبانة اخاف حامل

ريتال... ابتسمت كتلها فعلاً اني حامل جنت خجلانة لان موظفين ويانة استحي احجي بهيجي موضوع

سلوى... ياروحي ربي يتمملج على خير

ريتال... تسلمين حبي

سلوى... هاي بعدج بالبداية الله يساعدج راح تتعببن هوايه

ريتال.. لا هسه احسن من قبل

سلوى.. بستغراب ليش انتي بيا شهر

ريتال... دخلت بالرابع

حجت ست ساهرة مبين اذنها يمنا
يعني من اجيتي انتي حامل ادري لعد ليش مكلتي واني مخليتج رايحه جاية

ريتال..عادي مصار شي

من خلص الدوام طلعت هم شفت فارس جيت اتخبل هذا شيريد مني

العصر طلبت من هشام ياخذني الأهلي

من رحت حجيت البابا على فارس كتلة الكيلي حل هذا يريد يهجم بيتي

بابا تخبل اخذ السويج وطلع

للساعة ثمانية يلا رجع عرفت بي رايح البيت عادل وفارس جاي هناك ومتعارك ويا وعادل هم متعارك ويا فارس
وكايل البابا لاتخاف بعد شحدى يوصل يم دائرتها

ومن راجع رايح البيت جد رهف مأخذ من جدها رقم ابو رهف متصل عليه حاجيلة على سواية بنتة الرجال منخبل باقي يعتذر من بابا كايل اني الها بعد شحدها تدخل بحياة بنتك

من هذا اليوم اختفى فارس ورتاحيت منه

راجعت دكتورتي اطمئن على وضعي سويت سونار عرفت جنس الطفل حامل ابنوتة
فرحت كولش وحتى هشام فرح يكول احب البنات
بيومها جنا بايتين اني وهشام بيت اهلي باليل دنتعلل ماما كالت الرؤى جيبي البومات الصور خلي هشام يشوف ريتال من جانت صغيرة

رؤى راحت جابت كومة البومات كعد هشام يتفرج

هشام. هههههه من هي صغيرة باكثر الصور زعلانة ودمعتها بعينها يعني من هذاك الوقت ام دميعة

ريتال... جاي تصنف مو

هشام... هههههه لا والله تخبلين ياريت بنتنا تطلع تشبهج

جان اكو كيس، ورقي بي صور بامن فتحة طشر الصور من شفتهن انكصيت بالنص صور حنتي من فارس

هشام عقد حواجبة جمع الصور وظل يتفرج عليهن والمصيبة اكو صورتين مال عرسي

وجه هشام انگلب جان مركز على صور العرس ويباوع على فارس البيت صار هدوء باوعت على ماما بعتب

ماما.. ابني هشام الله يشهد جنا ناسيهن والله لو مذكرتهن جان من اول دقيقة حركناهن

بابا.. يزن اخذ الصور احركهن ولاتبقي منهن شي

هشام... عادي مصار شي معذورين سبحان المبنسى

ريتال.. صح هيجي حجى بس اعرف بي ضاج

وهو ابد مفتح وياي الموضوع

دخلت بالشهر الثامن بطني كبرت جنت اتعب من اقل حركة
ماما ورؤى جهزوا البنوتي

رؤى عرسها بعد ولادتي

جنت بالدائرة خلص الدوام هشام اجة عليه متعود من يجي يدخل للدائرة لان اكو كم درجة يساعدني من اصعد وانزل

طلعنا اني ويا دنمشي نروح للسيارة اشو هذا وكف
شبيك ليش وكفت اندريت على مكان نظرة
فارس واكف لوبيدي اكعد الطم بالشارع فارس يباوع على بطني وشكلة مصدوم

لزمت ايد هشام قوي فدوة اروحلك امشششي نفض ايدي من ايدة يريد يروح الفارس

هشام لا فدوة

هشام.. امششششي صعدي للسيارة

ريتال... فارس من شاف هشام يريد يجي عليه شغل سيارتة وطلع

هشام.. العاررررر انهزم اليوم احرك عششششيرتة

ريتال... سحبني من ايدي وصعدني بالسيارة

اجه صعد وهو يسب ويلعن اول مرة اخاف منه شكلة جان يخوف من العصبيه

هشام... شخط السيارة قوي يمشي سريع
لج احجييييييي هذا ششششجابة وشلون يندل دائرتج

ريتال... جنت خايفة من عياطة ما اعرف شجاوبة

هشام.. اجاوبينييييي ليششش ساكتة هاي مو اول مرة يجيييييي مو

ريتال... حسيتة راح گلبة يطك من العصبيه يحجي ويضرب على الستيرن

هشام والله العظيم هاي رهف مدليتة اجة مرتين واني كلت البابا وراح تعارك ويا اذا متصدكنب اسال بابا

هشام.. واني طرطور متكوليلييييي لو محاسبتني رجال وممالي عينج لج تشوفيني اتعامل وياج بالحسنى ومراعي الله بيج عبالج اني معندي شخصية وجبان وما اكدر احميج
من توكعين بمشكلة لو احد يتعرضلج تلتجأين الأبوج طلع ابوج احسسسسن مني هو الياخذ حقج ويسسسسسندج

ريتال.. لا والله مو هيج بس خفت منك اخاف تتعارك وتصير سالفة كبيرة وحياتي تنهدم

هشام... ااااخ الله راح اخذج الاهلج اذا تبقين يمي ائذيج والله

ريتال. كمت ابجي بشهكة الله لايوفقك فارس دمرتني

وصلت البيت اهلي نزلت بسرعة ادك الباب بكل قوتي
يزن فتحه مستغرب فتت بسرعة

تلكتني ماما
شبيج ريتال ليش تبجين

ريتال.. فدوة طلعي على هشام احجي ويا راح يصير بي شي من العصبيه

ماما. ولج احجي شكو

ريتال... شاف فارس يم الدائرة

ماما.. عزاااا عافتني وطلعت تركض

دخلت الغرفتي ماظل بيه حيل كعدت على السرير

دقائق واجت رؤى كالت دخل هشام جوة يريد ينتظر بابا حتى يدلي على بيت فارس

ريتال... لطمت على خدي عزااا عزاااا سترك ربي

رؤى... اهدي اكيد من يجي بابا راح يحجي ويا ويهدي

ريتال... ولج شيهدي انتي مشفتي شلون صاير نار من العصبيه

اجت ماما يمي
كالت مو زين لاظلين خايفة لاتروح تصير عندج ولادة مبكرة والطفل اذا انولد بالثامن نادرا يعيش

ريتال شلون ما اخاف وهو يريد يروح يتعارك

اجة بابا خطية فوك تعبة انوب مشاكلي على راسة ماما حجتلة وكالتة روح احجي ويا وهدي

بابا كعد ويا هشام اني وكفت قريب من الهول اريد اسمعهم شيحجون

هشام قافل يكولة هسه اريدك تاحذني البيت هذا السكط

بابا.. هسه بس كوم غسل ورتاح وعد اخذك ونروحلهم العصر

هشام.. شششلون تريدني ارتاح واني النار مشتعلة بصدري واحد واكف علمود زوجتي عرضي وشرفي وتكلي اهدء

بابا.. مثل ماهي عرضك هي عرضي ولا عبالك راح هالمرة اسكت الهذا النذل
اوعدك العصر، نروح

ريتال... صخام هذا بابا شبي وين يريد ياخذة ماما ادخلي احجي شي

سمعت هشام كال لعذ اني رايح ساعة واجي عليك واذا متاخذني قسماً اني اطلع عنوانة لو اعرف من جوة الكاع واروحلة

العصر بابا اخذ هشام وعمو مصطفى وراحوا

جنت ميتة صار عندي خفقان بگلبي من الخوف

المغرب رجعوا بابا وعمو مصطفى بس هشام مو وياهم ظلت عيوني ادورلة

بابا دخل الغرفتة لزمت عمو من ايدة فدوة عمو احجيلي شصار

مصطفى.. لاتخافين مصار شي تعالي كعدي واني احجيلج

رافد قبل لانطلع اتصل على شيخهم كالة راح نجيك واريدك ادز على فارس وعادل

سالتة ليش تريد نشوفة يم الشيخ كال علمود هشام اخاف بس يشوف فارس يسويلة مصيبة ويروح بيها لان من شكلة ناوي على كارثة

طلعنا واخذنا هشام من دخلنا البيت الشيخ فارس وعادل موجودين

هشام اول مشاف فارس هجم عليه وصار المضارب بفلس تعبنا نريد انفكهم مانكدر

ريتال.. كمت ابجي عزاا وبعدين شصار

الشيخ عاط بيهم وزلم من برا اجوي فاككوهم بس والله رجلج طلع بالف زلمة خرب غيرتة بالكوة لزموا

هشام.. عووووفوني امووت هذا الناقص لك يا عارررر يا انذل اذا بعد المحك باي مكان حتى لو صدفة ادفنك وانت عايش ياعديم الشرف

فارس.. محد عار غيرك مكيف وانت ما اخذ وحده ماتحبك لك هي الاخر لحظة جانت تريدني بس ابوها ما انطاها

هشام سمع كلام فارس رجع هجم يريد يضربة ولزمنا

رافد... صدك انت ناقص حرامات هاي الشوارب التارسة وجهك
شنو نسيت ريتال من رفضتك كدام الكل وهذا شيخكم شاهد

الشيخ. صخ البنية بنفسها كالت ماريدو

هشام.. احترامي الك شيخ وللموجودين بس اني طالع لان ميشرفني ابقى بمكان واحذ ويا هذا السكط
واكولها كدام الكل اذا بعد جبت طاري عرضي على لسانك لو وصلت يمها امحيك من الوجود

هشام عافنة وطلع انوب ابوج تعارك ويا عادل وفارس

الشيخ شبع فارس رزايل وكاله بعد اذا وصلت يم البنية واجتني شكوى عليك اطردك من العشيرة

هذا فارس صاير خبل تصرفاتة مو موزونة عبالك عقلة مو براسة

ريتال.. دخلت الغرفتي واني بدون روح خفت اتصل على هشام لان متعصب ويمكن يجرحني بالكلام

ثاني يوم مداومت جنت مريضة بالفراش
يومين اني بيت اهلي وما اعرف شي عن هشام

اتصلت عليه اكثر من مرة مجاوبني دزيتلة هوايه مسجات اخير شي جاوب كاتب
الخاطر ربج هسه عوفيني لان ما اضمن نفسي اذا شفتج او حجيت وياج شراح اسوي لو شراح اكول

من قريت كلامة طكيت بجي عرفت هشام كرهني وهاي المرة الثانية راح افشل بحياتي

وهاي الطفلة راح تكون الضحية

بابا كالي عوفي براحتة وبعد لاتتصلين عليه

احتاجبت ملابس لان عندي دوام وما اكدر البس من رؤى علمود بطني

ماما اتصلت عليه كالت نريد ملابسها
بسرعة كال تعالوا اخذوهن راح اعوفلكم المفتاح يم الجبران

بهذا تصرفة معناها يريدني اطلع من حياتة

رحت جبت ملابسي اما ملابس بنوتي اكثرهن بيت اهلي لان هما جهزولها

اهلة عرفوا زعلانين امه وابو اجوي يرجعوني بس الغريب هشام محاجيلهم عن سبب المشكلة كايللهم تعاركنا اني وياها وهي رفعت صوتها عليه واني اخذتها البيت اهلها

بابا كاللهم جيتكم على عيني وراسي بس اذا ميجي هشام بنفسه ما أرجع بنتي

صارلي شهر يم اهلي دخلت بالتاسع هشام لا اجه ولا سأل دوام اخذت اجازة

اليوم طول الليل كاعدة عندي وجع يروح ويجي متت اريد بس يحي الصبح

ساعة ستة طلعت من غرفتي بابا وماما بالمطبخ

صباح الخير

بابا وماما..صباح النور

ماما.. وجهج اصفر وذبلان

ريتال.. طول الليل منايمة عندي وجع

ماما.. يااا وليش مجيتي كعدتيني يمكن راح تصير عندج ولادة اليوم

بابا... اذا صارت عدها ولادة خابروا مصطفى يجي ياخذكم للمستشفى

ماما.. هشام هم لازم ننطي خبر

ريتال... رفعت راسي على ماما على شنو تنطي خبر صارلة شهر مسال وانتي بكل بساطة تريدين تبلغي
هشام معنده شي يمي غير بنتة من اولدها بالسلامة يجي اهنا يشوفها حاله حال الناس

بابا.. صح كلامها من تولد ان شاء الله وتكوم بسلامة اذا يريد يجي يشوف بنتة اهنا

راح بابا للدوام اني اخذت ملابس رحت سبحت الوجع كام يزيد

الساعة 11 الظهر بعد متحملت كمت ابجي بابا خطية اخذ اجازة واجة حتى هو ياخذنا

ماما اتصلت على عمة غيداء تجي ويانة

رحت مستشفى اهلي ظليت اتوجع من ساعة 11 الساعة وحدة الظهر يلا جبت فرفحت من الألم

من انطوني بنوتي بيدي حسيت وجعي وتعبي راح ماما عيونها مورمة من البجي

وبابا خطية هم خايف

غيداء.. هاي الحلوة شراح تسميها

ريتال..لمار

بابا كبر باذنها و سمهاها لمار

صحتي وصحت بنوتي جانت زينة ساعة ثلاثة طلعوني من المستشفى ورجعنا للبيت

لكيت عنماتي كلهن ابيتنا اجني بوسني واخذن لمار من ايد ماما رؤى حانت متخبلة عليها

مخليلي سرير بالهول تمددت جنت تعبانة ونعسانة

رؤى.. هاي ليش هيجي صغيرة لعد بطنج مو جانت شكبرها كلت هسه راح تجيبيها شسمنها

داليا.. المهم صحتها زينة بعدين اكيد راح تسمن

سوسن.. سجى خابرتي زوجها لو بعدج

سجى.. هسه اتصل على امه اخليها هي تبلغة

ريتال.. من التعب غفيت ما ادري اشكد نمت
كعدت جان اكو اصوات يمي ظليت مغمضة ركزت بالصوت. هذا صوت ام هشام ونور

فتحت عيني لكيتهم كلهم جايين
ايات ميادة منار تبارك

من شافوني كعدت اجوني بوسني وتحمدولي بسلامة

أم هشام... اني زعلانة منج

ريتال.. ليش عمة

ام هشام... ليش مقبلتي يبلغونة قبل لاتولدين

ريتال... لاتزعلين المهم هسه انتوا يمي

ام هشام... هشام برا صيحوا خلي يجي يشوف بنتة

ريتال... من كالت برا گلبي دك سريع ما اريد اشوفه مقهورة منه

دخل هشام
ميادة.. تعال شوف بنتك اشكد حلوة من يكبرون ولدنا راح انظل نتوسل بيك حتى تنطينياها

هشام... خلي اشوف ام بنتي اول مرة

ريتال... درت راسي اجة كعد بطارف السرير، لزم ايدي سحبتها منه

هشام... لزمت راسها بثنين ايدي ودرتها عليه غمضت عينها

همست ادري زعلانة وحقج بس وربج نار الغيرة دمرتني خفت ارجعج للبيت واجرحج بالكلام لو ائذيج

ريتال... مغمضة ودموعي تنزل باسني من ايدي واني ابعدة عني

هشام... بداعت لمار فتحي عينج

ريتال... متحملت كمت اشهك
الكل طلعوا من الهول عافونة وحدنا

فتحت عيني جنت ابجي بقهر انت مجاي عليه جاي علمود بنتك
شنو السويتة واستاهل هيجي تعاقبني عفتني باكثر وقت اني محتاجتك بي

هشام... حضنتها فدوة رحتلج كافي والله جنت معاقب نفسي مو معاقبج حياتي جحيم بدونج

ريتال... اني هم حضنتة وابجي ما اكدر ابقى زعلانة منه هو هم حقة صعب الموقف النحط بي

هشام... مسحت دموعها وبوستها بكل مكان بوجها احبج ريتالتي اموووت عليج

ريتال... اني هم احبك
هشام ظل حاضني ويبوس بيه كتلة كافي روح شوف لمار شنو گلبك مرف عليها يريد يشوفها

هشام... ههههههه من احضنج انسى الدنيا

ريتال. صاح عليهم يجيبوها كلهم رجعوا دخلوا

هشام... ولج هاي شكدوتها ليش هلكد صغيرة
بستها براسها اويلي تنكرط كرط

هههههه باعوها برطمت بس لا تطلع مثل امها ام دميعة

رؤى... هي مبينة وارثة جينات امها لان كل شوية تتنعوص وتبجي

ريتال... منار كاعدة يمي لزمت ايدها
وربي بعز المي واني بصالة الولادة دعيتلج من كل گلبي، الله يرزقج بالذرية الصالحة

منار كامت تبجي فدوة اشكد گلبج طيب الله يسمع منج ان شاء الله

ريتال.. طول الفترة البقيت بيها يم اهلي حتى يداروني هشام بقى وياي متركني

حبي الهذا الأنسان يزيد يوم بعد يوم شحجي وشكول قليل بحقة فعلاً الله عوضني بي

هشام متعلق بيه وبنتنا مثل الطفل اليتعلق بامة

بعد فترة رؤى ازوجت واستقرت بحياتها

اني حياتي مستقرة بين زوجي وبنتي ودوامي صار عمر لمار سنة
واكتشفت اني حامل اني وهشام مجنا حاسبين حساب هذا الحمل ردنا لمار شوية تكبر يلا نسوي طفل ثاني بس هذا رزق والحمدلله وعرفت راح تجيني بنوتة ثانية

اهلي موجودين الحمدلله دومهم عون وسند الي ربي يحفظهم

علاقتي بعيالي قوية احبهم ويحبوني

منار وعصام سافروا سوو طفل انابيب ونجح وحاليا عدهم ولد

هاي نهاية قصتي

صح حبيت فارس وجنت مجنونة بي بس بافعالة طلع من قلبي اعرف فارس حبني لكن بطريقة مؤذية
بساعة غضب مستعد يهدم كل الحب ويدوس عليه

اني لوما اهلي جان رجعتله و حياتي بالضيم يم زوج شكاك وعيال يكرهوني وحتى وظيفة مجان توظفت

هشام هو فارسي الحقيقي
انسان واعي ومثقف صح يغار ويزعل بس
مفديوم مد ايده عليه. عنده ثقة بيه عايشة ويا احلى حياة

باحر ان شاء الله اكوللكم ليش سميت القصة فارسي العاشق هسه تعبت من الكتابة

غلسوا اذا اكو سحك

اتمنى تكونوا استمتعتوا بالقصة تحياتي الكم

بسمة