رواية فَجيـعه الدَهر الفصل الخامس 5 - بقلم Hind Al taay

#فجيعة الدهر 🦅🪶
بقـلم الكاتبه هِند الطائي
تصويت+ تعليقات بين الفقرات

الحـلقه العاشِره

ـــــــ
زينب الحوراء

التفت إلي بصدمه وتوسعت عيونه بفرحه مسح وجهه ما مصدك وركض الي بلهفه وهو يگول بشكل متكرر:
ــ صدك ؟ حوريتي شو باوعيلي شمالج استحيتي ولج ريحي گلبي

دفعته وابتعدت شوي وگلت بهدوء:
ــ اي موافقـه اتزوجـك

حـار شيسوي سجد بالگاع يحمد رب العالمين وگام لزم ايدي يرجف رجيف بحيث ايدي ترجف وي أيده سحبت ايدي وگلت بتوتر:
ــ شبيك هُشيم حرام

ــ اروحلج فدوه لا ماللزمج بعد خلاص باجر نعقد لا هسه اجيب الشيخ يعقدلنا يلا تحضري

گالها وراد يطلع صحت :
ــ هُـشيــــم !

التفتلي بلهفه وگال :
ــ عيونـه حـاله وماله أمري؟

ــ شسمه شبيك مو هسه بعد وكت يعني خلي نگوللهم وهيج شبيك مستعجل

ــ راح اطير من الفرح ولج انا شايف النسوان يگولنها هسه أنا گلتها

ضحكت شكله ضحكني ضحك على ضحكتي وگال:
ــ چا شوكت نعقد؟

ــ بعد اسبوع .يعني الجمعه خليها

فتح عيونه بصدمه وگال:
ــ شنــووو؟ اسبوع شنو لج بابا هو باجر ما اتحمل انوب اسبوع ؟
ماكو عندج أكثر شي لباجر جهزي نفسج ومعليج أنا اگللهم

ـ هزيت راسي بقبول ابتسملي فرحان وطلع
اول مره اشوفه هلگد فرحان گعدت على الجربايه افكر قراري صح لو خطأ ؟ بس هذا القرار اتخذته بدون تفكير
ـ بس فكرت ماعندي أحد لمنو اروح لخالي؟
الي اصلا مادري يستقبلني لولا لو لمنو؟
ـ هنا كل شوي واحد ذابلي كلمه افضل هشيم هو يدافعلي وإذا فترة الخطوبه شفت شي غلط فورا اگله أفسخ الخطوبه
ـ بقيت كاعده لحد ما اندفع باب الغرفه فزيت خايفه وباوعت لكيت البنات كلهن تسطرن
باوعتلهن كلهن متخوصرات كلت ببرائه:
ــ هـا عمري تريدون شي؟

أنا گلت هيج وميسنه ندلعت:
ــ ليش تضمين عليـه هسه ينزل هشيم اخوي ولج اخوي يگللنا حضروا نفسكم باجر أعقد على زينب ليش تحبين اخوي وتضمين عليه أخ گلبي خيانات من كل مكان شسويلج ها هسه شسويلج؟

متت ضحك عليها باوعت على الي بصفها نيروز گالت :
ــ ها الج عين تباوعين وما تحجين فوگاها هيج صارت زوزي؟

انداريت على فيروز كتفت أيدها زعلانه ودارت وجهه و فداء ورهفاء يضحكن فرحانات گلت بضجر:
ــ شبيكم تره قبل كم يوم اعترفلي و قبل ساعات قبلت و هاهيه فدوه اريدكم توگفن وياي شسوي ماعرف

ضحكن كلهن واجن بصفي ميسنه گالت:
ــ خلي نقسم الاشغال

نيروز: اني عليه شغلات العقد والماي ورد وهسوالف

ميسنه: واني عليه الصالون والحجز

رسيل: الشعر على ذوقي

رهفاء وفداء وفيروز:  هم نرتب وياكم اي شي ناقص

گلت بفرح:
ــ كلش شكرا بنات

ابتسمن گالت ميسنه:
ــ تعالي اگول لهشيم نروح للصالون من الصبح باجر

عقدت حاجبي مستغربه وگلت:
ــ ليش؟

ــ علمود يسوون الج غسل وتشحيم يبدلون البطانه من جديد

ضربتها بخفه على كتفها وگلت :
ــ لا ماريد اي شي

گالت رسيل بهدوء :
ــ لا حبيبتي شلون هيج غير أنتِ اول عروسه من بيت عمو رافد ولعزيزنا هُشيم
بعدين لازم تتحضرين خوما ترحين مبهذله وتعقدين هيج مابقى وقت اصلا هسه صارت دنيا عصر

ــ تمام بكيفكم

هزن راسهن ما مقتنعات فجأة صار عياط جوه ركضنا جريت شالي ورحت وي البنات نزلنا شافتني هاي مرت ابو هشيم گالت وهيه رافعه حاجبها:
ــ نزلت المسعده ها ولج كوشتي على هشيم ؟
ما صارلج كم شهر

ــ شبيج خاله؟

ــ وخلخاله تخلخل عظامج يا حيـه  شبسرعه ولج شبسرعه خليتي هيج مستقتل عليج يا ام السحوره

دمعت عيوني نتر بيها هشيم:
ــ وانتِ فد قندره شعليج؟ خلي اسمعج مره ثانيه تغلطين على زينب الحوراء اشيلج اشمرچ للچلاب تنهش بلحمچ الظاهر خرفيتي

كال عمي حكيم:
ــ هشيم عيب ولك ، بعدين امك صدك تحجي ما چذبت ليش تريد زينب الحوراء ومنين تخطب البت إذا هيه ماعندها أهل

نزلت دموعي مختنگه ومسحتها بسرعه ، كلش نهضمت من هل كلمه ' ما عندها أهل '
گال هشيم :
ــ أنا اهلها واخطبها من كنان اخوها

گالت ام هشيم:
ــ اها هسه فهمت تريد تستر عليها لأن لگو ضـرغام نـايم وياها

فتحت عيوني بصدمه راد هشيم يروحلها تخبل شلون يلزمها ورفدان والولد لازمينه وهو يصيح:
ــ ولج بـر*** عبالج كلها مثلج ام الظلم تردين اذكرج لولا خرفتي ها أنا اعلمج كتلتج على أيدي جلدج يحكج

ــ هاي لأن حجيت الحقيقه امداك اثول زعطوطه مشتك

تخبل حاير شلون يلزمها يريد بس يكضها صرخ بوجه رفدان:
ــ ولك عوفني خلي اموتها هل بـر*** هاي
اسمعوني كلكم زينب الحوراء اشرف من الشرف وانا هاويها واخذها اخذها واصلا اجيت ما أخذ رأيكم بس انطيكم علم

گال عمي حكيم :
ــ لا ما تتزوجها اخلي ضرغام يتزوجها يستر عليها حتى الحجي لا يصير على ابني

ـ انصدمت من كمية الحقاره هسه طلعت الوجوه الحقيقيه كل هذا بس لان هشيم يريد يتزوجني مو معقوله وليش هلگد نافرين زواجنا ماعرف هشيم دفع رفدان بقوه وشال الطبله كسرها بالجام ويشيل ويكسر حتى انا خفت من عنده يصيح بكل قوته لدرجه شرايين رگبته برزن:
ــ ولكم وانا صغـــير متعلعلل وهسه تردون تعلعلوني بالزايد ليــش حتى بهااااااي؟
وگفتوا بطريقي وحق اخت العباس إذا ضرغام خطه خطوه بهذا البيت قبل ما نعقد أنا وزينب ذبحه على أيدي وغصبا ما عليكم اخذها اخذها ديلاااا اشوف يا گـ*** و گ*** يطلعلي ويگلي لا

گالها وطلع باوعتلها خزرتني جرتني رسيل وگالت:
ــ تعالي حبيبتي

اخذتني للمطبخ گعدت صافنه احس حتى بجي ماكدر ابجي عيوني مابيهن دمع بعد صافنه بالفراغ رسيل حاولت تخفف عني من شافت ماكو نتيجه سكتت شوي ودخل كنان باوعلي وعقد حاجبه بأستغراب اجه يمي وگال:
ــ شبيها روح أخوها ؟ منو مزعلها؟

بس گالها بجيت وحطيت ايدي على وجهي احس صدك محتاجه هل سؤال شبيج زينب منو وياج ليش زعلانه حضني يمسح على ظهري ويبوس براسي وهو يگول :
ــ شبيج ياروح اخوج منو حاجي وياج بيج شي؟

لازمه قميصه وابجي لدرجه قميصه تبلل احس نهد حيلي صح صغيره بس كل هذا عليه ماكدر ماكدر اتحمل ، بقيت على هل حاله لحد ما حسيت نفسي هديت شويَّ رفعت راسي باوعلي بحيره وعيونه حُمر وگال:
ــ شبيج حبيبتي احجي !

حجيتله كل الي صار حتى من مرت ابو هشيم حجت عليه بس ما حجيتله من هشيم اعترفلي بس من خطبني ، جر كرسي وكعد يمي حط أيده على خدي مسح عليه وگال بحنيه:
ــ أنا اعرفج كلش زين ما تغلطين وما تجي منج العيبه وادري بيج ما تغلطين بسالفه هشيم وانا اعرف هشيم خوش زلمه وصاحب مسؤوليه وانا مجربه بهواي مواقف وهواي شغلات صغيره وجبيره صايره كدامي واعرفه
يبقى القرار الج سواء قبلتي أو ما قبلتي بكيفج وأما هذول الي يتسمون عمام مالج دخل إذا تقبلين غصبا ما عليهم يوافقون وإذا ما تقبلين هم بكيفج فـ هسه أنتِ شقررتي ؟
بدون جذب بصراحه..

مسحت دموعي وگلت بصوت ناصي مستحيه:
ــ لمن حجه وياي هشيم گتله موافقه

حجيتها ورفعت راسي اشوف ملامحه معصب لولا من شفته عاقد حواجبه گبل غير ملامحه وابتسم وگال:
ــ زين ليش وافقتي؟

ــ ها يعني ما اوافق؟

ــ لا حبيبتي بس اريد تكلي الأسباب ليش وافقتي على هشيم

ــ لأن حباب

ضحك وگال :
ــ بس؟

ــ لا هو حباب وما يصيح عليه هم

ــ شحده لسانه اگصه بالمنشار

ضحكت ابتسم على ضحكتي وگال:
ــ ابقي ضحكي لا فد يوم تبجين ما طول أنا يمج بعد ، أنا اخوج وابوج وصديقج وحتى إذا تردين اصير امج واختج بس لا تضوجين گلبي ينحرك من اشوفج ضايجه

ابتسمت براحه وحضنته حسيت فعلا عندي سند گال :
ــ هسه متأكده موافقه؟

رفعت اكتافي وگلت:
ــ بكيفك

تنهد بحيره وگال:
ــ هسه ليش تتزوجين ابقي يمي شبسرعه بعدني ما شبعت منج

ــ هاهيه بكيفك

ضحك وگال:
ــ حبيبة اخوها ، باجر تحضري تعقدون

ـ ابتسمت گرص خدي وراح حسيت فعلا ارتاحيت من حجيتله كلشي توعد لمرت ابو هشيم گمت اكلت وغسلت مواعين العشه وتوضيت صعدت حتى اصلي وصليت وي صلاتي صلاة استخاره حسيت ارتاحيت نوعا ما دعيت إذا هشيم اله خير الي وننسعد سويه يتم زواجنا على خير وإذا لا كلمن بطريقه
ـ گعدت بغرفتي دخلت رهفاء ابتسمتلها ردتلي الابتسامه وگالت:
ــ يلا أنا دزوني على مهمه

ــ شنو ؟

رفعت أيدها صحت:
ــ لا رهفاء الله يخليج

گمزت عليه وما قبلت اله أن نظفت جسمي ومع انو جسمي مابي شعر أنا طالعه على امي وخرت وانا ابجي وامسح بدموعي وهيه تضحك :
ــ روحي عني رهفاء راح اكتلج

ــ بيج حيل بعد

ــ اي ليش عيني ما بيه مكسحه ؟

ضحكت وگالت:
ــ يلا امشي اسبحج

فتحت عيوني بصدمه وگلت:
ــ شنوو؟؟ لا عيني ماعندي ايد لو ماعندي رجل أنا اسبح

ساعه اتوسل بيها يلا قبلت عافتني وراحت دخلت سبحت وطلعت باوعت بالمرايه حطيت مرطب ومشطت شعري تمددت حتى اغفى نمت بدون ماحس نمت گعدت على شي يهز بيه فتحت تك عين لكيتها نيروز گالت:
ــ يلا عروستنا گومي للصالون يلا ساعه بالوحده

فتحت عيوني بصدمه وگلت:
ــ بالوحده الظهر؟؟

ــ اي عيني

انصدمت اول مره اتاخر بالنومه هلكد جرتني ودخلت وياها ميسنه مبدله وتصيح:
ــ امشي يلا للصالون

ــ شبيجن والله بطرانات ماروح

فتحت حلگها ميسنه وگالت:
ــ شنــووو يمه؟ ماتروحين بكيفج هو غير حجزنا البارحه گومي حبيبتي گومي لا اللبسج بايدي

ــ ماعندي شي بس عبايتي

ـ ماحسيت غير لبسني عباتي حتى وجهي غسلته شلون ما جان طلعت أنا وميسنه وفداء وفيروز ونيروز اجن ويانه أما الباقي گالن ميحتاج نسوي بالبيت لكيت باسن ينتظرنا بالسياره گبل صعدنا مافتهمت اي شي
ـ أنا بحياتي ما حاظره خطوبه بس سامعه يجون النسوان من يسمعون الموافقه يجون الزلم يعقدون وهاهيه وصلنا للصالون وطول الطريق ميسنه تصفك وتغني
ـ فرحت صراحه حسيت صدك عندي أهل وصلنا للصالون گال باسن راح انتظركم دخلنا گعدتني ام الصالون گالت:
ــ حبيبتي شنو يعجبج اللوان والمكياج حسب ذوقج

ــ ماعرف والله بكيفج على ذوقج بس خفيف

ــ اصلا أنتِ بدون مكياج تخبلين ما شاء الله

ابتسمتلها ، بدن بالشعر تسريحه كلش حلوه شعري طويل فـ بقنه على طوله ورفعه لگذلتي وكلش طلع حلو والمكياج فعلا خفيف وناعم والبنات هم راحن يسون لمن كملت العصر اجن البنات يصلن على محمد كلش طلعن حلوات گالت ميسنه:
ــ الله يعين هشيم اليوم

ـ ضحكت وضربتها بخفه والبنات هم نيروز مسويه مكياج ترابي خفيف يجنن وشعرها رافعته لأن قصير وفيروز نفس الحاله أما فداء مسويه مكياج كلش خفيف بحيث ما مبين بس نازك وميسنه مكياجها كلش قوي بس لايگلها وشعرها كيرلي رافعته كبه ومنزله خصل يجننون
ـ كملنا كلشي وطلعنا لكينا باسن منتظرنا رجعنا على البيت گبل البنات ودوني على الغرفه حتى لا اسمع كلام يضوجني
ـ كعدت على الجربايه شهگت من تذكرت ماعندي فستان باوعت للبنات وكلت :
ــ ماعندي فستان

هم تفاجئن بحيث حارن شيسون وانا شوي وابجي مدمعه ندك الباب دخلت رهفاء بيدها علاليك وكالت مبتسمه:
ــ عيني هشيم جاب فستان لزينب الحوراء

ـ ابتسمت براحه طلعت الفستان كلش نازك وحلو ابيض وبي من جهه الصدر مثل اللؤلؤ مخصر وطويل كلش حلو وعجبني وياه جايب كعب ابيض والسلك مالته ستن بحيث مثل مال اميرات بقينا نسولف للمغرب وكالوا اجه الشيخ حتى يعقدلنا
ـ توترت كلش وفعلا احتاجيت أبويه أو امي أو حتى ساره الي ماكدر اتواصل وياها
ـ بدلت فستاني والكعب وطلعت للبنات ميسنه تصوفر ورسيل تصلي على محمد باوعت على نفسي فعلا طالعه كلش حلوه والمكياج ضارب وي لون عيوني
ـ  نزلنا جوه مرت ابو هشيم ما موجوده بس بيبي والباقي بيبي عيونها مدمعه ما حجت شي كعدت يم الباب حطوا قطعه ستن بيضه على راسي وكامت رهفاء تركض جايبه غراض
ـ ماء ورد و ورق غار حطتهن يم رجلي وقران على أيدي وانا من زمان ما احب أصبغ أو احط اظافر رغم توسلن البنات بس علمود الصلاة ماحب
بدأ الشيخ يقرأ لحد ما سألني :
ــ زينب الحوراء بنت رافـد هل تقبلين الزواج من هُشيـم ابن مُعتصـم أن قبلتي قولي نعم وانتَ وكيلي؟

ما رديت دموعي تنزل بهدوء احس قراري صح وغلط رجع عاد الكلام مره ثانيه :
ــ زينب الحوراء بنت رافـد هل تقبلين الزواج من هُشيـم ابن مُعتصـم أن قبلتي قولي نعم وانتَ وكيلي؟

هم ما رديت طلع كنان رفعت راسي ودموعي توگع عقد حاجبه بأستغراب وگال:
ــ شبيج حبيبتي ضايجه ؟ إذا ما تريدين هاهيه نلغي كلشي بس گولي

هزيت راسي بمعنى 'لا' وگلت:
ــ اريد اهلي..

گلتها وبجيت أكثر تنهد بضيق وحضني لدرجه حتى الي بالديوان سمعوا بجيي وصار هدوء وانا اشهگ كال الشيخ :
ــ بنتي الله يرحمهم هسه همه مطمئنين بنتهم راح تستقر وتكون عائله إذا كنتي غير مجبوره گولي نعم ..

كرر السؤال:
ــ زينب الحوراء بنت رافـد هل تقبلين الزواج من هُشيـم ابن مُعتصـم أن قبلتي قولي نعم وانتَ وكيلي ؟

اخذت نفس وگلت :
ــ نعم وانتَ وكيلي

سأل السؤال نفسه لهشيم و رد الموافقه والهلاهل ماعرف منين كامت تجي البنات طايرات فرح بس لاحظت اسيا عيونها حمر وما حاطه مكياج ولا شي ويمها رسيل تحجي وياها بقيت كاعده يم النسوان شوي واجت ميسنه گالت :
ــ المحجبه تحط شيلتها على رأسها الزلمه يريد يشوف مرته

فد استحيت كلش استحيت گامن النسوان تغطن ودخل هشيم ما رفعت راسي ابد ايدي ترجف احس تسرعت بعدني صغيره لحد ما حسيته صار يمي وهمس :
ــ حوريتي شو رفعي راسج شمالج وين ما اكضج مدنگه راسج

رفعت راسي وخزرته لزم گلبه وهو يگول :
ــ آخ گلبي شنو هذا الجمال تعالي لج مو وصيت ميسنه ما تحطين مكياج هواي شو هذا شنو ؟

ــ والله حاطه خفيف

ــ ماتحمل گلبي ما يتحمل حوريتي يابعد هشيم وروحه حاله وماله

ـ نزلت راسي بخجل ، طبعا بيومها صارت تلبيس حلقات والعقد مال شيخ والخطوبه وكلشي وهذا طلبي رغم هشيم ابدا ما راد هلكد يستعجل بس انا ماريد هوسه جابوا الحلقات رغم ما شفتهم بس ذوق هشيم كلش نازكات
ـ لبسني اول حلقه وميسنه تصور ورجع لبسني ثاني حلقه والثالثه والرابعه وهمس بأذني:
ــ أنتِ اربعتهن تحرم عليه من بعدج مره

نزلت راسي خجلانه ما متعوده هيج سحبت الحلقه ولبسته وأيدي ترجف لزم ايدي وگال:
ــ شبيج حبيبة گلبي ؟ على كيفج يواشج

بسرعه لبسته الحلقه وباقي الذهب ما قبلت اللبسه لأن اصلا اتحسس لزم ايدي يحرك الحلقه على اصبعي ومبتسم احسه فرحان من كل گلبه گامت ميسنه تهوس:
ــ اخويه خوش اخو يستاهل الهوسه

ضحك هشيم لحد ما النسوان گامن يگولن بوسها وبوسها وانا اكره هاي الفقره ما احبها تقرب باسني بخدي لامسني خشونه شواربه وي ترافة خدي گال بصوت خافت:
ــ شلون ينطيني گلبي ابوسج وانا اخاف عليج حتى من خشونة شاربي وي ترافة خدج حوريتي

ــ اسكت كافي خجلت

ـ ضحك من كل گلبه بصوت عالي فضحنا بقى گاعد وانا شوي واموت من الخجل ما متعوده عليه اصلا وهو طبعا ما بكل سوالفه السرسريه وكل شوي يباوع على الفستان ويتأفأف ويلوم بروحه لأن جاب هيج دلعه
ـ شوي وگام بعد ما توسل بي وگال ارجع وره ما يروحن النسوان بقيت كاعده متكسره لحد ما بدن النسوان يروحن بس بقن شوي دخلت  رسيل وگالت :
ــ بلا زحمه اخوها راح يدخل

وفعلا شوي ودخل كنان دمعن عيوني اباوعله عيونه حمر باوعلي باس راسي وگال:
ــ روح اخوها صارت احلى عروسه ما شبعت منج بعدج صغيره لو ما موافقه مو احسن ؟

سكتت حايره رجع گال:
ــ ها ما موافقه ؟ اللغي كلشي وتفسخون عادي والله بس گولي

ــ بكيفك

ابتسم بحزن وحضني صاح لرسيل تجيبله هديته جابت علب اربعه فتح اول وحده تخم ذهب كلش حلو بس ثگيل والثاني هم تخم بس خفيف والثالث سوار حلو والرابع تراجي
باوعتله وگلت وانا مدمعه:
ــ كلفت على نفسك حبيبي والله ماللبس هواي ذهب اتحسس

باس راسي وگال:
ــ الذهب للذهب زنوبتي الحلوه

ـ بقى شوي كل شوي يحضن بيه ويكلي متأكده موافقه لحد ما گام راحن النسوان ردت اصعد فوك گالن البنات هشيم يريدج رحت لكيته منتظرني
ـ تقدمت بتوتر ضحك وفتح ايده حضني بقيت متشنجه بمكاني ماعرف شسوي گال :
ــ شنو شعورج هسه ؟

ــ ما فرحانه

عقد حاجبه وگال :
ــ ليش سويتلج شي احجي ؟

گلت بغصه:
ــ لا بس لأن احتاجيت اهلي أو حتى ساره البنيه من تتزوج تحتاج اهلها بس انا ماعندي أهل

تحسر بضيق وحضني انتبهت ما يعرف يواسي بالكلام بس يحضن أو يبوس براسي حتى بالفرح ما يعرف يعبر گال جمله وحده :
ــ أوديج لساره باجر بس لا تضوجين تلچمين گلبي

هزيت راسي بقبول فرحانه ابتعدت وكعدت بصفه بقى يسولف وياي شنو يريد يسوي صفن وگال :
ــ وهم راح اجيبلج تلفون باجر نسيت اليوم ذكريني باجر

ــ ما يحتاج

ــ تؤ اريد احجي وياج خاف اروح بالشغل تره باجر اخر يوم اجازه

ـ هزيت راسي بمعنى 'لا' ماهتم واعرفه يجيب گعد يسولف وانا بس اهز راسي أو اشاركه بكم كلمه حتى شالي ما قبلت اذبه وهو ما حجه وياي ارتاحيت لحد ما گتله نعست :
ــ هسه شبسرعه نعستي جنج دجاجه

ــ والله تعبانه

ــ عسى من حيلي على حيلج يابعد حيلي روحي نامي روحي بس اول ما تگعدين تعالي خابريني من تلفون ميسنه اسمع صوتج

ـ ابتسمت وعفته وصعدت لغرفتي صليت صلاة الليل ونمت گبل حتى بالصايه من التعب گعدت بنص الليل عطشانه فتحت الباب اريد انزل حتى اشرب ماي
ـ  سمعت صوت بجي جاي من غرفة هشيم
تقدمت على كيفي عاقده حاجبي مستغربه الباب مفتوح فتحه صغيره تصنمت بمكاني من شفت هشيم حاضن آسيا يمسح على ظهرها وتگله بصوت خافت :
ــ احبــك هُشيم ...

يتبــعع....

2800كلمه ♥️🥹.....

ــــــــــــــــ

بنات اعتذر البارت قصير بس والله عدنا خطار وأطفال وهوسه وعگب باجر خوالي يجون يعني كلش هوسه بالگوه كتبت هلبارت
بس حتى ما اخليكم تنتظروني اعذروني

حسابي الانستا
.

حسابي التيك توك

قناتي التليكرام كلش مهمه انزل كلشي بيها

الباقِياتُ الصَّالِحاتُ:

-سُبحــانَ الله
-الحمــــدُ لله
-لا إلهَ إلا الله
-اللهُ أكبـــر
-لا حَول ولا قوة إلا بالله
-سُبحــان الله العَظيــم
-سُبحــان الله وبِحَمـده
-أستَغفِــر الله وأتوبُ إليه
-اللهُمَّ صلِ علّى مُحمد وآل مُحمد