رواية فَجيـعه الدَهر الفصل الثالث 3 - بقلم Hind Al taay

#فجيعة الدهر 🦅 🪶
بقـلم الكاتبه هند الطائي
تصويت + تعليقات بين الفقرات

الحـلقه الثامِنـه

* اكو كلام يخص التأخير بنهاية البارت اتمنى تقرونه ..

ـــــــــــــ
زينب الحوراء

لساني نعگد رجليه صارت ما يعيننّي حتى اگوم وگعت بالگاع گبل اجه هُشيـم لزمني من زندي يباوع بخوف ويگول :
ــ زينب بنيتي فدوه باوعيلي شو تسمعيني!

ـ احس وشه صارت بأذني عيوني غوشن ما حسيت بشي بعدها ..گعدت على ايد تمسح على شعري فتحت عيوني لكيت كنان
ـ  باوعتله وكأن تذكرت كلشي باوعت لهُشيم عرف راح أفقد اجه بسرعه وهو يكول:
ــ بويه على كيفج وي روحج

رجفت شفتي فقدت كمت اصرخ بكل حيلي:
ــ عوفوني آخخ رضــا حبيبي وينــك رضــا

كنان وهشيم يردون يلزموني ماكو ادفر واجر بشعري واللطم على وجهي هشيم قيدني حيل وانا ادفر بي واصرخ:
ــ عوفنــي ودوني اشوفه يــلا ودوني ولكـــم أخ گلبي شكثــر فاقد عزاز

البنات يبجون وكنان گعد گدامي لزم وجهي بأثنين ايدي عيونه حمر باوعتله وانا اشهگ گال :
ــ زنوبتي الحــلوه إذا تهدأين اخذج تشوفينه ماشي؟

هزيت راسي متخبله اريد بس اشوفه احس گلبي طاگ عليه  گلت بسرعه:
ــ ما أصيح ولا ابجي يلا نروح يلا فدوه

ـ صاح على ميسنه تجيبلي عبايه وشال بسرعه ركضت جابت عبايه وشال ليسانس ميسنه وفداء تعدلي الشال لفته على السريع وهمست بأذني :
ــ الله يخليج ديري بالج على روحج 

ـ گومني كنان وطلعنا صعدنا بالسياره هشيم يسوق وكنان بصفه حطيت راسي على الجام ساكته احس كلشي ساكت بيه هدئت هدوء يخوف
ـ وكفت السياره باوعت لكيتنا بالنجف انفتح الباب شفته كنان باوعت على الگبور رجفت شفتي آخر مره اجيت قبل خمس سنين من توفوا اهلي
ـ مدلي ايده كنان لزمتها ومشينا بين الگبور
وگفت متصنمه من شفت هديل من بعيد تسوي نفسها تبجي تخبلت ركضت بسرعه عليها دفعتها وانا اصرخ :
ــ گومــي چلبه ما تستاهلين تجين بدفنته

باوعتلي بحقد وكالت:
ــ انجبي سـاقـ** تعلميني اجي بدفنة ابني لولا امشي أنتِ روحي منا يلا راويني عرض چتافچ

ودفعتني تخبلت جريتها من شالها الي حاطته على النص اضرب بيها كل حيلي نشاليت من فوگها باوعت كنان اضرب بأيده واصرخ :
ــ عوفنــي كنان لك هاي حرام توگف على دفنته عوفني اموتها

عاط بيه:
ــ كافي زينب كافي عيب

دفرته برجلي وماكو متت اضرب كل حيلي و ما يوخر وهشيم يتعارك وي هديل وهيه كل صوتها يصيح اخر شي شفته ضربها راشدي عافتنا وراحت وهيه تباوعلي بحقد وتكول:
ــ أنا اعلمج شايفه هذا الگبر إذا ما يجي يوم واوگف على گبرج بسيطه

تخبلوا الولد راح هشيم يصيح عليها :
ــ امشي لج لا اطمج بالگبر هذا

راحت يلا عافني كنان باوعت للگبر وهذا الدفان يحفر ركضت دفعته بخفه وانا ابجي :
ــ عوفه عمو لا بعده صغير مو مال گبر يخاف هو يخاف من الاماكن الضيقه ومن الظلمه وثنينهم هنــا

صرخت باخر كلمه وانا اللطم على وجهي بكل حيلي الولد حاروا شلون يلزموني گال الدفان :
ــ بويه كلنا على هذا الطريق يرحم والديج خليني اكمل شغلي

بعدني منه كنان وانا اشهك باوعت لكنان وگلت:
ــ يـ...يخـاف ر...رضا هنا و..والله

جر راسي لحضنه تعبت من البجي خلصوا الدفن جابوا الجثه ما سمعت غير صرخة ساره بعلو صوتها باوعتلها نامت على الچفن الي بيه رضا تصرخ :
ــ ولكم ابني ابنـــي اليوم اندفــن وندفنت حياتي ويــاه

كنان يريد يروحلها وحاير يلزمني يلزمها دفعته وركضت بصفها تبجي ونصرخ سويه نايمه ساره على التراب والدفان يدفن وتصرخ:
ــ يبعد اخيتك ارجع شوف حال اختك كسرتني ولك روحي نكسرت ‏عمت عيني عليك ياخويه بعدك شنو شايف من حياتك ردت اللبسك بدلة عرسك مو جفنك

گالتها وگامت نامت على الچفن ما تقبل يدفنوه شهگت ورحت يمها لزمت الچفن حضنته من فوك الچفن واحس روحي راحت
والنسوان يصيحن مايصير كنان راح على ساره لزمها حتى يبعدها وحسيت أنا هم نشاليت من فوك الچفن هُشيم يهمس بأذني:
ــ صيري قويه كلنا على هذا الدرب ، باوعي على ساره محتاجتج هسه لا تضعفين هسه فدوه اروحلج راح تموتين

هزيت راسي عافني رحت على ساره لزمت أيدها باوعتلي وشهگنا ثنيناتنا وحضنتني وهيه تبجي وتحجي:
ــ يسأل عليج جان يگول وين حوراء وينهــا ليش راحت آه  خويــه ارجعلــي مو ردت تشتري بايسكــل ارجع والله اشتريــلك

ـ احس روحنا راحت اصبر منو اصبر نفسي لو اصبر ساره لو منــو بدأت الدفنه ونزلوا رضــا للحفـره آه ياروحي شكثر تحملتي صغير مو مال هيج حفره عميقه ليش وجهه الحلو يغطي التراب ليــش !
ـ خلصت الدفنه وروحنا راحت ما قبلنا لا أنا ولا ساره نروح اول يوم بقوا الولد ويانه ثاني يوم اصروا نروح رجعنا على البيت وساره ما قبل كنان تروح يكول تتخبل إذا تبقى وحدها فـ اجت ويانه وشيصير خلي يصير
ـ دخلنا الكل يكول كلمات عبالهم تهدئ گلوبنا مايدرون مشتعله بنار مستحيل تطفى صعدت أنا وساره كعدت على الجربايه هيه وانا نزعت عباتي وكلشي ودخلت للحمام
ـ الماي يجري ودموعي وياه بقيت فتره طويله إلى أن ندك الباب واجه صوت ميسنه:
ــ وينج زينب طمنينه فدوه تسمعيني؟

سكتت احس مابيه حيل ارد كعدت بالگاع دموعي تنزل بهدوء لبست ملابسي وبقيت كاعده والباب يندك اجه صوت هشيم :
ــ بابا زينب موجوده طلعي فدوه اروحنلج مابينا حيل انتِ عاقله ومؤمنه تعرفين هذا قضاء بيج وقدره هو راح طير من طيور الجنه
أنا لله وانا اليه راجعون مرجعنا يم رب العالمين الي خلقنا هو الي خلقه هو الي يأخذه
بعدين هسه رضا يشوفج مايقبل تبجين مو عبالج هو مات يعني هاهيه انتهت لا بويه أنتِ ، يشوفج ويعرف متأذيه ليش تأذينه بگبره وتأذين روحج طلعي يلا بنيتي اخوج متأذي عليج ليش تأذينه

اريد ارد بس لساني نعگد رجع گال :
ــ زينب تسمعيني ؟

من شاف ماكو رد ما احس اله الباب يندفع لحد ما كسره من شافني أخذ نفس براحه گال بصوت خافت:
ــ هديتي حيلي هد زينب

گعد گدامي مسح على شعري الي يقطر من الماي ما نشفته باوعتله بتعب گال:
ــ ليش تسوين بروحج الحلوه هيج وين زينب الحلوه الي تخاف من الحرام اول ما اباوعلها تنزل عيونها وتغطي روحها خاف طالع منها شي وينها الي تأخذ من قوة وصبر السيده زينب

لا رد ...

تحسر وصاح على ميسنه دخلت ميسنه بهدوء عيونها حمر منفوخه من البجي باوعتلي وبچت :
ــ ليش سويتي هيج خوفتيني عليج والله

بقيت ساكته گال هُشيم:
ــ مو وكتها ميسـنه تعالي گوميها

اجت حاولت تگومني آخر شي گالت :
ــ هشيم ماگدر وحدي شيلها أنتَ

استغفر وگال بحيره :
ــ حــرام ينحسب ذنب عليها

گالت ميسنه تحاول تقنعه :
ــ ياخويه چا شنسوي تبقى هيج بس هالمره شيلها لخاطري

هز رأسه وتقدم لفلفني باللفاف وشالني باوعت ساره على الفراش نايمه غمضت عيوني بتعب گال هشيم موجه كلامه لميسنه:
ــ وين اخليها والبت نايمه ؟

گالت ميسنه بصوت ناصي:
ــ لغرفتك لأن البنات نايمات بغرفنا

فورا گال :
ــ بغرفة كنان

ــ غير تعرف بيها تعديل وجاي ينام وي ثائر

زفر نفس بحيره وما احس اله نحطيت على فراش وتغطيت واسمع يمي حجي ما فهمت غير حديث واحد صوت هشيم يگول :
ــ نترست حرام من وراي ميسنه شبيج لو شايلتها وي البنات

ــ هسه يا عيني تحسسني  بحياتك ما شايل بنيه

ـ ما سمعت بس صوت ضربه وهيه تضحك ابتسمت لا إراديا وغمضت عيوني اريد انام فعلا غفيت ما كعدت اله لمن سمعت صوت الاذان 'الله اكبر ، الله اكبر ' ...

ـ فتحت عيوني لكيت بغرفة هشيم و محد يمي كمت توضيت بسرعه ورجعت لغرفتي لكيت ساره تبجي تحسرت وأخذت الصايه والسجاده لبست الصايه باوعت لساره وگلت احاول اكون قويه گدامها :
ــ گومي ساره گومي توضي حتى نصلي سويه

هزت راسها بمعنى اي وگامت حتى تتوضى
اجت لبست عباتي وشال وصلينا سويه بآخر سجده بجينا سويه احس طاقتنا نفذت ما نكدر نمثل القوه بعد حضنتني وبقينا نبجي إلى أن ندك الباب مسحت دموعي وگلت :
ــ تفضل

باوعت لكيته كنان ابتسملي ودخل كعد على الكرسي وكال :
ــ شلون الحلوات اليوم ؟

أنا وساره: الحمد لله

هز رأسه يباوع لساره بقهر تحسر وگال :
ــ الفاتحه راح نسويها هنا

بسرعه ساره رفعت راسها وكالت :
ــ ليش هنا!

أخذ نفس وگال :
ــ لأن ما راح يسوون فاتحه امج وابوج

ضحكت ساره بأستهزاء وصاحت :
ــ مايستاهلون يسوون فاتحه لرضا اصلا

گال كنان :
ــ مو مهم المهم هنا راح تصير الفاتحه يومين وراح تجي الملايه اليوم الي اريده ما تموتن روحجن لأن ما يرجع إذا تموتن روحكم وتملخون وجهكم فهمتوا !

بجت ساره وغطت وجهه بأيدها تشهك كام كنان يهدئها عفتهم وطلعت رحت دكيت باب هشيم سمعت صوته دخلت باوعلي متفاجئ لأن بالعاده ما اجي أنا ابدا گال :
ــ تفضلي زينب تعالي دخلي

دخلت بهدوء وكفت گدامه عدل گعدته گلت بغصه:
ــ اريد اطلب منك طلب

ــ عيوني الج شنو تريدين يجرالج

هزيت راسي وگلت:
ــ اريد اروح لبيت خالي

عقد حاجبه بأستغراب وگال:
ــ ليش؟

ــ اريد اروح اجيب ملابس و اللعاب رضـا

هز رأسه بتفهم وابتسملي گال :
ــ ميخالف تدللين حضري روحج بليل وره ما تفض نروح خوش؟

ــ شكرا

ابتسم وسكت طلعت ورحت لغرفة ميسنه لكيت نيروز وميسنه كالت ميسنه:
ــ هلا حبيبتي زينب الحلوه تعالي اشتاقينالج

ــ اريد انام من تجي الملايه گعدوني .

اختفت ابتسامتهم وميسنه تحاول ما تحسسني بضوجتها هزت راسها وكالت:
ــ من عيوني ، نامي حبيبه .

هزت راسي بقبول وحطيت راسي على المخده تعبانه لحد ما نمت كعدت على صوت رسيل باوعت ابتسمتلي وگالت :
ــ اجت الملايه لبسي دشداشه سوده طلعتلج وشال اسود ونزلي حبيبه

هزيت راسي طلعت وعافتني گمت لكيت حاطتلي دشداشه سوده لبستها على السريع وشمرت الشال على راسي وطلعت نزلت جوه باوعن الي النسوان يتهامسن بين بعضهم ماهتميت كعدت على صفحه حطيت راسي على الحايط لحد ما بدت الملايه تنعي وصوت ساره تصيح بعلو صوتها تگابلنا أنا وساره والملايه تگول:
ــ يحزام الظهر يا خويه
رد مشتاگه لعيونك
يحزام الظهر يا خويه
رد مشتاگه لعيونك آه يالكلك محنه
رايح منشدت عنه
شوفك ما شبعت منه
ترد لو اگطع ضنونك
اي يا حزام الظهر يا خوي
رد مشتاگه لعيونك
تجوه لعوزي ضاخرتك
ليش اتعوفها اختك

ــ اويلاه اويلاه اي ضيعيتك خويه ضيعيتك

اللطم كل حيلي ملخت روحي وساره وياي انهارينا من نعي الملايه صارت الملايه تستغفر وتگول :
ــ حبيبات يمه على كيفجن بعد روحي على كيفجن

كملت الملايه نعي:
ــ شلونك يبعد اختك شلونك
يمه بعدك حلو يو خرب لونك
يمه خرب عيونك خرب عيونك
اظنه الگبر خرب عيونك
ما يجيني ما يجيني أنه مايجيني
يمرون ربعه يمرون انه ومثل قميصك يلبسون
انه يشلعون گلبي من يمرون ولك خويه

صرخت ساره :
ــ خرب عيونــك التراب ولك رضـاوي خويه

فقدنا ما نحس بحيث النسوان كلهن گامن يلزمنا وميسنه ركضت تصيح الولد صاحت فداء :
ــ بلا زحمه تغطوا راح يدخلون الولد

وأنا اللطم كل حيلي أنا وساره ما احس اله احد لزمني باوعت لكيته هشيم وكنان لازم ساره وهيه تصرخ آخر شي فقدت وانا هشيم يصيح:
ــ ولج بويــه شسويتي شوفي وجهج كافي راح تموتيــن

ادفع بيه آخر شي قيدني وشالني صعدني فوك لغرفته وسد الباب اول ما التفت ضربني راشدي بكل قوته شهگت وهو يصيح :
ــ اصحي زينب اصحي افتهمي رضا مات ولج ما ترجعينه باعي وجهج ينزف موتتي روحج ليش هيج

تقرب حضني اشهك وادفع بي واصيح كل حيلي :
ــ عوفني ودوني لرضا عوفني

ــ ما اعوفج اله تسكتين وما تضربين نفسج تخبلتي باعي وجهج شحاله

باوعت على وجهي بالمرايه كله دم ينزف وشعري ملخته تملخ بحيث مگطع انداريت دفعته وكلت صوتي مبحوح بالگوه احجي:
ــ عوفني وحدي

جر شالي وحطاه على راسي ضم شعري باوعلي وكال:
ــ البجي وتضربين نفسج وتوجعين روحج ما يرجع الراح استوعبي ما يرجع الراح إذا تلطمين لو حتى تموتين روحج هو جاي يشوفج هسه ومقهور

فزيت وگلت:
ــ ليش مقهور ليش؟

ــ لأن يشوفجن تبجن وراح تموتن وراه ما يقبل يشوف الناس الي يحبهم هيج ضايجين وانتو يحبكم وقريبات منه وأخواته مو ؟

هزيت راسي بقبول كمل كلامه..
ــ لهذا هسه اريدنج تلبسين عباتج وتجين حتى لا تبقين يمهم وهمين اخذج تروحين تجيبين ملابس رضا واللعابه مو ردتي؟

ــ اي أي هسه نروح

ــ انتظرج يم السياره استعجلي زنوبه

ــ تمام ..

هز رأسه وطلع رحت  گوه على حيلي اكوم غسلت وجهي الدم يجري منه غسلته شلون ما جان جريت عباتي وشالي فزت ميسنه والبنات وهيه تگول:
ــ وين رايحه حوراء ؟

رديت گوه صوتي مبحوح ما اكدر احجي:
ــ وي هشيم ، وين ساره ؟

نزلت راسها وكالت :
ــ تخربطت وحطولها مغذي والله زينب لا يضل بالج

هزيت راسي بقبول وطلعت صعدت بالسياره ومشينا شوي وگلت :
ــ اگدر اشغل شي بالسياره؟

ــ اكيد بويه هاج تلفوني شغلي الي يعجبج

اخذته دخلت على اليوتيوب طلعت قصيده باسم الكربلائي'لو نويت تروح'

حطيت التلفون يمه وعليت الصوت شوي رجعته وحطيت راسي على الجامه واردد وي كلمات القصيده :
ــ لو نويـت تروح .. گلبي وين يروح
لو صدك لا سامح الله وفارگتني
يالوداعك آه أسألك بالله
زينب اني ؟ لو تبدل واكف شفتني
مع السلامه لو گلت احسبني من باجر متت ...
لو نويت تروح ..
لقائي ولقائك سكته بي كلشي حجينه
فهمنا بعضنا بالدمع لمن بچينه
گلتله قريبه خيولهم صارت علينا
گلتلي وعد مكتوب يا خويه شبدينا ؟
صرت اشوف الليل چن سنابل خيل
تسحگ لصدري وتفوت الساعه لحظه
يمشي ليل الموت اسرع من الصوت
ليلة وداعه الحبايب چنها ومضه
ياموت ليش استعجلت احسبني من باجر متت
لو نويت تروح ..

نزلت دموعي وي كلمات القصيده كل الاحبهم يموتون امي أبويه اختي كلهم راحوا بومضه عين وهسه رضـا !
الي ما فد يوم ضوج اي واحد ما يأذي أحد
مسحت دموعي ورددت وي المقطع الجاي وفجأة صار صوت هشيم وياي :
ــ وگفنا بوداعك والزمن ويانا واگف
ورجفنا ورجف حتى الكلام أعلى الشفايف

شهگت باوعلي هشيم وگال :
ــ شلون هسه زينب ؟ شحچينا إذا تبجين اسدها

هزيت راسي ومسحت دموعي تنهد بضيق وكملت القصيده وصارت تنعاد طول الطريق لحد ما وصلنا للبيت نزلت وهو ضل كاعد بالسياره ينتظرني دكيت الباب محد طلع كذا مره رجعت على السياره گال :
ــ ها محد طلع ؟

اشرت لا هز رأسه وگال:
ــ شنسوي هسه كلش تريديهن؟

گلت بتوسل:
ــ اي هشيم حباب الله يخليك اريدهن قبل لا ياخذوهن مني وهم لساره ملابس

هز رأسه ونزل من السياره طفر من فوك الباب فتحه مقفول بسرگي لا قفل ولا هيج دخلت الباب الجوه مفتوح دخلت بسرعه شغلت الاضويه كال هشيم:
ــ راح انتظرج هنا روحي جيبي الي تريدينه

هزيت راسي بقبول رحت دخلت للصاله نزلت دموعي من شفت اللعاب رضا مطشرات ركضت لميتهن لگلبي وحطيتهن وحد ودخلت لغرفة ساره لأن رضا ينام بنفس الغرفه فتحت كنتور رضا اجت ريحته شهگت وضميت هدومه وابجي :
ــ وينك حبيبي وينــك من رحت ضعت ضعت والله وينك ابو وجه الحلو والضحكه الحلوه احترك گلبي بغيابك.

دخل هشيم تحسر وكال:
ــ گومي بويه زينب ما يفيد شي بعد راح للاحسن مني ومنج ومن الكل

هزت راسي واخذت ملابسه كم قطعه واللعابه وملابس كم قطعه من ملابس ساره وطلعنا رجعنا للبيت الملايه رايحه ونسوان قليلات كاعدات دورت بعيوني على ساره باوعتلي فيروز وكالت :
ــ تريدين ساره ، فوك صعدت

هزيت راسي بقبول وصعدت وياي الغراض رحت على غرفتي لكيت ساره بأيدها كانونه باوعتلي وباوعت للاغراض وبجت تنهدت بضيق و رحت يمها كعدت على الجربايه بالطرف مسحت على شعرها تدنت وحطت راسها على رجليه امسح شعرها گالت :
ــ ليش آخر امل يروح ؟

ــ حتى رب العالمين يختبرج

ــ شمعنى بأصعب شي؟

ــ الفقد يقوي الگلب  ويعلم الصبر ويكشف معدن النفس ويقوي الروح ويذكرنا بكلشي  ما دايم يدوم وكلشي بحياتنا عبور وامتحان من رب العالمين حتى نعرف قيمه الناس واللحظات ونتعلم نتمسك بالحياة الحلوه قبل ما تروح

هزت راسها وهمست بغصه:
ــ  حتى ما لحگت اشبع منه لحظات حلوه عافني وراح

بلعت ريگي احاول اتماسك گدامها گلت بصوت خافت متصنعه القوه:
ــ ما عافج ، ساره حبيبتي  أعرف الألم ما يرحم وگلوبنا ماتت وي رضا  والله  ادري صعب الفقد وانا اعرف لأن فاقده هواي  وكلشي بحياتي فقدته اعرف جان حيل قريب من گلبج واحد الان  لكن تذكري إنو هو هسه براحه يم رب العالمين وجنة الفردوس داره ودعائه بيها صايرلج نور وطمأنينه ساره  لا تضعفين فدوه يضعف من يشوف  دموعج  هو صار ملاك يحرسج ويحبج من بعيد وما راح يتركج يوم صيري قويه لخاطري علمودي ما بقالي غيرج

ما ردت سكتت شوي وحسيت نفسها ثگل عرفت نامت شلت راسها من رجليه وحطيته على المخده غطيتها وكعدت اصلي واهدي ثواب لروح رضــا واقراله قرآن مرن ايام الفاتحه ومر اسبوع بيوم چنه گاعدين بالغرفه أنا وساره فجأة صار صوت صياح جوه باوعتلي ساره وكالت :
ــ شكو ؟

رفعت اكتافي بمعنى 'ما اعرف' وگلت:
ــ هسه انزل اشوف

هزت راسها بعدم اهتمام ورجعت تباوع لالعاب رضا بأيدها وتحركهن تنهدت بضيق وگمت نزلت جوه انصدمت من شفت خالي وهديل باوعتلي وكالت بحقد:
ــ هاي اخذت بنتي ولج حقيره شعبالج ما نعرف بتنا وين تروح

ابتسمت باستهزاء وكلت :
ــ اي كملي تمثيل كملي

صاح عليه خالي:
ــ كافي احترمي و گومي صيحي ساره يلا تجي ويانه

تخبلت أصيح:
ــ ما تجي تردون تموتونها مثل رضا ما تروح وياكم ما تروح

صار صياح بين خالي وكنان هم ما قابل وخالي عاند لأن يعرف كنان يحب زينب خاطبها قبل وفاة رضا بأسبوع وما قابل وانا رجليه يرجفن حجه ضرغام وي خالي بهدوء :
ــ زين ابو رضا خلي البت يمنه جم يوم وتعال اخذها ما نكول لا البت بنتك

گمز خالي ينتر:
ــ تردون تمنعوني من بنتي عمي بنتي اريدها ما اقبل تبقى ببيت كله زلم

ابتسمت باستهزاء ، گال عمو حكيم :
ــ بويه البت بنته مايصير هيج خلي البت تروح وي  أهلها شنو نحرمها منهم

بعدني ستوني جاي ارد دخلت ساره بأيدها اللعاب رضا وهدومه ولابسه عبايه وشال باوعتلها بتوسل وگلت:
ــ لا ساره ..

گالت بصوت خافت:
ــ زينب احبج  بس هيج هيج لازم اروح ماگدر على فراگ عطر رضا ليهسه بالغرفه لازم اروح .

هزيت راسي گوه عليه لان هيه تريد ما اكدر اغصبها تبقى رادت تطلع وهديل تباوعلي بأستهزاء ماهتميت تذكرت شغله صحت :
ــ ســـاره !

اندارت ساره تنتظرني اكمل رحت يمها وگلت بهدوء:
ــ عفتيلي غراض من رضا ؟

باوعتلي وسكتت گلت بتوسل ودموعي تنزل :
ــ الله يخليج حتى لو كم قطعه حبابه ماگدر

ـ هزت راسها وانطتني لعبتين وكم قطعه من ملابسه وطلعت اخذتهم وركضت صعدت فوك حضنتهم اشهگ تعبت إلى متى ابقى هيج اسوي روحي قويه وانا ضعيفه فرشت سجادتي وكعدت اصلي واقرأ قرآن إلى أن حسيت ارتاحيت
ـ مرت اسبوعين والأوضاع هادئه ما اطلع من الغرفه البنات يجيبلي اكل واطلع على گد اتوضى وبس وحتى هشيم ما شفته كنان يدخل يحجي وياي ما اجاوبه يعوفني ويطلع

ـ إلى أن بيوم گاعده لابسه الصايه اردد بقصيده چنت احفظها لرضا لأن موتني يريد يحفظها بس ما يگدر وفعلا لحد ما مات ضلت حسره بگلبه ما حفظها اردد بيها :
' يساجيني حزنك
وانصلب شفه اعلى بيبان العطش
يرسملي طولك عالترب بحوافر الخيل نفرش
شلون بحصيره تنجمع ماكو أعلى گد طولك نعش هم لمو من الداستك لو ضاعن بليل اهدعش ...لو ضاعن بليل اهدعش '

اعيد بالمقطع نفسه لحد ما انفتح الباب باوعت لگيته ضُرغام گال :
ــ اعتذر دخلت هيج بس ردت احجي وياج

ــ لا عادي تفضل اكعد ..

گعد گدامي على الكرسي منزل راسه گلت ببرود:
ــ شنو ردت تحجي ؟

ــ شنو؟

ــ أنتَ ردت تحجي وياي بموضوع شنو هو؟

عدل گعدته وباوعلي وگال :
ــ اي صحيح ، بالموضوع الي حجيته وياج وبعدها... توفى رضا الله يرحمه ومالحگت اسمع جوابج اعرف الوقت مو مناسب بس ماكدر اصبر أكثر من هيج شنو جوابج زينب ؟

سكتت لحظات لحد ما تذكرت ما خجلت ولا سويت اي ردة فعل احس ما اهتم بعد وفاة رضا ما اهتميت بشي گلت بهدوء:
ــ الله يرحمه ، اعتذر منك يجوز راح اكسر گلبك بجوابي أو اجرحك بس ما ابادلك نفس الشعور ياريت تتفهمي .

باوعلي بقهر وگال :
ــ ليــش؟ أنتِ حتى متأكد ما فكرتي بالموضوع أصـلا زين فـ...

قاطعته:
ــ ضرغام الله يخليك حسبتك اخ لا اكثر لا تخليني اندم لأن حجيت وياك كم مره اتفهمني ما ابادلك نفس الشعور ما اشوفك غير اخويه وابن عمي غيره لا

هز رأسه وگال:
ــ ما راح اعتبر هذا جوابج الاخير فكري زين اني حابج من كل گلبي صحيتي گلبي الميت من زمان

غمضت عيوني وأخذت نفس احس صبري بلس ينفذ گلت:
ــ لا اخذه جواب نهائي لأن لا هسه ولا بعدين راح ابادلك نفس الشعور ولا تتوقع بيوم أنا هم گلبي مات وي رضا  روح شوفلك وحده من عمرك وگلبها حي على الأقل

گعد گدامي عيونه مدمعه ولزم ايدي وگال :
ــ راضي والله راضي بيج حتى لو گلبج ميت حتى لو ما تبادليني انطيني فرصه بس گولي اي اخطبج وخلي بعد كلشي على كيفج الله يخليج بروح اهلج زينب الحوراء لا توجعين گلبي

نترت ايدي من عنده ودفعته وگمت :
ــ لا تلزمني حرام تخيلت أنتَ ؟
گتلك ماريدك عوفني روح اطلع

ــ اسف والله ما جان قصدي اضوجج بس ردت تفكرين

نترت بي:
ــ اطلع اطلع

هز رأسه بحزن وطلع گعدت على الجربايه نزعت الصايه وفركت وجهي شبي هذا فوك ضيمي شلون هسه ماريد احب ولا انحب كل الي احبهم يموتون ماريد احب احد ماريد
گمت حضنت ملابس رضا ونمت ..
گعدت على ايد تخنگني فتحت عيوني باوعت لگيته ضُرغام يخنگ بيه بأثنين ايدي ويگول بصوت ناصي:
ــ ليش ما تريديني ليش عندج غيري مو !

ادفر جواه أريده يوخر وهو نايم فوگاي ويخنگ بيه عصرت ايده بأظافري رخت أيده شويه مادري منين اجاني الحيل وصرخت بكل علو صوتي:
ــ ساعـــدوني ساعـــدوني

سد حلكي بقوه حسيت اسناني راح تتكسر
يخنگ بيه مره أيده ترخه مره تقوه لحد ما حسيت نفسي راح ينگطع راح اموت همست بلگوه:
ــ يا زينب أدركــيني

سمعت صوت ضربة بالباب فز ضرغام يباوعلي شهگت اريد اتنفس أخذ نفس اندفع الباب دخلوا ثائر وهشيم باوعولي بصدمه وباوعوا لضرغام شهگت اريد النفس ركض هشيم يضرب بضرغام وضرغام ابدا ما دافع عن روحه ساكت وعيونه تباوعلي بخوف صاح ثائر:
ــ هشيم عوفه اختنگت البنيه

ركضلي هشيم يصيح:
ــ اتنفسي اتنفسي ولج بويــه راح تموتين أخذي نفس ولك ثائر راح تروح من ايدي

اريد بس اتنفس ماكو حسيت الدنيا ضاگت بيه غمضت عيوني وصوت صياح يمي اسمعه بس ما اگدر افتح عيني ما حسيت اله احد شايلني يركض بيه بعدها ما حسيت بشي گعدت باوعت بغرفة كنان مغذي وكانونه بأيدي
فز كنان يباوعلي وعيونه حُمر مبينه گال بقهر:
ــ شلون صرتي زنوبه بنيتي الحلوه

همست:
ــ زينـه .

هز رأسه واجه حضني دموعه بللت چتفي
گال بصوت مخنوگ:
ــ اعذريني ماگدرت احميج من هذا الحثاله بس والله موتته ماجنت موجود بس موتته

كأن تذكرت كلشي بس الغريب ما بجيت ولا سويت اي ردة فعل گلت بهدوء:
ــ مو ذنبك أنا ذنبي ما قفلت الغرفه ما جنت اعرف بنص الامان ممكن اموت

هز رأسه بمعنى لا وگال :
ــ لا اسم الله عليج ، ما راح تشوفينه بعد موتته

رفعت راسي باوعتله بخوف وكلت :
ــ شسويت كنان؟

ــ شعليج خلي يموت

ــ الله يخليك احجي شسويتله وينه

ــ بالسجن

شهگت بصدمه وگلت :
ــ ليش شسوه؟

باوعلي وعقد حاجبه بأستغراب وگال:
ــ شبيج بابا زينب ششاربه اليوم ؟ خاف المغذي أثر عليج غير تعرضلج وانا موتته ودخلنا للسجن طلعت بكفاله وهو بقى مثل الچلب

عقدت حاجبي مستغربه وگلت:
ــ ليش صارلي شكد نايمه ؟

ــ يومين

هزيت راسي بعدم اهتمام و سكتت دخلن البنات كلهن باوعت الهم كلهم مبتسمات حضنني طلع كنان والتمن كاعدات يمي كالت فيروز:
ــ شلون صرتي زنوبه ؟

ــ الحمد لله

كالت ميسنه:
ــ زينب خوفتينا عليج كله من وره هذا ضرغام الحقير

كامن يحجن عليه وانا ما اجاوب من شافوني ضجت غيروا الموضوع يضحكوني كالت فداء :
ــ بنات ما شفتن وجه ضرغام خريطه العراق مو هيج

ضحكت وضحكن البنات على ضحكتي بس لاحظت نيـروز ساكته انتبهت اباوعلها غطت وجهه بأيدها تبجي وگالت :
ــ والله اسفه نيابه عن ضرغام لا تكرهيني حبابه صح اني أخته بس والله ما قبلت على تصرفه

ابتسمت بحيره وحضنتها وگلت :
ــ مالج ذنب ما زعلانه منج

رفعت راسها فرحانه وكالت :
ــ صدك يعني ما زعلتي مني ؟

اشرت لا گالت بحماس:
ــ حلفي بالسيده زينب مو تحبيها

ضحكت وكلت :
ــ مايصير احلف على كلشي بس والله ما زعلانه منج

ضحكت فرحانه بقن گاعدات يمي واسمع صوت زلم عقدت حاجبي مستغربه وگلت:
ــ شنو منو هذول؟

كالت ميسنه :
ــ عمامنا والكل حتى يشوفون شيصير بسالفتج أنتِ وضرغام

بلعت ريگي وگلت :
ــ لا تجمعيني وياه

هزت راسها بقبول لحد ما صار صوت صياح حيل قوي اقوى من قبل فجأة دخل كنان باوعلي وكال :
ــ زينب كومي وياي بنيتي

باوعت بخوف وكلت:
ــ وين اروح !

اجه يمي لزم وجهي بأثنين ايديه وكال :
ــ لا تخافين بس تكولين هذا الحيوان شسوه بيج لازم تكولين فهمتي زينب مو وانا يمج شحده الي يجي يمج

هزيت راسي صاح على البنات يجبلي عبايه لبست عبايه ولفيت الشال بصعوبه بسبب الكانونه وگمت لزم ايدي كنان باوعتله ابتسملي يطمني دخلنا للديوان عمامي كلهم وولدهم كلهم دورت بعيوني على هشيم احس بأطمئنان من اشوفه ما اعرف ليش ركزت نظري عليه من شفته ابتسملي بهدوء
گال عمي الجبير :
ــ تعالي بويه احجي شصار

عصرت ايد كنان مسح على ظهري بخفه وهمس :
ــ احجي لا تخافين أنا اخوج وابوج بصفج ما راح يصيرلج شي

حجيت كلشي صار وياي وشلون اول ماگعدت شفته يخنگني ومن دخلوا الولد كلشي صار لحظة صمت وكنان كل شويه يغلط على ضرغام وجهه صار احمر وهشيم حتى شرايين رگبته برزن گال واحد من اولاد عمامي :
ــ زين هسه شنسوي حتى نسترها

صاح كنان:
ــ اختي مستوره غصبا على اليرضى والمايرضى ما سوت شي هيه هذاك النـ*** هو الي تعدى عليها

رد عمي :
ــ بويه طبعا تگول هيج لان اختك بس الناس كلها درت ولازم تنكتل عدنا وانتَ تعرف عاداتنا
لچنك من بينا وعدنا

گال هشيم بهدوء :
ــ البت بتنا مالنا غرض بغيرنا وبالناس ونعرف  عرضنا احنا موش هتليه علمود نكتل عرضنا وهو ما مسوي شي الغلط بضرغام مو بالبت

ــ ايباه هشيم هذا عود أنتَ العاقل

رد هشيم وهو يخزره:
ــ وشنو هسه صرت مخبل ؟

گال رجال جبير يحسم الأمر :
ــ بويه احنه عدنا الي تجي عليها الحچايه الموش زينه نغسل عـار*ها لچن هيه بتنا بس انا قررت قرار غير الكتـل وحسمته

گال كنان :
ــ احچي عمي شنو هو ؟

ــ البت يتزوجها واحد من زلمنا وتنستر ..

يتبــع ...

4400 كلمه♥️🥹....

ـــــــــــــــ
بخصوص التأخير بنات اعرف تأخر جان لازم ينزل البارحه وانا نزلته اليوم بس مو بكيفي مشغوله قابل شعندي حتى ما اكتب بس
نشغلت هواي وماگدرت اكتب
ياريت تقدرون هذا الشي وما تگولون قصير كل ما انزل بارت قصير حيل وقصير حيل رغم اكتب هواي وهذا بارت حيل طويل
بالنسبه لموعد البارت كله بقناة التليگرام حتى الاشباه خاف هنا ما طلعت هناك نزلتها انضموا وهناك هواي اتواجد أكثر من أي برنامج ..

حسابي الانستا

حسابي التيك توك

قناتي التليكرام مهمه جدا

الباقِياتُ الصَّالِحاتُ:

-سُبحــانَ الله
-الحمــــدُ لله
-لا إلهَ إلا الله
-اللهُ أكبـــر
-لا حَول ولا قوة إلا بالله
-سُبحــان الله العَظيــم
-سُبحــان الله وبِحَمـده
-أستَغفِــر الله وأتوبُ إليه
-اللهُمَّ صلِ علّى مُحمد وآل مُحمد