عزيزي القارئ فضلاً وليس أمراً أضغط تصويت لنشر المزيد من احداث الروايه،
فستان أحمر
تحسين لقمان
لگيت سيارتين شرطه واكفات كدام باب البيت والحجي وزلم كومه واكفه , بلعت ريكي ومهره
صاحت: عزه عزه شصاير.
نطاح :أش أبقن هادئات ولا وحده تنزل , خلي نروح بالفرع أصفط السياره هناك أفضل
واني انزل اشوف شنو الوضع وارجعلكم •
مهره لطمت على وجهه وكالت : يمه يمه منين اجتي هاي المصيبه ,
لك عيني نطاح بسرعه ودينه بالفرع , وشوفلي شنو الامور علمود أذا أطَلب ألامر أسوي اتصالاتي
اباوع على نطاح شغل سيارته وتحرك ليكدام علكيفه عبرهم شويه وداسله بانزين حيل ,
ودخل بالفرع صاحت مهره : عفيه لا تاكل همنه اهم شي الحجي ,
والبنات اركض بسرعه وتعال اليه •
نزل نطاح بدون ميجاوبهه , اباوعله من الجامه يركض بأسرع قوه عنده وبس التراب يهف وراه ,
كتلهه : اكلج عفيه اني خايفه خاف ياخذونه النه
صاحت بيه : انجبي أنتي من ساعه السوده الي اجيتج وردتج ويايه بهل بوكه الگشره
مياده : واني شعليه
مهره : تسكتين وتاكلين تبن احسلج حاليا كلش صاعده عندي وثقي بالله عندي استعداد اطلع
سلاحي واكتلج هسه من دون تردد اكعدي وَ اسكتي احسلج
اني هم صدك بلعت ريكي وحطيت ايدي على صدري وبديت اقره آية الكرسي لان الجو ابد
مايشجع ان ُ احجي واعاند لازم اكسر الشر بسكتوي افضل الي ,
اباوع على الفرع صافي بس اثنين جهال كاعدين يم باب بيتهم يلعبون بالتراب مسوين دوائر
ومادري شنو, واني كلبي يدك حيل ماعرف ليش خايفه ماعرف شنو سبب خوفي من الجريمه الي
سويتهه لو خايفه على البنات والحجي ماعرف ماعرف اي شي ,
شويه واشوف نطاح اجه يركض صحت على مهره
مياده : مهره اجه نطاح اجه هذا وينه
مهره : وكعتي كلبي يزباله وينه وينه
اجه فتح باب السياره وصاحت بي
مهره: لك بشر يمصخم خو ماصار شي
نطاح : ماكو شي طلعوا بوخه يمعوده جاين على على ابو شكري ,
تاهمي بأختلاس اموال مادري منين •
اباوع على مهره ضربت رجلهه وصاحت بصوت
عالي : وشصار بس لا أخذو ولك احجي موتتني
صاح بيهه : اي اي اخذو لتاكلين راسي
صاحت : لك اليوم احركهه للدنيه كلهه قسماً بالنجوم ساعتين اذا ما طلع ابو شكري
افركش كلشي واحرك الاخضر واليابس •
نطاح : اهدي مهره شبيج تخبلتي , هسه الحجي يروح وجماعتنه مناك يساعدونه شبيج شبيج
اباوعله من وره كامت تبجي وحاطه ايدهه على وجهه وتحجي : لك نطاح عيوني هذا ابو شكري
تعرف شنو ابو شكري ياما عنده مواقف ويانه ياما ساعدنه بأمور هوايه , رفعت راسهه وصاحت
مهره : بسرعه رجعني للبيت خلي اشوف هاي المصيبه الي حطت على روسنه امشي امشي
يمه يمه راسي
حطيت ايدي على جتفهه لان كلش انهارت كتلهه : اهدي اهدي اكيد هسه الحجي يساعده بس
علكيفج °
أندارت على ايدي ووخرته عن جتفه ولطخته بالكشن مال السياره وصاحت
: فكر ساقطه غبره , اني اطلعج بعد بس خل اوصل للبيت باوعت على نطاح
وكالت: شنو منتظر انت بسرعه فضني يمعود
كال: انتظر الحجي يدك يلا اتحرك منا ماتحرك هيج ماكدر
مهره : شيدك لك نطاح ابو شكري رايح للسجن وانت كاعد تكلي انتظر الحجي
لك طز بالحجي •
اباوع على نطاح ودموعي تنزل ماعرف ليش خايفه من الموقف كله ضرب الاستيرن مال
السياره وعاط: لج ساقطه مهره سكتي بت الكلب غير الشرطه بعدهم هناك غير يرحون
سكتت مهره و بقت عيني عليهه اشوفهه طلعت من جيبهه باكيت جكاير
وسحبت وحده وبدت ادخن , تاخذ نفس منهه وتذب الدخان على جامه
بالي يم ابو البيت والطفله الي ضلت تبجي شنو صار بيهم اجاهم احد لو لا ,
خاف مات كومه اسئله اجتي بالي بس ماكدر اسئل اي سؤال مهره اذا اسئله هسه تكفخني كفخات ما
ماخذته بحياتي سابقا ,
شويه ودك موبايل نطاح جاوب بسرعه ,
نطاح : ها ها حجي بشر راحو لو لا خوما محتاج مساعده
اسمع الحجي عصبي ويصيح مافتهمت منه شي ومهره حاطه ايده على راسهه وحايره ,
كمل المكالمه نطاح وكال : يلا يلا راح نرجع باوعن رئسا تنزلن
كبل ادخلن جوه لان زلم واكفه بره
شغل السياره وعدل المرايا باوعلي وكال: مياده الحجي وصى عليج اكثر ،
تنزلين راسج وكبل ليجوه •
مهره : هم ساقطه وهم غبره وهم خوثه وهم يغار عليهه عشتو اي والله
مياده : اخذي الج وخلي يغار عليج ويحبج لان خانكني كلش ثقي بالله
مهره : الموت يكرفج انشالله ساقطه,
اسمعهه أدردم بصوت ناصي و نطاح يمشي علكيفه بالسياره مهره
كالت : شنو شبيه السياره يمعود
نطاح : خرب البانزين راح يخلص بلكت يوصلنه للبيت
وضلينه شويه شويه نمشي ورجع دك موبايل نطاح رجع جاوب عرفته الحجي من صياحه
ما أسمعه زين بس نطاح
يكله : حجي السياره شويه عوزت بانزين هسه هسه جاين
وسده منه رجع كال : الحجي شبي خبصني خبص ماعرف
شويه شويه تمشي السياره الى ان طلعنه على الشارع الرئيسي مشينه بأتجاه البيت ,
وصلنه للبيت واباوع من الجامه كومة زلم واكفه بالباب ونطاح
يكلي : ستري نفسج يمعوده
مياده : شسوي مثلا شنو اخفي روحي من الوجود والله يالله ,
وكفت السياره كدام الباب باوعت لكيت الحجي واكف و بيده سبحه لافهه على اصابعه
ورافع صدره وعيونه تكتل العايش •
مهره كالت : يلا ننزل بسرعه كبل ندخل
حطيت ايدي على الباب وفتحته , نزلت بسرعه و توجهت لباب البيت انوبه هم واكفين كدام الباب
شلون راح ادخل •
ومهره ورايه واكفه صاح الحجي : شويه شويه سو درب تعالو هنا
انتبهوا علينه ووخروا على صفحه عيوني منزلتهن بالكاع واسمع الحجي يحجي بعصبيه قويه
دخلنه بسرعه للبيت حسيت روحي ردتلي ،
اجتي ياسمين تركض وهي خايفه
ياسمين : لج ها مياده يمصخمه تاليهه طلعتي تبوگين
مهره صاحت : لج نبوك شنو استغفر الله ماما منين تجيبين هاي السوالف
ياسمين : مهره حافظتج حفظ الله يعلم شسويتي بالبنيه
مياده : تعاي يمعوده خلي ندخل انطيني كلاص مي لان راح اوكع بالكاع بالكوه متحمله
كادتني ياسمين ودخلنه للهول , فعلا تعبانه جسمي يرجف من الهبطه وصوت الطلقه والطفله لحد الان
يتردد بأذني اجتي ياسمين و جابتلي كلاص المي بديت اشرب بي علكيفي شويه شويه
واخذ نفس شهيق زفير •
نوكيا السمره : معقوله تعبتي من السوك شسالفه احنه مو نروح ونجي شو ما نسوي هاي العياره
ياسمين : هسه عوفي البنيه براحته منو كلج رايحه للسوك اذا تكليلي كالتلج مهره هي مهره مثل ام مازن
طول عمرهه تحجي وتتصرف جذب ,
مياده : بنات اريد حبايه مال وجع راس شويه تهدي راسي ماعرف ليش راسي يوجعني
نوكيا السمره : انتي خاف واحد متقربلج شي وغمزتلي
صحت بيهه : نوكيا حبابه خليني محترمتج واحبج واقدرج وخلي علاقتنه حلوه
حبابه بدون هاي الالفاظ الي مادري منين تجيبيه ،
ضحكت وكالت : سكتنه عيني سكتنه
اجتي صابرين العبده وصاحت: بنات بنات تعالن للمطبخ نصب الغده يلا يمعودات ورانه سهره
باوعت على ياسمين شفتهه كامت اني هم كمت مشيت بصف ياسمين
وكتلهه : ولج بس لا هنا هم يوميه سهره
ياسمين : لا عيوني قليله، السهره بس بيناتنه اليوم نسوي لمه شويه
باوعتلهه صفح واني مابيه حيل اجاوب ابد دخلت المطبخ وبديت اشتغل ويه البنات
لزمت كدر التمن وكعدت اصب بالمواعين وصابرين تاخذ مني المواعين تودي على السفره
باوعت على الجهه الثانيه لكيت ثريه كاعده تسوي زلاطه كتله : محتاجه مساعده عيوني
ثريه : لا لا يمعوده كملت اصلا , رايحه اخذهه
كملنه تحظير السفره من دون ماينقص اي شي واجتمعنه كلنه على سفره وحده وهاي اول سفره تجمعني بيهم ,
مهره : مياده من تكملين غده اريد جاي مروتج مهيل
صابرين : حجي حجي فدوه لطولك اريد شويه فليسات اريد اطلع للسوك اني ومياده
اباوع على صابرين والحجي ومستغربه ان ُ ليش هي طلبت من الحجي ان نطلع اني وياهه للسوك
اشوف الحجي رفع راسه على الاكل وحنحن وكال : روحي انتي وسوي أي شي
بس مياده ماتطلع •
كمزت نوكيا وكالت :اي عيوني اي يغار الحجي عليهه
صاح: نوكيا هاي من شوكت اني كاعد وانتي تتماوعين بالكلام كدامي
رادت تحجي ومهره كالت : عوفهن حجي عوفهن ذني ساقطات ,
كلت بكلبي هي شايفه نفسه لو لا ماعرف شلون تتصرف وشلون تفكر ,
رجعت راسي بالماعون وضليت اكل , ردت خضره رفعت راسي علمود اشوفهه وينه بالسفره صارت
عيني بعين الحجي , ماعرف ليش خجلت رجعت دنكت راسي بالماعون وكملت اكلي ,
والبنات يشاقن ويضحكن ويه الحجي
ثريه: حجي حجي يكولون صاير تنطي خُمس وغمزت للبنات
صابرين : لا عاد اني سمعت صاير ينطي زكاه بعد مادري
الحجي : هذا الي جاب هذا الحجي غلطان مايفتهم ,
وبنفس الوكت تعرفني بنات الي يجيني وينخاني ارده ؟
ياسمين : لا شلون حجي مطلك يرد واحد ابد ماصايره ولا دايره ربي يحفظك
ويديمك ذخر علينه •
مهره : حجي على هاي الادعيه يستحقن تره كل وحده حمره ويكولون
انت عاد معروف بكرمك وماتقصر •
ضحكت وكلت بكلبي" عزه بعينج يمهره شلون تستغل الواحد "
حتى بالغده والادعيه يجمعن فلوس ويردن ليوره ,
معقوله عكبه فلوسهم راح تفيدهم بالكبر •
كملت الغده كمت من يمهم ورحت للمغسله غسلت وبعدهه توجهت للمطبخ بديت اسوي جاي مهيل
نفس مارادت مهره ,شويه والبنات هماتين كامو من السفره ونقلوا المواعين للمطبخ
واني سويت الجاي ورحت وديته لمهره
شايله الصينيه ومتوجهه للهول واني اسوي: وهذا الجاي المهيل لعيون مهراوي
ثريه : يمه يمه اللواكه
ياسمين : لعد شنو اني مالي كلاص
مياده : ذاك القوري وصبن , صبيت بس لمهره والحجي
مهره : تعاي تعاي يغبره انطيني كلاصي وروحي للحجي
عقجت حواجبي وكتلهه : هو الحجي وينه مو جان هنا
مهره : شبي وجهج صار اصفر تلكي كاعد بالصاله الله يعلم شيسوي وغمزتلي
خدودي صارن حمر من الخجل مو مره مادري شنو, حطيت الكلاص مالتهه كدامهه شلت الصينيه
رحت متوجهه للصاله وصلت اله دكيت الباب
كال : ادخلو محد موجود
دخلت واني ابلع بريكي وايدي ترجف وصلت يمه وكتله
مياده : تفضل عيوني حجي
الحجي : اي يابه صاير عيونج واني ومادري
مياده : محتاج شي بعد
الحجي : شعندج رايحه امشي كعدي كدامي
مياده : ليش حجي عندك موضوع مهم واني مادري بي
ماحجه شي اشرلي براسه على التخم الكدامه اروح اكعد عليه ورجع راسه على كلاص الجاي
اخذ منه رشفه , واني رحت كعدت كدامه كال
الحجي : شنو اليوم بدون بوشيه طالعه
بلعت ريكي لان الحجي بسرعه يگب بوجهي حرت شنو اجاوبه كتله
مياده : لا حجي شلون مالبس بوشيه جنت لابستهه
الحجي: ها ها جنتي وتوصلين كدام باب البيت تشوفين زلم كدامج ماتلبسيه مو
بلعت ريكي وكتله : ماعتقد احد شافني لان بسرعه دخلنه وحتى جنت انت موجود
اباوعله حط الجاي على الماصه وصاح : شنو شنو محد شافج ها شنو محد شافج
وسعد ابن حسنين الي ماشال عينه منج •
رطبت شفايفي بلساني وكتله : والله لا أعرفه ولاعندي شي ويا
كام على حيله وضرب كلاص الجاي وكعه بالكاع كمت على حيلي بسرعه حطيت ايدي على حلكي
صدري يصعد وينزل من وره الخوف تقرب عليه وصل يمي وهمس يم ركبتي ,
الحجي : راح أحرك امه وابو رايحله هسه انطي مهله اربع ساعات يشيل من المنطقه
وانعل روحه ان عاندني ووكف كدامي ,
وخرت ايدي وكتله : شنو يشيلون من المنطقه تره الولد قابل متقصد وباوع
عليه وبعدين هو باوع شسوه مثلا •
بعدني مامكمله كلامي ضربني راشدي وصاح: ان حجيتي حرف واحد بعد ثقي بالله يامياده
احركج واحركه جلبه انعديتي من ذني الساقطات توكفين كدامي وتتراددين مو
عليت صوتي وكتله : انت شنو يعني الي أدافع عن نفسهه معناهه انعدت وصارت ساقطه
رفع ايده راد يضربني واني رئسا حطيت ايدي على وجهي احمي من ضربته بس ماضربني نزله
بسرعه وعض اصابعه وصاح : اخخ بعلي اني الج هين هين يمياده مابقه شي
وخرت عنه واني منزله راسي ليجوه طلعت من الصاله ركض , كبل صعدت ليفوك لغرفة ياسمين
دكيت عليهه الباب كالت : ادخل عيوني ادخل
دخلت عليهه و ذبيت جسمي على جسمهه ودموعي تنزل على وجناتي
ياسمين: يا يا اسم الله شبيج حبيبتي اهدي
مياده : ياسمين تعبت تعبت مروتج طلعيني منا ماريد لا حجي ولا فلوس
ياسمين: هسه انتي منو وياج
مياده : الحجي اكو غيره حضي الاغبر والمصخم الي شمرني جواه من امداني اي والله
ياسمين : والله عمي حضج مثل الورد بس كولي اني الغبره اني الي مافتهم بأي شي
صحت بيهه : يعني شسويله ها شسويله اذا يوكف كدامي ويكلي ساقطه وانواع الكلام
شسويله ها ها
ياسمين : لج ماما هذا كلبه رهيف بضحكه اخلي ينام يحضني واسوي محبس بأصبعي
وهاي تكلي يكلي ساقطه •
سكتت شويه , باوعتلي هزت جتف وكالت عيني وهسه عليمن غالط وبعدين هسه هو
شنو غلط كلج ساقطه شنو الدنيا انكلبت وبعدين يمه شبيهه الساقطه تهي بهي
مياده : انتي اخلاقج تسمحلج ان ُ ينگال عليج ساقطه بس اني لا
وبعدين هو هذا شنو واضحك بوجهه شنو تخبلتي .
ياسمين : انتي اذا تضلين هذا شنو وهذا منو اني اكلج ماراح تكدرين اطلعين
لازم تعوفين كبريائج وكيانج هذا المزروع بيج لازم اضحكين وتلبسين وتهزين
علمود تكسبين الحجي •
مياده : واذا كسبته وين اروح شنو يعني استفاد مثلا
ياسمين : الاستفاده هواي اكو بنات اعرف ياما عدلن زلم ماكدر الوكت يعدلهم
حطيت ايدي على خصري وكتلهه: ها ها وترديني اني مياده الي لا حول ولا قوه ترديني اعدل
الحجي الي متروس من فوك ليجوه بالغلط والحرام
ياسمين : لج ماما المره تكدر تسوي كلشي يعني بين قوسين تكدر تسوي شغلات بليس بليس
مايكدر يسويهن لتضلين غبره اشتغلي وحركي نفسج احسن
مياده : اني اريد اطلع من هذا المستنقع يعني شحجيلج اليوم من بگنه بيت ابو سالم خطيه
شلون ضربه نطاح وبنته الي عفناهه تبجي ياسمين اني من شوكت اسوي
هيج ها ها من شوكت •
حطت ايدهه على جتفي وكالت : الحياة مرات تجبرنه على شغلات احنه ما راغبين الهه
بس لازم نسويهن علمود تمشي الايام المتبقيه من حياتنه ,
يعني مثلا قابل بيدج شي وبعدين قابل مهره اراح تخليج بحالج اذا ماقبلتي
مياده : ماكو شي يجبر الانسان متوهمه ياسمين، لعد الله المن حطلج عقل اذا الحياة وايامه وساعاته ودقايقه وثوانيها
تتحكم بيج يعني على هذا حجيج الانسان صار انكس من الحيوان ,
ياسمين : عيوني اني حاليا راسي راح ينفجر تشربين ويايه لو لا
ولعنة الله على كل واحد يتنعوص و مثقف °
مياده : انتي شنو تخبلتي حقج تكولين هيج لان الحجي وافعاله القذره غاسله دماغج غسل
اندكت الباب و ياسمين صاحت : منو عيوني
صاحت بنيه : لج ساقطه كاعده نايمه
ياسمين : دخلي عيوني دخلي يا نوم ياصخام
دخلت البنيه وطلعت نوكيا السمره كالت
: هاي شنو حقيرات ساقطات مجتمعات من دوني
ياسمين : لج عيوني تعاي تعاي هاي الشريفه دوخت راسي يايمه الله يساعد عقولهم
ذوله الي ميخافون الله وحاطين كورهم وكورنه •
اني كاعده وصافنه عليهن جاوبتهه نوكيا السمره وهي اطلع العلج
من حلكهه وترجعه : عيوني ذوله شبيج من جوه ليجوه شلون الحيه تلدغ وتضم راسهه خوفا
على حياته ذوله هيج ولايهمج يجي يوم الله يشرهم على حبل من هاي التوب •
ضكت ياسمين وهزتله جتف وصاحت :لج عيني انطيني البيره ارد
اشرب واخلص من هاي الدنيا الكشره
اباوع على نوكيا طلعت علج من جيبه وشمرتلياه كالت : هاج عيوني علجي محد يفيدج
غير بس العلج والجتف والصدر والشيشه •
اخذت العلج منهه فتحته وحطيته بحلكي كلت بكلبي
" هو الوضع صاير مادري شلونه بقت عليكم"
اباوع على نوكيا السمره دنكت جوه الجربايه جرت صندوك طلعت من عنده قوطتين بيره
شمرت وحده لياسمين وباوعتلي
وكالت : هيو عيوني الشريفه تردين لو لا
ابتسمت بوجهه وكتلهه : انتي كلتي الشريفه اكيد ماريد
باوعتلي صفح وكالت : يمه يمه الايمان دخيلك ربي
كمت على حيلي وكتلهن : رايحه بالهول افتر و اعزل البيت
ياسمين كالت : عفيه من اطلعين سدي الباب وراج مروتج ,
ابتسمت بوجهه وطلعت من الغرفه اخذت نفس شهيق زفير وتمشيت ليكدام نزلت الدرج علكيفي
واني اباوع على الهول اشوف منو كاعد بي لكيت ثريه كاعده
ثريه : هلا عيوني شنو مانايمه شعجب
مياده : هلو بيج حبيبتي اني مانام الظهر ماحب ماعرف ,
ثريه : انتي مثلي تحبين تتحركين وتشتغلين
مياده : بضبط بضبط احب الحركه انتي شعجب كاعده هنا وحدج بالهول لاتلفزيون ولا شي
رحت كعدت يمهه وكالت : والله ياحبيبتي صافنه بحياتي اريد اعرف وين راح اوصل بهذا طريقي
مياده : سهله اني اكلج وين راح توصلين راح توصلين لحفره ماراح تكدرين اطلعين منهه
ضحكت وكالت : وهاي ياحفره كليلي خلي اطمه من هسه
ابتسمت وكتلهه : اكيد تبقى مجهوله ,
ضربتني على جتفي علكيف وكالت: انتي ليش ماردتي تركصين
مياده: لان شي غلط
ثريه : معقوله اطلعين مثلي ماراغبه العيشه هنا
مياده: شلون ماراغبه العيشه وانتي عندج الدك والركص من الامور الاساسيه بحياتج
ثريه : تره صدكي واعتقدي مجبوره يعني شسوي وين انطي وجهي
مياده : شطلعت هاي شو كلكم مجبورين هسه اني خايفه من حجي مطلك خاف هم يطلع مجبور
واذا ميشرب يرحون يطهرو بهذا عمره •
ثريه: لان فعلا مجبورات غير هاي الحقيقه
مياده : بله احجيلي اسمعج خلي نشوف منو كاتلج ومنو ضاربج صوندات
ضحكت وكالت :اني حياتي جانت نعيم خير وبركه بس بسبب طلاك امي و ابويه انكلبت عليه المعادله ووصلت بيه هاي المواصيل ,
مياده : ليش اطلكو امج وابوج
ثريه : اطلكو علمود سلفه جانو مشتركين بهاي السلفه ام خمس ملايين سنين يدفعون بيهه
ويردون ليوره جنه نريد نسافر بيهه اني واختي نتونس بس ابويه جان معارض على سفرنه يكول
عباس : اني اتعب وتالي ماتالي تروح الفلوس هيج هدر ترحن تسافرن بيهه وتتونسن بيهه
ثريه : بابا هسه احنه قابل نريد ناخذهه كلهه مليون ونص كلش كافي نسافر بي ,
وبعدين انت جم بنيه عندك •
ابويه من النوع المتعصب ودائما محظر حزام بنطرونه خاف نسوي شي او تطلع من عدنه زله
رئسا مباشرتا يبدي علينه بالكتل اني واختي •
قاطعته وكلتلهه : اكلج معقوله كل الاباء هيج , ولو هسه اني ليش اروح بعيد شو اني ابويه
نام ويه امي بالحرام واجيت للدنيا من وره شهوتهم الحيوانيه
شهكت ثريه وكالت : جذب جذب معقوله يعني انتي شسمه بت حرام
نزلن دموعي كلتله : اي بت حرام ودارت عليه الدنيا شسوي بعد ,
كالت: حبيبتي مسحي دموعج حسبي الله ونعم الوكيل على كل اب هيج من طاحظ الدنيا اي والله
الي سوت بيج هيج , صح ماعرفج هواي بس مادري ليش حسيتج طيبه ونقيه
حطيت ايدي على جتفهه وكلتله : سولفيلي كمليلي عنج
كالت : والله عاد كتلج على طبيعة ابويه شلون جان ويانه , وكولي عيني اجت ايام وراحت ايام
سكتنه اني واختي عن سالفة السفر او بالاحرى ملينه منهه لان شفنه ابويه بده يتجاوز علينه
وقافل كلش على هاي السالفه سكتنه وماحجينه , اجه يوم استلام السلفه واستلموهه خمسه
بالعدله , امي لازم تاخذ مليونين من السلفه لاخوهه لان اخوهه مساعدهم بدفع السلفه
ومادري شكد موصل وياهم صارت العركه هنا بين ابويه وامي ,
ملاك : عباس اخويه وكف ويانه بالسلفه ويطلبنه الاقساط وهذا حقه
كام ابويه على حيله وصاح : ادري اخوج مايعرف يكول هاي واكعات لاجل عينج
شنو ماكو رحمه بينكم •
صاحت عليه امي : لك عيني شنو رحمه الرجال غير يريد حقه يعني هسه انت اصفن بينك
وبين نفسك لو ماهو جان احنه ماخذنه لاسلفه ولا اي شي غير هو ساعدنه بدفع الاقساط
شنو عيني شو استلمت السلفه طلعت الك جناحت •
اني واختي واكفات على الدرج نباوع الهم واحنه خايفين لان نعرف ابويه شنو من يتعارك
وامي ليش اجذب عليج يمياده السانه متبري منهه ,وحجايه من امي وحجايه من ابويه وكبت العيطه بنص البيت ,
ملاك : شوف مليونين اخذهن منك مال اخويه وغصبن عليك واطلعهن من عيونك
اباوع على ابويه عيونه صارت بكصته ,تقرب باتجاه أمي و يمياده انطاهه راشدي
اذا هي تنساه اني مستحيل انساه .
عقجت حواجبي وكتلهه : ليش اشوفج مكيفه على ضربة امج ليش ما ضايجه عليهه وهيج شي
ثريه : جايتج بالطريق هسه , وعيني البيت صار نار كامت امي لبست عبايتهه ورادت تطلع من
البيت واني اختي واكفات نبجي اباوع على ابويه صاح بامي صوت وكفهه بمكانهه
عباس : ماطلعين منا اذا ماتاخذين بناتج وياج يلا يلا اخذيهن وخلصيني منهن ,
باوع علينه وصاح : شنو ماتسمعن انتن يلا امشن بسرعه ويا امجن ولا تراوني وجوهجن ابد
باوعنه على امي وصاحت : هم صدك اخذهن لبناتي افضل من مايبقن هنا يم واحد فكر ابن فكر
يلا ولجن كدامي تحركن •
ابويه هي وكالت عليه فكر ابن فكر جات عليهه بالحزام دك دك يعني لحد ألان اذكر شلون كعد
عليهه وبالحزام على بطنهه على وجهه
قاطعته وكلتله : زين انتن شنو صنم انتي واختج اوكفن بوجه احمن امجن خابرن أحد
ثريه : عيني يا نخابر متكليلي, احنه واكفات نبجي ونصيح بعلو صوتنه عسى ولعل يعوفه
ماشوف اله اختي الثانيه نورس تطلع لبره ادك الباب على جوارينه سعدي
مياده : سعدي هذا شنو
ثريه : جيرانه خطيه الولد لحد الان اذكر ماقصر بأي شي جابته اختي واجتي لزملج بابا دك
بوكسيات •
قاطعتهه : اكلج فدوه ابوج رجال وكذا ينكتل من واحد سعدي ,
ثريه : انتي تعيبين على اسمه دخل يوكف كدامج اريدج تشوفين تكدرين تحجين والله يالله
اصلا يصيحوله شقاوجي المنطقه من كثر ما مشاكله وعركاته يمنه ولج مياده عيني هو شلون
سعدي غير يكتل ضخم واسمراني وصاحب عضلات سكتي مروتج سكتي
مياده : زين ابوج شنو ردت فعله جانت
ثريه : اجه سعدي وكف باب الهول
صاح : ثريه لبسي اي شي ستري نفسج اريد ارد ادخل ,
ماجذب عليج يمياده كبل جريت الشال من المحجر وحطيته على راسي ,
واختي واكفه بصفه لا شال ولاهم يحزنون لان طلعت سريع متلحك ,
والله عاد رئسا صحت
ثريه : مروتك سعدي ادخل يمعود امي راح تموت
وماحس اله سعدي يدخل علينه بسرعه ويفرق
امي عن ابويه وجيبه منا ورده منا ومانحس اله ابويه وسعدي واحد يضرب بالثاني ,
احنه كبل ركضنه على امي شلناها من الكاع لبسناهه العبايه والدم ينزل من خشمهه
ومن خدهه كمية الرعب الي شفته بوجه امي محد يتحمله ,
وشلون ما جان اخذنه امي اني واختي كبل طلعنه لبره اجرنه تكسي وامي تون من الوجع توجهنه لبيت خالي ,
وتمشي الايام بينه يمياده وتجينه اخبار ان ُ سعدي بالسجن ابويه مشتكي عليه
ان داخل بيته ومعتدي عليه •
مياده : عزه بعينه لابوج
ثريه : ولج مو بس هنا وعيني اهل سعدي يتوسلون بي ان ُ يتنازل عن ابنهم وماكاعده اذكر
شكد طالب منهم فلوس علمود يتنازل عن القضيه , وعيني مياده وصلت بينه الايام بيت
خالي بخير وسلامه واطلكت امي من ابويه، عاد ايام و كبت العيطه بين امي وخالي
خالي يريد يسافر للخارج ويطالب امي بفلوسه وتره الرجال اله حق يعني حقه يريده زين امي
منين تجيبله راتبهه هو بالكوه اطلع منه مصروف كراوي لروحتهه ولجياته من الدوام ومصروف علينه
عاد صاح خالي : لعد تشغلين وحده من بناتج
امي لطمت على وجهه وصاحت : لك يمصخم وين اشغل بناتي صدك تحجي انت
عدي : تشغليهن يم ولد صديقي عنده بنات الليل وكذا ومرات يحجيلي شغل مرتب وهيج شي
هو وكال هيج وامي كمزت عليه تضربه راشدي وتكله : لك يا أغبر تشغل بنات اختك هيج شغل يصمخم
قاطعته : زين اكلج اهل امج وين جدج عمامه وين
ثريه : كلهم بس اسم وداعتج كلهم تبخروا منو يتحمل وحده عدهه بنات اثنين
اصلا بتفكيرهم هاي وحده عار •
حطيت ايدي على حلكي وكتلهه وشصار كالت : شصار يعني انجبرت بعد الضرب والويل والعذاب
راد يودي اختي نورس بمكاني كمت اني وكلت اني اروح وفعلا رحت شسوي لعد مياده
مياده : بس اكو شرطه اكو قانون ليش مارحتو اشتكيتوا ,
ثريه : سكتي عيوني سكتي المرينه بي اني وامي واختي بس الله يعلم بي شلون جان,
عاد رحت للولد وبديت اشتغل يمه توزيع كهوه للموجودين جان بس هذا قسمي بس بعدين
اطورت الشغله الى ان صرت الدنبكجيه مال السهرات وصولا لهنا لمهره والحجي
مياده : زين خالج شنو ربحه
ثريه : اني الوحيده هسه راتبي الاقل بين الكل لان شهريا يندز مبلغ لخالي ومنتظره
تخلص هاي اقساطه الكشره •
مياده : زين امج اختج شنو صار بيهم
ثريه : اتواصل وياهم من بعيد عن طريق المكالمه وابد ماشايفتهم
باوعت على الماصه الي كدامي لكيت دولكة مي صبيتلي كلاص وشربت
كتلهه : اذا اجتج فرصه انُ اطلعين منا راح اطلعين لو لا
ثريه :اكيد اطلع بس بعد ما أتاكد انُ خالي يضل يوصله راتبه لان اخاف على اختي
خاف اشرد اني ويطلعهه بمكاني •
مياده : ماعرف شنو أكلج بس الله يساعدج والله شنو هذا الذل والضيم كبر لهيج خال
كامت على حيلهه وكالت : كومي كومي نكعد البنات راح تغرب الدنيا
باوعت على الدنيا لكيتهه صدك عصريه وراح تغرب كتلهه : لج هاي صارلنه شكد نلغي
ضحكت وكالت : غير من وره سعدي
ضحكنه سوه وتوزعنه على الغرف اني صعدت ليفوك اكعد صابرين ونوكيا وياسمين دخلت على
صابرين لكيتهه كاعده كالت : ها شو يمي الله يستر
ضحكت وكتلهه : لا عبالي نايمه اجيت اكعدج ، كومي يلا نروح نكعد ياسمين ونوكيا
وفعلا كامت ويايه بسرعه ودخلنه لغرفة ياسمين الريحه مال الغرفه تخنك خنك كلهه ريحة بيره
ووحده نايمه بالعرض وحده نايمه بالطول وياسمين رجليهه صايره على بطن نوكيا رغم
ريحة الغرفه بس جان شكلهن يخرب ضحك , كعدناهن بعد شلعان الكلب
و مشى بينه الوكت بين سوالف وضحك وبين سوالف العشه الى صارت الدنيا دنيا لليل
وكملنه سوالف السهره •
وكلماً راح لغرفته ,
دخلت للغرفه اباوع على صابرين كاعده على الحاسبه ومادري ويامن تحجي باوعتلي
وكالت : تعاي تعاي مياده سلمي على جبيرنه •
بلعت ريكي ماعرف ليش خفت كتلهه : ها لا اني نازله عندي شغله
وفعلا عفتهه بسرعه مادري شنو ادردم ورايه نزلت امشي علكيفي ورافعه اصابعي علمود ماطلع
اي صوت, اباوع يمنى يسرى ماكو احد رئسا فتحت الباب وطلعت لبره بالحديقه مال البستان
اجت عيني على الغرف الي كدامي ماعرف ليش كتلني الفضول اريد اعرف شبيهن وليش هيج
وحد حاطيهن رحت اتمشى بأتجاهن وصلت لشجره مال صفصاف وسمعت حركه يم غرفه
من الغرف بسرعه صرت وره الشجره طلعت راسي شويه من الشجره لكيت الحجي يلف كيلون
الباب مال الغرفه الي بالنص بالسيم , ويباوع يمنى ويسرى
ضليت اباوعله وصدري يصعد وينزل من الخوف كلت شكو ليش هيج ,
وخر عن الباب ورجع يمشي للبيت اباوعله مايمشي عدل على ماعتقد سكران
انتظرته يدخل ليجوه ورحت ركض على الباب , وصلت يمهه سمعت ونين مال رجال فتحت
السيم بسرعه شلون ما جان بس اريد افتحه علمود ادخل
انفتح السيم وفتحت الباب دخلت للغرفه عباره عن زوالي وفراشات بس اكو ونين مال رجال
اتبعت الصوت الى ان وصلت للزوليه الاخيره بالغرفه رحت من الجهه الثانيه لكيت ولد شاب مدنك راسه ليجوه
الدم ينزف من وجه من كل الجهات جسمه يرجف
اضافيره كلهن دم
ملابسه مشككه , قريت اية الكرسي لان الخوف اكلني اكل طلعت
صوت من حلكي هو رئسا رفع راسه واجتي عيني بعينه ضل يباوعلي ودموعه تنزل
واني لازمه صدري من الخوف واباوع يمنى ويسرى , كام يأشرلي براسه على حلكه عرفته
ان ُ يريد اوخر الوصله منه •
رحت على السريع وخرت الوصله من حلكه و اردان الدشداشه مالتي
صار بيهه دم من وجهه •
كال وهو يلهث : انتي منو احجي بسرعه
كتله واني خايفه : مياده مياده خدامه هنا
كال وهو يبلع بريكه : اقسم بالله عرفتج مياده ,
عقجت حواجبي واباوع يمين ويسار والخوف
كاتلني كتله : شنو شمدريك بيه منين تعرفني
كال : لازم نشرد بعد يومين علمود نلحك على ابوج قبل لا يموت
حاولي بأسرع وكت تجيني نشرد منا وجيبي فلوس وياج •
بلعت ريكي دموعي كامت تنزل , كلمات امي كامت تتردد بعقلي ابوج سكير ابوج اغتصبني
وكلمات هذا الولد لازم نشرد ابوج راح يموت •
رجعت ليوره ووكعت قوطيه مال دهن طلع صوت مسموع
يتبع .....
تحيه طيبه:
نلتقي يوم السبت ببارت جديد
و اذا أستمر هذا التفاعل الضعيف من دون التصويت والتعليق من المحتمل ان تتوقف الروايه
لان الحقيقه تقال أني أسهر كل الليل على بارت في سبيل انقلكم لعالم حلو
ومليئ بالاحداث والتشويق
والبارت الواحد يعبر المية قارئ ونسبة التصويت لا تعبر الخمسين !
للتنويه:
حساب الانستكرام الرسمي:tahsin_luqman4
حساب الفيس بوك: تحسين لقمان
خالص مودتي لكم
تحسين لقمان
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!