رواية فستان أحمر الفصل الخامس 5 - بقلم tahsin_luqman

عزيزي القارئ فضلا ً وليسَ أمراً أضغط تصويت،
لنشر المزيد من أحداث الروايه

         فستان أحمر
                    تحسين لقمان

ألگاع كلهه دم ، مَازن منجطل ْ بالگاع ألدم يسيل من حلگه , منو ضربه منو سوه هيج ,

ماشوف شي كدامي حلگي فاَتحته وَ عيوني تذبْ دموع ْ وَ أيدي مصعدته على راسي,

لاَ أعرف أتقدم ْ وَ أشيله وَلا أكدر أرجع ليوره , رفعت ْ راسي باتجاه الباب لگيت الحجي وبيده

سلاح اجه تقرب عليه  لزمني من ايدي بكل قوه گال وهو صاك على سنانه

الحجي : بسچ بچي أحجي شنو سوه بيج گليلي هسه اموته واحرگ روحه وَانعل ابو أبو

أريد احجي ، أريد أحرك لساني مَاكدر أسوي أي شي ,شفت الحجي عيونه بكصته

راح توجه باتجاه مازن الي خلاص غاب ْ عن الحياه حط المسدس براسه ضغط على زناد رئساً صحت بصوت عالي 

مياده : لا لا لا ماسوه شي لا لا '

حسيت عيوني ثگلن مقدمة راسي ثكلَّت أجه صوت سريع ْ بأذني يشبه صوت حفاره مشتغله ’

رحتْ لعالم بَعيد وَاكفه بنص شارع وداير مدايري طيور بيض ريشهن يلمع نظيفات حيل ,

يجن بصفي يقرقرن مافتهم عليهن بس الي افتهمته جوعانات حيل ,

بَاوعت يمنى يسره لگيت علاگه سوده طالع منهه شويه حنطه ,

رحت عليهه وهنه ورايه يمشن فتحته ، عيوني فتحتهن حيل من كثر الصدمه، العلاگه عباره عن

جيش متكامل من النمل ْ لَونه اسود طوخ بده يصعد على ايدي وجسمي. كمت أصيح

" لا وخرو وخروا " أوخر بي يكثر بالزايد , الى ان وگعت بالكاع ، وَ التمن عليه الطيور ينگرن

بجسمي ألى أن كمت شهگت بعالي الصوت 

مياده : يمه بسم الله , باوعت منا ومنا 
غرفه بيضه وكلهه اضويه والفراش ازرك ,

وهوسه مو طبيعيه وَأبر وَأمگاصه , عرفت نفسي اني بالمستشفى . ضليت كاعده بمكاني واني

أرجف ودموعي تنزل على خدي واسئل نفسي شنو صار بمازن بس لا مات , بس لا راح اوكع

بيهه  اني , ماعرف شكد مر عليه من الوكت ودخل عليه الحجي وعيونه عليه يتفحص

جسمي تقرب يمي ’

وكال : بويه يوجعج شي،  شلون صرتي احجيلي اكو شي يوجعج أجيب الدكتوره تشوفج

مياده : حجي فدوه مازن بس لا مات 

تغيرت نبرته .

وگال : هذا الساقط لتجيبين سيرته على السانج لا اروح احشه الج حش ,

وبعدين انتي شنو عندج ويه مازن , مياده ان عرفت عندج شي ويا وماكايله الي خلاص متلومين أله نفسج

جاوبته وصوتي عالي وجسمي يرجف

مياده : حجي فدوه لطولك هو وين اعرفه الولد مصارلي فتره يمهم ,

وانت شلون تضربه ماعندك رحمه متكول هذا انسان لهل درجه طغيت وصرت متفكر بس بنفسك

أجه تقرب باتجاهي وسنانه صاك عليهن لزم ايدي

وضغط عليه حيل : مياده أياج وبالج تلعبين ويايه هيج لعب وبالاخص اني ,

اذيج وحك الخلگج ومتعرفين اذيتي شلون , جري ويايه عدل احسن الج ثقي بالله ,

عتيت ايدي منه حيل .

وگتله بصوت عالي : منو انت وتتصرف ويايه وتلزمني هيج ها منو انت ,

شعليك بيه انت شنو نعمه لو نقمه •

بعدني ماكملت كلامي وضربني راشدي بكل قوته كال وهو

صوته عالي : مياده يصير خير وحك ْ الخلگج للالعب بيج لعب 

كمت ابجي بسرعه واجتافي تهتز , انفتحت الباب شلت راسي لگيت ياسمين اجتي تركض عليه تصيح 

ياسمين : لج مياده يمعوده وكع كلبي عليج
مياده : فدوه ياسمين كليله يطلع بره ماريد اشوفه كدامي

اجه على السريع يمي ، رفع ايده راد يضربني ياسمين شمرت روحهه عليه وصاحت بصوتهه

: لا لا حجي فدوه بداعت ولدك لخاطري حجي عوفهه واطلع بره تهده وادخل

لف السبحه على اصابيعه وعدل الشماغ على راسه وگال : هين هين يمياده اني الج

خله وَ طلع , حضنت ياسمين حيل بكل قوتي وابجي بحضنهه : فدوه طلعيني منهم ماريد لا فلوس ولا اي شي 
ياسمين : حبيبتي شبيدي عليج , بس وداعتج هو هيج يسوي لان هاويج عذري لخاطري

رفعت راسي وصيحت عليهه : شنو اعذره هو منو ويسوي بيه هيج ,

ميسوي بيج لو بنوره لو بناته شعليه اني متكليلي شعليه مليت مليت ,

ولج وصلت بي المواصيل يرفع سلاحه ويكتل انسان لو انتي متهمج هاي السالفه

ياسمين : اكلج هو زلمه معلينه باصله وفصله ومعلينه ان جان يحبج او اي شخص بس اي زلمه

بمكانه يشوف هذا الموقف ويه أي بنيه اكيد يتصرف هيج ,

وذاك الحيوان الي هامج وكاعده تبجين عليه شويه وياخذ عافيتج من الدنيا ،

انتي هسه مو تنوحين عليه لا تكعدين تلعنين بي  

صيحت بيهه : ياسمين طلعي بره بره انتي هم مثلهم ونفس الطينه
حضنتني وكلتلي : كافي مسحي دموعج , ومازن ديتعالج ونقله لغير بيت معليج بي 

مياده : زين هو ليش سوه بيه هيج اني جايه بس خدامه هنا اشتغل وَ أولي لغرفتي ليش تجرئ وسوه هيج  ليش ليش 

ياسمين : كافي اخذ عقوبته ووله , وتعاي اكلج عيوني انتي عقليه بهذا عقلج  ,

شتتوقعين من واحد يوميه مكضي يومه وليلته بالعرك ويوميه ويه بنيه والله يالله. ،

تريد مازن يطلع نبي مصغر سكتي حبيبه سكتي محد يعرفهم بس اني ,

وهذا الشي قليل الي شفتي اصلا ياما اعتدوا عليه ولعبوا بيه لعب ,

بس لهاي الساعه العن بام سعد الي دلتني على الحجي

مياده : اكلج انتي شنو هذا التناقض العندج ساعه تكولين مرتاحه وساعه لا ,

انتي هم صايره مدري شلونج

دتحجي وجان تدخل بنيه ناعمه حاطه عدسات لونهن سمائي ومكياج خفيف كلش حلوه

وطالعه نازكه والعلج بحلكهه كالت : شلونجن صبايا 

اني و ياسمين روحنه طالعه وحده باوعت على الثانيه

كالتله ياسمين : هلو عيوني منو انتي انوبه 

كالت وهي اطلع العلج تسوي طوبه واطكه : شبيكم عيوني غير الدكتوره اني , هسه هي وينهه المريضه

عاينت عليهه من جوه ليفوك وكتله :عيني حضرت الدكتوره لعد اني الكاعده كدامج شنو بياعة خضره مثلا
جاوبتني : اي عيني جايه افحصج 

أجت تقربت علينه رفعت ايده طلعت اصبعهه واشرت لياسمين معناهه كومي اريد اشتغل ,

كامت ياسمين كعدت بدالهه

كالت : ماما وين تحسين بوجع
مياده : ماعندي وجع 
كالت : هاهي مابيج شي , مابيج غير العافيه , تكدرين تسجلين خروج

اخذت السماعه الطبيه طلعت و َسدت الباب باوعت على ياسمين وهزيت ايدي

وكتلهه : من تجيبين دكتوره من باب الشرجي هيج تكون ,

اوف ياربي هي بقت عليهه هو شو الوضع كله خربان

ضحكت ياسمين وكالت : وهسه تلوميني من كاعده اهز بجتفي والعب لعب ,

مننسه هذا الضيم اله هيج 

باوعتله صفح وروحي بخشمي صاعده

كتلهه : روحي صيحي للعضله مالتج خل نطلع 
باوعت عليه
وغمزتلي : اي نشوف النهايه شلون تكون وياج 
ابتسمت بوجهه,

كمت على حيلي اجتي تقربت يمي لزمتني من ايدي ومشينه باتجاه الباب فتحته ياسمين

لكينه العنتين كاعد على الكراسي كدام غرفتي والجكاره بحلگه ,

كام على حيله
كال : خو مابيج شي , اجيبلج شي تردين عصير 

تجاهلته باوعت على ياسمين كتلهه : ياسمين ماريد شي كعدي وسكتي 

صم ايده حيل والسبحه بيده كلت بكلبي
" خلاص حرام راح يموتني "

عافنه ومشى كدامنه اسمعه يدردم " هين هين "

نمشي بممرات المستشفى تلهث لهث , وتجنن والفراشات خير من الله ,
تقربت على ياسمين كتلهه

مياده " كرصيني بالله عليج , معقوله اني بمستشفى شهل نظافه الي تخر من عيونهم

ياسمين : عيوني غير مستشفى اهليه , تردين الحجي يحطج بمستشفى حكومي  وعلى كولت نوره المصريه الحجي فلوووس فلووس 

ضحكت وضربته على جتفهه : صدك هاي شو ماجايه وياج 
ياسمين : لج دستكي نلعب بينه واحنه بالسوك من سمعنه بالصار رئسا رجعنه 
مياده : شلون عرفتو معقوله الحجي خابركم 
ياسمين : لا ياحجي ام مازن كالت لحكو مصيبه وحطت علينه 

كاعده ارجع احاجيهه اندار علينه الحجي عقج حواجبه
وكال بصوت خشن : لتنكنكن جنجن ذبان سكتن وامشن

ندست ياسمين علكيفي كتلهه : ماشالله العضله مالتج مو اذان عنده

كرصتني ياسمين من ايدي معناهه سكتي وستري علينه هسه يتخبل ,

والله عاد اني هم سكتت وصلنه لباب الاستعلامات رحنه للكراج مال المستشفى صعدنه بالسياره ,

وتوكلنه على الله راجعين للبيت وطول الطريق عيوني على الشارع,

اشوف بنات  بكدي واكبر مني كايدات امهن اوابوهن او اي احد من عائلتهن تمنيت اعرف احد

من اهلي والزمه من ايده وامشي هيج بس وين اعرف عنهم شي مشت الدنيا والسنين بيه بعد هذا

الوكت يجوني ، اصلا من ذبوني وراحوا حتى اسمي ميعرفو ضحكت على تفكيري

حطيت راسي على جامة السياره وغمضت عيوني والدمعه بطارف عيني ,

ماعرف شكد مر عليه من الوكت الى ان كعدتني ياسمين

كالت : يلا عيوني وصلنه هسه نلكه هضيمه لاعبه  لعب "

فركت عيوني لكيت الحجي نازل يفتح الباب مال الكراج صحصحت شويه رجعت كتلهه 

مياده:ولج تعاي منو هضيمه
ضحكت ياسمين وكالت : عيوني ام العنتين ام مازن يعني منو

ابتسمت وكتلهه : خاف تشد ويايه ولج والله مبيه حيل احد وبعدين اني قابل كتلت ابنهه والله يالله 

ياسمين ضربتني على جتفي علكيفهه

وكالت :يمه الحجي موجود وتردين واحد يفگ حلكه وياج سكتي سكتي اجه الحجي 

شويه وصعد الحجي حنحن بصوته , جر جكاره ورثهه عدل المرايا باوعلي غمزلي

وكال : شلون صارت ميادتنه 
ابتسمت وكتله : بس وخروا مني واني اصير بخير ونعمه
الحجي : هين هين الدنيا تمشي يمياده واذكرج بكلشي 
حطيت ايدي على يدت الباب ردت افتحهه وانزل صاح :ها ها وين  ؟
مياده : للكبور تروح ويايه يعني ليجوه 
ضرب الاستيرن مال السياره حيل

وصاح : مياده ترجعين ايدج وتسكتين احسلج بس خل نفوت ويصير خير 
كرصتني ياسمين

وكالت : سكتي لج هو هسه راح يدخل السياره وشبيج طايره على البيت هسه هو من حلاته 

رجعت كعدت اشوفه شلون يشرب بالجكاره ويباوعلي بالمرايا وعيونه بيهن خطوط حمر

وصاير نار من الاعصاب بلعت ريكي وسكتت ,

شويه ودخل السياره ليجوه نزلنه منهه اني وياسمين لكينه زيد واكف بالباب الداخلي

مال الهول 
مياده : شلونك عيوني زيد
زيد : الحمدلله على سلامتج ضل بالنه عليج
مياده : شكرا شكرا زيد , درت وجهي للجهه الثانيه  على التخم لكيت تماره تاكل شونذر كتلهه 

مياده : شلونج تماره 
تماره : هلو عيوني ماكدر احجي هواي بس بشريني الشيشه بعدهه لو انكسرت 
صفنت بوجهه مافتهمت كلامهه
كتله : ياشيشه هاي 
ضحكت وكالت : تعاي ماما اكلي ويايه شونذر مفيد لأول ليالي

ضحكت ياسمين وهزتله جتف

وكالت : لا عيناي شيشتهه بعدهه احسن من ذولاك الناس

جرتني ياسمين من ايدي وصعدنه ليفوك لكينه نوره المصريه حاطه مكياج كومه وكاشخه

كالت : ازيك يقشطه حصلك ايه من مازن ,
ابتسمت الهه وكتلهه : عوفيني اني , وين طالعه شهل كشخه 

فتحت الجنطه مالتهه وطلعت علج ابو السهم

وكالت : هو في طلعه غير الرزئ , النهارده رزئي بكير 

تقربت من يمي ضربت جتفي الايمن علكيفهه وكالت

بصوت ناصي : الحاك مطلك لعبلك بمازن لعبه ميأدرش ينساهه طول ايام حياته ,

وها يستي يحبيبتي يمياده عينك على الحاك هو يطلع منه فلوووس فلووس  

ابتسمت بوجهه ورحت دخلت لغرفتي لكيت ياسمين كاعده على الكرسي مال ميز التواليت

وتمشط بشعرهه علكيفهه كتلهه 
مياده : شو هضيمه ماهي لحد ألان معقوله لحكت ابنهه 
ياسمين : سكتي يمعوده هسه تجيج تلكيه فوك راسج,

نزعت ملابسي ورحت رشيت عطر ورتبت الغرفه ، نزلت ليجوه ترست الطشت مي حار وشويه ديتول

وقاصر وصعدت ليفوك وبديت اشطف المكان الي انضرب بي مازن,

كملته بعد تعب طويل كتلهه لياسمين , 

مياده : اكلج ياسمين معقوله الجوارين ماسمعوا طلقه شرطه ماجوي شي
ياسمين هزت ايدهه

وكالت : انتي بيج شي لو ضاربيج براسج يمه افتهمي عاد هذا الحجي مو شويه

والله يالله تكلي المنطقه  '

هزيت ايدي ونزلت الطشت فرغت المي مالته بالحمام ,

طلعت من الحمام لكيت ام مازن كدامي وكفت بمكاني بلعت ريكي من الخوف

كالت :طلعتي من المستشفى نورتي عيني ست الحسن  
مياده : هلو خاله, هسه راح ابلش بالشغل 

ام مازن : يلا بسرعه من فوك ليجوه , اليوم جايتنه ناس مهمه واريد انتي اطلعين اليوم تضيفين

حطيت ايدي على خاصرتي وكتلهه : اعتقد الحجي ميقبل اطلع اني شغلي خدامه انظف واصعد شعليه بيكم 

تقربت عليه ولزمتني من ايدي وكالت : شوفي لج خاف طلعلج سند لو جنح بالحجي ونفشتي ريشج

عليه حرام اشيلج احطج جوه ابطي ومارحمج ابد فاهمه لو لا 

حطيت ايدي على ايدهه

وكتلهه : اي اي هاهيَ فاهمه واليوم انزل مثل متردين 

هدت ايدي تفلت كدامي على الكاع وراحت كلت بكلبي "مادري شكول عليج الله يهديج"

رحت افتريت على الهول لملمت الارضيه وتماره كاعده على تخم تسوي باضافيرهه

كالت 
تماره : عيوني عوفي اني بعد شويه اسوي  
مياده : لا حبيبتي شكرا متقصرين بس كلما وشغله 
تماره : عاد بكيفج عيناي واني هم صوجي
 
رحت للمطبخ لكيت زيد على الميز كاعد وياكل جزر كال 
زيد: شلونج مياده 
ابتسمت بوجهه وماجاوبته على الي الصار بعد مانطي مجال لاحد بيهم ,

كال : اريد استشيرج بشغله 
مياده : كول عيوني 
زيد : سالمه عينج بس اذا تكدرين تكعدين شويه كدامي علمود احجيلج ,
وجهي صار اصفر ,واني اكول بكلبي

" الله يستر شيطلع منهم بعد "

كعدت على الكرسي وكتله 
مياده : تفضل عيني 
حنحن بصوته وكال : اني معجب بياسمين واريد ازوجهه
عقجت حواجبي وكتله : ومنو كلك اني السكرتيره مالتهه ذيج ياسمين فوك تلكاهه دك الباب وكلهه 

رجع شعره ليوره وكال : يبت الحلال , اني ولد شابع ضيم وقهر بدنياي مروتج أسمعيني وأفهميني , 
مياده : احجيلي عنك شويه , شو جنك العافيه شنو من ضيم شايف متكلي 
رجع ظهره ليوره وكال : منين ابدي من امي الخانت ابويه  لو من ابويه الكتل اختي موت وانحكم مؤبد طول حياته
 
انصدمت حطيت ايدي على حلكي

كتله : امك تخون ابوك نتوقعهه عادي بس ابوك يكتل اختك موت ليش , ولكم انتو الزلم هيج

وصخين ولعبان نفس وعباره عن قذاره بقذاره
حنحن بصوته

وكال : فهمي شنو السالفه , امي مطلقه وازوجهه ابويه وستر عليهه
مياده : ليش المطلقه شنو مرتكبه جريمه لو كاتلتله سيد , الله يطين عقولكم كرهتوني بالدنيه كلهه ومابيهه
زيد : انتي شنو ماكو بريك فهمي عاد 
سكتت وكتله : اسفه تفضل احجيلي سالفة امك 

جر حسره وكال : اي يابه جان ابويه كله نفوذ وفلوس وصاحب شركه مال اسماك بحريه ,

اخذ امي مطلقه وستر عليهه  وحبهه حب مو طبيعي والله يشهد ماجان مقصر وياهه بأي شي

تروح ايام وتجي ايام علينه , جنه اني وابويه بالشغل بالشركه بعنه وجبه وراجعين للبيت ,

والله عاد وصلنه للبيت ومن ندخل صنطه البيت والتلفزيون مشتغل وعالي كلش على اخر شي

ومحطوط على اغاني اذكر القناه اسمهه الشباب , ابويه

كال " زيد علكيفك امشي ولا أطلع صوت امشي جيب السلاح من جوه الجربايه "

اني استغربت من كلام وموقف ابويه يعني ابويه ابد مامسوي هيج شي سابقا ,

والله عاد رحت للغرفه باوعت يمنى يسرى مالكيت لا أمي ولا أختي ولاهم يحزنون كبل رحت

للجربايه جريت السلاح تأكدت منه بي طلق وسحبت زناد حيل وحطيته وره ضهري

ورحت طاير لابويه , لكيته كاعد يصعد بالدرج بس علكيفه ,

كلي " تعال لك انطيني السلاح "

انطيته وكتله " يابه سحبت زناد اني "

كال " عفيه بحزام ابو "

صعدنه ليفوك علكيفنه واني مستغرب السالفه لكينه باب السطح مفتوح وبي ونين مال مره

وطكطكه, ابويه لزم ايدي

وكال " ادعي لك ، ابن القندره ميطلع البالي صح "

وصلنه لباب السطح رحنه من الجانب الايمن وكام ابويه دفر الباب بس الله يعلم بيهه شلون جانت

قويه , وادخل وراه ومياده الكه موقف كدامي مانساه بحياتي ابد ,

شال ايده حطهه على وجه

كتله : اوكف هاك اشرب مي , صبيتله كلاص مي وانطيته اله ,

كلت بكلبي معقوله هيج عالم نفسهم لعبان نفس انتي مره مزوجه تسوين هيج ماستحيتي من ولدج من رجلج مادري شكول 

شرب المي وكتله : اي كمل شنو شفتو
وخر ايده من وجه

وكال : لكينه  شاب يمكن حرام يطلع اكبر مني بسنه سنتين , نايم عليهه ماكدر احجي وداعت الحجي صعبه صعبه كلش 

مياده : الله يسامحهه ويغفرله ذنبه ماكدر اكول غير بس هذا , بس وين صفه بيهه الدهر 

زيد :الولد مات بلحضتهه  
مياده : يعني ابوك مادخل سجن لان كتل بس اختك 
زيد : لا ابويه دخل سجن بتلث تهم , موت الولد واختي ساره , وتهمة التجاره باعضاء البشر

شهكت بصوت عالي

وكتله : شنوو انوبه طلع يتاجر باعضاء الانسان , انت صدك تحجي وكاعد ومتقبل ابوك بكل صوره

عامه  واصلا القضاء شلون مخلي لحد ألان يتنفس ماعرف هذا مفروض مو اعدام احرك روحه واحرك كل من يطلع وراه ويدافع عنه 

زيد : خرب يابه انتي شنو قنبله وتنفجرين بسرعه

افتهمي امي وين صفه بيهه الدهر, شالهه ابويه ذبهه بره خارج البيت وخلصنه منهه ومن عارهه الجلبه ,

والولد الي مات اندفن بجوله بس الله يعلم بي 
شهكت وكمت وكفت على حيلي : لك انتو شنو متخافون الله بأي حق تسون هيج ولك

هذا بشر بشر تعرف شنو بشر حتى لو جان غلطان وعدكم حق يمه اكو شي اسمه قانون اخذه

واسلمه بيد القانون 

ضحك وكال : مياده عيناي لو اكو قانون جان عدمو ابويه مو حكمو مؤبد 

رجعت كعدت على الكرسي ودمي فاير رفعت

راسي وكتله : اختك شنو شصار بيهه 
كال : الله يرحمه برحمته الواسعه , جانت تصوم وتصلي ليل ونهار وداعتج مياده السبحه متوكع من ايدهه نهائيا , 

مياده : اي احجي شسوت وكتلهه موت ، شكد جلب ابوك

زيد : مهما صار على اقل احترمي كدامي 

مياده : يولي لجهنم , وكل من وكف ويا وكل من يضحك بوجهه وكل من يصفكله لاي شي يسوي 

زيد : المهم , اختي لزمهه ابويه ويه ولد بالكليه 
عيوني صارن بكصتي

كتله : لحظه يعني شنو جانت تسوي ويه الولد

زيد : ابويه جنوبي عمارجي دمه حار ميتحمل يشوف عرضه هيج ,

وزلم العماره كلشي ولاعرضهم يتعرض للانتهاك لو واحد يوكف ويا ,

فالمرحومه جانت واكفه ويا ولد بالقسم مالتهه

كتله : اي وذا جانت واكفه ويا قابل مسويه شي حرام 
زيد : ابويه ميعرف هيج سوالف ايده والسلاح فجرهه جر من الكليه ,

للبيت وفتشهه ذاك التفتيش راد بس يلزم عليه شي علمود يسود حياتهه ,

مياده : تره هي بنته شنو يسود حياتهه شبيكم انتو

زيد : بين قوسين ابويه يكره شي اسمه  بنيه وجان متشدد ومتسلط ويا اختي بس شسوي المهم عاد

فتش كتبهه لكه بنهاية الكتاب رساله منه مكتوب

بيهه على ماذكر اني اريدج واحبج ومن هذا الكلام , 

مياده : ليش عود بالكتاب 
زيد : حسب ماعرفناه منهه الكتاب جان عنده ومن ابويه كلهه شعندج واكفه يمه

كالت " كتابي يمه واجه انطانياه "
مياده : اي وشنو سوه ,
زيد : شكلج بدون تفاهم جر الاسلاح كافي ماكدر اكمل 

مياده : حسبي الله ونعم الوكيل عليك وعلى ابوك حرامات الشباب الي فدت بروحهه من اجلي ومن اجل عرضهم ودينهم وعراقهم راحو من الدنيا

وانت وابوك بعدكم على قيد الحياه

زيد : اخر جمله كالتهه " الله اكبر الله اكبر 

مياده: اعذرني كايمه اني , واتمنى ماشوف خلقتك واصلا شلون اني كاعده كل هاي الفتره وياك ماعرف

زيد : بس اني ردتج تساعديني وحجيتلج كلشي 
مياده : كلش متوهم مو مياده تساعد المجرمين والقتله
زيد : بس اني معليه بأي شي صار 
مياده : لا انت جنت مشترك بكلشي وحوبة اختك مراح تروح هيج هسه تطلع بيك،  مع السلامه

طلعت من المطبخ  مفوره وعصبيه كلش , وتركت كلشي بي وضايجه ومقهوره من روحي ان عايشه

ويه هيج نماذج , صاحتني خالتي ام مازن

كالت : اني طالعه للسوك تعاي نظفي غرفتي اجي الكاهه تلمع وبدون حركات يلا 

عاد اني ابتسمت بوجهه ودخلت وبديت انظف بكل قوه عندي واطلع حركتي بالتنظيف لان حراره بداخلي قويه كلش

رحت لميز التواليت سفطت الاوراق المهمه بي من جناسي ومستمسكات 

لكيت ضرف ابيض مكتوب عليه مياده ,

كتلني الفضول ليش اسمي مكتوب عليه فتحته طلعتلي ورقه مثل الجنسيه بس مكلوبه على الجهه

الثانيه , شايفه هيج ورقه عند ماما منى شلتهه بيدي وكمت على حيلي ،

كلبتهه على الجهه الثانيه مكتوب بالنص فوك 

             جمهورية العراق             
       البطاقه الشخصيه

الاسم : مياده ثائر كاظم
اسم الاب : ثائر كاظم عبود 
اسم الام : هضيمه جاسب حسون

صحت بصوت عالي رج البيت رج 
مياده : شنووووو هاي ؟

باوعت على الصوره صورة طفله تشبهني

    يتبع ...

يوم سعيد أخواني واخواتي ألاحبه، أسولف شويه وياكم، بالبدايه شكراً للمحبه الكبيره، والرسائل

والتعليقات الجميله، مابيهه شي اذا القارئ الكريم كمل من قراءة البارت يضغط تصويت وبعدها

يعلق أي شي يحبه سواء كلمة شكر أو تعليق متفاعل مع أحداث الروايه ،

وهذا الشي هو رساله للكاتب انُ أستمر في تنزيل الاحداث من الروايه،

وعملية التصويت هي تقديرا للجهود المبذوله من خلال الكاتب للروايه،

مو اكولكم اني متفضل عليكم لا بالعكس اني من واجبي اكتب الروايه وانزله بالوقت المطلوب منكم

واني الممنون

لكن تقديرا لسهر الليالي ولاحداث الروايه،ان ُ القارئ يضغط تصويت

البعض من ألاحبه يسأل، الروايه حقيقيه واقعيه لو من الخيال؟

  بلي حقيقيه وواقعيه وتناقش أهم القضايا في المجتمع العراقي،

ايضا أحد التعليقات يگول:  أكو احداث منريدك تذكرهه، او البارت قصير

ألاسلوب الفني المخصص للكتابه يطلب من الكاتب أن ينقل ويكتب كل شيئ بأدق التفاصيل ،

أما بالنسبه لقصر البارت،أكو احداث اذكرهه بس ماتعمق بيهه اعوفهه للمستقبل القريب فلذلك تكون بعض البارتات قصيره

أليوم حبيت ابلغكم أنُ يوم الخميس والجمعه هو عطله ،لذلك ماراح يكون نشر في الخميس

والجمعه علمود بهاي اليومين اكتب أكثر، وانقلكم لعالم مليئ بالاحداث والتشويق

وبنفس الوقت هاي اليومين نتعرف بيهه على بعض ، ونعمل تاكات للاصدقاء والاحبه

للنجتمع سويتاً في الروايه ..

خالص مودتي لكم، 
دمتم بألف خير
                   تحسين لقمان