رواية فستان أحمر الفصل الثالث 3 - بقلم tahsin_luqman

عزيزي القارئ فضلاً وليسَ أمراً أضغط تصويت،

        فستان أحمر
                     تحسين لقمان

أجه مازن وَكطع كلامنه اني وياسمين گمنه دخلنه جوه مبقه شي وَ تصير الصلاه , رحت لياسمين

شفتهه كاعده على التخم تمسح باضافرهه كتلهه
مياده : شنو شبيهن اضافرج شو تمسحين بيهم
ياسمين : أمسح الصبغ لان مبقه شي ويأذن
أستغربت من كلامهه عقجت حواجبي كتله 
مياده : شنو السالفه ياسمين شنو شبيج يا اذان يعني بس لا تكليلي تصلين
ياسمين : اكيد اصلي وازيدج من الشعر بيت كلنه نصلي اني وام مازن ومازن ونوره المصريه والبنات البقيه ,
مياده : شلون تصلون وتعبدون الله وتوكفون بين ايديه وانتو من راسكم لأساسكم غلط بغلط شرب وعربده معقوله ماعدكم مخافت الله تسون الحرام وترجعون توكفون بوجه
ياسمين : باوعي مياده صح نغلط ونشرب ونهز ونركص بس كلشي اله وكته واضافه لهيج شي كلشي عدنه اله حدوده الخاصه وقت الصلاه الكل تترك كلشي، السكران يدخل يسبح ويفرش مصلايته ويتوجه

لله والمجنب نفس الحاله , والتركص تتوقف بهيج ساعه و تحتشم وتتوجه لربهه علمتنه مهره وقت الفلوس فلوس ووقت الصلاه صلاه

أستغربت من كلامهه ومن طريقة تفكيرهم ماعرف شنو اسوي بس جذبني اسم مهره كتله
مياده: زين مهره هاي منو
ياسمين : هاي المسؤوله عليه بعد ماطورت الشغله من جنت عند بيت الحجي 
مياده : شوكت تكمليلي قصة الحجي 
ياسمين : الايام طويله يا مياده , وهاي قصتي لا شيئ اما قصة نوره المصريه اكثر حزن وتعب ولو تسولفهه الج تشبعين بجي وقهر فكتلج انتي

قصتج لا شيئ مقارنتاً بقصص البنات الموجودات الويانه, اكو بيهن سباعيات شدن حيلهن ولعبنهه لعبه صح لمن فلوس براس الحجي ومازن وفلتن لاماكن بس الله يعلم بيهن وين 
مياده : شعجب مافكرتي تشردين وتخلصين من هاي اللغوه كلهه
ياسمين : حبيبه اني لازمه بنات براسي ومسؤوليات كومه وماكدر اترك ايد الحجي بعدين

اني هسه شنو ناقصني شو عايشه اميره والله لو اخذج لغرفتي تتفاجأين على الذهب والملابس

والتصميم وغيرهه من الامور شكو اشرد متكليلي 
نهت كلامهه بضحكه وهزتلي جتف،
كتلهه واني اضحك 
مياده : انتي شنو سالفتج ويه هزت الجتف
ياسمين : لج ماما انتي غبيه متفهمين شي لازم منا ورايح كلساع تهزين لان من هاي الهزه تحصلين الخمسه والعشره وللصبح 
ضحكت بوجهه  وكتلهه
مياده : والله عندج سوالف انتي , اني كايمه اسوي عصير برتقال واكلج صدك شو احنه مغلسات على سالفة الغده
ياسمين : يمعوده هي منو تاكل ولتعبين روحج هسه ام مازن تجيب وياهه من بره
ابتسمت بوجهه ورحت توجهت للمطبخ فتحت الثلاجه وطلعت اربع برتقالات حجم جبير علمود تصير كميه جبيره واختاريت وين البيهن مي

هواي , وكشرتهن على السريع، جبت الخلاط وحطيتهن بالخلاط , خليت الشكر والمي وشغلت

الخلاط عليهن انتضرت شويه شفتهن خلاص ذابن وصارن بركه اخذتلي رشفه منه الطعم يجنن ,

صبيتلي كلاصين  وحطيت جم ثلجايه بالعصير  ورحت طايره لياسمين , كتلهه
مياده: عصير عصير برتقال يلا هاج بردي كلبج ,
ياسمين : لج اجه بوكته عيوني مياده , وشمرتلي بوسه بالهوى وهزتلي جتف
ضحكت كتلهه : شوكت تبطلين هاي الهزه مادري , جنج صخله دترعش على مراحل الموت
ضحكت وجان تصيح بصوت : لج شنو هذا الثلج
مياده: يعني ثلج هسه هذا هم سؤال تسألي حطيته علمود يبرد العصير 
ياسمين : لج كلشي ولا تلعبين بالثلج يمعوده اني بالكوه كاعده اجمد المي واجمع بالثلج 
مياده: ليش شلج بيهن سامعه اني يجمعون قواطي علمود الناس تعيش عليهن , بس ابد ماسامعه ناس تجمد ثلج  ويجمعون بيهن
ياسمين : باوعي مو المشكله وين انتي بعدج جديده , هاي اكو ناس من تجي تطلب البيره بارده

احنه خو مو نكعد نبرد بيهه فنحطلهم ثلج بالكلاصات واكو بيهم يطلبون المشروب مكاسر حار وبارد وهاي كلهه تجيب فلوس يمه
مياده : خرب يومج ياسمين شكد ماديه حتى الثلج مطلعته من عينهم
ضحكت هي عاد كالت : كومي وخري مني خل اشرب العصير واكوم اصلي
وفعلا ابتسمت بوجهه ورحت عنهه وهي عاد صدك كملت شرب العصير وَ توجهت توضت وبدت تصلي وحتى مازن اسمعه بالغرفه يكبر تكبيرات الصلاه , كلت بكلبي

" والله هاي العائله امرهم عجيب "
سمعت الباب اندكت كلت بكلبي " منو يفتحهه هسه عاد " كلت دخل اروح افتحهه هم ميجيهم احد غريب ابد

" رحت وصلت للباب من وراهه كلت
" عيني منو
اجاني صوت مره كالت : من انعمن عيونج فتحي الباب لج اني خالتج ام مازن
فتحت الباب كتلهه : هلا خاله حبيبتي 
ام مازن: هلا بيج عيوني , شلونهه ياسمين وياج خو ماضوجتج كليلي
مياده: ماضجت منهه بكد ماضجت منج ومن ماما منى جذبتو عليه بكلشي ليش هيج خاله اني شنو ذنبي اعيش بقية حياتي كلهه هيج
ام مازن : اني عاذرتج حاليا دتعالي نفوت ونكعد ونتناقش على راحتنه , عود اني خليت ياسمين ام كصه ام راس، العاهره عود تعلمج وتفهمج شغلنه تاليهه اجي كلشي ماكو
راحت دخلت ليجوه واني امشي وراهه وصلنه للهول كتله 
مياده : شنو تفهمني و على شنو تبلغني على شغلكم لو البيت الكالبته دعاره لو على تصرفاتكم  وافعالكم القذره وفوك كل هذا متستحون الكم عين تجددون وتحطون عينكم بعين الله ولاكأنه صاير شي ابد ,
باوعت عليه وكالت
ام مازن : اكلج عيوني اني اريد ارتاح دجيبيلي مي واني افهمج
مياده : راح اجيبلج المي بس شنو تفهميني الكتاب واضح من عنوانه انتو شنو وشنو تسوون .
توجهت للمطبح بسرعه , و اخذتلي كلاص نضيف وترسته مي بارد ورحت عليهه : تفضلي

اخذته مني  تشرب وعيونهه عليه تأشرلي بحاجبه على الفراغ الي بصفهه على التخم معناهه كعدي هنا ,

رحت كعدت يمهه نزلت الكلاص جان تكول 
ام مازن : شوفي حبيبه انتي هسه جبيره وعاقله وتفهمين الصح من الخطأ صح لو لا
مياده: بلي صح واني اعرف انتو الكاعدين تسو اكبر غلط وحرام هم
ام مازن : خل اكمل سكتي , المهم واحجيهه الج بالقلم العريض احنه ناس بس يصير الليل نشغل

الديجي مالتنه وكلما يصب كلاص بيره, و يكوم يهزله شويه وياخذ البنيه الي يريدهه ويتوجه لوحده من الغرف
قاطعتهه : انتي عود المره الجبيره يطلع منج هيج , لعد الصغار شيسون
ماشوفهه اله تجر شعري حيل وصاحت ,

ام مازن: من احجي اني تلصمين لحد ما  اني اكمل كلامي واياج تفكين حلكج من تشوفيني اكل تبن فاهمه لو اعيد , هزيت راسي بمعنى بلي

ام مازن : اي عيني اكمل , هذا شغلنه نهز ونحصل فلوس كل وحده تهز صدرهه بطنهه شتهز خل تهز معليه بيهه كلما تهز ألي تريده تحصل الخمسه والعشره وغيرهه وغيرهه وَ تكون نفسهه وتصير شاطره وهسه هذا شغلنه وعرفتي ومن عندي

تردين تضلين ويانه اهلا وسهلا حالج من حال البنيات , اما اذا متردين فيايمه ذيج الباب كدامج

والله وكل الملائكه وياج لتتوقعين احد يوكف بوجهج وروحي باتي بالشوارع وشيصير بيج خليصير  والقرار قرارج

مياده : انتي لزمتيني من ايدي التوجعني ,تعرفين بيه ماعندي معيل واذا ابقى بالشارع اصير بالرجلين بس ماكول شي غير حسبي الله ونعم الوكيل عليكم , وشيصير بيه انتي تتحملين مسؤوليته 
ام مازن : لا عيوني اني شعليه مره كاعده بيتي وفاتحه بابي للكل شو انتي مجلبه ,

ولتكليلي يتيمه وحالي يقهر ومدري شنو كلنه نفس حالج وبعد اضعاف من حالتج بس شنسوي تقبلنه

الامر وكمنه نهز للرايح وللجاي ونضحك بوجوه العالم ونبتسم بوجهه الحاقد علمود تمشي حياتنه بصوره طبيعيه 
مياده: مادري شكلج خاله , الله يغفرلكم  اني كايمه احضر الغده الي جبتي 
ام مازن : اي عفيه صيري شاطره وسباعيه توكلي على الله روحي يمه 
ابتسمت بوجهه ورحت للمطبخ جايبه دجاج شوي من ريحته مبين طيب, والجلد احمر مكسب سويت

امور الغده زلاطه وطرشي , اجتي ياسمين تمشي وتغني تفرحون افرحلكم لزهور حسين كتله 

مياده : شعجب تغنين لا وتغنين لزهور حسين , 
ياسمين : ضحكتيني احنه كلنه نغني لان كل يوم وحده تغني بالسهره 
مياده: عوفي السهره اني حاليا كملت تحضير السفره مال الغده شنو اسوي
ياسمين : لعد عيوني تعاي حطي على ميز الطعام ,وهسه رايحه اصيحهم واجي 
وفعلا راحت واني عاد جبت المواعين نزلتهم من الكاونتر حطيته على الميز دقائق ودخلو مازن وام مازن للمطبخ وبعدهم اجتي ياسمين وكعدنه كلنه على السفره

ام مازن : اكول ياسمين خابرتي نوره المصريه شنو تأخرت هاي 
ياسمين : هسه اكمل غده واخابرهه تلكيهه نايمه بفراش مدري منو
مازن : يمه الحجي بعد جم يوم يجي النه يزورنه ويتطلع على امور الشغل
ام مازن : اي هلا بي خل يجي تزورنه البركه , هاي المره مياده الحلوه تستقبله 
هي وكالت اسمي وكعت الخاشوكه من ايدي بسرعه باوعتله واني مرعوبه
كتلهه : اني شكو ياستار خير 
مازن : الفاظج اختاريهه عدل من تحجين 
مياده: مموجهه الكلام الك , بعدين انتو كلتولي  اني اضل بس خدامه شنو التغير
ام مازن : اني كاعده اكلج تستقبلي ماشامرتج بحضنه يلا اكلي وبلا لغوه
وفعلا رجعت عيني على الماعون جريت خبزه وبديت اكل ,ومر علينه القليل من الوكت بسالفه

بضحكه الى أن كملنه الغده كمت سويت جاي مهيل معدل ,وقدمته الهم وصلت لمازن كتله ,

مياده:  أنتظر يبرد يلا أصبلك

اندكت الباب طلع مازن فتحهه واني كاعده بصف ياسمين نسولف عن كصات الشعر
ياسمين : باوعي مياده اني اكول تكصي من الطارف وبس 
مياده: ليش عود بس من الطرف يعني شنو ارادتج بهاي الخطوه
ياسمين : اولا مكفش وثانيا علمود يطول بعد اكثر وبراحتج انتي عيوني
دخل علينه مازن ووراه بنيه لابسه شال اصفر وبشرته كلش سمره والعلج يلعب بحلكهه ضحكت بصوت عالي وكالت : مساء الفل عليكم يحلوين 
ياسمين : حبيبتي نوره هلا ومية هلا
رجعت باوعت عليه وكالت وهي
طابگه حواجبهه : دي البت مين
مياده: اهلا نوره اني مياده خدامه هنا 
ضحكت وكالت : انتي بتعملي خدامه هني لو رئاصه متلنه 
ضحكت على طريقة كلامه اول مره اقابل واحد مصري كتلهه : لا عيوني وداعتج خدامه
ياسمين : نوره عيوني هاي مياده عزيزة ام مازن ماريدج تضوجيهه 
نوره المصريه: بعنيه التنتين بتدللي انتي ومياده وحاكه ام مازن , دلوئتي اني بروح انام لان تعبانه اوي اوي 
ياسمين: اضاهر رزقج البارحه جبير
ضحكنه كلنه وكالت نوره : كانت ليله حلوه اوي , هو بيتئرب عليه ويئولي " كلما تصيحي كتير ازود عليكي الفلوس " و ها انا امامكم صوتي خلاص مفيش
ياسمين : لعد روحي ارتاحي عيوني
باوعت عليه وكالت : من رخِصتك مياده بروح انام
مياده : حبيبتي نوم العوافي
درت وجهي على ياسمين الي صافنه ومبتسمه كتلهه : ها وين صافنه 
ياسمين : افكر بحال امي وين صفه بيهه الدهر 
مياده : صدك مو طول دنيا ضهر ومحد ماكو كمليلي وين ماوصلنه
ياسمين امري لله : عاد كتلج طلعت امي وام سعد قبلي واني طلعت اخر وحده شو ماشوفنه اله

ويتقرب يمي وهو بكوه واكف ,

:اني اريدج تجين منا ورايح ويا امج هواي

اني عاد سكتت لا كدرت اكله ليش وافتهم منه السالفه ولاكدرت اصيح امي وابلغهه

لبست شحاطتي وطرت وره امي بس اريد افلت لان رجال غريب ولاعرفه ولايعرفني شنو باقيه

يمه , عاد والله رجعنه ومشت الايام طبيعيه وصرت يوميه اروح لبيت الحجي اني وامي من

الصبح أنظف البيت ونرجع ومرتاحين كلش وشغلنه بس صباحي 
قاطعتهه وكتله : شعجب الحجي ماطلع كدامج بهاي الفتره كلهه
ياسمين : عيوني جايتج بالطريق ,جان الحجي دومه نايم عرفت عن طريق الخدم الي ويانه , ان ُ

يجي بليل متأخر ودربه ميشوفه ، وعيني تروح ايام وتجي ايام و مياده جان يحولنه للشفت المسائي احنه قلقنه اني وامي بس عادي گلنه

معلينه , وصرت كلما اروح الكاه كدامي كاعد على التخم ابد مايعوفني نضراته تاكلني اكل صاح امي على صفحه مدري شحجه وياهه وَ أجتني

كالت
ام ياسمين : اني رايحه لبيتنه اجيب للحجي شغلات انتي خليج هنا
ياسمين : ماما شلون تعوفيني هنا لازم اروح وياج 
ام ياسمين : ماكو روحه ضلي هنا وهسه اجيج يلا وخري 
عافتني وراحت , زين وين انطي وجهي وهذا موجود واكلني اكل بنظراته الحيوانيه دقايق مرت عليه، ماحس اله وهو يصيح بأسمي رحتله 
ياسمين:ها حجي صحتني
الحجي : تعاي بويه نضفي غرفتي 
استغربت من طلبه لان اني مو  مسؤوله على غرفته على غير خدامه اصلا, كتله
ياسمين : حجي غرفتك مو عليه ولا ضمن جدول شغلي 
الحجي : منا ورايح صارت شغلتج ,ويلا دخلي نضفيهه بلا كلام 
شفته يحجي وبكوه واكف خفت من عنده ليروح يسويلي شي , مياده مرات الخوف يسيطر عليج

وتردين تخلصين كلشي بس علمود تخلصين من الخوف او من المخوفج عاد دخلت للغرفه ماحس اله ربع ساعه و دخل ورايه وقفل الباب وشمر المفتاح

على الكنتور , هنا أني خربت خلاص صياح  وبجي
 
ياسمين : هاي شنو شديصير عفيه افتح الباب
الحجي : لتخافين هي شغلة خمس دقايق
هنا مياده العصيبه صعدت عندي فول : شنو خمس دقايق أشايفني كدامك كلب حيوان افتح الباب

تقرب عليه وهو ينزع بدشداشته ,ويسبني ويغلط بانواع الغلط , جنت اصيح باعلى صوت عندي بس ميفيد مياده  الى

ان استسلمت اله و كسر واهسي بالحياه كلهه, 
مياده: زين ياسمين امج وين راحت متكليلي شلون تعوفج هيج وتروح
ياسمين : المشكله ياريت بس هيج 
مياده: لعد شنو
نزلت دموعهه حطت ايدهه على وجهه وتبجي

كالت : يامياده امي هي الباعتني للحجي جان كله اتفاق منه هي ويا
شهكت وحطيت ايدي على حلكي , دمعتي نزلت كلشي ولا تتعرض للغدر من الانسان الي تحبه

وتأمن بي وتعتبره قدوه بحياتك كلش واكفه السالفه , حطيت ايدي على جتفهه وكتلهه :
مياده : خلاص مسحي دموعج حبيبتي الله ياخذ حقج
ياسمين : اوف اوف يامياده وشسولفلج على الطريقه الي اتزوجني بيهه
مياده: شنوو يعني انتي هسه مرت الحجي
ياسمين: جنت بس طلكني وحبسني بيد ام مازن
مياده :مادري شنو  أكلج بس الله يساعدج واضاهر وراج مصايب خير من الله
ياسمين : يمعوده كومي راح يصير العصر ولتخافين هذا الحجيته الج جزء كلش بسيط من حياتي
مياده : كومي عيوني كومي الله يساعدج , ردت اكسر الجو وياهه كتله
مياده: يلا شو هزيلي جتفج ميلوكلج الحزن
ضحكنه, كيفت هي رئسا هزتله جتف ,

صعدنه ليفوك بغرفتي بدت ياسمين تتحظر من تسريحه ومكياج وفستان , كلتله 
مياده : اكلج اني شسوي يعني بالسهره تره مافتهمت كلش زين
ياسمين : حبيبتي مراح تسوين شي , مجرد تحطين كلاصات وهيج شغلات وهسه ننزل اني وياج نحظر كلشي 
ابتسمت بوجهه وفعلا كملت كل شغلهه وتحظرت بشكل كامل ونزلنه سويه لكينه ام مازن كدامنه

لابسه جبه ومحمره كلت بكلبي

" والله زين تتحمرين جماعتج بمكبرة النجف بالفتحه الثانيه "

ام مازن : ماما مياده بسرعه كملي شغلج وصعدي فوك وقفلي الباب عليج ,

واستعجلن بالشغل عندي رجال مهم اليوم يجي

مياده : هسه نحط كلشي واصعد ،روحي انتي
ام مازن : طبكي الباب ورايه رايحه اني اجيبه واجي ميندل البيت

صار الليل و بده تحضير الميوزه بكلاصات وقواطي البيره , وورد احمر وفرشنه الفرشه

الحمره من باب البيت لباب الهول وطلعت نوره المصريه من الغرفه بكامل مكياجهه واناقتهه وفستان لونه اصفر يضوي على جسمهه 
نوره المصريه : انتو بتعملو ايه , محتاكين حاكه اعملهه معاكم
مياده : حبيبتي كملنه كلشي روحي صبغي وتعاي كعدي 
نوره المصريه : وانتي بتصيحي ليه, لتنسيش مئامك لا واللهي اركعكي لبطن مامي 
سكتت وبلعت ريكي كلت بكلبي : عزه بعينج هم سمره طوخ وهم لابسه اصفر وهم مصريه وهم ترادد حرام تاكل بشر هاي " 
بدت اجواء السهره شويه شويه تصير الى ان كلتلي ياسمين روحي صعدي اجه رجال ام مازن ,

ماكدرت اصعد ليفوك لان الدرج يم الباب ففتحت باب غرفة ام مازن دورت منا منا اريد اختل

ودخلت جوه الجربايه بس اريد اخفي روحي من الوجود
, وماحس اله ام مازن تدخل للغرفه هي والرجال ويتوجهون للجربايه واشوف من جوه الجربايه ام

مازن تنزع بملابسه وهو يبوس بيهه الى ان ناموا ثنينهم على الجربايه بهذا الوكت ماحس أله وتجيني الكحه
طايره ردت اسيطر عليهه بس ماكدرت ابد حطيت ايدي على وجهي وادعي بكلبي
"ياربْ ياربْ ماسمعوني "
صارت صنطه كلش ماحس أله رجال يباوعلي من فوك الجربايه عيونه مخوزره كال بصوت خشن :

ام مازن عيوني منو هاي الحلوه ..
 
طلعت كل جسمي من جوه الجربايه وكفت على حيلي كدامهم , وجسمي يرجف خوف من خاله ام مازن ,

كامت عليه ركض هي وبالملابس الداخليه جرتني من شعري حيل وصاحت :
ام مازن : لج تباوعين على شرفي بت الكلب انعل ابوج اليوم
مياده : خاله فدوه , بالغلط ودخلت لغرفتج والله جنت مستعجله
ماحس اله تجيني كفخه بيدهه على حلكي وكفخات على وجهي وبطني وتصيح 
ام مازن : بت الكلب , اراويج اليوم التربيه شلونهه , جرت شعري ولطخت راسي بالكنتور حسيت بدوخه قويه ,جرتني من ايدي فتحت الباب

مال الغرفه وشمرتني بنص الهول , وكالت بصوت يهز البيت هز: نوره , نوره وينج وينج يلجلبه

تاخذين هاي وتحطيهه بمكانهه واني باجر اعرف حسابي وياهه شنو , وطبكت باب الغرفه بوجهنه

بكل قوته , طلع مازن من غرفته عيونه بكصته شافني كدامه اجاني ركض شلت رجلي وكرفصت روحي وحطيت وجهي بين رجليه احمي نفسي

منه , اجاني كال بصوت عالي : بت الكلب شتسوين بغرفة الحجيه, دار وجهه عليهن كال : انتو شنو صنم لو صارلجن كومه ما دازجن على الحجي يجلدجن، تاكلن تبن وماكو وحده تدخل

برزق الثانيه , وانتي كومي لغرفتج بسرعه فكر بت الفكر , تفل عليه وراح 
اجتني نوره كالت : انتي  بتعملي بروحك ايه , مفيش حده بيحط روحه بالنار يحلوه
كتلهه واني ابجي : نوره اذا تكعدين تذبين سم بوجهي , ولي عني باوعت على ياسمين كتلهه
: عفيه تعالي صعديني لغرفتي , رادت تتقدم بأتجاهي منعتهه نوره المصريه ,وكالت
نوره : مفيش داعي انا حاضره هني وانا بساعدهه وها ياسمين يحبيبتي طلعي بت بدالي الليله مش عاوزه ركاله اليوم 
تقربت باتجاهي وكومتني من الكاع ورحنه لغرفتي دخلت وقفلت الباب , انتبهت عليهه راحت للميز اخذت تفاحه ,

ومددت على الجربايه اني هم اخذت تفاحه وياهه وامسح بدموعي رحت للتلفزيون وشغلته وافرك بوجهي والم بشعري كلت

بصوت عالي : الله لاينطيج يام مازن 
نوره : تره لها الحق بتصيح وتحرق روحك هو انتي بتعملي  ايه في الداخل 
مياده : لج نوره كاعده اصعد بس همَ صارو قريبين على الباب زين اني بس ردت اخفي روحي لان ادري مراح ترضى اذا شافتني وختلت جوه

جربايته واني شلون حظ عندي بين قوسين حظ المطي ماعرف انتي كاعده تفتهمين عليه لو لا

نوره : لا بفهمش القليل انا بعرف اتكلم عراقي بس بالقليل 
مياده : لعد احجي وياي عراقي ومصري عادي علمود اني افتهم عليج اكثر 
نوره : حاضره يست الحسن
تقربت منهه وكعدت على الجربايه تربعت كتلهه : شنو رأيج تحجيلي عنج شويه
نوره : انتي مجنونه لو فيكي ايه , كيف عاوزه مني اتكلم عن نفسي ليكي 
مياده : لا عادي تره , يعني مثلا شلون وصلتي للعراق 
نوره : تمام ,
كنا انا وَ مامي وبابي حاضرين سفره سياحيه هِنا في العراق عام 2014 لمرقد الامام الحسين عليه السلام ,

هي هِنا ضعت عن مامي وبابي صرت بصرخ بنادي باسمائهم لكن مفيش ابدا اي جواب وبأختصار  عملت خدامه باحدى الفنادق

وحصلت على مساعده الكبيره من اهالي العراق لكن بقول ليكي كانت بتواجهني مصاعب كبيره

لكن الحمدلله لربنا الكريم التقيت بحاجه مطلك وهو الي احضرني لهِنا , قطعت كلامهه بضحكه وكالت. :حاولت اتكلم عراقي
ضحكت على شكلهه وكتلهه: لا عادي ماكو اشكال , زين الشرطه الامن مادخلوا بيج
نوره :  مفيش امن
مياده : والله ولا عاب السانج حجيتي الصحيح والبكلبي 
رجعت كتلهه : زين انتي حاليا شكد عمرج 
نوره : 29 عام
مياده :نوره اني مياده , وبديت احجيلهه قصتي , قاطعت كلامي
وكالت : ابوكي بتمناه امامي لا قتله خلاص كيف يتركك في الميتم ,حسبي الله و ونعم الوكيل

مياده : دتعاي نباوع فلم ونكسر هذا الجو الكئيب , وفعلا بدينه نشوف فلم مصري على روتانا

والاغاني جوه والريحه والضحك صاير بفلس , قضينه الليل بضحك وشقه ونوره طلعت انسانه

نبيله وطيبه , نمنه وكل وحده نايمه بشكل عكس الثانيه , ماحسيت اله وصار الصبح واسمع عياط جوه , كمت نزلت من الجربايه باوعت على نوره نايمه بسابع حلم ,

نزلت الدرج واني افرك بعيوني واعدل بشعري, لكيت خاله ام مازن تتعارك هي والرجال تكله

ام مازن : فدوه اياد اطلب غيرهه ماكدر انطيك مياده , 
اياد: مو بكيفج ادفعلج فلوس اكثر من البارحه بس اريد مياده مدري شسمهه الي جانت جوه الجربايه وبس يوم واحد ماريد شي 
ام مازن : تحلم تشوف مياده , ويلا اطلع بره مو صوجك صوجي اني كبرت وجهك وحجمك
اياد : لج عاهره لتنسين نفسج انتي منو تره بنفخه وحده اسد البيت على راسج 
ام مازن : ولك عيني البنيه صغيره متفهم شي اصلا ,
اباوعلهم من الدرج دفعهه واجه باتجاه الدرج من خوفي كمت ماعرف شنو اسوي دموعي وحيدهن جرن

على خدي صعد الدرج لكاني كدامه كال : بعد كلبي شو تعاي ويايه , لزمني من ايدي وجرني عليه و صحت  بعلو صوتي 

مياده : مازن نوره ياسمين وينكم وخر عني عاد 
يجر ايدي ويمشي

: امشي لج بت الكلب , اني اعوفج هاي اذا جنت زوج 
ام مازن تصيح وتجر بي وهو يجر بشعري واصيح  عليه ولا مهتم ابد يكفر ويجر بيه,

بهاي الهوسه ويجينه صوت يهز البيت هز بس صوت رجولي خشن

: لك كلب ساقط, تمد ايدك على بنات الحجي 

اشيل راسي اباوع الكه رجال مشورب وعيونه نار وصاك على سنانه والسلاح بيده ،

                  يتبع ...

لا تنسوا التصويت والتعليق لنشر المزيد،
حساب الانستكرام الرسمي: tahsin_luqman4
خالص مودتي لكم
                   تحسين لقمان