عزيزي القارئ فضلا وليس امرا اضغط تصويت لنشر المزيد من احداث الروايه،
فستان أحمر
تحسين لقمان
حطيت الثاني مانفتح وصلت للخامس انفتح رئسا ابتسمت ردت افتحهه بس سمعت صوت من ورايه
تبسمرت بمكاني بلعت ريكي و كلت بكلبي منو ؟
درت وجهي ليوره لكيت ثريه حطيت ايدي على كلبي وكلت بصوت مسموع الف الحمدلله ياربي
كتلهه علكيفي : لج شعدج هنا يمصخمه مروتج لايشوفج احد يمعوده ,
اباوعله تباوع منا ومنا كالت : لازم اسد الباب وراج مال الغرفه لان من يصير الفجر يكعدون
الحراس فأكيد كلهم راح يشوفون الباب مفتوح مال الغرفه و يسوهه عرس هنا بالبستان
وخاف بهذا الوكت انتو مامسافرين لازم اقفل الباب وراج علمود محد يحس
ابتسمت بوجهه ورحت حضنتهه •
كتله : شكرا ثريه ربي يحفظج ماعرف شسويلج
وخرتني عنهه وكالت : روحي روحي محميه بجاه النبي معليج روحي
درت وجهي ورحت لباب الغرفه فتحته علكيفي ماكو صوت هذا الولد
كلت خاف نايم او اي شي ضليت اتمشى بين الزوالي واني اصيح
علكيفي : يولد يولد وينك
بس ماكو اي صوت من عنده استغربت وينه هذا ضليت اتمشى بين الزوالي الى
ان وصلت للزوالي الاخيره, لكيت الكرسي الي جان كاعد عليه فارغ ماكو احد كاعد عليه ,
وبس الوصل موجوده حطيت ايدي على حلكي الولد وين راح ووين الكاه شلون بلوه هاي
كاعده ارجع للباب علمود ابلغ ثريه بس اجتني همسه بسيطه كلش ضعيفه وكفت بمكاني
درت وجهي ليوره ماكو احد استغربت شنو الموضوع شكاعد يصير
كاعده اسمع صوت بس ضعيف ومن غير اتجاه الي اني بي
اتبعت الصوت علكيفي اباوع للكاع لكيت قطرات مال دم حطيت ايدي على صدري
وضليت اتبع الصوت وقطرات الدم الى ان وصلت يم زوليه من الزوالي و انكطع الدم والصوت صار قريب
أتقربت بأتجاه الزوليه وكلت : منو هنا
اسمع واحد يصيح اخ و يون من الوجع بس ماكو احد كدامي غير بس هاي الزوليه وبصفهه
مجموعه من الزوالي درت وجهي كاعده ارجع بس وكفت بمكاني رجعت باوعت للزوالي الي مكومه
كدامي حسيت ان الصوت كلش قريب من يمهن رحت تقربت عليهن مالكيت احد وخرتهن بديه
شويه وطلعلي الولد كاعد على كرسي مجتف و منتهي كله دم ومجلخ تجليخ وبطنه وحلكه ينزفن
دم , شهكت ورحت لزمته على السريع
مياده : يا يا اسم الله الزهره لك شبيك يمعود منو هيج مسوي
اريد افتهم من عنده شي ماكو بس يون ويحجي كلمات متقطعه اباوع لصدري يصعد
وينزل من الخوف رطبت شفايفي •
وكتله : تكدر تكوم لو لا
اريده يحجي مايكدر اشرلي براسه بمعنى اي
كتله : شلون تكوم وانت بهذا وضعك يمعود هسه اريد اعرف بطنك شلون أوكف منهه
الدم منو مجلخك هيج تجلخ •
بالكوه كدرت افتهم من عنده : م مي انطيني م مي للازم ن نشرد
باوعت للمكان الي اني بي اريد بطل مي او كاسة مي ماكو
كتله : عفيه هسه منين اجيبلك مي لازم تعاوني شويه علمود تكوم ونطلع منا قبل لا يكعدون
فتحت ايديه ورجليه حاولت اكومه من الكرسي بس ابد ماكدر جسمه متكسر تكسر
رحت للباب لكيت ثريه تباوع على كل ركن خاف احد يجي
كتلهه : هذا مكسري تكسر واريد اكومه ماكدر شسوي
كالت: تعاي اني وياج نتعاون الى ان اطلعون باب البستان
جرتني من ايدي بسرعه ودخلنه عليه اباوع لثريه رئسا شهكت
وصاحت : اوي اوي يمحمد يربي هاي شصاير بالولد
كتله : لج شلون راح نشرد بهذا حاله ماعتقد نكدر
كالت : انطيني حجابج بسرعه
كتله :شبيج تخبلتي شلون انطيجياه
كالت : لج ماما متشوفين الدم الي يم بطنه لازم نوكف الدم ويصير عنده سند
بدون ماجاوبه وخرت العبايه على السريع نزعت
الحجاب كتلهه : هاج هاج بسرعه
باوعتلي وكالت : ركضي سدي باب الغرفه لا يكعد احد ويحس يمعوده
رحت بسرعه سديت باب الغرفه ورجعتله لكيته يم الولد لكيتهه ماسحه الدم
مال البطن وشادته على الجرح بشكل كلش قوي •
كالت : اريد شال بعد يربي شلون هسه
رجعت باوعت للولد وضربته راشدي علكيفهه وهزت راسه
وصاحت بي : لازم تركز ويايه انت حاليا صح متوجع بس راح ينتهي كلشي اريدك تصير كدهه
وكدود مابقه شي وتطلع حاول ترجع لوعيك •
اباوع للولد منتهي كلش مو يمهه اصلا باوعتلي وبعيونهه نظرات الحيره
كالت :روحي لزاوية الغرفه راح تلكين كونيه مروتج ركضي لتضلين فاهيه يمعوده
اني رئسا رحت ركض اني واركض
كتلهه: شجيب منهه
صاحت : فتحيه طلعي الملابس الي بيهه شوفي اكو شال تشيرت اي شي جيبي
وصلت لزاوية الغرفه لكيت گونيتين جريت اول وحده فتحته ذبيت كل الملابس بيهه
جانت عباره عن ملابس داخليه كلت بكلبي ربي مروتك مساعدتك باوعت على الثانيه
بنظرات امل عسى ولعل يطلع الي بيهه يفيدنه مديت ايدي عليهه كاعده افتحهه
وصاحت ثريه : لج استعجلي راح يجون مروتج مروتج يالكعبه
بسرعه جريته لكيتهه معكوده عكده كلش قويه ضليت افتح بيهه ماتنفتح وكعت خصله من
شعري على خدي وخرته من خدي بسرعه ودنكت على الكونيه كعدت افتحهه بسنوني
بكل قوه عندي حسيت اكو طعم غريب صار بحلكي استغربت من هذا الطعم حطيت
ايدي على حلكي لكيت دم من حلكي رجعت دنكت على الكونيه وفتحته
رئسا نكثتهه و طلعت الملابس الي بيهه لكيتهن كلهن ملابس شتويه اخذت
بلوزين وبسرعه رحت لثريه لكيتهه تحاول تصحصح بي بس ماكو اي فائده
كالت : لج بسرعه انطيني خلي نلحك يمعوده
مياده : هاج عيوني , شمرتهن عليهه بسرعه
اباوعله اخذتهن بسرعه حطت اردان البلوز وشكته ولزمت جرحه وكعدت تشد بالجرح
اباوعله للولد بس يصيح اخ ويون من الوجع خطيه
كالت : ركضي دوري شال او ستيان شتلكين من ذني الاثنين جيبي
بدون ماجاوبهه درت وجهي ورحت ركض للكونيه فتشت بين الملابس الشتويه لكيت شلون المشمر
اخذته بسرعه اجتي عيني على ستيان هم اخذته وثريه اسمعه تصيح
ثريه : لج يمعوده وينج استعجلي ماريد فهاوه كلما نستعجل لصالحنه بسرعه بسرعه
رحت ركض عليهه كتلهه : ذني ذني
شمرتهن عليه اباوعله اخذتهن بسرعه شالت ايده وشدت الشال بيده وسوت دائره كالتله
بصوت عالي : يلا هسه اريد همتك حاليا راح اكوم اني واسندك على ركبتي
حاول تساعدني بأكبر قوه عندك •
اباوعله للولد يسويلهه براسهه بمعنى اي كامت من الكاع باوعتلي
كالت : شبيج واكفه يلا تعاي ساعديني
تقربت عليهه واني ابلع بريكي دنكنه على الولد لزمته من ايده وهي شالت الفتحه مال الشال
وحطته بركبتهه كومته من ايده الي لافه بيهه الشال وهو خطيه يون من الوجع
كتله : حباب حاول تتحمل ولا أطلع اي صوت تره والله نروح بالرجلين ,
هز براسه ليجوه بمعنى اي كالت ثريه : يلا ولج هدي من ايده امشي فتحي الباب كدامنه
ركضت على الكاع لبست عبايتي وفتحت الباب مال الغرفه كدامهم وثريه ساندته
من ايده وبالكوه تمشي بي وهو بالكوه واكف وبالكوه يمشي طلعنه من الغرفه وكفت كدام
الغرفه وكالت : قفلي الباب يلا بسرعه وحطيلي المفتاح يم ذيج الطابوكه
على السريع بدون جواب رحت طبقت كلامهه باوعتله
كالت: وهسه بدون صوت لازم تمشين ورايه علمود نطلع من باب البستان
باوعت منا ومنا ماكو احد مشت ثريه وهي بالكوه سانده الولد واني وراهه اتلفت منا ومنا
خايفه خاف احد يشوفنه ونتورط وصلنه لباب البستان ستونه ردنه نطلع والولد
زوع رئسا ركضت عليهم وصحت : اسم الله لج يمعوده وين رايحات بالولد وهو بهاي الحاله
ماشوف اله وثريه شالت دشداشته من الطارف ومسحت حلكه
وتسويله : يوم لعدوك عيوني سبع لا تخاف من هيج امور تصيرلك يلا يلا اريد همتك
مابقه شي •
درت وجهي بسرعه خفت من الموقف زواعه اختلط بدم وجهه ومعانيه كلهن مختفيات
صاحت ثريه : لج يلا يمعوده وين دايره وجهج ساعديني مروتج وداعتج راح ننلزم
درت وجهي عليهه وكتله : متكليلي شساعدج يمعوده دشوفي الولد شصاير بحاله
وانتي تكليلي ساعديني يربي •
تفلت عليه وصاحت : لج بت الفكر قابل اني راضيه بس غير لازم نساير الوضع
علمود الحك على نفسنه اخ يربي •
تقربت يم الولد لزمته من ايده و طلعنه من البستان علكيف واحنه خايفات نباوع منا ومنا
كتلهه : ولج ثريه شو كلشي ماكو لاسياره ولا ش
باوعتلي وكالت : هو حتى لو اكو سيارات وين متفقين ترحون
حطيت ايدي على حلكي وكتلهه : غير هو الولد كال لازم نشرد ومادري شنو
صاحت : لج انتي غبيه ثوله مصخمه وملطمه غير تجين قبل يوم تفتهمين من عنده السالفه شلون
راح تشردين وين راح ترحون •
كتلهه واني دمعتي بطرف عيني : يعني هو اكيد نروح لابويه غير
باوعت للولد ورجعت باوعت عليه
وصاحت : لج ماما وابوج وين تندلي
هزيت راسي بمعنى لا كالت : اغبى بنيه شفته بحياتهه كلهه
لا هاهي هواي الامانه مالتي راح توصل لمكانهه اذا ضلت عليج بنص الطريق ويطيرهه منج الهوى
كتله : وهسه شنسوي يعني شنو نرجع
كالت : ماما وين نرجع تخبلتي بعد الي سوينا شو امشي يمعوده ورايه نروح لرفيق المخبل
صفنت عليهه وكتله : منو هذا رفيق المخبل
كالت : بدال ماحايره لهاي الاسئله الغبيه تعاي ساعديني نحمل هذا البليه الي صار عليه
من طاحظ حظي اي والله اذا اساعد احد بهاي الدنيا الغبره
كتلهه : يلا عاد هسه انتي شمسويه هو نقلتي منا لهنا
كالت : تره والله اذبه عليج وارجع لغرفتي
ولفراشي اشرفلي هواي وخليج انتي هنا مثل الجلاب حايره
ردت احجي وهذا الولد
كال بصوت بالكوه ينسمع : خيتي مروتج بطني راح تموتني من الوجع وين ماتردين تودينه ودينه
كالت : لج تعاي يمي يلا بسرعه شيلي ويايه
تقدمت عليهه وسندته للولد من ايده نفس مامسويه هي ضلينه نمشي بالطريق
واني ماعرف وين رايحه ووين ذابه نفسي عبرنه البستان بمسافه كلش بعيده
وثريه صاحت : مابقه شي وصلنه وكلشي ينحل لازم تبقون يم رفيق المخبل
الى ان هذا الولد يصير زين •
جاوبتهه واني بالكوه احجي من وره ثكله لهذا الولد
كتلهه : منو هذا رفيق المخبل اول مره اسمع بي حتى ياسمين ماحاجيتلي عنه
كالت : ليش هو منو يدري بي غير بس اني
عقجت حواجبي وكتلهه : شمعنى بس انتي اكو شي يعني مخفي بالسالفه
كالت : عيوني ولو هو مو وكت حجي بس لازم انطيج نبذه عنه خطيه هذا ابو يخدم بالمواكب
بأيام عاشوراء و انفجرت عليه القنينه مال الموكب ويكولون الرجال صار دمار كلش
والام عيوني كرايبه علساس داخليلهه وكاتليه موت كدام رفيق ورفيق من هذا اليوم
ومن هاي المواقف تخبل وصار مايكدر يعيش اله بهاي الخرابه
وأشرت براسهه ليكدام •
استغربت وكتلهه : وين الخرابه تره ماكاعده اشوف اي شي هو عباره عن طريق
كالت : هسه راح ندخل بهذا الفرع وتشوفي
كتلهه : انتي شلون عرفتي قصته
كالت : وداعتج عيوني اني عرفتهه عن طريق النسوان منا ومنا
لميتلي جم خبر الى ان صارت قصته عندي كامله •
كتلهه : زين هو مخبل يعني كلش وتصيحوله مخبل
كالت : اي مخبل انتي شنو هذا الغباء العندج كاعده اكلج رفيق المخبل
يعني شنو يعني مخبل •
كتلهه : زين عفيه شنو رايحتله اني وهذا الولد فوكاهه بخرابه
وكفت بنص الطريق وصاحت : والله عاد حبيبتي هذا الموجود تشكرين ربج وانتي الممنونه
مفروض تفكرين بهذا الشي قبل لتسوين هاي الدكه الناقصه
كتلهه : زين هو خاف يأذي يعني هو خبل عاد كلشي نتوقع منه
باوعت عليه وكالت : صح هو خبل بس احسن وانظف من هواي ناس شفتهم حياتي
تعاي تعاي ندخل للفرع •
كاعده اجاوبهه وصاح الولد : اخ يابه خيتي شكد تحجين مروتج وصلينه لأي مكان
لان راح اوكع بالزايد وماكدر اسوي اي شي
ضجت من كلامه وتصرفه
صحت بي : اكلك اني كايلتلك سوي صلافه واشبع كتل على كولة ياسمين لو مادايسين
على ثوب الحجي جان انتو هسه بنعيم •
باوعتلي ثريه وكالت : خليهه ياسمين انتي اصلا كل الي تعرفي عنه شي بسيط هاي
داهيه جبيره محد يعرفه غير بس اني •
رجع صاح الولد : نعله روحي اي والله
صدك النسوان لغويات مروتجن امشن مو تكطعت بطني •
صاحت ثريه : اوكف انت تره تعبتني صارلي ساعه اسحل بيك وصلنه هسه
دخلنه الفرع ومشينه بي علكيف
الشارع مال الفرع عالي بالكوه الواحد يكدر يمشي بي احس روحي كاعده امشي على شي عالي
اباوع على البيوت كلهه متهدمه وبيهه اضويه
استغربت من الموضوع ليش هيج هاي البيوت
مهدمه وبيهه اضويه كتلهه : ثريه عيوني احنه وين كاعدين نمشي
شوفي البيوت مهدمه وبيهه ضوه
كالت : ماما هاي الفقير الشريف الي مثلج عايش هنا بهاي الخرابه لعد وين ينطي وجهه ماتكليلي
كتلهه : معقوله ناس تكدر تعيش بهيج بيوت وهي عباره عن انقاذ من الطابوك
كالت : ماما الفقير ماعنده شي اسمه معقوله ومادري شنو تلكي حاطله جينكو وحديد
ومسويله سكف مرتب يحمي من شعيط ومعيط•
كتلهه: اي اي بعد وين راح نوصل بهاي يالدنيا
كالت : امشي يمه امشي
باوعت على الولد •
وكالت : انت احلى شي تطلع ناصب علينه الله حرام اسويك وصلت مسح عند رفيق
ضحكت وهو ضحك كال : كون رفيق يطلع خوش انسان يمعوده مو من جماعة
الحجي تره بسهوله يطلع النه •
كالت : لتخافون ابد رفيق رفيقي القديم يا ماوكفلي بشدات تكسر الضهر
سكتنه كلنه واني اباوع على البيوت والولد يون من الوجع مدري من الضيم والقهر الي مر بي
وصلنه لنص الفرع يم بيت واكع وبنصه زباله
وكله مهدم
صاحت ثريه: رفيق رفيق موجود انت
اني استغربت كتلهه : هاي شبيج ثريه ماتشوفين الشوارع فارغه يارفيق
كالت : ولج يمه على الغباء لج غير عايش هنا بهاي الخرابه
رجعت باوعت للمكان حطيت ايدي على خدي وشهكت معقوله اكو انسان داخل هاي الزباله
والهوسه كلهه رجعت صاحت : رفيق رفيق اني ثريه ام كصايب ام الكمل اطلع اطلع
الولد يون من الوجع واني بين الحايره على المكان وبين المبتسمه على تصرفات ثريه
كالت : تعالو ندخل خاف نايم خطيه
كتلهه : اوكفي يمعوده صدك تحجين مدخلتنه بهاي الزباله طلعنه جلب شي
كالت :اكلج لاتضلين كلساع وتكليلي يمعوده ويمعوده كتلج هذا الموجود
شنو حلج تردين ترجعين للحجي وتخلي يلعب بيج ويغركج تغرك بضربه
اكلي تبن وتحملي كلشي •
سكتت لان كلامهه فعلا صحيح لازم اتحمل كلشي الحلو والمر علمود اطلع من هاي الدوامه الداخله
بيهه اني دخلت ثريه ليجوه وهي وتصيح واني سانده الولد بالكوه
ثريه : يمعود رفيق اني صديقتك ثريه ام كصايب ام الكمل وينك
اباوعلهه راحت لنهاية الزباله وصلت يم شجره وخرت منهه وصله شلون البرده اني استغربت
كلت بكلبي هاي وين داخله شدتسوي شويه وصار صياح انوبه اريد افتهم شي ماكاعده
اركز صار خبط صوت ثريه بصوت رجال خشن ردت اخذ الولد واروح للبرده بس لزمني من ايدي
كال : اوكفي لا ترحين خاف صار شي
كتله: تعال نرجع ليوره خاف صدك صار شي
كاعده ارجع ليوره اني والولد وجان يجينه صوت فزز كلبي تفزز
: منو منو منو انتم هيي هيي خطار خطار الفرح
درت وجهي عليه لكيت ولد سمين شعره طويل وعنده لحيه طويله ومخربطه ووجهه دائري
ولابس قاط ماروني كله تراب وطكع واكف يم ثريه يكمز ويفرك بعينه ويصيح
ثريه : لك رفيق عيوني اهده اي اي خطار الفرح ذوله
يجاوبه وهو يكمز : هيي هيي خطار خطار الفرح اني اني احبهم حيل
ثريه كلتله : شكد تحبهم الخطار
اباوعله وكف بنص الزباله وشال ايده يأشر بيهن ويصيح : اني اني حيل حيل احبهم
بكد القطار الي يسوي جك جك جك جك
وكام يكمز ويصيح : جك جك جك جك
راحتله ثريه وكلتله : يلا يلا تعال ويايه نروح نستقبلهم راح يبقون يمك
تونس وياهم وديربالك عليهم هواي هم َ همْ يحبوك •
باوع علينه يمه اني رئساً خفت يربي شلون راح تمشي بيه الدنيا ماعرف رفع ايده
وركض باتجاهنه ويصيح : قطار قطار خطار خطار الفرح هيي هيي
وصل يمنه واني اطكطك من الخوف لا يروح يأذيني
النوبه هو شكله يخوف كلش لحيته وشعره وملابسه •
ثريه اجتي علينه بسرعه
وكالت : اني لازم ارجع راح اتأخر بالسلامه ياحلوين ومحمين بجاه محمد وال محمد
ورفيق خوش ولد وحباب لا تخافون من عنده مو صح رفيق
رئسا حط ايده على جتفي
وكال وهو يكمز : اي اي رفيق رفيق خ خووش وو ولد
كتله واني شويه خايفه : عفيه رفيق خوش ولد
اباوعله كام يكمز داير مدايرنه ويحرك اصابعه بشكل مستمر ويسوي
علكيفه بصوت مسموع : جك جك جك جك قطار حديد اي اي نعلك ص صص صواني ش شموع
باوعت لثريه كالت: حاطتكم بيد الله مع السلامه يروحي مياده حبيبتي ان شاء الله ماقصرت وياج
دمعتي نزلت لاارادياً شكد صعبه ناس جابوك للدنيا يذبوك بالميتم وهاي الغريبه الي مسويته مهره
ساقطه ساعدتني ووخلصتني من هل شله •
كالت: لتبجين انتي قويه وانتي شريفه توصلين بالسلامه لابوج
كتلهه : ماعرف شنو اكول شنو احجي ماراح انسه معروفج ابد وامانتج الي صارت يمي لو اعرف
اني بأيام حياتي بين الحياة والموت اوصله اوصله •
ابتسمت بوجهي وضربت جتف الولد
وكالتله : ابو الشباب عيوني يلا اريدك باجر تصير نشيط الصبحيه
وتشوف دربك وكلما اطلعون منا من وكت من البصره يكون الافضل
كلهه : خيتي مع الاسف انتي هنانه بين هذني الساقطات تعالي ويانه واني اتكفل بيج
ضربته على جتفه وكالتله : تسلم عيوني ماتقصر والنعم من الزلم
اترخص اني بامان الله •
صاح رفيق : امان امان امان ياليل
ثريه ضحكت وكلتله : لا لا رفيق معناهه كاعده اروح ماكاعده اغني
ضحكنه اني والولد على رفيق و راحت ثريه ركض للبيت
ثريه انسانه طيبه بأدق التفاصيل ولاتوقعت بيوم من الايام ان واحد من هاي الشله التعبانه
مال الحجي بيهه خير
صاح رفيق: فرح فرح تت تبق تبقون هنا هنا
وضل يكمز : هي هي هي الفرح يبقون هنا هنا هنا
لزمني من ايدي رادني اكمز ويا
كتله : لا لا رفيق لازم ندخل هسه يمك جوه نرتاح وباجر نلعب
رفيق: و ووو وعد وعد مو مو
ضحكت وكتله : اي اي وعد معليك
كال : هي هي هي جك جك جك جك فرح فرح
راح دخل كدامنه واني كتله للولد : يلا هسه تمدد شويه
كال : تعبتج خيتي مياده
ابتسمت على طريقة كلامه مليانه دفو رغم الوجع الي بي هو حاليا
كتله : مو بس وياك اكون هيج اكيد ويه كل واحد
صاح : اخ يابه اخ
كتله : ها شكو شبيك شنو الي يوجعك تعال تعال ندخل يم رفيق
اخذته صعدنه الزباله واني اتعوذ الشيطان والعن بأهلي بسببهم وصلت لهاي المواصيل
وصلت للشجره وخرت البرده لكيت فانوس معلوك وضوه هم معلوك وبطاطين
اكو كومه واكل مطشر وريحه قويه لا تطاق اكثر من البيره اباوع لرفيق يباوع
على الحايط و يحجي مادري ويامن ويكمز
رفيق : اا انت ووخر ووخر مشكلجي كلاوجي اي اي اي كلاوجي هييي انت انت كلاوجي
وصار يكمز بنص الغرفه ويصيح : هييي هذا كلاوجي
الولد لزم ايدي وكال : مروتج حطيني بالكاع انتي شنو ماتحسين بالوجع الي اني بي
باوعتله وكتله: ها اي اي تعال مدد
وخرت ايده من ركبتي وشويه شويه حطيته على الكاع اول ماكعد على
الكاع صاح : اخ يابه ضهري اويلي يمه , كلب ابن سطعش كلب حجي مطلك
ورفيق كام يكمز : طعش طعش طط ططط طعش اي اي طعش كلب هيي هو طعش كلب
ضحكت اني من كل كلبي والولد كال : شوف هذا مايدري بالدنيا شكو ماكو عاشت ماتت
كتله : خطيه من ضيمه وقهره الله يعلم بشنو مر وشنو صار ويا
كال : هدي شويه شويه بالكلام الى ان يجي وياج لان هيج حالات بالتعامل الحلو يجون
عقجت حواجبي و استغربت من كلامه مادرت بال اله نزعت عبايتي بسرعه لان اختنكت
رحت لرفيق لزمته من ايده و كتله : رفيق رفيق حاول تصير حباب تره نزعل
صاح بوجهي وهو يفتر : الفرح الفرح يزعلون هييي هييي يزعلون
كتله : اي اي نزعل هسه انت وين فراشك ارجع عليه نام واحنه هسه هماتين ننام وياك
اباوعله رئسا بدون مايجاوب راح لفراشه ونام على السريع دار وجهه على الطابوك الي مفلش
ونام اباوع للولد حاير بالوجع مالته رحت للبطاطين اخذت اثنين انطيتهه للولد
كتله : هاك بلكت تفيدك بشي تغطه او سوي اي شي بيهه
كال : اي خوش سويتي يلا نامي انتي هم علمود نرتاح شويه
كتله : هو هم هيج لان هذا اليوم من اكثر المغامرات بحياتي الي سويتهه
ابتسم بوجهي وتقشط الدم اليابس الي موجود على خشمه فرشت البطانيه بالكاع
واخذت وحده ثانيه نمت على الي فرشته وتغطيت بهاي الثانيه درت وجهي على الولد
كتله : صدك قبل لا نام انت شنو اسمك
كال : حنظل , وابتسم
عقجت حواجبي وكتله: حنظل شنو هذا صدك تحجي
ضحك وكال : وشبي يابه اسمي اصلا دوله وعلم
شال راسه وباوع صفح على جتفه علساس كاعد يتكبر رئسا
صاح : اخ اخ يابه يابه ضهري
ضحكت وكتله : اشور تره ديربالك
باوعلي صفح بنظره تخبل مليانه رجوليه : نامي نامي يصير خير
انطيته ضهري ونمت نومه عميقه واني مبتسمه ومتأمله كل الخير لليوم الثاني
كعدت على بسبسه قويه استغربت شنو هاي رفعت راسي لكيت رفيق جامع الجهال
ومكعدهم كدامنه بهدوء ويتبسبسون علينه
كمت على حيلي وكتله : لك رفيق يمصخم شنو مسوي
باوعت على مكان حنظل نايم بسابع حلم ابتسمت على نومته شلون نايم وعضلاته بارزه وشراينه
من الركبه تخبل رفيق صاح : الفرح الفرح ذذ ذذوله يصيحولي رر رررفيق ال المخبل
ابتسمت على طريقة كلامه تقربت على الجهال وكتلهم : يلا ماما روحوا لاهلكم تره اجويكم
ماعندي مانع تره •
صاح رفيق: اهلكم هلكم اي اي اهلكم اجويكم نار نار جك جك جك جك
كتله : رفيق عفيه مايصير احد يعرف ان ُ احنه هنا موجودين اذا دره احد احنه هنا تره نروح منك
كام يكمز ويصيح : لا لا رروو رووحه منا منا ماكو اي اي منا ماكو
رحت يم حنظل وكتله : عفيه اكعد كوم صار
الصبح وراح يخلص الوكت بينه •
وخر ايده من وجه فرك وجهه حيل وكال: صباح الخير بيش الساعه
كاعده احجي وصاح واحد من الجهال : عزه عزه كعد الجني الي كله دم
اني عقجت حواجبي وحنظل كعد على حيله درت وجهي على الجهال بس يكمزون ويصيحون : ولكم ولكم شردو الجني كعد
ورفيق وياهم يصيح : جني جني اي اي جك جك جك جك هيييي شردو شردو
صحت بيهم : ولكم ياجني شبيكم باوعت على حنظل
وكتله : مروتك كوم نشرد صدك جذب تاليهه يسونه جني الله يستر شراح نصير بعد شويه
حنظل : بويه دتعاي كوميني خلي اغسل واني اشوفهم الج
رحت تقربت عليه واني مبتسمه شويه وخرت خصله من شعري ليوره ومديت ايدي
اله كتله : يلا حط ايدك بأيدي ونكوم
مده اليه واني بالكوه متحمله ملسمه حيل خشن وبنفس الوكت حلو اجه رفيق يصيح : الفرح الفرح بيت سس ام سعدي راح راح يجيبون
اليه كك ككيمر اي اي كيمر •
ضحكنه اني وحنظل
وكتله : واحنه مالنه كيمر يلا ناكل وياك عود
كام يكمز ويصيح : ناكل ناكل ناكل ها ها شناكل اي اي ناكل عميه عميه هيي عميه ناكل
ضحكت من كل كلبي وبالكوه وكفت حنظل على رجليه ,كله : دخيل جدك رفيق شكد تكمز
يمعود حاول تهدأ مكعدنه من الصبح •
اباوع رفيق رفع ايده على عيونه وكعد يفرك بيهن كال : لا لا شنو الفرح يصيح عليه
باوعت على حنظل
وكتله : مروتك عوف رفيق خلي لامنه هنا بخير وسلامه ,
رحت لرفيق لزمته من جتفه
وكتله : يلا رفيق رفيق سبع ما يبجي يلا يلا شو وخر ايدك وسوي صوت القطار
وخر ايده بسرعه ولزم ايدي كال : تسويهه ويايه يلا يلا
ضحكت وكتله : يمعود شلون اسويهه وياك مايصير
جرني من ايدي بنص الزباله وكام يدبج وايديه يارايحه ويا ونازله ويا
ويصيح : قطار قق ططار قطار سريع جك جك جك جك جك جك
واني هم كمت اكمز ويا واصيح : جك جك جك جك
والجهال داير مدايرنه يصيحون ويهوسون اجه حنظل
كال : بويه شبيج انتي عود هاي الصاحيه
رحتله ركض وافتريت داير مدايره واني اسويله جك جك جك جك
ضحك وهز ايده ,اباوع لرفيق المخبل يلعب ويا الجهال بالزباله انقهرت عليه شلون لابس القاط
وكله طكع وشلون يكمز بالزباله كلش انقهرت عليه صاحني حنظل
كال : مياده جبتي الفلوس لو لا
باوعتله وكتله : اي اي جبتهن بس ماحسبتهن شكد وثريه البنيه الي شردتنه
البارحه خطيه انطتني راتبهه •
كال : تعاي ندخل جوه وره البرده وانطيناهن لازم نشرد باسرع وكت لان مابقه اي وكت
كتله : عفيه ابويه شنو السالفه شبي وليش هاي الفتره ماهو أحجيلي شبيك
باوع منا ومنا كال : بالطريق احاول احجيلج جزء من الصار بس هسه لازم اعالج
روحي لان ماكدر اجازف بيج بالعماره بهيج وضع اني
عقجت حواجبي وكتله : ليش ابويه حاليا بالعماره ؟
كال : اي مياده بالعماره ويحتاج دعائج حاولي تدعيله تره ابوج مسكين ومن انظف
واطهر الزلم الي شفتهم بحياتي •
تقربت عليه وكتله : واضح من انظف واطهر الزلم وهو يتقرب على امي بالحرام
ويجيبني للدنيا بالحرام •
كال : ماعرف اني شنو السمعتي وشنو الفهمتي من ذوله الجلاب بس لازم تعرفين
كله جذب بجذب وماكو هيج من الي سمعتي
لزمته من جتفه
وكتله : حنظل انت شايفه لابويه حاجي ويا
شنو السبب الي مخليك هيج ثاق من روحك ومن اجابتك
وخر ايدي من جتفه وكال : لان ابوج اشهر هو يمي يدكون بي ويعذبون بي
ويلعنون بي شكاعده تحجين انتي •
اتذكرت كلام ياسمين من كالت هم اكيد داسو على ثوب الحجي وهو كاعد ياخذ بثاره
كلت بكلبي معقوله ابويه متورط ويه الحجي, شويه ودخل رفيق يكمز ويوخر الذبان
من على وجهه
حتى مالحكت انطي الفلوس لحنظل شويه ودخلت وراه مره لابسه عبايه
مكرضه تكرض وتصير سمره كالت : شلونكم خاله
حنظل نزل راسه استغربت من تصرفه ,
كتلهه : هلو خاله
كالت : خاله عيوني جبتلكم كيمر من حلالنه طيب ويخبل اذا ماعجبكم كلولي اسويلكم غيره
رحت يمه بوسته وكتله : خاله شكرا هواي ليش هاي الزحمه متكليلي
ابتسمت بوجهي وراحت عني بالكاع حطت الصينيه يم رجلين حنظل باوعت ألنه
وكالت : الف عافيه حبايبي و شنو تحتاجون اني موجوده بس كولو
وين ام سعدي ورفيق المخبل هم يندلي •
اباوع لرفيق يكمز ويوخر الذبان الي على راسه اترخصت ام سعدي من عدنه ودارت وجهه
وراحت كعد حنظل بالكاع يم الصينيه واني هم وصحت
لرفيق : يلا رفيق يلا شو أكعد كدامنه مثل الحلوين
رجع شعره ليوره وكعد على الصينيه باوعت لايده سود من وصخ الزباله
و القميص الي لابسه جوه القاط صاير بيجي من كثر ماوصخ حنظل بلش ياكل بالريوك
واني كتله لرفيق: رفيق امك وابوك وين شنو ماهم
رئسا كمز وشهك ماعرف ليش حسيت ان الوجع والضيم الي بكلبه جبير والدوامه الي بيهه
هو اكثر واخطر من الدوامه مالتي رجعت
كتله : رفيق تره اني اعتبرني نفس صديقتك ثريه ام كصايب
ضحك وشال ايده كام يصفك بيهه : ثث ثريه ثريه ام كك كصايب اي اي حلوه حلوه واحبهه
كتله : اي هم تحبك واني هم
رفع راسه حنظل وكال : تريكوا كافي تحجون
باوعتله وكتله : بله انتَ حط راسك بالاكل واكل غير اريد اعرف شي
على الولد الله ومحمد ميقبلون على هذا وضعه خطيه •
كال : يوكل الجوارين وعياله كاتلهم الجوع شوفي روحج انتبهي لروحج كعدي فكري
بهمومج بضيمج مو على رفيق وعلى الناس•
باوعتله صفح شفت كلامه صحيح سكتت مديت ايدي للصينيه وبديت آكل
صار هدوء كلش بسيط شويه
وكال رفيق : من من ماتت فف ففله اي اي فله من ماتت فله ما ما ماتت حياتي وياهه وياهه
باوعت على حنظل لكيت علامات الصدمه على وجه مثلي رجعت باوعت
لرفيق وكتله : منيه فله رفيق وليش ماتت حياتك وياهه
جر رشح خشمه ليفوك و رفع ايده ليفوك وصفك حيل ورجع فتحه النه
وصاح : هي هي كتلت ذ ذبانه
ابتسمت على حركته
ورجعت كتله : ماجاوبتني رفيق
صفن بوجهي وهو رافع ايده اليسرى يحك بيهه شعره
صاح وهو يهز راسه : ما ما ماتت ف فله بيوم عع عع عرسي اي اي عرسي راحت
بعي بعي بعيد اي اي بعيد •
حطيت ايدي على حلكي اباوع على حنظل ذب الخبزه من ايده وصفن على رفيق ورفيق
يلعب بيده ويهز بروحه منا ومنا
كتله : الله يرحمه بس فله شتصير منك •
هز راسه على السريع ومسح رشح خشمه الي نزل على شاربه الثخين
كال : ززوجت ززوجتي اي اي زوجتي فله فف فله اني اني حح حيل احب احبهه
اي احبه بك بكد طط طول القطار جك جك جك جك
لزمته من ايده وكتله : اهده اهده رفيق احنه يمك زين خطيه شلون ماتت
كال : دم دم بحر بحر باوع
بوجهنا اني وحنظل وصفك بيده
وصاح : بحر بحر دم •
باوعت على حنظل مافتهمت من عنده شي رجع
حنظل كله : قصدك صار بحر مال دم
صفك بيده وكام يهز بروحه : اي اي بحر دم دم دم جك جك جك جك
كتله : شلون صار بحر تكدر تحجي
باوعلي مسح وجهه وطلع السانه سوه : اررر اررر فف فله فف فله اح احبج
مياده : حاول تركز وتجاوبني
حنظل : دتشوفي خطيه مايكدر عوفي هو شابع ضيم بقهر انوبه تجين انتي تكابلي
مياده : مو ثريه كالت شي وهو كال شي
شو شي مايشبه شي غير نتعرف على الولد
واذا متريد تعرف شي رجاءا كوم اكعد بالزباله •
اسمع نفسه صار سريع وشريان ايده بين حيل وتفاحة ادم طلعت يم ركبته
بلعت ريكي وسكتت باوعت على رفيق
وكتله : رفيق اني اساعدك اعتبرني اني فله
باوعلي زين مد ايده على وجهي وبده يتلمس المنطقه الداير مداير حلكي
كال : شش شش شم اي شامه ما ما هي اي اي الشامه ماهي فف فله عد عدهه
شامه جج جبيره هواي اي اي هواي •
نزلت دمعتي بسرعه مسحته شنو المسوي هذا الولد وصار بحياته هيج ليش ربي ليش
كتله : هذا القاط حلو مال عرسك مو اختارته فله الك
كام على حيله وكام يكمز ويصيح : حح حلو القاط مو مو هاي هاي اختارته فف فله وكا وكالتلي
اي اي كالتلي هذا حح حلو عل عليك يطلعك
ابيض هييي هيييي ابيض ابيض جك جك جك جك
سمعت حنظل يكول : الك الله يالعراقي شصار بحالك ماتكلي شصار بيك
وانت ابو الخير كله تاليهه هيج يصير بالعايش بيك
كتله : حسبي الله ونعم الوكيل على كل مخرب وقاتل وداعتك شكد مالعبو لعب
يم الله يصيرون مثل الجريذي كلهه تطلع من عيونهم
صاح رفيق وفزيت على صوته بسرعه : طا طا فف فله فله ,
يصيح طا ويرفع ايده يسويهه بشكل مسدس •
ويصيح : طا طا فله فف فله باوعيلي طا طا
حنظل : استغفرالله ربي لج شنو هذا الضيم
ماتكليلي من انعل ابو هيج عيشه مرته حلاله بيوم عرسه تنكتل
نزلت دمعتي لااراديا مسحته بسرعه وكتله : منو سوالهه طا منو ضربهه
راح للجذع مال الشجره وكام يضرب بيه ويصيح : ع عم عمهه اي اي عمهه ابن ابن عمهه هييي هييي
ابن عمهه طا طا ففله فله طا دم بحر بحر اي اي بحر دم
انهاريت رئسا من البجي عليه وعلى حظي حطيت ايدي على وجهي ودكيتهه بجي بكل قوه عندي
ليش مكتوبلي قهر وضيم وليش مكتوب لكل انسان اعرفه واصادفه بحياتي هو عباره
عن ضيم وقهر ليش ليش •
اجه اتقرب عليه رفع راسي على السريع بلعت ريكي همزين ماخلعه خلع
كال وهو يكمز : دموع دموع تت تشبه دد دموع ال الفرح اي الفرح بب يوم
بيوم عع عرسي اي عرسي •
نززلت نزلت من من الدرج هيي هيي اي اي من الدرج وا مي اي امي تسويلي عر عرسك
مبا مبا •
ساعدته بالكلام رئسا كتله " مبارك مو
كال : اي اي مبارك هييي هيي
واخواني اخو اخو اخويه اي اخويه الصغير واكف يم يم امي ينطيهه الججج الجكك
الجكليت وهي وهي اطط اطش عع عليه وتسوي مبا مبا رك •
مسحت دمعتي الي ماوكفت ابد كتله : وامك وين هسه
راح للشجره حط راسه عليهه
وكال : اا ام امي
سكت شويه وكام شلون الي يحاول يلحن كلام
يا اامي ام يا امي يا يا ام ام الوو فه اي اي الووفه
سكت ورجع باوع وكال: يا يا طط طيب من من الجنه اي اي من الجنه
شال ايده ضمهه لصدره ورجع رفعهه للسمه ضل يعيد هاي الحركه يكمز ويكول : طط طبا طبا طبا
دم دم •
ططلعت بيومهه اا اني و ام مي اي اي امي وو وره عع عرسي بسوك الص الصد ريه اي الصدريه
عجبني اي عجبني اشتري اشتري مصاصات للاخويه مصاصه هييي هييي
مصاصه كتلهه ام امي امي انطيني
رر ربع ربع اي ربع •
اخذته منهه و ررحت اشتري اي اشتري مصاصات بس بس ابو المصا المصاصات اي بعيد حيل
بطول القطار جك جك جك جك •
مسحت دمعتي وكتله : كمل فدوه شصار
كعد يم الشجره والذبان مكوم عليه •
كال : ش شو شويه اي شويه وسس وسمعت صص صوت طبا طبا
دخان دخان بحر دم دم اي اي بحر دم
حط ايده على راسه وصار يصيح : بحر دم طبا صياح عياط جج جهال
رحت يمه وحطيت ايدي على جتفه
وكتله : ماعرف شنو اكول رفيق الله يكون بعونك
اباوع على حنظل دموعه تنزل على خده
رجع كال : ابو ابو المحل اي اي المحل كال ابب ابني تت تعال هنا خخ خفت منه فتحت
فتحت فتحت الباب اي اي الباب وطلعت بسس بسرعه
رككضت على مكك مكان ام امي وكك وكفت بسس بسرعه بمك بمكاني اي بمكاني
و عيوني ششا شافت دم بحر بحر دم دم هييي هيي دم
حطيت ايدي على جتفه وهزيته حيل
كتله : وامك رفيق شصار شصار بيهه
حط ايده على اذنه وهو يرجف كال : ان اني اي اني ام امشي بين بين نا ناس و واكعه بالكاع
والدم بحر بحر جبير جج جبير والنا النار ملتهبه البسط البسطيات اي اي البسطيات صحت
ام امي وو وينج اسمع ناس تون تون تون ونين قوي قوي
اي اي قوي ناس تون من الوجع حرت حح حرت كمت اركض على البحر سس سريع
اد ادور على على امي امي اي امي
اريد اذكر شك شكل البسطيه الي ال الي جانت موجوده يمهه ام امي
بس بس ماكو ماكو ضض ضليت امش امشي وكعن المصاصات
واني اني امشي لمحت بسطيه نايمه عليهه مره
نايمه واكعه ماجنت اعرف اي اي ماجنت اعرف
سكت شويه وهز راسه حيل وصفك بيده وكال : رحت رحتله ركض ركض اي اي ركض وخخ وخرته
عن البسطيه و الن النار اي اي النار تا تاخذ بالمكان
وخرته وجان الوجه دم دم دم بحر بحر
بحر لمسته اي اي لمسته بي بيدي اي بيدي
اباوعله راح اتمدد بالكاع ودك بيهه حيل : لمسته لمسته بيدي مسحته اريد اريد اشوف ملامحهه
اي اي ملامحهه وجانت اام امي اي ام امي امي امي امي هزيت هزيته حيل حيل بس
ماجاوبت عرفت عرفت اي اي عرفت امي
ماتت حضنتهه يم صدري وضليت
اسوي يم اذانهه ام امي امي يا يا ام الوفه يا طط طيب من من الجنه اي اي الجنه
شهكت رئسا من البجي حنظل كام كومه من الكاع وحظنه حيل واثنينهم صارو يبجون
واني اباوع للسمه وابجي اسمع حنظل يكله : اني اعتبرني امك وابوك واخوانك
وزوجتك وكلشي اعتبرني ماراح اعوفك رفيق
رحت يمه وكتله : رفيق اذا عافوك احبابك اني ماعوفك
مشى بينه الوكت بين نواسي رفيق وبين نواسي نفسنه
راح حنظل ويه رفيق لبيت ام سعدي يجيبون ملابس لحنظل علمود يلبسهن لان
ملابسه ماتسمح بيهن ابد يطلع بيهن للشارع او بالسيطره بين مايجون كمت على حيلي ولميت
فراش رفيق وكنسة المكان الي ينام بي ورتبته ترتيب حلو صح هو المكان بالزباله
بس نحمد الله ونشكره ان رفيق طول هاي المده كله وكل هاي التفاصيل صايره ويا وهو مامد ايده
على الحرام ولا سوه السوته تماره ولا مهره وشلة الحجي
شويه واجتي بنيه لابسه بس دشداشه لونهه ازرك وياهه طفل بالكماط وعليه الذبان
ذبيت البيدي وكتلهه : حبيبتي هذا طفل ميصير هيج روحي هناك لا يتمرض
جاوبتني من ورهه خشمهه : لا عادي احنه جهالنه يلعبون بالخيسه و بالتراب
لعنت الشيطان وكتلهه : خلي يلعبون بس هذا كماط شيلعب شبيج خيتي
باوعت على طفلهه وكالت: معليج انتي المهم شعندج يم رفيق المخبل ,
حطيت ايدي على خصري وكتلهه : اولا هو مابي شي لتكولين عليه مخبل
واحترمي نفسج ومن اجي يمج بذيج الساعه تعاي احجي ويايه •
باوعتلي من فوك ليجوه هزت ايدهه وراحت كلت بكلبي هاي صدك اكو ناس منحطه متعوده على
الغلط والعين الحمره كبور اي والله شويه واجه حنظل نظيف ومرتب ماكو دم وملابسه
بنطرون وقميص حلو طالع رغم الشخطات الي بوجهه
كتله : مابقه وكت لازم نعوف البصره بهذا الوكت ياحنظل لان الحجي تره قريب علينه
رفيق رئسا صاح : لا لا الفرح الفرح مايروح
مايروح اي اي مايروح انتو انتو تبقون يمي هنا هنا
ضحكت وكتله : بس احنه لازم نروح ورايه ضيم ابويه يرفيق سالفتي اعوج منك
راحله حنظل وكله : انت عندك ملابس لو بس هذا القاط
كله : لا ما ما عندي اي ماعندي
حنظل : يلا لعد تروح ويانه انت
عقجت حواجبي كلت بكلبي : هذا شكاعد يحجي يربي
باوعلي وكال : سكتي معليج يروح ويانه شلون نعوفه هنا وهو هيج حاله
قنعنه رفيق يروح ويانه وعدلنه ملابسه ورتبنا •
شويه واخذت عبايتي ورفيق كاعد على غرفته يبجي عليهه
رحت يمه وكتله:
يله يله رفيق امشينه راح تخلص من هذا الضيم والفكر الي انت بي
مسح دموعه وكال : اي اي اي واشوف القطار جك جك جك جك جك جك
مشينه اني ورفيق طلعنه من الغرفه الي كضه كل عمره بيهه باوعت ليكدام لكيت حنظل
واكف ويتلفت منا ومنا كال : استعجلوا بالمشي لازم نروح باسرع مايمكن
كتله : اوكف هاك الفلوس
كال : لا خليهن عندج معليج اني اعرف شسوي
سكتت ومشيت ضلينه نمشي بنص الفرع
واجوي جهال المنطقه يمشون ورانه ويقلدون صوت السيارات
مال الشرطه : وي وي وي رفيق المخبل
وذاك الثاني يسوي : رفيق الوصخ وين وين رايح
والي وراه يسوي : مخبل مخبل مخبل
اباوعله خطيه يكمز وياهم واني اجر بي علمود نمشي على السريع ,
حنظل رئسا اجر تكسي
كله : خويه من الاخير للعماره تروح لو لا
كله : لازم عندك خير من الله فلوس
حنظل : كتلك تروح لو لا
كله : اي يابه اصعدو
باوعلنه وكال : رفيق يلا اصعد بالصدر
كتله : صدك تحجي مصعد رفيق بالصدر
كال : معليج ببالي خطه
صعدنه اني وحنظل ليوره ورفيق بالصدر ويصفك بيديه
ابو التكسي كله : لازم افول بانزين تره هاي تخلص عليه هسه
حنظل جاوبه من وره خشمه : فول شتريد تسوي سوي
ضلت السياره تمشي بينه الى ان طبكنه على بانزين خانه دخلنه
بيهه وفول السياره بانزين والريحه اكلتنه اكل
صعد بالسياره
وكال : نتوكل على الله
قريت بكلبي آية الكرسي والفاتحه طالبه العون والمساعده من الله نوصل بالسلامه مشى بينه
الوكت والسياره مو ذيج السرعه الى ان وصلنه لسيطره مكتوب كدامهه قف ,
وكفت السياره وكدامهه سيارتين واباوع للشرطي يفتر على سياره سياره وصل السره للسياره
الي قبلنه الشرطي باوع على الصاعدين وسمعته صاح للسايق : حرك خويه حرك
درت وجهي على الجهه الثانيه من الجامه الي يمي ولكيت صورتي معلكه ويه المفقودين
على العامود
شهكت بسرعه
باوعت على الشرطي لكيته كاعد يتقرب على سيارتنه
يتبع ....
اعتذر عن التأخير بسبب ضعف الانترنيت،
خالص مودتي لكم
تحسين لقمان
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!