الفصل الثلاثين

رواية في قلب القريه الجزء الثلاثين 30 بقلم نوسة حمد في قلب القريهرواية في قلب القريه الحلقة الثلاثين

حسيت اشتياق انكسرت واتندمتا اني حكيت ليها لانها من الزعل ماقدرت تتفاهم معاي اتصلت عليها عاوزه اقول ليها ما تحكي لي اهلك حاجه بتقفل فيني الخط لدرجه انو بقيت خايفه عليها تقوم ترجع لي حالتها الاولي وتمشي المصحه لانها هي النوع البستسلم علي طول وبنكسر وصلت البيت لقيت احمد اخوي اتناقش مع مهاد وهي بس ساكته خشمها ما فتحتو سلمت عليهم ما ردا لي وبقا مواصل معاها في الكلام قطع قلبي قال ليها انا مابخلت عليك بي اي شي انا اديتك كل

شي وجزاتي انك خليتيني زي الاعمي ومشيتي تلعبي وراي وتنزلي راسي وبدل المره الف مره انا لو الدنيا انعدمت منها البنات ما ح اقبل تكوني لي زوجه خلاص اكتفيت الفي بطنك دا تلدي وبعد تلدي انا عندي فيهو راي وشاكي انو م ولدي نسيتي انك معاي كنتي بتاخدي مانع واعتبريني شاكي فيك وفي الحمل لانو انتي الدخلتي الشك جواي وانا ح اصرف عليك لغايه ما تلدي وفي المستشفى زاتو ح اعمل الفحص وقال ليها عندي مشوار اقضيهو واجي اوديك اهلك بقت تبكي

قالت ليهو ما توديني عليك الله ان شاءالله اقتلني انا لو رجعت ح ارجع اكعب من اول قال ليها ترجعي اكعب من اول كيف هسي انتي عملتي كل دا استفدتي حاجه عشان تمشي تعملي الاكعب منو يا بت الناس ختي الرحمن في قلبك وامشي في الطريق الصاح ما بتجيك عوجه لكن طول ما انتي ماشيه غلط صدقيني ح تهلكي وما ح تستفيدي حاجه وانا عندي كلام مع امك يا عدلكم الاتنين يا طفشكم وطلع لحقتو حدي الشارع قلت ليهو احمد قال لي مالك فشنو وكان زهجان قلت ليهو

في مصيبه قال لي مصيبه شنو عملتي شنو انتي كمان قلت ليهو انا حكيت لي اشتياق وطلعت زعلانه وقالت ليك تعال قول لي اهلي انك ما عايزني ما ح تقبل تعيش معاك ومعاك مهاد قال لي انتي مجنونه ولا حيوانه مهاد انا طلقتها مافي طفل برجعني ليها وكيف تقولي ليها كده انتي عندك التسرع في اي شي وبقا يكورك فيني لمن امي جات وحكا ليها وبقت تشاكل فيني ودخلت لبست توبا قالت ليهو ارح ليها في البيت انا قلت ليهم ماشه معاكم امي طلعت شبشبا من رجلها

وقالت لي انتي اصبري لي يا الشفقانه وبقت تكورك واحمد اظنو تلفونو اتصل وشكلها دي اشتياق وكانت تبكي قال ليها طيب اسكتي انا جاي عليكم عشان اكلم اهلك وسريع ركبو وفاتو لقيتا متصله لي رديت عليها وتبكي بكا مبالغه قالت لي انا ح ارجع المصحه مادايره اي حاجه من الدنيا دي خلاص اكتفيت كل ما اقول الدنيا ح تضحك لي ترجع تديني ضهرا قلت ليها اشتياق اصبري احمد اخوي جاي عليكم وهي شغاله تبكي وتتكلم بره من راسها وتحكي في قصص من هي صغيره اي

لحظه انكسرت فيها حكتا لي فجاه سمعت صوت امها بتقول ليها كدي قولي بسم الله يابتي البتعملي فيهو دا شغل شواطين وكفر منك انتي ما بتعرفي القسمه وكدي قومي البسي عبايتك خطيبك دا بره منتظرك ومعاهو امو هسي اقولو شنو قالت ليها دا ماخطيبي وانا مادايراهو وكانت حالتها سيئه جدا قفلت الخط اتصلت علي احمد قلت ليهو ما تجي الا تتكلم معاها لانها ما كويسه نهاي ان شاءالله تدخل ليها جوه قال لي كويس بس انتي ما تتصلي اقعدي ساي لانك كل مره

بتلخبطي الدنيا بتهورك دا قلت ليهو طيب قفلت منو وهي تشيل وتتصل ابيت ارد اتصلت علي ابراهيم وكنت ببكي حسيت بالذنب قلت ما ح ارحم نفسي لو احمد ما قدر يقنعها وترجع لي حالتها وتدخل المصحه قلت ليهو انا متهوره ومتسرعه بتعامل بكل سهوله وبراءه في المواضيع وفي مواضيع حساسه ما مفترض ادخل فيها ابراهيم ما جا علي وقال لي ليه انتي عملتي كده بقا يهدي فيني ويقول لي معليش حبيبتي عشان نيتك البيضاء دي مهما الدنيا جاطت بي نيتك بتروق انتي

ما كنتي تقصدي شي واتعاملتي معاها علي انها هي صحبتك ما خطيبه اخوك وعشان بتحكو اي شي اخدتي الموضوع عادي وحكيتي ليها وماقصدك تخربي الدنيا اندفعتي بس لكن صدقيني الدنيا ح تهدا واحمد ح يجيك مبسوط وح يتسرع في العرس وتقولي ابراهيم قال قلت ليهو يارب سرحتا بعيد واكتشفت انو السند الحقيقي مابجي عليك وانتي زعلانه بالعكس حتي لو كنتي غلطانه بحاول اهدي الموضوع وما ببقا عليك هو والزمن لحظتها اكتشفت اني اخيرا اخترت صاح دا الراجل

البستاهل يقيفو قصاد الدنيا عشانو دا الامان والحنان جاني احساس حلوووووو اتجاه ابراهيم وكنت ساكته وخيالي بعيد وهو شغال لي نوسه اهدي والدنيا ح تروق بس انتي ماتزعلي وانا ما رديت لسه بتأمل فيهو حسيت اني فعلا حبيتو وهو شغال لي الو نوسه انتي سامعاني الو الو وطلعت من الصمت الكنت فيهو وقلت ليهو بصوت حنين اول مره يطلع مني الصوت دا قلت ليهو هيما قال لي ياعيون هيما وقلب هيما وحياه هيما انا قلبي قال شح وقلت ليهو انا بحبك ابراهيم

قال لي نوسه شنو شنو قلت ليهو والله بحبك قال لي ياااااااه اقسم بالله ليها طعم وانا كمان بحبك شديد ومستعد ابيع الدنيا واشتريك ومستعد اعوضك علي اي لحظه زعل انتي عشتيها سعاده انتي بس قولي لي هيما تاني قعدت اضحك قال لي قوليها لي قلت ليهو هيما قال لي يااااه حلوه منك انتي عارفه انا ما حصل زول دلعني حتي زوجتي الاولي كنت انا البدلعها وخساره فيها اديتيني احساس حلووووو قلت ليهو ممكن ما تقارن حياتك القديمه بحياتنا مع بعض زي ما

فيها صفات كعبه ح تكون فيها صفات احسن مني عشان كده انسا قال لي حاضر يا نوسه بس الله اعلم تكون فيها صفات احلي منك انتي الكمال لله بقيت اتونس مع ابراهيم لغايه ما امي واحمد جو مبسوطين حمدت الله وامي قالت لي تاني ما تتسرعي مالك ومالن ما تدخلي فيهم قلت ليها حاضر يمه ابراهيم كان سامعهم قال لي موش قلت ليك ح تظبط الدنيا قلت ليهو الحمد لله وبقينا نتونس ابراهيم جاتو مكالمه قلت ليهو دي منو المتصله عليك بليل دي وحسيت نفسي غيرانه

قعد اضحك قال لي يا سلام بتغيري علي قلت ليهو ما بتوزعني وريني قال لي والله دا احمد اخوك وداير اقول ليك انتي فاجأتيني بشعور الغيره الحلو دا قلت ليهو الليله لو كانت بت ح ابقا علي زعل اشتياق وكان ح تتعب حتي ترضيني قال لي والله يا نوسه انا بنات في قاموس حياتي ماف موقفهم عديل وكنت ماناوي زاتو اتزوج شده ما كرهتهم قلت ليهو وخليك كارهم كويس قعد اضحك قال لي حاضر

خليني اشوف احمد عاوز شنو قلت ليهو طيب قفل مني واظنو رجع لي احمد وانا بقيت سرحانه اتخيل في كلامو وحنيتو وهو النوع البتعامل مع المواضيع بي هدوء عكسي تماما انا اي موضوع بهيج معاهو لغايه ما نومتا وصحيت بتلفون منو ورديت عليهو وانا نعسانه اول ما فتحت الخط وسمعني بقا يتغزل في صوتي وانا نعسانه قال لي عاوز اوريك احمد قال لي شنو بس شكلك ما ح تكوني واعيه لي كلامي ح اخلي الخط فاتح واكون جنبك لغايه ما تصحي وشكلي غرقت غرق في النوم

صحيت لقيت التلفون في جهه وانا في جهه شيلتو لقيت المكالمه شغاله وشكلو مصحصح قلت ليهو ليه ما نومتا قال لي نومتا وشبعت نوم عايني للساعه كم لقيتا ٨قلت ليهو مبالغه الصبح ما صليتو قال لي صلي وتعالي مسافه انا اطلع العربيه دي جريت اتوضيت وصليت وجيت قال لي عندك محاضرات قلت. ليهو عندي بس مرهقه ما ماشه وبالاخص بعد يومين امتحاناتنا قال لي بتاخد كم من الزمن قلت ليهو ١٥ يوم قال لي طيب بعد عشرين يوم زواجنا ان شاءالله رايك شنو قلت

ليهو الانت شايفو قال لي احمد اتصل علي بخصوص الموضوع دا وقلت ليهو م عندي مانع في اي زمن قال لي احمد حكا لي والضحكني قال لي نوسه دي متهوره ومتسرعه غايتو الله اكون في عونك كان نفسي اقول ليهو علي قلبي زي العسل قعدت اضحك قلت ليهو ما تكون قلتها ليهو بخجل من اخواني طبعا قال لي لانك متربيه صاح لا حبيبتي ماتخافي انا زاتي بحب اغنج بمشاعري ما بظهرها لي زول غيرك انتي قلت ليهو ربنا اخليك لي وقفلت الخط مشيت لقيت احمد اظنو ودا مهاد

من الصبح وجا قال لينا امها عاوزه تتعابط فيهو بس قال لي اديتا درس عمرها ما تنساهو وما كده وبس قال لي لاقاني محمد وسمعتو كلام يا عدلو يا عدلو قلت ليهو مالو هو قال لي اظنها فكت منو قالو خلا الشغل وموت بتو مأثر عليهو شديد بجد قلبي وجعني احساس صعب اخير منو الموت بتك اغتصبوها وهي طفله وتموت بسبب اهمال والله حاجه صعبه الله اعلم محمد امرق منها قلت ربنا يخفف عليهو ويعوضو

مرت الايام وامي وخالتو سعاد الاتنين اجهزن في حاجات العرس مع بعض وجابو لي شنطتي وحاجاتي وودو لي اشتياق وهي وقفت من الشغل عشان تنحبس وكانت قريبه لي شديد ومعاي في كل لحظه انا انضغطت في القرايه شديد وابراهيم ساعدني كتير في القرايه من جهه كنت محبوسه للعرس ومن جيهه ممتحنه بس ابراهيم كان بهون علي اي لحظه تعب وخلصت امتحاناتي وما كان باقي غير خمسه ايام للعرس مشينا حجزنا الزفاف انا وابراهيم وحجزت معاهو البدله تفاصيل زواجي كانت اهم من زواجي زاتو كل خطوه فيهو ابراهيم كان بخطيها معاي ما بخطي خطوه بدوني

مرت الايام وشفت اشتياق اجمل عروسه فرحت بي اني شفتها لابسه الزفاف اكتر من فرحي بنفسي دي الانسانه الاديتا ثقه بنفسها وطلعتها من مكان كانت دافنه فيهو نفسها بالحياه وما كده بس بقت صديقتي واختي وزوجه اخوي كان اجمل يوم في حياتي يوم زفافنا وامي مبسوطه بعرس احمد اكتر مني احمد يستاهل كل خير والحمد لله ربنا عوضنا كلنا مرينا بتجارب مريره بس بالعزيمه اتجاوزانها وثقتنا بي ربنا كانت قويه

انتهي الزواج علي خير وسافرنا شهر العسل دبي انا وابراهيم ناس احمد مشو بورسودان وكانت اجمل ايام عمري ابراهيم طيب وحنين وراقي جدااا النوع البهتم بي اي تفاصيل بتخص الزوجه حسيت اني اخيرا انتصرت

مرت الايام والشهور وانا حملت واشتياق كمان ومهاد ولدت والكنا متوقعنو طلع صاح جابت ليها بت واحمد اخوي عمل فحص الDNA وفعلا توقعاتنا طلعت صاح البت ما بتو ومهاد حالتها الصحيه كعبه والدكاتره اتهموها بي امراض خطيره وبعد الفحوصات طلع توقعات الدكاتره صاح احمد استغني عنها وسلمها قسيمتا وقال ليها ربنا يهديك من البتعملي فيهو دا ودا كان اخر يوم احمد يشوف فيهو مهاد حسينا انو دا هم وانزاح لانو البت لو طلعت بتو ح يطلعو لينا في راسنا بس مهاد حصدت نتايج قله أدبها ولعبها وهي متزوجه ببت حرام ربنا اعينها علي تربيتها

مرت الايام وانا مبسوطه مع ابراهيم شديد وخالتو سعاد طيبه طيبه مبالغ فيها بتحب اولادها حب ما طبيعي وهم كذالك الفرق بين خالتو سعاد وام محمد خالتو سعاد زوله في حالها بتهمها حياه بيتها اكتر من الشارع وما عندهم شغله في فلان عمل ولا فلانه عملت ناس في حالهم وبتمنو الخير للناس وماعندهم الغيره والحسد ودا المجتمع الانا نفسي اعيش فيهو عكس ام محمد اتربت في قريه بشجعو القيل والقال وسيره الناس وبيوتهم زي الزريبه للغاشي والماشي مافي

خصوصيه نهاي مجمتع قريتهم كان مجتمع فارغ وفيهو الخيانه بكثره ومشكلتهم بدعمو الفساد لا شعوريا كيف يعني ود عمك او ود خالتك اجي داخل البيت توش والبيت فيهو حرمات وكيف يعني اليوم كلو اكونو قاعدين ويقطعو في الغاشي والماشي بحجه الونسه وتحليه الونسه بسيره الناس مجتمع قريتهم كان قاسي عكس في قري حياتهم لا تقل عن حياه المدينه في شي اقرب مثال مكان اتولدت ناس في حالهم ماعندهم شغله في زول بس ديل ربنا ابتلاهم اسال الله ان يشوف حالهم

ويصحو من الهم فيهو دا واكيد موت بت محمد كان سبب في قفل البيوت في وش اولاد الاهل والاختلاط لانو الحصل ما كان حاجه ساهله وسمعت انو تهاني سافرت دبي ودي اكيد مشت تتم باقي قله ادبها هناك واخو وليد حكمو عليهو اعدام وقالو امو جنت عديل ودي كانت اخر اخبار اسمعها عنهم واتمنيت تاني الدنيا ما تجمعني بيهم لافي خير لا في شر وربنا يكون في عونهم ويهديهم

مرت الشهور وانا ولدت سعاد 🥰واشتياق ولدت حمد احمد اخوي سمهاهو علي ابوي وكان فاتحت خير عليهو ربنا وسعها عليهو واشترا بيت وشغلو بقا ظابط واشتياق حاولت تديهو قروش بس رفض ودي اكتر حاجه عجبتني فيهو ووليد سافر امريكا بعد زواجو بشهرين وكان متواصل معانا وقال زوجتو ولدت تؤام

انا خلصت جامعتي بعد تعب ومعانا وكفاح يوم تخريجي دا كان اجمل يوم في حياتي كلهم كانو مبسوطين لي اكتر من يوم زواجي انتصرت اخيرا علي كل العقوبات الواجهتني وابراهيم كان سند لي ودي كانت نهايه روايتنا في قلب القريه اتعمدت اكتب الروايه دي لاهداف لاحظتها انا شخصيا

مجمتع القري مجتمع عايشين بمفهوم زمان ود عمك هو اخوك وود خالتك هو اخوك ودا كان زمان زمن النفوس طيبه هسي الزمن اتغير والنفوس بقت كعبه شديد وغير النفوس بقت كعبه من الدين ما صاح كل البحصل في معظم القري ما كل القري طبعا لانو في قري عايشين حياه المدينه وفي حالهم بس القريه الانا وصفتها دي بتحمل كل عيوب القري التانيه من اختلاط بحجه القرابه وقطيعه ونميمه ودي حاجه كانت بتجري في دمهم وصعب التخلص منها لانو الطفل لمن يفطمو بفطمو

علي القيل والقال الطفل من هو صغير سامع وشايف اي شي قام لقا دي الحاجه السايده في المجتمع ح يكبر وح تكبر معاهو الحاجات دي وبمفهوم اخطر صعب التخلص منو الحصل لي بت محمد دا من ضمن المفاهيم الكبرت في عقول الشباب والساعد علي انتشارها السوشيل ميديا والحصل كان ضربه قاضيه لكل بيت في القريه فاتح بيتو للقريب بحجه انو اخ وعمرو القريب ما كان اخ

قال النبي محمد صلى الله عليه وسلم: “إياكم والدخول على النساء.” فقال رجل من الأنصار: يا رسول الله، أفرأيت الحمو؟ قال: “الحمو الموت.” والمقصود بـ”الحمو” في الحديث هو قريب الزوج غير المحرم، مثل أخي الزوج أو ابن عمه، وليس الأب أو الابن، لأنهما من المحارم وحابه اوضح ما كل القري مفهومهم كده بالعكس في قري متحضرين جداا وبعيدين كل البعد عن الجهل الحاصل في باقي القري ودي كانت نهايه روايتي