الفصل الخامس

رواية في قلب القريه الجزء الخامس 5 بقلم نوسة حمد في قلب القريهرواية في قلب القريه الحلقة الخامسة

مني جارتي جاره السوء اتصلت علي رديت عليها ببردو لاني كنت ما طايقاهم قلت ليها خير يا صحبه السوء قالت لي خير وكتر خيرك قلت ليها احسن الكلام اتقال في وشك من يتقال وراك قالت لي اخدي راحتك عافيه ليك وانا جايبه ليك شمار قلت ليها لا احتفظي بيهو لنفسك قالت لي لا شمار بخصك لازم تعرفي محمد راجلك اتزوج تهاني انا قلبي قعد ادق وبقيت ارجف وبقيت اتزكر في تهاني خربت بيتي وعرست راجلي قلت ليها مني تاني اوعك تتصلي علي هنا محمد لو عرس

امو انا م شغاله بيهو قفلت الخط وبقيت اتزكر فيهن حسدني علي استقراري وجرني معاهن الشارع لغايه م اهملت في بيتي وراجلي وباريت فارغتهن الغطست حجري وقتلت بتي في بطني جاني اكتئاب عديل وجواي بغلي نفسي امش لي محمد في بيتهم واتف ليهو في وشو وانبزهم اطلع الجواي واطلب انو يطلقني بالغصب

تاني يوم من غير م اشعر بدل امشي الجامعه ركبتا ومشيت لي ناس محمد وانا طبعا اتنقبتا طقيت الباب وقالو لي اتفضلي لقيت ليك نسيبتي المدستره محننه وتهاني اخر حنه ورسم وجيهه مع راجلها داك ما كانت مجيهه كده وخاته ليك صندوق القهوه والقهوه مدوره وقاعدين ولد خالتو وود عمو والجيران ونسيبتي عاد دا الدايراهو واحده تقعد تسوي ليها القهوه وتكون عينها قويه سلمت عليها وما رفعت النقاب الاولاد طوالي اتخارجو لمن طلعو رفعت النقاب تهاني بقت

تتمتم قلت ليها مبروك عليك محمد وهي تتمتم شغاله لي نوسه قلت ليها ايوا نوسه نوسه الكانت ماسكه بيتا وراجلا وماسكه حياتا مليتن راس راجلي بالكلام وطلعتني لمجتمعكم الغزر ودبرتي للكلام وجيتي قلتي انا القلتا وفي حين انو انتي عارفه وناس الحله بقولو في شنو دا كلو شكلك للأسف عشان تتزوجي راجلي وانا الطرطوره باريتك وباريت فارغتك انا عمري م ح اسامحك انت قتلتي لي بتي في بطني حسبي الله ونعم الوكيل وان شاءالله الجنا لا تضوقي انتي لا

يضوقو محمد لمن تموتو امو طوالي نطت لي في حلقي قالت لي بري ان شاء الله يضوقو الجنا مالك مداعياهم عاينت ليها وم رديت لاني كنت كرهاناها هي السبب خلتني اباريهن وسمعت كلامن فيني لغايه ما جرني معاهن وخربن بيتي وما كده عرست راجلي

محمد جا لقاني اتكلم قال لي الاستاذه الهاربه من بيتا اخيرا عقلتي ورجعتي قلت ليهو انا ليك براك م رجعت اجي راجعه ليك وفي عصمتك مره ح تبقا بتحلم يا محمد انا جيتك عشان تطلقني وكفايه حدي هنا قال لي انا طلاق م بطلقك لو كسرتي رقبتك ترجعي بيتك والبيت بشيلك انتي وتهاني قلت ليهو لو اموت في الشارع انا م برجع ليك واحسن يا محمد تطلقني عشان لو م طلقتني اقسم بالله انزل راسكم الارض قال لي بتهدديني انتي وداير يمد علي يدو مسكتها بكل

قوتي ولويتا ليهو لمن هو احتار فيني قلت ليهو حد الظلم معاك وقف لو عندك زره رجوله دقا بيها مرتك وامك القاعدات وسط الرجال زي ستات الشاي وململمات الاولاد في وسطن ويسقن فيهم في الجبنه قال لي اولاد منو ديل اولاد خالتي وعمي ناس بيت قلت ليهو ما تخليك جاهل زي ناس حلتك خليك واعي ديل بعتبرو ما محارم وما بحل ليهم يقعدو القعده دي والشي البوجع انت ما بتقعد معاهم قال لي انا ما بشرب قهوه وانتي عارفه امو قالت لي هوي يا قليله ادب

قهوتي دي بعملها من زمن المرحوم وبجو اصاحبو الما من لحمنا ودمنا وعادي زي ناس البيت قلت ليها دا زمان النفوس كانت طيبه وهسي كلهم نفوسهم وسخانه وانا لو عايزه اخرب علاقاتكم كان خربتها من اول يوم ووريتك المعتبرهم اخوانك بنظرو لي عرضك كيف وانت متعلم ي محمد ما صاح البحصل في حرم بيتك دا انت هسي بتدخل بيت واحد من البجو اشربو القهوه ديل قال لي بدخل اي قلت ليهو ابقا القلم ما زال بلم والله اكون في عون اولادكم الحا تلدوهم وما

عايزه معاك نقاش انا عايزه ورقتي قال لي ورقتك ماف عايزه ترجعي بيتك من هسي ارجعي طلاق م بطلق وطبعا تهاني خشما ما فتحتو قلت ليها ما قادره تتكلمي صاح هسي عليك الله ما بتخجلي تعرسي ولد جيران راجلك القديم محمد قال لي اتجاوزتي حدودك دي قسمه قلت ليهو فعلا قسمه بس قسمه مدبر ليها تماما

وطلعت شاطره ويا عالم الماضي كان عامل كيف قال لي ماضي ماضي شنو انتي مجنونه قلت ليهو مجنون انت كانت مصاحبه رجال الحله كلهم بتغلبا انت تهاني قعدت ترمي في دموع التماسيح وتتنايص لمحمد ومحمد سمعني فارغ ما خلا لي جهه ارقد عليها بقيت اعاين لي تهاني الكانت رداحه وجنها لفح توب وشمارات جابت الرقه دي من وين ولا ياربي الكان زمان دا عشان يوقعوني انا بيهو بقيت تايهه طلعت الشارع وحيلي ميت لو زول لمسني ممكن اقع اموت

مني اظنها كانت سامعه الشكله وراخيه اضانا لمن جيت طالعه استلمتني قالت لي نوسه حمد لله ع السلامه سلمت عليها بطرف يدي ما بحب زو الوجهين مني كان ليها دور كبير في خراب بيتي من دخلتو وهسي عامله نفسها في صفي ونوعيتا دي بعرفها بتلفو حواليك عشان يشيلو كلامك ويزيدوهو قصه خياليه من تأليفهم ولانو عالمهم مريض بالقيل والقال اي قصص خياليه بتدخل عليهم وبعمو من الحقيقه ما عارفه دا ابتلاء ولا الناس ديل الخبث سيطر عليهم قلت ليها مني

اسمعيني نحنا دافننو سوا حركاتك دي ما بتخيل علي انا غير نسيبه الغيرتنها وطلعتنها للمجتمع انا زوله عرفت مصلحتها والصاح والغلط فما تحاولي انك تنقلي الكلام عشان تشيلي مني وازيدك في بيت الشعر بيتين انا تاني كلام ورا الناس م بقولو بقول الكلام الداير اقولو في وشك بس القطيعه والنميمه الخربت حياتي تاني في غنا عنها مشيت منها وكنت مضايقه وحاسه اني م طبيعيه وصلت البيت ولقيت اخوي منتظرني بالشكله شكلو محمد اتصل كلمو وقال لي نحنا

ما مالين عينك كيف تمشي لي نسابتك وتتعدي حدودك معاهم في الكلام انتي قاصده شنو وجامعه دي انسيها ورجلك فوق رقبتك ترجعي لي محمد وبقا يكورك في امي قال ليها كل منك دلعتيها وسمعتي كلامه انتي مفتكره الطلاق ليها سمح هسي شوفي فلانه وعلانه طلقوهن وللان حارسات بيوت اهلن لا عرسن لا خلن اخوانن المعرسين اتهنو مشاكل ونقاشات ماليها حد ونحنا الرجال وكلمتنا لازم تنسمع ولو يا امي ما عايزاها تسمع كلامنا نحنا بنطلع نخلي ليكم البيت طلقيها

من راجلها واقعدن وفات اخوي كان منفعل شديد وقرارو نزل علي زي الصاقعه

1 2الصفحة التالية مدونة كامومنذ 4 أيام 0 4 دقائق