رواية في قلب القريه الفصل الأول 1 - بقلم نوسة حمد

جيت بيتنا وم من عوايدي امشي ليهم لقيت امي قاعده تعوس قالت لي بسم الله مالك في شنو ي بت😭 وامي من النوع العندها الحاسه السابعه يعني لو دسيت عليها بتقرا الكلام من عيوني بس انا من طبعي لو زعلانه م بتكلم لو اختو ف رقبتي سيف اي نعم هي امي وح تشيل همي بس شالت همي وانا صغيره م بشيلها همي وانا كبيره حاولت اتهرب منها بالاسئله ومتجنبه عيني م تقع في عينا وهي تركيزا كلو في عيوني عشان حست بي مضايقه المهم قدرت اتجاوزها من غير م

احكي قلت ليها امي انا عيانه قالت لي الحمد لله يعني م متشاكله مع راجلك قعدت اضحك قلت ليها امي انا عيانه وتقولي لي الحمد لله وهمك كلَو راجلي قالت لي ي بتي لو عيانه بتتعالجي بس لو متشاكله مع راجلك انا م بقدر ادخل فيكم وح تشغلي بالي لاني انا م عارفه البينكم شنَو هو ولدي وانتي بتي 😥هنا عرفت انو امي م ح تنصفني عشان كده قلت احسن لي امثل المرض وامش ارقد ف السرير امي قامت من عواستها ولبست وقالت لي ارح الدكتور مسافه خالتك تجي

ونجي نفطر قلت ليها لا لا انتي عارفاني بخاف من الدكتور م ماشه ي امي قالت لي م بعاين ليك وانتي راقده ارح اتقدري وامشي الدكتور خمسه دقايق م بنتاخر تحنس فيني ساعه عشان امش معاها وانا كنت م ماشه عشان انا م عيانه بس م حبيت اقول ليها متشاكله مع محمد مشينا الدكتور ولقينا ماف زول ودخلت ودخلت معاي بقيت اتمتم للدكتور وحسا بي اني م عيانه قال لي امي امشي جيبي الدرب دا وتعالي امي فاتت قال لي انتي مالك قلت ليهو معليش ي دكتور انا م

عيانه متناقشه مع راجلي وجيت بيتنا عشان م ازعل مني اكتر. وامي بتريد راجلي شديد مستحيل تغلطني وم بترضا لينا المشاكل وعندها سكري م عاوزه اشيلها همي المهم انت قول ليها عندي ملاريا وتايفود وكده عشان زاتو جيرانا لمن اجونا اقولو ليهم انا عيانه قال لي خلاص بس ي بتي انتي مدام واعيه كده م ترجعي بيتك لي راجلك قلت ليهو انا م زعلانه بس محتاجه ابعد شويه قال لي ربنا يستر عليكم انتهينا من الدكتور وجيت البيت لقيت خالتي واخواتي جو من

عرفو اني عيانه وبي كده دسيت عليهم مشكلتي معاهو رسلت ليهو رساله قلت ليهو انت عارف امي بتعتبرك زي ولدها م بترضا ليك زي م بترضا لي وانا قلت ليهم انا عيانه ممكن تحترمو خصوصيتي وم تحكي لي امي لانها عندها السكري ولو لينا نصيب بنرجع لبعض لو ماف نصيب بقعد مع اهلي لمن اتيقنو واقتنعو رسل لي قال لي تمام

قعدت ايام من غير م احكي شيء لي اهلي وهو بتصل علي م برد عليهو بكتب ليهو رسايل بس وكانت الحركه دي بتزهجو شديد بقول لي الرسايل م حل لمشكله ردي وانا من جواي م قادره اسامحو لاني قدمتا ليهو اي شي جميل بس عشان انا انطوائيه الموضوع دا مزعل اهلو واقوم اشاكلني 😭طبعي كده والحاجه دي م بي يدي انا من قومتا لقيت عندي اخو يهودي عديل خلاني افقد الثقه ف كل الناس ومانعنا الطلوع عشان كده بقيت انطوائيه وم بي ارادتي انا جبريا بقيت كده

واتاقلمت علي الحاجه دي اهلو دايرني اطلع معاهم لاي مناسبه الطلقوها والعرسوها وووووو وانا الكلام دا م بنفع معاي يعني م بي يدي لمن ارفض هم بقولو انا م متقبله الوضع وبالعكس انا مبسوطه بي عرستي وراجلي اكتر من المجتمع بتاعهم عندي لهفه ليهو اكتر من المجاملات لكن مجتمعنا قاسي بمعني الكلمه دايرين الواحده تعرس م تحرس راجلها طوالي تباري النسوان من جبنه لي جبنه ومن عرس لسمايه لي طلاق وانا م قادره اقتنع بالكلام دا حاولت افهمو هو

بس اهلو م قادرين اقتنعو كانو بشغلوها ليهو اقولو ليهو الحلبيه دي مسكتك مننا الشارع م بنشوفك فيهو واهلو النوع الواحد بعرس اسم عرس لكن م عندو حاجه لمرتو عشان كده كنت بشوف الغيره ف عينهم هم نسوانن لافات بالحله وانا حارسه راجلي الموضوع دا اتنمرو فيهو كتير كان لمن اجي احكي لي بقول ليهو انا م عاوزه اكون زي نسوان حلتكم الواحده النهار كلو لافه والعرس لو ف اخر الحله تمشي انا عاوزه اكون ليك ولي اولادك تمش الشغل تجي تلقاني

منتظراك ومجهزه ليك حاجاتك واولادك اجو من المدرسه القوني قاعده بقول لي لكن ي نوسه الزول م ببقا براهو لازم تطلعي للمجتمع بقول ليهو انا م براي انت معاي واولادي معاي واهلك واهلي ومكتفيه بي كده بس كل م امر زمن، اهلو اتكلمو ف الحته دي لمن جا يوم اتناقش فيهو معاي بسبب النقطه دي وصوتو بقا عالي حاولت اهديهو ابا اسكت وغلبني وانا اموت ولا ازعل مني ولا الناس تحس حياتنا فيها مشاكل عشان كده بعدتا بس م قادره انسا صوتو العالي طلبت

منو اوديني لي اهلي