رواية غريب احتل قلبي الفصل الثالث 3 - بقلم شهد حمدي

وتاني يوم بتصحي مي من النوم وبتكون ناسيه ان في حد معاها وبتسمع صوت مياه جاي من الحمام وبتتخض ولكن بعد ثواني بتفتكر وبتروح علي المطبخ وعامر بيخرج من الحمام ومي بتقوله: صباح الخير
عامر: صباح النور يا استاذه يارب مكنش عامل ازعاج ليكي
مي بأبتسامه: لا أبداً متقولش كده وبعدين بلاش استاذه دي اسمي مي يبقي تقول مي بس بلاش بقي استاذه ومدام ماشي ولا مش ماشي
عامر بأبتسامه: ماشي يا مي المهم هو انتي بتشتغلي صح ولا قاعده
مي: لا بشتغل بس امبارح بعت مسدج للمحامي اللي شغاله معاه اني تعبانه وهاخد اسبوع اجازه وهو وافق
عامر: طيب ماشي هو انتي بتعملي ايه
مي: بحضر فطار علشان نفطر وبعدين نقعد نفكر هنعمل ايه مع الناس اللي عاوزه تقتلك دول
عامر: تحبي اساعدك في حاجه
مي: لا شكراً جدا انا بحب اعمل كل حاجة روح انت في الصالون وانا عشر دقايق واكون عامله الفطار هتشرب شاي صح ولا تشرب ايه وبلاش اي حاجة دي علشان بتخنق منها
عامر بضحك: خلاص ممكن قهوه مظبوطه
مي: ايوه كده لكن اي حاجة دي بتعصبني يلا اتفضل روح لحد ما اخلص
وبيروح عامر الصالون ومي بتخلص وبتنادي علي عامر وهو بيجي علي السفر وبيقعدوا بيفطروا مي بتقول: لما صحيت من النوم كنت ناسيه انك هنا وكنت هصرخ لما سمعت صوت المياه في الحمام لكن بعد ثواني بالظبط افتكرت انك هنا
عامر بضحك: يالهوي ده كان زماني قطعت الخلف والله
مي بضحك: والله العظيم ده اللي كنت فعلا قلبي هيوقف من الخضه
وهما بيتكلموا الباب بيخبط وهما بيخافوا ولكن مي بتحاول تبان قويه وبتقول لعامر: ادخل اوضتك بسرعه لحد ما اشوف مين
وبيدخل عامر بسرعه وهي بتحاول تهدي وبتروح تفتح الباب وبتلقي ايمن وبيقول: صباح الخير يا ميمو
مي بأرتياح: ايمن صباح النور اخبارك ايه
ايمن بدراما: من علي الباب كده مفيش ادخل تعال افطر اي حاجة هموت من الجوع يا ناس حد ينقذني
مي بضحك: بلاش الدراما اللي علي الصبح وحياة خالتي المهم جاي ليه
ايمن: امي بتقولك يا واطيه ياللي مش بتسألي مش ناويه تيجي تتغدي معانا
مي بذهول: انا واطيه ماشي علشان خالتي بس هعديها لا النهاردة مش هينفع خالص تعبانه خلينا وقت تاني ماشي
ايمن: ماشي يا ميمو عاوزه حاجة انا همشي بقي
مي: لا شكراً باي
وبيمشي ايمن ومي بتقفل الباب وبيخرج عامر وعلي وشه ضيق غريب ومي بتاخد بالها وبتقول: ده ايمن ابن خالتي وكان بيطمن عليا
عامر بضيق: هو عادي كده ويفضل واقف علي الباب بيهزر ويضحك مش مراعي انك بنت وقاعده لوحدك
مي بعدم فهم: ده ابن خالتي يا عامر
عامر بغضب وصوت عالي نسبيا: يعني ايه ابن خالتك هو مش مراعي انك قاعده لوحدك والناس ممكن تتكلم عنك هو عبيط ولا ايه
مي بشعور غريب: خلاص اهدي هقوله ميجيش تاني وبعدين وطي صوتك انت كده اللي هتخلي الناس تتكلم
عامر بهدوء: انا اسف بس انا استغربت بس
مي بأبتسامه: مفيش حاجة يلا نكمل فطار
وبيخلصوا فطار وبعدين بيقعدوا يتكلموا