رواية جحيمي وناري الفصل الثالث عشر 13 - بقلم Roskan Aljibory

البارت 13
#جحيمي_وناري
بقلمي ملاك الصمت
ثاني يوم الصبح كعدت ..اكو شي بداخلي قلق وخوف واشتياق كل هالمشاعر للاهلي ..خوف من المواجهه واشتياق الهم ..
نزلت حضرت الريوك .. البيت جان كوله نايم وعلي هم ..جهزته وصعدت اگعد علي ..
ندهته .. گعد ..باوعلي ..كتبتله .. صباح الخير گوم تريك ..
رد عليه ..هلا ..
وهز راسه ..اي هسه جاي ..
بس يحجي بثكل من ورة خشمه ..عرفته زعلان او شايل عليه من كلامي وياه البارحه ..
نزلت وهو كام غسل ونزل ورايه ..
گعدنه نتريك ..كالي ..
هسه بس تخلصين ريوك تكومين تبدلين ..نروح لاهلج قبل اهلي حته تشبعين منهم علمود نرجع سوة لان اهلي يتأخرون ياله يروحون للعزيمه ..
هزيت راسي اي وفرحت ..
كملت الريوك وبقيته لان محد متريك ..
صعدت ابدل وعلي صعد وراي ..كملنه طلعنه ..تلاكينه ويه امه حاچاهه بأتفاقنه وافقت ..ركبنه السيارة ورحنه للاهلي ..
الطريق كوله اقرة ايات متوترة ..خايفه ..
وصلنه ..نزلنه ..دكيت الباب وابتعدت ..حس علي بخوفي .. صرت وراه ..التفتلي .. باوعلي نظرة مطمئنه ولزم ايدي ..
تگاودنه ..فتح اخويه حسام الباب ..
استقبلنه ..سلم سلام حار ع علي وعليه همين ..جانت ابتسامتي خجوله وبخوف مثل واحد مسوي مكسورة ويعرف بنفسه راح يتعاقب وحان وقت حسابه ..
مانطقت ولاحرف واصلا وين اكدر ..
فهمه علي انو اني مريضه وماكدر اسولف ..
مثل الضاج عليه وانقهر حضني مرة ثانيه بشفقه وحنيه طبطب ع ظهري تطييب خاطر يعني ..
دخلنه استقبلتنه امي ماستحملت هديت ايد علي وسرّعت خطواتي عليهه وهي تهلي وتمرحب بعلي ..وصلت الهه حضنتهه ماحضنتني ..
بجيت بحضنهه تقرب منعدنه علي باس راس امي ..
كاللهه ..خاله صغيرة وغلطت .. بصوت ناصي لان حسام لساته جان واكف يم باب المطبخ ..
بجت امي ..
اخويه حسام كال .. هاي شنو يمعودين شو صار بيهه بچي ..
رد عليه علي گاله ..مو خطيه صار شهر ممتشاوفات مشتاقات وكذا ..
ضحكوا ودخلوا ..
بس دخلوا دفعتني امي وتفلت بوجهي وكفختني بغمه ..
انصدمت عبالي رضت عليه .. صوفرت .. بكلبي كلت اذا ردة فعل امي هيج لعد ابويه شلون .. ظليت صافنه ..
غلطت عليه هواي غلط واخير شي ختمتهه ب .. اهمداج وغمت نفسهه .. واهمده هالبطن الشالتج ..
بس مو صوجج صوجنه احنه دللناج وخليناج ع راحتج واخير شي استهترتي ونزلتي راسنه وسودتي وجوهنه ..
علي ابن اوادم ستر عليج وع اختج ..متستاهلينه مدري شلون بقاج ع ذمته ..بس شحجي وشكول حظ ادبسز ..اكيد حظج كاعد ..
الماكلتهه اختج الثوله الغبيه صارت مكفخه ومداس لابوج الى ان شردتهه لبيت اختج ضرغام الله يطيه العافيه تدخل واخذهه لبيتهم ..
وهذاك ابن عمج النزلتي راسنه علموده خطب صارله اسبوعين خطب بنت خالته وطلع يحبهه يالعوبه يالمضحك ..
امه تتباهه بابنهه وبنت اختهه شلون زوج لايكين شلون صخام وعزة بعينج وعين اختج ..
عيوني غوشت رجليه صارت خيوط ماعاد تحملني لزمت الحايط صرت اشوف نجوم والدنيا سوده ماشوف شي ..
افترت الدنيا بيه .. گلبي  .. سجينه ودجوهه بي .. آآآخ ..كفخات ..معقوله ..كعدت بالكاع ..غمتني امي وطبت ..
طلعتلي هاله جانت جايه لبيت اهلي علمود العزيمه وهم تساعد امي ..
طلعتلي كومتني وبوستني وغسلتلي وجهي واديه وشربتني مي ..
دخلت المطبخ شفت همس كاعده رغم من بدايه دخولنه للبيت واحنه واكفين بالطارمه جنت اشوف وحده تشبه هيئتهه كاعده بالمطبخ فكلت هي همس ماكو غيرهه بس هي ابد ما اجتي لي يمي ومن طبيت رفعت راسهه باوعتلي وبعيونهه نظرة عبالك متشفايه بيه ..
بعدين عافت المطبخ وطلعت ..
الظاهر صدوك الي صار كوله تمثيل كدام علي وكدام عيالي ..لان همس اجتني ورة السبعه مالتي لبيت عيالي ويه هاله بس ماشوفتني هذا الوجه ..
هنا ..اليوم ..هالساعه وقت الحساب والوقت مو دائما كفيل بالنسيان الحساب لسه باوله ..
مرات لابد من المواجهه وتفريغ كل الي بداخلك تجاه هذاك الشخص حته تبدي تتقبل الي صار وتسامح ..اي نسامح علمود نرتاح بس احنه مو اطفال علمود ننسه الي صار وبحكم احنه كبار يمكن نحقد ونكيد ويمكن ماعرف شنسوي اكثر بعد ..
كالتلي هاله ..
مارجعلج صوتج ..؟
هزيت راسي ..لا ..
دفوتي حبيبه  فوتي سلمي ع ابويه واستسمحي منه بلكي من يشوفج هيج مريضه ومتكدرين تحجين ينكسر خاطرة عليج ونفتك ونخلص من المصايب ..
اخر 3كلمات كالتهه هاله بنفاذ صبر ..
فتت للاستقبال .. رحت بخطوات متردده سلمت ع ابويه بسته بخده بدون كلام حسيت ببروده تجاهي ..
عيوني تباوعله بخوف ومتأمله منه رحمه وحنيه وعطف عليه ..
هو يباوعلي بعتب شكله تعبان .. دمعت عيوني ..تمنيت اكدر احجي واتعذر منه الف مرة ولا هالنظرة الي بعيونه ..خيبت امله وخنت ثقته بيه .. شكد كرهت روحي بهاللحظه ..
سلمت ع بقيه اخواني جانوا موجودين محمد وبسام ..
طبيت للهول سلمت ع نسوان اخوتي واطفالهن .. نرجس زوجة حسام جانت راجعه وسلامهه ثكيل وياي ..
ماهتميت شلي غرض بيهه ..
امي جرتني ع صفحه .......

تكمله البارت 13
#جحيمي_وناري
بقلمي الملاك الصامت
واخذتني لغرفه البنات ..صعدنه فوك دخلنه الغرفه ..دفعتني طبيت وهمس جانت موجوده بالغرفه ..
رأسا دخلت هاله ورانه لان جانت هي بالمطبخ وشافت امي من جانت تجر بيه ودتصعدني باوعتلهه بنظرة توسل .. انقذيني .. فلحگتنه وعافت الجناين تلاثتهن بالمطبخ ...او هيج ظنينه ..
هاله ..يمه كافي فضايح الله يخليج ..الله ستر ..كافي تفتحون الموضوع ..اي دنسوه رحمه ل الله ..
اسكتي انتي معليج ..
امي جاوبتهه بعصبيه وتكز ع اسنانهه وتحاول تحجي بصوت ناصي بس هي من الاعصاب صايرة باروود ..
اريد افتهم السالفه من هاي الادبسز وأشرت عليه ..
كتبتلهه ..مريضه وماكدر احجي وأشرتلهه ع بلعومي ..
ردت عليه ..من عساج بابو زايد وظلت تغلط عليه وهاله تسكت بيهه لان بده يعلى صوتهه والي يتسمع يكدر يفتهم من كلامهه شصار ذاك اليوم بين قوسين فضحتنه ..
كل هذا وهمس المتفرج المتشفي بكل الي ديصير ..
ع وجهه ابتسامه مستفزة ..
هاله ردت ..
يمه شتريدين تعرفين بعد مو همس سولفتلج كولشي ..
جنت احس امي بصف همس او مكسور خاطرهه بس ع همس وتريد تطلع حركتهه بيه ..
هالة رجعت سولفت لامي شصار وعن اتفاقي ويه همس بالترتيب .. وامي كل شويه وغامتني ..
جنت احس جسمي موجود بالغرفه بس روحي مو يمي طلعت راحت لغير مكان جنت بحاله من اللاوعي ..
جنت اشوف شفايفهم تتحرك بس ما اسمع شيحجون اذاني صارت بيهه وشه ..
شويه وانفتحت علينه الباب ..
منوو؟
حسااام .. عيونه حمر ..
جنت كاعده ع الجربايه ماحس الا انسحلت من شالي انفتح الشال واجه شعري بيده عبالك واحد وذب عليه مي بارد بعز الشتا ..
ولج ساقطه ادبسز ..
هيج هيج منج ..
غلط وفشار ما انزل به من سلطان ..
واني لسه ماعرف شنو السالفه وع شنو دا انضرب ..معقوله حسام عرف زين منو گله ..
كومني بالگاع ودگ دفرات ورفس واني احمي وجهي وراسي من ضرباته ويجر بشعري حته لاابتعد عنه واحمي نفسي منه ..
من حلات روحي بجرة شعري صحت بعلو صوتي ..
علييييييييي ..
ما اجه ببالي احد يحميني من حسام اخويه غير علي ..
اسمع هاله تصرخ تريد توخره عني .همس مالهه صوت خاتله ورة امي ..
امي وهاله يحاولن يوخرنه عني ..
ع صوتي اجه علي يركض فتح الباب بقوة دفعه عني وضربه بوكس وگع حسام بالكاع ..
اخواني بسام ومحمد اجووا فاككوهم وهمه ميدرون شنو السالفه ..
علي گام وگومني وياه خلاني وراه بظهرة لزمت قميصه بقوة تمسكت بي واني اهمس بهستيريا بس هو يسمعهه ..
علي لتعوفني ..عفيه لتعوفني حسام راح يموتني ..
اخواني گاموا يصيحون ع حسام .. ليش هيج سويت شمسويه جلنار شصار احجي ..
ناره حسام مدا تطفه .. راح لهمس جرهه جانت واكفه ورة هاله تحتمي بيهه وخر هاله الي جانت حاجوز بيناتهم دفعهه وضرب همس وكبت العيطه من جديد صياح وصريخ وبالگوة اخواني تكابلوا عليه ووخره عنهه ..
بالصياح والغلط حجالهم حسام شصار .. استغربت شلون عرف ..باوعت ..نرجس واگفه بالباب بوجهه شبح ابتسامه شمتانه .. عرفت هي جانت تتصنت والي سمعته بلحظتهه نقلته لحسام .
من حجالهم شصار هدوا علينه تلاثتهم شالتهم الغيرة .. تدخل ضرغام ..
هو الي ساعد علي .. علي ظل يدفعني وراه وامي متشبثه بقميصه ولازمته حيل وصايرة ورة ظهرة ..
ضرغام خله همس وهاله ورة ظهرة وعلي صف وياه صاروا سوة عبالك جبهه .. المشهد يضحك بطريقه مؤلمه . الغريب يحمينه من اخوانه ..
ابويه تدخل صاح بيهم باخوتي .. سكتوا من بعد الصياح والغلط ..
گالوا لعلي سلمنه بتنه .. احنه نحاسبهه ..
يقصدون عليه لان اني بحمايته ..
علي ماقبل گاللهم ..
زوجتي وتممت زواجنه واريدهه ومو من حقكم .. اي بتكم صح بس طلعت من عصمتكم دخلت بعصمتي ..
وهمس يومين وتجي مشيه زلم عليهه رايديهه لآخويه حمزة ..
سكتوا متفاجئين بكلامه خاصه الجزء الي يخص همس ..
ابويه ظل صافن ..
علي كمل كلامه ..
رجاءا اهلي ميدرون بهاي المشكله وهمه هسه ع جيه وماريد يحسون بشي ..
البنات صغار وغلطن والضرب مو حل مراح يجيب نتيجه ..بتكم صارت زوجتي ..رايتكم بيضه ..
حسام گال ..
مرتك عدك معلينه بيهه .. بس همس بتنه واحنه نعرف شلون نأدبهه لذلك معليك انت اطلع منهه ..
علي ..وشلون راح تأدبهه بالضرب ؟ التشويه لو تحرمهه وظيفتهه ..حسام هذا مو حل ..عمي انت شتكول ع الكلام الي كلته الكم .. رايدين نخطب بتكم لاخونه ع سنة الله ورسوله ..
ابويه .. رحم الله والديك يابه ..والنعم من اصلكم ونعم النسب ..هلا بيكم عمي ..نتشرف وع راسنه من فوگ .
علي .. رحت بسته براسه وجلنار وياي خليتهه توكع ع ابوهه .. باسته براسه وگالتله اسفه بابا وظلت تبجي وهمس همين دفعتهه هاله علمود تسوي نفس ماسوت جلنار ..نريد يخلص هالموضوع هنا وع خير ونهدئ كل الاطراف ونطيب خاطرهم بهالموقف ..
انتبهت ع جلنار رجعت تحجي ..
يمكن حته هي ممنتبهه ع نفسهه ..
اجاني محمد اخوهم الجبير صافحني وحضني وكأنه يتشكر مني وممنون مني ع موقفي هذا ....
تكمله البارت 13
#جحيمي_وناري
بقلمي ملاك الصمت
گالي ..كفو منك متقصر سترت ع بناتنه ومافضحتهن ..الف رحمه ع والديك ..
هالكلام جان جبير وصعب يتفوه بي بشر لان العرض والشرف غالي واني فكرت باخوتي قبل لا افكر بجلنار وهمس ..
اشوف فرح وارتياح بعيون ام جلنار تدعيلي بالعافيه والتوفيق ..شعور حلو ..

حسام شاف الكل وكف وياي وموافق وراضي عن كلامي ..
سكت وطلع من الغرفه ..
بسام صافحني وكالي رحم الله والديك وخالتي تشكرت مني ..
ضرغام اخذ هالة وطلعوا من الغرفه لان جهالهم جوة يبجون من ورة صياحنه ..
همس باوعتلهه ودنگت ..تكسر خاطري ..اكثر وحده تأذت هي .. كلامهه يدوگ براسي ..تحبني ..لسه تحبني ؟
حاجيت عمي ..عمي من رخصتك اريد احجي ويه همس اني وجلنار ..
اي يابه تفضل ..
اخذ خالتي وطلعوا ..
كولهم من سمعوا كلامي انسحبوا ..
ظلينه اني وهمس وجلنار بالغرفه ..
همس خيتي ..
تقصدت اكول هالكلمه خيتي ..ردت اقتل اي امل الهه بحبي اذا كان هالكلام الي انگال سابقا صحيح ..
سألتهه ..
عندج اعتراض ع الكلام الي گلته ..توافقين باخويه لو تقدملج ؟
ظلت ساكته ومنصيه ..
همس ؟
رفعت راسهه ..اجت عيونهه بعيوني ..عيونهه متروسه دموع ..
جاوبتني بألم ..
ليش عندي حل ثاني ؟
محد غاصبج خيتي .. آني دا سألج .. انتي معززة مكرمه ببيت اختج بس هم يبقه هذا حل مؤقت لان ضرغام يبقى رجال غريب عليج ..بس من تصيرين بذمة رجال مثل حمزة الج الاحسن ..
مو دا امدحلج باخويه بس حمزة خوش ولد وانسان مثقف وفاهم وواعي ومهندس وحالته الماديه خير من الله ..
رغم هو اصغر مني بس هو الي لازم شغل ابويه يعني شاغول وابن سوگ ..
تكدرين ترفضين ..بس بعد گتلج انتي بوضع مؤقت واذا رجعتي لهنا يمكن يأذوج اخوانج ..
لا مو يمكن اكيد يأذوج ويحاربوج بدوامج ويحرموج منه .. اسمعي كلامي خيتي ومتخسرين اريدلج الخير اني ..
صفنت ثواني ع وجهي ..جنت احجي منفعل يمكن بكل جوارحي اريدهه توافق باخويه لان اعرف الكم الاكبر من الاذيه والضرب والحرب النفسيه واسلوب النبذ وكع براسهه ..ليش اكذب ع نفسي ..جزء مني يحس بالذنب تجاهه ..صح هي غلطت بس اني يمكن تصرفي هم بي غلط .. بوكتهه ماشفت كدامي غير هذا الحل.. يمكن هو هذا الحل الي جان اقل ضررا لكل الاطراف ..
كالتلي .. ابويه وافق ..بعد متحتاج موافقتي ..
ردت احجي ماقبلت تسمع مني بعد ..
وضحتلي فكرة انو هي مجبورة تقبل وماعدهه حل ثاني ..
انداريت ع جلنار .. تقربت منهه  .. لزمتهه من خصرهه ونصيت عليهه .. بيج شي ؟
يوجعج شي ؟
هزت راسهه لاء ..
رجعتي تحجين !!
كلتهه مبتسم ..
كالتلي ..اي الحمدلله ..
دنكت عليهه اكثر ..شاورتهه ..صالحي اختج وقنعيهه ..
طلعت واني حليت مشكله ووكعت بمشكله ثانيه ..
شلون اقنع حمزة يخطب همس ؟؟
والطامه الكبرى شلون اقنع امي تخطب همس ..
جلنار ..
علي عافني وطلع .. بقيت وحدي ويه همس ..
باوعتلهه متباوعلي متجاهلتني ..
همس ..مادري شأكولج .. آني اسفه ..
ردت عليه بحديه ..
لاتكولين شي ..طلعي برة ..
همس !!!

للحكايه بقيه ..

رايكم بالبارت حبايب .توقعاتكم للقصه ؟؟؟