رواية جحيمي وناري الفصل الثالث والعشرون 23 - بقلم Roskan Aljibory

البارت 22
جحيمي وناري
بقلمي ملاك الصمت

حمزة .. همس من يوم الوگعت عيني عليهه عجبتني ..
اول مرة شفتهه جنت مسوي حادث ومكسر وهي جانت مثل الفراشه تفتر داير مدايري وعيني ماشلتهه عنهه ..
ايام ظليت بالمستشفى وصارت هي الداء والدوا ..
صح جنت اتألم بس جنت ابالغ حته يدزوهه تشوفني ..
حتلو لحظات اشوفهه تضربني المسكن وتروح جنت قابل ..
عجبني ثگلهه ورزانتهه وهدوءهه .. شكد ما جنت اتحارش كلام او نظرات مارفعت عينهه عليه ..
اعرفهه تحس وتسمع بس مغلسه .. حته تغليسهه عجبني ..
فررتني وراهه السبع فرات دوختني ماخليت شي مسويته ونظرة مابادلتني ..
گلت هالبنيه دواهه اجيهه من الباب وبلكي تصير نصيبي واني اعلمهه ..
شخصيتهه هادئه الى درجة انو تحسهه ضعيفه الشخصيه بس من تتعرف عليهه صدوك همسه نسمه هوا بارده عذبه منعشه بليله من ليالي اب ..
يعني مثل العجينه حسيتهه .. عجينه وبيدي وشلون مااريد اني اسويهه ..
صارت عزيمه العرسان اخويه وزوجته واهلي ببيت اهل همس ..
گلت ايييي فرصه اشوفهه وبلكي هالمرة تنطيني وجه ..
عاشرت جلنار والبنيه اخلاقهه ماكو منهه صاينه اخويه ومتحمله امي وطاير بيهه طيور ..
ناسبنه هالعائله وصار طريقي سهل اخطب همس وتطمنت اكثر من شفتهم يحبون علي وشايلين النسيب بالصلوات گلت واني اخو علي يشهدلي بس هالصيت ممعقوله اذا خطبت يرفضوني ..
فعلا حاجيت علي ودگ صدرة وكالي عد عيناك ..
ماجذبنه خبر بيوم العزيمه حاجينه ابويه وخطينه البنيه الي وبعد اسبوع اتفقنه تصير مشيه الزلم ..
الي ردتهه مو نفسهه الي تهواهه امي وتريدهه اليه وصارت بيومهه مشكله بس الحمدلله الله سهل ومشى كلام ابويه ونوعا ما اقتنعت امي باختياري بس اعرف همس لو جبتهه لهنا راح تتعذب ويه امي ..
فنويت اشهر اکعود ويه اهلي اشوف الاوضاع شلونهه وبعدهه اطلع اذا مناسبنه الوضع لو ماتفاهمن همس وامي ..
صارت مشيه الزلم وبعدهه باسبوع عقدت ع همس ..
خلال فترة اسبوعين ممتواصل ويه همس بالتلفون الا للضرورة وهنا مو اخوان همس ولا ابوهه الي يحاسبوني ضرغام زوج اختهه الجبيرة هو الي يحاسبني ..
دائما همس من اتصل عليهه الگاهه ببيت هاله هالموضوع كولش ضوجني ..
كلت بعد منعقد اطلب من همس تقلل روحاتهه لبيت اختهه لان ضرغام يبقه رجال غريب شلون تكعود ببيته ..
حسيتهه واكفه عندي همس صارت عرضي واني ماتقبلت الموضوع ..
عقدنه وهمس بعدهي كولش خجوله ..
موتني خجلهه لاماخذ منهه حق ولا باطل .اني استعجلت بالعقد وياهه لان جنت اريدهه تصير حلالي وتتعود عليه وتشيل حاجز الخجل بيناتنه كلت اتعب عليهه هسه ولاتشلع گلبي بعد الزواج ..

ثاني يوم من بعد العقد مالتنه صادف يوم سبت من الصبح اني وابويه طلعنه بشغل يعني سفر خارج المحافظه ..
رغم رقمي عدهه ومن البارحه بعد ماتعشيت يم اهلهه وصيتهه تتصل بس متصلت ..
محبيت بردهه تجاهي حسيتهه مجبورة عليه ..
من افكر بالموضوع شلون خطبتهه وشلون بسرعه عمي كال گبع واخذ .. فعلا محد اخذ رأيهه بس بالعقد مجانت مبينه معارضه ولا كارهتني ولامبينه مجبورة بس خجوله وسرحانه بعالم ثاني عبالك .. تبتسم مجامله بس هم مو ضايجه .. الهدوء والرزانه هو الطبع الغالب عليهه ..
فكرت ليش وافقوا بسرعه اهلهه بدون ميرجعولهه ..
يمكن لان العائلتين  صارت بيناتهم نسبه فماكو داعي لفقرة السؤال عني وعن اخلاقي ويمكن لان تعرفوا ع علي وشلون مداري جلنار ويحبهه ويمكن لان مرتاح ماديا بس هالاحتمال مااحب افكر بي بعيد لان ماطلبوا ولاتشرطوا ..
السبت الظهر جنت مسافر بس ببيت ابويه الثاني اتصلت ع همس ..
جاوبت سلامهه عادي ماكو لفهه بصوتهه محسيت بهالشي ..
سمعت صوت اطفال يمهه گتلهه انتي وين كالت ببيت هاله ..
كولش تنرفزت ..
نهيت المكالمه ماردت اتعصب عليهه ولا اضوجهه كلت بعدهي ممتعلمه ع طبعي ..
اكره العناد اني .. اكره البنيه التعاندني ..
صح مامنعتهه بشكل نهاءي من بيت اختهه بس مو من ثاني يوم العقد الگاهه ببيت اختهه ولا كأنه اني حجيت شي ووصيت ..
سديته منهه وحاير شلون اعلمهه ع طبعي ..
عدى اليوم بالشغل ويه ابويه ..
وبتنه هناك ببيت ابويه ولا اني رجعت اتصلت ولا هي ..
ثاني يوم الاحد هم شغل .. اني بالشغل ايد ابويه اليمنه مقربني من دون اخواني لان مهندس وهاي شغلتي من جنت طالب صارت عندي خبرة بالبناء والاعمار وهذا شغل ابويه بالتحديد .. مقاول بيوت وعمارات وقطع اراضي نشتريهه نبنيهه ونبيعهه ومرات يأجرونه عالم نبني الهم البيت عدنه ببغداد مكتب يهتم بهالموضوع واني اهتم واشرف ع البناء بشكل مباشر .. 
جنه مقررين نرجع العصر بس علي خابر الوالد وطلب منه يرجع ..
الي افتهمته صايرة مشكله بين امي وجلنار بس المشكله جبيرة وامي طارده جلنار من البيت ..
هالكلام قلقني ..
احنه ممناسبيهم گصه بگصه بس المشاكل بين جلنار وامي اكيد حتأثر ع علاقتي ويه همس واهلهه ..
وصلنه للمستشفى حجينه ويه علي وافتهمنه السالفه كولهه ..
هنا مو بس قلقت .. صح عاقد ع همس وصارت زوجتي شرعا بس ردة
تكمله البارت 22
جحيمي وناري
ملاك الصمت

بس ردة فعل اهلي وخاصه علي هي الي راح تحدد مصيري ويه همس ..
جنت حيل لازم كلبي من هالموضوع ..
ظليت ساكت ومبتعد .. علي قريب عليه وميضم عليه شي اخذ ابويه ع صفحه وحجاله سالفه انمار ابن عم البنات والي سامعته امي من زوجه اخو جلنار كيد نسا ..
مانكر انمار خطب زوجته قبل لاهو يخطبهه واهلهه ماوافقوا بس مجان اكو شي بيناتهم ..
زواجي من همس يمكن متوقف ع ردة فعل علي وتلافيه للموضوع ..
حسيت اني وهمس امكانيه زواجنه فد موضوع ع المحك ..
قررت بيني وبين نفسي بس تفض شغله جلنار وامي نسوي العرس بسرعه ماريد اظل تحت رحمة الظروف والدنيا اقدار ..

شفتهه جانت واكفه بالمستشفى يم امهه ..
توجهت الهم ...
السلام عليكم ..
خالتي وهمس .. وعليكم السلام ..
تگوم بالسلامه ان شاء الله ..
مجان عندي كلام اكوله مستحي من  الي سوته امي ببنتهم ..
وكفت ع صفحه بعيد شويه عنهم .. جنت فوك هذا كوله ضايج من همس لاتسمع الكلام ولاتخابرني ولا تسأل عليه ولا تهتم بيه .. مااحس بشي ثاني غير برودهه وكأنه مجبورة عليه ..

ورة شويه اجتي وكفت يمي بس من ورة مثل واحد بايكله بوكه ولا كأنه خطيبهه بس ارجع واكول عاذرهه لان اعرفهه رب مال مستحى ..
هلو حمزة شلونك ..
رفعتلهه حاجب وظلين اباوع بوجهه ..
شعجب .. خاف صارت زحمه ؟
ابتسمت باحراج ..
اعرف خجلتهه ..
زين الحمدلله انتي شلونج ؟
زينه ..
شذكرج بينه ؟
باوعتلي باستفهام ..
اي .. لا تتصلين لاتسألين .. تدرين بيه مسافر ويه الوالد من البارحه ..
مو اجيت حاجيتك هسه ..
هه خاف خالتي دزتج ..ههههههه ..
ظليت اضحك .. احس نفسي استجدي مشاعر حب واهتمام من خطيبتي ..
اجتني فكرة جنونيه انو ممكن همس تحب احد ثاني وانغصبت عليه ..
طردت هالفكرة من راسي .. تعوذت من الشيطان ..
باوعت لوجهه البرئ وجمالهه الهادئ محاطه بس مكياج خفيف .. كحله مأطرة وجهه وبياضهه بحُمرة ..
ابتسمت بوجهه .. النظر لهذا الوجه يمسح تعب سنين حرمان ..
دنگت ورجعت رفعت راسي ..
طالعه حلوة ..
كلتهه بابتسامه .. جانت واكفه همس كبالي بادلتني الابتسامه بخجل ..
عيونك الحلوة ..
زادت ابتسامتي گتلهه .. والله ؟
بوووياااي خجلت اكثر ..
فديت الخجوله اني .. كافي هيج ..
هو شنو الكافي ؟
حجتهه بهمس ..
خجلج .. هواي تخجلين ..
مو بكيفي والله ..
ظلينه نحجي شويه بس ابد مجبتلهه طاري انزعاجي من تكرار روحاتهه لبيت اختهه ومسألة جفاءهه وبرودهه تجاهي طيبت خاطري هسه بهالكلمتين الي حجتهه وياي .. كولش خجوله مو برود ولامغصوبه عليه ..
عزمتهه ع گهوة بكافتريا المستشفى .. جنت بغير عالم وياهه .. وهي هم حسيتهه فاصله عن الواقع ومتجاوبه وياي ..
حسيت ممهتمه كولش لوضع اختهه تيقنت هي وجلنار مو قريبات من بعض ماعرف شنو السبب المفروض توأم ومترابطات ووحده تحس بالثانيه ..
صار لقاء غرامي هههههههه بعيد عن عيون ابوهه واخوانهه وضرغام ..

علي .. نقلنه بطلين دم لجلنار ولليل الحمدلله توقف النزيف .. ابد ماعفتهه ..
اخاف اعوفهه ..كولشي بيه متعلق بيهه .. كولشي بيه يريدهه ..
حالتهه استقرت وخروا الصوندات من حلگهه ونقلوهه لغرفه خاصه لان حجزتلهه ع الخاص هناك يداروهه ويديرون بالهم عليهه اكثر واكدر اني ابات وياهه ..
ماقبل الطبيب تطلع للبيت ع مسؤوليتنه كال خلي نراقب حالتهه واني ماعارضت ..
ذاك اليوم جان اصعب يوم بحياتي .. حسيت بقرب الموت من حبيبتي .. حسيت شكد سهله وبلمح البصر يروح منك عزيز .. شعور مااتمناه لعدوي ..
من نقلناهه لغرفه ثانيه كدرت ادخل الهه براحتي ..
اهلهه واهلي والكرايب الي عرفت بيهه بالمستشفى اجوي شافوهه بالليل ..
جنت اشوفهه من بعيد .. اوكف بالباب اراقبهه .. اراقب نظراتهه .. تدورني بعيونهه .. اراقبهه من تعقج حواجبهه اعرفهه دتتألم .. كون الالم بگلبي قبل لاتحس بي هي ..
وجهه اصفر بلعومهه مجرح من الصونده ومتكدر تحجي هواي كلمات مرة وحده ..
شگد احبهه .. شگد اعشقهه .. وانوبينه حامل بطفل مني .. الدنيا ماسايعه فرحتي بهالخبر احس الكاع متشيلني .. ابتسم لا اراديا من اتذكر جلنار حامل مني ..
ياجحيمي وياناري .. ياعشقي وياجنوني ..
الطبيب طلب نبقيهه هالليله تبات بالمستشفى ..
اهلنه رجعوا للبيت واني وخالتي امهه بقينه يمهه ..
خليتهم يحطون سرير واحد للمرافق لخالتي خطيه تعبت واكفه ع حيلهه من الظهر لسه مرة جبيرة وتعبانه هاي من غير هبطة بنتهه اجتهه بذيج الظهريه مطروده وصار الي صار ..
لان بلعومهه مجرح كلت للطبيب ديأذيهه بلعومهه ومتكدر تحجي كالي وكلوهه شوربه دافيه وعصاير طبيعيه اسهللهه بالبلع والمغذي بيدهه لان هي تحتاج اكل يقويهه ..
اتصلت ع ايه ساعه زمان تسويلي شوربه وعصايرطبيعيه  وتدزهن بيد حمزة الي راح يوصل هاله وهمس للبيت لان ضرغام اليوم خفر فرجع لدوامه من العصر ويرجعلي بالاكل ..
بين ماوصل حمزة رحت جبت لخالتي واليه عشه لان اني جنت بدون غده و

تكمله بارت 22
وميت جوع وجلنار نايمه ع المسكنات ..
تعشينه اني وخالتي ..
كتلهه خاله تمددي ع سرير المرافق انتي تعبانه وورانه ليل طويل وسهر خاف تحتاج شي جلنار فثدوك ماجذبت خبر بس ذبت جسمهه ع السرير نامت .. خطيه الله يساعدهه تعبانه ..
ظليت اكل بلفتي كاعد ع الكرسي بعيد شويه عن سرير جلنار بس صايرة كبالي ..
نص ساعه وكعدت ..
فتحت عيونهه بتعب .. هنا الدنيا ضحكت بوجهي .. شعور محاس بي قبل .. معقوله هالكد احبهه هالبنيه هاي .. شنو البيهه يفرق عن بنات العالم ..
كمت الهه تقربت منهه بستهه براسهه ..
الحمدلله ع سلامتج عمري ..
ابتسمتلي بتعب واشرتلي ع بلعومهه ..
كتلهه .. ادري والله ادري بس اليوم ويصير زين هاي من الصونده الجانت داخله بي ..
بشنو تحسين ؟يوجعج شي ثاني ؟
هزت راسهه لا ..
جوعانه حبيبي .. اكيييد ..
خليتهه تكعود ع حيلهه وجبت الشوربه الدافيه وكعدت اوكلهه ..
مثل الطفله داريتهه ..
وشربتهه عصير موز وحليب شويه وكالت كافي ..
عل ي .. هدوو  مي  كول هه د م  عفيه كعد ام ي تساعد ني اب دل
وليش اكعدهه اني موجود ..
حطيت الشوربه ع صفحه وقبغت الحافظه حته تبقه دافيه وكمت طلعت الملابس الي جايبيهه الهه اخذت دشداشه وتوجهت لجلنار خليت المغذي مالتهه ع حامله متحركه تتحرك وياهه وين متروح ..
راح اشيلج للحمام وانتي بس لزمي الحامله ..
هزت راسهه اوك ..
شلتهه للحمام فتحت المي الدافي كعدتهه ع كرسي التواليت الغربي بعد ماسديته ..
رفعت دشداشتهه لحد افخاذهه وهي كاعده وغسلت الهه رجليهه لان اكثر الدم جان ع طول رجليهه .. فركت الدم اليابس باصابيعي وحاولت مااذيهه ماكدرت اغسل ايديهه لان ثنينهن بيهن كانوله غسلت الهه وجهه ..
نزعتهه دشداشتهه المتروسه دم ولبستهه وحده ثانيه نظيفه ..
ابتسمت خجلانه لان نزعتهه بس يشهد عليه رب العالمين ماببالي ولابتفكيري هاي الشغله ابد ..
خلصت غسلتلهه وجهه ورجعت شلتهه .. باستني بخدي ..
كتلهه بالشقى ..
لاتتحارشين بيه وين اروح بهالليل ..
زادت ابتسامتهه وحضنت رگبتي بايديهه وهمستلي باذني ..
والله احبك ..
تنفست بعمق وهو شهيق من رگبتهه غمضت وذبيت الزفير بقوة  .. عتقت عطر حبيبتي بين طيات حضني كولشي بيه يريد يحفظ عطرهه اطول فترة ممكنه ..
رجعتهه للفراش ..عدلتهه وعدلت نومتهه ..
يوجعج شي كالت لا ..وبدت تكدر تتواصل وياي بالكلام ..
بعدج جوعانه ؟
لا حبيبي ..
صفنت عليهه ..
عيوني متقبل .. ترفض تفارك وجهه ..
نظراتي مركزة عليهه ..
كالتلي .. علي اني فرحانه ..
ضحكت وضميت ضحكتي .. لان دائما جلنار تنكتل واكو جانب مشرق بالموضوع يفرحهه ..
ليش بله فرحانه ؟
لان رب العالمين قسملي هالطفل منك ..ومااخذة ..
شفت الفرحه بعيونك من سالتك ايه شنو شعورك لو كلولك زوجتك حامل ..
اي صح فرحت .. بس لو خيروني بينج وبينه اختارج الج ..
ابتسمت بتعب ..
جنتي تدرين بنفسج حامل ؟
لا والله ..
وجهك تعبان سودة عليه ..
مو تعبان لاتشيلين همي .. بس گوميلي بالسلامه وانتي تداريني يروح التعب مني ..
لزمت ايدي اخذتهه وباستهه ..
ولج لاتتحارشين ..
مشتاقه الك .. نيمني بحضنك ..
بنت الاوادم ماتشتاقين الي الاّ واحنه بالمستشفى ..
نطلع لبيتنه ..؟؟ شتگول ..
لااااا الحمل طلع عينج ..
ههههههه اخ ههه والله مابيه حيل اضحك عفيه لاتضحكني ..
دخلت الممرضه ضربتهه بالكانوله مسكن الاَم حته يساعدهه ع النوم وطلعت ..
اني وخرت بعيد عنهه ومن طلعت الممرضه كالتلي ..
ها شو شردت وغلست ؟
لااا ابد ..
لعد نيمني بحضنك ..
صار .. غالي والطلب رخيص ..
تدنت عني شويه سوتلي مجال بسريرهه ونمت يمهه حطت راسهه ع صدري حضنتهه وغفت واني من التعب هم غفيت بسرعه رغم شخير خالتي واصل لنهايه الممر هههههههه ..

للحكايه بقيه ..