رواية جحيمي وناري الفصل السابع والعشرون 27 - بقلم Roskan Aljibory

البارت 26
جحيمي وناري
ملاك الصمت

همس .. طلعت من مكتب حمزة فااايرة اعصاب شلون يتجرأ هيج يسوي وياي ..
احس جسمي كوله يرجف .. اخذت سيارة تكسي للمستشفى لان ماخذة زمنيه ..
وصلت وكملت دوامي .. دخلت للدار عقلي مو براسي تفكيري مشوش ..
خليت البنات يغطن ع غيابي ورحت ارتاح بالدار .. من اتذكر باسني بشفتي ابرد واختض جلدي يكزبر وارجع اتلمس شفايفي باطراف اصابيعي .. بسري بداخلي نوعا ما فرحانه .. ليش انكر اي احبه ومارحت افصخ خطوبتي وياه رحت انتقم لكرامتي ماعرف ردت فد شي أأذيه بي لان تخطاني وراح لابويه وقرر شي يخص حياتنه ثنيناتنه ..
ع صدري جبل هم .. هاله تنصحني مااحجي شي وعلي حجه وياي ولمحلي انو ماكو داعي حمزة يعرف بالموضوع ..
عرفت نفسي ضعيفه بحضور حمزة ..
مااكدر .. لتأثيرة عليه .. وهو يعرف هالشي كولش زين وواثق منه ..
قررت اقاطعه مااحجي وياه .. حتلو زواجنه بعد اسبوعين اعاقبه ..
من جنت بالدار اتصل عليه شكم مرة مارديت ..
اني اعلمك حمزة ..
ظلينه شكم يوم هو يتصل واني ماارد ..
الي صار بالمكتب ماحجيته لاحد حته لهاله ..
ومثل ماطلب مني ابويه ارجع لبيت اهلي من ثاني يوم لميت غراضي ورجعت بدون كلام ..
الاوضاع ببيت اهلي زوينه امي وابويه زينين ويايه ..امي تحب الي يداريهه ويشيل عنهه بشغل البيت واني ع طول مااني موجوده بالبيت ايدي بكولشي .. طبخ مواعين تنظيف ماخليهه تشتغل ..
حسام مو بحالي يحجي وياي بثكل من ورة خشمه وع گد الصخرة والطلبات مالته لان زوجته عد اهلهه واكو احتمال يطلكهه بس ابويه معارض لان تبقه نرجس بنت اخوه بس هي نرجس حيه متستاهل واحد يوگف بصفهه لو يدافعلهه من باب خطيه وحرام علينه وهذا هدم بيوت وحسام معاند الا يطلك لان تفاشل ويه اهل علي من وراهه وشغله ثانيه صارلهم 4سنوات مزوجين وماعدهم اطفال فأخويه لگاهه حجه يطلگ ويجدد لذلك اغلب المشاكل الي ببيت اهلي بسبب هالموضوع ..
اني التهيت بين شغل البيت ودوامي وبين تحضيرات عرسي ..
يوميه العصر نطلع اني وامي لو ايه لو هاله للسوك اشتري نواقصي وتأجير بدلاتي ..
حمزة بس اول يومين جان يتصل عليه بعدين توقف بطل يتصل ..
مرساله جانت ايه الي صارتلي اخت وصديقه والحلو بيهه كتومه اذا تسريهه بسر او كلام متطلعه ..
احتياجاتي اكتبهن بورقه ونطلع نشتريهن ونسوي قائمه سوة توديهه ايه لحمزة علمود مينسه شي من التحضيرات ..
بس ابد من بعد ذنيج اليومين ابد مدگ عليه ..
عرفت مأجر قاعه ومرتب الزينه البيهه واغاني الدي جي هو اختارهن بنفسه وتم تاكيد الحجز لاذربيجان واني عبالي كذبه من بابا كال عنده شغل وياج وياه ..
مر اسبوع وبقالي بس اسبوع واحد ..
احنه عقد محكمه عاقدين ومكملين حته الجنسيه بدلناهه الى متزوجه وبالظهر مكتوب اسم الزوج ..
عرفت من ايه غرفتي غرفة الاخشاب جهزت ..
ونصبوهه بالغرفه ..
اخذنه موعد ويه الصالون .. والحجز بمكان راقي وكذلك حجز الفندق اهتم بي حمزة ..
اتصلت بيه هاله ..
حاجتني حمزة متصل عليهه ..
سألتني شصاير بيناتكم ..
مصاير شي ..
لعد ليش صارلج اسبوع متحجين وياه ولاتردين ع مكالماته ..
زعلانه منه ..
اي مو كافي زعل .. بعدين ديحاول يتصل بيج ليش متجاوبينه ليش متعاتبينه .. ترة اسلوبج غلط ميصير هيج تجافين الرجال ..
خليني براحتي هاله ..
اريد اعلمج انتي داخله ع حياة جديده ماعندج خبرة بيهه شلون اخليج براحتج ..
مرديت عليهه مقتنعه بالي داسويه .. صح مشتاقتله بس ماعرف ..
هو شنو الي صار بيناتكم ؟
مسولفلج ؟
لا سولف .. كال اجتني همس للمكتب تعاركت وياي لان حجيت ويه عمي علمود ترجع لبيت اهلهه ونستعجل بالعرس .
بس هيج سولفلج ..
اي .. شنو صار شي اكثر بعد ؟
اي ..
شنو احجي ..
باسني ..
ههههههههه والله ياحبيبتي انتي فطيرة ودتضيعين هاي الايام من ايدج ..
وج واذا باسج .. غير انتي حلاله ..غير يحبج .. هاي احلا ايام ايام الخطوبه اشبعي ونسه ودلال وطلعات وبوس هههههههه شكو بيهه ..
هاي انتي تحجين هيج هاله ..
اي احجي واعلمج لان شو تبدل لسانج بس الظاهر لسه ثوله ومتعرفين مصلحتج وين ..
مو ثوله ..
ديله ماطولج مو ثوله خابريه وتصالحوا ..
ما معليه ..
يابه يطبج ورد اني شعليه بيكم اووي ..
يله روحي عدي شغل ..
اي تمام الله وياج ..
هلا ..
سديته من هاله واني افكر بكلامهه بس عندت وركبت راسي ..
الاسبوع الثاني تقريبا خلص بنهايته ..
زوجات اخوتي اجن يمنه يساعدن بالتنظيف والي تساعدني انظف جسمي ..
جلنار تمر عصريه ولليل يجي علي ياخذهه .. حامل وتعبانه ..
رحت للصالون اهتموا بيه عنايه بالبشرةوتنظيف وشمع وحفافه ..
طلعت الهث ماعرفت نفسي وهاي عود بدون مكياج ..
وغيرت لون شعري هو طويل لحد نهايه ظهري ..
هالمرة مو بس ايه وهاله وياي اجن خوات حمزة المتزوجات بمحافظات بعيده فاتن وسمر وهم ع واهسي اشتغلتهن ام الصالون شمع وتنظيف بشرة وتغيير لون الشعر بين صبغ وميش وتخصيل ..
ثاني يوم الحنه بس اني ماردت نسوي 
تكمله البارت 26

ماردت نسوي حنه .. احنه حاجزين قاعه ونسوي بيهه حنه وزفه بس حمزة لا راح يسوي اليوم حنه شبابيه يفرحون بي اهله ويحنوه ومن تخلص حفلته يمر عليه يحنيني ..
اسبوعين اني مشايفته ولا سامعه صوته .. اني اختاريت هالعقوبه اله ماردته بعد يجبرني ويلغي شخصيتي ..
قبل يوم الحنه بيوم دزلي مسج ع الخط كاتبلي بي ..
باقي بس ليله وحده بس وتكونين بحضني ..
غمضت عيوني وتخيلت نص كلام رسالته .. جلدي كزبر وخجلت حيييل ..
غطيت وجهي بالبطانيه ونمت ع صفحتي .. تخيلت حمزة نايم كدامي .. فتحت عيوني مجان اكو احد ..
رجعت غمضت .. تذكرت بوسته ..ابتسمت لا اراديا ..
بس يخلص باجر وراهه راح ابوسه بكيفي .. شوكت مااريد .. يويلي .. بس التفكير بهالحظات يخليني اموت خجل .. هه افكر ابوسه والله اموت بكاعي من خجلي ..
بيوم حنة حمزة بيتنه هووسه الكرايب كولهه ملتمه من البارحه بايتين يمنه ودي جي اغاني وكولهه ترگص صدوگ لو گالو العرسان ثنين والمجانين الفين ..
اتصل حمزة بامي گاللهه خلصت حفلته وراح يجون يحنوني ..
لبست ع السريع بدله قصيره للركبه كلوش احمر من كدام قصير ومن ورة اطول بس مو ع طولي ومن فوگ تطريز مخرم مستطيل بمكان  الصدر بدون تعلاگات يعني البدله ملزومه بصدري ومن ورة قيطان علمود يضبه ..
شعري عفته سرح وع طوله ..ومكياج مخليت هواي او مالحكت اصلا ..
جنت كاعده بالهول مبوزة وهو دخل عليه بقميص سمائي و بنطرون نيلي ..
رفعت عيني اله صارت عيوني بعيونه ..
تنهدت ونزلتهن لان جان يضحك وماردت ابادله الضحكه واعرف لو باقيه اباوعله جان استسلمت وضحكت ..
عيونه ونظراته نظرات عشق ..
زفوه لي يمي باس راسي واخذ ايدي باسهه وكعد سلم ..
شلونهه حياتي ..؟
الحلو زعلان بعده ؟
وج يويل الله شطالعه ..
دنكت حصرتني الضحكه ..مارديت .. بوزت ..
ليش زعلانه مني .. ؟
لان بستج ؟
لعد شوفي باجر شراح اسوي بيج .. اذا ما ادمي هالشفه مو اني حمزة ..
صديت عليه بخزرة .. بس محجيت ابد ..

تعاقبيني بسكوتج ؟
والنبي اني اعلمج باجر.
جان يحجي وياي ويتوعد بيه ع باجر والضحكه مافاركت وجهه ..
لازم ايدي وكل شويه يشيلهه يبوسهه امه تقربت منه كالتله .. اثگل شويه شنو مشايف نسوان ..
رد عليهه .. اي يمه هيج كيمر عرب اني مشايف ..
باوعتلي صفح معاجبهه ..
انطته امه الحنه حطلي باصبعه حنه بثنين اديه وخلالي فوك كل ايد حناهه عمله نقديه هاي عد امهاتنه وبيبياتنه عاده يحطون عمله نقديه (درهم ) ع الحنه بايد العروس تجلبلهه الرزق والحظ والسعاده ويه زوجهه وعائلتهه الجديده ..
وباصبعي حنيت ايد وحده بس هو طلب ..
بقه شويه يمي ووطول الوكت اني مدلغمه عليه ابتسم مرات مجامله ..
من كام باسني براسي ..
نص عليه وهمس بأذني ..
باجر موعدنه ..
شكد جرئ وشكد متحمس لباجر  واني شكد خايفه .

تكمله بارت 26

شكم لقطه حلوة سويه لوحددكم ومن بعدهه تدخلون سوة للقاعه سألتهه منو خطط لكل هذا كالت حمزة لعد ماكلج ..
سكتت ماريد افضح روحي واكوللهه صارلي اسبوعين ماحجي وياه واليوم زواجنه واني بعدني زعلانه ..
كملت كلامهه هاله ..
وبعد اختار اغاني لدخلتكم للقاعه واغاني ترگصون عليهه سلو ..
فتحت عيوني ظليت فاكه حلكي ..
سدي حلگج خيه فضحتينه ..
لسه متحجين وياه مو ..
ضحكت .. هاله الوحيده الحافظتني بدون ما احجي شي ..
يرادلج كتله معدله .. هو حمزة لو يفتهم من اول ليله يكفخج شكم راشدي حته تجرين عدل الظاهر لسه متخافين من زلمتج ..
ضحكت ولج تطين بأختج ..
اذا مثلج عوبه اي اطي بيج لان عجزت واني احجي وياج واعلمج ..
لاعفيه هاله لاتخوفيني ..
دمشي امشي ..
دخلتني هاله لغرفه ثانيه حطتلي باودر ع جسمي علمود توحد اللون ويه وجهي ولو هو مو هواي فرق لان مكياجي نازك مو اوفر واني اصلا بيضه ..
وبعدهه لبستني البدله الماروني الي اشتريتهه بالعقد بس مالبستهه ..
جانت قصيرة كوولش طلعت بيهه عبالك لعابه ..
آيكون مال نزاكه ..
بعد عمري هاله من شافتني بالصورة النهائيه هلهلت وبوستني ودعتلي ربي يسعدني ..
ظليت كاعده انتظر ام الصالون تخلص البنات ع السريع لان اتصلنه بحمزة علمود يجي ياخذني ..
جانت جلنار كاعده وتتراسل ويه علي وهي مبتسمه ..
بداخلي حقد الهه ..
صح راح اتزوج حمزة ومو ع بالي علي ابد واصلا حمزة باسلوبه وشخصيته خلاني احبه بس بوقت من اوقات حياتي وصلت للحضيض بسبب جلنار وهي هم وصلت للحضيض بس اكو من مدلهه ايده وانتشلهه بس هي ممدتلي ايدهه .. فكرت بأنانيه فكرت بنفسهه وشلون تنقذ نفسهه وبس ..
تذكرت قبل اشهر جنه كاعدين نفس هاي الكعده وهي تبجي موتت روحهه من البجي وحاولت تنتحر وبالفعل اخذت حبوب اكثر من شريط واتخربطت ووديناهه للمستشفى غسلولهه معدتهه ياله تحسنت كوله علمود تجبرني اصير عروسه علي بمكانهه واني شكككد ثوله وغبيه استسلمت لضغطهه ناسيه حرام الله وناسيه شرفي وناسيه انو كان ممكن انذبح من وراهه ..
گتلهه بحقارة ..
تتبادلين بمكاني ؟؟
هي التفتت عليه مصدومه ممصدکه تسمع هالكلام مني ..
افتهمت قصدي كولش زين ..
ضحكت باستهزاء ودرت وجههي عنهه ..
رتبتلي ام الصالون الطرحه بشكل سهل وثبتتهه بماشات وخلتلي تاج نازك بسيط ولبست عبايه اسلاميه مزدوده فوك البدله وع راسي لبست برنص مغربي ابيض مال عروس ..
وطلعت لحمزة ..
صعدت ليورة لكيت ايه موجوده سلمت عليه وكالت راح اروح وياكم بس علمود ارتبج واساعدج ..
باوعتلي وكملت كلامهه .. عبالي بدلتج مدنفشه ..
كتلهه لا لبست القصيرة اول وبعدين البس الثانيه وبعدهه البيضه ..
اي زين تسوين ..
حمزة يباوعلي بالمرايه ..
كلما اشيل عيني الكاه مبتسم ويباوعلي ويسويلي حركه ينزل ايده ع حنجه يتوعدلي ..
وصلنه للاستوديو ..
لزم ايدي حمزة ونزلني من السيارة ..
جان اكو 3درجات ساعدني اتخطاهن بدون مااعثر ..
طبينه حجه ويه مالك الاستوديو طلب كادر نسائي دخلنه للغرفه الي راح نصور بيهه واسعه الغرفه وبارده وبيهه مري هواي وورد وارضيات خضرا عبالك ثيل وكاعدين بحديقه ..
ايه نزعتني العبايه الاسلاميه والبرنص ورتبتني ..
حمزة لابس قاط حبري القميص فاتح والرباط غامق طالع فد شي عيوني ماشلتهه من عليه ..
واول ماطلعتله ظل فاتح عيونه وصافن ..
اجتي المصورة ..
باركتلنه بوجه مبتسم ..وكالت ..
مو عرسان شبيكم تقربوا ..
كاللهه حمزة.. زوجتي تستحي ..
كالتله عادي عادي وانت وين رحت عنهه..
تقرب مني گلتله المصورة صير مقابيلهه اوكف واحضنهه من خصرهه..
وهو ماصدك وكف كبالي وحوط خصري بايده ..
كوة كاتم ابتسامته وعيونه بعيوني ..
يهمسلي كلمات ..
هذا الجمال كوله الي اليوم ..
اويلي يابه ..
المصورة توجهنه ونسوي مثل ماتكول ..
اكثر واحد مستمتع ومستفاد هو حمزة ويمكن مراد جلسه التصوير تخلص ..
حرجني حيل والمصورة مقصرت ابد باللقطات الي اخذناهه واني متت بخجلي كوة سيطرت ع نفسي حسيت بالحرارة تطلع من وجهي وعرگت ..
خلصنه لبست عبايتي والبرنص وساعدني حمزة انزل الدرج واصعد بالسيارة ..
تقرب مني كالي ..
والله لو ماعيب جان خليت الزفه من التصوير للفندق شلت عيني باوعتله غمزلي ..
يله حبيبه صعدي لا اغير رأيي ..
صعدت بسرعه هذا مخبل يسويهه كولشي اتوقع منه ..
وصلنه للقاعه ..
صعدنه درج طويل وايدي بايد حمزة لانحذائي كعب عالي وخفت خاف اوكع بس حمزة سندني ابد ماتركني ..
بنهايه الدرج نزعتني ايه العبايه الاسلاميه والبرنص وطبيت للقاعه واشتغلت الهلاهل واشتغلت وياهن اغنيه حسام الرسام ..
جبناهه واجت ويانه ..

الف الصلاة والسلام عليك ياحبيب الله محمد ..

هم عريس هم نشمي وهم ربعه يزفونه ..
هي وياه وتتمناه وهو بحبهه خيعونه ..

دسمعونه الهلهوله ..
الف مبروك گولوله ..

عرسه العيد ..
چا شيريج ..
اذا مثل الگمر مرته ..
هلاهل وورد وجكليت وهالاغنيه كل هذا بدخلتنه للقاعه..
تكمله بارت 26

احلا استقبال شفته بحياتي .. دمعت عيوني فرح شفت السعاده ع اعتابي ..
نسيت زعلي ونسيت هم بكد الجبال
شايلته ع ظهري وردت اطير ..
هالسعاده الي .. هالفرحه الي .. باوعت لحمزة .. هالرجال اللازم ايدي وماعافني ابد زوجي هذا حقي وحلالي ويحبني ..
فرحت لنفسي الي انكسر خاطرهه بعلي وجلنار وانجبر بحمزة ..
عصرت ايد حمزة الي لازمتني هو التفتلي عباله اريد شي ..
همستله .. احبك ..
ماسمعني .. بس من حركه شفايفي عرفني شگلت ..
توسعت ابتسامته .. شفت عشق بعيونه مو بس حب واهتمام .. احبه اريد اصرخ احبه ..
الاغنيه مستمرة ..

هاي الشافهه گلبه وحلم بيهه ..
حبي وروحي وعمري يسميهه ..

الهلاهل مستمره واجواء فرح ..
والاغنيه فدشي مو طبيعي اني ماسمع اغاني ولاواهسي يمهن لذلك بالي جان يم كلمات الاغنيه وعبالك الدكه مال الاغنيه بگلبي تعزف شمااحجي مااكدر اوصف شعوري ..

گلبه يغار تشعل نار لمن تحجي وي غيرة ..
مو معقول صح ميگول بس مبينه الغيرة ..
وهو يضحك .. باسني بايدي الي لازمهه وابد ماهدهه ..
اخير شي بالاغنيه ..
منوصيك نعرف انت تهواهه ..
تنسة الدنيا كولهه انت ومتنساهه ..

اجتي امي بوستني وباركتلي وهو باس راس امي ووصته عليه وامه هم تقربت بوستنه وخواته وخواتي بوسني وهواي ناس دخت من كد العالم السلمت علينه ..
كعدت شويه ع الكوشه وحمزة يمي اخذنه صور بالمبايل ..
وبدت الدگه مال اغنيه سلمى رشيد يهنيالي ..

علمني .. اغمض العين .. دونك لحظه ياغالي .. نسيت شلون .. الك اشتاگ .. گد ماتجي ببالي ..

گومني حمزة نرگص سلو اني استحي وماعرف وخاف يصير شي واتفشل بس ماهمني شي ماخفت ماطول حمزة وياي ولازم ايدي .. حسيته هو السند الي ..

يهنيالي ويهنيالي ..
حبيبي يمي هنيالي ..
انا اتمنيت بگلبي بيت واعيشك بالگلب مالي ..
انت عيني ونظر عيني ..
ادورك لو غبت بيني ..
اريد وياك الف الكون ..
ولاخر نقطه وديني ..
اوعدني ابد متروح ..
عن عيني ولا لحظه ..
تكتلني .. اذا انت تغيب ..
لأنك للكلب نبضه ..
يحسدوني ويحسدوني ..
ع حبك يحسدوني ..
شتريد انطيك ..
حته ارضيك اذا مكفت عيوني ..
احبك كلما ترمش ..
عيونك بالعشگ متغش ..
تخيل صير حبيبي طير ..
الك حضني يصير العش ..

تمنيت الاغنيه متخلص وتمنيت حمزة ميعوفني .. بس عافني وطلع وبدت حفله النسوان بالقاعه ..
ساعتين .. دي جي صوته عالي قريب والصوت باذني انطرمت ..
لبست بدلتي البيضه والطرحه فوكاهه وجلوني ..
ودزلي حمزة مسج .. كاتبلي .. جايج حبيبتي .. عرفت الزفه بالطريق بلغت امي والبنات حته يتحضرن ويلبسن ..
شويه واجتي الزفه ..
لبسوني البرنص بس اكدر اشوف وجهي طالع ..
دخل ابويه واخواني تلاثتهم وعمي ابو حمزة وحمزة وعلي واخوانهم الكبار حيدر وحسين ..
المشهد جان مهيب تدخل بالكلب رهبه شلون ابو البنيه يسلم بنته لزوجهه ويوصيه عليهه ..
ابد مجنت خايفه من الحياة الجايه وحمزة بجانبي وايده بيدي ..
هالموقف تكرر عليه للمرة الثانيه ..
نفس الوكفه .. ابويه واخواني .. نفس عمي ووگفه الاخوان بس العريس علي جان مو حمزة ..
الفرق هناك جنت خايفه واليوم لاء ..
سرقت نظرة لجلنار واكفه يم علي .. هالثنائي سببولي التعاسه بيوم بس اليوم السعاده ع اعتاب بابي واني فاتحه الهه بابي واكوللهه بالمهلي ..
ربي تمم عليه سعادتي ..
ابويه لزم ايدي حضني وباسني بکصتي وسلمني لحمزة..
بدلنه حلقاتنه من اليمنه لليسرة الاقرب للقلب ..
نزل البرنص مالتي وگاودني شبك اصابيعه باصابيعي وخطيت اول خطواتي بحياتي الجديده ويه حمزة ..

للحكايه بقيه ..
اعتذر البارحه منزلت بارت لان هم صايمه وتعبانه ..
راح يكون النشر بين يوم ويوم لان جديات ماعندي قدرة اكتب واني صايمه وبيت واطفال وفطور وحته بعد الفطور عبالك حيلي مهدود تسمعون العافيه ..
عوضتكم ببارت طويل .. جسدت زواج حمزة وهمس بالتفاصيل .. شاركوني توقعاتكم ..
.