جحيمي وناري الفصل الرابع وأربعون 44 - بقلم Roskan Aljibory

البارت 36
جحيمي وناري
بقلمي ملاك الصمت

همس .. اجاني تبليغ من المحكمه .. وقعت عليه .. استلمته .. افترت الدنيا بيه .. مدري الشمس مدري الخبر انسطر راسي وصارت وشه باذاناتي .. يعني صارت صدوك .. يعني نفذ كلامه حمزة ..
دموعي الهه ولوحدهه نزلت ..
راح الموظف بس من شدهتي فاتحه باب البيت وواكفه والورقه بيدي اقراهه وارجع اعيد بيهه .. اعيد اقرة اسمه الثلاثي .. ممستوعبه ..
ابويه طلع ديشوف منو بالباب شافني واكفه ودموعي تجري وبيدي الورقه ..
شكو بابا منو اجه ..
باوعتله مديت ايدي طيته ورقه التبليغ ..
هو عين ع الورقه وعين ع دموعي ..
حضني من جتفي ومشاني جوة للبيت ..
هاهيه بابا هذا امر ربج .. ليش تبجين .. خلي يطلك مو تكولين مرتاحه هيج ..
هزيت راسي اي بس انعصرن دمعتين الم مطلعن من عيوني طلعن من کلبي الي صرخ بلحظتهه احبه اريده ليش هيج سوة بيه ليش مسامحني يمكن من عافني شهر بدون مينفذ وعده انو يطلكني يمكن صار عندي امل انو يسامحني ..
احد مأذيج احد مسمعج حجايه ؟؟
لا بابا ..
خلص وكلي امرج لالله وكافي بجي ..
امي جانت بس صافنه افتهمت وماسألتني اي شي ..
كومي غسلي بابا خلي ااوديج لدوامج بطريقي ..
رحت غسلت وبالي كوله يم هذا الموضوع ..
وصلني بابا لدوامي .. مااخذت ايدي شغل ومن شدهتي خفت أأذيلي مريض خليت البنات هنه يفترن ع المرضى واني كعدت ع الباصات للناس الجايه تدخل للطبيب او تاخذ دوة ..
اخر ساعتين اخذت زمنيه وطلعت من الدوام وبنيتي بعد ماارجع ..
بوجهي للبيت .. دخلت لكيت بابا راجع وماما رايحه للدوام دوامهه مسائي واخويه الجبير محمد موجود..
سلمت عليه ..
هاهموسه شلونج ..
زينه الحمدلله .. انت شلونك .. زينه شلونهه احمد واشرف شلونهم ..
بخير بخير .. شويه ويجون ..امهم راح تجيبهم من مدارسهم وبوجهم لهنا ..
زينه زوجه محمد وتصير بنت عمتي واحمد واشرف ولد اخويه ..
هلا بيهم ..
عرفت ابويه هو الي متصل ع محمد يجي علمود باجر يروح ويانه للمحكمه .. ياربي صعبه .. حته الطبه للمحكمه اشوفهه صعبه ..
من معارفه محمد دبرلنه محامي والاصح المحامي يصير ابن عمتي اخو زينه زوجته واسمه عصام اكبر مني ب 4سنوات ..
سمعت منهم هذا الكلام الي تعمدوا يحجوه كدامي ومن بعدهه صعدت لغرفتي ابدل ملابسي وتمددت شويه بين ميصير وقت الاذان حته اصلي وانزل احضر الغده وبلكي زينه وجهال اخويه الكاهم جايين حته فد مرة نتغده سوة ..
بهالفترة سويت فيس .. صح من زمان عندي نت بس مجان عندي فيس وتواصلت بي ويه ايه .. ايه هي الوحيده من اهل حمزة معافتني وجنت حاسه انو هي تعرف شي قصدي عن سبب مشكلتنه وشكد لحت عليه اسولف الهه بس اني محجيت شي ..
مجنت اسمحلهه تجيب طاري حمزة او اخبارة بس جانت تسولفلي ع الكليه ووضعهه هناك شويه ونسده ونروح ..
بيومهه لكيتهه مراسلتني بس محاجيتهه والبارحه هم مجنت محاجيتهه لان بيتنه جان هوسه هاله بايته يمنه ومن راحت ظليت انظف وراهه ولفيت كبه وبورك للعشوات مال ايام الاسبوع لان عشانه دائما نواشف ..
صار الاذان مكدرت انام رغم تعبانه ونعسانه كمت صليت ونزلت احمي الاكل واحضر حضورات وفاكهه وزلاطه ولبن ..
شويه واجتي زينه وولد اخويه وكحين وترسوا البيت حس وهوسه ..
سلمت عليهم وبوستهم ..
هذا اشرف الصغير ابو لسان يكولي عمه صايرة حلوة ودبدوبه كرصت خدوده ابو لسان ..
کلي انتي هم صار عندج خدود ..
ضحكت من سوالفه ..
اجتي زينه ساعدتني نحضر سفرة الغده واجه حسام وصبينه الغده وكوليتنه تغدينه سوة ..
خلصنه حطيت الجاي ع النار والتهيت اغسل مواعين ..
جنت اسمعهم يحجون بموضوعي .. حسام مجان يدري كلوله وزينه هم جانت يمهم وجانت اصلا تدري يمكن من اخويه ويمكن من اخوهه المحامي الي لزم قضيتي واتفقوا راح نروح باجر اني وابويه ومحمد اخويه والمحامي للمحكمه ..
للعصر اجتي هاله هي وجهالهه وزوجهه وضرغام حاول يصبرني ببعض الكلمات .. الله يعوضج بالاحسن منه ان شاء الله .. ومن هالكلام الي يجبر الخاطر ويطيبه ..
كلتهه مرة واكولهه مرة ثانيه علي كسر خاطري وحمزة جبره فاي كلام بعد ميفيد ..
تعشينه كوليتنه سوة بيت اخويه ماراحوا هم ظلوا ع العشه ويه بيت اختي ..
هالة حاولت تطلعني من جو اليأس والكآبه الاني بيهه هي وزينه ..
جنت لابسه دشداشه فانيله ضيگه جوة العبايه الاسلاميه المفتوحه كالتلي هاله ..
وج عيني شو مكرشه اول تالي هموسه عمرج ماسمنتي ..
ضحكت كتلهه وين اكو ..
نبت زينه .. اي عيني مرتاحه ع فراك حمزاوي .. شنو جان ماخذ عافيتج ..
ضحكت بالم من جابت طاري حمزة ..
حاولت ابلع بطني متنبلع الكرش الصغيرون بي نوع من الصلابه .. خفت بيني وبين نفسي ..
انتبهت عليه هاله ..
شبيج ..
مابيه شي ..
لعد شبي وجهج انكلب فجأه مو هستوج جنتي تضحكين .. ترة دنشاقه وياج والله لا مكرشه ولابطيخ اصلا حليانه يلوگلج من تربربين ..
هههههه
ضحكت وبداخلي الف اه وحسرة وهم جديد .. خوف من الي شاكه بي يطلع صحيح

تكمله بارت 36

تعشينه سوة وورة العشه كلمن راح لبيته وقبلهه اتفقنه باجر من الصبح يمر علينه محمد ياخذنه للمحكمه بسيارته ..
ليلي بيومهه مانمته يمكن لحد الفجر بجي ساعات وتفكير ساعات ماعرف شأريد وماعرف شأدعي ساعه اكول احبه واريده وانظلمت واريده يسامحني وساعه اكول مترهم نكمل سوة حتلو احبه راح يظل يعيرني بالي صار طول عمري ..
وجه الفجر نمت من التعب ..
الصبح الساعه 7 امي كعدتني علمود اتريك وابدل واروح ويه ابويه ..
كعدت غسلت وجهي وبدلت راسآ .. گلبي جان مقبوض وعيوني مورمه منايمه زين .. احس روحي باختبار صعب .. مو بس صعبه دخلتي للمحكمه اكو رهبه بداخلي .. مثل الي موديهه لمصير هي تعرف شنو هذا المصير ومتريد تروح بس مجبورة تروح ..
اي والله ماريد اروح حيل مختنكه ..
لبست بنطرون وفوكاه فستان للركبه لبسي الاعتيادي بس لان سمنانه بي صاير بي ضيگ ع جسمي شويه ..
نزلت واني جابرة نفسي ..
صباح الخير ..
سلمت ع امي وابويه وحسام الي جانوا كاعدين يتريكون ..
كعدت اريد اتريك ماكدرت الزم شي .. كمت ..
ليش گمتي يمه .. اكليلج لكمه تسندين روحج بيهه ..
ماريد يوم ماشتهي ..
سوده عليه ..

كمت واني اشوف عيون ابويه واخويه عليه حاسين بيه واني ماكدر احجي شي ..
حسام راح لدوامه وسمعنه محمد دگ هورن طلعناله اني وبابا سلمنه وانطلقنه للمحكمه ..
بگلبي رهبة المكان .. رهبة القاضي .. نظرات الاتهام بعيون الناس ..

هالضغط النفسي متحملته جنت كوة لازمه نفسي دموعي مترقرقه بعيوني بس ارمش تنزل ومن تنزل بسرعه امسحهه وتنزل غيرهه امشي ورة بابا مدنگه ..
شفنه المحامي واكف يم باب القاعه الي راح ندخل الهه وموجود بيهه القاضي ..
تقربنه سلمنه .. عصام ابن عمتي صح بس مو ذيج العلاقه وياه عدا السلام ..
اخذني ع صفحه من بعد ماسلم وسلامه اريحي وشقه وضحك ويه محمد اخويه شافنه كولنه متكأبين ووجوهنه مكلوبه وراد شويه يغير نفسيتنه ..
جان واكف وياي يسألني عن شنو الي اريده ..من حقوقي لان حمزة هو الي راح يطلگ فمن حقي اتمتع بكل حقوقي نفقه والمتقدم والمتأخر .. بالي مو يمه مو هذا الاريده شيفيدني المقدم والمؤخر صح جنت اجاوبه كلما يسأل بس عيني ع الباب لسه مالمحت حمزة لسه ما اجه ..
ابويه تعب من الوكفه وكعد ع كرسي جان ع بعد امتار من عدنه ومحمد راح يجيبلي بطل مي ..
حسيت نفسي تلعب حارة الدنيا كولش واني ممتريكه ابد ماستحملت الحر حسيت كل شويه اريد اوكع كوة لازمه نفسي ..
بهاللحظه بالذات دخل حمزة هو وياه رجال جبير بالعمر .. مو عمي ع الاكثر محاميه ..
اول مارفعت راسي وشفته صارت عيني بعينه .. وجه نظرة لعصام الي جان واكف يمي ويحجي ونظرة اليه ..
هي نظرة هي خزرة ..
اجه اخويه محمد جابلي مي رأسا اخذته فتحته وشربت ..
لابت روحي ..وماتحملت مشيت ركض للحمام اخويه محمد لحكني فهمته بعد ماكدر اريد اتقيأ اخذني للحمامات دلاني عليهه وطبيت ..
تقيأت .. بس معدتي فارغه فمو دا اتقيأ عبالك دا تطلع روحي ..
بجيت بحرگه ع حظي .. غسلت وكملت بسرعه لان خاف يصيحون اسمي حته ادخل للقاضي طلعت لكيت اخويه بعده ينتظرني بباب الحمامات رحت وياه ودموعي لوحيدهه تتساقط وامسحهه ..
اول ماوصلت حاجاني عصام من شاف عيوني حمر گالي لنتقهرين هو الي خسرج متعرفين الله شكاتبلج يمكن الاحلا والافضل الج بعده ماجاي وانتي بعدج صغيرة والحياة كدامج لاتخلين طموحج وسعادتج
وغايتج تتعلق برجال ..
جان يحجي واني مدنگه اهز براسي ..
تمام ؟؟
رفعت راسي ابتسمت ابتسامه خفيفه صارت عيني بعين حمزة ضايج وبوجهه خزرة ماعرف اليه لو هو هيج ..المفروض يفرح هو رادهه وراح يخلص مني ليش هالتجهم وعقجة الوجه بعد ..
رجعت دنكت ..
صاحوا اسمي واسمه واسماء محامينه ودخلنه للقاعه .. صدوك رهبه .. القاضي والناس .. استحيت مثل الي مسويه جريمه .. صعب عليه هالموقف ..
تقربنه من القاضي .. رجال خمسيني لابس نظارات طبيه .. قرة اوراقنه .. كل شويه ينصي ع الاوراق ويشيل راسه يباوعلي ..
صاح اسمي واسم حمزة ..
گمنه وضفنه ..
سأل حمزة .. تريد تطلق زوجتك ..
اي نعم سيدي ..
سأله القاضي .. شكد صارلكم متزوجين ..
جاوبه حمزة .. اربع اشهر ..
رفعله حاجبه القاضي ..
وهاي الفترة برأيك كافيه حته تقرر تنهي زواج وتكسر بخت بنيه ..
دنك حمزة ..
جنت ابجي اني من اول ما بلش القاضي يسأل حمزة ..
حجه بمتمته ..
سيدي ممتفاهمين ..
شنو سبب عدم التفاهم .. طيني اسباب ..
سكت حمزة ..
مقايمه بواجبهه كزوجه تجاهك ..
لا سيدي مو هيج ..
ابتسم القاضي مثل الي ديسأل السؤال وممقتنع بي ..
متعرف تطبخ ..
متعرف تنظف ..
حمزة يهز براسه لا ..
اضاف القاضي .. وحته هاي مو اسباب كافيه للطلاق .. هي ممجبورة تطبخ وتخدم مو من واجباتهه ومع هذا بناتنه يدخلن لبيت الرجال كاملات مكملات ..
التفت عليه ..
ليش تبجين بابا ..
زاد البجي مالتي من وجهلي السؤال ..
شنو السبب ..
متريدين تتطلكين لو شنو ..
وقع وختم
تكمله بارت 36

وقع وختم القاضي .. وكال طلب الطلاق مرفوض وحولنه ع المرشده الاجتماعيه الي هي مختصه بحالات الاصلاح بين الازواج ..
اذا هالحل جاب نتيجه تسقط قضيه الطلاق واذا لاماكو فايده وماحلوا مشاكلهم وخلافاتهم ترجع تصعد قضيه طلاقهم للقاضي ..
هذا الي فهمنياه المحامي ..من بعد مامسحت دموعي وكتلهم يعني شنو ..
طلعنه من قاعه المحكمه بوجهنه للمصلحه الاجتماعيه وطلبوني فقط اني وحمزة ..
جنت حرفيا ارجف ..
دخلنه اني وحمزة لمكتب المصلح الاجتماعي والشرطي الي جان بالباب سد الباب علينه وماسمح لاحد بالدخول ..
ظلينه وحيدنه .. مجانت موجوده ..
رحت كعدت وهو همين كعد كبالي ..
جنت احاول اتهرب من عيونه الي جانت تتفحصني ..
رأسا حجه ..
شنو هذا لبسج ومنو هذا الجنتي واكفه تتمضحكين وياه ؟
صدمني سؤاله .. باوعت لروحي ..
عقدت حواجبي .. شبي لبسي .. ومنو هذا الجنت اتمضحك وياه .. اتذكرت المحامي ابن عمتي عصام .. جانت مجرد ابتسامه مجامله ..
محجيت شي ولا رديت ..
دخلت المصلحه الاجتماعيه سلمت علينه مرة اربعينيه من بعد السلام كلام ودود واسلوب حلو تستدرجنه بالحجي وكل شويه توجه سؤال لطرف منعدنه ونجاوب .. بلحظات قليله زرعت بيه ثقه ..
عرفت بينه نريد نتطلك وحمزة هو المشتكي معناهه هو الي رافع قضيه الطلاق ..
شكد صارلكم مزوجين ..
4اشهر ..
شلون هيج بهالسرعه قررت تنفصل عنهه ..
بيناتنه مشاكل ..
وهاي المشاكل مالهه حل ؟
مالهه حل ..
شلون عرفت .. شلون قررت بهالسرعه .. غير تكعدون سوة تفكرون وتتناقشون وتحلون مشاكلكم .. ترة الزواج تنازلات وتضحيه من الطرفين مو بس من الزوجه ..
ست احنه اتفقنه ..
اهااا ع شنو اتفقتوا ماما ؟
ع الانفصال ..
التفتت عليه لكت دموعي تجري ..
ليش تبجين ماما .. انتي راضيه تتطلكين ؟
رجعت باوعتله ..
هذا وجه وحده تريد تتطلگ ؟
انت جاوبني ..
شنو الي ماله حل بيناتكم ؟
مقصرة وياك بحقوقك ؟
هز راسه لا ..
مانعتك عن التمتع بيهه ؟
لا ..
لازم عليهه شي موزين لاسامح الله ؟
لا ..
سيئه الفاظ سيئة اخلاق وياك ؟تتجاوز عليك ..
لالا ..
لعد هي لعبه جاي تريد تطلگ ..
سكت ..بعدين كال .. ممتفاهمين ست ..
بشنو ممتفاهمين ..
سكت مجاوب .. كل شويه يباوعلي .. يريدني اسانده يريدني احجي واكوللهه اي ممتفاهمين واني هم اريد اتطلگ بس سكتت محجيت ..
جنت امسح بدموعي وتنزل غيرهن واشهك بهدوء ..
خابرهه مطلوبه بقضيه بغرفه القاضي استأذنت وطلعت وكالت تفاهموا بلكي تتصافون ..
اول ماطلعت الباحثه صك ع سنونه وحاجاني ..
انتي ليش متحجين متكولين اريد اتطلك منه ليش متسانديني من اكول للمرة ممتفاهمين ..
ليييش .. تسألني ليش .. لان احبك .. اي احبك وماريد اتطلك منك ..
كمت ابجي بحرگه ..
غلطه .. غلطه وحده وراح اظل طول عمري ادفع ثمنهه ..
جان يباوعلي بهدوء ببرود ..
هاي بعدج تتمسكنين ..
مسحت دموعي .. هواي ذليت نفسي الك ..
ترة اني الي اعترفتلك بكولشي .. مو علي .. مو جلنار .. اني الي اعترفت الك .. اني الي ماكدرت ابني سعادتي وحياتي وياك بكذبه وردت من قبل زواجنه اصارحك واتركلك القرار نكمل لو كلمن يشوف طريقه بس اختي واخوك ماقبلوا ..
شنو فرقك عن علي ..
كمت اصيح لان تلفت اعصابي منه .. صرت ابجي بحركه واحجي بألم ..
شنو فرقك عن علي .. علي يحب جلنار ومن عرف سامحهه وكمل حياته وياهه وانت تحبني ومن عرفت اجيت هنا تبهذلني بالمحاكم علمود تطلگني .. تريد تطلگني روح طلگ محد لازمك .. لهنا وخلصت وياك ..لهنا وهاي هيه .. كافي ذله لناس متستاهل ..
اني ماستاهل ؟
ايي اييييي .. وهسه تأكدت انت متستاهل ورسالة نرجس جانت رحمه من رب العالمين اليه .. عرفت حقيقتك .. تحبني ع اساس وكتلت روحك .. هه !! حبيش ..
جنت واكفه واصيح .. فجأه افترت الدنيا بيه ودخت لان بدون ريوك وحارة الدنيا ..
رأسا گعدت ع الكرسي ..
شبيج ..
معليك ..
شربت مي ..
هدأت من برة بس داخلي يغلي .. روحي تنزف وگلبي هم ينزف ..
مجاوبتيني .. منو هذا الجان واكف وياج وتضحكيله ؟
باوعتله .. استصغرته .. جاي يطلكني ومطببني بنص الزلم وبهذله المحكمه شنو يغار ..
منا وهيج اي شي يخصني ميخصك ..
باوعت بعيونه من حجيت هالكلام ..
لساتج ع ذمتي فأحترمي شويه ..
اكرهك .. اكرهك .. سمعتهه لو اعيدهه .. اكرهك ..
جنت حيل منفعله وهو باوعلي بصدمه .. مشدوه من ردة فعلي يمكن قويه ممتوقع هالشي مني ..
ظل يباوعلي وهو كاعد بمكانه ع كرسيه كدامي ..
لحظات ودخلت المصلحه الاجتماعيه ..
ها ماحليتوهه بيناتكم ..؟
باوعتلي .. هزيت راسي بقوة .. لا ..
وهو هم سكت ماحجه ..
كتبت بورقه انو ماصار حل او تفاهم بين الطرفين وكتبت ورقه ثانيه وختمتهه كالت هاي تسلموهه للقاضي ..
اني سألتهه .. هسه شراح يصير ؟
ماما اطيتكم فرصه تتفاهمون بلكي تتفقون وتحلوهه بيناتكم بهدوء وما تراهمتوا بالاحرى ماحاولتوا .. انتوا بايعين ليش اتعب نفسي وياكم ..
كلت بكلبي .. هو بايع ..
كملت
تكمله بارت 36

الباحثه كلامهه ..
راح ترجع تصعد اوراقكم للقاضي ..
يعني شنو تصعد اوراقنه ..
ماماتي يعني دعوى الطلاق الي زوجج رفعهه عليج راح ترجع تصعد اوراقهه للقاضي وهو يشوف الاجراء المناسب واسباب الطلاق قد يطلقكم بجلسه وحده او تصير ع عدة جلسات ..
شكرا ست ..
اهلا ..
ترخصنه وطلعنه ..
حمزة بعد ابد ماحجه وياي ..
بس من طلعت لكيت ابويه واخويه والمحامي جانوا منتظريني بالباب ..
سألني بابا شصار ..
طيته الورقه الي طتنياهه الباحثه ونفس النسخه عد حمزة وثالثه صعدت للقاضي ..
اخذهه المحامي من ابويه وافتهم السالفه شنو وسولفت لبابا شصار جوة بس مسولفتله شصار بيني وبين حمزة ..
حمزة ظل واكف بعيد ويه المحامي مالته جانوا يحجون ويتناقشون ..
رجع المحامي مالتنه دخل للقاضي ومحامي حمزة هم دخل ..
شويه وطلعوا حددوا جلسه ثانيه واخذنه تاريخهه وطلعنه للبيت ..
اخويه وصلني اني وبابا للبيت واخذ وياه عصام اخو زوجته لبيتهم عزموه يمهم يمكن ..

حمزة .. بنفس اليوم ابويه اجه للمكتب تعارك وياي لان عباله صرفت نظر عن سالفه الطلاك وماعرف منين سمع اليوم جانت جلسه طلاكي من همس بس الظاهر الي خبرة بهذا الموضوع مجان يعرف باقي التفاصيل ..
من بعدهه خليت واحد من الولد العمال المعتمد عليهم يلزمولي المكتب ..
رجعت للشقه اخذت جواز سفري وشكم قطعه ملابس واغراض شخصيه وفيزت لتركيا ..
قفلت الشقه وبوجهي للمطار .. حجزت .. اقرب طيارة بعد اربع ساعات قضيت هالاربع ساعات بالمطار بين نوم وتفكير بالي صار اليوم بالمحكمه وبهمس الي شفتهه اليوم متغيرة .. اسلوب ولبس وشخصيه .. ردودهه فاجئتني .. جرأتهه .. سمنانه .. حليانه عدا العيون الذبلانه والخشم الاحمر من کد مابجت .. لايگلهه فراگي .. لو هذا المحامي الي يريد ياكلهه بعيونه وهي واكفه تتمضحك وياه .. هه .. ماصدگت تخلص من حمزة .. دنعل عشيرة حمزة ع هل الحظ الطايح مدري بيا چيحه ..
غفيت واني هاي افكاري ..

للحكايه بقيه ..
توقعاتكم حبايب وباجر احتمال مانشر اريد افكار واحداث اكمل بيهه القصه لان هاي نهاياتهه وماريد استعجل وبنفس الوقت تعبت ..
توقعاتكم تفيدني لاتبخلون عني بيهه ..