- هو انتِ عاوزه إيه بالضبط؟ هتحاسبيني على كلمتين بقولهم افك بيهم عن نفسي مع اخواتي! كنتِ قاعده هناك مراقباني ولا إيه؟ كنتِ واخده بالك مني للدرجادي !
- لا انا ما كنتش مراقباك ولا حاجه, بس كنت رايحه متوقعه إنك هتبقى بنفس المود اللي انتَ فيه معايا بقالك اكتر من اسبوعين, استغربت لما لاقيتك قادر تكون كويس, طب ليه ما بتعملش ده هنا؟
- وليه هعمل ده هنا هو انتِ مش مراتي بتستحمليني في كل ظروفي وفي كل حالاتِ النفسيه؟ مش مجبر اني اجي على نفسي عشان ابان قدامك كويس واضحك واهزر وانا مش كويس.
- وانا ما قلتش كده, بس برضو مش طبيعي ان طول الايام اللي فاتت دي كلها يبقى جو البيت كله عصبيه وتوتر ونرفزه, وضغط نفسي, وكنت بحاول معاك ان يبقى شويه كده وشويه كده عشان ما نتعبش اكتر ما احنا تعبانين, كنت بتتهمني اني مش مقدره تعبك ومش مقدره مشاكلك, لحد ما بقيت انا كمان نفسيا مضغوطه وتعبانه.
- اه وانتِ بقى همك نفسك, حاضر انا بعد كده حتى وانا متضايق وانا بولع هبقى بضحك وبهزر عادي عشان حضرتك نفسيتك ما تتعبش.
- على فكره دي مش طريقه نقاش, وبص لنفسك لما انا ببقى في حاجه مضايقاني انتَ بتتعامل معايا ازاي, بتقعد تقولي هو انا كل ما اجي الاقيكِ قالبه وشك, هو احنا هنعيش في النكد ده كتير, ما بتراعيش انتَ ليه وقتها مشكلتي وحالتي النفسيه زي ما انتَ عاوزني اراعيها دلوقتي, وانا اصلا مراعياها, بقالي اسبوعين مراعياها لحد ما انا نفسي تعبت, وبقى مودي وحش و نفسيتي زي الزفت, انا بقيت بنام مش عاوزه النهار يطلع من كتر النكد اللي بقى موجود حوالينا, ومتضايق اوي اني مستغربه انك بره البيت قادر عادي تبقى كويس وتتكلم وتضحك, انا شكيت ان المشكله فيا, وانك متضايق بسبب حاجه تخصني, بس رجعت قلت لا اكيد لو كده كان قال, هو يعني مش هيخاف عليا ولا على مشاعري انه يقولي اني عملت حاجه مخلياه زعلان مني او اخد موقف, حتى موضوع الأكل, اوقات كتير بترجع البيت تقولي لا مش واكل, وتقولي انك مالكش نفس, افضل احايل فيك ما بترضاش, و في يوم على فكره لاقيت منيو في جيب بنطلون الشغل, فدي برضو حاجه انا مش فاهماها خالص, ليه لو انتَ واكل بره ماتقولش انك اكلت, ليه عاوز تفهمني انك عامل اضراب على حياتك كلها عشان حالتك النفسيه والمشاكل اللي عندك!
وكان الوضع زي ما هي بتوصفه بالضبط, هو فعلًا قاصد يحسسها هي بالذات ان الدنيا ضاغطه عليه وانه مش مرتاح, ان المسؤوليات كبيره عليه وبتزيد, وان شغله متعب ومرهق وفي مشاكل طول الوقت, وكأنه قاصد يشيلها همه وكاره راحتها النفسية!
-مفيش هبل من اللي بتقوليه ده, ولو انتِ مش عارفه تقدري مشاكل جوزك وتعبك تبقى مشكلتك انتِ, لكن انا دماغي مش رايقة لحوارتك الفارغة دي, واقولك مش عاجبك عيشتك معايا قولي ونشوف حل يا بنت الناس.
-حل؟ حل إيه يعني نسيب بعض؟ ده الحل اللي عندك مش كده؟ بدل ما تقولي نحاول مع بعض نوصل لحل يرضينا.
-قولتلك دماغي مش رايقه لوجع الراس بتاعك ده, انا دي طباعي وتصرفاتي, مش هغيرها عشان حد, بعدين انتِ اللي دماغك تعبانه وبتفترضي حاجات مش موجوده, لكن انا تصرفاتي عاديه زي أي راجل في بيته, انا شايف اللي محتاج تغيير هي دماغك مش انا.
وكالعادة يُغلق النقاش دون التوصل لحل..!
-------------------
قاعده بتغلي زي المايه على النار, مش قادرة تتحمل اللي بتسمعه اكتر من كده, اتكلمت معاه كتير في الموضوع ده ومفيش فايده, وكأنها بتكلم نفسها, وكل مره نفس الكلام الخايب وانها مكبرة الموضوع على الفاضي.
-مش ياختي يبقى ليا عزومة عندك... يا بنتي انتِ هبلة! فلوس ايه اللي اخدها, اعتبريها هدية مني.... ماشي نبقى نشوف كده ونتفق.... خلاص رتبي معاهم وعرفيني.. يلا باي...
قفل المكالمة وبصلها بزهق:
-في إيه؟ عماله تشاوريلي مش شايفاني بتكلم في التليفون؟
-بتكلم مين؟
-دي زميلتي في الشغل.
-احنا مش اتكلمنا قبل كده مية مرة في الموضوع ده! وقولت زمايلك دول يبقوا جوه الشغل غير كده لأ, زميلتك دي تكلمك الساعة 1 بليل ليه ان شاء الله؟ وايه اصلاً الحوار اللي داير ده؟ عزومة ايه وهدية ايه؟ وترتب إيه مع مين؟
-عادي يعني كنت جايبلها حاجه تساعدها في الشغل ومصرة تحاسبني عليها قولتلها اعتبريها هدية, وبعدين انتِ هتقفيلي على الواحده! انا مبحبش الخنقة دي.
-لا دي مش خنقة, انتَ عاوزني اسمع واشوف حوارتك مع الستات واسكت؟ مش كفاية قرايبك البنات اللي ولا كأن في راجل غيرك في العيلة كل ما واحده تحصلها مشكلة تجري تكلمك وتدخلك في مشاكلها, كمان زمايلك في الشغل يتصلوا في أوقات مش مناسبة ويفضل الكلام بينكوا رايح جاي ومش عاوزني أتكلم؟ ليه ماسك عليه ذِلة؟ انا لو مكانك هتسكت؟ ده انتَ عملت مشكلة للسما لما ابن عمي اتصل يطمن عليا بعد ما عرف اني كنت تعبانه, وبمنتهى قلة الذوق خدت مني التليفون وقلتله هي تعبانه ومحتاجه ترتاح, وحرجتني قدامه, دي مش زي دي؟
-لا مش زيها, ابن عمك بيتصل بيكِ بيجر معاكِ مش بيطمن, اصلاً الواد ده مبرتاحش له و....
-مش مبرر, أي حاجه هتقولها مش مبرر يا وائل, وانا مش هتحمل الوضع ده كتير.
-وانا مبعملش حاجه غلط, ولو تفكيرك هيفضل كده اخبطي راسك في الحيط, ومتفتحيش معايا كلام في المواضيع دي تاني, اظن وضحت؟
-لا ماوضحتش, وطول ما تصرفاتك مش عجباني هتكلم, لحد ما نوصل لحل.
---------------------
-إيه ده؟ دي بيتزا؟ ده طعمها يسد النفس!
قالها وهو بيسيب الاكل من ايده ووشه مقلوب, بصتله بتنهيدة من رد فعله اللي مبتكونش غريبة على أي حاجه بتعملها جديدة:
-مالها بس؟ هي اكيد مش زي طعم برا, بس طعمها مش وحش! انا حتى فضلت اتفرج على فيديوهات كتير عشان اعملها صح, وطالعه كويسه اهي.
-اه ما عشان انتِ اللي عملاها, لكن هي لا كويسه ولا حاجه, قولتلك نطلب من برا انتي اللي اتفزلكتي.
-يعني الحق عليا اني مش عاوزه اتعبك؟ الدكتور مش قايلك بلاش اكل برا واعمله في البيت عشان العدوى اللي عندك؟
قام من على الأكل بزهق:
-العدوى ارحم من الاكل المايع ده.
لجميع الفصول من هنا