رواية جمعتنا فرصة عمل الجزء الثاني — الفصل 7 — بقلم تقي محمد )
قلتا ليها يا دكتوره هدى اولا انا ماممكن اعمل حاجه مخالفه ابداً والمريض دا لو ما انا حصلتا على الموافقه من الاطباء ما كان عملتا ليهو ابدا CPR قالت لي اي اطباء ديل الحصلتي منهم على الموافقه وريتا اسمائهم إستدعوهم جو لمن سألتهم نكرو💔 قالوا نحن اصلا ما اديناها موافقه قلتا ليها يا دكتوره عن إزنك دقيقه بس اجيب ليك الدليل قالت لي إتفضلي طلعتا مشيت المكتب بقيت افتش عن الورقه فتشتها في الادراج ما لقيتا بقيت افكر انا ختيتا وين فتحت الدولاب فتشتو كلو ما لقيتا إنصدمتا شديد يا ربي الورقه مشت وين إتصلت على الممرضه الكانت ماسكه وسألتها قالت لي ما شفتها قلبتا المكتب كلو ومافي ليها اثر قلبي بقى يضرب من الخوف رجعتا المكتب دكتوره هدى قالت لي وين الدليل قلتا ليها كان عندي ورقه والله مكتوبه بخط يدهم ومختومه بس ما لقيتا قالت لي الختمها منو اصلا إنتي بتهظري ؟! رائد قال ليها يا هدى انا متأكد إنو في حاجه غلط لانو ملاذ دي من الممرضات الممتازات عندنا قالت ليهو يا رائد الخطأ دا لايغتفر ابدا وكمان معاها كزب قالت لي يا ملاذ مهما يكن لازم تقولي الحقيقه قلتا ليها والله العظيم كلامي دا صح انا بزات نفسي مسكتا الورقه منهم قالت لي فلنفترض كلامك صح يا ملاذ الورقه جابت الختم من وين رفعت لي علبة الختم قالت لي في غيري بختم في المستشفى دي قلتا ليها لأ قالت لي طيب دا اكبر دليل على إنك كزابه!! انا م ح اتكلم معاك كلامي مع إيهاب..ما قدرتا ارد ليها حسيت إني عاجزه كيف انا شفتا الختم وهي بتقول ما ختمت الورقه!! واساسا الورقه مشت وين انا متأكده ختيتا في الدرج بتاع المكتب المشكله إني ما عندي شاهد يشهد لي قطع تفكيري صوت هدى قالت لي وفق القرار الطلعنا بيهو يا ملاذ إنو ح يتم إيقافك مؤقتا وبي سبب الحصل ح تتدخل الهيئه السعوديه للتخصصات الصحيه وح يتم التحقيق في الموضوع وبعدها ح نتخذ الاجراء اللازم تقدري تمشي لحدي ما المستشفى تستدعيك طلعتا من المكتب وانا رجلي ما شايلاني من شدة الحاله الدخلتا فيها كيف حاجه زي دي تحصل حسيت إنو سنين شغلي كلها إتبخرت انا هسي ح اعمل شنو رجعتا المكتب فتشتا الورقه تاني ما لقيتا جاتني ممرضه تمسك مني وريتا التقرير وطلعتا مشيت البيت دخلتا سلمتا على ناس خالتو سماهر وطلعتا مشيت شقتي بكييت قدرتي انا خزلتا ابوي التعب وقراني وخزلتا نفسي انا عار على التمريض كيف حصل كدا بكييت شديد لحدي عيوني ما إتورموا كنتا موجوعه شديد سنين شغلي وتعبي وسهري وقرايتي كلها راحت اكيد ح يسحبو رخصتي انا ح اعمل شنو ياربي قمتا صليت الظهر ودعييت كتييير إنو ربنا ينصرني والحقيقه تظهر اثناء ما قاعده كدا تلفوني إتصل شلتو لقيتو إيهاب....
الفصل الثامن
لمن لقيت إيهاب هو المتصل عرفتا إنو ح يكون كلموهو ما عرفتا اعمل شنو في الاخير رديت قال لي ملاذ كيف قلتا ليهو تماام الحمد لله قال لي مالو صوتك قلتا ليهو مافي حاجه قال لي إنتي قاعده تبكي حسيت من كلامو إنو ما عارف الحصل قلتا ليهو لالا قال لي طيب مالو صوتك في حاجه حاصله قولي لي قلتا ليهو مافي شي ما كنتا قادره اقول ليهو الحصل لانو انا زاتي ما قادره إستوعب إتكلم معاي مسافه واخر حاجه قال لي انا ما مطمن ح إتصل ليك مكالمة فيديو قلتا ليهو لالا إطمن انا كويسه بس حاسه بي مبادئ إلتهاب قال لي لسه دوامك ما إنتهى صح امشي افحصي وبعدها تعالي واصلي قلتا ليهو طيب وقفلنا على كدا تاني قعدتا ابكي ياخ حسيت بي إنكسار ما عادي وقعدتا افكر ليه الدكتورين ديلك عملوا كدا لمن العصر ازن صليت وعملتا الغدا ما كان عندي نفس اكل بعد إنتهيت غسلتا وشي وشلتو مشيت بغادي إسماعيل ما كان في ختينا الغدا كلهم لاحظوا لي وعيوني كانن مورمات ظاهر إني كنتا ببكي شيرين قالت لي مالك يا ملاذ ؟كنتي بتبكي؟ شجن قالت ليها حتى انا لاحظتا ليها هسي عايزه اسألك خالتو سماهر عاينت لي بس قلتا ليهم مافي حاجه بس حاسه عندي صداع شديد شجن قالت لي ابلعي بندول شيرين قالت لي او امشي المستشفى قلت ليهم بلعتا قبل شويه وهسي حاسه نفسي احسن وسكتنا على كدا إتغدينا وعملنا الشاي وبعدها شلتا العده مشيت بيتي غسلتها ورقدتا وكلو ما إتزكر الحصل اقعد ابكي مره باقي اليوم صباح اليوم التاني إستدعوني في المستشفى مشيت سألوني كم سؤال وانا جاوبتا بالحقيقه اصلا م ح اكزب حتى لو ما عندي دليل بس قلتا العندي واحد سألني قال لي وين الورقه الي بتتكلمي عنها دي قلتا ليهو انا ختيتا في الدرج بتاع المكتب ولمن جيت فتشتها ما لقيتا قال لي هيدا يحتسب إهمال يا ملاذ اي ورجه زيّ دي لازم تُحتفظ في مكان آمن ما رديت عليهو لانو كلامو صح بعد خلصوا إستجواب قالوا لي تقدري تمشي طلعتا من المستشفى اثناء ما انا ماشه لاقاني زول والزول دا بالتحديد الكان وقف قدامي المره الفاتت وقف قدامي ومسك يدي شديد قعدتا اكورك عاين لي في عيوني ملامحو كان مألوفه قلتا ليهو فك يدي ابى يفكها لي وقال لي وين إيهاب قلتا ليهو ما عارفه قال لي يعني إنتي ما مرتو قلتا ليهو إنتا منو وعايز مني شنو قال لي عايز إيهاب لمن كتر معاي جمعتا قوتي كلها ولزيتو وقع ضربتو بي شنطتي كنتا لابسه كعب عالي ضربتو في بطنو قعد يتلوى جريت سريع ركبتا ترحال ويدي في قلبي إتزكرتا شفتو وين دا الولد الجاني يوم التمريض وقال لي عايزك إنتي تركبي لي الكانيولا وما ركبتها وفي النهايه إيهاب جاء ساقو كان إسمو تغريبا سعيد!!...
لقراءة الجزء الاول جميع الفصول كامله من هنا