الفصل 23

وصلنا السعوديه لاقانا إسماعيل بالعربيه ركبنا ومشينا البيت خالتو سماهر وشيرين وشجن كان عاملين لي إستقبال حلو كانو فرحانين بالحمل كدا بقينا إتنين🤣 انا وشيرين ما شاء الله شرين بطنها بقت كبيره طبعا هي في الشهر الخامس قالت لي اصبري حبه بس لمن تصلي مرحلتي دي النوم م ح تقدري تنوميهو قلتا ليها طمنتيني الله يطمنك بعدها طلعنا إرتحنا صباح اليون التاني إيهاب طلع مشى المستشفى يتمتم موضوع الاوراق وكلم خالو برضو عشان هو بعرف سعيد ومشوا سواا ،،ختينا الفطور فطرنا وطلعتا بيتي كنتا تعبانه

مرت الايام سريع ودخلتا في الشهر التاسع طبعا من جيت من السودان ما نزلتا شغل في المستشفى نهائي كان شغال إيهاب براهو قال لي مره مره سحر بتساعدوا لمن تكون فاضيه وبالنسبه لي موضوع سعيد أتسجلت المستشفى بي إسم إيهاب خلاص وإيهاب قدم الاوراق والتسجلات للمحكمه وسعيد إتحاكم بالسجن عشان الغش والاحتيال الكان بعملو وطبعا شيرين ولدت جابت بت سمتا سبأ وبعد خلصت فترة النفاس سافرة لي راجلا اما انا الحمل تعبني شديد زي ما قالت لي شيرين

بس والله كلو يهون شعور إنو انا شايله طفل في جواي بخفف علي كتيير إيهاب يا حليلو ما قصر معاي كان بجي متأخر ويرتب معاي البيت وما بخليني اعمل اي حاجه وخالتو سماهر كانت بتطبخ هي ما كنتا شغاله اي حاجه وبعد دا شعري منكوش وحالتي بالبلاء صحيت من النوم

كان يوم جمعه قمتا دخلتا الحمام إستحميت وبدلتا ملابسي حاولتا اسرح شعري لميتو بقى مرتب حبه طلعتا لقيت إيهاب قاعد في الصاله صبحتا عليهو قال لي اقعدي اجيب ليك شاي قلتا ليهو خليهو بجيبو براي مشيت دخلتا المطبخ وكالعاده الكفتيره في مكان والكبابي في مكان والملاعق ما تديك الدرب بس برضو مهون علي رتبتا المطبخ وكبيت شاي وجيت قعدتا جمبو كان خاتي الجردل والممسحه قدامو ويعاين ليهم داير يمسح وما قادر🤣 قال لي كويس إنك سرحتي شعرك دا انا كل يوم اشوفك بنخلع قلتا ليهو هها ما قعد يضحك على فكره قال لي بقيتي تشبهي الغول شكلوا لازم افكر...

قلتا ليهو تفكر في شنو مسكتا الممسحه وبقيت اعاين ليهو قال لي شكلو لازم افكر اغير الديكور للبيبي وكدا🙂 قلتا ليهو اها بحسب قال لي لاتغضبي يا حلوتي فانتي في نظري حلوه حتى لو بتشبهي الغول🤣 عاينتا ليهو كدا😒😒 قال لي جيبي الممسحه خليني اشوف شغلي اديتا ليهو مسكا وبدأ يمسح وانا قعدتا اشاغل فيهو مره يضحك ومره يحمر لي لحدي ما جاء يمسح تحتي قال لي ارفعي رجليك رفعتهم مسح وجاب المعطر رشاهو وفتح التكييف وبعدها شال العدا غسلا لمن خلص

جاء قعد قال لي ياخ شغل البيت دا صعب خلاص قلتا ليهو إنتا شفتا حاجه هسي إنتا لا قاعد تضبخ ولا قاعد تغسل وتكوي كان عملتهم إلا تشرد تخلي البيت قال لي انا ماشي إرتاح حبه لمن وقت الصلاة يجي صحيني قلتا ليهو سمح مشى رقد لمن وقت الصلاة قرب مشيت صحيتو قام إستحمى وغير بالجلابيه وطلع مشى المسجد معا خطبة الجمعه كدا حسيت بي وجع شديد في بطني وانا قاعده براي لمن ما قدرتا إتحرك قعدتا اكورك يمكن خالتو سماهر تسمعني حسيت بي نفسي كتم

بقيت افتش في تلفوني لحدي ما لقيتو إتصلتا لي خالتو سماهر وقبل ترد بقيت اشوف طشاش طشاش ونفسي كتم والدنيا دي ضلمت في وشي.....

للكاتبه تقى محمد 《24》 إيهاب الراوي

امي إتصلت لي من دون اي مقدمات قالت لي يا إيهاب لو في المستشفى رسل لينا إزعاف ملاذ دي تعبانه شديد لمن قالت كدا لقيت نفسي جاري بس لحدي طلعنا إزعاف ركبتا معاهم ومشينا لمن وصلنا لقيتا حالتا صعبه شديد وبتتنفس بي صعوبه رفعناها في الازعاف وانا ركبتا معاهم الممرضات حاولن يهدنها انا ما كنتا عارف إتصرف كيف لحدي ما وصلنا المستشفى دخلوها غرفة العنايه وبعدها سريع دخلوها غرفة العمليات دكتوره رميساء كانت ماسكه عمليات الولادات قلتا ليها في شنو يا رميساء ملاذ كويسه قالت لي ح ندخل تدخل مستعجل الضغط حقها منخفض جدا ودا ممكن يأثر عليها وعلى الجنين...

لمن قالت انا ما قدرتا اقيف كيف يعني ملاذ دي انا خليتا كويسه وحتى كنا بنهظر سواا بقينا منتظرين قريب ساعه حتن رميساء طلعت قالت لي مبروك جاك ولد قلتا ليها الله يبارك فيك بس ملاذ كيف هي كويسه صح قالت لي كويسه الحمد لله بس ح تكون تحت المراقبه لحدي ضغطها ما يبقى كويس بعد مسافه الممرضات جو شايلين ولدي مسكتو ياخ شعور إني بقيت اب كان حلو خلاص امي وشجن كانوا فرحانين لي فرح ازنت ليهو وسلمتا عليهو في راسو واديتو امي شالتو كانت

فرحانه فرح وتشيل وتحصن فيهو بعد مسافه ونحن قاعدين الممرضات بقن يتجارن ودكتوره رميساء جات جاريه سريع دخلت ما فهمنا اي حاجه الحاصل شنو في ممرضه جات وقفناها قالت لينا المريضه نزفت لازم نوقف النزيف فورا لانو لو ما وقف ممكن تموت لانو مسبقا كان ضغطها منخفض!!

امي قعدت تكورك فيها قالت ليها تموت كيف إنتي مجنونه شجن بقت تهدي فيها اما انا ما كنتا حاسي بي رجليني قعدتا وختيت يدي في راسي فكرة إنو ملاذ تموت دي لالا مستحيل بقيت إستغفر وادعي دخلنا في حاله لايعلم بها إلا الله وكل شويه ممرضه تطلع وتدخل ما قدرتا اقعد مشيت الاستراحه صليت ودعيت ليها كتييير ملاذ دي ما بس مرتي وبت عمي دي حب سنين بحبها من وهي في الاساس دعيت كتير كنتا حاسي بالوقت بمر بطئ اعصابي باظت مشيت تاني قعدتا جم ناس امي لقيتهم ودو البيبي الحضانه بقيت ماشي وجاي في الممر ما قادر اقيف ورجاء إتأخرت شديد قربتا ادخل ما قادر إستحمل عايز اعرف الحصل شنو ؟

لحدي ما رميساء جات طالعه وانا في الحاله دي....