رواية جمعتنا فرصة عمل الجزء الثاني — الفصل 17 — بقلم تقي محمد
إيهاب الراوي
كنتا حاسي بي صداع شديد بي سبب المشاكل الحاصله دي والزاد علي لمن رائد إتصل علي وقال لي إنو ما لقى الاوراق حقت المستشفى قلتا ليهو فتش كويس انا متأكد إنو انا ختيتهم في الخزنه فتش مالقى قال لي انا شاكي إنو سعيد دا متفق مع فاديه يا إيهاب لانو مافي زول غير فاديه بتدخل المكتب قلتا ليهو طيب اقفل خليني إتفقد كميرات المراقبه بعد قفلتا من رائد إتفقدتها فعلا مافي زول غير فاديه بدخل المكتب معقوله بس فاديه تعمل كدا إتصلتا ليها وواجهتها في البدايه نكرت لكن لمن ضغطا عليها إعترفت إنها شالت الاوراق ادتهم لي سعيد بقيت في حالة لا يعلم بها الا الله تعب سنين وجري ضاع في يوم واحد بس دقيت لي رائد وكلمتوا إنو يفصلا فورا بقيت افكر ح اعمل شنو سعيد اكيد بعد ما إستلم الاوراق ح يطالب بالمستشفى وخصوصا إنها لسه بي إسمو ما بي أسمي!! فاديه بعد الحصل كانت بتتصل لي كتيير بس ما كنت برد ليها وبترسل لي رسائل برضو ما رديت ليها قعدتا افكر مسافه ملاذ جات قعدت جمبي قالت لي لو عندي قروش بالسعودي البنك ما بحولا لي بالسوداني؟ قلتا ليها في مغاصات بتحول القروش...إتزكرتا البنك قالت لي مالو قلتا ليها إن شاء الله يكون عندهم الاوراق لسه إتصلتا على رائد وقمتا مشيت بغادي قلتا ليهو يا رائد المبالغ الاتحولت دي إتحولت من بنك .... راجع البنك يمكن تلقى عندهم نسخه من الاوراق دي قال لي طيب بمشي ليهم بعد العمليه قلتا ليهو طيب بس اسرع يا رائد عشان سعيد ما يتخذ اي خطوه قال لي بعد العمليه طوالي بطلع على البنك قفلتا منو وبقيت قاعد على اعصابي بعد ساعه بالضبط رائد إتصل لي قال لي يا أيهاب انا طلعتا من العمليه لقيت إتصالات من سعيد في تلفون المكتب قلتا ليهو إتصل ليهو وخلي الخط فاتح قال لي تمام إتصل ليهو وفتح المكبر ردا بعد مسافه قال ليهو الو إيهاب كيفك رديت ليهو قلتا ليهو ما عندي كيف وإنتا في حياتي عايز شنو متصل علي قال لي ولا حاجه بس حبيت إطمن عليك وبالمناسبه اوراق البيع كلها بقت عندي يعني باختصار المستشفى رجعت لي لكن انا ما بحب اظلم زول رسل رقم حسابك احول ليك قروشك الدفعتها وكدا تبقى صافيه بيناتنا ولا شنو ،،فتحتا التسجيل وسجلتا كلامو كلو قلتا ليهو المستشفى دي إنتا بعتها وانا إشتريت وكان مفترض زمان تبقى بي إسمي إنتا خدعتني وشلتا المبلغ وما كتبتها بي إسمي بس انا سبقتك بي خطوه إنتا ما كنتا متوقعه وهي إنو كان عندي نسخه من اوراق المبالغ الدفعتها وعليها توقيعك والاوراق دي كانت بالنسبه ليك هاجز كبير منعك من إنك ترجع المستشفى بعد ما شلتا قروشي كنتا مفتكر إنك عادي جدا ممكن تغشني وتشيل قروشي وترجع المستشفى بي سهوله وهسي برضو يا سعيد انا سابقك بخطوه خلي الكلمه دي في بالك قعد يضحك قال لي نشوف يا إيهاب اصلا حتى لو مسكتا المستشفى بعد المشاكل الحصلت والدكاتره القتلوا المريض ديلك عادي جدا المستشفى دي تتعرض للمسائلات القانونيه قلتا ليهو قصدك الدكاتره الانت مرسلهم لي قال لي انا ما رسلتا زول ديل دكاترتك زاتهم بس لعبتا بي دماغهم حبه ورسمت ليهم احلام ورديه زي ما رسمتا ليك إبتسمتا يعني فعلا ربنا لمن ينصرك بوقع عدوك بي طريقه بسيطه شديد ما يكون خاتي ليها حساب....
2
للكاتبه تقى محمد
《18》
كنتا قاعده بفكر في تصرفات إيهاب في الفتره الاخيره انا متأكده في حاجه وفاديه دي علاقتها شنو بالموضوع الكلام دا ما راضي يدخل لي في راسي وبقى كلام زهره يتردد لي في راسي حسيت بي وجع راس شديد من امبارح وحاسه إنو عندي حمى رقدتا في السرير الكلام دا بعد صلاة العشاء قعدتا ابكي ما عارفه ببكي عشان شنو زاتو مزن جات لقتني كدا قالت لي يابت مالك قولي بسم الله يا ملاذ في شنو لمست راسي لقتني محمومه قالت لي يابت إنتي عندك حمى دقيقه انادي امي وإيهاب قلتا ليها نادي امي بس عاينت لي وما ناقشتني مشت نادت امي وإيهاب برضو جاء لقوني في حالتي ديك امي قالت لي يابت مالك قلتا ليها ما عارفه بس حاسه بي وجع راس شديد قالت لي جسمك حار قومي نمشي المستشفى إيهاب جاء علي لمس راسي قال لي حاسه بي شنو احكي قلتا ليهو زح مني بس كلهم إتخلعوا لمن قلتا ليهو كدا كنتا مغبونه منو زحيت منو وحضنتا امي وقعدتا ابكي مزن قالت ليهو زعلتها في حاجه قال ليها لالا والله لحدي قبيل كنا كويسين امي قالت ليهو دور العربيه يا إيهاب نوديها المستشفى هو مشى وامي لبستني عبايه طلعنا مشينا المستشفى لمن وصلنا انا حسيت بي لفة راس عديل كدا من الصداع وطوالي جيت واقعه من طولي اخر حاجه سمعتها صوت امي وتاني ما سمعتا حاجه لمن صحيت لقيت نفسي في المستشفى تغريبا في غرفه خاصه كان مركبين لي درب فتحت عيوني كنتا حاسه جسمي مكسر مكسر عاينتا للساعه كانت في الحيطه لقيتا ماشه على وحده بالليل إنتظرتا الدرب خلص عايزه افكوا كدا الباب فتح إتوقعتها ممرضه لقيتو إيهاب لمن شافني جاء سريع علي قال لي ملاذ إنتي كويسه قلتا ليهو حاسه بي تكسير في جسمي قال لي اي لانو عندك ملاريا وجسمك فاقد شديد قلتا ليهو معقوله دي ملاريا بس قال لي في فحوصات لسه ما طلعت المعامل جزو كبيره منها واقف لكن ح ننتظر لحدي الصباح قلتا ليهو سمح ورقدتا تاني قعدتا اعاين للسقف مسك لي يدي وقال لي عارفه قيمتك عندي قدر شنو يا ملاذ عاينتا ليهو قال لي انا اسف لو غلطا في حقك قلتا ليهو يا إيهاب إنتا ما بس غلطا إنتا بقيت تتجاهلني عديل إنتا عارف انا فكرتا في شنو وقتها ما تقعد تقول لي قيمتك وقيمتك إنتا كذاب تقعد تسمح لي في الكلام وانا اسكت بس لحدي هنا وكفايه يا إيهاب وقعدتا ابكي قال لي انا كلمتك إني مضغوط في الشغل إنتي حاولي إتحمليني بس قلتا ليهو اكتر من كدا يا إيهاب اكتر من كدا قال لي معليش حبه تاني بس عندي مواضيع مشربكه اول ما تتحلى بوعدك إنو اعوضك بس ما تزعلي مني حاضر؟! قلتا ليهو سمح لمن مواضيعك تتحلى وتنتهي تعال إتكلم معاي فهمتا يا إيهاب هسي ما عايزه اي كلام معاك ولو سمحتا امشي خليني إرتاح لانو انا مريضه رقدتا وقبلتا منو بالجهه التانيه قال لي ما تغسي علي انا محتاجك معاي يا ملاذ ما ممكن يبقوا علي إتنين إنتي زعلك براهو مشكله قعد مسافه لمن ما رديت ليهو طلع...
صباح اليوم التاني صحيت بي صوت امي ومزن لمن فتحت عيوني امي جات قعدت جمبي قالت لي يا ملاذ يابتي كيف اصبحتي قلتا ليها الحمد لله مزن قالت لي امبارح خوفتينا عليك إبتسمتا ليها بعدها ابوي ومزمل جو حمدلو لي السلامه إستغربتا إيهاب ليه ما معاهم بعد مسافه الدكتور جاء كتب لي فحوصات قال لي اعملي ديل وتعالي امي شالت منو الورقه بعدها طلعنا عملنا الفحوصات كلها قلتا لي امي إيهاب وين قالت لي مشى يجيب الادويه اثناء ما بنتكلم كدا جاء ،،قعد جمبنا قال لي كيف اصبحتي قلتا ليهو تماام الحمد لله قال ل امي عملتوا الفحوصات امي قالت ليهو اي منتظرين النتيجه قاعدين كدا بعد مسافه بتاع المختبر جاء ادى إيهاب الورقه حقت الفحص مسكا وقعد يعاين ليها حسيت بيهو إنصدم وشديد كمان.....