تحميل رواية جمعتنا فرصة عمل بقلم تقي محمد pdf

طلعنا انا وابوي على المطار بعد ودعت امي واخواني ووعدتهم إني في اقرب فرصة إجازه ح اجي مشينا انا وابوي عملنا إجرآت السفر وبقينا منتظرين يندهو دورنا إتزكرت فرحة ابوي وأمي لمن قبلوني في المنحه دي وأخيراً ح اشتغل شغل سمح ياداب فرحة بي شهادتي حقت التمريض ياداب حسيت إني شغاله حاجه سمحه ياااخ التمريض هنا ما مقدرين الممرضات نهائي ولا مدننا قدر تعبنا ابوي جا قال لي قالوا لينا نمشي صالة المغادره الطياره ح تقلع بعد دقائق قلت ليهو خلاص ارح مشينا دخلنا صالة المغادره ياخ إحساس لايوصف كنت خايفه ومتوتره هل ح أقدر على المهمه دي هل ح إتوفق مسكت يد ابوي وبقينا منتظرين لحدي ما جاء وقت المغادره ركبنا الطياره وخلاص الركاب كلهم ركبوا اول ما إتحركت حسيت إنو في حته من قلبي خليتا وراي بلدي وأهلي وصحباتي كلهم خليتم وراي ماشه بلد غريب مكان غريب عاينت لي ابوي وبقيت إتزكر حجم المعاناة العاناها عشان يكبرنا وما يحوجنا لي حاجه دا الوقت المفترض نحقق ليهو احلامو دا الوقت المفترض امسح على يدو واقول ليهو يابا دا حصاد تعبك دا نجاحك ما نجاحنا لولا تعبك وإجتهادك ما وصلنا للمرحله دي لحدي ما إستوت الطياره في الجو بقيت اتأمل في المنظر ما حصل إتخيلت نفسي ح اسافر بيها في يوم من الايام ما إتخيلت إنو ح افارق حينا وورشة ابوي وحوشنا الكبير في يوم من الايام حوشنا الملان حنيه وصوت اخواتي وهن بغنن وبلعبن قمريه بلونه وريحة شاي الصباح من حليب بقراتنا ولا ونسة زهره وريم لمن يجوني العصريه لقيت نفسي من دون ما احس قعدت ابكي دي غربه جبرتنا عليها ظروف بلدنا ابوي قال لي إنتي يا ملاذ يابتي اسم المستشفى كان إسمها شنو وريتو إسمها قال لي كدي ابحثي عنها في النت نشوفا قلت ليهو سمح يا ابوي دقيقه بس فتحت تلفوني وفتحت قوقل بحثت عنها جاب لي لم يتم العثور على نتائج قلت في نفسي معقوله كتبت إسمها غلط بقيت أحاول كم مره ونفس النتيجه لم يتم العثور على نتائج بقيت متوتره كيف يعني لم يتم العثور على نتائج فتحت الشات القدمت منو كانت اخر رسائل قبل اسبوع مبروك إتقبلتي في منحة مستشفى فيرست كير التخصصي نفس الاسم طيب كيف مافي نتائج والعجيب إنو الموقع دا موقع موثوق قلت يمكن المستشفى ما نازل في قوقل وحاولت اقنع نفسي بي كدا قلت لي ابوي ما لقيت بحث عنو يا ابوي شكلوا الموقع ما مشارك مع قوقل

وعلى كدا سكتنا ما حسيت بي نفسي الا وانا نايمه بقيت احلم احلام غريبه وكوابيس صحيت مخلوعه قلت يمكن من الفكره الختيتا في بالي دي شربت مويه وبقيت اهدي في نفسي مسكت تلفوني دايره افتح النت لقيت انو الشبكه طشت عرفتا إنو نحن خلاص غادرنا الحدود عاينت بالقزاز المنظر كان حلو شديد التقط لي كم صوره كدا عاينت لي ابوي لقيتو نايم إتصورت معاهو كم صوره برضو فتحت الاستوديو وبقيت اعاين في الصور لحدي ما إتفتحت صوره كانت لي انا ومعاي زهره وريم كان إتصورنا الصوره دي قبل كم يوم بديت اقلب في الصور وقفت في صوره كانت لي مع بنات عمي الصوره دي كانت قديمه شديد ركزت في ملامحهم وبقيت افكر هسي بنات عمي عمر ديل بكون عمرهم كم ولا ملامحهم كيف سرحت في افكاري وإتزكرت لمن عمي قدم في اللوتري وكان جاهو القبول باع بيتو وأراضيهو وسافر ومن اليوم داك ما بنعرف عنو اي حاجه اخر حاجه بتزكر إتصل على ابوي وقال ليهو إنهم وصلوا وتاني إنقطعت اخباروا قفلت التلفون لفت إنتباهي ولد كان قاعد قصادنا كنت ملاحظه ليهو من قبيل بعاين لي كان شكلوا غريب لابس بدله سوداء وكمامه باللون الاسود كانت ملامحو غريبه ظاهر إنو إنسان صارم كدا ما إهتميت لي الموضوع كتير...

يـــا دنيا ما تزيدي الهموم*

*بـــــــالله ما تبكي العيون*

*ما تشيلي في خاطرك علي*

*خليهو قلبك لــــــي حنون....💔*

الفصل الثاني

وأخيرا وصلنا هبطت الطياره في مطار جده في السعوديه يا الله شعور حلو خلاص ابوي قال لي يا الله يابتي وأخيرا شفت السعوديه فرحة ابوي دي نستني اي حاجه وبقيت فرحانه لي فرحو قال لي تاني ح نمشي وين يابتي من المطار قلت ليهو يا ابوي ناس الشغل قالوا لي إنو إنتظر في المطار ح يجونا هم قال لي و ح نعرفهم كيف قلت ليهو هم ح يعرفونا من البطاقات وصور إثبات الشخصيه ما كملت كلامي جات عربيه سوداء وقفت قدامنا نزل منها زول قال لي إنتي ملاذ عبد الفتاح إدريس قلت ليهو اي انا قال لي اركبوا نحن من مستشفى فيرست كير ركبنا انا وابوي في الكراسي ورا والولد ركب قدام مع السائق ما لا حظت لي السواق بس الولد كان ظريف وزول ظاهر عليهو إنسان مثقف بدأ يحكي لي عن المستشفى وعن الشغل وعن الدوام ح يكون كيف قلت ليهو معليش بس ممكن سؤال قال لي إتفضلي قلت ليهو المستشفى دي جديده لانو لمن بحثت في قوقل ما جاتني قال لي لالا هي ما جديده المستشفى دي قديمه شديد ومعروفه بس ما بتلقي إسمها في قوقل لانو إسم فيرست كير دا ما إسم المستشفى دا إسم شهره ساي جربي ابحثي عن مستشفى الهدى التخصصي فتحت تلفوني عايزه ابحث إتزكرت الشبكه قلت ليهو وليه ما مشتهره بي إسم الهدى مع إنو إسمها الحقيقي قال لي في الحقيقه اسم الهدى زاتو في المواقع بس الاسم الاتعرفت بيهو المستشفى من زمان الهدى لكن نتيجه لي إنو المستشفى دي المالك حقها إتغير ف إتغير الاسم تبعا لذلك لكن لسه معروفه في قوقل بي إسم الهدى قلت ليهو يا داب فهمت قال لي باين إنك زوله فضوليه قلت ليهو ما كدا والله لكن بحب إستفسر من حاجات جديده ح اكون انا جزو منها عشان اكون فاهمه اكتر طبيعة الشغل قال لي لالا كدا تمام ابوي قال ليهو من لهجتك سوداني بس الشكل فيك ملامح دول الخليج قال ليهو فعلا يا عمي انا اصلا ابوي وأمي مولودين في الخليج لكن جزورنا من السودان وحبي لي السودان والسودانيين وإحتكاكي الكبير بيهم خلاني إتعلم اللهجه السودانيه مع إنو ابوي وأمي ما بتكلموا لينا عن السودان كتير لكن من خلال زياراتي ليهو قدرت إتعرف على ناس كتيرين من السودان وعادات كتيره وزرت كذا مكان يعني ممكن تقول إنو انا بقيت متعلق بالسودان اكتر من اي مكان❤ ابوي قال ليهو فعلا والله السودان جميل المهم فتحنا كم موضوع كدا وفعلا يا دوب إطمنت كنت خايفه الموضوع دا يطلع فيهو مشكله والمستشفى تكون ما موجوده والموقع يكون كزب ختيت في راسي الف فكره وفكره لكن كلها إتلاشت وصلنا نزلنا العربيه وقفت قدام مجمع كبير كدا وحلو نزلنا الولد جاء وقف معانا قال لينا طبعا المجمع دا مقسم زي سكن لي الممرضات والدكاتره يعني زي الميز خاص بالمستشفى حقتنا ح تدخلي في زي مكتب صغير كدا على يدك اليمين ح تلقى بت قولي ليها انا ملاذ عبد الفتاح ح توريك مكان سكنك كنت عايز ادخل معاكم والله بس عندي شغل ضروري مستعجل عليهو ابوي قال ليهو ولا يهمك ما قصرت معانا بس ما وريتنا إسمك😅

قال ليهو تصدق يا عمي نسيت مع الونسه انا رائد دكتور متخصص جراحة قلب وشغال نائب المدير الطبي

ابوي قال ليهو كويس والله ربنا يوفقك إن شاء الله قال ليهو اميين يارب وعن إزنكم عندي عمليه بعد دقائق بس لازم الحق

مشى ركب لمن العربيه لفت عشان تستعدل الطرق شفت وش السائق حسيت نفسي زي الشايفاهو في محل بقيت اقول وين شفتو تاني قلت يا ملاذ يمكن مشبهاهو مشينا المكتب لقينا بت صغيره قالت لينا إتفضلوا قلت ليها انا ملاذ عبد الفتاح ممرضه جديده دي اوراقي مسكت مني الاوراق قالت لي صح إنتي إتزكرتك إنتي السودانيه صح قلت ليها ايواا

كانت بتتكلم سعودي قالت لي تعالي ورايا اوريج مكانك اللي رح تسكني فيه مشينا وراها لحدي ما وصلنا قدام شقه كدا ادتني المفتاح قالت لي دي شقتك ودي بطاقه شغليها في جوالك المستشفى رح تتواصل معاك بيها شلت منها الشريحه هي مشت وانا فتحت باب الشقه دخلنا انا وابوي وبقينا نتفرج فيها ياخ كانت في منتهى الروعه والله في الاحلام ما حلمت بيها حاجه كدا خرافيها كانت مطليه بي لون وردي داكن وفيها زي ثريا كبيره في النص باللون الابيض وفيها غرفتين ومطبخ وحمامين داخليات في الغرف وواحد خارجي كانت مجهزه بي اي حاجه حتى الاكل التلاجه مليانه والملابس ما ناقصاها اي حاجه عملت لينا حاجه ناكلا انا وابوي اكلنا وصلينا الاوقات الماصليناها ويا السرير جاك نفر نمنا نووم صحيت الصباح بي صوت تلفوني فتحت الخط قلت الو جاني صوت شاب بقول لي يا دكتوره لسه نايمه شكلك قلت ليهو بين نايمه وصاحيه منو معاي قال لي معاك رائد ح اجيكم زي الساعه اربعه مساء لازم تشوفي المستشفى عشان بكره ح تنزلي شغل قلت ليهو شغل شنو قال لي شغل المستشفى انتي مركزه معاي ولا لسه نايمه قلت ليهو يااخ شكلوا إنت متصل غلط قفلت الخط ورقدت بعد شويه ركزت كدا قمت وقعدت على حيلي بقيت اقول في نفسي واي دا شنو الانا خبصتو دا ياخ يا ملاذ ركزي انا ح ابقى زوله مسئوله متين مسكت التلفون بقيت متردده إتصل ولا لأ اخر حاجه إتصلت ردا لي بعد الجرس التالت قال لي شكلك صحصحتي وقعد يضحك قلت ليهو والله يا دكتور رائد كنت ما مركزه معليش قال لي ما مشكله انا زاتي إتصلت عليك في وقت بدري بس حبيت اقول ليك إنو ح امر عليك بعدين عشان نمشي المستشفى لازم تشوفيها عشان بكره مباشرتاً ح تبدي شغل وبالمناسبه هي ما بعيده من مكان السكن قلت ليهو تماام قفلت منو تميت باقي نومي وقمت إتسوكت ولبست لي جلباب من الدولاب رتبت الغرفه ومشيت عملت شاي الساعه كانت ١١ وحاجه مشيت صحيت ابوي شربنا الشاي وقعدنا نتونس حبه قلت ليهو زي الساعه اربع دكتور رائد جايينا عشان نمشي المستشفى قال لي بكره ح تنزلي شغل طوالي قال لي كويس ربنا يوفقك يا بتي..

يامنيه قاعده بعيد هناك مركونه في رف الفرح اتحققي💞💞