سحر ضربتني قالت لي مالك واقفه قال ليك إتفضلي دخلتا سحر طوالي إنسحبت الجزمه لقيتو برتب في اوراق في الرف إتلفت لقاني واقفه قال لي ملاذ قلت ليهو اي يا دكتور اسفه على التأخير والله شالتني نومه وما حسيت بالوقت ضحك قال لي ما مشكله اصلا كان مفترض اليوم يكون إجازه لكن ما دام جيتي ما برجعك،،، وحمدلله على السلامه
قلت ليهو الله يسلمك قال لي إتفضلي اقعدي مشيت قعدتا في مكتبي قال لي تشربي حاجه قلت ليهو لالا شكرا قعد وبقى يرتب في الملفات إستغربت ليه ما سألني المهم قعدتا قال لي الملف دا حق عملية بكره الليله ما عندنا عمليات بس ح نمشي العمبر نتفقد المرضى
شلت منو الملف وقعدتا اقرأ فيهو لمن خلصتا لقيتو بعاين لي قال لي كيف لقيتي اهلك قلت ليها كويسين الحمد لله قال لي الحمد لله ،،خلصتي قلت ليهو اي قال لي طيب ارح العمبر مشيت معاهو طفنا على المرضى شرح لي حالة كم مريض وعملوا ليهو شنو المهم انا كنت بتفقد في العلامات الحيويه قال لي اها قلت ليهو حالتهم مستقره قال لي كويس بعدها طلعنا مشينا المكتب حسيت إيهاب دا بتعامل معاي معامله عاديه شديد وكأنو ما بعرفني وحدود معرفتو معاي هي إني ممرضه شغاله معاهو المهم طلعنا بعدها وصلني المجمع ومشى طلعت لقيت مزمل يحضر قلت ليهو عملت فطور؟ قال لي لسه قلت ليهو طيب ارح نطلع نفطر بره قال لي طيب لبسنا وطلعنا مشينا مطعم قعدنا طلبنا بالصدفه شفت دكتور إيهاب معاهو البت الكان لاقتني معاهو في السوق كان إسمها شيرين تقريبا طلبوا وكان بتونس معاها وهي بتضحك كان ظاهر عليها إنها متزوجه حاولت اصرف نظر من الموضوع جابوا لينا الطلب اكلنا وبعدها طلعنا ما إتصادفنا نهاي مع دكتور إيهاب مره باقي اليوم صباح اليوم التاني صحيت بدري طلعت الهدايا الكنت جايباها من السودان دخلتهم في كيس وشلتهم طلعت اديت مزمل قروش قلت ليهو لو إحتجت لي حاجه أنزل إشتري من البقاله تحت العايزو
المهم طلعتا مشيت الشغل اديت سحر هديتا وهديت دكتور رائد ووزعت للباقين اخر هديه كانت حقت دكتور إيهاب
مشيت المكتب لقيتو قاعد عاين لي قال لي اول مره تجي بدري قلت ليهو ودي حاجه كويس صح قال لي اي كويسه حاولي إتعودي قلت ليهو حاضر عاين لي قال لي الليله المزاج حلو قلت ليهو شديد قال لي السبب قلت ليهو مافي سبب معين فرحانه بس طلعتا الهديه من الكيس قلت ليهو الهديه دي ليك عاين لي وعاين للعلبه قال لي المناسبه شنو قلت ليهو مافي مناسبه بس إنتوا ما قصرتو معاي نهائي وحبيت اجيب ليكم هدايا من السودان إتمنى تعجبك مسكا مني وختاها في المكتب وجا وقف قدامي قلت ليهو بي توتر كدا ف في حاجه قال لي اي حاجه بتجي منك اكيد ح تعجبني ما محتاجه ليها إتنين تلاته لو اديتيني حجر من يدك ح اشوفو مميز قلت ليهو كتر خيرك والله برد عليهو من دون تفكير قلت ليهو طيب افتحها شوفا قال لي ح افتحها قلت ليهو هسي ممكن شال الصندوق وفتحو كنت جايبه ليهو ساعه وعطر وحاجه تانيه ح تعرفوها ....
الفصل السادس والعشرون
قال لي حلوه شديد طلع الساعه والعطر كنت خاته معاهم رساله فتحها وبقى يعاين ليها ويعاين لي قلت ليهو القلب الزهبي دا بحبو طبعا صحباتي كانن بهدني هدايا طوالي فيها القلب الزهبي دا بس انا ما فاهمه يعني شنو؟ قال لي عندو معاني كتيره بين الاصحاب بعني الصداقه نقيه وبرضو لانو ذهبي والذهب ثمين ف بدل على إنو الصداقه قويه وثمينه ،،وبرضو في العلاقات بين اي إتنين بمعني إنت غالي علي وبقدرك وبرمز الى الحب الهادئ
طبعا كان بقول لي كدا وبعاين لي في عيوني قلت ليهو إنت كنت قاصد شنو في ديل عاين لي بي إستغراب قال لي قصدك شنو قلت ليهو قصدي واضح يا دكتور إيهاب عمر إدريس عاين لي بي صدمه قال لي ملاذ.. قلت ليهو ليه إتصدمتا انا عرفتا اي حاجه ح تشرح لي ولا ح تفضل ساكت كدا؟ قال لي منو قال ليك قلت ليهو ما مهم منو
قال لي انا ما عندي حاجه اشرحها غير إنو انا حبيت بت ما بظن في يوم من الايام تحبني حبيت بت وانا عارف كل تفاصيلا وهي ما بتعرف عني اي حاجه قلت ليهو إنت حصل صارحتها؟ قال لي لأ لانو عارف إنو نحن م ح نكون لي بعض عشان كدا ما كنت عايز اعشما بي حاجه قلت ليهو يا إيهاب انا ما عارفه ارد ليك جمايلك علي والله انا لو واقفه في المكان دا هسي وبحقق في احلامي ف دا بي فضلك بعد ربنا انا عارفه إني ما بعرف عنك اي حاجه بس يا إيهاب ممكن تديني فرصه إتعرف عليك لمن قلت ليهو كدا رفع راسو وبقى يعاين لي قال لي منو الحكى ليك زهره ولا ريم؟ قبل ارد ليهو الباب دقا عاين لي وقال إتفضل دخل دكتور رائد قال لينا إنتوا هنا وفي حياة ناس منتظراكم بره إنتوا نسيتو زمن العمليه إيهاب عاين للساعه قال لي وقت العمليه جا مشينا جهزت الغرفه وعقمناها ودخلنا المريضه بدينا العمليه إنتهينا بعد ساعتين طلعنا بدلنا كان عندنا عمليه تانيه بعد نص ساعه إيهاب مدى لي الملف وطلع قريتو لمن جاء وقت العمليه إتجهزنا ودخلنا...
لمن خلصنا صليت مر الوقت إتفقدنا المرضى دوامنا إنتهى الساعه سبعه مساء إيهاب قال لي ارح اوصلك ركبنا وطول الطريق كنا ساكتين لمن وصلتا المجمع نزلتا شكرتو قال لي امشي ح إنتظرك لحدي ما تدخلي مشيت دخلتا الشقه كانت مضلمه ولعت الانوار ندهت على مزمل بس نهائي ما جاني رد دخلت غرفتو ما لقيتو وغرفتي فتشت البيت كلو ما لقيتو قلبي قبضني قفلت الشقه وطلعتا سألت البت بتاعة الاستقبال قالت لي شفتو طلع قبيل تقريبا بعد صلاة العصر قلت ليها طيب ما عرفتي ماشي وين؟ قالت لي لالا والله قلت في نفسي اكيد ضاع هسي ح القى وين الولد دا طلعتا بره لقيت عربية دكتور إيهاب واقفه لمن شافني جا نازل قبل يتكلم قلت ليهو يا إيهاب ما لاقيه مزمل اخوي قال لي كيف يعني مشى وين قلت ليهو ما عارفه خايفه يكون ضاع وقعدتا ابكي حسيت بي عجز شديد قال لي خلاص ما تبكي خلينا نفتشو قلت ليهو ح نفتشو وين لكن؟ قال لي نمشي اقسام الشرطه نفتش الاماكن القريبه اكيد ح نلقى بس ما تخافي ..
فتشناهو جمب المجمع ما لقينا إيهاب دور العربيه وانا ركبتا معاهو مشينا كم قسم مافي اثر ليهو وطبعا م ح نقدر نفتح بلاغ لانو ما مرو ٢٤ ساعه انا إنهرت عديل وقعدتا قدام باب القسم وختيت يديني في راسي وبقيت افكر ح يكون مشى وين إيهاب جاء لقاني قاعده كدا قال لي ح نلقاهو إن شاء الله قلت ليهو عارف لو ابوي عرف ح يضبحني انا عارفه إنو مزمل زول واعي وبعرف يتصرف لكن يا إيهاب هو في بلد غريب اكيد يكون ضاع قال لي هو بعرف مكان هنا ركزي قلت ليهو ما بعرف غير المطعم الجمب البحر كان مشينا ليهو لمن جينا قال لي طيب ارح نشوفو هناك مشى دور العربيه وانا لحقتو وصلنا المطعم ونزلنا فتشنا جمبو وبالعربيه برضو مافي ليهو اثر طوالي إنفجرت بالبكاء إيهاب نزل إتكلم تلفون مسافه في النهايه جاني راجع قال لي ما تبكي خلاص ح نلقاهو عندي اصحابي ح يفتشو معاي لكن اول لازم ترجعي المجمع قلت ليهو ليه ؟ انا ما عايزه ارجع بعدين كيف ارجع واخوي ضايع قال لي اسمعيني اول يمكن يرجع ونحن هنا بنفتش فيهو عشان كدا لازم يكون في زول هناك اسمعي كلامي..
دور رجعنا المجمع لمن نزلتا كدا لمحتو جاي من الدكان جريت قلت ليهو مزمل؟!!