بعد مرور كم يوم
انا الراويه🙂
كانت واقفه مسافه وتخبط على باب الغرفه ما سمعت رد ولافي زول فتح ليها بقت تكورك يا إيهاب افتح الباب إنت وعدتني ح تسوقني نمشي السوق وهسي الوقت إتأخر اكيد ح تقول ماشي المستشفى... لمن ما سمعت صوتو فتحت الباب ودخلت الغرفه كانت فاضيه قالت في نفسها معقوله يكون طلع وخلاني الليله ما بخليهو لفت إنتبتها باب الحمام الداخلي بفتح بس مافي زول طلع مشت إتجاهو لقت إيهاب!! وكانت حالتو صعبه شديد بتنفس بي قوه ووشو احمر صرخت!! لمن شافتو وجرت عليهو!!
《》《》《》《》《》《》《》
دخلت المستشفى مشيت المكتب طوالي وكنت زهجانه من الصباح ما عارفه ليه مشيت لقيت المكتب مقفول ودا الناقص قعدتا إنتظرت مسافه وإيهاب ما جاء قلت ياربي ليه إتأخر كدا شفت دكتور رائد طالع وكان جاري عديل قلبي قبضني ما عرفت اسوي شنو لقيت نفسي قمت طلعت من المستشفى قدر ما فتشت رائد ما لقيتو زي الارض إنشقت وبلعتو بقيت اقول إن شاء الله يكون إيهاب كويس دخلت لاقتني سحر قالت لي ملاذ مالك وشك داير يقع منك قلت ليها مافي حاجه مشيت المكتب لقيتو مقفول وزهجانه م عايزه إشتبك مع السكرتيره دي قالت لي دكتور إيهاب لسه ما جاء قلت ليها لسه والله قالت لي خلاص تماام تعالي معاي المكتب اقعدي لحدي ما يجي الليله عندكم عمليات قلت ليها عندنا وحده الساعه اتنين قالت لي لسه زمنا بعيد قلت ليها اي بعيد مشينا المكتب قعدنا ما كان عندها جرع قعدنا نتونس وانا مره بكون معاها ومره لأ
《》《》《》《》《》《》《》
انا الراويه
في بيت ناس إيهاب كانت شيرين ومعاها بت ومره كبيره قاعدين في الصاله وبتكلموا رائد جاء داخل قال السلام عليكم ردوا ليهو قال ليهم يا جماعه الحاصل شنو إيهاب مالو شرين قالت ليهو حالتو صعبه شديد يا رائد هسي معاهو دكتور علاء الدين فوق رائد قال ليها الفريق الطبي ما معاهو انا كلمتهم يجو قالت ليهو اي جو بقو منتظرين الدكتور يطلع اخد زمن طويل وجاء طالع كلهم إجتمعوا حولوا دكتور علاء الدين قال ليهم ما تخافو هو كويس عندو هبوط محتاج راحه بس.. المره والبت وشيرين قالوا ليهو ممكن ندخل نشوفوا قال ليهم اصبروا حبه وادخلوا ليهو...الدكتور طلع رائد تبعو قال ليهو يا دكتور علاء الدين دقيقه علاء الدين وقف وقال لي رائد انا قبل كدا كلمتكم إنو حالتو صعبه لازم تتعمل العمليه فورا يا رائد والاحسن يسافر الهند في دكتور هناك متخصص بي الاورام دي وخصوصا في مرحلتا دي!!..
رائد قال ليهو المشكله يا دكتور إنو إيهاب حاسي بالمسئوليه تجاه امو واخواتو والموضوع دا مأثر عليهو شديد حتى امو واخواتو ما عارفين بي مرضو دكتور علاء الدين قال ليهو انا عارف إيهاب والمره بيهو وعارف حالة امو الصحيه عشان كدا ما وضحت ليهم موضوع مرضو لكن يا رائد ايهاب لازم يتعالج لو ما إتعالج في الوقت الحالي حالتو ح تبقى صعبه بعدين يا رائد نحن ما غرباء عنو اكيد ح نتكفل بي اسرتو لحدي ما يمشي ويجي بالسلامه حاول اقنعو يا رائد انت الوحيد الممكن تقنعوا
الدكتور مشى وخلى رائد واقف يفكر بعد مسافه طلع دخل غرفة إيهاب لقى امو واخواتو قاعدين معاهو حمدل ليهو السلامه وقعد كان مركبين لي إيهاب اوكسجين ومحاليل طبيه رائد قال ليهو بالمناسبه يا إيهاب الدكتور إتكلم معاي عن حالتك إيهاب عاين لي رائد وحمر ليهو رائد واصل وقال ليهو الدكتور قال ليك لازم ترتاح وما تجهد نفسك كتير عشان صحتك ام إيهاب قالت ليهو اي يا إيهاب يا ولدي إنت تعبان شديد في الشغل والله تطلع من الصباح وتجي بالليل دا إرهاق يا ولدي إرتاح حبه رائد قال ليها والله يا خالتي الخوف صحتو تتدهور اكتر من كدا وكان بعاين لي إيهاب في عيونو إيهاب ما قدر يتكلم عشان الاكسجين واساسا حالتو الصحيه كانت شويه صعبه...
الفصل الثلاثون30
كنت قاعده لسه مع سحر والوقت إتأخر شديد الساعه إتنين قربت ولسه إيهاب ما جاء بعد مسافه لمحت رائد مشيت لحقتو سحر نادتني ما إشتغلت بيها وقفت رائد قال لي ملاذ؟! قلت ليهو رائد إيهاب ليه ما جاء لسه هو كويس قال لي اي كويس بس عندو شغل طلع م ح يقدر يجي الليله قلت ليهو رائد ما تكزب علي انا قبيل شفتك طالع وكنت بتجري رائد إيهاب حاصله ليهو حاجه؟! عاين لي مسافه حسيت في كلام عايز يقولو بس اختصر وقال لي إيهاب كويس قلت ليك عندو شغل انا ح امسك عمليتو حقت الساعه اتنين إنتي ارجعي البيت الليله مافي شغل ومشى خلاني إستغربتا وكلام رائد نهائي ما دخل لي في راسي لو إيهاب بالجد عندو شغل ليه ما كلمني ؟ وحتى لو كان ضروري وظهر فجأه كان إتصل وكلمني انا واثقه من الحته دي إيهاب بحترم مواعيدو شديد ولو حصلت حاجه دائما بعتزر وبفسر تصرفو بس ليه الليله ؟رجعتا البيت وقلبي قابضني إتزكرت تصرفاتو معاي في الفتره الاخيره وكيف إتغير تعاملو معاي رتبت الشقه وعملت لي حاجه اكلها حاولت اصدق كلام رائد لحدي الصباح بس ولمن اشوف إيهاب بكره ما ح اخليهو في تصرفو دا مره باقي اليوم صحيت الصباح جهزت نفسي ومشيت المستشفى مشيت على المكتب شايفاهو فاتح دخلت طوالي بس إتفاجأت بي رائد كان قاعد في المكتب قلت ليهو رائد؟! قال لي جيتي في وقتك عايز الملف حق المريض الاسمو عماد سراج الدين عندو ثقب في القلب تغريبا ما لاقي الملف قلت ليهو دقيقه اطلعو ليك مشيت طلعت الملفات حقتي فتشتو لقيتو اديتو ليهو قال لي عايزك الليله تمشي الطوارئ ح تشتغلي الليله هناك عندنا نقص في الممرضين طبعا دي اوامر إيهاب قلت ليهو ليه لسه ما جاء قال لي عندو شغل بره السعوديه إطره يسافر قلت ليهو ح يجي متين طيب قال لي قريب،، انا لازم امشي وقت العمليه قرب طلع خلاني شلت حاجاتي ومشيت قسم الطوارئ الممرضه سلمتني ومشت بقيت شغاله طبعا اكتر قسم متعب قسم الطوارئ لانو بكون شغاله طوالي ما بقيف إلا وقت التسليم ولازم اكون مستعده دائما في اي لحظه لي حاله طارئه جديده
مره إسبوع وإيهاب لسه ما جاء كنت بصادف رائد مره مره لمن فاض بي مشيت المكتب كان دكتور رائد قاعد قلت ليهو ليه لسه دكتور إيهاب ما جاء قال لي عندو شغل يا ملاذ قلت ليهو طيب الشغل دا جاء فجأه كدا وطوالي سافر من دون ما يكلم زول قال لي إنتي ليه مهتمه بالموضوع كدا سكتا ما عرفتا اقول ليهو شنو... قال لي إيهاب بيعني ليك حاجه؟! قلت ليهو ما إلا يعني لي هو مديري ولازم اسأل منو وبعدين انا فترتا من الشغل في قسم الطوارئ عايزه ارجع شغلي قال لي حاولي تتعودي لانو إيهاب ما ح يرجع هسي قلت ليهو ليه؟ ليه م ح يرجع هسي؟ قال لي يا الله يا ملاذ في شنو انا عندي شغل كلمتك إنو هو سافر قلت ليهو طيب ومشيت خليتو...
الاسبوع بقى شهر والشهر زاتو بقى شهرين عديل وبرضو إيهاب ما رجع بقيت افكر الحاصل معاهو شنو طبعا رائد كان ماسك الاداره وما كنا بنتلاقى كتير ممكن يمر إسبوع عديل ما أشوفو ومن اخر مره إتكلمتا معاهو تاني بقيت ما بتكلم معاهو إلا في الشغل،،،شبه إتعودتا على طريقة الشغل الجديده...