رواية #جوليت وأسرها.... الفصل الخامس عشر 15 - بقلم الكاتبه سمو العراق

البارت العاشر
رواية...جولييت واسرها..غياهب الإنتقام
بقلمي..نور سمو العراق

💔💔💔💔💔💔💔💔💔💔

#ويسكت
من تخلي طينته بخده
#البشر لوما ترده يگوم يتعده

.......................................

رمشت بعيوني بخووف...من شفته هجم عليه وهو يتقرب مني مثل حيوان سافل...

صرخت برعب شديد...لاااااا جااااااسر يممممه وخرر مني

تقرب مني وسحب الشال من راسي بقووة كبيره حسيت رگبتي انخلعت وطكت من همجيته وسحبته للشال...

لزمت رگبتي بوجع واني اصررخ  زحفت علئ السرير ببكاء وتوسل...الله يخليك عووفني الله يستر علئ اخوواتك ..

ضحك بخبث وهو يعض شفته..دنعل ابوو اخواتي غير كل يوم من اشوفج اتبهذل ..

درت وجهي علئ الشباك وفتحته واني استنجد باي احد من الفلاحيين لا يمكن تسوء،حالتي اكثر من هييج ..

صرخت باعلئ صوت حسيت الحبال الصوتية تكطعت ...ولجججج يمممه ولك جاااااسر تعااال ..

حسيت بي سحبني من شعري الي تناثر بين اديه ودفعني علئ السرير...

ارتعدت من شكله وقاومته بكل ما املك من قووه دافعت عن نفسي دفاع مستميت ما اعرف منين اجتني القوووه ملخته تملخ..

الا الشرف كووولشي ولا الشرف ...والله اضيع اذا لمسني والله اكتل روحي وما اقبل اعيش،بالعااار...

ما استسلمت اببببد رفسته خرمشته بصقت بوجهه

رغم جانت قوته تفوق قوتي اضعاااف بس ما سمحت اله يلمس اي جزء من جسمي

جان فقط مقاومه شرسة بيني وبينه...

همس بخبث من الثوب نزل شويه من صدري...اوووويلي شهل وحمه الي زادت اعجابي بييج

نطق اخر جمله وما حسيت غير وكع فوكاي بكل جسمه والدم ينزل من راسه علئ خده...

صرخت برررعب حااااد وجمدت اعصابي...

دفعته حييل وكع من السرير وارتطم جسمه علئ الارض الصبخه...

فتحت عيوني واني امسح الدموع النازفه من عيوني شفتها صبرية واكفه وبيدها بوري حديد..

شمرت البوري بصف داوود وركضت عليه حضنتني،واني تخبلت ارجف واصررخ مرعوووبه وألم نفسي كلي بحضنه واختل بجسمها من الخووف...

ضمت راسي الصدرها وهي تمسح علئ شعري...يممه سوده عليه ابن الكلب ابن الزمال عرفته شفته من بعيد يحوم علئ البيت كلت راح يروح لجويليته

ضليت ارجف واشهك والكلمات تلاشت عندي ...و ووالله قق قفلت الباب مالت الحديقه شلون دخل ؟

جرت نفس ورفعت وجهي وهي تمسح بدموعي...جيت من السياج ..خليت عمير ابن كاظمية واكف بنص الشارع وانه ختلت بالبستان وشفته من جيت واجيت اركض وادخلج من الباب الثاني اليطلع علئ البستان واركعه براسه ...

باوعتله واني حاضنتها وانحب همست ببكاء...خاله اخاف مات...

ردت بعدم مبالاة...ياريت يموت ونخلص منه ..

انصدمت من كلامها قوويه وابد متخاف ...

باوعتلي وضحكت كالت..خايبه لا تحافين عار ما يموت شفتيلج عار يموت

ذاك ثوري ابو روح العزيزه مات بساع بساع لو عار جاا ضل علئ كلبي....

مسحت دموعي وحضنتها...خاله فدوووه خلي يطلع لعبت نفسي منه حييل الله ينتقم منه حيوان حقير

وكفت صبريه ورفسته برجلها وهو يون عاطت بي...كااام كوووم لك عاااار ساق...كوا...والله اليوم اخلي ابوك يسحلك بالبستان سحل ابن الزفره...

وكف وهو يترنح بمشيته والدم نازل علئ خده همس بتعب...اني الج صبريه اله اخلي ابوي يطردج من البستان ...

سحبته من ياخته وطلعته بره الغرفه وهي تدردم...دمشي امشي العار ابو الوصخ يهدد دكلي يجي ابوك اله اطمه بالبستان...

دفعته وسدت الباب ..اجت يمي باوعتلي مقهورة علئ حالي جرت نفس كالت..كوومي يمه كوومي خليني انضف الغرفه من دم هل نكس ابو الچعچ..

ساعدتني وكفت واني لسه ابجي اتذكرت كلماته المقززه وهجومه عليه متحملت ركضت بسرعه للحمام واني اتقيئ حسيت معدتي طلعت من مكاني ...

وخاله صبريه خطيه تغسلي تغلط علئ داوود وتفشر بفشار ما ينلبس عليه ثوب

أخذتني واني لازمه بطني من التقيئ حسيت ضغطت علئ الرحم الله يساعده هل طفل شلون لحد الان ما صار بي شئ...

حكمة من رب العالمين لحد الان ما مات وضل نايم بين احشائي ..

كعدت بالحديقه واني ابجي وامسح بدموعي اتاذيت حيل حرب نفسيه وجسديه وشد للاعصاب...

ضلت صبرية تنضف وتشتغل وتسب وتفشر وكل شويه وخلت ابو اللول بالنص هو وحسنه...

شووويه وتفلش الباب بقوووه

كمزت من مكاني وطلعت صبريه شمرت المكناسه من ايدها وراحت فتحت الباب...

كالت بتهجم...خييير اليوم اخووي ومرته مشرفينه شني تذكرتوني...ترئ الچلب العضكم كتلنا...

دخلت ام داوود وابة داوود للحديقه وتكلمت بغضب...ليش ضاربه داوود براسه ومخليه دمه بطووله حتئ المضمد ما عرف شلون يضمده

ردت صبرية بعدم اهمتام...يالله يكبر وينساها ...هسه قابل فطس

وهسه انتي جايه انتي،ورجلج هداده مناك لهنا علئ داوود ركعته بالبوري الحديد صدك ما تستحون...

كتل ثوري وموته وثوري اعز من ليالي واعز منكم كلكم شو ما اجيت هداده مثلكم ...

رد ابو داوود ...يعني الولد لو مات اني اخليج عايشه هاي وهو ابن اخووج ...

ضحكت باستهزاء...اخوووي الي يخاويني بالمصلحه ما اريده ..

اي وانه طكيت داوود الفاسد وشترييد والله ضربته ولهسه ما شفه غليلي منه

ولك احنه ناس عرب واهل حموله لازم نحمي الدخيل عدنه مو نروح نعتدي عليه...

ابو داوود باستغراب...هو شسوه لا دكليلي كتل الثور ..ثورج خبل وهايج وزين ما كتل الوادم...

رفعت اصبعها بتهديد وغضب...لا دكول ثورج خبل ..ماكو واحد خبل غير ابنك الوصخ...

وانه من ضربته لداوود لان جان يريد يعتدي علئ جويليته

كملت بصياح وعصبية وهي تحط ايدها علئ راسها...ولكم الله اكبر ..بنيه حامل وضعيفه وطفله يجي ابو صماخ داوود النذل يريد يعتدي عليه

بس العتب مو عليه العتب علئ تربيتك الزفره مخلي ابنك ملطلط مثل الحيووان تمشي غريزته لا والله من يروح ستين فدوه للحيوان...

ردت ام داوود بحده..وانتي شعندج ملفيه بنت الناس ببيتج مدكليلي منين جبتيها...

حطت ايدها علئ حافة الباب والايد الثانيه تخصرت بيها ...عشتوو وانتي شعليج عسئ ما الفي الكيوليات والكح..وامهات الملاهي ..انت شعليج

جاي تصرفين عليها ...كضي ابنج الوصخ وكفينه شركم وولي من وجهي

ابو داوود...هااا هيج صرتي صبرية والله حقه ابو اللول يتزوج عليج لان انتي عرمه وما تنحملين...

هزت ايدها بسخرية...ديلا عساس ابو اللول شيخ مفتول كله ابو اللول حتئ ما علية مية العجين...

طردتهم وقفلت الباب وهي تدردم...لانعل ابو تربيتكم كواوي...سرسريه ..

كعدت مقابيلي وجرت نفس عاطت بيه بصوت كمزت من مكاني ولزكت بالحايط كالت بصرخه...ولج لا تضلين بس تبجببن هاي العالم ما تعيش وياهم الفقيره ...هييج كوون اريدج تطبين بعيونهم...

بلعت ريكي بخوف منها تنهدت وطلعت جكارتها ورثتها كالت...كون عمير ببيع الحليب والكيمر ويجيني بس هل اثول خايفه منه يضيع الاول والتالي انه ما اعتمد عليه...

باوعتلي بنظرات شفقة وكفت وجرت حسره...كومي يمه كوومي ناميلج شوويه الله ينتقم منك يالعار يداوود يالمصخم ..

دخلت للغرفه اخذت ملابس ودخلت سبحت بجيت بحسرة علئ حالي مقهورة علئ نفسي تبهذلت حييل..

لا اكدر ارجع اله ولا اكدر اضل هنا احتاريت

غسلت وسبحت وعيوني ورمت من البجي يااارب ارجع الامي ما اريد اي واحد اريد بس امي وابويه مدا اكدر اعيش بدونهم هم الوطن ما الي،غيرهم وطن...

اووف يا جاسر لو تعرف شصار بيه

........................

ريهام...

كل عاده كعدت الصبح عند بيت عمي نضفت البيت وكملت ودا اسوي الغدا..

جانت عمتي رضيه وعمتي ام فلاح ووقار كاعدات يالحووش ...

ونوال كاعده تمشط بشعر بنتها والبنيه تصرخ لان جانت تشد بشعرها حييل وكل شويه وركعتها بالمشط...

وعمتي ام فلاح تصيح عليها...ولج كافي موتي البنيه خلي رضيه تمشطها...

ردت نوال بقهر...موتني اني بيا قهر وبيا ضيم وهنه يتنعوصن عليه والله تعبانه ونفسيتي زفت منا الحمل منا فلاح مات وخله هل قردات فوك راسي...

جرت نفس ام فلاح وخزرتها مقبلت علئ كلامها كالت....شنو ذنبهن البنات هاي بدل ما ترحميهن ودكولين يتيمات انوب تكتلين بيهن وتضربيهن خافي ربج بيهن لا الله يغضب عليج...

شمرت المشط بعصبية...بعد شيصير بيه ويغضب عليه ما كافي بركبتي تلث بنات والرابعه بالطريق منو الهن منو يعيني عليهن...

وبعدين لا تشوفين ولدج مهتمين بيهن هسه ...اي يكولون اليتيم بس اول اسبوع وبعدين يركعونه مية نعال...

رضيه جاوبتها...لا يمه شنو السالفه اني وعمتج ام فلاح شلون ننساكم ...

ردت بقهر...اي نشوووف ..

سكتت منها وضلت تسوي بالخضره...احب رضيه من تنضف الخضره اكزز عليها...حيل مرتبه...

رحت توضيت واجيت كالت ام فلاح...يممه رهومه بعده ما اذن الظهر..

ابتسمت...اي عمه اعرف بس دا اصلي طلب

رضيه باوعتلي باستغراب...انتي هم مطلووبه

ابتسمت...اي عمه مطلوبه تعرفين كل شهريه لازم اكطع الصلاة وهماتين البارحه شكيت بصلاتي باطله

ام فلاح كالت...ليش باطله

جريت نفس..مو جنت دا اتوضئ ودخل صلاح فجان رداني مرفوعه وشعري طالع فحسيت صلاتي باطله قررت اليوم اعيدها...

تنهدت نوال بقهر...وانتي مواقفج متصير اله ويه صلاح ؟

فشلت باوعت للكل بهدوء وابتسمت مجاملة...اي هو دخل فجأة عباله محد موجود...

ردت بغرور...اي عادي تصير هسه اني هم لازمه عده وكل شويه واحد صاير بوجهي...

جاوبتها رضيه...اكعدي بغرفتج واحنه نجيب الج التردينه و وقت الموجودين بي لا تطلعين

فتحت شالها...ياا والله فووك ما نفسيتي تعبانه انوب ترديني اسجن روحي بغرفة صدك جذب..

وقار تكلمت بهدوء...روحي الاهلج

باوعتلها بحده وخزرة...صدك ما تستحين بعده ما مات اخوج طردتيني بس ليعلمج النه ورث بهذا البيت وبنات فلاح الهن ورث اكثر من ورثج ومو من حقج تطردينه

وقار بعصبية...هو انتي منو الطردج دا اكولج خلصي العده وتعالي اذا تستحرمين...

وكفت وهي تتخصر...لا حبي عايفه الحلال والحرام الجن...

اخذت بناتها وصعدت فوك ..ام فلاح جرت نفس بحيره واستغفرت ربها وبعد رزلت وقار ...وقار ضاجت بس محجت...

رحت اني صليتت وكملت ..

طلعت بره اعدل بحجابي ..دخل جعفر تجاهلته ورحت كعدت يم رضيه...

كعد علئ الدرج وهو يدخن...وكل شويه وتنهد..

دخل صلاح جان بالشغل كال...السلام عليكم...

جاوبنا ...وعليكم السلام..

رضيه ضحكت كال...صلاح اليوم ريهام عادت صلاتها من وراك دكول جنت اتوضئ وشافني واحتمال صلاتي باطله ..

انصدمت من كلامها وباوعتلها بعتب..رجعت نزلت عيوني بفشله واني افرك باديه

هو ضحك كال..والله ما ادري بيها بالمطبخ واعتذرت منها...

جعفر كال..ههه والله يا بنت عمي احسج من جماعة الزرقاوي ...

هاي لو اني منج ومصلي ما اعيدها لو ينزل بيه قرار من جهنم...

كمل بضحك...والله مرات اصلي صلاة الصبح اضل يومين مسيطر احس روحي بالجنه...

واردف بحماس..لا لا انوب برمضان من اصوم...النهار كله نايم اكعد ويه الفطور وصوم بدون صلاة واحس نفسي مسوي شئ عظيم وحاجز الطابق الرابع من الفردوس...

باوعتله بتفاجئ وصدمه...صدك تحجي؟ بس هل شئ حرام لان الصلاة عمود الدين...وبعدين اذا تصوم ومتصلي تعتبر من عبادة شهر رمضان ..مو عبد لله

رد بعدم اهتمام....يمعوده هناك نتجازه بيوم القيامه بلكي يلكولي غرفه حتئ لو ما ملبوخه بالجنه ويكعدوني بيها...

جاوبته بقهر...استغفر الله استغفر ربك حرام لا تضاعف ذنوبك...

جاوبني صلاح..يمعوده عوفي هذا ابليس متمدد براسه وينطي اوامر...لا تجي وياه نصيحه ولا موعظة...

ابتسمت وسكتت...

رفعت راسي ليفوك شفت نوال واكفه علئ المحجر وتشر بملابسها

صلاح كال...اليوم كلت مدام ريهام لحد الان عدنا خلي اروح الابو السمج وخليته يشوي النه كم سمجه مسكووفه حتئ نقراها بثواب ابوي وفلاح...

رضيه ضحكت...هااا يعني راح ناكل بجال ريهام

جعفر بغرور...الله عليج ريهام ضلي يمنه حتئ صلاح يدللنا...

ضحكت...شكرا صلاح خجلتني والله

رفع حاجب...افااا علئ شنو خجلتج تدللين والله...

ابتسمت ومجاوبته ..نكثت نوال ثوبها بحده وعصبية وراحت...

ما نسمع بس عياط البنات...

الولد خطيه مكدروا يرحون الها وام فلاح ورضيه ساعتين يالله يصعدن الدرج...

ركضنه اني و وقار صعدنه الها لكيناها لازمه بناتها تلاثتهن بغرفه ولازمه الصونده وتضرب بيهن بوحشيه ...

وهنه يصرخن ويبجن وهي تصرخ وتضرب عبالك وحده بيها حاله نفسيه....

حاولت اخذ منها الصونده ماكدرت ضربتني بيدي خلتني شاطت روحي لزمت ايدي بوجع احس كف ايدي صار ناااار...

خطيه وقار كدرت تسحب منها البنات وهي شمرة الصونده علئ الارض...

صعدت عمتي رضيه وعمتي ام فلاح لزمتها ام فلاح بغضب...ليش ضربتي البنات ليش انتي مجرمه...

اشو هاي تخبلت بالزايد شكت ثوبها وتلطم وملخت شعرها وتصرخ ...

هنه تخبلن وصعدو الولد يركضون دكوا الباب رادو يعرفون شكوو...

لزمتها رضيه وسطرتها راشدي عاطت بيها بغضب.. ومرض وسم وزهر شبييج تخبلتي

اشرت عليه بغضب وهي تصرخ...كله من وره هااي هي السبب خلتني موتت البنات كتل ذنبهن بركبتج اليوم الديين...

شعندها لافيه علينه متروح الاهلها لو شافت دبگه هناا وكالت خلي احصلي لعطة...

وكفت بغضب...شبيج شنو لعطة شنو اني شدخلني

صرخت بوجهي...انتي دكولين لبناتي امجن كافره وكح...وتدخل لنار لان ما ملتزمه بالعده ليش تخبلين بناتي عليه عوود انتي متديينه ..

اشرت علئ نفسي بخووف وقهر و تفاجئ...اني ؟

رجعت تعيط...اي انتي يالمتدينه يا ام الاحكام بيج خيير روحي اكعدي بيت اهلج ولا تفترين بالبيوت وصيري شريفه علئ نفسج...

حسيت نار اشتعلت بصدري همست بعبرة...والله جذب مستحييل اني احرض بناتج عليج هل كلام مصار اذا تردين اروح اتوضئ،واحلف ابد مكلت هيج شئ...

ام فلاح باوعتلها بقرف...طاح حظج اي والله هاي وانتي مكسورة هيج تسوين ما تصير الج جاره...

هو انتي دواج بس فلاح وراح طمه التراب جان من تفكين حلكج وتنافقين يطمه الج بنعال...

دكت علئ صدرها بغضب وصياح...تعيريني تعيريني ويينك يالحيد ويينك فلاح تعال شوف امك تعيرني بيك

ردت عليها رضيه...هو انتي لو تستحين جان كلتي اني بيا ضيم العلع ...ومنا حموينج كاعدين وصوتج عوورة...

خلت ونزلت جوه واني ابجي ونزلت وقار ويايه وهي تبوس بيه وتسكت بيه كالت...يمعوده متعرفيها لنوال فد وحده خبله ولسانها عام عليها...

شفت جعفر واكف بالحووش هو وصلاح ولازمين بنات فلاح وهنه يبجن...

نزلت رضيه وام فلاح وهنه يحجن عليها...

ام فلاح كالت...والله اله اكول الجاسر عنها اخلي يشوفلي صرفه وياها هل خبله هاااي موتت البنات كتل اعرفها بالعناد هيج تسوي

جعفر...يمه اني اكلج هاي تخبلت ما تكدر تضل بدون رجل...

رضيه عاطت بي ...انجببب واسكت ولك يا رجل وهي حتئ عده ما خلصت

جعفر بسخريه..تعلميني بنويله اذا كلتولي تعال اتزوجها انهزم باليلة ظلمة ومحد يلكاني...

باوعلي صلاح بخوف...شبيج...شبيها ريهام تبجي

بلعت ريكي بغصه...عفيه اريد اروح الاهلي

لزمتني رضيه بقهر...شبيج يمه رهومه خلي تولي تروحلج فدوه هسه اروح اطيح حظها واخليها تعتذر منج ...

صلاح باستغراب...شبيها وياها نوال؟

اني عفتهم ورحت ابجي من الفشله...

وقار كلتله ...هاي نوال طردتها

سمعت صلاح يصيح بعصبية...شنوو بكيفها تطردها شنو بيتها خلي تحترم نفسها احنه نكول مكسورة وحزينه وما نحجي وياها...

بس مو معناها تتجاوز وتكتل البنات ظلم وتتهم ريهام وتطرد بكيفها...

خلي يوصلها هذا الكلام عيب عليها هي حرمة اخونه ما نريد نتجاوز عليها...

طلعت اني لابسه حجابي كامل وجنطتي بيدي دا اروح الاهلي...

هي مدت راسها من فوك مبوشه ولابسها حجاب كالت...صلاح والله مو قصدي بس ضجت وانت كلامك علئ عيني وراسي وتمون لو تكضني وتجنزني بصونده ما الومك بس اعذروني اني مقهوره علئ فلاح وما كدرت اسيطر علئ نفسي

يعني تقبل بناتي يغلطن عليه ويكولن كافره

رد عليها بغضب وهو عيونه بالارض بدون ما يباوع الها...هنه اطفال شفهمهن هاي بدل ما تخافين الله بيهن ودكولين ذن من ريحة فلاح خلي اداريهن انوب تلزميهت بصونده تموتيهن...

منو يتحمل الصونده هسه انتي بهذا كبرج تتحملين واحد يضربج ..شحال هذن اليتيمات لا حول ولا قوة وضعيفات شلون الج ايد تضربهن شنو شايله من كلب انتي...

تتحملين هل ضرب وهل صونده سؤال واحد جاوبي عليه...

رد عليه جعفر بهمس...اي تتحمل مو هي مطي ...والله ما ينلام بيها فلاح من جان يكتلها

ردت عليه بصوت حزين...كلت اعذروني شنو لا تطلعوني اكرهن هنه بناتي طالعات من كلبي بس ساعة عصبية...

رجع كمل كلامه بحده...ومره ثانية لا من كيفج تطردين وتتجاوزين انتي هنا حالج من حالنه احترمينا حتئ نحترمج لا تخلينا نكرهج...

ردت عليه ...لا فدوه والله اني احبكم وان شاء الله ما تشوفون مني بس كل الخير...

غمض عيونه باسئ...روحي الغرفتج خوويه روحي والتردينه يجيج حاظر الباب الغرفه...

جاوبته بتنهيده...مشكور صلاح والله دائما اكول انت وجاسر الوحيدين الي توكفولي بمحنتي...

سكت مجاوبها وهي خلت وراحت الغرفتها...

باوعلي وعقد حواجبه كال..شنوو اشوو لابسه لا دكولين استحرم...حتئ والله اذا كلتي استحرم هسه اسكطج تسكط بصوندة نوال..حجاها وهو يبتسم...

مسحت دموعي بسرعه همست...لا اريد اروح الاهلي..

جر نفس وتكلم بحدية...ريهام انتي عاقله وحبابه لا تسوين هيج هي نوال هاي عقليتها شويه وهي تجي تعتذر منج...

هزيت راسي بنفي....لا اني ما اريد اي واحد يعتذر مني بس والله اني اريد اروح الاهلي هماتين كلام نوال صح ..وخطيه امي الوحدها ...

مسح وجهه بتوتر كال...ضلي بس اليوم وباجر وعد اني اخذج بيدي البيتكم بس اليوم اني عازمج و عيب ترديني وتكسرين كلمتي...

تقربت مني رضيه وهي تحضني ...اي والله عيب تكسرين كلمة ابن عمج وشيكول علينه شيخ عكاب ردينه بنته زعلانه وبدون غدا

ابتسم كال...لا هي حبابه اكيد تضل اليوم ...

جريت نفس ومسحت دمعتي وابتسمت... بس باجر تاخذني الاهلي وعد؟

دك علئ صدره بحزم...وعد

دار وجهه الجعفر كال...يالله جعفر روح جيب السمج وتعال ..

جعفر اخذ منه فلوس وراح اخذ وحده من بنات ..

شويه واحنه حضرنه الغدا وجعفر جاب السمج...

صبينه كلنه كعدنه اكلنه...صعدت رضيه صينيه النوال لان ما تنزل هي لان لازمه عده...

جاسر مموجود من البارحه واتصلت بي امه كلها ...اني يم ابوي وغزل وفلاح

هي خطيه ضلت تبجي وتنوح عليهم ...وهذا حالهم كل يوم ياخذون مشوار من النوح والبكاء علئ احبابهم...

...........................

جولييت...

مر تقريبا اسبووع...

رسلت رساله لجابر شويه واتصل عليه ...

كتله..جابر محتاجتك بموضوع ظروري ..

خطيه كال...اي ادللي احجي شنو محتاجه

جريت نفس..خالتي صبرية تريد تحجي وياك..

رد بهدوء...اهااا يعني اجيكم لو تتصل بيه

تنهدت بضيق...لو تجي احسن بس دير بالك اخاف احد مراقبك

ضحك كال...لا محد مراقبني وبعدين اني ابن عمهم شكوو يراقبوني ...

بلعت ريكي...مدري احساسي يكولي اكو احد مراقبك

ضحك...ان شاء الله احساسج غلط..

همست ...ان شاء الله

قفلت الخط وتنهدت بعد ما كال ان شاء الله هل ايام يجي والله كريم

داوود سمعت ابو طارده ورايح الخواله ببغداد

بس اني لحد الان خايفه ومرعووبه دا اريد اروح للدكتورة لان احس باوجاع قوويه اسفل بطني وضهري...

بس مدري شبية مستحيه اطلب من خاله صبرية رغم هي متقصر تاخذني بس اضل اخجل اطلب منها...

صار من تحرش بيه داوود لحد الان واني الخوف عاميني حتئ للبستان ما اطلع واقفل الابواب كلها من تطلع صبريه...

واقل حركه اكمز واضل اتلفت...

اجت صبرية تهف بعبايتها شمرته علئ السرير كالت...هذا الساقط داوود رجع انوب يتهدد عليه الكو...

جريت نفس...خاله اني لازم اروح منا لان دا اسبب الج مشاكل...

عاطت بيه بصوت عالي...انجبي ولج اني حبيتج وانتي ونستي والله ما ضايجه منج بالعكس نسيتيني همومي بس هذا النعال رجع ...بس لا تخافين عندي،مسدس مره ثانيه اكسر رجله واخلي يزحف علئ ركبه...

انوب خوفتني بالزايد هي ابد متخاف والي براسها تسوي ...

راحت للكنتور طلعت مسدسه واني لزكت بالحايط من الخوووف تذكرت اخوويه من كتل اخوو جاسر وبنته وابوها...

صرخت برعب واني ابجي وحضنت نفسي هي ضمت سلاحها واجت حضنتني كالت بضحكه...لا تخافين شبيج اخوفه بس ما اكتله...

همست بنحيب...خاله فدوة السلاح خطر ...هذا السلاح هو الي دمر حياتي وخلاني مثل الاسيرة كل شويه بمكان...

بسبب هل سلاح والشيطان ...اخو برگبته دم تلث اشخاص راحو بساعه وحده...

جرت نفس وباستني براسي...لا تخافين جكليته هذا السلاح جنت ناوية اكتل بي حسنه واطمها بس ما صار مجال...

وهسه بعد كرهتهم وما اريد احطهم برگبتي ..واخذ اثم من وراهم..

ان شاء الله زوجج هم مثلي من يرجع العقله يبطل انتقام...

هزيت راسي بنفي...لا خاله لاااا جاسر اهله ماتوو مستحيل يبطل انتقام مستحييل...

ردت بعصبية...خيبه هو هذا رجلج مطي انه كل هل جمال الي داوود صار مثل الزمال عليه واعوفنج واروعج ...والله انت بس شوفتج تنسي ابو الانتقام..

ابتسمت علئ كلامها وحضنتها اكثر...

..........................

جابر...

رحت البيت عمي اشوفهم...

لكيت جاسر هسه داخل للبيت...

كعدت ويه صلاح وجعفر ضلينه نسولف...

شويه واجه جاسر سلم عليه وكعد يدخن ويرجع يدخن ...

جريت نفس...ابو غزل هووواي تدخن ترئ مو زيين تلكه الرئه كلها دخان. هسه...

باوعلي وابتسم ابتسامه جانبيه ونفخ الدخان بهدوء....ليش اهمك ؟

بلعت ريكي وعقدت حواجبي...شلون ما تهمني انت ابن عمي بمثابة اخوووي اكيد تهمني،

هز راسه بغموض...ونعم منك.... يصير خيير 

ضلينه نسولف وهو كلامها كله حااد ولاذع...

بعدها اخذت ريهام واجه وياي صلاح وخلينه ورحنه البيتنه...

مقرر ان شاء الله بهل يومين اروح الجولييت اعرف شتريد صبرية

بس حاس بحسرة بداخلي جولييت كلش معذبتني ومحتار بامرها....

رغم هووواي احاول الكي اهلها بس ماكوو اختفو...للاسف...

وتركوها تعاني بوسط هل كم الهائل من المصايب...

.....................

جولييت...

جنت كاعده اني وصبريه بالبستان...

جانت صبريه تقطف بالخضره وتاكل وسخه واني احجي عليها اخاف تتمرض خطيه وهي مصره تصفئ بالمعده....

شمرت الخضره ووكفت متعصبه...اعوذ بالله منج ما تخلين واحد ياكل براحته...

خليني اگوم اشوف گنوش احسن...

ابتسمت...الحمار موو

صاحت بوجهي...المطي المطي

ضحكت وهي وخلت وراحت توكل گنوش...

باوعت للبستان كله حلوو يجنن وريحة الزرع تجنن والخضروات شئ فضيع...راحه نفسية...

رجعت بذاكرتي من جنت مخطوبه اجت رضيه واشواق اخذني من بيت اهلي لان جان العرس هذا الاسبوع وجان لازم اصبغ شعري...

لبست تنورة طوويله وقميص وشال وحذاء رحت وياهن...

امي خطيه ابويه مقبل تجي ويايه لان محد يضل يسويلهم غدا...

رحت من الصبح تغديت يمهم وجاسر ماكو جنت كل شويه اباوع للباب اتمنئ يجي واشووفه بس ما اجه

يالله شكد فرق بين قبل وهسه...قبل اتمنئ اشوفه وهسه خايفه اشووفه...

صار دنيا المغرب كالت اشواق ..هي هاي ام الصالون اعرفها جانت صديقتي خلي تسوي شعرج بالبيت ...

هزيت راسي بقبول...

شوية وصارت ربكه بالبيت كالو اجه جاسر .. بس،كبل راح الغرفته ما شفته توتر علئ خووف وقلق اتمنئ اشوفه...

بعدها اجت رضيه تركض كالت...الحكي ام فلاح جعفر سكران هسه يموته جاسر

خالتي دفعتني كالت...روحي روحي الجاسر لا تخلينه يطلع بين ما انصحي جعفر والله بس يلزمه يموته حلال...

ضليت واكفه محتاره ومتردده سحبت ايدي رضيه ودكت الباب هو صاح...ادخل.

فتحت الباب رضيه ودفعتني جووه...

جان فاتح ازرار قميصه من البدايه باوعت عليه ورجعت باوعت للباب خايفه اريد اطلع...

رفع حاجب متفاجئ من وجودي

بلعت ريكي بخجل وجريت نفس طويل...اءء اءء شش شسمه هذا ...هي رضيه كالت شوفي جج جاسر

تقرب مني وهو يضحك لزم ايدي وقربني عليه ورفع وجهي باصابعه كال...اي اهلا وسهلا بيج ما ادري جايتنه ...

بلعت ريكي بصعوبه...اءء اجيت من الصبح بس ما شفتك لان ردت اصبغ شعري علئ العرس ...

سحب شالي ونثر شعري باوعلي بإعجاب كال...لا مستحيل اخليج تخربين شعرج وبعدين هو اشكر شكو صابغته...

همست ...مو اشواق كالت اصبغي يصير حلو

دخل اصابعه بشعري وهو يحركه بهدوء ويباوعلي بنظرات معجب...وشنو انتي متزوجه اشواق غير لازم تاخذين رأيي...

ضحكت بتوتر...كيفك اذا تحب ما اصبغه

كال بجدية...اي لا تصبغي يتلف الشعر الصبغ ويخربه وحرامات انتي شعرج حلوو...

رمشت بعيوني ونزلت راسي...مثل متريد

ضحك وتقرب مني طبع بوسه دافية علئ طرف شفتي...

ابتعدت بسرعه خايفه ومهبووطه ...استاذنت منه وطلعت بسرعه...

اول مطلعت من غرفته شفت امي بوجهي ...هو غرفته جووه جانت...

تعصبت من شافتني بغرفته وهو رأسا طلع ورايه...

ضلينه كاعدين ونظراتها بيها توعد اليه ...

كالت بحدية...والله عاصم تخبل كال هسه ترحين تجيبين جولييت حتئ لو اهل خطيبها بس ميصير...

انتي خيه ام فلاح ما تعرفين عاصم مخبل وجابني واجه...

كالت اشواق...يالله هسه نروح نصبغ شعرها ..

همست بهدوء...لا جاسر ما قبل اصبغه ...

اول شئ راحن يقنعن بي بس هو مقبل واني هماتين خفت من نظرات امي لان شافتني بغرفته ومقبلت اروح....

رجعنه للبيت وامي اول ما وصلنه كتلتني كتله بنعال وتغلط دكلي ...الي متئ تضلين عووبه وفاهيه ولج شعندج بغرفته

ولج شلون بيج البيت متروس ولد وابوهم الشيخ موجود وانتي تدخلين الغرفته هاي واني امشي واوصي ...يمه جوولي صيري مؤدبه يمه جوولي صيري ثكيله وانتي مثل الجحش لا فهم ولا علم ...

بعدها نزعت مني القميص وهي تتفحصني..احجي ولج سوالج شئ شسوه ولج يمصخمه احجي

صرخت بوجهه..كوولشي مسوه والله شبيج محاربتني

لزمتني من شعري ..كولي والله ما سوالج شئ...ولج ما تقنعيني والله

باوعتلها بخوف واني ارمش...ببب بس بب بوسه

رجعت كتلتني كتله بنعالها وهو شلون نعال يابس طبعته علئ جسمي طبع...

امي صح كصيرة واني اطول منها بس من تكتل يبووو تموت تجرم ...بس امووت عليها كتلتها عافيه فدوة الكلبها....

مسحت دموعي واني اجر نفس من تذكرتها...

رفعت راسي علئ خيال الشخص الي حسيته فووك راسي

ضحك كال...شوكت ما اجيج تبجين شوكت تبطلين بجي

همست بنحيب...من ارجع الحضن امي ...

تنهد بضيق كال...اختفوا فجاة ماكو ابد ..

وكفت بابتسامه...شلونك جابر ان شاء الله بخير

رد بضحكه...بخير بخير انتي شلونج طفلج شلونه ان شاء سبع علئ،عمه جابر...

حطيت ايدي علئ بطني...اي سبع متحمل كل هل صدمات وبعده صامد طالع علئ امه ..

باوعلي من فوك ليجوه كال...ادري شنوو غجريه تحسسيني كاعده بالغجر...شنو هل ألوان الي لابستها. 

باوعت النفسي ضحكت جنت لابسه ثوب عريض برتقالي وجاكيت جووزي وشال ازرگ..

همست بمرح...هذا استايل السنه حاليا

كال بجمود...يالله بس ترئ لايگ عليج

سكتت مجاوبته...درت وجهي...ويين راحت صبرية

جر نفس...اي وين راحت

درت وجهي واني اضحك...راحت تغدي گنوش

ضحك...گنوش منووو

جاوبته بمرح...هذا الحمار المدلل من بعد الثور مالتها واسم علئ مسمئ كووولش حلو وصاحب شخصيه

رد بقهر...افااا انوب المطي صار صاحب شخصية بعد صبرية وحيواناته حقهم يصيرون شخصية اذا مربيتهم ام اللول

ضحكت اول ما درت وجهي باوعت للي نزل من السياره وهو شايل سلاحه صرخت برعب شديييد.....جااااااااااااسر لااااا...

نهاية البارت...يتبع

كونوا انتم كونوا بخير...احبكم  💔

نور سمو العراق..😘

لا تنسو التصويت والمشاركه بكم نكتمل 🌹

وغلسو علئ السحكات عبن عندي امتحان 👌

هذا التعليق الفاز بالمسابقة...البارت هديه الها 😍

وتابعو هاي الكاتبه فضلا وليس امرا..Zahraalbayati