البارت الرابع والعشرين
رواية...جولييت واسرها.... غياهب الإنتقام
بقلمي...نور سمو العراق
💔💔💔💔💔💔💔💔💔💔💔
انا وكلبي مشينه الحد صدى النسيان غنينه وحفرنه كبورنه ومتنه
غلسوا علئ السحكات ترئ اكتب بتك لايت 🙄
....................................
شكد يوجع هذا الشعور من تضلين واكفه بنص الطريق حايره حنينج وراج وكبريائج كدامج...
اسال نفسي اذا ابقئ...... وصرخ كبريائي ويكووولي روووحي لا تضلين هنا...انتي ما عندج كررررامه...
وهذا الي صار عندي من بعد ثورتي وانهياري حسيت هل شئ ما اله داعي اصلا هو رجال متزوج من زمان واني ما اكدر املك گلبه وهل شئ مو إجباري
قطع افكاري كلام الدكتوره من ضلت تحجي ويايه وتسولف وكالت بطنج جنايه تجني اكثر من طفل اني عبالي تقصد لان عندي توم من قبل ...
بس فاجئتني من كالت طفل ميت والطفل الثاني مابي نبض ...
عدلت كعدتي واني احس بنبضات گلبي السريعه و وجهت كلامي من دون اراده مني ومعرفة مكان الدكتوره همست بعذاب...اءءء ييعني شنووو مييتيين ؟
مسحت علئ راسي وجرت نفس كالت...ماما حبيبتي شوفي انتي متعرضه الحادث وهذا الي فهمته من دكتورة الخفر لذلك يا ماما طفل من التوأم ميت من خلال الحادث ومتحجر مثل كيس ولحد الان موجوده بالرحم...
والطفل الثاني عادي عايش حتئ بعد موت اخو التوأم بس نبض مابي او مثل منكووول ضعيييف حيييل واحتمال كبير تسقطي...
حسيت بيد ثكيله حطت علئ بطني وهو يكولها بنبره متوتره...يعني هسه هي حاليا حامل بتوم و واحد من التوم ميت ؟
جاوبته بهدوء...اي حامل بس نبضه ضعييف حييل احتمال كبير ينفقد
رد عليها بقلق...بس هي من اول ما تعرضت للحادث كالو ان الطفل مات وما كالو توم وصار النزف ...
جاوبته واني ما اشوف تعابير وجهم الي اتمنئ اشوفها كالت...اي يجوز يكون تشخيص خاطئ او يمكن ما عرفوا ان اكو بعد طفل يصارع الحياة
اني جنت بدوامه من كلامهم شنو الي ديصير شنو الي ديحجي هو يعرف الطفل ميت وما يعرف توم وبعد اكو طفل عايش؟
دخت والله وحسيت كلبي انعصر حيييل واني بضلمة روحي صار تقريبا اكثر من شهر طفل ميت ومتحجر مثل الكيس ببطني
بطني حملت ابني وحمته حتئ وهو مييت ومتحجر حطيت اديه علئ شفايفي وشهكت همست بيني وبين روحي...شوفي يمه شوفي طفلي ميت واني محتضنته لحد الان
واني عدله وعايشه بغابه وانتي ابد ما احتضنتيني وحنيتي عليه...والله وحسيت بي ميت وانتي ابد ما حسيتي بيه
رفعت عيوني واني امنع هطول الدموع همست الحمد لله راضيه بقدرك يارب وانت يمه ما الك نصيب بهل دنيا...
بس حسيت مثل أنياب ثعلب تنهش بروحي عز عليه واحد ميت و واحد عدل ياريت لو ثنينهم عايشين شلون هذا دينمو والثاني فاقد الحياه
انتبهت علئ اديه الخشنه احتضنت ايديه وهو يسالها...زين الطفل المتوفي ياثر علئ حياة زوجتي وحياة الطفل الثاني وشنو نسوي بهل حاله
ضحكت...لا لا ان شاء الله مياثر مدام الطفل مات بالشهر الثاني من الحمل فالجسم حيمتص كيس الطفل وينتهي نهائيا...
جر نفس عميق وبقلق...زين دكتوره هسه شنسوي للطفل النبضه ضعيف يعني ابر علاج شنو تنطينه
جاوبتها بهدوء...راح انطيها مثبتات وماما لا تخافين اذا نزل عليج شويه دم هاي لانو الجسم ديمتص كيس الطفل...
بعدها سالته بحزن....هي عميه مووو
رد عليها بعد ما ضغط علئ ايدي...للاسف اي بس ان شاء الله من تجيب اسويلها عمليه وهي تاخذ علاج اتركه لو شنو وهم مآثر علئ الجنين
جاوبته...لا مماثر بس خلي تترك شكو علاج تشربه حاليا وخلي تراجعنه بين فتره وفتره لان الطفل حالته ممستقره ولا تصعدين درج او تتعبين نفسج تمام ماما...
هزيت راسي بقبول وهو تشكر منها وخلت وراحت وخطيه ماما رضيه كله شويه تتصل وجاسر طمنها ومن كلها حامل خطيه فرحت وضلت تحجي ويايه افتهمت منها هم مجانوا يدرون بيه توم وما كلولي الطفل ميت...
تقرب مني وهمس بصوت عذب...يالله نرجع للبيت
تنهدت بضيق وهمست...المن ارجع ؟ جاسر هذا البيت بيتك وانت مدام رجعت شام وهي زوجتك ارجع الها صدكني مراح ازعل...
واعتذر والله عن السويته البارحه وعن انهياري بس صدكني...... غصيت بالكلام وتداركتها بضحكه....ههههه يعني عادي ردة فعل طبيعيه يمكن خبالات الحمل...
ما شفت منه اي اجابه ولا اي ردة فعل اختفت ابتسامتي وضحكتي تلاشت بلعت ريكي بفشله...اءء يعني عادي هذا الشئ منتهين منه اني والله صدكني ما جنت منتظره منك حب ولا احب افرض نفسي عليك
وصدكني صح فرحت ان اني حامل وما فقدت الطفل بس مو فرحت عود اذا صار عندي اطفال وكثروا انت بعد ما تكدر تتخلئ عني
لاااا مستحيل افكر هيج تفكير لان بهذا الشئ حتكون مجبور علئ العيشه ويايه بس هل طفل قطعه من روحي
وكل ما ينسد باب بوجهي ربي يفتح الي الف باب من واسع رحمته صدك تعذبت بالبدايه بس صدكني من جنت اشوف مشمش و روضي واشوف عيونهم الحلوه ينزاح كل تعب عني...
لمست بطني بحنيه...وياريت يكون هل طفل بنيه اتمنئ تصير عندي بنيه حتئ تكون الي حبيبه
جاسر اني اعرف بيك حاير بيني وبين شام وشفت لهفتك عليها وما الومك حقك مرتك وحبيبتك والله يعينها علئ بلوها...
غصيت بالكلام بس ذكرت اسمها تنهدت وتوقفت عن الكلام واني الهث بتعب ايقنت روحي تحولت سرداب اسود موحش صامت...
ابتسمت بعذاب واتلمست الفراش الموجود علئ السديه واني ادور علئ ايده احتضنت ايده الضخمه بكف ايدي الناعم ...
همست بروح مجروحه...اني رهينه عندك وصار الوقت الي تحرر هل رهينه من قيودك وتطلق سراحها من هل قفص المعتم...
عصر ايدي حييييل حسيت اصابعي تكسرت من قبضته بس تماسكت وتحملت الألم كال بصوت غاضب....شنووو قصدج ؟
ابتسمت ...هههه قصدي يا جاسر اني بعد ما افيدك وعطفك وحنيتك وحبك المزيف انتهئ دوره اجت التاخذ مكاني صدكني ما ازعل صدكني
اني جنت من زمان حاسبه حساب لهذا اليوم حاسبه حساب الرجعتها ولهفتك عليها جنت اريد اتعلم خياطه أعين نفسي واطفالي بس للاسف القدر اله كلمته وتقيدت بفقدان عيوني...
بلعت ريكي المر بصعووبه...بس والله اكدر اعيين نفسي يعني يمكن اروح اكعد عند خالتي صبريه واتعلم علئ الزرع والحليب والروبه واكيد هي ما تقصر وياي
هو انتفض بسرعه من حجيت هييج حسيت بي وكف واحتضن اكتافي وهزني بقوووه...مستحييل مستحييل شنو اخليج ترحين الصبريه هذا مو حجي انتي صار ساعه تحجين واني ساكت اريد اشوف وين توصلين
انتي ما تطلعيين من هذا البييت هذا البييت الح انتي وجهالج البيت ملكج والكل خطار عندج
بجيت بصوت مخنوك...بب بس باجر تجي شام ولازم هي تكعد بي هي تعرف بنتها ماتت لو لااا؟ واذا عرفت اني اخت كتال بنتها مراح تقبل بهيح شئ
مسح دموعي حيييل باطراف اصابعه حسيت انحسبت عيوني كد ما مسحهن بقوه وجر نفس كال...ما الج دخل بيها كتلج هذا البيت الج امتي وهي راح تكون بعيده عنج ...
هو جان واكف واني كاعده علئ السديه همست بحيره ورجفه واني احارب دموعي...بب بس
سحب راسي اله وخلاه علئ بطنه ما حضنته ولا رفعت اديه بس بجيت بصوت مخنوووك وانذباح...
هديت شويه وبعدها هو كال ...خلينه نطلع رضيه كل شويه تتصل وتعبت خطيه
نزلني من السديه ودنك حسيت خله نعالي قريب من رجليه ما شفت ولا كدرت اشوفه واني اتلمس برجليه اريد البسه هو لبسنياه
حسيت بايده تلبسني النعال بلعت ريكي بغصه وعضيت علئ شفايفي واني كلبي،يرجف من هل موقف والدموع احاربها وكل شويه ورفعت راسي للسكف حتئ ما تنزل دموعي...
عدل حجابي حسيت باصابعه الدافيه تضم خصلات شعري وتطخ بجبيني وبعدها لزم ايدي وطلعنه من المستسفئ...
ركبني بالسياره وكعدني بيها وشد حزام الامان عليه حسيت بي خله شئ علئ كصتي
رفعت ايدي وتحسستها باستغراب شفتها لصقه مال جروح اتذكرت البارحه انضربت من اجيت انام علئ الجربايه...
اتعصرني الالم وطغئ علئ روحي صرخت بداخل نفسي لا تحنننن عليه لا تحن فدوه ابوس رجلك لا تخليني اتعلق بيك
وانت مثل الگشه بس اتعلق بيك اغرك واعرف بيم مو اليه....
وصلنه للبيت نزلني ودخلني بحذر تلكتنه ماما رضيه واطفالي وهم محتضنين رجليه ويبوسون بيه وماما رضيه تحمدت الي بالسلامه...
كعدتني علئ القنفه وسوت الريوك شويه اكلت بس احس غاصه بالاكل وريكي مثل العلگم المر
كال ...اني رايح اذا محتاجين شئ خابروني واي شئ يصير بجولييت خابري يمه مو تنسين
مجتبئ رد عليه بغضب...انت تله اقلع برا اقلع برا ما قب البيت سنك الديج بس اسرد منه...
« انت كله تطلع برا تطلع برا وما تطب بالبيت جنك الديج بس تشرد منه »
هو ضحك بصوت عالي عليه وحسيت بي يبوس بي كله...غير جنت ويه امك راحت تجيب الكم نونو
سأله باستغراب...شداب وين نونو ماتووو ما دبتوو نونو ...« جذاب وين النونو ماكوو ماجبتو نونو »
رد عليه...لا شلون ما جبنه نونو جولييت وين النونو
ضحكت واشرت علئ بطني ...هنا النونو
رد عليه بعناد وغضب...شدابه سلون قب هنا « جذابه شلون طب هنا »
رمشت بعيوني وعقدت حواجبي...طاح حضك شنو هل سؤال
ضحك باستهزاء وبعدها رد بنبرة صوت حزينه ومذعور....سكيته انتي تليتي النونو؟ « جكليته انتي اكلتي النونو »
ضحكت بصوت عالي متناسيه حزني وضحكتي الرنانه تطرب بالبيت...اي اي عفيه اكلت النونو مو ما اشوف شنو كدامي اكل فديروا بالكم علئ رواحكم وديروا بالكم علئ الديج مالتكم لا اكلكم مثل ما اكلت النونو...ههههههههههه
ضحك جاسر وباسه...اي ديرو بالكم من امكم صايره تاكل الأخضر واليابس ويالله خلوني اروووح عندي شغل...
رد عليه...مااااا الوح اياك
جاسر ضحك كال...وين تروح وياي وانت نعالك تك وتك
مجتبئ بزعل...هدا روطي نعله ابووو اخد نعالي
وبعدها تكلم بجديه...بابا ماتو هدا روطي يدلي نعله ابوووت ممش نعله ابو الدييج
جاوبه جاسر ...ولكم عييب استحووو اني نفسي ابوكم ثنينكم لا تضيعون الحسبه عليه بعد لا واحد غلط علئ الثاني ازعل عليكم
مجتبئ بتبرير...اني سعليه هو مططه ما اتحي اقلط عتئ علئ سكيته ويعفهاااااا عييييل ...
وهي ابجي اهئ اهئ اهئ دوول داتر عليك روطي والله اهئ اهئ
حطيت ايدي علئ خدي واني ابتسم يااا عزا صدك مرات من يعضوني اجذب عليهم وهيج اكلهم وهم لواته شلون ما ينسون ويقلدوني....
ضل يحجي وياه انوب اجه مرتضى هو والديح مالته وخبص لامه خبص وشويه وهو جاسر خله وراح...
واني ضليت ملخبطه من بين تفكيري بس حاولت اصبر نفسي الي يصير خلي يصير واني املي بربي كبير ...
من زمان واني عايشه بتجاها معاكس ويه الكاسر بس دا اضوج من اي تصرف يسوي احسه عطف واني ما احب العطف من اي شخص
من زمان واني اضووج اشوف العطف بعيونهم وشام اجت بوقت اني مكسوره بي وضريره لو ما الصار بسبب نوال يمكن كنت اقوئ واكدر اواجهه...
...........................
حازم..
جنه طالعين برا بفلندا والمطر جان غزير والجوو بارد حييل بس جنه لابسين كل واحد بينه قمصله جلد من هاي القويه وشمسيه جنه هسه راجعين من المعهد تعلم اللغة...
عاصم جر نفس وهو يجر بعكازته كال...حازم احنه لازم نسوي شئ يعني الي متئ اختنا تضل عند ذاك العار...
لك والله كلبي،مجمر من وراه كل حيوان ضربني وخلاني اعرج وحالتي حاله حتئ استحي امشئ
حلفت والله اله اكسره كسر باختي واجيبها وغصبا عنه اني عاصم وهو جاسر ونشوف منو الرجال بينه
غمضت عيوني باسئ...بس يا عاصم من وراك هشام اجه يموت وانضرب بيده من دخل بيت جاسر
رد عليه بعدم مبالاة...اي لان واحد غبي وحمار اكو واحد يسوي،سوايته هو وذاك الثاني غلط يدخلون البيته
انت احمد ربك جاسر الحيوان ما مخلي كاميرات بالبيت جان طاح حضنه تردي لو ما تدري
هم لو عندهم عقل جان فكروا يخطفوا من اي مكان مو يدخلون الها للبيت
بس بسييطه اخذها من جاسر اخذها وعيونه تشووف لو اعرف ابييع روحي اله اجيبها منه واطيح حضه واحرگ كلبه عليها...
وكفت وضربته علئ صدره.. اهااا يعني انت ما هامتك اختك بس المهم تحرك كلب جاسر عليها...
دفعني بغضب...شلووون ما هامتني لك هاي اختي صارت عميه بسبب هل كلب الحيوان وبعديين احنه شنو مو زلم وهذا يجرم باختنا ...
ضحكت باستهزاء. لا هسه تذكرنا احنه زلم بس من عفناها من قبل جنه نسوان مووو ؟
وبعدين تعال عاصم جولييت بسببنا احنه تزوجت من جاسر وبسببنا احنا انضلمت ولك انت لو شفتها شلون من اجت خلصتني من قبضة الكاسر
شلون ترجف والدمعه بعينها وخدها مشوهه من راشديته ...
باوع للسماء وبعدها باوعلي بانتقام...اي عار ادري بي جان يضربها وياذيها كل شئ جان يوصل من هاله ومن امها وحتئ من سحر اختهن...
بس ميخالف لطلع كل هذا من عيونه واخلي يبجي عليها دم...
ارجف بغض وهو عاقد حواجبه . وبعدين تعال اكلك شنو دكول تزوجته بسببنا ترئ ،تزوجته بسبب امي هي الي راحت وفزعته وخطب جولييت
تنهدت بضيق...اتزوجته مجبوره وهو نقذها منه ومن ضلمنه احنه لو ما هو جان موتناها تتذكر اتهام هشام الها من كال احمد يكول جانت تروح وياي بالشقق،
منو الي ثبت تهمتة هشام ومنو الي لزم احمد واحمد اعترف ان كل كلمة انطقت بحق جووولي غلط غلططط اني وياك ضلمناها ولحد الان ضالمينها
مشئ خطوتين وهو يحفر الارض بعكازته كال...اي ولازم نصحح اغلاطنه ونرجع اختنا النه...
انت تدري من بعد ما عماها شسوه ؟
باوعتله بحيره واستغراب...شسوه ؟
ضحك بسخريه وتنهد...ااااااه لك من بعد ما ضربها رجع مرته السوريه وخله اختي خدامه الها ههه
اردف وهو يعض اصبعه بقهر...خدامه للسوريه حتئ ينتقم منها ومني لان قتلت بنته شفت شكد مجرم وحقير
لزمته من ياخة القمصله واني متخبل من كلامه...انت تحجي صدك اختي عميه وخدامه لضرتها ؟ شلون هاي صايره
تنفس بقهر وجبروت...اييي اساليبه حقييره وهو مجرم وانت تعرفه شلون عصبي كل شئ يسووي بس لحتئ يغيضنه اختنا عنده اسييره
وهل اسيره عذبها وجرم بيها واحنه لازم نرجع الامانه لاصحابها...
ضربته بقبضة ايدي علئ صدره...منو كلك هل كلام ؟
زفر بتنهيده طووويله...سحر بنت عمي ابو هشام وسالت عمي عن رجوع مرته السوريه وكال الخبر صحيح...
فركت اديه من شدة البرد ورديت علية بغضب...يعني خلصنه من هاله تطلع النه سحر
باوعلي بنظرات غريبه كال...سحر ما تجذب واني من سمعت الخبر من خالتي ام هشام اصريت اخابر سحر وخابرت عمي واكدو الخبر صحيح
نزلت دموع الالم والقهر علئ خدي معقووله عميه ويخليها خدامه المرته لهل درجه وصل بي الظلم
لزمت عاصم من صدره وهزيته بعنف واني ابجي بنهيار...جووووليت لازم ترجع لاااازم ما نخليها ما تصير اختي خدامه المرته وهي مريضه
دفعني وابتعد عني وهو يحك بلحيته...شهر شهرين سنه اجيبها اجيبها والله وروح ابوووي اجيبها وما اخليها لو اعرف ادفع الثمن حياتي
ضل يتصل واني رجعت للبيت والدمع اختلط ويه مي المطر دخلت للبيت لكيت امي نايمه مريضه وبس تبجي وتريد ترجع وعاصم ما يخليها...
........................................
وقار....
وكفت واني ابجي ودموعي تنزل بحييره جابر ما اعرف شبي وردة فعلة حييل قاسيه ويايه
واكوله اني مو قصدي بس هو ابد ما اهتم ودفعني واهاني والله ابد اني وياه مل متراهميين وحيل ما يحترمني ويشككني بنفسي
ضليت تقريبا يومين علئ هل حال والدمعه تشكي حالي بعدها خابرت علئ جاسر بعد ما شفت جابر ما طيب خاطري...
اجاني صوته الحاد كال...الووو هااا وقار شلونج
بجيت بصوت متعوب وهو تخبل كال...خيير وقار وقار شبيج منو وياج
بلعت ريكي وشهكت بدموع...جابر جابر يغلط عليه وزعلني ورزلني والله تعبت متت منه
هو رد عليه بتوتر وارتباك وغضب مفرط...ليييش رزلج شمسويه ويرزلج وعلئ شنو
مسحت دموعي ورديت عليه...لان جبت السوريات واجيتكم
جاوب باندهاش...وليش يرزلج هو شدخله بيهن ؟
شهكت بدموع حايره...يكول خربتي بيت اخووج وضل يغلط عليه وصار يومين زعلان
رد بعنف...وهو شدخله ببيت اخوج باعي اني هسه جايج اخذج البيتي حضري نفسج
قفل الخط واني حضرت نفسي وابجي دخل جابر وهو مطنكر باوعلي،باستغراب كال.انتي شجاي تسوين
بلعت ريكي ورديت عليه...ماكوو شئ بس اريد اروح الاهلي
باوعلي من فوك ليجوه كال...وليش بالله ترحين لاهلج زعلانه لو شنو يعني مثل انتي،يحق الج تزعلين ...
مجاوبته ولا رديت عليه تجاهلته وضليت اجمع بملابسي كال...اذا طلعتي اطلكج
جريت نفس...طلك عادي اصلا انت تريدها من الله وانت دومك هيج اناني وما تحب بس روحك
لبست صايتي وحجابي وطلعت واني شايله جنطتي..
هو سحبني من ايدي اول ما وصلت للكليدور وهو يمشي وراي وبعدها وصلت للحديقه ودارني عليه بعنف...انتي مستهتره حييل ومحد مربيج
صرخت بوجهه...لا متربيه واحسن منك انت تريد بس تتعارك وياي وتريد بس تسبب مشكله واني ما اتحمل
اشر علئ نفسه بعصبية وقهر...اني اني اريد مشاكل مووو ماكو غيرج ام المشاكل وانتي وحده صلفه وما عندج تربيه لان الما تمشي بشور زوجها اي تربيه ما عندي
دفعته بغضب وصحت بوجهه...لا تحجي بالتربيه اصلا انت الما عندك تربيه وانت تشكك الواحد بيك اكرهك والله اكرهك لان انت عينك نكسه
ما حسيت اله براشدي شوهه ملامح وجهي حطيت ايدي علئ خدي ودخل جاسر شافه من ضربني ...
اجت عمتي تركض وعمو ما جان موجود جاسر هجم علئ جابر ودفعه من صدره بعنف وصاح بيه بغضب....لييييش تضربها ؟
رد عليه جابر....هااااا هي هي اللسانها طوووويل ما تحترم ما عندها تربيه
عاد هو جاسر جابه ببوكس وكعه من طوووله واني لزمته وعمتي لزمته وهي تصييح...يممممه يمممه اسم الله كوولو يالله يمه وليدي جابر
جاسر ضل يتهدد عليه ويغلط...ولك كلب حيووووان انت منو وتحجي بتربية اختي والله اليوم امدك بالكاع يا حيوووان
جابر وكف وهو يمسح الدم من خشمه ويباوعله بغضب ...
وجاسر يصييح...يا عديم التربيه والله اليوم امووته والله عوووفيني...جنه لازمينه اني وعمتي
انوب اني ضليت الطم علئ وجهي عزا العزاني شسويت شصخمت والله مصيبه شلون اخابر جاسر واعرف بي عصبي...
الحمد لله دخل عمو وشاف العركه كابه وجاسر يتهدد عمتي لازمته وتتوسل بي
لزمه عمي بغضب...خيير بويه جاسر شكوو شصاير ليش هاجم علينه مو حلوه منك واحنه بيت عمك
صرخ بوجهه عمي بغضب...مو حلوه مني مووو بس حلوه من ابنك يضرب اختي ويكول عليها ما عندها تربيه شبيها اختي وما عندها تربيه
خلي يكللنه شافها ويه واحد لو ما حفظت شرفه لو طلعت من دون علمه هي الماعندها تربيه شنووو ؟؟
عمي باوع الجابر بغضب و وعيد ورجع باوع الجاسر كله...بويه علئ كيفك والله علئ هاي كلمته اني بيدي اطيح حضه شلون يحجي بتربية بنت مهيوب يضربها...
ورجع لزم ايد جاسر ورد عليه بتوسل...ادخل بويه ادخل وانتي بويه ادخلي وخلونه نتفاهم ونراضيكم
هو سحب ايده من ايد عمي بقسوه ويباوع الجابر بغضب كله....لاااا ما ادخل ولك جاااابر ذييج اختك ريهام مخلينها علئ روسنه ومحد يكلها علئ عينج حاجب ومقدرينها ومحترمينها وانت هيج تعامل اختي
بسييطه بسييطه والله والله وروح ابوووي اطلكها منك وثاني يوم ازوجها لاحسن واحد وكووول جاسر ما كال...
عمي لزمه بقسوه...علئ كيفك بويه لا تسويها قصه ترئ هم عايلة بيت ما بيها شئ اذا تعاركو مصارين البطن تتعارك وانت شكد جانت عندك مشاكل ويه ام مرتضئ...
رد علئ عمي بجمود...عوف ام مرتضئ علئ،صفحه بس هذا جابر علئ كل شئ وحاسبها واذاها اني مو تارك اختي وراي
انت شدخلك اذا جابت السوريات او لا انت شدخلك اذا حجت علئ مرتي او لاااا ليش هلكد مركز بحياتي وتحارب اختي
اني جاي ومشتكي عندك ولك اختي بسببك طرحت طفلها لان وصلت الي الكلام النقلته الها هاله
اريد افهم شغله وحده انت شدخلك ليش تتدخل بحياتي ليش تخليني اذبحك بيدي ...
لا تصيير فضولي ولا تخلصها عليه اختي ام مرتصئ ام مرتضى لا اختك ولا بنت عمك ومو من حقك تحاسب اختي لخاطر زوجتي
ترئ عاي زايده منك واني ساكتلك هووواي سكتت عنك هووواي يا جابر
اخذت مرتي وما رجعتها واخذتها لديالئ وهي طفله واحد غيرك جابها للشيخ وخليتها امانه عنده مو تبعدها عني...
ضميت عني موت عاصم ورحت ساعدته وكلت ميخالف انوب تجي تكفخ باختي وتحجي بتربيتها انت شتريد بالضبط ليش تخليني احجي بالقلم العريض...
عمي جاوبه بذهول...شقصدك هو يحب جولييت
رد عليه جاسر بكل غضب واعصاب مثل البركان...يخسئئئ والله موته علئ ايدي لو مجرد يفكر تفكير لو تسول اله نفسه ما رايد روحه والله
وكله خله يحترم نفسه وخلي النفس عليه راضيه وحنيته علئ ام مرتضئ ما نريدها مو بحاجة نحيته وعطفه
سحب ايدي المعاقه وشال الجنطه شمر الجنطه واني صعدت بالصدر واخذت الطريق كله ابجي
زفر نفسه بضيق ورد عليه بحنان...خلي،يولي لا تبجين والله اله اخلي يتمناج وما يلكاج...
وصلنه للبيت مالت اخويه دخلت خطيه الجهال فرحوا بيه وسلمت علئ جولييت وكعدت سالتني شكو واني خرطت الاول والتالي وضليت ابجي
كالت بتنهيده...مو من حقه يحاسبج اول وتالي ترجع شام ما دام دخل للعراق اكيد تجي ومن حقها ...
ضليت كاعده يمهم واسولف الها وهي جانت عاديه ممبينه ضايجه تكابر للاسف وتضحك وتسولف عادي عندها...
وجاسر طلع برا البيت بس،قبل لا يطلع احتضن وجهها الناعم بكفوف اديه وهي رفعت عيونها اله بعشوائيه وهي ما تعرف وين توجهه نظرها...
كلها بحنية...اجيبلج شئ وياي محتاجه شئ ؟
هزت راسها بنفي بس شفت اطراف اديها ترجف من لمساته وعصرت طرف القنفه وهي تداري نفسها ...
تنهدت بضيق اجيت ابجي اني والله مو قصدي اجيبهن واجي والله بس ما ادري حسيت نفسي غبيه شلون استغلتني ياسمين.
انتبهت علئ صوته وهو يكول...وقار محتاجه شئ اجيبلج...؟
جاوبته ببتسامه حزينه...لا لا مشكور ما اريد شئ...
هو خله وراح وشويه ودخل مرتضئ،وهو شايل الديج والنعال تك وتك والحلك احمممر يجنن ومتعصب طلع من الغرفه كلها...يمااااااا يماااااا
ضحكت...يااا عزا يصيح يمممه شبي؟ ههههه
ردت عليه جوليت بضحكه..اي جعفر معلمهم يكولهم الزلمه هيج يحجي ههه
تقرب منها وشمر روحه عليها والديج طفر من ايده هو باوع للديج..تعال عبيبي ما عفك سكيته اني ادر اعفها...« ما تعضك جكليته اني اعضها »
كرص خدودها وهو مكزكز علئ اسنانه الناعمه ولازمها حييل من خدودها...ايه عبابا سكيته عباباااا ما تعف اعنه عفها عييل هي ما تعف...
هي ضحكت وحضنته واجه مشمش شايل قوطية الحليب هم هسه كبار ولحد الان يشربون حليب يحبونه
هز راسه بعصبية....يماااا علطت عوطية العليب من ادي ابوت داتر دليله يديب عليبه انه اني رطاوي ...
يمه خلصت قوطية الحليب من ايجي ابوج جاسر كليله يجيب حليبه النه اني ورضاوي
اشرت علئ عيونها. اي يمه ادللو من يجي اكله او روحو خابروا من رضيه وكلوله
عاد هم ما صدكوا ركضوا خابروا ويحجون وياه وهو اخويه صدك مهموم بس خلگه طويل وياهم
ويلعبون وخابصين الجووو والديج خطيه مظلوم بنصهم يجبروا اله تاكل اله انمشطك تعال اسبح اخر شئ لبسوا شيلة رضيه متت ضحك عليهم
انوب خطيه اخذته منهم ونومتهم وهو شمرته بالحديقه انطلق يمشي براحته ورافع خشمه ...
............................
ريهام...
سمعت وقار زعلانه وعند بيت جاسر كووولش ضجت وسمعت جاسر ضارب اخويه
اني كووولش احب جاسر واحترمه حييل فما حبيت احجي بالموضوع ابد وكلت هم بينهم يحلوها هم ولد عم وان شاء الله ما بينهم شئ،
وسجئ تفتر عليه هو اخووج شبي هيج يحجي ويه عمو وليش ضرب عمه اشو انتي مدلله دلال وتداومين كليه وعمه خدامه مخلينها عدكم
جان استحيتوا علئ نفسكم ما يغزر بيكم ابد
جاوبتها بهدوء....حبيبتي هم عائلة بيت مو من حقج تتدخلين ولا تثيرين نار الفتنه لان الفتنه اشد من القتل
اذا انتي تحبين عمج وعمتج فحاولي تكونين منصفه وتهدين النفوس بدل ما تشعلينها...
هزت ايدها اني وين احجي وانتي وين اي،بس الادي بالنار مو مثل الادي بالمي وانتي مرتاحه مو مثل عمه المسكينه...
عفتها تحجي الوحدها بس هي ماشيه عدل تنضف ومهتمه باخواتها وبيبتها من تطلبها تنفذ
بس ذيج شهيده متخبله رسمي مو صاحيه ساعه تجيها تنضف البيت وتسوي،يجنن وتحبني،وحتئ ما تقبل اغسل مواعين الغدا
وتجيها ساعه مسودنه تصيح وتغلط وتتجاوز...
والله ذاك اليوم باليل سودنته اجه جعفر يركض كال...هاي شهد تبجي بطنها توجعها رحنه نركض عليها لكيناها لازمه بطنها وتعصر بيها....يمممه راح اجيب يمممه يمممه الحكيلي
تفاجئت هي بعدها يعني مو مال تجيب لزمتها بخوف...حبيبتي شهووده شنوو شتحسين
لزمت بطني وهي تصررخ...طلللع طلللللللع طلللع يمه الحكيلي...
اني خفت لزمتها حييل وجعفر جاوبها باستغراب...هو منو الطلع ؟
ضربته امه علئ كتفه...ابنك مدري بنتك يحضي
هز ايده...اهووو والله بعد وكت علئ الطلعه شدعوه هلكد مستعجل
كلتله امه...ولك شيلها خلي ناخذها للمستشفئ ردت عليها وهي لازمه بطنها وتصرخ...لا خاله دخل دخخخخخل يمه يمه راح اموت
كلتلها خالتي ..هسه شنو تلعبين عليه دخل طلع شسالفه
تنهد جعفر...من هسه دايح وضال بكيفه ماله رداد
هي عصرت نفسها...يمه بطني رااااح اجييب يمممه جعفر جعفر راح اموووت ادفني بصف امي خابر ابوي يدليك
هو اخذ مخده ورد عليها..حطيت وياج بخت طميشه وان شاء الله لا تموتين ولا يصير بيج شئ
خله وراح وهي صاحت...ياااا عزا وين جاي تنام تعال يمعوود
هو عافها وراح وهي شويه وصارت زينه وهاي،سجيوه تخبث عليها دكلها...عندج طروح امي هيج وطرحت ولد
خبلتها انوب شو هاي ضلت تبجي يمه راح تموت بنتي يممه اخذتلها شويه وكالت عفيه ديري علئ ام بي سي فور متابعه سمر ومهند هو صح اعاده بس احبه
هزيت ايدي وخلينه ورحنه خالتي حجت ويه جعفر كلها يمه بالقران هاي مو صاحيه احسها مسحوره ساعاتها مو سوه
ساعه زينه وساعه مخبله
والله يمه ذاك اليوم كاعده بتلاثه باليل تبجي دكلي انت ما تحبني وتخابر ليل كله وانت سكير وانت مدري شنو وخابصه الدنيا عساس ما تدري جنت سكير
اني اتذكرت سجئ ترش وتسوي يجوز صدك مسويتلها لان فعلا البنيه مو صاحيه اببد مخبله رسمي هي مجانت هييج...
ثاني يوم اجتنه ام هاله هي وبنتها سحر هاله ما اجت
وسجئ لزمتهن وضلت تسولف عليهن جانت خالتي مو هنا بالسوك كلتلهن عمي جاسر رجع مرته السوريه وصايره مكاصب...
واني حييل مقهوره هذا عمو جعفر يكول جاسر شلون ثنين وحده سوريا ثلاثينيه والثانيه عشرينيه والعيون زرك
واني وجهه الطاوه اكبر مني بقرن وذيج شهيده بيها جني
ترئ هو مو من حقه يحجي علئ امي وعيب عليه اصلا...
ضجت من سولفت الهن عن رجوع شام وفعلا اني ضايجه علئ جولي اكثر لان والله شام ما اعرفها ولا اعرف ظروفها بس جولي خطيه شافت ايام وليالي صعبه بهل بيت ومن جاسر ومن اهله وما ارتاحت جنت اتمنئ الها السعاده...
الله يسعدها ويسعد شام ويريح جاسر يارب ويفك هل عقده من حياتهم....
...................................
وقار...
ضليت عند بيت اخويه اجت امي كالت امشي وياي هناك بس اني مقبلت خطيه هم بيت اخويه بحاجتي
عرفت جولي حامل حييل فرحت واهتميت بيها والله وهي شاهده...
وجاسر كل شويه و وصاني عليها يكول لا تخلينها الوحدها اخاف توكع او يصير بيها شئ وهي حامل وطفلها بخطر جولي امانتج
واني امشط شعرها وحتئ ابدل الها ان شاء الله ممقصره وياها ... بس انتبهت عليها تحب تختلي بروحها وتنام هواي ومن تختلي بروحها تضل تبجي
كالت بضحكه...اريد اغسل ملابس بالحووش اخلي الطشت واغسل شويه التهي
عاد اني ما قصرت اخذتها وخليت الطشت وام
نطيتها الملابس والتايت وضلت تغسل
ضحكت كلتلها...ذكرتيني بنانسي عجرم ...ههههههههههه
ضحكت كالت...اي اي حبيبي ائرب بص بص بص زعلان ازعل ازعل اه ونص ههههههه
سحبت ثوبها ورفعتها وفتحت زنجيل الثوب من صدرها...هييج جولي صرتي نانسي عجرم بجلالة قدرها
غطست ايدها بالمي المغف بالتايت...اي ههههه جانت صبريه دكول ناسيه عجرب. ههههه
هي دتغطي رجليها ودخل جاسر هي خطيه ما شافته ضل يباوع عليها بنظرات ما عرفت افسرها حزن علئ قهر اراده عشق بعيونه
اني كلت بمرح...هلا جاسر اجيت
هي خطيه ارتبكت وكفت وضلت تنكت بملابسها ولزمت الثوب من صدرها اجت توكع وهو صاح عليه بلهفه وخوف واضح علئ عيونه....الزميها
لزمتها بسرعه وسحبتها كالت بهمس...راح
ابتسمت ...اي راح
ضربتني علئ كتفي وكالت...شكد عيب هسه يكول شافت شام رجعت ضلت تشلتح بروحها ما يدري بيج انتي منحرفه
ضحكت...اي متشوفين جابر يكول بدون تربية
بهتت ملامحها كالت...لا والله ونعم من تربيج يجوز غلط الانسان ممعصوم
بعدها كعدنه اني وياها غسلنه الملابس ودخلنه جوه شفته من بعيد وهو بالصاله يخابر ويحجي بهمه وعصبية وهو يكلها...انتي بس افهمييني ترئ والله عذبتيني هسه بس كولي انتي ويين
سكت ثواني وكلها...اييي ميته صح
بسرعه باوع النه وهو الموبايل لحد الان باذنه ضل ينتقل بنظراته اليه والجولي واني لازمتها
وبعدها اشاح بنظره عنه وهو يكلها...الووو الووو احجي وين رحتي
باوعت الجولي انخطف لونها وشحب وجهه فجاة بلعت ريكها واني جبتها وكعدتها علئ القنفه بالصاله
وهو ضل يفتر بالصاله واصابعه تثور بين لحظه والثانية وكل شويه وفرك جبينه بتوتر...
ضلينه تقريبا ساعه واندك الباب راحت امي رضيه فتحت الباب وما نشوووف اله الهجوم ورضيه تصيح...اوكفي انتي شلووون هييج تدخلين
وهي تفادت رضيه ودخلت تصيح هي وياسمين و وياها مره كبيره تشبهها وتصيح...لك ويييينك والله انا اليوم انتقم منكم ويينكن..
توسطت الصاله جانت شابه بعمر التلاثين سنه اكثر اقل ما اعرض صاحبة انوثه بارزه ومعاني حاااده تدل علئ قوة شخصيتها
وكفت جولي وهي تتلمس بالاثاث اليمها
وجاسر باوع الشام وهو عاقد حواجبه و وجهه محتقن بلع ريكه وتنفسه صعد عبالك الاوكسجين انكطع
هجمت عليه وهي تضرب بي بكل عنف وتصرخ وهو يتفاده ضرباتها الضعيفه ....بدييييييي بنتي بديييي بنتي هلااااا بتجيب الي بنتي
قيد مقاومتها وسحب اديها بقسوه وهي لحد الان تحت تاثير ثورتها العارمه وهو جان موقفه ضعيف كدامها وحقه وين بنتها عنها...
حاولت تفلت من تقده الها ودارت ضهرها وهي تصررخ بصوت هز اركان البيت...اتركنييييي اتركنيييي يا ظالم لا يوفئك الله ينتقم منك
حط ايده علئ شفايفها وهو يمنع صريخها ورد عليها بحمود...اشششش اسكتي اهدي خليني افهمج
بعدت ايده من شفايفها وهو جان محتضن بطنها وضهرها بصدره صرخت بنحيب ...ما بدي افهم شئئئئ ما بدي اتلتني والله اني متت متتت كانوا يقولوا بنتك ماتت هيك فهمنا من اختو وكنت اكزب كلامن قالو تجوز ونساكي قلت لااااا جاسر ما بيعملها بيحبني
وطلعوا هم الصادئين وانا الكزابه ايييي انا كزااابه تجوزت ما سالت عني انا يلي كنت مسجووونه ظلم بسجون لبنان...انا يلي كنت رايحه لاجئه هيك بيصير فيه
ابتعدت عنه ورفعت ايدها بتهديد ...بكرهككك بكرهككك كتير ائول ميين قتل بنتي وانا اقتلو باديه هدووول واشرب من دمووو
لان انت باين دم بنتك عندك رخييص لهيك ما عاد تهتم متجوز وعندك اولاد
صرخ بيها بصوووت عالي وزمجر بغضب شديد.... اسكتتتتتي لا تهيجييين الموووواجع دم غزل عمرررره ما صار رخييص غزل ليلي ما نمته من وراها كله واني محتار شلون احاسب الجاني
هجرتهم شردتهم حركت بيوتهم وما هدالي بااال كتلته ورميته وموته وما ماااات ولحد الان جمرتها ما انطفت
دك علئ صدره بغضب...اني انييي الشفتع وكعت وماتت كدامي انييي الدفنتهل بيدي وجنت كل يوم انام علئ كبرها...
اني ابووو غزل المحد داوه جرحي بغزل غيرها جايه تحاسبيني هسه ؟
لج اني ابوووي واخووي وبنتي ماتووو كلهم بيوم واحد عشت تلث صدمات محد عااااش مثلي....
رفع اديه بعنف وبعدها تقرب منها ولزم اكتافها وهي تبجي هزها بعصبية....ولج انييي انيييي جااااسر بيوم الماتت حطيت المسدس براسي وكلت انتهت حياتك يا جاسر روووح وره احبابك وموووت
هز راسه بحزن واسئ بحزن راودني طيف الغاليه وهو يكلي...لا بابا لا تظلم نفسك اصببر
هي جانت تباوع الملامحه وتبجي وحضنته بدون سابق انذار وبجت علئ صدره
رفع اديه واحتضنها وهي ضلت تشهك بصوت عالي....
اباوع الهم واباوع الجولييت حطيت ايدي علئ صدرها حسيت كلبي صار رماد من كثر خفقانه حسيت بيها من شحوبها ومن دمعتها النازله علئ خدها وشاكيه الهم بداخلها
همست شام بعذاب...سمعت يلي قتل بنتي هو اخو مرتك مو هيك
هو جر نفس وباوع الجولييا الي وجهه انخطف اول ما ذكرت اخوها شام ولزمتني وعصرتني حييل ضل مركز بيها ومجاوب شام
وهي حطت ايدها علئ وجهه ودارته الها عضت شفايفها بقهر وتكلمت بقهر...لا تتطلع فيها اخوها مو هييك
هز راسه بأي بس بدون ما يباوعلها...
بلعت ريكها بحسره وكلتله بدموع غزيزه...لكان طلئها ارمي عليها يمين الطلاق...
نهاية البارت...يتبع
كونوا انتم كونوا بخير...احبكم 💔
نور سمو العراق 😘
لا تنسوا التصويت و المشاركه بكم نكتمل 🌹
بنات رجاءا لا تغلطون علئ شام راعوا السوريين متابعين ويانه هي هماتين شام مظلومه وعانت كثير ميصير تتهمونها بدون ما تفهمون ناس تتهمها بشرفها ناس باموتها ميصير هيج انتو شنو الفهمتوا ترئ لحد الان بس مقتطفات عن حياتها...
حبابات عيب والله انا دا اخجل منهم حتئ من البدايه من عرفت القصه تدور حول بلد ثاني ما قبلت اكتبها لان ما ردت اتفاشل مع البلد السوري بس لان القصه حلوه كتبتها وان شاء الله اكملها علئ اتم وجهه...
وشغله ثانيا اختصر بالاحداث لو اخذ راحتي هي هاي اخر محطه بالرواية 😘
تصاميم رائعه من ابداع رزان من ادمونات كروب ورود وفراشات بالفيس😍
غلاف مت ابداع طلحه اكيد 😍
فقرة الصور ايضا الطلحه 🌹🌹🌹
عيني العراقيين احبكم كووومه لا تغاروون 😁
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!