رواية #جوليت وأسرها.... الفصل الثالث عشر 13 - بقلم الكاتبه سمو العراق

البارت التاسع

رواية..جولييت واسرها...غياهب الإنتقام
بقلمي..نور سمو العراق...

💔💔💔💔💔💔💔💔💔💔

اوجعتني الطعنات ممن وثقت بهم
واكتشفت ان الوحده اجمل......
وان الصمت ارقى...وان الكتمان
يحفظ الكبرياء حتى لو قتلني

................................

تنفست بضيق...جولييت صبري شووويه هسه الوضع ممستقر

وكع الموبايل من ايدي علئ الصوت الغاضب الي اجاني بصدمة...جولييت عندك؟

درت وجهي برهبه جبيره حطيت ايدي علئ صدري ودنكت اخذ الموبايل...

تقربت مني وهي تضربني بغضب علئ صدري بقبضة ايدها ومن بين اسنانها...احجي ولك شصخمت شلون مرت ابت عمك عندك احجييي...

حطيت ايدي علئ شفايفها بانصعاق وتاتئته..يمممه اسكتي كووولي يالله لا تفضحينه ونروح بيها بشربة مي..

سحبت نفسها بغضب وطلعت ريهام من گن الدجاج تباوعلي بحييرة وخووف...

حطيت ايدي علئ راسي شلون ورطه امي وريهام ..وهاي ريهام متعرف تجذب اخاف واحد يسألها وتعترف عليه

ريهام باستغراب وهي شايله الجدر الي،بي تمن...شكووو؟

امي عاطت بيها...روحي ادخلي جووه ماكو شئ

راحت ريهام وهي تعثر بخطواتها وتستغفر...

عقدت حواجبها بغضب..احجي ولك شصخمت شعندك ويه زوجة جاسر

تقربت منها واني اتلفت للمكان ...يمممه اسكتي لا احد يجي بعدين افهمج كلشي...لا تحكمين من البدايه وشوفي بيتنه متروس ناس وجاسر موجود يمه لا تبلينه...

هزت راسها بغضب شديد...يصير خييير ..

لزمتها بتوسل...يمممه بروح الحسين لا تحجين اي شئ افهمج وبعدها تصرفي

جرت نفس..ما راح احجي بس اريد افتهم السالفه منك بعدين

تركتني وراحت ...

اخذت الموبايل وطلعت بره صعدت بسيارتي،وقفلتها....

لكيت جولييت متصله علئ الواتساب وعلئ الفايبر وحتئ علئ الرصيد...

دزيت الها رساله كتبت اني جابر لا تخافين جكليت..من اكتب جكليت هي تتطمن اني،جابر..

فتحت خط وهي تبجي كالت بخوف...منووو العرف بيه عندك

جاوبتها بضحكه واني اطمنها...لا تخافين هاي امي وفهمتها ان هي فاهمه غلط ..

ردت بترقب ورعب...يعني ما عرفت

جريت نفس ...لا معرفت وبعد لا تتصلين اني اتصل عليج جان جاسر بصفي وانتي اتصلي حتئ الموبايل من الربكه بدل ما افتح خط فتحت مايك

جرت نفس حزين كالت...جابر اريد تسويلي فيس اريد اراسل اخويه علئ حسابه بلكي ياخذني الامي

جاوبتها بتنهيده طويله...شوفي جولييت اني راسلته هووواي بس حسابه تعطل هو واخوج حازم اثنينهم عطلو كل حساباتهم بس،اذا تردين اسويلج فيس،عادي شويه اسويلج إيميل وباسوورد وارسله الج...انتي،بعدج فاتحه نت علئ الرصيد موو ؟

ردت بهدوء...اي فاتحه بيانات بلكي اكدر احصل حساباتهم الجديده...

زفرت بضيق...ديلا هسه اني راح اقفل الخط ومن افرغ اسويلج فيس ادللي

جرت نفس حزين وهمست...شكرا جابر والله لو ما انت جان اني ضعت ادري تعبتك هووايه واعرف صرت تضوج من اتصل بيك وحقك

ضحكت بتفاجئ...ههههه لا يابه ادللي صدك تحجين والله ما اضوج ولا اخاف بس اني طعنت ابن عمي وطعنت الكل اتمنئ اوصلج الامج بأمان حتئ اني ارتاح وانتي هم ترتاحين

همست بحزن...ان شاء الله...

ودعتها وقفلت الخط ...

رجعت دخلت لكيت الولد كلهم كاعدين وابوي بنصهم..

باوعلي جاسر ببتسامه مستهزئة...اتصالاتك كثرانه شنو صيده جديده...

ضحكت بتوتر...لا صديقي عنده مشكله ويريد احلها

رجع يدخن بشراهه...مبين صديقك مشاكله ما تخلص

حطيت الموبايل بصفي وابتسمت بتوتر...لا ان شاء الله خلصانه تعرف مشاكل الشغل وكذا وخطيه تكفلته

طفئ الجكاره بالنفاظه همس.. ونعم منك...خوش كفيل..

ابوووي جر نفس وهو يقبض علئ سبحته بأيمان فطري...اني اليوم عزمتكم ورايدكم بموضوع دام طلعت الاربعين خلونه نسولف. .

صلاح جاوبه باحترام...اي عمي احجي ومشكور علئ العزيمه...

جر نفس وكمل بزهد وهو يباوع الصلاح...الله يبارك بيك

واردف بهمه.....تعرفون الله سن علينه سنة الزواج وجعله امر شرعي واكمال لنص الدين...يا بويه المغزئ من كلامي هو...

انتم تعرفون فلاح مات وترك مرته وهي ما عليها زود شابه وحلوه فإني حبيت افتح وياكم موضوعها وطبعا بس تنزل حملها وتجيب بالسلامه احنه نرجع نفتح الموضوع ... 

والرسول يكول صلى الله عليه واله وسلم: (يا معشر الشّباب من استطاع منكم الباءة؛ فليتزوّج؛ فإنّه أغض للبصر، وأحصن للفرج).

يعني المقصد من كلامي هي راح تضل وياكم بالبيت وما تكدرون تغضون البصر عنها فلازم واحد منكم يتزوجها...

رد جعفر باستهزاء....اني بالنسبه اليه غاض البصر مستحيل اباوع لنويله جنها طاوه محتركه ...

جاوبه جاسر بعصبية..اكل تبن لك مهما يكون هي امانة اخونا المرحوم لو تحجيلك حجايه بيها خير لو تسكت...

ضحك باستهزاء...و شنو قابل شحجيت بس اني مستحيل اتزوج نوال تعرفوني اكرهه من زمان وحده منافقه وجذابه وكل ما حجت اني مو فتانه لا عمي انتي فنانه...

رجع كمل...اني ما اتحمل هيج مره جنها الناطق الرسمي مال البيت

وبعدين ابووي الله يرحمه مو خطبلي ريهام يعني لازم تعفوني من الزواج بيها لو شنو عمي تقبل اتزوج نويله علئ ريهام...؟

اني صدك ضجت شنو هل سكير يتزوج ريهام جنت منتظر رد ابويه ابوي كال...اني ريهام ما اجبرها علئ شئ اذا قبلت بيك مبروك عليك واذا مقبلت اني ما اجبرها...

رد جعفر..قبلت او ما قبلت الناطق الرسمي ما اتزوجها لو يجي ابووي من الكبور...

جاسر رجع طفئ الجكارة بالنفاضه اعتقد هاي عاشر جكارة...عمي عوفنا من جعفر وخلي الموضوع الوقته هسه مو حلوه نحجي بهيج موضوع...

صلاح بلع ريكه بتوتر...اني مستحيل اتزوج نوال ما اشوفها اله اختي ومرة اخوووي الله يخليكم لا تورطوني بيها...

رد جاسر...واني ما اتزوجها لو غزل تطلعلي من كبرها كافي عليه شام وذيج الكلبه بنت الكلب...

ابوي تعصب...جااا ياهو ليتزوجها انه..؟

جاوبه جعفر بجاوب اتمنيت اجيبه ببوكس اوكع سنونه بحلكه من كال...زوجها الجابر

فتحت عيوني مصدوم وكفت بهجوم...شنوو شنوو زوجة اخوكم وانت تلاثه ما لكيتو غيري يتزوجها شدخلني اني اتزوجها...

جاسر باوع الجعفر وهمس من بين اسنانه...انت عوود ليش ما تنلصم انوب ما يعرف يحجيله حجايه بيها خير

رد صلاح..شنو يتزوجها جابر هي منو يكول تقبل تزوج عندها تلث بنات والرابعه بالطريق وبنتها بعد كم سنه تصير شابه يعني ماله داعي لزواجها...

جر نفس ابووي..المره تريد الها رجال وشوفوها بس تجيب تضل تتزعل وتروح الاهلها وانتم امكم متعلقه ببنات فلاح ...يعني الله يساعدها اذا اخذتهن وراحت مو خسرت بس فلاح تخسر عائلة فلاح كلها...

جاسر مسح وجهه بتوتر...هسه خليها تجيب والله كريم

اجت امي جابت الجاي ضلو يشربون ابوي كال...اي جاسر بيت عم عاصم ما يعرفون مكان عاصم واهله

ارتشف من استكان الجاي شويه ورد بجمود ...والله شيخهم يكول بيت عمهم انهزموا بصفحه واهل عاصم الكلب بصفحه...

باوعله ابوووي بغموض...صدكتهم...

جاسر بهدوء...مو مهم اذا صدكت او لا لان مراح اتوصل النتيجه وماكو واحد يدليني علئ،عدوي اني اطلعه لو يدفن روحه بزاغور ..الزمن طوويل والثار بينه ...

توترت من كلامه وجريت نفس...يالله ان شاء الله تلكاهم وتاخذ من عيونهم وان شاء الله ربي يوكف وياك...

باوعلي وهو يرسم ابتسامه خبيثه ..لا تحجي باللغة السياسية لان هل اللغة تبين الجذاب صادق والمجرم محترم...

انصدمت من كلامه بس ما ناقشت وابوي همس...الله المعيين...

وكف بعد ما تنهد بجمود...اني رايح من تجون جيبو وياكم وقار واشو ؟

خله وطلع ...هم ضلو شوويه كاعدين وبعدها راحو اخذو البنات وريهام راحت وياهم لان وقار تحبها ومرتاحه الها...

ابوووي طلع خابره واحد من الشيوخ وطلع...

ضلينه بس اني وأمي...

اجت امي فلشت باب غرفتي وهي متعصبه فتحت الباب بفشله ...هاااا يمه

رد بغضب...ولك شمسوي احجي جولييت وينها رجعها لابن عمك لا اكول الابوك وخلي يذبحك مخلي الناس ناس تركع بناس وانت مثل حية التبن تكرص وتضم راسك...

ليش ما تنطيهم البنيه وبعدين شلون عندك حرام وعيب رجعها لا اروح اكللهم

تنهدت بضيق...يمه ما ارجعها اني وعدتها اوصلها الاهلها ولازم ارجعها الامها...

صرخت بوجهي بعصبية...هي ويين امها ولك مصخم ولك شكول شحجي كلي وينها وخلي اني ارجعها

مسحت وجهي بتوتر...يمه البنيه سلمت الناس وهل ناس امينين مو عندي والله من اول يوم مو عندي

جرت نفس وحطت ايدها علئ كتفي وهي تفح من العصبية...يمممه جابر الشيطان ما مات واذا البنيه عندك رجعها هي حليوة وصغيره اخاف توكع بالغلط وتروح بيها

عقدت حواجبي باستغراب...شنو يمه لهل درجه ما عندج ثقه بيه لهل درجه اني نذل بعينج كتلج والله ليلة وحده ما ضلت عندي اخذتها بمكان امين وراحت بس هي تريد امها واني ادور عن امها

واذا تردين روحي اعترفي عني وخلي يدفنوني بالفتحه الخامسه وانتي البسي اسود وضلي الطمي وكولي اني السبب بموت ابني اني كتلت ابني المظلوم...

صكت اسنانها ورجعت ضربتني بقبضة ايدها علئ صدري...ورطت نفسك ولك جااابر شيخلصك من ابن عمك ومن ابووك بعد ما الك شغل بيها ولا ترد علئ اتصالاتها عوفها تحتار بروحها ما يجي من وراها بس المشاكل. 

انصدمت من كلامها معقوله هاي امي هزيت راسي بنفي...صدك تحجين يممه خلي نفسج بمكان امها وخلي ريهام بمكانها لا سند ولا عوون وبنص الوحوش ومحد الها يمكن اني دعوة امها الصادقه لهذا السبب اني متحمس اساعدها وما متندم لان خطيه محد الها...

باوعتلي بحزن...يممه فدوه ارحمني هاي سالفتها مستعصية ما اريد اخسرك

والله گوة صرت عندي بالتواسيل وبالنذورة يالله خلفتك لا تفجعني بيك يا جابر...

بستها براسها.. يمه لا تخافين الله الحافظ...

جرت نفس...ونعم بالله بس يمه بعد مالك شغل فدوة اروح الطولك

ضحكت...لا شعندي قابل بس ديري بالج دكولين جابر هو الي هرب جولييت لان راح ينتقمون مني واني ما اعرف وين راحت بس بالبداية خليتها بمكان امين وبعدها كلتلهم ضيعوها مني اخاف يجبروني اعترف عنها...

نفخت بغضب وتركتني وراحت...

سديت الباب ورحت ردت اتصل بجولييت  بس بطلت لان الوقت متاخر وما حبيت ازعجها

نمت تعبان ومحتار هل مره امي لكفتني مره ثانيه منو يلكفني الله اليستر.......

............................

جولييت...

طلعت بالبستان واني اتنقل بين اشجاره الحلوه جان الجو شويه باارد...

كعدت كعده بتعب وضليت اقطف بالخضره واجمعها وسلك هماتين...

اشتهيت دوولمه اريد اسوويها بس اخاف صبريه متقبل مخلصتها عليه لحم وتشريب واني ما احب هيج...

سفطت الخضره كل نوع وحد ...

اجت صبريه تهف رابطه عبايتها علئ بطنها كعدت بصفي كالت...رحت علفت الهوووش انقهرت عليهن لا ياكلن ولا يشربن من مات الثور لحد هسه وهنه ما ياكلن حزنانات...

حقهن الثور عزيز ...والله لو ميت ابو اللول ولا ميت الثور ...

ابتسمت وخليت السلگ علئ صفحه باوعتلها...خاله هو ابو اللول ليش تزوج عليج

احتدت ملامحها مثل اسد مفترس كالت...هاي حسنه اخذته مني وحده كح...

ضلت تفشر وتغلط وتسب ...

استغربت واستحيت...هي وين تعرف ابو اللول

ضحكت وهي تاكل بالخضره وسخة...مرة اخوو حسينه ام الوصخ

سحبت الخضره من ايدها ...خاله مو زين كلها طين

جرتها مني بغضب..دجيبي كلها طيين...عووفيها تصفئ بالمعده

باوعتلها بحزن...اي خاله كملي يعني هو خانج واتزوج زوجة اخوو زين اخوو وين

رجعت تعلس بالخضره..اخو مات بحرب ايران وحسنه ضلت ارمله...

اربع سنين وهي يوميه جايه للبستان وكالت بعيارة...يااا اليوم جبت سمج وكلت هاي السميجه لابو اللول ...

وانه جنت علئ لاهيتي وفطرتي ما ادري بخبث حسنه ...

منا لمن اجت مرت اخوي ابو داوود وكالت ...ولج يصبرية ابو اللول تزوج عليج حسنه...

انه ما انقهرت بكد ما انقهرت علئ،ثوري الثاني باعه ابو اللول علئ ابو يشتري النه بستان ثاري طلع بايع ثوري ومعرس هو وحسنه ام الوصخ ...

عاد طردته هو وحسنه بس لهسه مقهورة علئ ثوري

بصراحه ..اني ما عندي،حظ بالثيران ...وحتئ قررت بعد ما اشتريهن واحد مات و واحد عرس بي ابو اللول الثور...

همست بقهر...الله يساعدج ..

باوعتلي وهو تورث بجكارتها...ههه خايبه شبيج انتي لو شايفته ابو اللول جااا غميتيني اني وحسنه كصير وكرشه جنه صرة زعلانة ...

ضحكت...خاله انتي ماعندج اطفال

عبست ملامحها...يييع هي بس وحده همزين ما خلفت من ابو اللول جان ضليت افتر بالكشافات ازوجهن...

ابتسمت.. ياااا ليش

سحبت من جكارتها كالت...خلفت ليالي جنها ابو اللول ...جان يدلعها لول وضلو يسمونه ابو اللول وانه هم جانو يسموني ام اللول

استغربت...لعد وينها ليالي

طفت جكارتها باصبعها بعد ما بللته بالعابها...تزوجت بالعمارة ما صدكت لكت الها رجل لا تسأل لا دكول جنها ماتت...

انه جنت اروح الها واروح محمله اخذ الملابس والحليب والجبن والصناديگ مال الفواكهه والخضره بس هي جلبة علئ ابوها ما يغزر بعينها...

وكعت مريضه ما صدك جذب اجتني وسألت عن حالي صار بيه سل و الاوادم دارتني ويخابروها دكول. ما اكدر اجي فروخي بالمدرسه

عاد تكاطعت انه وياها من خفت الشوفتها هي وابوها

انقهرت كعدت يمها وحضنتها...شلون الها نفس والله هسه اني ميته علئ امي اتمنئ عندي جناحات واطير الها والله كل يوم ابجي يالله انام من اتذكرها...

اني بنتج خاله وانتي ان شاء الله امي

حضنتي وجرت نفس...مو كل گلب گلب يجكليت الله يرجعج لحضن امج ويهدي زوجج عليج

رفعت ايدي بايمان...اميين...

لزمت وجهي وهي تباوعلي بحنية...كومي ادخلي جوه انتي حامل وجهج الحلوو ما اريد يغيره الهوه والجوو...

بجيت بنحيب همست واني بحضنها ..خاله تعبانه

جرت نفس وهي تشد بحضنها عليه ...يخسئ التعب يتگرب من عيونج الحلوة كومي يمه كوومي خلينه ندخل جووه ونسويلنه اكله ناكلها..

الله يفك اسرج ويريح بالج...

طلعنه من البستان نمشي اجه داوود يمشي باوعلنه وضحك بضحكه مليانه غل وخباثه

من شفته صرت وره صبرية بخووف...وهو عيونه تتفحصني بسخافه

جنت لابسه ثوب طوويل جوزي وفوكاه جاكيت مال صبريه اسوود وشال بنفسجي شئ ميشبه شئ ...

بس اني ما عندي ملابس وشتجيب صبريه البس وبارده لبست الجاكيت...

صبريه عاطت بوجهه...وخر يالفكر موتت الثور خطيتة بركبتك ان شاء الله بيوم القيامه ينطحك بلي ابالي...

هو ضحك وعيونه عليه...اي عمه عرفينه علئ الحلوه كل ما اكلج عرفينه عليها ما تقبلين ليش..

ردت بخبث...تاكل نعال الجيش ..

ولي من وجهي ولا تحجي وياي من اشوفك اتذكر ابو نفس العزيزة وشلون كتلته يا ظالم...

سبل عيونه بخدر...غير راد يكتل الحلوة..

عفست ملامها بقرف...خيبه كرهتني بالغزل جنك ابو اللول بشبابه ووويع..

سحبتني امشي جويليته امشي يموت ثوري الزين وتضل الغمان...

مشينه اني وياها وهو همس بعد ما عض شفته...وين ترحين الزمج الزمج ...

دارت صبرية وجهه عليه.. تلزمن ولك ابو الچعچ..«القذارة »..

رفعت ايدها بتهديد وغضب.. شوف ولك المسلوح اذا تقربت من جكليت افلش راسك بربد...

ضحك ...اووف صدك جكليت مايعه والخدود حمر الله يعين زوجها شلون جان متحمل كل هل جمال وليش تاركها والله راح اتخبل

رفعت ايدها بالدعاء وهي دكول...ياريتك مخبل وتركض وراك الجهال وتصيح هوو هوو مخبل وكون بالطابوك يفلشون هل الراس الما بي بس قلة الادب والفساد...

سحبتني ورحنه لبيت انقهرت حيل منه وخفت استحيت اكول الجابر وخفت اسبب اله مشاكل ويه ابن خاله...

رحت اسوي غدا...

اتذكرت مره نوال كالت...جاسر دوومه معاكس اهله بزواجه ...

هم ما قبلو يتزوج شام لان بغير دووله وهو اصر وتزوجها وسكن بسوريا الخاطره حتئ عمي مهيوب زعل عليه وقاطعه...

مو لان سوريه بس،يكول بغير دوله وغرب نفسه وراح كعد هناك ليش ما اخذ من ديرته

ومن ماتت شام وره كم سنه تزوجج وخالتج ما قبلت كلتله هاي بنت اختي وحده فاهيه وبارده ومنعوصه

وانت ينراد الك وحدك عشر نسوان وهاي اتعبك

وفلاح اييد كلامها

وكال بعدين هي خالتي معوقه واكيد تصير عندها وراثه من امها وابوها وتجيب الك كله معوقين. 

بس هو كلها...شنو هل حجي هاي خلقت الله وكاتبه يصير معوقين مو معوقين اني اريدها واريد اتزوجها...

بيومها حيل قهرتني وانقهرت علئ امي وابوية شلون هيج ابن اختها يحجي عنها...

امي رغم حالتها هي وابويه بس والله مو مبالغه الله عوضها واني واخواني لكل يشهد بجمالنه احلئ عوائلهم كلهم...

وامي دائما تفتخر بينه...

حتئ الجواريين يكلولها ...ام عاصم شنو هل طيور الحلوة الي مخلفتهم...

حطيت ايدي علئ بطني ..معقوله مثل مكال فلاح اني اخلف اطفال معاقيين..بس والله همه المعاقين بتفكيرهم يرحون فدوه الامي وابويه...

كملت الغدا ورحت تغديت اني وصبريه وهي حبتني وضلت تسولف عن شبابها ومغامراتها...

..........    ..................

ريهام...

الصبح جانت اشواق دتحضر نفسها دترجع لبيت عيالها ودتنتظر زوجها يجي عليها ، كمت اني غسلت مواعين الريوك ورتبت المطبخ ..

سمعنا صوت هورن مال سيارة ، طبت اشواق سلمت على الكل وطلعت ، جتي سلمت عليه ..
كالت حبيبتي رهومة ماوصيج بعد عمري ..

رديت عليها بنبرة مطمئنة : تدللين حبيبتي بدون ماتوصين والله ..

نزلت مستواها للكاع اخذت جنطتها وراحت ..

واني سديت باب المطبخ لفيت شالي ليوره وحطيت الدنبوس  وشكلت رداناتي وبلشت اطبخ ..
طلعت دجاج من الفريزر غسلتهم وخليتهم ع النار
حسيت شوي ضوجة ، خاصة هم خطية بعدهم ضايجين وحزنانين حتى كلامهم قليل كلش .

للثنعش اني مخلصة كل شي حتى البيت نظفته
والجدورة طفيت النار عليهم ..

وصار وقت اذان الظهر رحت اتوضى ..
باوعت وجيكت المكان ماكو أحد ..
نزعت شالي خليته على اكتافي وشكلت رداناتي حد العكس وفتحت المي دا اتوضى ..

توه دااغسل وجهي سمعت صوت رجولي خشن يسوي احم احم ..

رفعت راسي والتفتت شفته صلاح واكف
فتحت عيوني على اوسعها ونبضات قلبي تسارعت ..
ارتعش كل جسدي تحت نظراته .. بسرعة خليت شالي على راسي ونزلت رداناتي ظليت اتمتم بداخلي واستغفر ..

عفت المي مفتوح وطلعت من يم المغسلة واحس بعدها نظراته عليه تتفحصني ، اقشعر جسمي ، حضنت وجهي باديه ، احس بخدودي اشتعلت النيران بيها ، يربي شلون شافني شلوون ماانتبهت عليه ..

استغفر الله العظيم من كل ذنبٍ عظيم
ظليت اردد ..

دااصعد صارت بوجهي نوال مبتسمة بسخرية

باوعتلها باستغراب وبعدني اتمتم بالاستغفار ..

كالت شبيج انخضيتي خض وخدودج صارن عبالك طماطة ؟

قطبت حواجبي وحجيت بنبرة جافة ..
_ العفو منج بس شنو تقصدين ؟

تقربت مني اكثر وظلت تحجي بصوت مصرور ونظرات كلها حقد ..
_ شبيج معتي فد نوب لمن شفتي صلاح ؟ ليش نسيتي نفسج انت تره محجوزة لجعفر لو نسيتي هالشي يحلوة ؟اذكرج؟

وخرت مني بعد ما كالت هالكلام وترست إذني بي
ظليت اباوعلها مصدومة ..
وبنبرة مرتعشة ؛ العفو بس انت ليش دتكوليلي هالكلام شتقصدين .

بنظرة مستفزة وبنبرة استهزاء ؛ لا بالله تسوين نفسج متفتهمين لعد انت ليش هنا بالله وشمعنى انت هنا غير يردونج لجعفر يابه لو تسوين نفسج متدرين ؟

بلعت ريك وحجيت بتفهم مصطنع ؛ لا ادري وميحتاج تذكريني بي .

سمعت صوت صلاح يكح هي ركضت صعدت لغرفتها واني رجليه عبالك ثبتت بالكاع مااكدر اتحرك .

هو اجه بيده منشفه صغيرة ينشف اديه بيها
باوع بعيوني لحظات ، شحيت نظراتي منه .

اقترب ديريد يصعد واني اريد اتحرك مابيه
احتاريت حسيته ديريد يحجي ويايه مااعرف ليش اجاني هالاحساس ورغم هذا التافيت دااروح .

دااصعد وكفني صوته وهو يصيحني
-- ريهام ؟؟

التافيت بدون مااباوعله وانيى ساكتة ، كلماته الهادئة والرزنة وصلت اسماعي ..
_ العفو تره منتبهت عليج وانت دتغسلين .

لزكت نفسي بالحديد مال الدرج وجسمي رجع يرجف
وحلكي جف ..
جاوبته بتجهم ؛ لا وله يهمك ان شاءالله اخويه انت ..

باوعتله ثواني عكد حواجبه شحيت نظراتي
سمعته سعل .. صعدت فوك بسرعة

صعدت فوك ونبرته وهو يكول اسمي غزت اسماعي
عضيت على شفتي وبداخلي استغفر اريد ابعد هالافكار عني ، و اريد اطلع صوته من راسي .

واني على هذا الحال واحس وجهي حينفجر من شدة الحرارة ، سمعت صوت باب انفتحت ، التافيت شفتها
نوال ومن ملامحها مبينة معصبة تساءلت بداخلي
ياا شبيها هاي ؟

اجت يمي وبس تنفخ للحظة حسيت نفسي راح اطير ..

خلت ايدها على خصرها كالت اي شكالج صلاح .

ضوجتني كلش جاوبتها واني ادور صفح منها .

مكال شي

بنبرة اقرب للصياح شوون مكال مو سمعته ديحاجيج .

ها اي اعتذر لان فات ديغسل واني جنت دااتوضى ..

اي دكولي هيج ثاني شي لمن شفتيني صعدت ليش مااجيتي ورايه ؟

التفتت عليها بصبر مفقود ؛ انت لازمة عده وميصير يشوفج اني ليش اجي وراج بعد .

يمه يمه اي طلع اللسان طلع .

من رخصتج اروح اصلي .. عفتها تدردم
واني على هذا الحال واحس وجهي حينفجر من شدة الحرارة ، سمعت صوت باب انفتحت ، التافيت شفتها
نوال ومن ملامحها مبينة معصبة تساءلت بداخلي
ياا شبيها هاي ؟

اجت يمي وبس تنفخ للحظة حسيت نفسي راح اطير ..

خلت ايدها على خصرها كالت اي شكالج صلاح .

ضوجتني كلش جاوبتها واني ادور صفح منها .

مكال شي

بنبرة اقرب للصياح شوون مكال مو سمعته ديحاجيج .

ها اي اعتذر لان فات ديغسل واني جنت دااتوضى ..

اي دكولي هيج ثاني شي لمن شفتيني صعدت ليش مااجيتي ورايه ؟

التفتت عليها بصبر مفقود ؛ انت لازمة عده وميصير يشوفج اني ليش اجي وراج بعد .

يمه يمه اي طلع اللسان طلع .

من رخصتج اروح اصلي .. عفتها تدردم وخليت رحت يم وقار لبست عباية الصلاة وصليت..

.....................

فتحت عيوني واني نايمه علئ سرير الألم...

رفعت موبايلي شفتها الساعه بالثنتين ونص ...

بداية دخولنه للشتاء وخرت البرده من الشباك شفت المطر ينزل بغزارة...

ابتسمت بمرح...هلا بالشتا وبركته...

تجدد الفصل لكن ما تجدد شئ بحياتي بس الضجيج والخووف داخل صدري تجدد

وعيوني متحجي بس الحزن ضاله وحيده حايره باحزاني وكلبي محمل بالهموم ...

كاعده بهل غرفة الضلمة ما املك النفسي بس الدعاء...

همست بدعاء...يااارب اغسل گلبه من الحقد والانتقام وزول كل غيمة سووده من عقله ..ياارب ريح باله ولا تغضب عليه

حطيت وجهي بين اديه ورذاذ الدمع يتطافر من عيوني..يااربي اقضي حاجتي واسعدني...

ادري بروحي معذبته وكسرته من طلعت من دون علمه بس والله اني احببه واعرفه قاسي وبارد مثل برد الشتا

انهزمت وفضلت الانهزام لان خايفه منه بلحظه غضب يدمرني ويكسرني

صورته حلوة بنظري يااارب ما ردت تتشوه ...

طلعت بالحديقه فتحت ادييه وقطرات المطر ببلت وجهي وازاحت عني غبار الهم...

شهكت بصوت مسموع واختلطت دموعي المالحه ويه رذاذ المطر...

همست ببكاء واني المس بطني بنحيب...ياااربي احمي اهلي منه واحمي طفلي ..ساعدني خليني اولد بالسلامه

حسيت تبللت ملابسي واشتد عليه البرد...

رمشت بعيوني ...ان شاء الله يا كاسر المطر يغسل همك وين متكون ...

حطيت ايدي علئ حلكي واني ابجي.  والله مو قصدي اقهره والله جابر كال مقهور منج والله حيل مقهورة عليه مصيبته كبيرة محد يتحمل...الكاسر جبل ولحد الان ما وكع الله يعينه...

الله يرحم بنته واهله ويرحم مرته وين متكوون...

همست بانين مكسور وحزين.  بس اني مرتك والي حق عليك خلي الله بين عيونك وارحمني...

ما اجملها الفتاة⁦ ⁩🖤.....~
ان اذيتها بكت...~
وان اذتك بكت و بشدة

باوعت للمضمار شفت الحصان واكف بس مقفول عليه الباب الحديد تطمنت علئ حيوانات صبرية كلهم تمام ورجعت الغرفتي حسيت براحه شووية...

شفت صبريه نايمه علئ نفس نومتها كل عاده فاتحه رجليها واديها وتشخر ..وكصايبها كل كصيبة بصفحه...

ابتسمت عليها رغم قاسيه بس بنفس الوقت حنينه خطيه عندها قطعه قماش صح هي مال عجايز بس حلوه لونها نيلي وبيها نقطه بيضه...

ماخذتها ومخيطتها اليه هو هم صح خياط ابو الزخمتين ومابي اي شئ،يعني نفس موديل ثوبها

بس محبيت اكسر خاطرها انبهرت بي كدامها وبستها وتشكرت منها كلتلها ذوقج يجنن وهي فرحت حييل...

اخذته واخذت ملابس،داخليه رحت للحمام نزعت ملابسي وبدلت لان بردت حييل

شفت بطني كبرانه ومبين عليها استغربت احتمال طفلي كبير لان بطني ما شاء الله كبيره...

ضليت انشف بشعري ورجعت غطيت خالة صبرية..

كعدت علئ السرير تعبانه وثكيله حييل ...

مشطت شعري دا اضفر بي...وكفت اباوع للمراية مالة صبريه المكسور نصها...انتبهت وجهي حييل شاحب وصايره صفرة...

حطيت ايدي علئ اعلئ صدري واني المس الوحمه مالتي ببتسامه...

كوولشي بداخلي الكه ذكرئ حلوة وياة...

رجعت بذاكرتي من جنت عصفورة تحت جناحه..

طلعت من الحمام واني ارجف من البرد جنت لابسه ثوب قصير لونه فستقي فااااااتح ولافه شعري بالمنشفه...

شفته كاعد علئ الجربايه لابس تشيرت ابيض نص ردان ولابس بيجامه سوده وحاط لاب بحضنه وهو مركز بهمه بشغلة...

ابتسمت واني اباوع المنظره الجذاب..

كعدت قريب منه وضليت انشف بشعري اما هو جان مركز بشغله وعادم وجودي...

باوعلي بعدها وابتسم ابتسمت واني ارفع الثوب من صدري واغطي الوحمه

خله الاب توب علئ صفحه وسحب باكيت الجكاير ضل يدخن ابتسم بجمود كال..شبيج احسج ممرتاحه

رديت بخجل وفشله واني اعدل بالثوب ..لا بس،هذا الثوب ضوجني دلعته محلوه وكل شويه نازل اروح اغيره

حطيت رجلي علئ الارض دا انزل هو سحب ايدي واني درت وجهي عليه ضحك كال..وخلي ينزل شنو يعني؟

جاوبته بنفس منقطع ورهبه...مو هاي الوحمه تطلع واني ما احبه

عقد حواجبه بتساؤل...الي بصدرج ؟

سحبيت ايدي منه بتوتر...ايي هي محلوه عبالك جوزيه طووخ

سحبني قريب منه وهو يضحك لمسها بهدوء ...لا بالعكس كلش،حلوه عبالك لؤلؤة بنص محاره..

ابتسمت بهدوء وضليت ابلع بريكي خجلانه لزمت ايده وهو حس بيه استحيت...باسني بخدي وضم راسي الصدره

جان هذا الموقف قبل لا اكون زوجه فعلية اله

رجعت بذاكرتي علئ صوت المؤذن العذب المنغم باصداء الطبيعة..

ابتسمت علئ الصوت الايماني وهو صوت اذان الفجر...

نفضت عني الافكار السلبية وتأثيراتها وافتتحت يومي بصلاة على محمد وال محمد...

رحت توضيت وكعدت خالتي صبرية تكعد تصلي..

كعدت وهي تنفض النعاس من عيونها وكفت بهمه وفطره بديهيه راحت توضت واجت صلينه اني وياها...

كالت..يالله جوولي حظري غريضاتي اليوم اروح ابيع الحليب والكيمر والروبه هسه يجي عمير ابن كاظميه بالمطي والعربانه ياخذني...

رحت حظرت الگدورة مالت الروبه وصواني الكيمر ودبات الحليب ..

طلعتهن بره لزمت ظهري بوجع لسه السما متلبده بالغيوم وتمطر خفييف ...

شفت واحد اجه بحمار وعربانه وكف عند الباب وهو يصيح...صبرية صبرييية ام ليالي

باوعتله بخوف...هسه تجي هسه

كال...كليلها عامر ابن كاظميه منتظرج

رحت بسرعه الها لكيتها تلبس بجواريبها كلتلها..خاله اجه هذا العنده حمار مربوط بي عربايه وديصيح عليج كليلها عامر منتظرج

وكفت بهمه...هااا عمير اي اي اجييت.. وبعدين ولج الا متئ تضلين مايعه حمار شني كولي مطي ..

همست ...ان شاء الله ..مثل متردين مطي مطي

طلعت وبعدها رجعت عليه بخوف..شوفي جكليت اي واحد يدك الباب لا تفتحينه ولا تطلعين منا لمن اجي خوووش وداوود اذا اجه حتئ لا دكليله منوو..

وباعي خليتلج كيمر وجبن وزبد سويلج جاي وخبز تلكينه بالعلاكه وتريكي لا تموتين الفرخ من الجوع...

ابتسمت وهزيت راسي بقبول..

خليت ورجعت نمت بعد ما راحت هي ...وقفلت الباب الرئيسي عليه...

انتبهت علئ الشباك يتحرك شلون واحد يدفع بي ما اهتميت يمكن لان الجو بارد وهو هيج ديتحرك الشباك

رجعت راسي علئ مخدتي مخزن احزاني...

حسيت بحركه بالحديقه استغربت وصوت رجلين يمكن صبريه رجعت...

كعدت كعده حطيت ايدي علئ صدري بخووف منو الي يتجرء يدخل بيت صبرية غيرها...

باوعت للمقبض مالت الباب وهو يتحرك بلعت ريكي ولبست شالي ووكفت ..

ما حسيت اله الباب انفتح

انصدمت من شفته دخل وهو يرسم ابتسامه مثل سم الافعئ علئ شفايفه القذره...

صرخت بخوووف...اطلللع براا حييوان

طك ركبته بخبث وهو يعض شفته...الحيوان ما يطلع اله ياخذ الي يريده

شمرت عليه المخده واني اصررخ...جاااسر خااله جااااابر...

هجم عليه بخبث واني ارافس واصرخ...

نهاية البارت...يتبع

كونوا انتم كونوا بخير..احبكم 💔💔

نور سمو العراق..😘

لا تنسوا التصويت والمشاركة بكم نكتمل

تابعو هذي الكاتبة فضلا وليس امرا..HafsaHafsa710

التصميم للمبدعة...وئام الشيخلي snwn2231

فازو ويانه هذي التعليقات...البارت هديه الهم😍