تحميل رواية «جرايم مشروعة» PDF

ن

جريمة بدأت بفضيحة كبيرة.. دكتور نفسي مشهور بتتسرب من عنده بيانات المرضى.. واللي حرفيا مليانه كوارث

ستات معترفه بخيانه ازواجها.. اشخاص معترفه بجرايم قتل عملتها، وفضايح اسريه لعائلات كبيرة ليها اسمها وتاريخها

واكيد في حاله زي دي الدكتور النفسي بيتشطب من النقابة ده غير انه بيتعرض للمسائله القانونية

وبدأت توصل بلاغات ضد الدكتور اللي سرب البيانات، عشان تتحرك قوه من الشرطة عشان تقبض على الشخص ده، ولكن اول ما يدخلوا مكتبه بيلاقوه مقتول ولكن الصدمه مش في قتله وبس، الصدمه انه لما وصل رجاله الطب الشرعي وبدأ توقيع الفحص على الجثه، اتضح ان الجزء اللي فوق بس هو اللي يخص الدكتور.. ولكن الجزء اللي تحت يخص جثه تانيه خالص

....

انا المقدم منتصر مرزوق، كنت واقف قدام الجثه وانا محتار، هو ايه اللي يخلي واحد يقتل حد بالشكل ده؟!

ويا ترى الجثه التانيه دي جثه مين؟.. لغز كبير كنت عاجز عن حله لحد ما سمعت واحد من العساكر بيقول ان في جثه في غرفه الكهربا ولكن الجثه كانت النص الفوقاني بس.. وعرفت وقتها ان النص التحتاني اللي في جثة الدكتور يخص بتاع الامن، لكن الجزء التحتاني اللي يخص الدكتور ما لهوش اثر

طريقة قتل غريبة أول مرة أشوفها.. في الوقت ده وصل وكيل النيابة ايمن الشاطر واول ما شاف مسرح الجريمة كان مصدوم شوية واتكلم وقال

_ الشخص ده شكله بيتفرج على افلام اجنبي كتير، ايه طريقه القتل المبتكره اللي هو عاملها دي؟!

= انت بتتريق يا باشا؟!.. احنا هيطلع عينينا بسبب الموضوع ده عشان الجزء التحتاني من جثه الدكتور ملهاش اثر

_ واضح ان العياده بتاعته اتعرضت للسرقه، في شرايط كتير واقعه على الارض ومتكسره ده غير الاجهزه المفتوحه قدامنا واللي بتوضح ان في حد سرق الداتا وهو اللي سرب البيانات اللي بسببها كل الناس دي عملت محاضر في الدكتور

= منطقي، اكيد يعني مش الدكتور نفسه هو اللي سرب البيانات، واكيد الشخص اللي سربها لي مصلحه في كده

_ اكيد ليه مصلحه.. الدكتور حسن ابو اليزيد كان على علاقه بناس كبيره في الدولة.. وممكن يكون اللي حصل ده شغل مصالح وفي نفس الوقت لو الموضوع مجرد قتل وخلاص، فالقاتل مش هيستخدم طريقه القتل دي.. القاتل عاوز يوصلنا رسالة بس اكيد هنعرفها قدام

...

قربت انا ووكيل النيابة من الجثه اللي على الارض.. والدكتور كان بيفحصها واتكلم وقال

_الاتنين مقتولين بسكينة، القاتل دبحهم وواضح من طريقه الدبح، ان اللي عملها شخص متمرس مش اول مره يقتل او هنقول فاهم ازاي يمسك سلاح ويتعامل بيه.. ايده ثابته ومش بتتهز وده واضح جداً من خلال الجرح اللي في رقبة المجني عليهم.. وبعدها استخدم منشار كهربا حديث عشان يقطع بيه الجثث واستخدم ماده كاويه عشان الدم

= طيب وفي اثار مقاومه يا دكتور، هل في جروح في اجسامهم حاجه توضح او تفهمنا ان حصل شجار ما بينهم وما بين القاتل؟

_ لا.. مفيش اي حاجة تدل على ده، واضح ان القاتل باغتهم وهما كانوا مش مديين خوانة

...

وبعد ما خلصنا كلام مع دكتور الطب الشرعي، اللي قال ان بعد التشريح اكيد هتوضح حاجات تاني.. لقيت وكيل النيابة بيقولى

_ كلام الدكتور بياكد كلامي، واحد فاهم هو بيعمل ايه عارف يمسك سلاح ويتعامل بيه وايده ثابته ومش بتتهز، وبعد ما خلص عليهم استخدم منشار كهربا عشان يقطع الجثث وكان معاه ماده كاويه كمان عشان موضوع الدم.. تفتكر شخص زي ده بيشتغل ايه؟

= ممكن يكون دكتور؟

_ جايز.. وعموما انت اكيد هتعمل تحريات وهتوضح فيها كل حاجة وهبتدي التحقيق مع المشتبه فيهم

...

واحنا بنتكلم لقيت واحد من العساكر جايب سلسله وجاي ناحيتي، السلسله كان مكتوب عليها ليلى وكانت واقعه في مسرح الجريمة.. بصيت لوكيل النيابة وقولتله

_ ممكن تكون خيط مهم ويوصلنا لمين اللي عمل كده؟!

=معتقدش ان اللي عمل كده واحده ست، الجبروت ده مينفعش أبداً ست تعمله، ولو افترضت معاك القتل هستبعد خالص استخدام المنشار لتقطيع الجثث، ولكن ده ميمنعش ان انا لازم نعرف دي بتاعه مين؟!.. ويتحقق مع صاحبتها

...

وبعد ما خلص الرجالة شغلهم في مسرح الجريمة واترفعت البصمات واتجمعت الاحراز رجعت على مكتبي.. وبدأ الرائد ياسر تحرياته مع فريق البحث الجنائي عن الدكتور حسن ابو اليزيد

وخلال 24 ساعة كانت التحريات عندي وبدأ الرائد ياسر يتكلم ويقول

_ الدكتور حسن ابو اليزيد دكتور نفسي مشهور عنده 57 سنة، وكان بيدرس الطب النفسي في اوروبا ورجع مصر من 10 سنين ولكن للاسف سمعه الدكتور حسن بعد ما رجع مصر مكنتش افضل حاجة، هو ملهوش عداوات كتير.. ونقدر نقول ان اللي بينهم وبينه عداوة اتنين بس.. رجل الاعمال المعروف سليم ابو المجد وده كان مرشح قبل كده لعضويه مجلس الشعب.. وده اكتشف بالصدفه ان مراته بتتعالج عند الدكتور حسن وعرف انها قايله اسرار كتير للدكتور حسن وده العادي في شغل الطبيب النفسي، والعادي برضه ان الدكتور النفسي بيسجل الجلسات ودي الحاجه اللي رفضها سليم ابو المجد وراح للدكتور وطلب منه يحذف الجلسات دي ولكن الدكتور النفسي رفض وقال ان ده شغله ومستحيل يحذف حرف منه وانه مستحيل يسرب اي حاجه ولكن الكلام معجبش سليم ابو المجد واللي هدده يومها بالقتل قدام ناس كتير من المرضى النفسيين.. وده اللي خلى الدكتور حسن يعمل محضر وشهد معاه ما يقارب من 11 شخص

الشخص التاني اسمه يوسف عبد الرحمن.. يوسف كان مهندس كمبيوتر ومبرمج واللي سبب عداوه ما بينه وما بين الدكتور حسن هي اخت يوسف اللي كانت بتتعالج عند الدكتور حسن بعد وفاه والدتها، ولكن في يوم روحت لاخوها معيطة وقالت ان الدكتور حاول يقرب منها ولكن اللي قالته كان اصعب من كلمه يقرب منها، وقتها يوسف راح وحاول يتهجم على الدكتور حسن ولكن الامن منعه واتصلوا بالشرطة ووقتها اتحبس يوسف ولكن الدكتور حسن اتنازل عن المحضر، ومن يوم ما خرج وهو مختفي هو واخته والكلام ده من شهر تقريباً

...

بعد ما خلص الرائد ياسر قرايه ملف التحريات واللي اتضح من خلالها انه المجني عليه كان بني ادم مش محترم، سألته عن التحريات اللي تخص فرد الامن وقال ان فريق البحث الجنائي لسه شغال عليها

وطبعا كنت مستنيه يخلص عشان ابعت التحريات كلها مره واحدة للنيابة، ولكن في الوقت ده بيوصل بلاغ عن ست اترمت من الدور السادس في مصر الجديدة ولما اتحركنا ووصلنا لمكان البلاغ عرفنا ان الست دي اسمها ليلى الصواف كانت واقعه على وشها وطبعا كانت ماتت.

وبعد شويه وصل وكيل النيابة وطلعنا معاه انا والرائد ياسر على شقه المجني عليها اللي وقعت منها، كسرنا الباب ودخلنا واول ما دخلت للصاله لاحظت ان صوره المجني عليها كانت متعلقه على الحيطه وكانت لابسه نفس السلسله اللي كانت موجوده في مسرح الجريمه الاول في عياده الدكتور حسن ابو اليزيد.. وهنا اتأكدنا ان في علاقه بين الجريمه الاولى والجريمه دي.. ولقيت الرائد ياسر جايب تليفون واقع على الارض وكان مفتوح على محادثه واتساب والمحادثه كان فيها صوره.. فتحت الصوره دي وكانت المفاجأة...

الصورة كانت عباره عن عقد زواج عرفي ما بين الدكتور حسن ابو اليزيد وليلى الصواف.. يعني الدكتور حسن كان متجوز ليلي عرفي

طيب حتى لو متجوزها.. ليه هما الاتنين يتقتلوا بالشكل ده؟

لكن اثناء تفتيش الشقة لقينا كذا حاجة تثير الشك حوالين موت ليلي الصواف.. حاجات ممكن تقول ان ليلى انتحرت متقتلتش وده لما لقيت الرائد سليم بيمسك ظرف والظرف ده كان مكتوب عليه من بره الى ليلى الصواف.. طب ايه اللي كان جوه الظرف ده؟!

كانت علبه اسطوانات ولكن فاضيه.. وده اللي خلاني قربت من الجهاز الموجود الخاص بالاسطوانات وفتحته ووقتها لقيت اسطوانه فعلاً موجوده فيه.. واول ما فتحت الفيديو.. للاسف كان فيديو مخل بيجمع ليلى الصواف بالدكتور حسن ابو اليزيد، والفيديو كان متصور في اوضه نوم

ده غير علاج الاكتئاب اللي كان موجود في اوضه المجني عليها وواضح انها كانت بتاخد منه باستمرار

وده اللي خلاني ابص لوكبل النيابة واقوله

_ تفتكر الست دي انتحرت؟!.. ولا في حد خلص عليها

= والله لو على الحاجات اللي موجوده في الشقة، وخصوصا موضوع الفيديو بجانب وجود علاج الاكتئاب فوارد جداً تكون انتحرت، ولكن برضو في احتمال انها تكون اتقتلت، والبصمات اللي هتترفع من الشقة جايز تعرفنا اذا كان في حد دخل الشقة قبل ما تقع من البلكونه ولا لا

= واكيد دلوقتي لما ننزل لدكتور الطب الشرعي، هيكون عنده تفسير لموضوع الوقوع من فوق وهل كان بفعل فاعل ولا لا؟

_ ممكن يعرف وممكن لا.. مش شرط، بقولك صحيح.. هي الرساله اللي فيها العقد العرفي كانت ليلى بعتاها للدكتور حسن ولا ايه؟

....

ومع سؤال وكيل النيابة رجعت بصيت للمحادثه تاني، وقلبت فيها ومن كلام ليلى مع الدكتور حسن ان في رقم غريب بعت الرساله دي وبعدها رجع مسحها وعمل بلوك ولما حاولت تتصل بيه الرقم كان خارج الخدمة.. وكمان بتبلغه على موضوع الفيديو والفضيحة اللي بقيوا فيها، ولما قلبت شويه في الرسايل لقيت رساله مبعوته وكانت بتسالوا فيها عن السلسله بتاعتها.. وانها ممكن تكون وقعت في المكتب عنده

وبلغت وكيل النيابه بالموجود في الرسالة، واضح ان في حد كان بيحاول يبتزها ويا اما هي انتحرت بعد ما شافت الموجود في الرسايل ياما في حد هو اللي عمل فيها كده

...

بعد ما خلصنا تفتيش في الشقة، طلع فريق المعمل الجنائي عشان يرفع البصمات من المكان، واحنا نزلنا لدكتور الطب الشرعي اللي كان بيفحص الجثه في الشارع.. واول ما شافنا اتكلم وقال

_ انا خلصت فحص الجثه، الزاويه اللي وقعت منها مش محدده اذا كان حد زقها ولا هي اللي رمت نفسها.. ولكن في حاجة ولو قربتوا هتشوفوها.. شعر المجني عليها ناحل يعني في حد شدها منه، ولكن مفيش اي تفاصيل ظاهريه تاني اقدر ابني عليها وجهة نظر.. لكن بعد التشريح ان شاء الله هتبان تفاصيل واكيد هتساعدنا في حل القضية

= تمام يا دكتور واحنا في انتظار التقرير

...

وبعد ما الرجاله خلصت شغلها واترفعت البصمات واتجمعت الاحراز، اتقفلت الشقة واتحولت الجثه للمشرحة... ورجعنا المكتب في وقتها كان فريق البحث الجنائي خلص التحريات الخاصه بفرد الامن واللي كان مقتول في غرفه الكهربا وكانت جثته مقسومه نصين زي الدكتور حسن بالظبط.. فرد الامن كان اسمه سيف عبد المقصود ولكن كل التحريات اللي موجوده عنه تحريات عاديه جداً، الراجل كان في حاله مش بتاع مشاكل، وكل المشاكل الموجوده بينه وبين مراته وزيها زي اللي بتحصل بين اي راجل ومراته

وعشان كده بعت التحريات للنياية عشان تبدا تحقيق مع المشتبه فيهم

*****

وصلتنا التحريات من المباحث عن المشتبه فيهم في الجريمة الاولى، وكان المشتبه فيهم اتنين رجل الاعمال والمرشح السابق لعضوية مجلس الشعب سليم ابو المجد.. ومهندس كمبيوتر وبرمجة اسمه يوسف عبد الرحمن، والاتنين عندهم دافع قوي انهم يخلصوا من الدكتور حسن ابو اليزيد

استدعينا الاتنين وبصراحة الناس متأخرتش وفي اقرب وقت كانوا عندنا

وفضلت ابدا برجل الاعمال سليم ابو المجد.. اللي جه ومعاه المحامي بتاعه وبدأت تحقيق معاه

_ حضرتك عارف انت هنا ليه؟!

= في الحقيقه مستغرب، ولكن احنا تحت امرك يا باشا اتفضل

_ الامر لله يا سليم بيه، حضرتك مشتبه فيه في جريمه قتل الدكتور حسن ابو اليزيد واظن انك عارف مين هو الدكتور حسن ابو اليزيد اللي انت هددته لما رفض يمسح الجلسات بتاعه زوجه حضرتك اللي كانت بتتعالج عنده

= حضرتك مدرك انك بتكلم رجل الاعمال سليم ابو المجد والمرشح لعضوية مجلس الشعب، يعني اظن انت عارف انت بتكلم مين؟

_ واظن انت كمان يا باشا عارف انك قدام نيابة يعني سلطة عليا، لا تعرفك ولا تعرف غيرك.. تعرف القانون وبس وانت هنا متهم زيك زي اي حد، ولو مجاوبتش على الاسئله انا هأمر بحبسك اربع ايام على ذمه التحقيق

المحامي حب يتدخل في الكلام.. فنبهت عليه انه يسكت وان دوره في تحقيقات النيابة هي الاستماع فقط وده القانون فالتزم الصمت وسكت

وهنا اتكلم سليم ابو المجد وقال

= انا فعلاً هددت الدكتور حسن، بس الكلام ده كان في لحظه عصبية لكن موضوع القتل ده انا معرفش عنه حاجة، وبعدين انا كنت مسافر باريس ولسه راجع امبارح

_ يعني حضرتك كنت خارج البلاد في الوقت اللي اتقتل فيه الدكتور حسن، عموما احنا هنتاكد من المعلومه دي.. تقدر تتفضل ولكن ممكن نستدعيك تاني

...

وبعدها دخلت المهندس يوسف عبد الرحمن.. كان شاب واثق في نفسه وبدأت اتكلم معاه

_ شوف يا استاذ يوسف انت بالنسبالي مشتبه اساسي في القضية، انت مهندس تكنولوجيا وبرمجة، وليك مشكله مع الدكتور حسن ابو اليزيد اللي اتقتل ولكن قبل ما يوصلنا بلاغ بخبر قتله، اتسربت معلومات كتير من على الجهاز الخاص بي.. تخص المرضى اللي بيتعالجوا عنده، وكلها كانت مصايب وفضايح.. وانت مهندس برمجه يعني انسب واحد لموضوع التسريبات اللي حصل

= انا معملتش حاجه حضرتك، ثم انا مهندس برمجه مش هكر، اه اعرف حاجات كتير في عالم التكنولوجيا، ولكن عمري ما استغليت ده في الشر

_ بس الدافع اللي عندك قوي يا استاذ يوسف.. الدكتور حسن حاول انه يقرب من اختك مش كده، وانت روحت واتهجمت عليه وكنت عايز تقتله لولا ان الامن منعك وبعدها اتحبست وهو تنازل عن المحضر

= الموضوع حاصل من فتره صغيره، ومن بعدها انا واختي عزلنا من المنطقه نهائي ونسينا اللي حصل.. وبقول لحضرتك تاني ان ما ليش دعوه بالموضوع، ولو عاوني اثبت حسن نيتي انا ممكن اساعدك في موضوع جهاز الكمبيوتر ده وهحاول اعرف مين الشخص اللي سرب المعلومات

_ تقدر تعمل كده؟!

= هحاول

******

كنت قاعد في مكتبي مع الرائد ياسر بنراجع تفاصيل القضية، لكن وصلنا بلاغ من شخص مجهول بيبلغ عن جزء تحتاني من جثه مرميه في صندوق زبالة.. اتحركنا بسرعه انا والرائد ياسر ولما وصلنا هناك كان الجزء اللي يخص الدكتور حسن ابو اليزيد.. وبلغنا النيابة بده، ولكن وكيل النيابة طلب مني اسيب ياسر هناك يتعامل، واجيله على عياده الدكتور حسن ابو اليزيد واللي هي مسرح الجريمة الاول.. كنت مستغرب من الطلب ولكن لما روحت لقيت معاه المهندس يوسف عبد الرحمن والمشتبه فيه في قتل الدكتور حسن ابو اليزيد، طلعنا العياده احنا التلاتة ولقيت الاستاذ يوسف شغل الجهاز وقعد عليه، مكنتش فاهم هو بيعمل ايه بالظبط؟.. لكن فجأه اتكلم وقال

_ في داتا اتمسحت من على الجهاز ده وانا بحاول ارجعها عشان دي اتمسحت بفعل فاعل

= طيب والموضوع ده هياخد وقت

_عشر دقايق

.....

وفضل يوسف شغال لحد ما قدر يرجع الداتا فعلاً، والداتا اللي رجعت كانت عباره عن فيديوهات وتسجيلات لبنت وكانت موجوده صورتها مع شخص انا اعرفه كويس والصدمه ان الشخص ده يبقي...

بصيت لوكيل النيابة اللي كان لسه مستغرب من الشخص اللي ظاهرة صورته قدامنا في شاشه الكمبيوتر، ومستحيل كنا نشك فيه أبداً انه ممكن يكون هو اللي عمل كده

والشخص ده يبقى ظابط متقاعد كان معانا في الجهاز واستقال من فتره كبيرة ومحدش يعرف عنه حاجة من يومها.. والبنت اللي معاه في الصوره دي برضو انا اعرفها كويس دي اخته سلمى

الظابط ده اسمه سعد عبد الكريم.. وانا كل اللي اعرفه عنه ان اخته توفت من فترة كبيرة، وهو استقال بعدها وكان داخل في حاله اكتئاب صعبة حاولت كتير اتواصل معاه بس من غير نتيجة

وهنا اتكلم وكيل النيابة وقال

_ معقول اخت سعد كانت بتتعالج عند الدكتور حسن ابو اليزيد؟!.. اللي اعرفه عنهم انهم ناس مرتاحين ماديا وانهم عيله مترابطه وكبيرة

يعني معتقدش ان عندهم حد بيعاني من مرض نفسي

= الله اعلم.. جايز كان في مشكله في حياتها وهي اللي وصلتها، للنتيجة دي.. بس الاكيد انها كانت بتروح من ورا سعد اخوها، انا اعرف سعد كويس انسان صعب وعصبي، ومعتقدش انه هيسيب اخته تتعالج عند دكتور نفسي خصوصا لو كان راجل مش ست

_المشكلة مش بس انه ممكن يكون قتلهم، المشكلة في الطريقة اللي قتل بيها واللي بتنطبق على سعد عشان هو شخص فاهم وعارف ازاي يستخدم سكينة، وعارف الماده الكاويه اللي بتحبس الدم

واكيد اخته كانت على علاقه مش كويسه بالدكتور ده او حاول يعتدي عليها زي اخت المهندس يوسف كده

....

المهندس يوسف اللي كان قاعد على الجهاز بيفتح كذا ملف قدامنا من الحاجات اللي اتمسحت.. لحد ما لقينا فيديو مش محترم للدكتور حسن ابو اليزيد وهو بيحاول مع سلمى ولكن هي كانت بترفض

يوسف لما شاف المشهد افتكر اخته واتعصب وفضل يسب ويشتم في الدكتور ويقول عنه حيوان وزبالة

ولكن انا ووكيل النيابة كنا بنحاول نهديه، ووقتها بصيت لوكيل النيابة وقولتله

_ الموضوع واضح وضوح الشمس.. الدكتور الزباله اللي في الفيديو ده حاول انه يقرب من سلمى زي ما حاول يقرب من ستات كتير، لكن البنت رفضت وحاولت تبعد عنه.. وبلغت سعد اخوها والله اعلم ايه اللي حصل.. ولكن اخت سعد ماتت وهو استقال، وبعدها بدأ يخطط ازاي ينتقم لاخته

=معلش انا عندي سؤال، هو انت كنت هنا وقت موت اخت سعد ولا كنت في مكان تاني وسمعت الخبر

_ لا انا وقتها كنت في المنيا، وسمعت الخبر ده غير انه كان مكتوب على الفيسبوك، وبعدها جالي خبر استقالته حاولت اتواصل معاه بس مردش عليا

= طيب اسمع يا باشا، انا عاوزك تعرفلي سلمى اخت سعد ماتت ازاي؟.. ده غير اني مستني التحريات الخاصة بجثة ليلي الصواف، وعاوزها تكون عندي في اقرب وقت

_ تمام يا باشا تحت امرك

.....

رجعت المكتب ولقيت الرائد ياسر وصل قبلي، وقال ان الجزء التحتاني من الجثه اتسلم للطب الشرعي.. وان التحريات الخاصه بليلي الصواف وصلت من البحث الجنائي، فطلبت منه يعمل تحريات عن سلمى عبد الكريم.. اخت الرائد سعد عبد الكريم وبلغته انها توفت من حوالي سنة وان اخوها استقال من الشرطة

اتحرك الرائد ياسر عشان يعمل التحريات الجديدة المطلوبه منه، وانا فتحت ملف التحريات الخاص بليلى الصواف وبدأت أقرأ فيه

كل الكلام كان عادي ويخص علاقتها بالدكتور حسن ابو اليزيد اللي كانت متجوزاه عرفي وعلى علاقه بيه، لكن الجزء اللي وقفت عنده ان ليلى الصواف كان ليها صديقه مقربه والصدمه انها تبقى سلمى عبد الكريم

...

قفلت ملف التحريات وانا مخي بدأ يجمع شوية خيوط، ليلي الصواف كانت على صداقة بسلمى اخت الرائد سعد، ممكن تكون استغلت الصداقة اللي ما بينهم وهي اللي وصلتها للدكتور حسن ابو اليزيد ومش بعيد تكون عارفه انه هيعمل فيها كده

وعشان كده القاتل اللي بنسبه كبيره هيطلع هو الظابط السابق سعد عبد الكريم.. قتلها زي ما قتل الدكتور حسن وممكن يكون فرد الامن، شاف الجريمه وحاول يمنعه فخلص عليه هو كمان.. ده اللي انا كنت فاكره او استنتجته لكن الحقيقه اللي صدمتني لما وصلني ملف التحريات الخاص بسلمى عبد الكريم واللي عرفت من خلاله صدمه كبيرة.. سلمى عبد الكريم ممتش موتة طبيعية دي اتقتلت والقضية اتقيدت ضد مجهول عشان محدش عرف يوصل للي عملها، وقفل القضية كان سبب استقاله سعد عبد الكريم من الشرطة

ولكن الصدمه مش في كل ده.. الصدمه الحقيقية في زوج سلمى عبد الكريم واللي كان سبب انها تتعالج اصلا عند الدكتور حسن ابو اليزيد عشان كان بيعاملها وحش وبيمد ايده عليها.. والشخص ده يبقى دكتور الطب الشرعي خالد عبد الوهاب

الدكتور اللي بيفحص في الجثث واللي حاليا شغال على الجزء التحتاني من جثة الدكتور حسن

....

قفلت ملف التحريات بعد ما خلاص كل حاجه اتعرفت، شخص بيعرف يستخدم سلاح الجريمه كويس واللي هو السكين وعارف تفاصيل في تقطيع الجثث والماده الكاويه اللي بتمنع الدم.. انا توقعت من البداية ان دكتور.. والتحريات اتبعتت للنيابة اللي اصدرت قرار على طول بالقبض على الدكتور خالد عبد الوهاب دكتور الطب الشرعي وبدأ التحقيق معاه

****

_ بص يا دكتور حضرتك شخص فاهم قانون كويس.. وعارف اننا مش هنقبض عليك غير واحنا متاكدين 100% انك انت اللي عملتها، فمفيش داعى للانكار ويا ريت تتكلم على طول ده في مصلحتك وتحكي اللي حصل كله

= انا كنت عارف ان كل ده هيحصل، كنت عارف انه هيتقبض عليا ورغم كده مهربتش وآن الأوان أعترف بكل حاجة.. يمكن انا قررت اخد حقها وافضح كل اللي كان بيعمله الدكتور القذر اللي اسمه حسن ابو اليزيد.. عشان حاسس بالذنب معاملتي الوحشه ليها كانت هي السبب انها تروح تتعالج نفسيا، انا المجرم الحقيقي اللي وصلها للحاله دي

ولما احاول الحيوان ده يقرب منها وهي منعته وحاولت تفضحه قتلها، وساعتها اخوها معرفش يثبت التهمة على حسن

لا واي كمان ده انا عرفت ان صاحبه عمرها كانت متفقه معاه عشان يعمل فيها كده.. ويوم الجريمة روحت عنده على اساس اني مريض نفسي وكنت مجهز كل حاجة ولكن وانا بخلص عليه دخل فرد الامن علينا ووقتها جري عليا وحاول يمنعني فكان مصيرهم هما الاتنين واحد.. وخلصت عليهم وبعدين قطعت جثثهم وكنت قاصد اخلي الجزء الفوقاني بس من الجثة موجود، عشان الكل يعرف انها انتقام مش مجرد قتل وخلاص، كنت عاوز اعرف الناس كلها النار اللي قايده في قلبي... مسحت كل الداتا اللي تخص مراتي سلمى من على الكمبيوتر ووزعت باقي الداتا على الانترنت ومن خلال ايميل الدكتور حسن نفسه اللي كان مفتوح على الكمبيوتر.. وكل الناس شافت الفضايح

_ طيب وليلى الصواف قتلتها ازاي؟

= عملت نفسي عامل دليفري، وطلعت عندها الشقة ومن حظي انها كانت سايبه الباب مفتوح.. كانت هتصرخ لكن هددتها انها لو اتكلمت هخلص عليها.. بس قبل ما اطلع كنت بعتلها صوره العقد العرفي والاسطوانه اللي عليها العلاقه القذره اللي ما بينها وما بين الدكتور وبعد ما شافت كل القذاره اللي عملتها رميتها من فوق وبعدها هربت من السطح ونطيت على سطح عماره تاني وهربت

وانا اهو قدامك بعترف بكل حاجة عملتها.. وعارف مصيري هيكون ايه كويس.. بس انا مش زعلان كفايه اني اخذت حقها وكفرت عن ذنبي معاها

....

اتحول الدكتور خالد عبد الوهاب للمحكمة وما زال الحكم معلق

..

رسالة من الكاتب / انا جيت عند الحكم ووقفت.. لو بالقانون هياخد اعدام ولو بالانسانية فأنا شايف ان الاعدام ده يستحقوا الدكتور حسن

وليلى وامثالهم.. جايز فرد الامن ميكونش لي ذنب ولكن هو كان ضحيه لما حاول يدافع عن شخص مش محترم.. فانا هسيب ليكم الحكم لو انتوا مكان القاضي.. هتحكموا بايه؟!

...

انتهت احداث الرواية نتمني أن تكون نالت اعجابكم وبانتظار آراءكم في التعليقات