تحميل رواية «جثة المدرسة» PDF

ن

القصة للكبار فقط +21

في مدرسة في احدى محافظات الصعيد، بتبدأ التحقيقات في واحدة من اصعب الجرايم اللي ارتكبت وحدثت بالفعل

بيوصل بلاغ لرجال الشرطة، عن جريمة قتل في مدرسة حكومي ثانوي مشترك.. البلاغ كان بيقول ان المشرفة كانت بتفتش على الحمامات ولقيت جثة بنت المفروض انها في اخر سنه في الثانوي واقعة على الارض وسايحة في دمها.. والازاز كان داخل في وشها بشكل مفزع ومراية الحمام متكسرة

واول ما وصل البلاغ اتحركنا ولما وصلنا هناك، اكتشفنا ان سبب الوفاه الواضح قدام عينينا.. هي كميه القزاز اللي دخلت في وش البنت وفي رقبتها.. ولما قربت من الجثة لاحظت ان البنت شعرها ناحل، وده معناه ان في حد مسكها من شعرها وضربها في الازاز وده اللي ادى للوفاه

...

انا عماد عبد الكريم وكيل نيابة، لما وصلتنا الاشاره اتحركنا على طول، ولما وصلنا كانت المدرسة كلها متجمعة، والدنيا كانت مقلوبة.. الشرطة كانت وصلت ورئيس المباحث ايمن طايع كان موجود في مسرح الجريمة.. الحمام اللي كانت واقعه فيه بنت سنها تقريبا 16 سنة منظرها كان صعب جداً، وده بسبب الازاز اللي داخل في وشها ورقبتها.. ده غير ان ملابس البنت كانت متقطعة، وده اللي كان بيوحي حاجة انا مش عاوز اتخيلها، وان شاء الله تكون مجرد خناقة وقتل خطأ

وعرفت ان البنت اسمها نورهان في اخر سنة في ثانوي، وانها عايشة مع والدتها في بيت في البلد، ووالدها متوفي من سنه

وفي اللحظه دي سمعت صراخ جاي من بره، وعرفت ان والدتها وصلت المدرسة، وكانت بتحاول تقتحم مسرح الجريمة بس احنا منعناها، وحاولنا نهديها ولكن الست لما لمحت هدوم بنتها المتقطعة.. لطمت على وشها وكانت بتصرخ في وش المدرسين اللي واقفين.. وجات عند واحد منهم ومسكته من هدومه وقالت

_ عملت ايه في بنتي يا نجس؟!.. ما احنا اعتذرنا بدل المره مليون، برضو مش راضي تصفي

= يا ستي انا معملتش حاجة، انا متفاجئ زيي زي الناس والله، انا مقدر اللي انتي فيه يا ست نادية.. بس مينفعش كده

...

مكنتش فاهم حاجة، واللي عرفته ان ده مدرس واسمه عاصم، ولكن كنت عاوز اعرف الحوار اللي دار ما بينهم ده معناه ايه؟

وليه والده المجني عليها تتهم البني ادم ده انه عمل كده، وايه حوار الاعتذار ده؟!.. كلها اسئلة كنت محتاج عليها اجوبة

ولكن في الوقت ده وصل رجالة الطب الشرعي والمعمل الجنائي للمدرسة عشان يتم فحص الجثة ومسرح الجريمة، وطلبت من كل اللي كانوا واقفين يطلعوا بره.. عشان الناس تقدر تشوف شغلها

ولما خرجت بره مع الناس اللي واقفة قربت من المدرس اللي كان واقف واللي كان اسمه عاصم وقولتله

_ هي والده المجني عليها كانت بتقولك كده ليه؟!.. هو كان في حوار بينك وبين بنتها؟

= ايوه كان في حوار من حوالي شهرين، بس يعني انا مش عايز اتكلم في اعراض حد، انا كنت مظلوم في الموضوع والناس اعتذرت والحوار خلص، بس هي فاكره ان انا عملت كده في بنتها

_ لا ما انت لازم تحكي ايه اللي حصل، مفيش حاجة اسمها مش هتتكلم في اعراض ناس، في حاجة اسمها انك ممكن تكون متهم في الجريمة، والتحريات هتثبت ده.. وساعتها هنحقق معاك ولازم هتتكلم.. ولو خبيت حاجه موقفك هيكون سيء

= طيب ممكن على الاقل مش دلوقتي، حضرتك شايف الدنيا متوتره ازاي.. ده غير ان مدام نادية باصة علينا، وهي لسه شاكة اني انا اللي عملت كده

...

في الوقت ده دكتور الطب الشرعي نده عليا.. ودخلت انا ورئيس المباحث عشان نشوف الدكتور هيقول ايه

_ سبب الوفاة واضح وظاهر.. الازاز اللي موجود في رقبتها اللي تسبب في وفاتها بشكل مباشر، ولكن للاسف البنت اتعرضت لاعتداء، وده هيوضح أكتر مع التشريح، بس دي حاجة واضحة

وبرجح ان الجريمة حصلت قبل اكتشافها بساعة واحدة او اقل، لان جسم المجني عليها لسه دافي

= هنتظر منك التقرير في اقرب وقت يا دكتور، وشكرا لتعبك

...

كنت لسه هخرج من الحمام ولكن لفت نظري كلام رجاله المعمل الجنائي، ان حيطان الحمام مدهونة ببلاستيك مانع للصوت، ودي نقطة استغلها القاتل، عشان ينفذ جريمته والناس متسمعش صراخ المجني عليها

وبعد ما خلصنا اتنقلت الجثه للمشرحه عشان يتم التشريح النهائي، ورجاله المعمل الجنائي رفعوا البصمات من المكان، وطلبت من رئيس المباحث سرعة عمل تحريات عن المجني عليها

وخرجنا من المدرسة ولكن واحنا في الطريق لمحت على اول الشارع كاميرا على محل ملابس، وطلبت مراجعتها بعد ما نعمل اذن في النيابة واكيد هتفيدنا في التحقيقات

*****

رجعت مكتبي انا والرائد ادهم عشان نبدأ تحريات عن المجني عليها.. نورهان مصطفى صالح.

وبدأ رجالة البحث الجنائي في عمل التحريات وبعد 24 ساعة كان في ايدي ملف التحريات اللي هبعته للنيابة واتكلم الرائد ادهم وقال

_ القضيه دي كبيره ومش سهله.. شوف يا باشا البنت اللي اتقتلت دي كانت مريضه نفسيا.. عايشه مع والدتها بعد وفاه والدها، وفي 3 مشتبه فيهم

الاول كان موجود في المدرسة وشوفنا والدة المجني عليها وهي بتحاول تتخانق معاه.. الاستاذ عاصم عز الدين

حسب التحريات ان نورهان اتهمت الاستاذ عاصم انه كان بيحاول يقرب منها وانه مسك ايديها، وده اللي نفاه الاستاذ عاصم وقال انه محصلش.. واتحول للتحقيق بسبب الموضوع ده ولكن في النهايه ظهرت براءته وان البنت افترت عليه بسبب انها حاولت تتكلم معاه وهو اللي رفض.. ووالده نورهان اعتذرت للاستاذ عاصم قدام المدرسة كلها عشان ميرفعش شكوى ضد بنتها

المشتبه في التاني.. طالب معاها في نفس السنه واسمه ممدوح

والطالب ده كان بيتعرض للتنمر وبالذات من نورهان، هو عنده تلعثم في الكلام ومش بيقدر يتكلم كويس وبسببها دخل في حاله نفسية صعبة.. وكان هيموت نفسه ولكن اتلحق على اخر لحظة

ونيجي للصدمة في المشتبه فى رقم 3.. والد نورهان كان متجوز على والدتها واحدة اسمها حنان ومخلف بنت اسمها شهد والموضوع ده اكتشفوه بعد وفاه الوالد

والبنت دي كان عندها مشكله في التنفس ومش مشكله عادية، دي كانت نايمه على السرير في البيت وما توصلها جهاز تنفس

وفي يوم نورهان زارت مرات ابوها في بيتها.. وبعد ما مشيت بحوالي نص ساعة.. البنت اتوفت

ووقتها الست حنان اتهمت نورهان ان هي اللي عملت كده في بنتها.. ولكن محدش عرف يثبت ده

وعلى حسب التحريات ان المشتبه الاول والتاني كانوا بره المدرسه قبل وقوع الجريمة.. ولكن محدش عارف هما دخلوا تاني امتي؟!

....

قفلت ملف التحريات واتبعت للنيابة.. عشان تبدأ تحقيق مع المشتبه فيهم

******

وصلتني تحريات المباحث وبعد ما قريتها قررت استدعاء التلاتة للتحقيق معاهم.. عشان نعرف مين اللي عمل كده

ولكن من الواضح ان البنت دي كانت مش كويسة، ومش هستبعد انها متعرضتش لاعتداء وان كل حاجه كانت برضاها وان ممكن يكون اللي عمل كده غير اللي قتلها.. ولكن رجعت استغفرت ربنا على الظن السيء وقبل ما اعمل اي حاجة

وصل تسجيل الكاميرات اللي كانت على اول الشارع واللي بتوضح مين اللي دخل قبل توقيت الجريمة.. بدأت اركز لحد ما لمحت الشخص ده.. شخص بيتلفت حوالين نفسه، وكأنه مش عايز حد يشوفه.. وفتح باب المدرسه براحة ودخل.. ولكن الصدمه ان الشخص ده يبقى..

اللي كان داخل المدرسة مش واحد من المشتبه فيهم.. بس كان شخص انا اعرفه كويس، شخص سوابق كان محبوس قبل كده على ذمة قضية، وانا حققت معاه بنفسي

بلطجي واسمه سالم.. والسؤال هنا ايه اللي يخلي بلطجي زي ده يدخل المدرسة؟.. معقول هو اللي عمل في البنت كده؟

طيب عمل كده من دماغه ولا في حد كان وراه؟

كنت بسأل نفسي كل الاسئله دي.. ولكن لاحظت ان ممدوح الطالب اللي بيعاني من التنمر.. والاستاذ عاصم الاتنين وصلوا المدرسة قبل وقوع الجريمة، ورغم كده ده العادي والطبيعي انهم يدخلوا المدرسة طالب فيها ومدرس ولكن اللي مش عادي هو دخول سالم وعشان كده طلعت امر باستدعاءه هو كمان

والغريب انه كان عندي قبل حتى المشتبه فيهم ما يوصلوا.. كأنه محضر نفسه للاستدعاء ده

وبدأت اتكلم معاه

_ايه سرعة الاستجابه دي يا سالم؟.. ده انا قولت انك هتدوخنا يا راجل على ما نوصلك

= ودي تيجي برضو يا باشا.. هو انا اقدر اتاخر عنك؟

_ يا سلام على التثبيت بتاعك، طيب خلينا ندخل في الموضوع على طول وبلاش الحبتين بتوعك دول.. تحب تتفرج على نفسك في فيديو يا سالم؟!

= ايه يا باشا هو انا طلعت في التلفزيون ولا ايه؟!

_ اه تخيل.. تعالى كده بص

...

قرب سالم وبص في الشاشة وشاف نفسه وهو داخل المدرسة.. بلع ريقه بالعافيه واتكلم وقال

= ده انا كنت رايح للواد سيد صاحبي، اصله غاوي تعليم بس انا كنت عاوزه في مصلحه كده

_ سيد صاحبك.. هنبدأ نستعبط، طيب واللي رايح لسيد صاحبه هيقعد يتلفت حوالين نفسه كده يا سالم؟.. هات من الاخر وقول انك رجعت للشمال تاني

=بصراحة كده يباشا.. عرفت ان البواب بتاع المدرسة اللي اسمه عاطف، نايم على قرشين حلوين وانا الحاله معايا ضنك من يوم ما خرجت من السجن، فروحت قلبته فيهم خفافي كده وبعدها مشيت

_ يعني انت عاوز تفهمني انك ما لكش علاقة باللي حصل للبنت في الحمام.. مش انت اللي عملت فيها كده وقتلتها؟!

= لا بنت مين وقتل ايه يباشا؟!.. انا معرفش حاجة عن الكلام ده، انا كان معايا مصلحه وقلبت الراجل في قرشين ومشيت، لكن بنت وقتل، الحوار ده بره عني

_ ماشي يا سالم، بس انت هتشرف معانا شويه لحد ما نشوف ايه حوار الراجل اللي انت قلبته ده، ما هي دي تهمه يا عم سالم ولا انت شايف ايه؟

= اذا كان الراجل مشتكاش يا باشا.. يبقى اتحبس ليه؟

_ لا سيبك من الموضوع اشتكى ولا لا، احنا بس هنتاكد اذا كنت فعلاً حاولت تسرقه ولا الراجل مشافكش اصلا

...

اتحفظت على سالم.. وفي الوقت ده كان وصلت الست حنان الزوجة التانية اللي كان متجوزها والد المجني عليها.. واللي عندها دافع قوي انها تنتقم من نورهان

ولكن قبل ما ابدأ تحقيق معاها.. كلمت المباحث وطلبت منهم عمل تحريات عن سالم وقولتلهم عاوز اعرف كل حاجة عنه بعد ما خرج من السجن

وبعدها طلبت من العسكري يدخل مدام حنان.. دخلت وقعدت قدامي

وبدأت اتكلم معاها

_ مدام حنان.. حضرتك عارفه انتي هنا ليه؟!

=في الحقيقة لا

_يعني مسمعتيش ان نورهان بنت جوزك اتقتلت في المدرسة؟

= سمعت، بس ده ميخصنيش في حاجة.. تتقتل او يحصلها اي حاجة بالنسبالي ده حق بنتي وربنا خلصوا فيها

_ بس حضرتك هنا مشتبه فيكي.. حضرتك عندك دافع قوي انك تعملي كده في نورهان، بعد ما اتهمتيها ان هي اللي قتلت بنتك، وانا كنت عاوز اعرف اللي حصل يومها.. عشان التحريات اللي جاتني عباره عن خطوط عريضة مفهمتش منها حاجة

= انا كنت عايشه انا وبنتي شهد بعد ما جوزي توفى، بنتي كانت مولوده وعندها مشكله في التنفس ولما كبرت المشكله كبرت أكتر، لدرجه انها معظم الوقت نايمة في السرير ومتوصلها جهاز تنفس، وفي يوم اتفاجئت من زياره نورهان.. كانت اول مره تيجي عندنا البيت كانت بتتعامل معايا كويس، بس انا كنت مستغرباها وكلام والدها عنها قبل ما يموت انها خبيثه زي امها وده كان قلقني وطلبت تشوف شهد.. ولما لقيتها بتعامل بنتي كويس سبتها معاها وروحت اعملها حاجه تشربها، بس خمس دقايق وهي استاذنت، وبعد ما مشيت بشوية لقيت بنتي مش بتنطق.. كلمت الدكتور اللي جه وكشف عليها وللاسف قال ان البنت ماتت.. اتهمتها عشان مفيش غيرها اللي دخلت عندها

_وفضلتي تفكري ازاي هتنتقمي منها، فاتفقتي مع حد وبعتيه على المدرسة، يعتدي على البنت في الحمام وبعدين يقتلها

= لا يا باشا، انا عمري ما فكرت في كده، مش هنكر اني فكرت في الانتقام بس مش بالشكل ده، اه لو كانت وقفت قدامي في يوم كنت مش هعرف اتحكم في نفسي.. بس مش كده

_ عموما انتي مفيش دليل ضدك لحد دلوقتي.. ولكن خلي بالك ان احنا ممكن نستدعيكي في اي وقت واتمنى انك ما تتاخريش

...

ومشيت الست حنان.. وفي الوقت ده وصل تقرير الطب الشرعي والمعمل الجنائي والبصمات

تقرير الطب الشرعي كان بيقول ان البنت فعلاً اتعرضت لاعتداء، وان السبب الوفاه مش الازاز سبب الوفاه هو الاعتداء(ج)

اما عن تقرير المعمل الجنائي والبصمات فكان في اكتر من بصمة مختلفين في مسرح الجريمة بخلاف بصمات المجني عليها

...

خلصت التقارير من هنا.. والعسكري بلغني ان ممدوح واحد من المشتبه فيهم واقف بره ولكن معاه والده وسمحت ليهم بالدخول

سلمت عليهم وطلبت منهم يقعدوا.. وعرفت من والد ممدوح ان حاله ابنه النفسيه صعبة، وهو جه معاه عشان خايف عليه من الضغوطات

ولكن انا طمنته وبدأت تحقيق مع ممدوح

_ ممدوح.. انا عرفت انك كنت بتتعرض للتنمر من زمايلك في المدرسة وخصوصا من نورهان.. صح؟

= ايوه.. كانت بتتريق عليا.. وانا كنت هموت نفسي بسببها

_ طيب مفكرتش تنتقم منها، خصوصا انك معاها في المدرسة وعارف بتدخل الحمام امتى؟!

= انا عارف حضرتك تقصد ايه؟!.. بابا فهمني على كل حاجة بس مش انا اللي عملت كده، انا استاذنت في الفسحه وروحت البيت وبعدها رجعت تاني على المدرسة وطلعت الفصل على طول، وحضرتك تقدر تسأل المدرس اللي كان علينا الاستاذ عاصم

_ تمام يا ممدوح.. بس انا بجد مش عارف ليه كانوا بيتنمروا عليك، انت عارف تتناقش وتتكلم كويس ودي حاجه مخلياني فخور بيك وانا بكلمك.. انت كويس ومتخليش حد يقلل ثقتك في نفسك

....

خلصت كلام مع ممدوح اللي كنت فاكره هيكون مهزوز بعد اللي حصل معاه.. وفي الوقت ده وصلت تحريات المباحث عن سالم وكان بيعمل ايه بعد ما خرج من السجن

فتحت ملف التحريات وعرفت انه سالم اشتغل على توك توك بعد ما خرج واستمر على الشغل ده لمدة شهر ولكن بعدها ساب الشغل وبدأ يتلم تاني على الصحبه الشمال، بس المشكلة مش هنا

المشكلة.. انه خلال الشهر ده وصل مدام حنان من بيتها لبيت والدها والعكس اكتر من خمس مرات والموضوع مش صدفة، وانه سالم كان بيروح لحد البيت ياخدها ويوصلها لبيت والدها والعكس

وده طبعاً غريب.. ايه اللي يخلى مدام حنان يكون ليها علاقه بواد زي ده.. وكنت فاكر ان كده الصوره وضحت

ولكن وانا قاعد باب المكتب خبط ودخل الرائد ادهم من المباحث، كان معاه كيس صغير وحاجة لقيوها وسط الاحراز.. الحاجه دي كانت زرار قميص كان موجود وسط الازاز بتاع المرايه اللي كان متكسر في الحمام

لما ركزت مع الزرار وافتكرت لما كنت واقف بتكلم مع المشتبه فيهم عرفت الزرار ده بتاع مين والصدمه ان الشخص ده يبقي..

الزرار كان يخص الاستاذ عاصم، اللي نورهان اتهمته قبل كده انه حاول يقرب منها ومسك ايديها، ولكن اكتشفوا ان نورهان بترمي بلاها على الاستاذ عاصم.. ووالدتها اعتذرت للاستاذ عاصم على البهدله اللي حصلتله بسبب بنتها

الزرار بتاع قميصه في المسرح الجريمة، ومعنى ده ان هو اللي كان مع نورهان في الحمام، هو اللي اعتدى عليها وهو اللي قتلها

الرائد ادهم لاحظ اني سرحان فاتكلم وقال

_ حضرتك كويس يا باشا؟!

=ها.. اه انا كويس، كنت بفتكر بس الزرار ده بتاع مين؟

_ وافتكرت؟!

= ايوه افتكرت.. بصراحة مكنتش اتوقع أبداً، ان اللي عمل كده هو الاستاذ عاصم.. راجل يبان عليه انه محترم ومش ممكن يعمل حاجه زي دي!

_ مش بالمظاهر يا باشا.. وحضرتك عارف ياما ناس كتير منظرها يبين ان هما ولاد ناس وبيطلعوا مجرمين وحرامية

= ما اهو لو الكلام ده صح والاستاذ عاصم هو اللي عملها، يبقى البنت مرمتش بلاها عليه ولا حاجة، وهو فعلاً حاول قبل كده يقرب منها ويمسك ايديها

_ طيب ايه؟!.. هيطلع اذن استدعي ولا قبض عليه؟

= هو كده كده هياجي دلوقتي عشان معموله استدعي للتحقيق معاه كمشتبه في القضية.. ولكن بعد الزرار ده بقي مش مشتبه فيه بقي المشتبه الاول والوحيد

_ طيب يا باشا انا هستاذن.. وحضرتك لو عوزت اي حاجه انا في الخدمة

= العفو يا ادهم باشا اتفضل

....

مشي الرائد ادهم.. وبعد حوالي ساعة لقيت باب المكتب بيخبط والعسكري بيقول ان الاستاذ عاصم واقف بره... طلبت منه يدخله

ودخل الاستاذ عاصم وقعد قدامي

_ استاذ عاصم انت عارف انت موجود هنا ليه؟

= عشان يتحقق معايا في موضوع قتل نورهان، وعشان الموضوع اللي حصل قدام سيادتك من والدتها

_ لا احنا عرفنا اللي حصل من التحريات، عرفنا ان البنت اتبلت عليك وقالت انك حاولت تقرب منها، وانك اتحولت للتحقيق.. ولكن طلعت براءه من الموضوع ووالدتها اعتذرتلك، وطلبت منك متقدمش شكوى في بنتها عشان مستقبلها ميضيعش

= طيب كويس ان حضرتك عارف كل حاجه اهو

_ انا بقى عاوز اسألك.. مش ده الزرار بتاعك يا استاذ عاصم.. اللي كان مقطوع من قميصك اللي كنت لابسه يوم الجريمة؟!

= ايوه فعلاً.. بس حضرتك لقيته فين؟.. ده اتقطع مني عند الكانتين بتاع عاطف بواب المدرسة ودورت عليه كتير بس ملقيتهوش

_ اتقطع عند عاطف، ولا نورهان اللي قطعته وهي بتحاول تقاومك عشان متعتديش عليها وتقتلها

= حضرتك بتقول ايه؟!

_ اللي سمعته يا استاذ عاصم، الزرار ده كان في مسرح الجريمة وسط الازاز بتاع المرايه اللي اتكسرت في الحمام

= يا فندم الكلام ده محصلش، انا معملتش كده

_ لا عملت.. لو هفترض انك بريء في الموضوع الاول، فأكيد لما اتحولت للتحقيق وطلعت براءه مش كل الناس صدقتك، واكيد في طلبه كتير اهلهم نبهوا عليهم يبعدوا عنك، عشان في النهايه انت عليك شبهه، ده غير انك بقيت منبوز من المدرسين اللي حواليك واللي مصدقك واللي مش مصدقك.. حاجات اثرت عليك نفسيا وخليتك عاوز تنتقم منها

وعشان انت مدرس في المدرسة.. عارف ان الحمامات مدهونه ببلاستيك عازل للصوت.. يعني لو حد صرخ جواه وعمل اي صوت مش هيتسمع.. وشوفت نورهان وهي داخله الحمام ووقتها الحصص شغالة ومفيش حد شايفك، فقررت انك تدخل وراها وتعمل عملتك حاولت تقاومك وقطعت زرار القميص، ولكن انت قدرت عليها وعشان متفضحكش بعد عملتك.. خلصت عليها

= حضرتك بنيت سيناريو محصلش، مش انا اللي عملت كده فيها

انا لو كنت عاوز آذيها.. كنت رفعت شكوى لوزاره التربيه والتعليم، ووقتها كنت هاخد حقي وهضيع مستقبلها

لكن اعتدي عليها واقتلها.. والله ما حصل، وبعدين حضرتك ممكن تجيب عاطف البواب وتسأله.. هو كان بيدور معايا على الزرار قدام الكانتين

_ تمام يا استاذ عاصم.. حضرتك هتستنى بره شويه متمشيش ولو طلعت صادق في كلامك اكيد هتروح

....

وطبعا اي حد بيجي النيابة عشان التحقيق كنا بناخد بصماته، عشان نطابقها بالبصمات اللي كانت في مسرح الجريمة، وكان اخرهم الاستاذ عاصم

ولكن بعد ما اخدنا بصماته.. وطلعت النتيجة اتصدمت

البصمات اللي كانت موجوده في مسرح الجريمة مش لشخص واحد، البصمات كانت لسالم وممدوح والست حنان.. ده بخلاف بصمات المجني عليها.. ومفيش وجود لبصمات الأستاذ عاصم.

وده اللي خلاني استدعي عاطف البواب، كان لازم اتكلم معاه لان هو اللي هيوضح حاجات كتير.. والراجل كان عندي بعد ساعه من الاستدعاء

_ ازيك يا عم عاطف عامل ايه؟!

= الحمد لله في نعمه يا باشا

_ كنت عاوز اسالك على كام حاجه كده.. يوم ما اتقتلت البنت اللي اسمها نورهان، بس عاوزك متخافش من حد وتقول الصراحه يا عم عاطف

= حاضر يا باشا انا تحت امرك

_ في بلطجي اسمه سالم جه وحاول يقلبك في قرشين يوم الجريمة؟

= ايوه حصل فعلاً.. بس هو مدخلش على طول عندي، انا شوفته وهو جاي من جوه ولما قربت منه فتح عليا مطوه.. خوفت فطلب مني اطلع اللي معايا

_ طيب وانت كنت فين لما دخل المدرسه اصلا يا عم عاطف؟!

= يا باشا انا مش بقعد في مكاني غير في ساعه الفسحه، عشان الكانتين لكن باقي الوقت بنضف الحوش بتاع المدرسة وبرش الزرع وبعمل كذا حاجة

_ طيب بمناسبة الكانتين.. هو صحيح زرار القميص بتاع الاستاذ عاصم اتقطع عند الكانتين وانت دورت معاه عليه؟!

= ايوه حصل في نفس اليوم، بس ملقينهوش

_ طيب متعرفش مين دخل المدرسة تاني غير الواد البلطجي ده، يعني مفيش حد غريب دخل تاني؟

= وانا موجود عند البوابة لا.. بس ممكن حد يدخل وانا جوه عشان اكون صريح

....

مشيت عاطف البواب.. وافرجت عن الاستاذ عاصم

وقررت اني هلعب لعبه على سالم جايز تجيب نتيجة.. بعد التحريات اللي اتعملت عنه وعرفت انه يعرف مدام حنان ومع وجود بصمات وبصماتها في مسرح الجريمة.. جبته قدامي وقولتله

_ شوف يا سالم انا كنت هفرج عنك، بس شريكتك في الجريمه اعترفت عليك، الست حنان قالت انها اتفقت معاك انك تعمل كده في البنت عشان تاخد حق بنتها، في مقابل مصلحه متفقين عليها انت وهي

= الست حنان اعترفت عليا.. بعد كل اللي عملته

_ ايوه.. احكي بقى اللي عملته بدل ما تشيل القضية لوحدك، اصل هي قالت انها كانت متفقه معاك تخوف البنت وانك انت عملت ده من دماغك فكده انت اللي هتشيل القضيه دي لوحدك ولكن لو اتكلمت جايز تخفف من على نفسك

= بص يا باشا انا هعترف باللي عملته وبالاتفاق اللي اتفقته معاها، بس مش هحاسب على حاجه معملتهاش... انا اه اعتديت على البنت وده كان اتفاقي مع الست حنان اني اكسر عينها وافضحها هي وامها ولكن قتل محصلش.. انا سبت البنت في الحمام وهي بتعيط وتصرخ وخرجت وانا ماشي ناحيه البوابه قابلت عاطف البواب اللي لقيته جاي عليا وبيقولي انت بتعمل ايه هنا؟!

وقتها طلعت المطوه ورفعتها عليه وهددته انه يطلع الفلوس اللي معاه والا هخلص عليه وطلع المصلحه واخدتها ومشيت، وبعدها هي طلبت مني اوصلها عند المدرسه وامشي وما ليش دعوه تاني، معرفش بقي هي عملت ايه؟!

....

وزي ما توقعت اللعبه اللي عملتها على سالم نجحت ولكنه اعترف بالاعتداء بس ورفض يعترف بالقتل.. وكنت لسه هستدعي الست حنان للتحقيق معاها.. ولكن في الوقت ده الباب خبط ودخل منه راجل ومعاه بنت في نفس سن نورهان وعرفت ان اسمها ساره

وقالت انها شافت شخص كان خارج من الحمام وايديه غرقانه دم وهرب قبل ما حد يشوفه ومكنش يعرف اني شوفته.. والشخص ده يبقى.

الشخص ده يبقى ممدوح.. الطالب اللي نورهان اتنمرت عليه، كنت مذهول وانا بسمع كلام سارة الطالبة اللي جت عشان تشهد باللي شافته يوم الجريمة

فطلبت منها تحكي اللي شافته بالظبط فقالت

_ انا كنت متعودة أنزل انا وصحابي الحمام بعد الفسحة ما تخلص، عشان نضيع وقت في آخر حصتين.. وكنت بشوف نورهان بتعمل زينا وفي يوم الجريمة، كنت راجعة الفصل، ووقتها لمحت ممدوح كان رايح ناحيه حمام البنات.. وقفت وبصيت عليه عشان اشوفه داخل بيعمل ايه؟!

وكنت هبلغ الابلة المشرفة عشان تشوفه بس بعد خمس دقايق، كان ممدوح خارج من الحمام وايديه كانت غرقانه دم

وفضل يبص حوالين نفسه وبعدها جري وخرج من المدرسة

= طيب معلش سؤال، ليه مجتيش انتي ووالدك وحكيتي الموضوع ده من أول يوم؟

...

في الوقت ده ادخل والدها في الكلام وقال

_ بنتي حاسه بعذاب الضمير، رغم انها لسه صغيرة.. بس في واحدة جت وسالت على نورهان كذا مرة، وبنتي قالتلها على موضوع نزول الحمام في الوقت ده، وان نورهان اكتر واحدة بتقعد في الحمام عشان تضيع وقت ومتطلعش الفصل، ولما حصل اللي حصل بنتي جت حكيتلي.. اصريت اني اجيبها عشان تحكي اللي عندها

واتمنى ان بالشهاده دي تقدروا تقبضوا على اللي عمل كدا

= لو بنتك شافت الست اللي كانت بتسالها على نورهان، تقدر تتعرف عليها؟!

_ اكيد تقدر، لانها شافتها كذا مره مش مره واحده

...

عرضت عليها صوره حنان واكدت ان هي دي الست اللي سالتها على نورهان.. وبكده كان لازم نقبض على ممدوح والست حنان، ولكن انا فضلت ابدأ بممدوح.. اللي مكنتش متوقع أبداً ان هو اللي قتل، ولكن واضح ان المره دي حسبتها غلط

وفعلا طلع اذن من النيابة للمباحث بالقبض على ممدوح والست حنان

وبعد حوالي ساعتين كان اتقبض عليهم ووصلوا عندي قدام المكتب وطلبت من العسكري يدخل ممدوح ولكن المره دي لوحده من غير والده اللي كان جاي معاه برضو

_ ازيك يا ممدوح؟... معلش المره دي بقى اتقبض عليك مش استدعاء زي المره اللي فاتت

= هو انا عملت ايه؟!

_ مش عارف عملت ايه يا ممدوح؟!.. انت اللي قتلت نورهان زميلتك اللي كانت بتتنمر عليك، والمره دي في شاهد عليك، شاهد شافك وانت خارج من الحمام وايديك غرقانة دم

=انا دخلت الحمام بس هي كانت ميتة، انا قربت منها ولمست الدم بايدي، بس مقتلتهاش

_ يعني انت عاوز تفهمني، انك مدخلتش عليها لقيتها بتعيط بسبب اني اتعرضت للاعتداء واستغليت الموقف اللي هي فيه والكسرة اللي هي فيها.. وخلصت عليها

= لا... انا حكيت اللي حصل، انا مقتلتش نورهان

_ طيب وليه مقلتش الكلام ده اول مره، تعرف انت لو كنت حكيت الكلام ده اول مره قابلتك فيها كان ممكن اصدقك، ولكن دلوقتي انت متهم، وهتفضل متهم لحد ما يظهر دليل يبرأك من القضية، ده لو ظهر يعني

...

وطلبت من العسكري يخرجوا بره ويدخل الست حنان

_ ازيك يا ست حنان عامله ايه؟!

= مش كويسه يا باشا، انا مقبوض عليا ليه ممكن افهم؟.. منا قولت لحضرتك المره اللي فاتت ان الموضوع ميخصنيش أصلا

_ لا انا عاوزك تهدي خالص، الموضوع كبير... اصل شريكك في الجريمة اعترف يا ست حنان.. اعترف وحكى كل حاجة

= انا ما ليش شريك، ومش فاهمه حضرتك بتتكلم على ايه؟!

_ مش فاهمه انا بتكلم عن ايه؟!... طيب وبالنسبه لبصماتك الموجوده في مسرح الجريمة، ممكن افهم كانت بتعمل ايه هناك؟

اعتبريني مصدقك وانك بريئه من الموضوع ده كله.. بصماتك كانت بتعمل ايه في مسرح الجريمة؟

=انا قولت اللي عندي.. ومعنديش حاجة تانية أقولها

_ لا احنا كده نبعت لسالم شريكك في الجريمة ونعمل مواجهه لطيفة، ونشوف مين فيكم الصادق ومين الكذاب؟

...

وبعد خمس دقايق، كان واقف سالم قدام الست حنان اللي بدأت تتوتر وبان عليها الخوف وطلبت من سالم يحكي اللي حصل من البداية بس في الاول سألته

_ تعرف الست دي يا سالم مش كده؟!

= اعرفها يا باشا، دي الست حنان اللي طلبت مني اكسر عين البنت اللي اسمها نورهان واجيبها الارض ولحد دلوقتي لسه مسددتش الدين اللي عليها.. انا اخدت نص المبلغ بس

ردت الست حنان وقالت

= نص مبلغ ايه؟!.. وبنت مين؟.. الراجل ده كذاب انا اول مره اشوفه

...

التوتر زاد على حنان وبدأ سالم يحكي

_ بعد ما خرجت من السجن، اشتغلت في الموقف على توك توك كنت عاوز امشي بالحلال وقلت كفايه شمال، لحد ما في يوم قابلت الست حنان وركبت معايا، وانت عارف بقى يا باشا احنا بنحكي مع الزباين، وعرفت من كلامي معاها اني لسه خارج من السجن واني ليا في الشقاوه

فاول مره مطلبتش حاجه، بس عرفتني انها بتروح بيت اهلها كتير عشان تطمن على ابوها، واخدت رقمي عشان اروح اوصلها كل يوم وارجعها تاني وانها هتراضيني، قولت انها مصلحة في الجول

ووافقت، لحد ما في يوم طلبت مني اني ارجع للشمال تاني وعرضت عليا مبلغ كويس، في مقابل اني اعتدي على بنت في ثانوي، وعرفتني كل التفاصيل عنها.. وانها بتنزل الحمام بعد الفسحه وبتطول فيه

وادتني نص المبلغ والنص التاني بعد التنفيذ

ويومها روحت وزي ما قالت، روحت عند حمام المدرسة ولقيت السنيوره اللي اسمها نورهان واقفه قدام المرايه وبتلعب في شعرها، قفلت الباب وقبل ما تصرخ فتحت عليها المطوه وعملت اللي انا عاوزه وانا كاتم بوقها وبعد ما خلصت.. قعدت على الارض وفضلت تعيط وانا خرجت من المدرسة وقتها قابلت البواب اللي اسمه عاطف وفتحت عليه المطوه واخدت اللي معاه

كلمتها وقابلتني في مكان قريب من المدرسة وطلبت مني اوصلها على هناك، وبعدين امشي وهي هتيجي تديني فلوسي

وبعد ما دخلت المدرسة انا مشيت ومن ساعتها مشوفتش وشها غير دلوقتي

...

بصيت للست حنان اللي كان باين عليها التوتر وقولتلها

_ شاهد اثبات وشريك في الجريمة وبصمات موجوده، يعني الموضوع خلصان.. تتكلمي وتساعدي نفسك ولا تكملي في استهبالك وفي النهايه محدش الخسران غيرك

=مقدرتش اسيب حق بنتي، كل حاجة قالها سالم حصلت ولما وصلني المدرسة.. لقيت البواب اللي اسمه عاطف قاعد وكان بيدور على حاجه في الارض.. وعرفت انه بيدور على زرار اتقطع هنا من مدرس اسمه عاصم.. وهو بيدور لمحت الزرار مسكته وخبيته في هدومي وعملت نفسي اني ام طالبه في المدرسة فطلب مني اقعد هنا لحد ما يسقي الزرع.. استغليت انه دخل لجوه، ودخلت على الحمام لقيتها قاعده على الارض بتعيط وهدومها متقطعة.. قربت منها وقولتلها

_ ايه يا حلوة، الواد عمل عملته وشوفتك مكسورة وعينك في الارض بعد اللي عملتيه في بنتي يا تربية زبالة، وكل الناس هتعرف المصيبه اللي انتي فيها، ليكي عليا اني افضحك واعرف البلد كلها ان شرفك راح.

مسكتها من شعرها ونزلت ضرب فيها بالاقلام كنت زي المجنونة، وفي اللحظة دي مكنتش شايفة غير بنتي وانا واخداها في حضني وبعيط عليها.. ولقيت نفسي مسكتها من شعرها وبكل قوة بخبطها في المرايه مره واتنين وتلاتة مكنتش حاسة بنفسي

ولما شوفتها وهي غرقانة في دمها رميت الزرار وسط الازاز اللي متكسر.. وهربت واخدت حق بنتي، واديني اعترفت بكل حاجة وحكيت على اللي حصل

_ وبنتك رجعت؟!.. لما عملتي كده بنتك ارتاحت يعني، ابسطي عشان هتروحي لبنتك قريب، بس ازاي صحيح؟!.. بنتك انسانه بريئة ومكانها الجنه بعون الله، لكن اللي زيك مكانه النار.. حسبي الله ونعم الوكيل فيكي وفي امثالك

....

الاتنين اتحولوا للمحكمة.. والغريبة ان المحامي بتاعهم كان بيطلب التأجيل.. فرد القاضي اللي كان قرفان منهم وقال

_تأجيل ليه؟.. متهمين ومعترفين.. معترفين بجريمة قذرة ارتكبت في حق بنت صغيرة لسه في ثانوي.. وكل ده عشان ام الانتقام عمي عينيها وقلبها

واتحكم على الاتنين ومن اول جلسه بالاعدام.. والقاضي قال بعد الحكم ان لو بايده يعدم الاتنين وفي ميدان عام

وخلصت قضية كانت من اصعب القضايا اللي حققت فيها.. واللي اتعرفت باسم جثة المدرسة.

انتهت احداث الرواية نتمني أن تكون نالت اعجابكم وبانتظار آراءكم في التعليقات