تحميل رواية «جثة أرملة» PDF

واحده اسمها الست نجلاء عايشه مع ابنها الصغير في شقة لوحدهم بمحافظه المنيا مركز ملوي.. الشقه كانت في عمارة في منطقه مليانه سكان.. والست نجلاء كانت متعودة انها تفتح باب الشقه من اول ما تصحى من النوم لحد ما تيجي تنام بتتونس بالجيران اللي طالعه ونازله وعشان هي بتخاف من القعده لوحدها

وفي يوم يوصل بلاغ لرجال الشرطة من الجيران.. البلاغ كان واصل الصبح بدري من واحده اسمها أميرة كانت نازله شغلها ولقيت باب الشقه مفتوح والست نجلاء واقعه في ارضيه الصالة.. ولما دخلت الشقه وقربت لقيت الست نجلاء مقتولة اتفزعت طبعا من المنظر وبلغت الشرطة.. ورجال الشرطة لما وصلوا الشقة لاحظوا ان شباك المطبخ مفتوح وان الدولاب اللي في اوضه المجني عليها مفتوح وواضح انه اتسرقت منه حاجات ومن حسن الحظ ان الولد الصغير ما حصلهوش حاجة وتم تسليمه لعمته اللي كانت ساكنه قريب منها لحين انتهاء التحقيق.. ولكن الغريب ان البصمات لما اترفعت من الشقة اكتشفنا ان البصمات الموجوده على الدولاب غير اللي موجوده في مسرح الجريمة وده يحطنا قدام تفسيرين

يا اما دي ناس كانت داخله تسرق الشقة واتفاجئوا بالست نجلاء

يا اما اللي قتل غير اللي سرق

…

انا المقدم ابراهيم سعد.. دكتور الطب الشرعي لما فحص الجثة في مسرح الجريمة قال في التقرير المبدئي ان كان في مقاومه من المجني عليها وده عشان في قطع في الملابس الخاص بيها وفي خرابيش على الايد وكسر في الصباع الكبير من الايد اليمنى.. ولكن السبب في الوفاة هو اكثر من طعنه نافذه في منطقة البطن وسلاح الجريمة مش موجود

وبعد ما الدكتور خلص فحص الجثة اتنقلت للمشرحه عشان تبدأ عمليه التشريح واتقفلت الشقه واتشمعت بالشمع الاحمر

عشان نبدأ التحريات عن نجلاء حسين محروس.. امرت الرائد حسن عبد المجيد بعمل التحريات مع رجاله البحث الجنائي والتحريات دي تكون مستوفيه كل حاجة عاوز اعرف كل حاجه عن المجني عليها من يوم ما اتولدت لحد ما اتقتلت

ولكن في الوقت وصل التقرير الخاص بالبصمات ووصل بالسرعة دي لان في بصمه مسجله عندنا باسم غريب السيد، وغريب ده كان محبوس قبل كده في قضية سرقة وبصماته كانت موجوده على الدولاب اللي اتسرق.. طلع اذن من النيابة بالقبض عليه وطبعا كان مختفي وتعبنا على ما وصلنا لى

قبضنا عليه وبعد دقايق كان واقف قدامي في المكتب

_ يااااه… بقالى كتير مشوفتكش يا غريب، ده ده انا يا راجل قولت انك اعتزلت المهنة بس المره دي ايه الموضوع كبير يعني مش سرقه وبس، ده احنا بقينا بنعرف نقتل كمان

= انا مش فاهم حضرتك بتتكلم عن ايه؟!

_امممم.. شكلك هتتعبني يا غريب وانا مش حابب كده انا عاوزك تحكي اللي عندك وتقول كنت داخل البيت بغرض السرقة فلقيت الست في طريقك وخلصت عليها ولا انت اصلا في مشكله بينك وبين الست دي ودخلت وخلصت عليها

= ست مين يا باشا وخلصت على مين؟!.. انا من يوم ما خرجت من السجن وانا ماشي في حالي ما ليش علاقه بحد ده انا حتى بعدت عن كل المسجلين اللي كنت ماشي معاهم في الاول

_ ما انا عارف انك هتتعبني يا غريب، بص انا هجبلك من الاخر بصماتك على الدولاب اللي اتسرق في الشقة اللي اتقتلت فيها الست، بس بصماتك مش موجوده في مسرح الجريمة يعني لو اعترفت بالسرقة مش هتلبس الموضوع لكن لو فضلت سايق العوج هلبسك السرقة وجريمه القتل

= انا باشا هتكلم، بس قسما بالله انا مجيتش ناحيه الست، انا كنت توبت عن الطريق ده بس امي في المستشفى وتعبانه وعاوزين مني مبلغ كبير وانا مش معايا المبلغ ده، كنت مضطر ومن دردشتي مع كام واحد من المنطقة عرفت ان الست دي عايشه لوحدها مع ابنها وجوزها ميت وبتخاف من خيالها، بس على قلبها فلوس كتير.. وفكره انها بتسيب الباب مفتوح مش هتنفع لان ممكن حد من الجيران يشوفني، نطيت من على المواسير ومن حسن حظي شباك المطبخ كان مفتوح، دخلت منه وفتحت الدولاب وقلبته، بس وانا طالع المواسير اتخبطت خبطه جامده في رجلي وفكرت اني ليه ما طلعش من باب الشقة، خصوصا ان الشقه هاديه وواضح ان الست نايمه او في الحمام

لكن لما خرجت للصالة.. لقيت الست دي واقعه على الارض وغرقانه في دمها.. رجعت بسرعه على الشباك اللي دخلت منه ورجعت من نفس الطريق

_ يعني بعد ما خلصت السرقة.. اكتشفت الجريمة، تمام يا غريب

…

رميته في الحجز لحد ما يتعرض على النيابة، وتاني يوم ظهرت التحريات ودخل عليا الرائد حسن وفي ايده الملف واتكلم وقال

_ القضية دي كبيره يا باشا، الست نجلاء عايشه في العماره بقالها اربع سنين وجوزها الاستاذ شريف متوفي من ست شهور.. بس اتوفى في الامارات في حادثة هناك.. على حسب التحريات ان الست دي كانت على خلاف مع جوزها وانه قبل ما يسافر كان بيضربها كتير وكذا مره الجيران تتدخل ما بينهم وانها ما صدقت انه سافر

معاها منه طفل اسمه عماد

كل ده عادي.. ولكن اللي مش عادي ان الست نجلاء هربانه من اهلها في الصعيد من فترة كبيرة عشان كانوا رافضين شريف وهي اتجوزته غصب عنهم وهربت واخوها كان بيدور عليها في كل مكان وحالف ليخلص عليها.. ده غير ان عندها عداوه مع راجل قعيد في العماره اسمه الحاج صالح وعلى حسب التحريات ان هي السبب في عجز الحاج صالح اللي اتهمها في شرفها وقال للناس في العمارة انه بيشوف رجاله غريبه داخله عندها ولكن الكلام ما تصدقش لان الست نجلاء متعوده تسيب الباب مفتوح وهي لما سمعت الكلام ده حصلت بينهم مشادة على السلم وزقته من غير ما تقصد وده تسبب في عجز للراجل وبقى قاعد على كرسي وابنه اتوعدها انه هينتقم منها

المشكله بقى ان الكلام ده لما وصل للاستاذ شريف وهو في الغربة الكل كان فاكر انه هيدافع عن مراته ولكنه بعت مبلغ مالي كبير للحاج صالح واعتذار عن اللي بدر من مراته، وهنا الناس كانت مستغربه التصرف ده، يعني المفروض ينزل ويتخانق مع الحاج صالح وابنه عمرو

ولما وصل البلاغ للشرطة.. واتسال الحاج صالح عنها رفض يقول اي حاجه واكتفى بقول اذكروا محاسن موتاكم

= طيب يا حسن، هي منين في الصعيد بالظبط؟

_ من سوهاج

= طيب انا عايز تحريات عن عيلتها، عاوز اعرف اخوها اللي بيدور عليها ده وصل المنيا قبل الجريمة ب 24 ساعه او كان قريب من مسرح الجريمة ولا لا؟.. عاوز اعرف كان فين وقت وقوع الجريمة يا حسن.. عاوزين نبعت التحريات للنيابة ومتكونش ناقصة اي حاجة

…

كنت بتكلم مع حسن وفي الوقت

ده وصل تقرير الطب الشرعي وتقرير المعمل الجنائي..

تقرير المعمل الجنائي بيقول ان مفيش كسر في اي شباك او باب وده نظرا لان المجني عليها كانت بتسيب باب الشقه مفتوح يعني وارد القاتل يكون دخل من باب الشقة.. في بصمات على ترابيزه السفرة وعلى الانتريه وكمان في بقع دم صغيرة عند الستارة واضح ان المجني عليها كانت بتحاول تقرب من الشباك وتستنجد بحد والقاتل كتم بوقها وطعنها اول طعنه ودي اللي نتج عنها بقع الدم

ولكن تقرير الطب الشرعي كان في مفاجأة مش متوقعة خلتني طلبت من الرائد حسن ان لازم اتكلم مع الحاج صالح والمفاجأة دي.. ان الست نجلاء كانت حامل لكن…

عمر الطفل كان 3 شهور، وده معناه ان الست نجلاء كانت على علاقه بحد فعلاً، وكلام الحاج صالح عليها مظبوط، ولكن ازاي كانت على علاقه برجالة وهي كانت بتسيب باب الشقه مفتوح؟!

رجعت بصيت للرائد حسن وطلبت منه التحريات عن عيلتها واخوها اللي بيدور عليها.. وكمان يستدعي الحاج صالح للتحقيق معاه واخذ اقواله

كنت حاسس ان في حاجه مش مظبوطه في القضية، في حاجات لسه مستخبية وهتبان قدام مع التحقيقات.. وبعد كام ساعة

وصل قدامي الحاج صالح وابنه عمرو.. الحاج صالح كان قاعد على كرسي بعجل وابنه اللي بيحركه

طلبت من عمرو يستنى بره ويسيب الوالد معايا شوية

وبدأت الكلام معاه

_ ازيك يا حاج صالح عامل ايه؟!

= الحمد لله في نعمه يا باشا.. خير حضرتك عاوزني؟!

_ خير يا حاج صالح.. كنت عاوز اعرف ايه السبب في قعدتك على الكرسي دي، انت تعرضت لحادثه او حاجة؟

= البلد كلها عارفة ان الست نجلاء الله يرحمها هي اللي عملت فيا كده واظن ان حضرتك عارف والسؤال ده لي غرض تاني

_ طيب انا مش هلف وادور عليك يا حاج صالح، على حسب التحريات اللي عندنا انك اتهمت الست نجلاء في شرفها وقولت انها على علاقة برجالة وانك شوفت ده بعينك، والكلام لما وصل الست نجلاء حصلت بينكم مشكله على السلم وهي اللي زقتك وتسببت في قعدتك على الكرسي.. مظبوط الكلام؟!

= ايوه.. هو ده اللي حصل فعلاً

_ طيب انت فعلاً شوفت رجالة عندها في البيت؟

= يا باشا الست ماتت.. اذكروا محاسن موتاكم وانا قولت كده للباشا اللي جيه يوم ما الجريمه دي حصلت

_ حاج صالح.. الموضوع دلوقتي ما فيهوش رفاهية يعني باختصار انت لازم تتكلم، الست نجلاء طلعت حامل اثناء تشريح جثتها، والمفروض ان جوزها متوفي من ست شهور يعني هي فعلا كانت على علاقه بحد، والله اعلم اذا كان واحد ولا أكتر

= لا حول ولا قوه الا بالله، انا هقول اللي عندي وربنا يسامحني الست نجلاء صحيح كانت بتسيب الباب مفتوح من يوم ما جوزها سافر، عشان كانت بتخاف وبتتونس بالجيران ولكن كل يوم في وقت متأخر كنت بشوف راجل غريب داخل العماره وبيدخل عندها الشقه وبعد كده الباب بيتقفل، في البداية كنت فاكر ان ممكن يكونوا قرايبها ولكن كل يوم راجل شكل ده اللي خلاني اتكلمت، بس لو رجع بيا الزمن مكنتش هتكلم أبداً

…

بعد ما خلصت كلام مع الحاج صالح.. دردشت شويه مع عمرو ابنه اللي هدد الست نجلاء وتوعدها بسبب اللي عملته في ابوه ولكن قال انه الكلام ده كان في لحظه عصبية وان مش من الناس اللي بتاخد حقها بايديها، ووالده وقتها رفض ياخذ حقه بالقانون وتنازل عن حقه عشان هي وليه يعني.

مش عارف ليه كنت حاسس ان عمرو مخبي حاجة، وان كلامه مش راكب على بعضه

…

وبعد 48 ساعة دخل عليا الرائد حسن ومعاد تحريات اللي تخص عيله نجلاء واخوها منعم واتكلم وقال

_ التحريات دي يا فندم هتقلب مجرى القضيه خالص، زي ما حضرتك توقعت منعم اخو المجني عليها كان موجود في المنيا فعلاً قبل وقوع الجريمة، ولكن ما عرفناش نحدد هو كان فين في المنيا بالظبط.. بعد التواصل بمحطة القطر وباذن من النيابة اتفحصت كاميرات المحطة وفعلا منعم دخل المحطه وحجز تذكرة وبالمتابعة عرفنا انه نزل في المنيا ولكان بعدها اختفى عن الانظار ورجع تاني على سوهاج بعد وقوع الجريمة ب 24 ساعة

ولكن مش ده الكلام اللي هيقلب مجرى القضية.. اللي كنت عاوز اقوله لسيادتك ان نجلاء هربت زمان من اهلها مش عشان كانت عاوزه تتجوز شريف وبس، نجلاء غلطت مع شريف وحملت منه وهو ده السبب اللي مخلي اخوها منعم بيدور عليها وعاوز يقتلها بسببه، لان العادات والتقاليد في الصعيد خلت راس عيله نجلاء في الارض بسبب اللي عملته وسيرتهم في البلد كانت على كل لسان

…

بعد ما سمعت واطلعت على ملف التحريات، اتوصلنا مع مديرية الامن في سوهاج عشان يقبضوا على منعم وبعدها يتحول لينا ونبدأ تحقيق معاه وفعلا الاستجابه كانت سريعة وبعد حوالي 24 ساعة كان واقف قدامي منعم وبدأت كلام معاه

_ انت عارف انت هنا ليه يا منعم ولا لا؟!

= في الحقيقه لا، بس احب اعرف يا باشا؟

_ انت متهم بقتل اختك نجلاء.. وقبل ما تقول محصلش احنا اتاكدنا انك كنت في المنيا في اليوم اللي حصلت في الجريمة فلو هتنكر حاول تفسر سبب وجودك في المنيا في اليوم اللي اتقتلت فيه؟

= انا مش هنكر اني كنت بدور عليها عشان اقتلها، بعد ما حطت راسنا في الطين وغلطت مع اللي اسمه شريف وحملت منه، بس انا مقتلتهاش.. في واحد من البلد شافها في المنيا بتشتري حاجات وهو اللي بلغني انها في المنيا وعشان كده انا روحت ادور عليها، قلبت عليها البلد كلها ولكن ما لهاش اثر وبعد ما رجعت على البلد عرفت من الجرايد انها اتقتلت.. وانا لو قتلتها مش هخاف اقول وهعترف

_ بس انت قعدت في المنيا 24 ساعة، ومستحيل يعني كنت بتلف على رجليك اليوم كله اكيد قعدت في مكان، قولنا قعدت فين عشان نثبت صحه كلامك من عدمه

…

منعم كان قاعد في لوكندا وادانا عنوانها وبعد التحريات ثبت صحه كلامه.. عشان نرجع تاني لنقطة الصفر

عدى اسبوع واحنا في تحقيقات وتحريات ليل ونهار لحد ما حصلت حاجه غريبة كنت قاعد في مكتبي والعسكري بلغني ان في واحده عاوزاني بره ولما دخلت عرفت انها ياسمين اخت الاستاذ شريف قعدت قدامي وكانت منهاره من العياط وقالت كلام في منتهى الخطورة.. قالت انها اتواصلت مع الشغل اللي كان بيشتغل فيه اخوها في الامارات وبصفتها اخته كانت عايزه تستلم كل المستحقات الخاصه بي.. ولكن المفأجاه في رد الشركه هناك اللي قالت ان اخوها مجاش اصلا ولا اتعين في الشركة، وان كل اللي حصل اتصال ما بينهم وهو في مصر.. وكده في حاجه غلط اومال الجثه اللي اتدفنت دي جثه مين؟!

وازاي شريف كان بيتواصل مع مراته من هناك؟!.. والسؤال اللي كان في دماغي ان ممكن شريف يكون عايش وهو اللي قتل مراته؟!

اتواصلت مع النيابة عشان نطلع الجثة اللي المفروض هي جثه شريف ورغم انها كانت وصلت لمرحله صعبه من التحلل الا ان الطب الشرعي قال انه هيعرف ياخد منها العينة وهياخذ عينه من اخته وهيطابق ما بينهم.. وفضلت مستني التحليل ده بفارغ الصبر

ولكن في نفس الوقت كان عندي هاجس اني افتش شقه الست نجلاء بنفسي.. كنت حاسس اني هلاقي حاجة وفعلا اتحركنا انا والرائد حسن وفتشت الشقه حتة حتة.. ووقتها لقيت في عقد عرفي في الدولاب الخاص بالست نجلاء.. الصدمة مش

في العقد.. الصدمة كانت في اسم العريس واللي هيخلي القضيه دي تتعاد من اول وجديد عشان العريس ده يبقى..