تحميل رواية «جثة مروة» PDF

جريمة من اغرب الجرايم اللي حيرت رجال الشرطه في حل لغزها، جريمة تحصل في ليلة دخلة، بيوصل بلاغ لرجال الشرطة من اهل العريس والعروسة يوم الصباحية عن جريمة قتل حصلت في بيت من بيوت المركز، والمركز ده في محافظة في صعيد مصر بدون ذكر اسمها.. لما رجال الشرطة وصلت الشقة لقيوا في ارضيه الصاله العريس متعور في دماغه وواقع على الارض ولكن لسه عايش، والعروسه مطعونة بسكينة ولكن لسه فيها النفس ولما العريس يفوق من الاغماء اللي كان فيه بيكون ناسي كل حاجة حصلت.. عشان يبدأ التحقيق في القضية وتتكشف الحقايق

…

جثة_مروة

الجزء_الأول

انا المقدم حسن عبد النعيم، والنهارده بحقق في قضية من اكبر القضايا اللي حصلت في الصعيد، جريمة قتل حصلت في ليلة دخلة

او زي ما بيسميها ناس ليلة العمر… العروسه كان اسمها مروه والعريس كان اسمه سعيد

لما دخلنا الشقة، اتاكدنا ان مفيش حاجة ناقصه فيها، ده غير انها كانت مرتبة ومنظمة وده معناه ان اللي حاول خلص عليها وضرب سعيد على دماغه كان داخل بغرض القتل مش بغرض السرقة يعني في انتقام.. للاسف هدوم المجني عليها كان فيها كذا قطع اتنقلت العروسة للمستشفى ولكن كان لازم تتعرض على طبيب شرعي عشان نعرف اذا كانت اتعرضت لاعتداء ولا لا؟.. وبعد الفحص الدكتور قال:

كانت هتتعرض لمحاوله اعتداء ولكن اللي ظاهر ان في مقاومة منها وده واضح من القطع اللي في الهدوم والجروح السطحيه اللي موجوده على ايديها ولما القاتل معرفش ياخد منها اللي هو عاوزه حاول يخلص عليها

..

ولكن الدكتور شوقي الطبيب الشرعي قال حاجة ودي كانت اول طرف خيط في القضية، الدكتور قال واضح انها مش اول مرة تتجوز، ورغم اني متاكد انها متعرضتش لاي اعتداء ولكن العروسة دي مش بنت بنوت، والصدمه لما سألت اهلها وعرفت ان دي اول جوازه ليها.. مكنتش عارف اقول ايه للناس.. واتحجزت مروة في المستشفى تحت حراسه مشدده لحد ما تفوق وتقول مين اللي حاول يعمل فيها كده

واضطريت اصبر شويه لحد ما نعمل التحريات ونشوف مين الشخص اللي حاول يخلص على مروه.. رجعت على مكتبي وطلبت من الرائد ادم انه يعمل تحريات مفصله عن مروة، عاوز اعرف عنها كل حاجة.. وبعد 24 ساعة ظهرت التحريات الخاصه بمروة.. التحريات اللي كانت كارثه حرفيا.. واتكلم الرائد ادم وقال

_ شوف يا باشا، التحريات اللي قدام سيادتك بتخلي كذا حد مشتبه في القضية دي، البنت اسمها مروة عباس وابوها الله يرحمه كان واحد من الناس اللي ظروفهم مرتاحه كان بيجيب لعياله كل حاجة والعيشه كانت زي الفل

مروه ليها اخ واحد اسمه وليد، ووليد ده واحد من المشتبه فيهم والسبب هو الاستاذ عباس لانه ببساطه كتب كل ما يملك لبنته مروه بسبب ان وليد كان مدمن مخدرات ومش اي نوع من المخدرات وليد كان بيشم، وكان دايما بيطلب فلوس من ابوه عشان يروح يجيب بيها الهباب ده، ولكن ابوه لما اكتشف ان ابنه بيعمل كده دخله مصحه عشان يتعالج ولكن وليد قدر يهرب من هناك وكان بيبعت لاخته مسدجات على الواتساب كلها تهديد انها لو ما رجعتلهوش نصيبه من الورث هيخلص عليها، بس في نفس الوقت لو جيت حسبناها هنستبعده، اصله هنقول قتلها عشان الورث ولكن في اخ ممكن يعتدي على اخته، اظن ده مستحيل يحصل

= لو على شرب المخدرات يبقى مفيش حاجه اسمها مش ممكن تحصل، اللي بيشرب الحاجات دي بيكون مغيب وبيعمل تصرفات مش مسؤولة ولكن كمل عشان نعرف مين مشتبه فيه كمان؟

_ شريف وده يبقى اخو العريس سعيد، وعلى حسب التحريات اكتشفنا انه كان في علاقة محدش يعرف مداها وصل لحد فين ما بين مروة وشريف، قبل ما سعيد يتقدملها، وطبعا السؤال اللي جه على بال سيادتك دلوقتي، هل سعيد كان عارف بالعلاقه اللي ما بين شريف ومروة؟!

في البداية مكنش عارف، ولكن لما عرف كمل في الموضوع عادي وكان الموضوع مفيهوش اي حاجة، وده اللي خلى شريف يدخل في حاله اكتئاب خصوصا كمان ان البنت باعته ووافقت على شريف

= اعوذ بالله، هو في ناس كده ازاي يسمح لنفسه انه يتجوز البنت اللي بيحبها اخوه، ده اكيد شخص مش طبيعي ومريض، وعلى فكره شريف هيكون من اكتر الناس المشتبه فيهم، والتركيز عليه يكون اكتر

_ بلاش استعجال يا باشا لما تعرف المشتبه رقم 3، على حسب التحريات مروه كانت بتشتغل مدرسة في حضانة أطفال بيملكها واحد من الناس التقيله والاغنيه واسمه صفوان، ورغم ان عنده حضانه والمفروض راجل خير، الا انه كان بيشرب وسكري وفي يوم حب يقرب من مروه فصدته ورفضت اسلوب ولما حاول يتهجم عليها، ضربته بحاجه في وشه وللاسف عينه راحت وبقت عاهه مستديمه، ومن حسن حظها ان كل المدرسين اللي معاها في الحضانة، شهدوا في صفها هي وقالوا انه راجل مش محترم وانه حاول مع كذا واحده قبل كده، وطلعت من القضيه دي دفاعا عن النفس.. ولكن صفوان هددها انه مش هيسيبها وهيأذيها

….

قفلت ملف التحريات وانا مستبعد تماماً اخوها من الصورة بسبب واقعه الاعتداء، وشايف ان اقرب واحد وان ممكن يكون عمل كده.. هو شريف اخو سعيد، وهو عنده اكبر دافع للانتقام منها ومنه ولكن عشان نتاكد من ده، كان لازم اتكلم مع الاستاذ سعيد.. العريس اللي مراته اتعرضت لمحاوله القتل

…

وفعلا بعد ما فاق وقدر يتوازن اتكلمت معاه وكان بدأ يفتكر، وقال ان القاتل كان ملثم ومعرفش يشوف وشه وسألته

_ طيب مش بتشك في اخوك شريف ان ممكن يكون هو اللي عملها؟!

= واخويا شريف هيعمل حاجه زي كده ليه؟!

_ يا راجل، يعني مش عارف؟!.. على حسب التحريات ان كان في علاقه ما بين مراتك واخوك قبل ما تتجوزها وانت عرفت بالعلاقه دي، والغريبة انك كملت في الجوازه.. مش شايف ان دي حاجة غريبه شوية؟

= هي مش عاوزاه، انا اتكلمت معاها وقالت ان هو كان بيلعب بيها، اما انا فدخلت البيت من بابه واظن اني معملتش حاجه غلط، ولو على موضوع الاتهام.. فرغم كل حاجه اخويا ميعملش كده

_ طيب انت كنت على علم ان مراتك مش بنت بنوت؟!

= حضرتك بتقول ايه؟!.. انت كده بتتكلم في شرفي وعرضي

_ اهدي يا استاذ سعيد، مرات حضرتك اتكشف عليها في الطب الشرعي عشان كنا شاكين انها تعرضت لمحاوله اعتداء، والدكتور قال لا، ولكن قال ان مراتك مش بنت بنوت وده اللي خلاني اتواصل مع اهلها واتاكدت انها متجوزتش قبل كده

….

سعيد اتعصب من كلامي، وصوته بدأ يعلى، فطلبت من الرائد ادم ياخده بره شويه لحد ما نشوف هنعمل ايه، وفي الوقت ده وصل رساله من الدكتور المسؤول عن حاله مروة

في المستشفى.. واسمه الدكتور صفوت الدكتور كان صوته مهزوز وقال

ان في حد بيبعتله رسايل وبيطلب منه يخلص على مروة في مقابل مبلغ كبير من المال، ولما طلبت منه الرقم قال ان الرقم دولي

ولكن الشخص اللي بيبعتله عارف ظروفه، وعرفت ان الدكتور ان بنته بتعاني من كانسر وان الدكتور مكتئب بسبب الموضوع ده وان الشخص اللي بيبعتله الرسايل ده بيساومه

فطلبت منه ميتحركش من المستشفى وانا جاي، اخدت عربيتي وطلعت على المستشفى لما وصلت الشارع الدنيا كانت مقلوبة كان في حادثه عربية قدام المستشفى والناس كانت بتطلب دكتور عشان يجي بسرعه.. وفي اللحظه دي لمحت الدكتور صفوت نازل

عشان يشوف المصابين.. وبمجرد ما خرج عدت عربيه من غير نمر بمنتهى السرعة ولكن فجأة..

الدكتور اخد باله وحاول يتفادى العربيه ونط من قدامها، نزل على الارض وايده مع الاسف اتكسرت، حاولت الحق العربيه اللي جريت باقصى سرعة، ولكن للاسف السواق المجنون اللي فيها كان سايق بسرعه جنونية، وواضح انه شخص متمرس في السواقة ومش سهله خالص اني اقدر امسكه بسهولة

اتنقل الشخص اللي كان عامل حادثه والدكتور صفوت للمستشفى جوه، وطبعا اتجبست ايد الدكتور صفوت وبعد ما اتجبس ارتاح في اوضة ودخلت عشان اطمن عليه

_ حمد لله على السلامه يا دكتور، الحمد لله قدر ولطف

= الله يسلمك يا باشا، الموضوع ده مش صدفة انا حاسس ان اللي عمل الحادثة دي، كان قاصد يخلص عليا واكيد عرف ان انا بلغتكم

_ انا كمان متفق معاك في وجهة النظر دي، بس ده معناه ان في حد من جوه عندنا بيبلغوا بالاخبار ودي حاجه في حد ذاتها كارثة

= التليفون اهو انا فتحته لحضرتك وكنت واخد الرسايل كلها اسكرين شوت، لاني لاحظت قبل ما انزل من المستشفى ان الشخص ده بيمسح كل الرسايل

….

مسكت التليفون من الدكتور صفوت، وزي ما قال الرقم اللي باعت الرسايل دي رقم دولي.. طلعت تليفوني وكتبته وبعته لمباحث الاتصالات ولكن انا عارف النتيجة في النهاية، حيطه سد ومش هنوصل لاي حاجة عشان الارقام دي بتكون ارقام فيك وبتشتغل تبع ابلكيشن لمدة بسيطة وبعدها بتتقفل

الرسايل اللي كانت على التليفون كلها كانت فيها طلب واحد من الدكتور صفوت انه يخلص على مروة في مقابل مليون جنية، وبيفكروا ببنته مريضه الكانسر، وانه لو نفذ هيعرف يعالجها وانه لو احتاج فلوس تاني الشخص ده هيبعتله

شخص مرعوب ان مروة تقوم وتحكي على اللي حصل.. شكرت الدكتور صفوت واخدت الاسكرينات وكل حاجة تخص الموضوع وقولتله انه لو حصل اي مستجدات يكلمني

…

ورجعت على مكتبي من تاني.. كان لسه الاستاذ سعيد منتظرني قدام الباب، وكان باين عليه الهدوء طلبت منه يدخل المكتب عشان نتكلم.. واول ما قعد قدامي اتكلم وقال

_ انا اسف يا باشا، اعذرني بس الكلام اللي حضرتك قلتوا مش سهل خالص، عارف يعني ايه تكتشف ان مراتك مش بنت، تخيل انا لو كنت اكتشفت ده كنت عملت ايه؟

تحس ان الحادثه اللي حصلت دي، حصلت مخصوص عشان تمنعني من جريمة قتل كنت هرتكبها لو انا اللي اكتشفت ده بنفسي

= استاذ سعيد انا مقدر، بس انا عاوزك تساعدني عشان نوصل للي عمل كده، انت اللي فتحت الباب واتخانقت مع القاتل وقولت انه كان ملثم.. حاول تفتكر اي حاجة، كان طويل ولا قصير تخين ولا رفيع.. عينيه اللي كانت ظاهره من ورا الحاجه اللي كان لابسها على وشه واسعه ولا ضيقه لونها ايه اي حاجه افتكر

_ انا اول ما فتحت الباب، لقيت في حاجه اترشت في وشي، دوخت شوية وبعدها لقيت الخبطة على دماغي محستش باي حاجه ووقعت من طولي

= طيب هسألك سؤال تاني، وحاول تكون هادي.. تفتكر اخوك هو اللي ممكن يكون عمل كده، بما انه هي كانت تعرفه وعلى علاقه بيه قبلك؟

_ بعد اذنك يا باشا لما توصل حضرتك لحاجه ابقى بلغني، بس دي اعراض ناس وحضرتك مصمم تكلمني في حاجه بتعصبني انا مش متخيل اني كنت هلبس حاجه زي كده ولو شكيت في اخويا لحظه ان هو اللي عملها، صدقني كنت هتيجي هتلاقيني متهم بقتله دلوقتي.. بس انا عارف ان اخويا جبان وميعملهاش

….

خلصت كلام مع الاستاذ سعيد وطلبت منه يروح ولو وصلنا لحاجه هنكلمه، وفي الوقت ده وصلني تليفون من المستشفى وكان من المدير نفسه بيشتكي من العسكري اللي قاعد حراسه على باب اوضه المريضة مروة وبيقول انه بيشرب سجاير وده ممنوع في المستشفى، وانه مش بيسمع كلام حد

بصراحة مكنتش ناقصه خالص.. عشان كده طلبت من الرائد ادم يروح على المستشفى ويتكلم مع العسكري ده وينبه عليه انه ممنوع يدخن قدام الباب وانه لو عملها تاني حسابه هيكون معايا

وفي نفس الوقت طلبت استدعاء شريف اخو سعيد وواحد من المشتبه فيهم

وبعد اقل من ساعة كان واقف قدامي

_ ازيك يا شريف اخبارك ايه؟!

= الحمد لله يا باشا في نعمة

_ ايه الجرح اللي في ايدك ده انت متعور؟!

= اه، ما انا شغال في جزاره يا باشا، وايدي اتعورت امبارح وانا بقطع اللحمة

_ طيب انت عارف احنا مستدعينك ليه؟!

= اكيد عشان الحادثه اللي حصلت، بس انا معرفش حاجة

_ مش بس عشان الحادثة، على حسب التحريات اللي عندنا انك كنت على علاقه بمروة مرات اخوك قبل ما اخوك يفكر يتجوزها وانكم كنتوا بتحبوا بعض.. ممكن اعرف العلاقه ما بينكم وصلت لحد فين؟

= اول حاجه يا باشا دي كانت قصه قديمة وانتهت، ودلوقتي مروة هي مرات اخويا وبس وميربطنيش بيها اي حاجة، وانا اسف اني مفهمتش بس يعني ايه العلاقه وصلت لحد فين؟!

_ مدام مروة اتعرضت على طبيب شرعي لانه كان فيه كذا قطع في هدومها واثار ضرب على جسمها ودكتور الطب الشرعي قال ان مروة مش بنت واكيد كانت متجوزه قبل كده، واخوك لسه مدخلش عليها

= حضرتك بتلمح لأيه؟!.. انا مستحيل اعمل كده لو حضرتك فعلا عملت تحريات، كنت عرفت ان راجل محترم ومش بسيب فرض وبخاف ربنا ومستحيل اوقع نفسي في خطيئه زي دي

_ طيب اهدى يا استاذ شريف، انا مقدر عصبيتك جداً، ولكن احنا بنحقق في محاوله قتل مرات اخوك اللي انت كنت على علاقه بيها قبل الجواز، فطبيعي اننا نعرف كل حاجة كانت بتجمعك بيها ده لو يعني انت عايز تطلع من الموضوع لانك ببساطه مشتبه فيه

= انا قولت اللي عندي، ومعنديش كلام تاني اقوله

…

سبت شريف يمشي.. وفي الوقت ده ظهر تقرير المعمل الجنائي والبصمات.. من ناحيه تقرير البصمات فمفيش بصمات في المكان غير بصمات سعيد ومروة ولكن في تقرير المعمل الجنائي في نقطة كانت في منتهى الاهميه وهي بقع الدم اللي كانت موجوده في الارضيه واللي ناتجه عن طعن مروة.. التحاليل اثبتت ان في دم كان عند جسم مروه اللي مرمي على الارض ومكنش دمها هي العينه كانت غير متطابقة ووقتها افتكرت الجرح اللي كان في ايد شريف واللي قال انه اتعوره في محل الجزارة ودي مستحيل تكون صدفة من الواضح انه اثناء محاوله الاعتداء على العروسة مروة قدرت تعور القاتل وينزل منه دم على الارض وبكده احنا بنقرب

ولكن في اللحظه دي يوصل تليفون من المستشفى على ان مروة فاقت ومنهاره من العياط وانها عارفه مين اللي عمل كده

اتحركت بسرعه على المستشفى وهناك كان اهل مروة وصلوا ولكن العسكري كان بيمنعهم من الدخول لحد ما اوصل، بس اهل مروه كان عاوزين يدخلوا مش عشان يطمنوا عليها، للاسف وصلهم خبر بموضوع

بنتهم وانها مش بنت بنوت، وفي الصعيد ده بيوصل للقتل وصلت وكنت ببعد الناس عن الباب وطلبت من الرائد ادم يتدخل ويبعد الناس لحد ما اسمع اقوال مروة.. واول ما دخلت اتصدمت لما لقيت مروة مقتولة.. خرجت من الباب وانا مذهول ومسكت العسكري من هدومه كنت هتجنن واعرف مين اللي دخل وعمل كده.. ومن غير تفكير جريت على مدير المستشفى عشان اراجع الكاميرات واشوف مين اللي قدر يدخل اوضه مروة وازاي العسكري ممنعهوش، مدير المستشفى بدأ يراجع معايا التسجيلات ولكن اللي شوفته كان مفاجأة مش متوقعة لاني شوفت…