المجني عليها كانت حامل، بس حامل ازاي؟.. والدكتور عزت مش بيخلف
رد عليا الرائد حسن وقال
_ هو في ايه يا باشا؟!.. حضرتك بتكلم نفسك؟!
= مدام صابرين كانت حامل يا حسن والتحريات بتقول انه الدكتور عزت مش بيخلف
_ طيب وده معناه ايه؟!.. ان الراجل كان صح لما كان بيشك في سلوك مراته، معنى كده انها كانت بتخونه يعني ولا ايه؟
= مش عارف يا حسن انا مخي هينفجر، لكن احنا اللي علينا ان احنا هنبعت التحريات للنيابة، وهما يشوفوا هيستدعوا مين؟.. والتقرير لما يطلع اكيد النيابة هتستدعي دكتور عزت للتحقيق معاه
…
بعتنا التحريات للنيابة عشان تبدأ تحقيق مع المتهمين، او المشتبه فيهم بمعنى اصح، وبصراحة مرضتش ابلغ وكيل النيابة بكلام دكتور الطب الشرعي، وقولت استنى لحد ما يصدر التقرير واللي ممكن حاجات تانيه لسه مستخبية
*******
بعد انتظار 24 ساعة وصلتني التحريات من المباحث، ولما فتحت الملف وابتديت اقرأ.. عرفت اني قدام 3 مشتبه فيهم
جوزها الدكتور عزت واللي كان شكاك بطبعه، وكمان موضوع الخلفه اللي اكيد اثر في نفسيا وخلاه بيتعامل بالاسلوب ده معاها
اخوها كامل واللي بجانب موضوع الميراث الا ان اخته قتلت بنته بالخطأ.. واللي خرجها من الموضوع هو تقرير الدكتور النفسي اللي اكد انها مش في وعيها وبتتعالج من الإكتئاب
طليقها طاهر اللي على حسب التحريات هي نصبت عليه في فلوسه، والراجل اتجنن وكان في المستشفى بيتعالج، ولسه خارج من فتره قريبة ومن ساعتها وهو مختفي
وعرفت من مكالمه مع المباحث ان الدكتور عزت اتعرض لغيبوبة سكر وهو سايق العربية، وواحد ابن حلال في الطريق.. نقلوا على المستشفى.. ولكن بعد التواصل مع المستشفى عرفنا ان الدكتور عزت بقي كويس.. واكيد طبعاً عرف الخبر وعشان كده قررت استدعيه عشان ابدأ تحقيق معاه كزوج للمجني عليها وكمشتبه فيه حسب التحريات.. وبمجرد ما وصله الاستدعاء متأخرش وفي خلال ساعة كان قدامي في المكتب
_ دكتور عزت البقاء لله.. والف سلامه على حضرتك عرفت انك لسه فايق من غيبوبة سكر
= سبحان من له الدوام.. متشكر لحضرتك جداً، انا يا دوب فوقت من غيبوبة السكر وعرفت الخبر
_ طيب انا عاوز اقول لحضرتك حاجه، انت هنا مش بصفتك بس زوج المجني عليها، انت للاسف الشديد مشتبه فيك يا دكتور عزت وانا اسف اني بقول الكلام ده لدكتور كبير زيك، ولكن التحريات هي اللي بتثبت انك كنت على خلاف مع زوجة حضرتك مدام صابرين
= انا متهم؟!.. حضرتك مش عارف انا مين؟… انا دكتور عزت نصار من اكبر الدكاتره في البلد، راجل ليا اسمي وسمعتي.. ازاي حضرتك تتهمني بحاجة زي دي؟
_ دكتور عزت.. مكانة حضرتك فوق دماغي، ولكن القانون ميعرفش حضرتك ولا حضرتي، انا عندي تحريات.. والتحريات دي بتقول انك كنت على خلاف مع مراتك وكنت بتشك في سلوكها وكانت بتوصل للاهانه ومد الايد والموضوع زاد عن حده خصوصا لما عرفت انك عندك مشكله في الخلفة وانك مستحيل تكون اب
= التحريات دي غلط، انا فعلا عندي مشكله في موضوع الخلفة بس عادي يعني الدكتور قال ان انا ممكن اتعالج، ولكن المشاكل اللي بيني وبين مراتي.. كانت مشاكل عادية زي اللي بتحصل ما بين اي واحد ومراته
…
كنت لسه بتكلم مع الدكتور عزت وكان زعلان من انه ضمن المشتبه فيهم في القضية، وفي الوقت ده وصل تقرير الطب الشرعي.. بصيت في التقرير واتصدمت ورجعت بصيت لدكتور عزت وقولتله
_ ممكن تفتكر يا دكتور، لما جتلك غيبوبة السكر كنت في اي شارع بالظبط
= الشارع اللي ورا المستشفى على طول، هو حضرتك لسه بتلمح ان انا اللي عملت كده، حضرتك انا كنت في غيبوبه سكر وكنت تعبان امبارح اليوم كله ومن الساعة 7 بليل موجود في المستشفى
_ اللي قدامي ده تقرير الطب الشرعي..ومش عارف اجبهالك ازاي بس مدام صابرين كانت حامل قبل ما تتقتل، وكانت واخده حبوب كتير عشان تسقط الحمل ده او بمعنى اصح تنتحر، بس في واحد خلص عليها قبل ما تموت
= كانت حامل ازاي؟!.. ايه اللي حضرتك بتقوله ده؟
_ مش انا اللي بقول يا دكتور، تقرير الطب الشرعي هو اللي بيقول
…
الراجل بدأ يتعب، وكان بياخد نفسه بالعافية وعشان كده طلبت منه يهدى وخليت العسكري طلعه بره عشان يعرف ياخد نفسه
وبعد ما هدي افرجت عنه بضمان محل اقامته، وقولتله انه لو ظهر جديد هنستدعيه
واتواصلت مع المباحث وطلبت منهم اني عاوز اعرف مين الشخص اللي وصل الدكتور عزت للمستشفى، واكيد الشخص ده بياناته هتكون موجودة في المستشفى
وبعدها قررت استدعي المتهم التاني.. كامل اخو المجني عليها من الاب.. والراجل ده كمان متاخرش وكان موجود بعد اقل من ساعتين وبدأت تحقيق معاه
_ استاذ كامل ما قولك فيما هو منسوب اليك.. انك قتلت اختك مدام صابرين
=محصلش، انا سمعت الخبر زيي زي الناس، وهكذب على حضرتك لو قولت اني زعلت او الخبر اثر فيا، انا صابرين بالنسبالى ماتت من يوم ما قتلت بنتي، وانا مش مسامحها حتى بعد ما ماتت مش مسامحها
_ما هو ده مربط الفرس يا كامل، انت عندك دافع قوي عشان تقتل مدام صابرين، عشان تنتقم لبنتك اللي مدام صابرين كانت عارفه انها عندها حساسيه من الشطة ورغم كده حطت الشطة في الاكل وبكمية كبيرة، وعلى حسب التحريات انك اتهجمت عليها وحاولت تقتلها وقتها، ولكن جوزها الدكتور عزت هو اللي منعك
= وقتها ده حصل فعلاً، ولكن اعذرني انا كانت حالتي صعبه.. تخيل تسمع ان بنتك ماتت بسبب ضيق تنفس حصلها عشان حساسيه الشطه اللي العيله كلها عارفه ان بنتي بتعاني منها، واولهم صابرين
فتقوم تحط الشطة وهي متعمدة انها تأذي بنتي
_ وطبعا تقرير الدكتور النفسي بتاع اختك، طلعها من الموضوع لانها بتتعالج من الاكتئاب والادويه بتأثر عليها بالسلب وبتخليها غير مسؤولة عن تصرفاتها.. وده خلاك تفكر تاخد حقك بايدك وخلصت عليها
=محصلش، والله العظيم ما حصل
….
وبعد التحقيق معاه عرف يثبت انه كان عند واحد صاحبه في نفس توقيت وقوع الجريمة.. وكده مش قدامنا غير التحقيق مع الشخص التالت طاهر طليق المجني عليها واللي كان بيتعالج في مستشفى العباسية وخرج قريب، ولكن المشكلة ان العنوان اللي موجود معانا، واللي قدرت المباحث تتوصل اليه، عنوان قديم وطاهر مش موجود فيه والبيت مقفول
ولكن لازم نلاقيه لان عنده هو كمان دافع قوي للقتل واختفاءه ده مريب.
في الوقت ده اتواصلت معايا المباحث، وعرفت ان الشخص اللي نقل الدكتور عزت للمستشفى اسمه ابراهيم عيد وكان سايب بياناته.. عملتله إستدعاء
ولكن في نفس الوقت بتوصل اشاره عن جثة مشوهه ومرمية على جنب طريق صحراوي، ووقتها كان لازم اتحرك عشان نشوف دي جثه مين؟.. وصلت هناك وكانت الشرطه وصلت ولقيت العسكري بيديني محفظه كانت جنب المجني عليه.. فتحت المحفظه وطلعت البطاقه وكانت الصدمة…